1. Modi ki amor di Deus ta pô-u ta xinti?

‘DEUS é amor’. (1 João 4:8) Kes palavra sinplis li ki apóstlu Juan skrebe, ta lenbra-nu di un verdadi inportanti: Deus, ki é Fonti di vida, tanbê é Fonti di amor. Jeová ta ama-nu! Se amor ta pô-nu xinti suguru, kontenti i filís.

2. Sima sta na Mateus 22:37-40, kal ki é kes dôs mandamentu más inportanti, i pamodi ki pode ser difísil obi ku kel sugundu mandamentu?

² Kristons ka pode skodje si es ta mostra amor ô nau. Kel-li é un mandamentu. (Lé Mateus 22:37-40.) Óras ki nu ta kumesa ta konxe Jeová dretu, nu pode atxa ma é más fásil obi ku kel primeru mandamentu. Kel-li ta kontise pamodi Jeová é perfetu; el ta preokupa ku kada un di nos i el ta trata-nu ku bondadi. Má nu pode atxa difísil obi ku kel sugundu mandamentu. Pamodi? Pamodi nos irmons ku irmans, ki é kes algen ki ta sta más pértu di nos, é inperfetu. Alvês es pode fla ô faze kuzas ki pode ofende-nu. Jeová sabia ma nu ta ben pasaba pa kel prubléma li. Pur isu, el uza alguns algen pa skrebe livrus di Bíblia ki ta inxina-nu pamodi ki nu debe mostra amor pa kunpanheru i modi ki nu pode faze kel-li. Un di kes algen é Juan. — 1 João 3:11, 12.

3. Kuzê ki Juan inxina sobri amor?

³ Na kes livru di Bíblia ki Juan skrebe, el distaka ma kristons debe mostra amor pa kunpanheru. Aliás, na se Ivanjélhu sobri vida di Jizus, Juan uza palavra “amor”  ô “ama algen” más txeu di ki tudu kes otu três Ivanjélhu djuntadu. Juan tinha uns 100 anu kantu el skrebe se Ivanjélhu i se três karta. Kes livru di Bíblia li, ta inxina-nu ma é amor ki debe motiva-nu faze tudu kuza. (1 João 4:10, 11) Má leba ténpu pa Juan prende kel lison li.

4. Juan sénpri mostra amor pa otus algen?

⁴ Kantu Juan éra jóven, nen sénpri el ka ta mostraba amor. Pur izénplu, un bês el kunpanha Jizus na un viaji di pregason di Jiruzalen pa Samaria. Kes algen di un zóna pikinoti di Samaria ka resebe-s dretu. Modi ki Juan reaji? El pergunta Jizus si el podia mandaba lumi pa dixi di séu pa distruíba tudu kes algen! (Luc. 9:52-56) Na un otu situason, Juan tanbê ka mostra amor pa kes otu apóstlus. Ta parse ma el ku se irmon Tiagu, es konvense ses mai pa pidi Jizus pa da-s un puzison inportanti na Reinu di Deus. Kantu kes otu apóstlu da kónta di kel-li, es fika uma xatiadu! (Mat. 20:20, 21, 24) Má simé, Jizus ka dexa di ama Juan pamodi kes kuzas mariadu ki el faze. — João 21:7.

5. Kuzê ki nu sta ben odja na kel studu li?

⁵ Na kel studu li, nu sta ben pâpia di izénplu di Juan i di alguns kuza ki el skrebe sobri amor. Kel-li ta ben inxina-nu modi ki nu pode mostra amor pa nos irmons ku irmans. Tanbê, nu sta ben odja un manera inportanti ki xéfis di família ta prova ma es ta ama ses família.

