1. Һʹьзкьрьна Хԝәде чаԝа ль сәр тә һʹӧкӧм дькә?

«ХԜӘДЕ һʹьзкьрьн ә» (1 Йуһʹәнна 4:8). Бь ван готьна, Йуһʹәнна рʹастикә һʹимгьрти тинә бира мә: Хԝәде һьм Чʹәʹвканийа жийане һьм жи Чʹәʹвканийа һʹьзкьрьне йә. Бәле, Йаһоԝа мә һʹьз дькә. Бь сайа һʹьзкьрьна ԝи, әм хԝә бехоф, бәхтәԝар у дьлрʹьһʹәт тʹәхмин дькьн.

2. Ль гора Мәтта 22:37-40, дӧ тʹәмийед һәри мәзьн кʹижан ьн, у бәлки ль мә чьма зор те кӧ әм тʹәмийа дӧда пек биньн?

² Әм шагьртед Иса Мәсиһ нә, у әм гәрәке һʹьзкьрьне әʹйан бькьн, чьмки әва тʹәми йә (Мәтта 22:37-40 бьхунә). Фәʹмдари йә ль мә зор найе кӧ әм гӧһ бьдьн тʹәмийа пешьн, чьмки Йаһоԝа беԛьсур ә, ԛәнщ ә у бона мә хәм дькә. Ле бәле, бәлки щарна ль мә зор те кӧ әм тʹәмийа дӧда пек биньн. Гәло чьма? Чьмки хушк у бьред мә – йед кӧ мәрьвед мә йед һәри незик ьн – ԛьсурдар ьн. Щар-щара, готьн у кьрьнед ԝан дькарьн мә әʹщьз кьн. Йаһоԝа заньбу кӧ әв чәтьнайи ԝе һәбә. Ләма, әԝи бь сайа һьнә ньвискʹаред Кʹьтеба Пироз нишани мә кьрийә кӧ гәрәке әм чьма у чаԝа һәвдӧ һʹьз бькьн. Йәк жь ван ньвискʹара, Йуһʹәннайе шанди бу (1 Йуһʹәнна 3:11, 12).

3. Ньвисаред Йуһʹәнна дина мә дькʹьшиньн сәр чь?

³ Дь ньвисаред хԝәда, Йуһʹәннайе шанди гәләк щара дьгот кӧ лазьм ә ԝәки шагьртед Иса һʹьзкьрьне нишан бькьн. Гава Йуһʹәнна дәрһәԛа жийина Иса Мәсиһ ньвиси, әԝи хәбәра «һʹьзкьрьн», жь Мәтта, Марԛос у Луԛа зедәтьр  да хәбате. Ԝәхта кӧ Йуһʹәнна «кʹьтеба Йуһʹәнна» у се нәʹмед хԝә ньвисин, әԝ ԝәкә 100 сали бу. Әв ньвисаред кӧ жь бина бәр Хԝәде нә, мә һин дькьн кӧ һʹьзкьрьн гәрәке ль сәр һʹәму кьрьнед мә һʹӧкӧм бькә (1 Йуһʹәнна 4:10, 11). Ле бәле, Йуһʹәннарʹа жи ԝәхт лазьм бу кӧ әԝ ве дәрсе һин бә.

4. Гәло Йуһʹәнна һәртʹьм кәсед дьнрʹа һʹьзкьрьн әʹйан дькьр?

