1. Anni i efekto nittam na pangaya na Dios?

NITURA ni apostol Juan nga “i Dios ay aya.” (1 Juan 4:8) Simple laman i kinagina ngem iperaddam nittam natun yaw nga importante nga kinakurug: I Dios i Paggafuan na inango anna yayya gapa i Paggafuan na aya. Ayatan ittam ni Jehova yayya nga memammo ittam, magayayya, anna kontento.

2. Segun ta Mateo 22:37-40, anni i dua nga importante nga dob, anna ngatta mariga nga tuttulan i mekadua?

² Nedog ta Cristiano ira nga mawag tu kanayun nga mangipasingan ira tu aya, ari laman nu kayàda nga ipasingan yatun. (Bibbigan i Mateo 22:37-40.) Nu ammammu tam tu mapia si Jehova, alistu laman para nittam nga tuppalan i ollu nga dob. Ngatta? Megafu ta perfekto si Jehova, ikavurunganna ittam, anna masippo yayya ta pattratuna nittam. Ngem baka marigatan ittam nga tuttulan i mekadua nga dob. Ngatta? Megafu ta imperfekto i pinakamadukko nga kasittoletam—i wawwaragi tam. Ngem baka egga i tiempo nga makekagi onu makakua ira tu gannug nga mamarraddam nittam. Dati ngana nga ammu ni Jehova nga meparubang ittam ta kunnaw nga kapurueba. Yatutta ininspiranna i karuan nga nattura tu Biblia nga isalida i espesipiko nga tabarang nu ngatta makka-aya-aya ittam anna nu kunnasi tam nga makua yatun. Tadday tatun si Juan.​—1 Juan 3:11, 12.

3. Anni i nipasigo ni Juan?

³ Nipasigo ni Juan ta turana ira nga mawag tu mangipasingan tu aya i Cristiano ira. Mas namikkaru nga inusana i uvovug ira nga “aya” anna “inaya” kumpara ta napakkirivu nga nitura na tallu paga nga nattura tu Evanghelio. Magedad ngana tu magatu si Juan turi ta niturana i Evangheliona anna i tallu paga nga turana. Ituddu danatun nga libru ta Biblia nga aya nakuan i motibo ta ngamin nga kuan na tadday nga Cristiano. (1 Juan 4:10, 11) Ngem nappasa labbi i tiempo nige nga nagigiammu ni Juan yatun.

4. Kanayun kari nga nakepasingan si Juan tu aya ta tanakuan?

 ⁴ Turi ta mabbing paga si Juan, egga ira i tiempo nga ari yayya nakepasingan tu aya. Nesimmu yatun turi ta naddalan ta Samaria da Jesus anna i disipulosna mappange ta Jerusalem. Manaki na totolay ta tadday nga bario na Samaria nga padulakkan ira. Anni i reaksion ni Juan tatun? Nikiddona nga magurang nakuan tu afi tapenu matuggi i ngamin nga maddian tatun nga bario! (Luc. 9:52-56) Mittan paga, ari nga nakepasingan si Juan tu aya ta kavuluna nga apostol. Kavulu i wagina nga si Santiago, kinagida ta yenada nga ikiddona nakuan kani Jesus nga meddan ira tu prominente nga posision ta Pappatulan. Nattaki i nono na karuan nga apostol turi ta nakannammuadda yatun nga kingngua ni Santiago anni Juan! (Mat. 20:20, 21, 24) Ngem maski nu aru i nakkamalian ni Juan, inaya lagapa yayya ni Jesus.​—Juan 21:7.

5. Anni i gigiammuattam taw nga artikulo?

⁵ Gigiammuattam taw nga artikulo i ehemplo ni Juan anna i karuan nga niturana meyannung ta aya. Magigiammu tam tatun nu kunnasi tam nga mepasingan i aya ta wawwaragi tam. Ammuattam gapa i makua na ulu na familia tapenu mepasinganna nga ayatanna i familiana.