6. Kuzê ki Jeová faze pa el mostra ma el ta ama-nu?

⁶ Txeu bês nu ta pensa ma amor é un sentimentu ki nu ta mostra óras ki nu ta uza palavras bunitu. Má kel amor verdaderu nu ta mostra-l pa kuzas ki nu ta faze. (Konpara ku Tia. 2:17, 26.) Pur izénplu, Jeová ta ama-nu. (1 João 4:19) I el ta mostra se amor através di kes palavra bunitu ki nu ta atxa na Bíblia. (Sal. 25:10; Rom. 8:38, 39) Má kuzê ki ta da-nu sertéza ma Deus ta ama-nu, é ka sô kel ki el ta fla, má tanbê kel ki el ta faze pa nos. Juan skrebe: ‘É si ki Deus mostra se amor pa nos: Deus manda se Fidju unijénitu pa ben mundu pa nu ganha vida através di el.’ (1 João 4:9) Jeová dexa se Fidju ki el ta ama txeu pa sufri i móre pa nos. (João 3:16) Pur isu, nu pode ten tudu sertéza ma Jeová ta ama-nu.

7. Modi ki Jizus prova ma el ta ama-nu?

 ⁷ Jizus fla se disiplus ma el ta amaba es txeu. (João 13:1; 15:15) El prova se amor pa es i pa nos, ka sô pa kel ki el fla, má tanbê pa kel ki el faze. Jizus fla: ‘Ningen ka ten amor más grandi di ki kel ki da se vida pa se amigus.’ (João 15:13) Óras ki nu ta pensa na kuzê ki Jeová i Jizus faze pa nos, kuzê ki nu ta krê faze?

8. Sima sta na 1 João 3:18, kuzê ki nu debe faze?

⁸ Nu ta prova ma nu ta ama Jeová i Jizus óras ki nu ta obi ku es. (João 14:15; 1 João 5:3) I Jizus da-nu kel mandamentu di ama kunpanheru. (João 13:34, 35) Nu debe mostra nos amor pa nos irmons ku irmans ka sô pa kel ki nu ta fla, má tanbê pa kel ki nu ta faze. (Lé 1 João 3:18.) Má kuzê ki nu ten ki faze pa nu prova nos amor pa es?

9. Kuzê ki amor poi Juan ta faze?

⁹ Juan podia fikaba ta trabadja ku se pai na nogósiu di péska di família i ganhaba dinheru. Má envês di kel-li, el disidi uza tudu se vida pa djuda otus algen prende verdadi sobri Jeová i Jizus. Kel vida ki Juan skodje é ka éra fásil. El sufri pirsigison i kuazi na fin di primeru séklu, kantu el staba algen grandi, el podu prézu. (Atos 3:1; 4:1-3; 5:18; Apo. 1:9) Mésmu kantu el staba prézu i el ka ta podia pregaba sobri Jizus, Juan mostra se amor pa otus algen. Pur izénplu, kantu el staba na ilha di Pátmus, el skrebe livru di Apocalipse i el manda pa kes kongregason pa es pode sabeba di kes kuza ki staba ‘kuazi ta ben kontise.’ (Apo. 1:1) Nton, ta parse ma dipôs ki el libertadu, Juan skrebe se Ivanjélhu sobri vida i trabadju di pregason di Jizus. Tanbê el skrebe se três karta pa nkoraja i pa bira fé di se irmons ku irmans más fórti. Juan faze txeu sakrifisiu na se vida. Modi ki nu pode imita-l?

10. Modi ki bu pode prova ma bu ta ama otus algen?

¹⁰ Manera ki bu ta skodje leba bu vida pode prova si bu ta ama otus algen ô nau. Mundu di Satanás krê pa nu pensa sô na nos kabésa i pa nu gasta tudu nos ténpu i forsa na ganha dinheru i na tenta ser algen inportanti. Má envês di kel-li, kristons na mundu interu ta uza maior párti di ses ténpu pa prega kes notísia sábi i djuda otus algen ser amigu di Jeová. Alguns ti mésmu ta prega i ta inxina pa ténpu interu.