⁴ Ԝәхта кӧ Йуһʹәнна һе хорт бу, әԝи щарна һʹьзкьрьн әʹйан нәдькьр. Мәсәлә, щарәке Иса Мәсиһ у шагьртед ԝи бәрбь Оршәлимева дьчун. Гава әԝана дь гӧндәки Самәрирʹа дәрбаз дьбун, Самәрийа ча меван ԝана ԛәбул нәкьрьн. Гәло Йуһʹәннайе шанди ча сәр ве йәке ньһерʹи? Әԝи хԝәст кӧ «жь әʹзмен агьр . . . бьбарә у ԛьрʹа ван бинә»! (Луԛа 9:52-56). Щарәкә дьн жи, Йуһʹәнна шандийед дьнрʹа һʹьзкьрьн әʹйан нәкьр. Ӧса те фәʹм кьрьн кӧ Йуһʹәнна у бьре ԝи Аԛуб дийа хԝәрʹа готьн кӧ бьра әԝ жь Иса Мәсиһ ӧса рʹьща бькә: «Бежә, кӧ әв һәр дӧ кӧрʹед мьн ль нав Пʹадшатийа тәда, йәк ль мьле тәйи рʹасте, йе дьн жи ль мьле тәйи чʹәпе рʹуне». Гава шандийед дьн бьһистьн кӧ Аԛуб у Йуһʹәнна чь кьрьн, әԝана гәләк һерс кʹәтьн! (Мәтта 20:20, 21, 24). Рʹаст ә Йуһʹәнна гәләк шаши дькьрьн, ле диса жи Иса ԝи һʹьз дькьр (Йуһʹәнна 21:7).

5. Ве готареда, әме дәрһәԛа чь хәбәр дьн?

⁵ Ве готареда, әме мәсәла Йуһʹәнна у һьнә готьнед ԝи йед дәрһәԛа һʹьзкьрьне леколин бькьн. Әв йәк ԝе мә һин кә кӧ әм чаԝа дькарьн хушк-бьрарʹа һʹьзкьрьне нишан бькьн. Ӧса жи, әме бьвиньн кӧ сәред малбәте чаԝа дькарьн избат бькьн кӧ әԝана малбәта хԝә һʹьз дькьн.

6. Йаһоԝа чаԝа нишан кьрийә кӧ әԝ мә һʹьз дькә?

⁶ Һʹьзкьрьн һьлбәт бь готьнед назьк у ширьн те нишандайин. Ле бәле, әв йәк нә бәс ә. Һʹьзкьрьна рʹасти гәрәке бь кьрьнед баш жи бе әʹйанкьрьне (Аԛуб 2:17, 26 жи бьньһерʹә). Мәсәлә, Йаһоԝа мә һʹьз дькә (1 Йуһʹәнна 4:19). Һʹьзкьрьна ԝи, жь готьнед хԝәш, йед кӧ ль Кʹьтеба Пироз һатьнә ньвисаре, әʹйан дьбә (Зәбур 25:10; Рʹомайи 8:38, 39). Ле бәле, әм һʹьзкьрьна Хԝәде нә тʹәне жь готьнед ԝи, ле жь кьрьнед ԝи жи дьвиньн. Йуһʹәннайе шанди ӧса ньвиси: «Бь ве йәке һʹьзкьрьна Хԝәде һьндава мәда хӧйа бу, гава кӧ әԝи Кӧрʹе хԝәйи Тайе Тʹәне шандә дьнйайе, ԝәки әм бь ԝи бьжин»  (1 Йуһʹәнна 4:9). Йаһоԝа изьн да кӧ Кӧрʹе ԝийи дәлал бона мә еше бькʹьшинә у бьмьрә (Йуһʹәнна 3:16). Гәло әв йәк избат накә кӧ Йаһоԝа Хԝәде бь рʹасти мә һʹьз дькә?

7. Иса Мәсиһ чаԝа избат кьр кӧ әԝ мә һʹьз дькә?

⁷ Иса Мәсиһ гәләк щар шагьртед хԝәрʹа дьгот кӧ әԝ ԝана һʹьз дькә (Йуһʹәнна 13:1; 15:15). Ле бәле, әԝи нә тʹәне бь готьнед хԝә, ле бь кьрьнед хԝә жи нишан дькьр кӧ әԝ ԝана чьԛас һʹьз дькә. Әԝи ӧса гот: «Тʹӧ һʹьзкьрьн сәр ԝе һʹьзкьрьнерʹа тʹӧнә, кӧ йәк әʹмьре хԝә бәр достед хԝәва бьдә» (Йуһʹәнна 15:13). Гава әм тиньн бәр чʹәʹве хԝә кӧ Йаһоԝа у Иса Мәсиһ бона мә чь кьрьнә, әв йәк гәрәке ль сәр мә чаԝа һʹӧкӧм бькә?

