1. Nama asai ati nuan pasal pengerindu Petara?

RASUL John nulis, ‘Petara endang pengerindu.’ (1 Jhn. 4:8) Kitai nemu Petara nya Pun pengidup. Tang ayat tu ngingatka kitai, pengerindu datai ari Jehovah. Iya rinduka kitai! Pengerindu Iya ngasuh kitai berasai likun, gaga sereta puas.

2. Nitihka Matthew 22:37-40, nama dua iti pesan ti pemadu besai, lalu nama kebuah kitai engka tusah deka nitihka pesan ti kedua?

² Orang Kristian enda ulih milih sekalika sida deka ngayanka pengerindu tauka enda, laban nya siti pesan. (Bacha Matthew 22:37-40.) Lebuh kitai ngelala Jehovah enggau manah, kitai engka senang deka nitihka pesan ti keterubah. Tu ketegal Jehovah nya sempurna. Iya ibuhka kitai sereta nelap enggau kitai. Tang kitai engka tusah deka nitihka pesan ti kedua. Nama kebuah? Laban bala menyadi Kristian kitai enda sempurna. Kekadang, sida engka nyebut utai tauka ngereja utai ti ngemediska ati kitai. Jehovah nemu kitai deka tusah nitihka pesan ti kedua nya. Nya alai, Iya ngena sekeda penulis Bup Kudus meri jaku lalau pasal kebuah kitai patut ngayanka pengerindu ngagai pangan diri sereta chara ngereja nya. Seiku ari penulis nya John.—1 Jhn. 3:11, 12.

3. Nama dipadah John pasal pengerindu?

 ³ Ba bup ke ditulis John, iya seruran ngingatka orang Kristian ngayanka pengerindu. Lebuh iya nulis pasal cherita pengidup Jesus, John ngena leka jaku “rinduka” enggau “pengerindu” lebih agi ari Matthew, Mark enggau Luke. John nyauka beumur seratus taun lebuh iya nulis bup John enggau tiga iti surat iya. Utai ke ditulis iya nunjukka, orang Kristian patut ngereja utai bepelasarka pengerindu. (1 Jhn. 4:10, 11) Taja pia, John mega patut belajar ngayanka pengerindu.

4. Kati John seruran ngayanka pengerindu ngagai orang bukai?

⁴ Lebuh John agi biak, iya enda seruran ngayanka pengerindu. Bisi sekali lebuh Jesus enggau bala murid iya bejalai ngagai Jerusalem nengah Samaria, bisi siti genturung pendiau ba Samaria enggai nerima sida. Nama digaga John? Iya nanya Jesus sekalika sida patut ngangauka api nurun ari langit lalu nganguska genturung pendiau nya! (Luk. 9:52-56) Ba maya bukai, John enda ngayanka pengerindu ngagai bala rasul ke bukai. Iya enggau menyadi iya James, ngasuh indai seduai iya nanya Jesus sekalika ulih meri penuduk ti tinggi ngagai seduai ba Perintah Petara. Lebuh bala rasul ke bukai ninga nya, sida balat pedis ati! (Mat. 20:20, 21, 24) Taja pan John ngereja semua penyalah tu, Jesus agi rinduka iya.—Jhn. 21:7.

5. Nama deka dikerandauka kitai ba artikel tu?

⁵ Ba artikel tu, kitai deka berandauka teladan John sereta sekeda utai ke ditulis iya pasal pengerindu. Kitai mega deka belajar chara ngayanka pengerindu ngagai bala menyadi Kristian. Lalu kitai deka meda baka ni tuai bilik ulih nunjukka iya amat rinduka ruang bilik iya.

