1. Ania ti mariknam maipapan iti ayat ti Dios?

“TI DIOS ket ayat,” insurat ni apostol Juan. (1 Juan 4:8) Dayta a simple a sasao ipalagipna kadatayo ti nakapatpateg a kinapudno: ti Dios, nga Ubbog ti biag, ket isu met ti Gubuayan ti ayat. Ay-ayatennatayo ni Jehova! Gapu iti ayatna, mariknatayo a natalged, naragsak, ken kontentotayo.

2. Sigun iti Mateo 22:37-40, ania ti dua a kadakkelan a bilin, ken apay a mabalin a marigatantayo nga agtulnog iti maikadua?

² Para kadagiti Kristiano, napateg ti panangipakita iti ayat. Maysa a bilin dayta. (Basaen ti Mateo 22:37-40.) No naan-anay nga am-ammotayo ni Jehova, nalakatayo a pagtulnogan ti umuna a bilin. Perpekto ngamin ni Jehova; maseknan ken nakaim-imbag kadatayo. Ngem mabalin a marigatantayo nga agtulnog iti maikadua a bilin. Apay? Gapu ta dagiti kakabsattayo—a karaman kadagiti kaasitgan a kaarrubatayo—ket imperpekto. No dadduma, nalabit makaibaga wenno makaaramidda iti banag a mariknatayo nga awan ti pannakaseknanda ken didatay ipatpateg. Ammo ni Jehova a maipasangotayo iti dayta. Isu a tinignayna ti dadduma a mannurat ti Biblia nga iramanda ti espesipiko a balakad no apay ken kasano a maipakitatayo ti ayat iti maysa ken maysa. Maysa kadagita a mannurat ket ni Juan.—1 Juan 3:11, 12.

3. Ania ti impaganetget ni Juan?

³ Kadagiti surat ni Juan, impaganetgetna a masapul nga ipakita dagiti Kristiano ti ayat. Kinapudnona, iti salaysayna maipapan iti biag ni Jesus, ad-adu ti panangusarna iti sao nga “ayat” uray agtitipon ti panangusar iti dayta ti tallo a dadduma pay a  mannurat iti Ebanghelio. Agarup 100 idin ti tawen ni Juan idi insuratna ti Ebangheliona ken ti tallo a suratna babaen ti panangiwanwan ti Dios. Ipakita dagita a surat a ti amin nga aramiden ti maysa a Kristiano ket masapul koma a gapu iti ayat. (1 Juan 4:10, 11) Ngem saan a dagus a nasursuro dayta ni Juan.

4. Kanayon kadi a naipakita ni Juan ti ayat iti sabsabali?

⁴ Idi agkabannuag pay ni Juan, saanna a kanayon a naipakita ti ayat. Kas pagarigan, naminsan, mapmapan ni Jesus ken dagiti adalanna idiay Jerusalem ket lumabasda iti Samaria. Adda purok dagiti Samaritano a saan a nangpadagus kadakuada. Ania ti reaksion ni Juan? Dinamagna ken Jesus no kayatna a kiddawenda a bumaba ti apuy manipud langit a mangdadael iti amin nga agnanaed iti dayta a purok! (Luc. 9:52-56) Iti sabali pay a gundaway, saan nga impakita ni Juan ti ayat kadagiti padana nga apostol. Isu ken ti kabsatna a ni Santiago mabalin nga imbagada ken nanangda a kiddawenna ken Jesus nga ipaayna kadakuada dagiti napateg a saad iti Pagarian. Idi naammuan ti dadduma pay nga apostol ti inaramid da Santiago ken Juan, nakapungtotda! (Mat. 20:20, 21, 24) Nupay kasta, iti laksid ti amin a nagkamalian ni Juan, inayat latta isuna ni Jesus.—Juan 21:7.

5. Ania ti usigentayo iti daytoy nga artikulo?

⁵ Iti daytoy nga artikulo, usigentayo ti ulidan ni Juan ken ti dadduma nga insuratna maipapan iti ayat. Masursurotayo met no kasano nga ipakita ti ayat kadagiti kakabsattayo. Maammuantayo met ti maysa a napateg a pamay-an a mapaneknekan ti ulo ti pamilia nga ay-ayatenna ti pamiliana.

