1. O henda ya Nzambi itubhangesa kudivwa kyebhi?

“NZAMBI henda.” (1 Nzwá 4:8) O izwelu yiyi yatumbula poxolo Nzwá, itulembalesa ima iyadi: Nzambi mwene o fixi ya mwenyu, mwene we o fixi ya henda. Jihova watuzolo! Mukonda dya henda ye, tudivwa kala twala mukididi kyakondama, twazediwa, twatenena.

2. Kala kilondekesa Matesu 22:37-40, itumu yebhi iyadi yabetakota, ni mukonda dyahi kibhonza kutumaka okitumu kyakayadi?

² Phala o Jikidistá kulondekesa henda kikima kyakusola kana, maji kitumu mwene. (Tanga Matesu 22:37-40.) Kyoso kituya ni kwijiya kyambote Jihova, tumona kwila kikubhonzo kubelesela okitumu kyadyanga. Kuma Jihova muthu wayuka, mwene usuwa muthu ni muthu, ututalatala ni henda. Maji kitena kutubhonza kubelesela okitumu kyakayadi. Mukonda dyahi? Mukonda ojiphange jetu ni yó atuzukama akwa ituxi. Sayi bhabha, ene atena kuzwela mba kubhanga ima ituluwalesa. Jihova wejidile kwila twejidibhana ni ibhidi yiyi. Kyenyiki mwene watumu asoneki a Bibidya kutubhana itendelesu yatokala itwijidisa se mukonda dyahi ni kyebhi kitutena kulondekesa henda. Muthu umoxi wasoneka yalungu ni maka ya, Nzwá.—1 Nzwá 3:11, 12.

3. Yalungu ni henda ihi yalongo Nzwá?

³ Mumadivulu asoneka, Nzwá watendelesa kwila, o Jikidistá atokala kulondekesa henda. Ku athu oso asoneka yalungu ni musoso wamwenyu wa Jezú, Nzwá mwene watumbula dingi o kizwelu “henda,” ni “kuzola” o asoneki amukwa a divulu dya Matesu, Máluku ni Luka ndenge. Kyoso Nzwá kyasoneka odivulu  dyalungu ni musoso wamwenyu wa Jezú ni mikanda yê itatu mwene wakexile kyá ni hama yamivu. Omadivulu ya atulonga kwila, o ima yoso twatokala ku ibhanga ni henda. (1 Nzwá 4:10, 11) Maji kwabhiti thembu phala Nzwá kudilonga kulondekesa henda.

4. Okwila Nzwá walondekesa henda mu ithangana yoso?

⁴ Mu unzangala we Nzwá kexile mulondekesa henda mu ithangana yoso. Mukifika, sayi kizuwa Jezú ni maxibulu mê abhangele njila mukubhita ku Samádya phala kuya ku Jeluzaleme. Mumbanza imoxi ku Samádya, sayi athu aditunu kuzalela Jezú ni maxibulu mê. Mwene wabhingi kwa Jezú phala kubhangesa kulawuka thubhya kudyulu phala kubwika o athu oso a mbanza yenyóyo! (Luka 9:52-56) Sayi kithangana Nzwá kalondekesa henda kujipoxolo ni akwâ. Mwene ni phangyê Tiyaku azwela ni manyâ phala kubhinga kwa Jezú n’a abhane ididi ya ungana mu Utuminu wa Nzambi. Kyoso ojipoxolo jamukwa kyeza mukwijiya omaka yâ, afutuluka! (Mat. 20:20, 21, 24) Maji Jezú wasuluka ni kuzola Nzwá sumbala ni itondalu yê.—Nzwá 21:7.

5. Ihi itwandadilonga mumilongi yiyi?

⁵ Mumilongi yiyi, twandamona ophangu ya Nzwá ni ima yasoneka mwene yalungu ni henda. Omilongi yiyi yandatulonga kyebhi kitutena kulondekesa henda ku jiphange jetu, ni kumona kyebhi o atwameni amiji alondekesa kwila azolo o miji yâ.