6. Baka ni Jehovah nunjukka Iya rinduka kitai?

⁶ Kitai engka ngumbai pengerindu nya semina diayan ngena jaku ti nelap. Tang kena ngayanka pengerindu ti bendar, kitai enda tau enda nunjukka nya ari pengawa. (Bandingka James 2:17, 26.) Ambika chunto, Jehovah rinduka kitai. (1 Jhn. 4:19) Lalu Iya madahka nya dalam Bup Kudus. (Mas. 25:10; Rom. 8:38, 39) Taja pia, kitai mega nemu Petara rinduka kitai ari utai ke digaga Iya. John nulis: ‘Baka tu ku jalai pengerindu Petara udah dipandangka ngagai kitai: Iya udah ngirumka Anak Tunggal  Iya ngagai dunya, ngambika kitai tau idup ulih iya.’ (1 Jhn. 4:9) Jehovah ngemendarka Anak Iya ti dikesayau merinsa sereta mati ke kitai. (Jhn. 3:16) Endaka tu nunjukka Jehovah amat rinduka kitai?

7. Baka ni Jesus nunjukka iya rinduka kitai?

⁷ Jesus madahka bala murid iya, iya rinduka sida. (Jhn. 13:1; 15:15) Iya ngayanka pengerindu nya ukai semina nengah jaku, tang ari utai ke digaga iya. Ku Jesus, “Nadai orang ngembuan pengerindu ti besai agi ari tu, datai ke iya nyerahka nyawa diri ke pangan iya.” (Jhn. 15:13) Lebuh kitai belemati utai ke udah digaga Jehovah enggau Jesus ke kitai, baka ni nya meransang kitai?

8. Nitihka 1 John 3:18, nama utai ke enda tau enda dikereja kitai?

⁸ Kitai ngayanka diri rinduka Jehovah enggau Jesus lebuh kitai ngasika seduai iya. (Jhn. 14:15; 1 Jhn. 5:3) Lalu Jesus ngasuh kitai rinduka pangan diri. (Jhn. 13:34, 35) Kitai ukai semina madahka diri rinduka bala menyadi Kristian, tang kitai mega ngayanka nya ari pengawa kitai. (Bacha 1 John 3:18.) Baka ni kitai ngereja nya?

9. Nama digaga John ketegal pengerindu?

⁹ John ulih milih gawa enggau apai iya ba pengawa dagang berikan sida. Tang iya milih ngena pengidup iya ngajar orang pasal Jehovah enggau Jesus. Taja pia, pengidup nya enda senang. Iya diperinsa. Lalu lebuh iya udah tuai, iya dibuai ngagai pulau Patmos. (SKR. 3:1; 4:1-3; 5:18; Pem. 1:9) Indah lebuh iya dijil ketegal nginjil pasal Jesus, iya agi berundingka bala menyadi. Ambika chunto, lebuh iya ba pulau Patmos, iya nulis bup Pemandang lalu nganjung nya ngagai eklisia ngambika sida nemu “utai ti enda tau enda nyadi enda lama da agi.” (Pem. 1:1) Lalu pengudah iya dilepaska ari pulau Patmos, John nulis bup Injil pasal pengidup Jesus enggau pengawa nginjil iya. John mega nulis tiga iti surat kena meransang sereta ngeringka bala menyadi Kristian. Baka ni nuan ulih nunda John ke sanggup ngelengkaka pengingin diri empu?

10. Baka ni nuan ulih nunjukka diri rinduka orang?

¹⁰ Chara nuan ngena pengidup deka nunjukka enti nuan bisi pengerindu. Dunya Sitan deka nuan ngena awak enggau pengering ba diri empu, baka ngulihka duit tauka nyadi tebilang. Tang orang Kristian ba serata dunya sanggup ngelengkaka pengingin diri empu ngambika sida ulih nginjil pasal berita manah lalu nulung orang semak enggau Jehovah. Sekeda indah ulih nginjil sereta ngajar penuh jam.