6. Ania ti inaramid ni Jehova tapno maipakitana ti ayatna kadatayo?

⁶ Masansan a panunotentayo a ti ayat ket mayebkas laeng iti nasingpet a sasao. Ngem tapno pudpudno ti ayat, masapul a napakuyogan met iti aramid. (Idilig ti Santiago 2:17, 26.) Kas pagarigan, ay-ayatennatayo ni Jehova. (1 Juan 4:19) Ken iyeb-ebkasna ti ayatna babaen ti nagsasayaat a sasao a nairekord iti Biblia. (Sal. 25:10; Roma 8:38, 39) Nupay kasta, kombinsidotayo nga ay-ayatennatayo ti Dios saan laeng a gapu ta ibagbagana dayta no di pay ket gapu iti ar-aramidenna. Insurat ni Juan: “Babaen iti daytoy a naipalgak ti ayat ti Dios iti kasasaadtayo, nga imbaonna ti bugbugtong nga Anakna ditoy lubong tapno magun-odtayo koma ti biag babaen kenkuana.” (1 Juan 4:9) Impalubos ni Jehova nga agsagaba ken matay ti patpatgenna nga Anak para kadatayo. (Juan 3:16) Talaga ngarud nga ay-ayatennatayo ni Jehova!

7. Kasano a pinaneknekan ni Jesus ti ayatna kadatayo?

 ⁷ Impasigurado ni Jesus kadagiti adalanna nga ay-ayatenna ida. (Juan 13:1; 15:15) Pinaneknekanna iti sao ken aramidna a nauneg ti ayatna kadakuada ken kadatayo. “Awan ti dakdakkel nga ayat ngem iti daytoy,” imbaga ni Jesus, “nga ited ti maysa ti biagna para kadagiti gagayyemna.” (Juan 15:13) No panunotentayo ti inaramid ni Jehova ken ni Jesus para kadatayo, matignaytayo a mangaramid iti ania?

8. Ania ti ibaga ti 1 Juan 3:18 a masapul nga aramidentayo?

⁸ Pampaneknekantayo nga ay-ayatentayo ni Jehova ken ni Jesus no agtultulnogtayo kadakuada. (Juan 14:15; 1 Juan 5:3) Espesipiko nga imbilin ni Jesus nga agiinnayattayo. (Juan 13:34, 35) Saantay laeng nga iyebkas ti ayattayo kadagiti kakabsat no di ket ipakitatayo pay dayta iti aramid. (Basaen ti 1 Juan 3:18.) Ania ti dadduma a pamay-an a mapaneknekantayo nga ay-ayatentayo ida?

9. Ania ti inaramid ni Juan gapu iti ayatna?

⁹ Mabalin koma a nakikadua lattan ni Juan ken amana tapno agbirok iti kuarta iti panagkalap a negosio ti pamiliada. Ngem saan, ta inusarna ti nabatbati a paset ti atiddog a biagna a mangipakaammo iti kinapudno maipapan ken Jehova ken ni Jesus. Ti biag a pinili ni Juan ket narigat. Naidadanes, ket idi agpatinggan ti umuna a siglo nupay lakayen, naibalud iti sabali a lugar gapu iti panangasabana maipapan ken Jesus. (Ara. 3:1; 4:1-3; 5:18; Apoc. 1:9) Uray iti kasta a kasasaadna, pinaneknekanna a maseknan latta iti sabsabali. Kas pagarigan, bayat nga adda iti isla ti Patmos, insuratna ti libro nga Apocalipsis ken impatulodna dayta kadagiti kongregasion tapno maammuanda “dagiti masapul a mapasamak iti mabiit.” (Apoc. 1:1) Sa posible nga idi nakaruaren idiay Patmos, insuratna ti Ebanghelio maipapan iti biag ken ministerio ni Jesus. Nangaramid met iti tallo a surat tapno paregtaen ken pabilgenna dagiti kakabsat. Kasanom a matulad ti kinamanagsakripisio ni Juan?

10. Kasanom a mapaneknekan nga ay-ayatem dagiti tattao?

¹⁰ Mapaneknekam nga ay-ayatem dagiti tattao iti piliem nga aramiden iti biagmo. Kayat ti sistema ni Satanas nga usarem ti amin a tiempo ken pigsam para iti bagim, nga ikagumaam ti agbirok iti kuarta wenno agbalin a natan-ok. Ngem naiduma dagiti managsakripisio nga agibumbunannag iti Pagarian iti intero a lubong. Us-usarenda ti adu a tiempoda a mangikasaba iti naimbag a damag ken tumulong kadagiti tattao nga umasideg ken Jehova. Adda pay ketdi dagiti nagbalin nga amin-tiempo a manangaskasaba ken mannursuro.