6. Ihi yabhange Jihova phala kulondekesa kwila watuzolo?

⁶ Sayi bhabha o athu axinganeka kwila, ohenda a ilondekesa ngó bhukaxi ka izwelu. Maji o henda yakidi atokala ku ilondekesa bhukaxi ka ibhangelu. (Sokesa ni Tiyaku 2:17, 26.) Mukifika, Jihova watuzolo. (1 Nzwá 4:19) Mwene ulondekesa ohenda yê bhukaxi ka izwelu yafwama itusanga mu Bibidya. (Jisá. 25:10; Loma 8:38, 39) Maji okima kituxikinisa kwila Nzambi watuzolo, ko ima ngó izwela mwene, maji o ima ibhanga phala ombote yetu. Poxolo Nzwá wasoneka: “Mwene mwa tu tukulwila Nzambi o henda yê ya tu kwatela, Nzambi kya katula Mon’ê umoxi-èlele, anga u mu tumikisa mungongo, phala etu ni tu mone mwenyu kwa mwène.” (1 Nzwá 4:9) Jihova wehela Mon’ê wakazola kutala hadi ni kufwa mukonda dyetu. (Nzwá 3:16) Kyenyiki tutena kuxikina ni kidi kyoso kwila, Jihova watuzolo!

7. Kyebhi Jezú kyalondekesa kwila watuzolo?

⁷ Jezú wambela maxibulu mê kwila wa azolele. (Nzwá 13:1; 15:15) Mwene katulondekesa ngó henda bhukaxi ka ima yazwela,  maji bhukaxi we ka ibhangelu yê. Jezú wambe: “Kanaku henda yatundu yyi, se muthu ubhana mwenyu we bhukididi kyamakamba mê.” (Nzwá 15:13) Kuxinganeka mu ima yabhange Jihova ni Jezú phala ombote yetu, kutuswinisa kubhanga ihi?

8. Kala kilondekesa o 1 Nzwá 3:18 ihi itwatokala okubhanga?

⁸ Etu tulondekesa ohenda yetu kwa Jihova ni Jezú mukwabelesela. (Nzwá 14:15; 1 Nzwá 5:3) Jezú watubhana okitumu kyakudizola mudyetu. (Nzwá 13:34, 35) Twatokala kulondekesa henda ku jiphange jetu, kana ngó mu izwelu yetu, maji ni mu ibhangelu yetu. (Tanga 1 Nzwá 3:18.) Maji ihi itwatokala kubhanga phala kulondekesa ohenda yetu kwa Jihova ni Jezú?

9. Ohenda yaswinisa Nzwá kubhanga ihi?

⁹ Nzwá hinu waxala ni tatê mukikalakalu kyakutamba jimbiji, phala kunganyala kitadi. Muveji dyakiki, mwene wabhakula omwenyu wê woso mukikalakalu kyakukwatekesa akwa kwijiya Jihova ni Jezú. O ukexilu wamwenyu wasolele Nzwá wabhonzele kyavulu. Mwene amuzukutisa, amute mukaleya. Oveji yasukina yadibhanene ni ibhidi yiyi yabhiti kudisukilu dya hama yadyanga, kyoso mwene kyakukile kyá mwene amutele mukaleya. (Ika. 3:1; 4:1-3; 5:18; Dij. 1:9) Ne mwene mukaleya, Nzwá walondekesa ohenda yê ku akwâ. Mukifika, kyoso mwene kyexile mukikolo kya Patamu, mwene wasoneka odivulu dya Dijingunwinu yu wa itumikisa mu ilunga phala n’ejiye o ima yoso ‘yejibhita.’ (Dij. 1:1) Kyenyiki kyoso kyamujituna mukikolo kya Patamu, nange kyene Nzwá kyasoneka omusoso walungu ni ukunji wa Jezú mu ixi. Mwene wasoneka we mikanda itatu phala kuswinisa ni kukolesa o jiphange. Nzwá wabhiti mu ibhidi yavulu. Kyebhi kitutena kukayela ophangu yê?

10. Kyebhi ki utena kulondekesa kwila eye wazolo o athu?

¹⁰ O ima i usola kumwenyu we itena kulondekesa se wazolo akwenu mba kana. Omundu wa Satanaji wamesena kwila tudixinganeka ngó etu, ni kuzanga okithangana kyetu ni nguzu yetu mukusota kunganyala kitadi ni fuma. Maji muveji dyakubhanga kiki, o Jikidistá kumundu woso angastala okithangana kyâ phala kuboka onjimbu yambote ni kukwatekesa o athu kuzukama kwa Jihova. Sayi yâ, adibhakula musidivisu yathembu yoso.

