1. Chanru nakaawekʼa aawibʼ rikʼin li xrahom li Yos?

LI APÓSTOL Juan kixtzʼiibʼa jun li aatin li moko chʼaʼaj ta xtawbʼal ru abʼan jwal wank xwankil. Kixtzʼiibʼa: «Li Yos aʼan rahok» (1 Juan 4:8). Li Yos aʼan xyoʼlebʼaal li yuʼam ut aʼan ajwiʼ xyoʼlebʼaal li rahok. Li Jehobʼa nokooxra ut li xrahom naxbʼaanu naq inkʼaʼ tooxuwaq, sahaq ut kʼojkʼooq qachʼool.

2. a) Joʼ naxye saʼ Mateo 22:37-40, bʼar wank li wiibʼ xnimal ru chaqʼrabʼ? b) Kʼaʼut naq naru nachʼaʼajkoʼk chiqu xpaabʼankil li xkabʼ chaqʼrabʼ?

² Ebʼ laj paabʼanel tenebʼanbʼil saʼ xbʼeenebʼ xkʼutbʼesinkil li rahok (taayaabʼasi Mateo 22:37-40). Naq naqanaw ru chiʼus li Jehobʼa moko nachʼaʼajkoʼk ta chiqu xpaabʼankil li xbʼeen chaqʼrabʼ, xbʼaan naq li Jehobʼa tzʼaqal re ru ut junelik naruxtaana qu ut naxkʼe xchʼool chiqix. Abʼan maare tchʼaʼajkoʼq chiqu xpaabʼankil li xkabʼ chaqʼrabʼ. Kʼaʼut? Saʼ xkʼabʼaʼ naq ebʼ li qechpaabʼanel wankebʼ ajwiʼ saʼ xyanq li qas qiitzʼin li naʼaatinak wiʼ li raqal aʼin ut aʼanebʼ aj maak ut wank sut naru nekeʼxye junaq li aatin malaj naru nekeʼxbʼaanu junaq li naʼlebʼ li naru naxtochʼ qachʼool. Li Jehobʼa naxnaw naq tchʼaʼajkoʼq chiqu xpaabʼankil li chaqʼrabʼ aʼin, joʼkan naq kixbʼaanu naq wiibʼ oxibʼ li kristiʼaan li xeʼtzʼiibʼank re li Santil Hu teʼaatinaq chirix chanru ut kʼaʼut naq tqara qibʼ chiqibʼil qibʼ. Ut jun rehebʼ aʼan laj Juan (1 Juan 3:11, 12).

3. Bʼar wank li naʼlebʼ naabʼal sut kiʼaatinak wiʼ laj Juan?

³ Saʼebʼ li hu li kixtzʼiibʼa, laj Juan naabʼal sut kixye naq ebʼ  laj paabʼanel tento teʼxkʼutbʼesi li rahok. Saʼ li hu li kixtzʼiibʼa laj Juan li naʼaatinak chirix li xyuʼam li Jesús, naabʼal sut kiroksi li aatin rahok chiru ebʼ li oxibʼ chik chi hu li naʼaatinak chirix li xyuʼam li Jesús. Wank tana 100 chihabʼ re laj Juan naq kixtzʼiibʼa li xhu li naʼaatinak chirix li resil xyuʼam li Jesús ut li oxibʼ chik chi esilhu. Li kixtzʼiibʼa naxkʼutbʼesi naq aʼ li rahok tento t-ekʼasinq re junaq aj paabʼanel chi xbʼaanunkil junaq li naʼlebʼ (1 Juan 4:10, 11). Naabʼal chihabʼ ajwiʼ kiʼajmank chiru laj Juan re xtzolbʼal li naʼlebʼ aʼin.