11. Kasano a pampaneknekan ti adu a matalek nga agibumbunannag nga ay-ayatenda ni Jehova ken dagiti kakabsat?

¹¹ Adu a matalek a Kristiano ti masapul nga agtrabaho iti amin a tiempo tapno masuportaranda ti bagida ken ti pamiliada. Nupay kasta, dagitoy a matalek nga agibumbunannag supsuportaranda ti organisasion ti Dios iti aniaman a pamay-an a kabaelanda. Kas pagarigan, adda dagidiay tumulong iti panangsaranay kadagiti nadidigra. Makipagtrabaho met ti dadduma kadagiti proyekto a panagibangon. Ken adda gundaway ti amin nga agdonar iti kuarta para iti sangalubongan a trabaho. Ar-aramidenda dagitoy gapu iti ayatda iti Dios ken iti padada a tao. Linawas a pampaneknekantayo ti ayattayo kadagiti kakabsat no umatender ken makipartisipartayo kadagiti gimong ti kongregasion. Nupay mabalin a nabambannogtayo, addatayo latta kadagiti  gimong. Uray no mabalin nga agnerbiostayo, agkomentotayo latta. Ken nupay addaantayo amin iti problema, parparegtaentayo ti dadduma sakbay wenno kalpasan ti gimong. (Heb. 10:24, 25) Apresiarentayo ti ar-aramiden dagiti padatayo nga agibumbunannag!

12. Ania ti sabali pay a pamay-an a pinaneknekan ni Juan ti ayatna kadagiti kakabsat?

¹² Pinaneknekan ni Juan ti ayatna kadagiti kakabsat saan laeng a babaen ti panangkomendarna kadakuada no di pay ket babaen ti panangbalakadna kadakuada. Kas pagarigan, kadagiti suratna, kinomendaranna dagiti kakabsat gapu iti pammati ken nasayaat nga ar-aramidda, ngem direkta met a binalakadanna ida maipapan iti basol. (1 Juan 1:8–2:1, 13, 14) Kasta met, masapul a komendarantayo dagiti kakabsat iti nasayaat a maar-aramidanda. Ngem no adda mangpatpatanor iti dakes nga ugali wenno kababalin, maipakitatayo ti ayattayo no ibagatayo ti masapul a mangngegna. Kasapulan ti tured iti panangbalakad iti maysa a gayyem. Ngem ibaga ti Biblia a dagiti pudno a gayyem, patademen wenno ilintegda ti gayyemda.—Prov. 27:17.

13. Ania ti masapul a saantayo nga ar-aramiden?

¹³ No dadduma, mapaneknekantayo ti ayattayo kadagiti kakabsat babaen ti saantayo nga ar-aramiden. Kas pagarigan, saantayo a dagus a tagidaksen ti ibagbagada. Usigentayo ti maysa a napasamak idi dandanin agpatingga ti biag ni Jesus ditoy daga. Imbagana kadagiti adalanna a tapno magun-odda ti biag, masapul a kanenda ti lasagna ken inumenda ti darana. (Juan 6:53-57) Makapakigtot unay dayta nga imbagana nga uray la pinanawan isuna ti adu nga adalan—ngem saan a pinanawan dagiti pudno a gagayyemna, a pakairamanan ni Juan. Simamatalek a nakikaduada kenkuana. Saanda a naawatan ti imbaga ni Jesus ken mabalin a nakigtotda iti dayta. Ngem dagiti matalek a gagayyem ni Jesus saanda nga impapan a di umiso ti imbagana ken saanda a tinagidakes dayta. Imbes ketdi, nagtalekda kenkuana, ta ammoda nga ibagbagana ti kinapudno. (Juan 6:60, 66-69) Nakapatpateg ngarud a saantayo a dagus a tagidaksen ti ibagbaga dagiti gagayyemtayo! Imbes ketdi, ikkantay ida iti gundaway a mangilawlawag no ania ti kayatda a sawen.—Prov. 18:13; Ecl. 7:9.

14. Apay a ditay ipalubos nga agtubo ti gura iti pusotayo?

¹⁴ Pinaregtanatayo met ni Juan a ditay guraen dagiti kakabsattayo. No saantayo nga  ipangag dayta a balakad, mabalin nga impluensiaannatayo ni Satanas. (1 Juan 2:11; 3:15) Napasamak daytoy iti dadduma idi ngudo ti umuna a siglo C.E. Inkagumaan ni Satanas a paggiginnuraen ken pagsisinaen dagiti adipen ti Dios. Idi ar-aramiden ni Juan dagiti suratna, nakastreken iti kongregasion dagiti tattao a nangtulad iti kababalin ni Satanas. Kas pagarigan, nangpataud ni Diotrefes iti nakaro a panagsisina iti maysa a kongregasion. (3 Juan 9, 10) Awan respetona kadagiti agdaldaliasat a pannakabagi ti bagi a manarawidwid. Pinadasna pay ketdi nga ikkaten iti kongregasion dagidiay nangpadagus kadagiti kagurgurana. Anian a kinapannakkel! Ikagkagumaan pay laeng ni Satanas a pagsisinaen ken dadaelen ti ili ti Dios ita. Ditay koma pulos ipalubos a pagsisinaennatayo ti gura.