6. Kunnasi nga nipasingan ni Jehova i ayana nittam?

⁶ Maruddu nga nonopattam nga mepasingattam laman i aya ta totolay gukaban na pangikagi tu makasta ira nga uvovug. Ngem nu talaga ayatattam ira, ipasingattam yatun gukaban na pagangngua tu makasta nga gannug. (Ikumpara i Santiago 2:17, 26.) Angngariganna, ayatan ittam ni Jehova. (1 Juan 4:19) Nikagina i ayana nittam gukaban na makasta ira nga uvovug nga nerekord ta Biblia. (Sal. 25:10; Roma 8:38, 39) Ngem ammu tam nga ayatan ittam na Dios ari laman nga megafu ta kinagina, nu ari, megafu ta kiningnguana ira. Nitura ni Juan: “Nipasingan na Dios i pangaya na nittam ta pamaddob na ta tattadday nga Ana na toye ta utun na davvun tapenu mattolay ittam megafu sa.” (1 Juan 4:9) Nipamavulun ni Jehova nga mazziga-riga anna matay i iddukanna nga Ana para nittam. (Juan 3:16) Yatutta masiguradu tam nga ayatan ittam ni Jehova.

7. Anni i kingngua ni Jesus tapenu ipasingan nga ayatanna ittam?

 ⁷ Kinagi ni Jesus ta disipulosna nga ayatanna ira. (Juan 13:1; 15:15) Nipasinganna nu kunnasi kadakal i pangayana nira anna para nittam ari laman ta kinagina, nu ari, ta kingnguana. Kinagi ni Jesus: “I kadakallan nga pangaya nga mepasingan na tadday nga tolay ay i pangiyawa na ta inango na megafu ta kakkofun na.” (Juan 15:13) Nu nonopattam i kingngua ni Jehova anna ni Jesus para nittam, anni nakuan i efekto natun nittam?

8. Segun ta 1 Juan 3:18, anni nakuan i kuattam?

⁸ Mepasingattam nga ayatattam si Jehova anna si Jesus nu parulattattam ira. (Juan 14:15; 1 Juan 5:3) Nidog ni Jesus nittam nga makka-aya-aya ittam. (Juan 13:34, 35) Mawag tu ikagi tam ta wawwaragi tam nga ayatattam ira. Ngem mawag gapa tu ipasingattam yatun ta kukukuattam. (Bibbigan i 1 Juan 3:18.) Anni ira i makua tam tapenu mepasingattam nga ayatattam ira?

9. Megafu ta aya, anni i kingngua ni Juan?

⁹ Puede nakuan nga ari nga pinanawan ni Juan i yamana anna nattrabahu lagapa ta negosio na familiada nga pagimmanango. Ngem inusana i nabattang nga tiempo ta apaddu nga pinattolena tapenu uffunan i tanakuan nga mammuan i kinakurug meyannung kani Jehova anna kani Jesus. Mariga i pattolay nga pinili ni Juan. Napeppersigi yayya anna nefuku ta pangultimu na ollu-siglo C.E. maski paga nu lakay ngana yayya. (King. 3:1; 4:1-3; 5:18; Nep. 1:9) Maski paga turi ta agga-fuku ngana yayya, nipasinganna lagapa nga ayatanna i tanakuan. Angngariganna, ta keggana ta isla na Patmos, niturana i libru na Nepakannammu tapus nipatulugna yatun ta kongregasion ira tapenu mammuadda i “ganna-gannug nga mesimmu ta mappange.” (Nep. 1:1) Turi ta nallawan ngana yayya ta affukutan ta Patmos, nitura ni Juan i Evangheliona meyannung ta pattolay anna ministerio ni Jesus. Egga gapa i tallu nga turana nga mamasikan ta nono na wawwaragina. Kunnasi tam nga maparigan i minassakrifisio nga espiritu ni Juan?

10. Kunnasim nga mepasingan nga ayatammu i totolay?

¹⁰ Mepasingammu nga ayatammu i totolay depende ta pangusam ta pattolem. Kayà na mundo ni Satanas nga ufutammu i tiempo anna sikammu para ta pammakapianammu lagapa gitta na pappariku onu pabbalin tu sikat. Ngem ari tu kunnatun i minassakrifisio ira nga Cristiano ta interu nga mundo. Kuadda i adde na mawayyada tapenu usan i tiempoda ta pangilayyagayya ta mapia nga dumug anna panguffun ta totolay nga maddukko kani Jehova. Massesserbi paga lagu i karuan nira ta ngamin-tiempo.