11. Baka ni orang Kristian ke tetap ati ngayanka sida rinduka Jehovah sereta bala menyadi Kristian?

¹¹ Mayuh menyadi Kristian patut gawa penuh jam kena ngintu diri empu sereta diri sebilik. Taja pia, sida enggau tetap ati nyukung gerempung Petara enggau nama-nama chara. Ambika chunto, sekeda ulih meri bantu lebuh penusah ngenyit nyadi tauka nulung ba pengawa nirika bengunan teokratik. Lalu semua orang bisi peluang meri duit pemeri kena nyukung pengawa Jehovah ba serata dunya. Sida ngereja semua utai tu ketegal sida rinduka Jehovah sereta orang bukai. Lalu ninting minggu, kitai bisi peluang ngayanka pengerindu ngagai bala menyadi Kristian. Baka ni chara iya? Taja pan kitai engka berasai lelak, kitai agi datai begempuru. Taja pan kitai engka berasai kesal, kitai agi meri saut. Lalu taja pan kitai bisi penanggul diri empu, kitai  meransang bala menyadi Kristian sebedau tauka pengudah gempuru. (Heb. 10:24, 25) Kitai amat beterima kasih enggau pengawa ke udah digaga bala menyadi Kristian kitai!

12. Nama agi chara John nunjukka iya rinduka bala menyadi?

¹² John ngayanka iya rinduka bala menyadi Kristian lebuh iya ukai semina muji sida tang mega meri sida jaku lalau. Ambika chunto, ba surat iya, John muji pengarap sereta pengawa manah ke digaga bala menyadi. Tang iya mega meri sida jaku lalau bekaul enggau dosa. (1 Jhn. 1:8–2:1, 13, 14) Pia mega, kitai ulih muji pengawa manah ke digaga bala menyadi kitai. Tang enti bisi menyadi ke berengkah ngembuan ulah ti enda manah tauka ngereja pengawa ti ulih ngerusak kaul iya enggau Jehovah, kitai ulih ngayanka pengerindu lebuh meri jaku lalau enggau nelap. Endang amat, kitai begunaka pemerani kena meri jaku lalau, tang Bup Kudus madah kaban ti bendar ngerara pangan diri.—J-lam. 27:17.

13. Nama enda patut digaga kitai?

¹³ Kitai mega ngayanka pengerindu ngagai bala menyadi lebuh kitai enda ngereja sekeda utai tu. Ambika chunto, kitai enda jampat ringat enggau utai ke disebut sida. Peratika utai ti nyadi lebuh Jesus ba dunya. Iya madahka ngagai bala murid, sida patut makai tubuh sereta ngirup darah iya ngambika bulih pengidup. (Jhn. 6:53-57) Mayuh ari murid iya tekenyit enggau utai ke disebut lalu ninggalka Jesus. Tang kaban iya ti rapat, nyengkaum John terus enggau iya. Taja pan sida enda mereti utai ku Jesus, tang sida enda ngumbai Jesus salah lalu ringat enggau iya. Sida arapka iya, laban sida nemu iya bejakuka pemendar. (Jhn. 6:60, 66-69) Nya alai, kitai enggai jampat ringat enggau utai ke disebut bala bakih kitai. Tang kitai meri sida peluang nerangka utai ku sida.—J-lam. 18:13; P-jar. 7:9.

14. Nama kebuah kitai enda patut begedika bala menyadi Kristian?

¹⁴ John mega meransang kitai enda begedika bala menyadi Kristian. Enti kitai enda nitihka jaku lalau nya, Sitan senang bekuasa atas kitai. (1 Jhn. 2:11; 3:15) Tu kala nyadi ngagai sekeda menyadi ba pengujung  kurun keterubah. Maya nya, Sitan bebendar deka nembiak Petara begedika pangan diri lalu enda beserakup. Lebuh John nulis surat iya, orang ke ngayan ulah baka Sitan udah bisi ba eklisia. Ambika chunto, Diotrepes. Iya ngereja utai ti ngasuh eklisia enda beserakup. (3 Jhn. 9, 10) Iya enda bebasaka pengari ke dianjung raban ti ngiring. Iya indah deka muai orang ari eklisia ke nerima penatai menyadi ti enda dikerinduka iya. Naka meh penyai ulah iya! Kemayaharitu, Sitan agi bebendar nguji ngerusak penyerakup nembiak Petara. Nya alai kitai anang sekali-kali begedika bala menyadi Kristian.