4. Ma junelik kixkʼutbʼesi laj Juan naq naxrahebʼ li junchʼol?

⁴ Naq toj saaj chaq, laj Juan moko junelik ta kixkʼutbʼesi li rahok. Jun eetalil, saʼ jun kutan naq li Jesús ut ebʼ li xtzolom yookebʼ chi xik Jerusalén, xeʼnumeʼk saʼ li tenamit Samaria ut saʼ jun li kʼalebʼaal re li tenamit aʼan inkʼaʼ xeʼkʼuleʼk chiʼus. Chanru kinaʼlebʼak laj Juan? Kiraj raj naq tkubʼeeq chaq xaml saʼ choxa ut tixsach ruhebʼ chixjunil li wankebʼ saʼ li kʼalebʼaal aʼan (Luc. 9:52-56). Saʼ jun chik kutan, laj Juan inkʼaʼ kixkʼutbʼesi li rahok chirixebʼ li junchʼol chi apóstol. Chanchan tawiʼ naq aʼan ut laj Santiago xeʼxqʼunbʼesi li xnaʼ re naq tixtzʼaama chiru li Jesús naq tkʼeheʼq rehebʼ li naʼaj li jwal wank xwankil saʼ li Xʼawabʼejilal li Yos. Naq ebʼ li junchʼol chi apóstol xeʼrabʼi li xeʼxbʼaanu, kʼajoʼ naq xeʼjosqʼoʼk (Mat. 20:20, 21, 24). Usta laj Juan kipaltoʼk, abʼan naraheʼk chaq xbʼaan li Jesús (Juan 21:7).

5. Kʼaru tqatzʼil rix saʼ li tzolom aʼin?

⁵ Saʼ li tzolom aʼin tqatzʼil rix li kixbʼaanu laj Juan ut wiibʼ oxibʼ li naʼlebʼ li kixtzʼiibʼa chirix li rahok. Tqatzol chanru tooruuq xkʼutbʼesinkil naq naqarahebʼ li qechpaabʼanel ut tqil ajwiʼ chanru naru naq ebʼ li nekeʼjolomink re li junkabʼal teʼruuq xkʼutbʼesinkil naq nekeʼxra li wankebʼ rubʼel xwankil.   

6. Chanru kixkʼutbʼesi li Jehobʼa naq nokooxra?

⁶ Maare naqakʼoxla naq re xraabʼal ebʼ li kristiʼaan kaʼajwiʼ naʼajmank naq tqaye li chaabʼil aatin rehebʼ. Abʼan wi naqarahebʼ chi tzʼaqal, tento tqakʼutbʼesi rikʼin li qabʼaanuhom (juntaqʼeeta rikʼin Santiago 2:17, 26). Jun eetalil, li Jehobʼa nokooxra (1 Juan 4:19). Ut naxye qe naq nokooxra rikʼin li chaabʼil aatin li natawmank saʼ li Santil Hu (Sal. 25:10; Rom. 8:38, 39). Abʼan, chʼolchʼo chiqu naq nokooxra xbʼaan naq moko kaʼaj tawiʼ naxye qe, naxkʼutbʼesi ajwiʼ rikʼin li xbʼaanuhom. Laj Juan kixtzʼiibʼa: «Aʼin kikʼutunk wiʼ qikʼin li qaraabʼal xbʼaan li Yos: naq li Yos kixtaqla chaq li Ralal jun chiribʼil saʼ ruuchichʼochʼ re naq wanq qayuʼam saʼ xkʼabʼaʼ Aʼan» (1 Juan 4:9). Li Jehobʼa kixkanabʼ naq li Ralal li jwal raaro xbʼaan  trahobʼtesiiq ut tkamsiiq saʼ qakʼabʼaʼ (Juan 3:16). Joʼkan naq chʼolchʼo chiqu naq aʼan nokooxra.

7. Chanru kixkʼutbʼesi li Jesús naq nokooxra?

⁷ Ut kʼaru kixbʼaanu li Jesús? Kixye rehebʼ li xtzolom naq naxrahebʼ (Juan 13:1; 15:15). Abʼan kixkʼutbʼesi naq qʼaxal naxrahebʼ ut naq qʼaxal nokooxra moko kaʼaj tawiʼ rikʼin li kixye, rikʼin ajwiʼ li kixbʼaanu. Kixye: «Maaʼani qʼaxal narahok joʼ li naxqʼaxtesi li xyuʼam saʼ xkʼabʼaʼebʼ li ramiiw» (Juan 15:13). Naq naqakʼoxla rix li kixbʼaanu li Jehobʼa ut li Jesús saʼ qakʼabʼaʼ, kʼaru raj toorekʼasi chi xbʼaanunkil?