11. Kunnasi nga ipasa-pasingan na aru ta matalo nga wawwaragi tam nga ayatadda si Jehova anna i kapangngurugda?

¹¹ Full-time i sekular nga trabahu na aru ta matalo ira nga Cristiano tapenu masuportan i baggida anna i familiada. Ngem kukukuadda lagapa i adde na mawayyada tapenu matalo nga suportan i organisasion na Dios. Manguffun i karuan ta nira nu tiempo na kalamidad, mabboluntariu gapa i karuan ta construction project, anna awayya gapa nga maddona i ngamin tapenu masuportan i interu-mundo nga trabahu. Kukukuadda danatun megafu ta ayatadda i Dios anna i kasittoleda. Mepasingattam gapa ta kada ligguan nga ayatattam i wawwaragi tam nu magatende ittam ta study ira anna nu makkomento ittam. Maski nu nababbannag ngana ittam, magatende ittam lagapa anna maski nu maggudu-gudu ittam, makkomento ittam. Pagarammattam gapa i tanakuan nige onu kabalin na study maski  nu egga gapa ira i problema tam. (Heb. 10:24, 25) Talaga ipappabalo tam i kukukuan na meddu nga wawwaragi tam!

12. Kunnasi paga nga nipasingan ni Juan nga ayatanna i wawwaragina?

¹² Tapenu ipasingan nga ayatan ni Juan i wawwaragina, kinomendanna ira. Ngem fuera paga tatun, sinabarangnganna gapa ira. Angngariganna, kinomendanna i pangurug anna mapia nga annangngua na wawwaragina ta turana ira. Ngem sinabarangnganna gapa ira meyannung ta liwa. (1 Juan 1:8–2:1, 13, 14) Kunnatun gapa nakuan i kuattam. Komendattam i wawwaragi tam nu egga ira i makasta nga kukukuadda. Ngem nu mamegafu ngana nga mangipasingan tu marake nga tendensia i kapangngurug tam, onu nu egga i kukukuanna nga marake, mawag tu masippo tam ira nga kagianan. Kawagattam i gutu tapenu tabarangngan i kofuttam ngem kagian na Biblia nga makkataba-tabarang i kurug nga makkorofun.​—Prov. 27:17.

13. Anni nakuan i ariattam nga kuan?

¹³ Nu mittan, mawag tu egga i ariattam nga kuan tapenu mepasingattam nga ayatattam i wawwaragi tam. Angngariganna, ariattam insigida nga massinti ta kakkagiadda. Nonopammu i nesimmu turi ta aranni ngana nga matay si Jesus. Kinagina ta disipulosna nga mawag tu kanadda i pattagna anna inumadda i dagana tapenu mapeggan ira tu inango. (Juan 6:53-57) Aru ta disipulos ni Jesus i nakaddag tatun nga kinagina yatutta pinanawadda yayya. Ngem ari yayya nga pinanawan na matalo nga kokkofunna, kasali tatun si Juan. Maski nu ariadda nga nalippawa i kayà kagian ni Jesus anna nakaddagan ira ta kinagina, ariadda nga ninono nga mali i kinagi ni Jesus anna ariadda gapa nga nassinti. Nattalo lallagu ira nisa megafu ta ammuda nga kurug i kakkagianna. (Juan 6:60, 66-69) Makasta gafu nu ari insigida mattaki i nono tam ta kakkagian na kofuttam. Iddattam nakuan ira tu tiansa tapenu mepakanawagda nu anni talaga i kayàda kagian ta kinagida.​—Prov. 18:13; Ecl. 7:9.

14. Ngatta ariattam nakuan nga ikalussaw i wawwaragi tam?

¹⁴ Sinabarangngan gapa ittam ni Juan nga ariattam nakuan ikalussaw i wawwaragi tam. Nu ariattam nga tuttulan yatun, iddiddattam si Satanas tu tiansa nga influwensian ittam. (1 Juan 2:11; 3:15) Kunnatun i nesimmu ta karuan ta ultimu na ollu-siglo C.E. Kiningngua ni Satanas i adde na mawayyana  tapenu ikalussaw na totolay na Dios i kataggi-tadday anna mawawadda i pattaraddeda. Turi ta pinadday ni Juan i turana ira, egga danuri nakatallung ta unag na kongregasion nga paparigadda i kingngua ni Satanas. Angngariganna, passirinan ni Diotrefes i wawwaragi ta kongregasion. (3 Juan 9, 10) Arianna nga alawatan danuri lallaki nga zinog na manangngal nga baggi. Papanawanna paga ta kongregasion danuri mamadulo ta totolay nga manakina. Kurug nga palagopog yayya! Adde ta maddaggun, desperadu lagapa si Satanas nga passirinan i totolay na Dios tapenu ari ira nga makka-aya-aya. Ariattam nakuan ipamavulun nga massirina ittam gafu laman ta lussaw.