15. Ania ti masapul a laglagipen ti maysa nga ulo ti pamilia?

¹⁵ Ti maysa a napateg a pamay-an a mapaneknekan ti maysa nga ulo ti pamilia nga ay-ayatenna ti pamiliana ket babaen ti panangipaayna iti material a kasapulanda. (1 Tim. 5:8) Ngem masapul a laglagipenna a ti material a bambanag saanda a mapennek ti naespirituan a kasapulan ti pamiliana. (Mat. 5:3) Alaentay a pagarigan ti inyulidan ni Jesus para kadagiti ulo ti pamilia. Sigun iti Ebanghelio ni Juan, idi matmatayen ni Jesus iti kayo a pagtutuokan, sipapanunot latta iti pamiliana. Nakatakder idi ni Juan iti abay ni Maria nga ina ni Jesus, iti lugar a nakailansaan ni Jesus. Uray nakaro idin ti ut-ot a marikrikna ni Jesus, kiniddawna ken Juan nga aywananna ni Maria. (Juan 19:26, 27) Adda met ketdi kakabsat ni Jesus a sigurado a makaipaay iti kasapulan ni Maria, ngem agparang nga awan pay kadakuada ti nagbalin nga adalanna. Isu a kayat ni Jesus a siguraduen a maipaay ti pisikal ken naespirituan a kasapulan ni Maria.

16. Ania idi dagiti responsabilidad ni Juan?

¹⁶ Adu idi ti nadagsen a responsabilidad ni Juan. Kas maysa kadagiti apostol, indauluanna ti trabaho a panangasaba. Mabalin met nga adda asawana, isu a masapul a balanse ti panangipaayna iti material ken naespirituan a kasapulan ti pamiliana. (1 Cor. 9:5) Ania ti maadal kenkuana dagiti ulo ti pamilia ita?

17. Apay a napateg nga ipaay ti maysa nga ulo ti pamilia ti naespirituan a kasapulan ti pamiliana?

¹⁷ Mabalin nga adu ti nadagsen a responsabilidad  ti maysa nga ulo ti pamilia. Kas pagarigan, masapul a nagaget iti sekular a trabahona tapno maidaydayawna ni Jehova. (Efe. 6:5, 6; Tito 2:9, 10) Mabalin met nga adda dagiti responsabilidadna iti kongregasion, kas iti panangipastor ken panangidaulo iti trabaho a panangasaba. Kasta met, napateg nga adalenna a regular ti Biblia a kaduana ti asawa ken annakna. Sigurado nga apresiaren ti pamiliana ti amin nga ar-aramidenna tapno agtalinaedda a nasalun-at iti pisikal, emosional, ken naespirituan.—Efe. 5:28, 29; 6:4.

18. Kombinsido ni Juan iti ania?

¹⁸ Napaut ti panagbiag ni Juan ken adu ti nagsasayaat a kapadasanna. Naipasango iti adu a nadumaduma a pakarigatan a mabalin a nangpakapuy koma iti pammatina. Ngem kanayon nga inaramidna ti amin a kabaelanna a mangtungpal kadagiti bilin ni Jesus, a pakairamanan ti panangayat kadagiti kakabsat. Kombinsido ngarud idi ni Juan nga ay-ayaten isuna ni Jehova ken ni Jesus ken ipaayda ti bileg a kasapulanna a mangsango iti aniaman a pakasuotan. (Juan 14:15-17; 15:9, 10; 1 Juan 4:16) Awan ti naaramidan ni Satanas wenno ti sistemana a mangpasardeng ken Juan a makarikna, mangyebkas, ken mangipakita iti ayat.

19. Ania ti iparegta ti 1 Juan 4:7 nga aramidentayo, ken apay?

¹⁹ Kas ken Juan, agbibiagtayo iti lubong nga iturturayan ni Satanas, ti dios nga awanan ayat. (1 Juan 3:1, 10) Kayatna nga isardengtayo nga ayaten dagiti kakabsat, ngem dina maaramid dayta no ditay ipalubos. Determinadotay koma a mangayat kadagiti kakabsat ken mangpaneknek iti dayta iti sao ken aramidtayo. Iti kasta, naragsaktayo kas paset ti pamilia ni Jehova, ken talaga a makapnek ti panagbiagtayo.—Basaen ti 1 Juan 4:7.