8. Joʼ naxye saʼ 1 Juan 3:18, kʼaru tento tqabʼaanu?

⁸ Naqakʼutbʼesi naq naqara li Jehobʼa ut li Jesús naq nokooʼabʼink chiruhebʼ (Juan 14:15; 1 Juan 5:3). Joʼkan ajwiʼ, li Jesús kixye qe naq tento tqara qibʼ chiqibʼil qibʼ (Juan 13:34, 35). Abʼan, moko kaʼaj tawiʼ tqaye naq naqarahebʼ li qechpaabʼanel, tento ajwiʼ tqakʼutbʼesi rikʼin li qabʼaanuhom (taayaabʼasi 1 Juan 3:18). Joʼkan bʼiʼ, kʼaru naru naqabʼaanu re xkʼutbʼesinkil aʼin?

9. Kʼaru kixbʼaanu laj Juan saʼ xkʼabʼaʼ naq naxrahebʼ li junchʼol?

⁹ Laj Juan kiruuk raj kʼanjelak rochbʼen li xyuwaʼ joʼ aj kar re xsikʼbʼal xtumin. Abʼan moko joʼkan ta kixbʼaanu, kiroksi bʼan li xyuʼam re xtenqʼankilebʼ jalan chik kristiʼaan chi xnawbʼal li yaal chirix li Jehobʼa ut li Jesús. Chʼaʼaj li kixsikʼ xbʼaanunkil saʼ li xyuʼam. Kirahobʼtesiik ut maare chiru li chihabʼ 96, naq ak cheek chik chiʼus, kitaqlaak chi preexil saʼ jun li naʼajej (Hech. 3:1; 4:1-3; 5:18; Apoc. 1:9). Usta wank chaq saʼ tzʼalam saʼ xkʼabʼaʼ naq naxpuktesi li xkʼutum li Jesús, laj Juan kixkʼutbʼesi naq naxkʼe xchʼool chirixebʼ li junchʼol. Jun eetalil, naq xwank chaq saʼ li naʼajej Patmos, kixtzʼiibʼa li Apocalipsis li kiril saʼ moy u ut kixtaqla rehebʼ li chʼuut re naq teʼxnaw «chixjunil li taakʼulmanq chi seebʼ» (Apoc. 1:1). Moqon, naq kiʼisiik chaq saʼ li naʼajej Patmos, kixtzʼiibʼa resil xyuʼam ut xkʼanjel li Jesús. Kixtzʼiibʼa ajwiʼ oxibʼ chi esilhu re xwaklesinkil ut xkawubʼresinkil xchʼool ebʼ li rechpaabʼanel. Chanru tooruuq xkʼambʼal qe rikʼin li kixbʼaanu laj Juan?

10. Chanru tooruuq xkʼutbʼesinkil naq naqarahebʼ li kristiʼaan?

¹⁰ Naru naqakʼutbʼesi naq naqarahebʼ li kristiʼaan saʼ xkʼabʼaʼ li naqasikʼ xbʼaanunkil saʼ li qayuʼam. Li xruuchichʼochʼ laj Tza naraj naq tqoksi chixjunil li qahoonal ut li qametzʼew re xsikʼbʼal li bʼihomal ut re naq tnaweʼq qu yalaq bʼar. Abʼanan, saʼ chixjunil li Ruuchichʼochʼ wankebʼ aj paabʼanel li nekeʼroksi naabʼal li xhoonalebʼ re xpuktesinkil li chaabʼil esilal ut re xtenqʼankilebʼ li kristiʼaan chi xnawbʼal ru li Jehobʼa. Ut wiibʼ oxibʼ rehebʼ nekeʼxkʼe chixjunil li xhoonal saʼ xkʼanjel li Yos.