11. Modi ki txeu irmon fiel sta ta mostra ses amor pa Jeová i pa otus irmon?

¹¹ Txeu irmon fiel ten ki trabadja dia interu pa sustenta ses kabésa i ses família. Má simé, kes irmon fiel li ta faze tudu kel ki es pode pa apoia organizason di Jeová. Pur izénplu, alguns ta ba djuda óras ki kontise dizastri, otus ta trabadja na kes konstruson di organizason i inda otus ta faze kontribuison pa óbra na mundu interu. Es ta faze kes kuza li pamodi es ta ama Deus i otus algen. Tudu simana nu pode prova ma nu ta ama nos irmons óras ki nu ta sisti i nu ta partisipa na runions. Sikrê nu ta sta kansadu, nu ta bai runion. Sikrê nu ta sta nervozu, nu ta da komentárius. I mésmu ku nos prubléma, sénpri nu ta nkoraja kunpanheru antis i dipôs di runion. (Heb. 10:24, 25) Nu ta xinti txeu gratidon pa tudu kel ki nos irmons ku irmans ta faze!

12. Di ki otu manera Juan mostra ma el ta amaba se irmons?

 ¹² Juan mostra ma el ta amaba se irmons ku irmans pamodi el ta ilojiaba es i el ta daba es konsedju. Pur izénplu, na kes karta ki el skrebe, el ilôjia irmons pa ses fé i pa kes kuza dretu ki es ta fazeba. Má tanbê el da irmons konsedju dirétu sobri pekadu. (1 João 1:8–2:1, 13, 14) Di mésmu manera, nu meste ilôjia nos irmons ku irmans pa kes kuza dretu ki es ta faze. Má si un di es kumesa ta ten un atitudi ô un ábitu mariadu, nu pode mostra ma nu ta ama-l óras ki nu ta fla-l ku amor kuzê ki el meste obi. Nu meste ten koraji pa nu konsedja un amigu. Má Bíblia ta fla ma amigus di verdadi ta mola, ô ta koriji kunpanheru. — Pro. 27:17.

13. Kuzê ki nu ka debe faze?

¹³ Alvês, nu pode prova ma nu ta ama nos irmons ku irmans pa kel ki nu ka ta faze. Pur izénplu, nu ka ta fika ofendidu faxi ku kel ki es ta fla. Pensa na un situason ki kontise duránti vida di Jizus li na Téra. El fla se disiplus ma pa es ganha vida, es tinha ki kumeba se karni i bebe se sangi. (João 6:53-57) Kes disiplu fika ofendidu ku kes palavra di Jizus i txeu di es bandona-l. Má kes amigu di verdadi di Jizus, sima Juan, ka faze kel-li. Es mante lial i es fika djuntu ku Jizus. Es ka ntende kuzê ki Jizus flaba i es fika spantadu ku kel-la. Má es ka fika ta pensa lógu ma Jizus flaba algun kuza mariadu, nen es ka fika ofendidu. Envês di kel-li, es kunfia na Jizus pamodi es sabia ma sénpri el ta papiaba verdadi. (João 6:60, 66-69) Nos tanbê nu ka krê fika ofendidu faxi ku kel ki nos amigus ta fla. Óras ki kontise algun kuza ki nu ka ntende dretu, nu krê da-s oportunidadi pa es splika. — Pro. 18:13; Ecl. 7:9.

14. Pamodi ki nunka nu ka debe ôdia nos irmons ku irmans?

¹⁴ Juan tanbê aviza-nu pa nu ka ôdia nos irmons. Si nu ka sigi kel konsedju li, Satanás pode influensia-nu. (1 João 2:11; 3:15) É kel-li ki kontise ku alguns kriston na fin di primeru séklu. Satanás staba ta faze di tudu pa el poba povu di Deus ta fikaba divididu i ta odiaba kunpanheru. Na kel ténpu ki Juan skrebe se kartas, alguns ómi ki tinha  mésmu atitudi di Satanás entra na kongregason. Un di kes ómi éra Diótrifis. El kria txeu divizon na un kongregason. (3 João 9, 10) Enkaregadu di grupu di óbra na kel ténpu ta mandaba alguns ansions pa vizitaba kongregason. Má Diótrifis ka ta mostraba ruspetu pa kes irmon. I ti el tenta poi fóra di kongregason kes irmon ki ta resebeba dretu kes algen ki el ka gostaba. El éra txeu orgulhozu! Oji Satanás ta kontinua ta tenta di tudu manera kria divizon na povu di Deus. Nunka ka nu dexa ódiu pô-nu ta afasta di nos irmons.