11. O Jikidistá ja fiyele ene mulondekesa kyebhi ohenda yâ kwa Jihova ni ku Jiphange?

¹¹ Jikidistá javulu abhingi kukalakala kizuwa kyoso kyamuvimba phala kudikila o ibhindamu ya mwiji wâ. Ne kiki o Jikidistá jiji jafiyele abhanga yoso yatena phala kukwatekesa okilunga kya Nzambi. Mukifika sayi aboki akwatekesa yó abhiti mumavuwa, amukwa akwatekesa mukikalakalu kyakutunga o Ididi ya Ubhezelu, oso ala ni ujitu wakusangela kitadi kyâ phala kukwatekesa okikalakalu kya Utuminu kumundu mundu woso. Ene abhanga o ima yoso yiyi mukonda azolo Nzambi ni jiphange jâ. Mujisemana joso tutena kulondekesa ohenda yetu kujiphange mukuya muyonge, ni kubhana o itambwijilu yetu. Ne mwene se twabwila etu tuya muyonge. Ne mwene se twala ni njinda tubhanga yoso phala kutambwijila muyonge. Sumbala ni ibhidi yetu kumwenyu, tusota kuswinisa ojiphange jetu kudimatekenu ni kudisukilu dya kyonge. (Jihe. 10:24, 25) Etu tusota kulondekesa okisakidilu kyetu mu yoso ibhanga ojiphange jetu!

12. M’ukexilu webhi Nzwá walondekesa henda kujiphange jê?

¹² Nzwá walondekesa kwila wazolele ojiphange jê, mukwaximana ni kwabhana itendelesu.  Mukifika, mumikanda yê, Nzwá waximana okixikanu kyâ ni ikalakala yâ yambote, maji mwene we wabhana itendelesu yaswina phala kwadimuna. (1 Nzwá 1:8–2:1, 13, 14) Kyene we kimoxi, twabhingi kuximana ojiphange jetu mu ima yambote yenemubhanga. Maji se phange umateka kukala ni wendelu mba idifwa yabolo tutena kulondekesa kwila twamuzolo mukumubazela ni henda yoso. Kubhinga kuswina phala kubazela dikamba, maji o Bibidya yamba kwila omakamba akidi adizwika mba adikwatekesa mudyâ.—Jisa. 27:17.

13. Kitwatokala kubhanga ihi?

¹³ Sayi bhabha tulondekesa ohenda yetu ku jiphange mu ima itukamba okubhanga. Mukifika, etu kituthathamana mba tuluwala ni lusolo mukama kosokoso kazwela ojiphange jetu. Xinganeka mu ima yabhiti kudisukilu dya mwenyu wa Jezú mu ixi? Mwene watangela kumaxibulu mê kwila, phala kutambula omwenyu ene atokalele kudya oxitu yê ni kunwa omanyinga mê. (Nzwá 6:53-57) Maxibulu avulu adivu kyayibha mukwivwa o izwelu yiyi ya Jezú, avulu amuxisa mba amubwazeka, maji omakamba mâ akidi kamuxisa, kala Nzwá. Axalela ni Jezú adikwatenena kwa mwene. Ene katendela o ima yazwelele Jezú, nange ene asasumuka ni izwelu yiyi. Maji omakamba afiyele kamono kwila Jezú watondala mu izwelu, kadivwile kyayibha. Muveji dya kiki ene adyelele kwa Jezú kwila mwene mukwa kuzwela okidi mu ithangana yoso. (Nzwá 6:60, 66-69) Etu kitwamesena kudivwa kyayibha mukama kosokoso kazwela omakamba metu! Kyoso kikumoneka maka mba kima kitwakambe kutendela kyambote twamesena kwabhana kithangana phala kutujimbulula kyambote omaka.—Jisa. 18:13; Ndo. 7:9.

14. Mukonda dyahi kitutokala kuzemba ojiphange jetu?

¹⁴ Nzwá watudimuna phala kituzembe ojiphange jetu. Se tukamba kukayela o itendelesu yiyi twandajikula onjila phala Satanaji natunganale. (1 Nzwá 2:11; 3:15) Sayi Jikidistá muhama yadyanga K.K. adibhana ni maka enya. Satanaji wabhange yoso phala kuwanuna omundu wa Nzambi ni kudizemba. Kyoso Nzwá kyasoneka omukanda wê, sayi mayala exile ni kifwa kya Satanaji abokona mukilunga kya Nzambi. Mukifika, mumayala yâ umoxi Diyotelefu, wabhangesa okilunga kudiwanuna. (3 Nzwá 9, 10) Mwene kexile muxila otufunga twa ilunga exile mwatumikisa kwal’o kibuka kya utuminu. Mwene  kate wexile mukaya mukilunga oso azalele muthu kamuwabhelele. Mwene wexile kindanda! Lelu Satanaji wamubhanga hanji yoso phala kuwana omundu wa Nzambi. Kitutokala kudisandula ku jiphange mukonda dya kudizemba.