11. Chanru nekeʼxkʼutbʼesi naabʼalebʼ li hermaan naq nekeʼxra li Jehobʼa ut ebʼ li rechpaabʼanel?

¹¹ Naabʼalebʼ li qechpaabʼanel nekeʼkʼanjelak wulaj wulaj re naq teʼruuq xwenteninkil ribʼ ut re naq teʼruuq xwenteninkil li xjunkabʼal. Usta joʼkan, nekeʼxbʼaanu chixjunil li wank saʼ ruqʼebʼ re tzʼaqonk chirix li xmolam li Jehobʼa. Jun eetalil, wankebʼ nekeʼtenqʼank naq nakʼulmank junaq li rahilal, jalanebʼ chik nekeʼkʼanjelak saʼ li kabʼlak ut chiqajunilo naru nokookubʼsink chirix li xkʼanjel li Yos li nabʼaanumank saʼ chixjunil li Ruuchichʼochʼ. Chi joʼkaʼin nekeʼxkʼutbʼesi naq nekeʼxra li Yos ut li ras riitzʼin. Joʼkan ajwiʼ, rajlal xamaan naqakʼutbʼesi naq naqarahebʼ li qechpaabʼanel naq nokoowulak saʼebʼ li chʼutam usta tawajenaqo, naq nokootzʼaqonk saʼ li chʼutam usta nokooparpot ut naq naqayal qaqʼe chi xwaklesinkilebʼ  xchʼool li qechpaabʼanel naq toj maajiʼ natiklaak ut naq ak xraqeʼk li chʼutam usta yooko xnumsinkil junaq li rahilal (Heb. 10:24, 25). Relik chi yaal naq oxloqʼ chiqu chixjunil li nekeʼxbʼaanu ebʼ li qechpaabʼanel aʼin li jwal raarokebʼ qabʼaan.

12. Kʼaru chik kixbʼaanu laj Juan re xkʼutbʼesinkil naq naxrahebʼ li rechpaabʼanel?

¹² Laj Juan kixkʼutbʼesi naq naxrahebʼ li rechpaabʼanel naq kixwaklesihebʼ xchʼool, abʼan kixkʼutbʼesi ajwiʼ aʼin naq kixkʼe xnaʼlebʼebʼ. Jun eetalil, saʼebʼ li esilhu li kixtzʼiibʼa kixwaklesihebʼ xchʼool xbʼaan naq kaw xaqxokebʼ saʼ li paabʼank ut chaabʼil li xbʼaanuhomebʼ, abʼan kixkʼe ajwiʼ rehebʼ jun li kawil qʼusuk chirix li maak (1 Juan 1:8–2:1, 13, 14). Qakʼamaq qe rikʼin laj Juan, qawaklesihaq xchʼool ebʼ li qechpaabʼanel saʼ xkʼabʼaʼ li chaabʼil naʼlebʼ li nekeʼxbʼaanu. Abʼan wi naqakʼe reetal naq junaq li qechpaabʼanel moko us ta chik nanaʼlebʼak, naru naqakʼutbʼesi naq naqara wi naqaye re saʼ tuulanil kʼaru tento tixbʼaanu re xjalbʼal xnaʼlebʼ. Yaal naq naʼajmank li kawil chʼoolej re xbʼaanunkil aweʼ, abʼan li Santil Hu naxye naq ebʼ li tzʼaqal amiiw nekeʼxqʼesna ribʼ, malaj; nekeʼxqʼus ribʼ chiribʼilebʼ ribʼ (Prov. 27:17).

13. Kʼaru inkʼaʼ tqabʼaanu?

¹³ Naru ajwiʼ naqakʼutbʼesi naq naqarahebʼ li qechpaabʼanel naq inkʼaʼ naqabʼaanu wiibʼ oxibʼ li naʼlebʼ. Jun eetalil, moopoʼk saʼ junpaat wi nekeʼxye qe junaq li naʼlebʼ. Qakʼoxlaq li kixkʼul li Jesús saʼ jun kutan naq kiwank saʼ Ruuchichʼochʼ. Aʼan kixye rehebʼ li xtzolom naq wi nekeʼraj xkʼulbʼal li junelik yuʼam tento teʼxwaʼ li xtibʼel ut teʼrukʼ li xkikʼel (Juan 6:53-57). Naabʼalebʼ li xtzolom inkʼaʼ xeʼwulak chiru li kixye, joʼkan naq xeʼxkanabʼ xtaqenkil. Abʼan ebʼ li tzʼaqal ramiiw, joʼ laj Juan, inkʼaʼ xeʼxtzʼeqtaana ut inkʼaʼ xeʼxkanabʼ xjunes. Usta inkʼaʼ xeʼxtaw ru li kiraj xyeebʼal ut sachso xchʼoolebʼ xeʼkanaak, abʼan inkʼaʼ xeʼpoʼk chi moko xeʼxkʼoxla naq tikʼtiʼ li naxye. Xeʼxkʼojobʼ bʼan xchʼool rikʼin xbʼaan naq nekeʼxnaw naq junelik naxye li yaal (Juan 6:60, 66-69). Jwal wank xwankil naq moko saʼ junpaat ta toopoʼq xbʼaan li nekeʼxye ebʼ li qechpaabʼanel, qakʼehaq bʼan hoonal re xtawbʼal ru li nekeʼraj xyeebʼal (Prov. 18:13; Ecl. 7:9).