15. Anni nakuan i daddamman na tadday nga ulu na familia?

¹⁵ Mepasingan na ulu na familia nga ayatanna i familiana nu iyawana i material ira nga pakawagadda. (1 Tim. 5:8) Ngem mawag tu daddammanna nga mas importante nga iyawana i espiritual nga pakawagan na familiana anne ta material. (Mat. 5:3) Egga i magigiammu na ulu ira na familia ta ehemplo ni Jesus. Segun ta Evanghelio ni Juan, agga-nono lagapa ni Jesus i familiana turi ta aranni ngana yayya nga matay. Agga-taddag laman ta aranni si Juan kavulu i yena ni Jesus nga si Maria turi ta egga si Jesus ta estaka. Maski nu magattattam ta taki si Jesus, nikiddona kani Juan nga tangngallanna si Maria. (Juan 19:26, 27) Maski nu egga gapa ira i tanakuan nga ána ni Maria nga awayyana nga manangngal ta pisikal ira nga pakawaganna, gittana awan paga tu maski tadday ta nira i nabbalin tu disipulo ni Jesus tatun nga tiempo. Yayya nga kayà nga siguraduan ni Jesus nga matangngallan i pisikal anna i espiritual nga pakawagan ni Maria.

16. Anni ira i responsibilidad ni Juan?

¹⁶ Aru i madammo nga responsibilidad ni Juan. Tadday yayya nga apostol yatutta mawag nga matalikarag yayya ta pallayyagayya. Posible gapa nga egga ngana i atawana. Megafu tatun, mawag tu iyawana i material kunne na gapa i espiritual nga pakawagan na familiana. (1 Cor. 9:5) Anni ira i magigiammu tatun na ulu na familia?

17. Ngatta iyawa nakuan na tadday nga ulu na familia i espiritual nga pakawagan na familiana?

¹⁷ Awayyana nga aru i responsibilidad na tadday nga brother nga ulu na familia. Angngariganna, mawag tu malallappo yayya ta  pattrabahuanna tapenu medayona si Jehova. (Efe. 6:5, 6; Tito 2:9, 10) Awayyana gapa nga egga ira i responsibilidadna ta kongregasion kagitta na pamagaram ta wawwaragi anna pangiyorollu ta pallayyagayya. Maski nu kunnatun, importante nga egga i regular nga paggigiammuna tu Biblia kavulu i atawana anna i ánada. Daka-dakal i appabaloda megafu ta ngamin nga kukukuanna tapenu mattalupaddian ira nga magawa-gawayyan, magayayya, anna uuffunanna ira ta espiritual.​—Efe. 5:28, 29; 6:4.

18. Ta anni nga makasiguradu si Juan?

¹⁸ Apaddu i pinattolay ni Juan anna aru i kappagayayya nga naekspiriensana ta pattolena. Neparubang gapa yayya ta napakaru nga kapurueba nga awayyana nakuan nga namakkafi ta pangurugna. Ngem kanayun nga kingnguana i adde na mawayyana tapenu tuttulan i dorob ni Jesus nelagum ngana i dob nga ayatan i wawwaragina. Megafu tatun, siguradu si Juan nga ayatan yayya ni Jehova anna ni Jesus anna iddadda yayya tu sikan tapenu maattamman i maski anni nga kapurueba. (Juan 14:15-17; 15:10; 1 Juan 4:16) Awan tu maski anni nga makua ni Satanas anna na mundona tapenu pagimmangan si Juan nga ayatan i wawwaragina anna ipasingan yatun gukaban na kinagi anna kiningnguana.

19. Anni i ipagaram na 1 Juan 4:7 nga kuattam, anna ngatta?

¹⁹ Kagitta ni Juan, mattolay ittam ta mundo nga pammagurayan ni Satanas. Awan tu pangayana ta maski sinni. (1 Juan 3:1, 10) Kayàna nga mawawattam i pangaya tam ta wawwaragi tam. Ngem arianna nga makua yatun fuera ngana laman nu ipamavuluttam. Determinadu ittam nakuan gafu nga ayatan i wawwaragi tam anna ipasingan yatun nga aya gukaban na kakkagian anna kukukuattam. Nu kuattam yatun, mabbalin ittam tu kurug nga magayayya, megafu ta parte ittam na familia ni Jehova.​—Bibbigan i 1 Juan 4:7.