15. Ihi yatokala kwijiya o atwameni amiji?

¹⁵ O ukexilu umoxi wa atwameni amwiji kulondekesa kwila azolo omwiji wâ okudikila o ibhindamu yâ muxitu. (1 Tim. 5:8) Maji mwene watokala kulembalala kwila ojimbote kijanda dikila o ibhindamu yamwiji munzumbi. (Mat. 5:3) Tala ophangu yaxisa Jezú phala o atwameni amwiji. Odivulu dya Nzwá dizwela kwila ne mwene kyoso Jezú kyexile mufwa kutaka, mwene wathandanganyele hanji ni mwiji wê. Kyoso Jezú kyexile kutaka, Nzwá wemanene kumbandu a Madiya manya Jezú. Sumbala wexile ni ndolo yavulu maji Jezú wabhingi kwa Nzwá phala kulanga Madiya. (Nzwá 19:26, 27) Ojiphange jamala ni j’ahatu ja Jezú ejidikila o ibhindamu ya Madiya muxitu, maji nange mudyâ kikwexile muthu wakitukile kyá dixibulu dya Jezú. Kyenyiki Jezú kamesenene ngó muthu phala kumulanga muxitu maji ni munzumbi we.

16. Nzwá wexile ni ikalakalu yebhi?

¹⁶ Nzwá wexile ni ikalakalu yavulu. Kuma mwene wexile poxolo, mwene watokalele kukala kupholo dya kikalakalu kyakuboka. Mwene nange wexile dikaza, kyenyiki watokalele kulanga o ibhindamu yamwiji wê muxitu ni munzumbi. (1 Kol. 9:5) Ihi itena kudilonga o atwameni amiji muphangu ya Nzwá?

17. Mukonda dyahi omutwameni wamwiji watokala kulanga o ibhandamu yamwiji wê munzumbi?

¹⁷ Omutwameni wamwiji nange wala ni ikalakalu yavulu. Mukifika, mwene watokala kukala mukalakadi wanguzu phala owendelu wê uximane Jihova. (Efe. 6:5, 6; Titu 2:9, 10) Nange mwene wala ni kikalakalu, kala, kyakuswinisa ojiphange mukilunga ni kukala kupholo dya kikalakalu kyakuboka mukilunga. Mwene watokala kudilonga o Bibidya kumoxi ni muhatu wê ni twana twê. Mwene wala ni kikalakalu kyakulanga osawidi yamwiji wê, kusota kwijiya kyebhi kyamudivwa ni kyebhi kyala munzumbi. Athu aso ku mwiji andasakidila onguzu yê.—Efe. 5:28, 29; 6:4.

18. Ihi yejidile Nzwá?

¹⁸ Nzwá watungile mumivu yavulu, mwene wasangulukile kumwenyu. Mwene wadibhana  ni ibhidi yavulu yejizozesa okixikanu kyê. Mwene wabhange yoso phala kubelesela okitumu kya Jezú, kala okitumu kyakuzola ojiphange. Mukonda dya kiki Nzwá wejidile ni kidi kyoso kwila Jihova ni Jezú amuzolele ni kwila ejimubhana onguzu phala kutolola o ibhidi yoso. (Nzwá 14:15-17; 15:10; 1 Nzwá 4:16) Seku kima kyejibhanga Satanji phala kufidisa Nzwá kuzola ojiphange jê ni kulondekesa ohenda yê bhukaxi ka izwelu ni ibhangelu.

19. Omukanda 1 Nzwá 4:7 utuswinisa kubhanga ihi ni mukonda dyahi?

¹⁹ Kala Nzwá, etu we twatungu kumundu wa Satanaji kwala o athu akambe henda. (1 Nzwá 3:1, 10) Mukidi Satanaji wamesena kwila tweha okuzola ojiphange jetu, maji kiki kyandabhita ngo se etu twehela. Kyenyiki sola kuzola ojiphange, ni kulondekesa ohenda yenyi bhukaxi ka ima i uzwela ni ima i ubhanga. Mukubhanga kiki eye wandasanguluka mukubhanga mbandu yamwiji wa Jihova ni kuzediwa kumwenyu.—Tanga 1 Nzwá 4:7.