14. Kʼaʼut naq moko us ta naq xikʼ tqilebʼ li qechpaabʼanel?

¹⁴ Laj Juan kixye ajwiʼ naq moko us ta naq xikʼ tqilebʼ li qechpaabʼanel. Wi inkʼaʼ naqapaabʼ li kixye, naru nokootʼaneʼk saʼ ruqʼ  laj Tza (1 Juan 2:11; 3:15). Aʼin li xeʼxkʼul wiibʼ oxibʼ aj paabʼanel saʼ xraqik li xkutankilebʼ li apóstol. Laj Tza kixyal xqʼe re naq twanq li xikʼ ilok ut jachok ibʼ saʼ xyanqebʼ laj paabʼanel. Naq laj Juan kixtzʼiibʼa ebʼ li esilhu ak xeʼok saʼ li chʼuut ebʼ aj paabʼanel li nekeʼnaʼlebʼak joʼ laj Tza. Jun rehebʼ aʼan laj Diótrefes, li naxbʼaanu chaq naq twanq jachok ibʼ saʼ jun li chʼuut. Inkʼaʼ naroxloqʼi ruhebʼ li nekeʼtaqlaak xbʼaan li nekeʼjolomink re xmolam li Yos chi rulaʼaninkil ebʼ li chʼuut. Saʼ xkʼabʼaʼ naq qʼetqʼet, kixyal risinkil saʼ li chʼuut ebʼ li hermaan li nekeʼxkʼe rochochnal ebʼ li xikʼ narilebʼ (3 Juan 9, 10). Saʼebʼ li qakutan laj Tza toj naxbʼaanu chixjunil li wank saʼ ruqʼ re xjachbʼal ut xqʼaxbʼal ru li xtenamit li Yos. Miqakanabʼ naq li xikʼ ilok tixkʼam chaq li jachok ibʼ saʼ xtenamit li Yos.

15. Kʼaru tento teʼxjultika ebʼ li nekeʼjolomink re li junkabʼal?

¹⁵ Yaal naq li najolomink re li junkabʼal naxkʼutbʼesi naq naxrahebʼ li wankebʼ rubʼel xwankil naq naxwentenihebʼ (1 Tim. 5:8). Abʼan jultikaq re, naq li jwal wank xwankil aʼan xtenqʼankil li xjunkabʼal saʼ li xpaabʼalebʼ (Mat. 5:3). Qilaq li kixbʼaanu li Jesús. Joʼ naxye li hu li kixtzʼiibʼa laj Juan chirix li xyuʼam li Jesús, naq tʼuytʼu chiru cheʼ toj naxkʼoxla li xjunkabʼal. Laj Juan ut li xMaría li xnaʼ li Jesús, wankebʼ chaq saʼ li naʼaj bʼarwiʼ yook chi kamsiik li Jesús. Usta jwal ra yook xkʼulbʼal, li Jesús kixtzʼaama chiru laj Juan naq chirilaq li xMaría (Juan 19:26, 27). Li xMaría wank jalan chik ralal xkʼajol li naru nawentenink re, abʼan chanchan tawiʼ naq toj maajun rehebʼ wank joʼ xtzolom li Kriist. Chi joʼkan, li Jesús kixbʼaanu naq maakʼaʼ tpaltoʼq re li xMaría saʼ li xyuʼam ut saʼ li xpaabʼal.