15. Nama patut dikingatka tuai bilik?

¹⁵ Siti chara tuai bilik nunjukka iya rinduka ruang bilik lebuh iya nyediaka utai ti diguna sida. (1 Tim. 5:8) Taja pia, ke beguna agi iya patut nulung sida bisi kaul ti manah enggau Jehovah. (Mat. 5:3) Tuai bilik ulih belajar ari teladan Jesus. Nitihka bup John, lebuh Jesus dipantang ba tiang perinsa, iya agi berundingka pasal diri sebilik iya. Maya nya John bediri ngimbai indai Jesus, Maria. Taja pan Jesus balat pedis, iya minta John ngibun Maria. (Jhn. 19:26, 27) Jesus bisi menyadi bukai ke ulih nulung ngintu Maria. Tang ba maya nya, sida bedau nyadi murid iya. Nya alai Jesus ngaga atur ngambika bisi orang nyaga Maria ba pengerai sereta ba pengarap.

16. Nama tanggung pengawa ti dikembuan John?

¹⁶ John megai mayuh tanggung pengawa. Laban iya seiku ari bala rasul, iya ngiring ba pengawa nginjil. Iya mega engka udah bisi bini lalu patut nyediaka utai ti diguna diri sebilik sereta nulung sida bisi kaul enggau Jehovah. (1 Kor. 9:5) Nama ulih dipelajar tuai bilik kemayaharitu?

17. Nama kebuah nya beguna tuai bilik nulung diri sebilik iya bisi kaul ti manah enggau Jehovah?

¹⁷ Menyadi lelaki ke nyadi tuai bilik bisi mayuh tanggung pengawa. Ambika chunto, iya patut gawa enggau ransing ngambika ulah iya ba endur gawa ulih mai puji ngagai Jehovah. (Eps. 6:5, 6; Tit. 2:9, 10) Lalu iya mega engka bisi tanggung pengawa ba  eklisia, baka meransang bala menyadi sereta ngiring ba pengawa nginjil. Ba maya ti sama, iya mega patut belajarka Bup Kudus enggau tetap enggau bini sereta anak iya. Sida tentu beterima kasih enggau pengawa iya ke nentuka sida gerai sereta gaga ati, lalu nulung sida terus nyembah Jehovah.—Eps. 5:28, 29; 6:4.

18. Nama utai ke diandalka John?

¹⁸ John bisi pengidup ti gayu lalu bisi mayuh utai manah nyadi ba pengidup iya. Iya mega napi mayuh penanggul ke ulih ngelemika pengarap iya. Tang iya seruran ngasika pesan Jesus, nyengkaum rinduka bala menyadi Kristian. Ketegal nya, John nemu Jehovah enggau Jesus rinduka iya lalu deka meri iya pengering kena betan napi penguji. (Jhn. 14:15-17; 15:9, 10; 1 Jhn. 4:16) Sitan enggau dunya iya enda ulih nagang John ari rinduka bala menyadi tauka ngayanka nya ari jaku sereta ulah iya.

19. Nitihka 1 John 4:7, nama patut digaga kitai, lalu nama kebuah?

¹⁹ Baka John, kitai diau ba dunya ke dibaruh kuasa Sitan, ke nadai pengerindu ke sapa-sapa. (1 Jhn. 3:1, 10) Lalu iya mega enggai kitai rinduka bala menyadi Kristian. Tang iya enda ulih ngereja nya enti kitai enda ngemendarka iya. Nya alai, aram meh kitai terus ngayanka pengerindu ngagai bala menyadi Kristian ari utai ke disebut kitai sereta pengawa ke digaga kitai. Enggau nya, kitai berasai gaga ulih nyadi sebagi ari ruang bilik Jehovah lalu idup enggau gaga ati.—Bacha 1 John 4:7.