15. Di kuzê ki xéfis di família debe lenbra?

¹⁵ Un manera inportanti di un xéfi di família mostra ma el ta ama se família, é óras ki el ta kuida di ses nisisidadi. (1 Tim. 5:8) Má el debe lenbra ma kes kuza material ka ta djuda se família ten un amizadi fórti ku Jeová. (Mat. 5:3) Odja un bon izénplu ki Jizus dexa pa kes xéfi di família. Ivanjélhu di Juan, ta fla ma kantu Jizus staba ta móre na staka di tortura, el kontinua ta preokupa ku se família. Juan staba sakédu na ladu di Maria, mai di Jizus, kantu Jizus staba ta matadu. Mésmu ta xinti un dór ki ka ta da pa aguentaba, Jizus pidi Juan pa kuida di Maria. (João 19:26, 27) Kes irmon ku irman di Jizus podia kuidaba di nisisidadis di Maria, má ta parse ma ninhun di es inda ka biraba disiplu di Jizus. Pur isu, Jizus krê tinha sertéza ma un algen ta kuidaba di Maria ka sô na kuzas ki el mesteba, má tanbê ta djudaba el kontinua ta sirbi Jeová.

16. Ki responsabilidadis inportanti Juan tinha?

¹⁶ Juan tinha txeu responsabilidadi inportanti. Dja ki el éra apóstlu, el tinha ki tomaba kónta di trabadju di pregason. Alén di kel-li, ta parse ma el éra kazadu. Nton, el tinha ki kuidaba di nisisidadis di se família i djudaba es ten un amizadi fórti ku Jeová. (1 Cor. 9:5) Kuzê ki xéfis di família pode prende ku izénplu di Juan?

17. Pamodi ki é inportanti xéfis di família djuda ses família ten un amizadi fórti ku Jeová?

¹⁷ Un xéfi di família talvês pode ten txeu responsabilidadi inportanti. Pur izénplu, el ten ki ser un bon trabadjador  pa se konportamentu da glória pa Jeová. (Efé. 6:5, 6; Tito 2:9, 10) I pode ser ki el ten responsabilidadis na kongregason, sima kuida di irmons i sta na frenti di trabadju di pregason. Má simé, é inportanti pa el studa Bíblia sénpri ku se mudjer i se fidjus. Se família ta fika txeu gratu ku tudu sforsu ki el ta faze pa djuda-s ten bon saúdi, sta kontenti i kontinua ta sirbi Jeová. — Efé. 5:28, 29; 6:4.

18. Ki sertéza Juan tinha i pamodi?

¹⁸ Juan vive txeu anu i el tevi bons spiriénsa. El pasa pa txeu prubléma ki podia biraba se fé fraku. Má sénpri el faze se midjór pa obi ku kes mandamentu di Jizus, sima kel di ama se irmons ku irmans. Pur isu, Juan tinha sertéza ma Jeová ku Jizus ta amaba el i ma es ta daba el puder pa el venseba kalker difikuldadi. (João 14:15-17; 15:10; 1 João 4:16) Ninhun kuza ki Satanás i se mundu faze ka inpidi Juan di ama se irmons i mostra es amor pa kuzas ki el fla i pa kuzas ki el faze.

19. Kuzê ki 1 João 4:7, ta insentiva-nu pa nu faze i pamodi?

¹⁹ Sima Juan, nu sta vive na un mundu governadu pa Satanás, ki ka ten amor pa ningen. (1 João 3:1, 10) Satanás ta fikaba kontenti si nu dexa di ama nos irmons ku irmans, má sô el ta konsigi faze kel-li si nu dexa-l. Pur isu, sta disididu na ama bus irmons ku irmans i na mostra kel amor li através di kuzas ki bu ta fla i ki bu ta faze. Asi, bu ta xinti alegria di faze párti di família di Jeová i di ten kel vida ki bale péna. — Lé 1 João 4:7.