16. Kʼaru ebʼ li kʼanjel kʼebʼil chaq saʼ ruqʼ laj Juan?

¹⁶ Naabʼal li kʼanjel kʼebʼil chaq saʼ ruqʼ laj Juan. Saʼ xkʼabʼaʼ naq aʼan jun li apóstol, tento naq tkʼamoq bʼe saʼ li puktesink. Ut maare sumsu ajwiʼ. Wi joʼkan, tento raj naq tril li xjunkabʼal re naq maakʼaʼ tpaltoʼq rehebʼ saʼ li xyuʼamebʼ ut saʼ li xpaabʼalebʼ (1 Cor. 9:5). Kʼaru naru nekeʼxtzol ebʼ li nekeʼjolomink re li junkabʼal rikʼin laj Juan?

17. Kʼaʼut naq aajel ru naq ebʼ li nekeʼjolomink re li junkabʼal teʼxkʼe rehebʼ li wankebʼ rubʼel xwankil li naʼajmank chiruhebʼ saʼ li xpaabʼal?

¹⁷ Ebʼ li nekeʼjolomink re li junkabʼal maare kʼebʼil ajwiʼ saʼ ruqʼebʼ naabʼal li kʼanjel  li wank xwankil. Jun eetalil, tento naq kaw teʼkʼanjelaq re naq li xnaʼlebʼebʼ t-aatinaq chiʼus chirix li Jehobʼa (Efes. 6:5, 6; Tito 2:9, 10). Ut maare kʼebʼil saʼ ruqʼebʼ li kʼanjel saʼ li chʼuut, joʼ rilbʼal ebʼ li rechpaabʼanel ut xkʼebʼal xqʼe saʼ li puktesink. Abʼan tenebʼanbʼil ajwiʼ saʼ xbʼeenebʼ xtzolbʼal li Santil Hu chi rajlal rikʼin li rixaqil ut ebʼ li ralal xkʼajol. Li xjunkabʼal qʼaxal oxloqʼaq chiruhebʼ naq ebʼ aʼan nekeʼxyal xqʼe chi xkʼebʼal rehebʼ li naʼajmank saʼ li xpaabʼalebʼ, saʼ li xyuʼamebʼ ut re naq sahaqebʼ saʼ xchʼool (Efes. 5:28, 29; 6:4).

18. Kʼaru chʼolchʼo chaq chiru laj Juan?

¹⁸ Chiru naabʼal chihabʼ kiwank laj Juan ut naabʼal li naʼlebʼ kixkʼul saʼ li xyuʼam. Kixnumsi naabʼal li chʼaʼajkilal li kiruuk raj xbʼaanunkil naq tkehoʼq saʼ li xpaabʼal. Abʼan junelik kixbʼaanu li wank saʼ ruqʼ re xpaabʼankil li xchaqʼrabʼ li Kriist, ut jun rehebʼ aʼan xraabʼal ebʼ li rechpaabʼanel. Joʼkan naq chʼolchʼo chaq chiru laj Juan naq naraheʼk xbʼaan li Jehobʼa ut li Jesús, ut naq aʼanebʼ teʼxkʼe xmetzʼew re naq tixkuy xnumsinkil yalaq kʼaru chi chʼaʼajkilal (Juan 14:15-17; 15:10; 1 Juan 4:16). Chi moko laj Tza chi moko li ruuchichʼochʼ aʼin kiruuk xrambʼal chiru laj Juan xkʼutbʼesinkil naq naxrahebʼ li rechpaabʼanel rikʼin li kixye ut li kixbʼaanu.

19. Kʼaru naxwaklesi qachʼool chi xbʼaanunkil 1 Juan 4:7, ut kʼaʼut?

¹⁹ Joʼ kixkʼul laj Juan, laaʼo ajwiʼ wanko saʼ li ruuchichʼochʼ li naxjolomi laj Tza bʼarwiʼ numtajenaq li xikʼ ilok (1 Juan 3:1, 10). Aʼan naraj naq tqakanabʼ xraabʼal ebʼ li qechpaabʼanel ut truuq xbʼaanunkil aʼin wi laaʼo tqakanabʼ naq t-oq saʼ qayanq. Joʼkan bʼiʼ, qarahaq ebʼ li qechpaabʼanel ut qakʼutbʼesihaq rikʼin li qaatin ut li qabʼaanuhom. Chi joʼkan tqataw rusilal wank saʼ xjunkabʼal li Jehobʼa ut qʼaxal sahaq saʼ qachʼool (taayaabʼasi 1 Juan 4:7).