8. Ль гора 1 Йуһʹәнна 3:18, лазьм ә кӧ әм чь бькьн?

⁸ Гава әм гӧһдарийа Йаһоԝа у Иса Мәсиһ дькьн, әм избат дькьн кӧ әм ԝана һʹьз дькьн (Йуһʹәнна 14:15; 1 Йуһʹәнна 5:3). Йәк жь тʹәмийед Иса Мәсиһ әв бу кӧ әм һәвдӧ һʹьз бькьн (Йуһʹәнна 13:34, 35). Гәрәке әм нә тʹәне бь готьнед хԝә, ле бь кьрьнед хԝә жи нишан бькьн кӧ әм хушк-бьра һʹьз дькьн (1 Йуһʹәнна 3:18 бьхунә). Гәло әм чаԝа дькарьн избат бькьн кӧ әм ԝана һʹьз дькьн?

9. Бь сайа һʹьзкьрьне, Йуһʹәнна чь кьр?

⁹ Дәԝса кӧ ль щәм баве хԝә бьминә у тʹәви малбәта хԝә дь ише мәʹсигьртьнеда бьхәбьтә, Йуһʹәнна һʹәта даԝийа әʹмре хԝә али кәсед дьн дькьр кӧ әԝана Йаһоԝа у Иса Мәсиһ нас бькьн. Жийана кӧ Йуһʹәнна хԝәрʹа бьжарт, жийанәкә һеса нибу. Әԝ рʹасти зӧльме дьһат, у незики хьлазийа ԛьрʹна йәке, гава әԝ ида кал бу, әԝ һат аксоркьрьн (Кʹаред Шандийа 3:1; 4:1-3; 5:18; Әʹйанти 1:9). Гава Йуһʹәнна гьрти бу, чьмки мьзгина дәрһәԛа Иса Мәсиһ бәла дькьр, әԝи диса жи бона кәсед дьн хәм дькьр. Мәсәлә, ԝәхта кӧ Йуһʹәнна ль гьрава Патмосе бу, әԝи кʹьтеба Әʹйанти ньвиси у чәнд щьватарʹа шанд, ԝәки әԝана дәрһәԛа «тьштед кӧ гәрәке зутьрәке бьԛәԝьмьн» бьзаньбьн (Әʹйанти 1:1). Дьԛәԝьмә паши кӧ әԝ жь Патмосе аза бу, әԝи һьнге кʹьтеба хԝә дәрһәԛа жийан у хьзмәта Иса Мәсиһ ньвиси. Ӧса жи, әԝи се нәʹмә ньвисин, ԝәки хушк-бьра һелан бькә у ԝана ԛәԝи бькә. Гәло тӧ чаԝа дькари фәдакʹарийа Йуһʹәнна хԝәрʹа бьки мәсәлә?

10. Тӧ чаԝа дькари нишан бьки кӧ тӧ мәрьва һʹьз дьки?

¹⁰ Һәгәр тӧ инсана һʹьз дьки, әв йәк ԝе ль сәр сафикьрьнед тә һʹӧкӧм бькә. Дьнйа Шәйтʹан дьхԝазә кӧ тӧ ԝәхт у ԛәԝата хԝә тʹәне бона кʹара хԝә бьди хәбате. Система иройин мәрьва һелан дькә кӧ әԝ бькʹәвьн пәй мал у мьлкʹ йан жи пәй наве хԝә. Ле бәле, сәр тʹәмамийа дьнйайе, мьзгинванед фәдакʹар чь жь дәсте ԝан те дькьн кӧ мьзгине бәла бькьн у али мәрьва бькьн ԝәки әԝана незики Йаһоԝа бьн. Һьнә мьзгинван ча хьзмәткʹаред һәртʹьм хьзмәт дькьн.

11. Гәләк мьзгинванед амьн чаԝа избат дькьн кӧ әԝана Йаһоԝа у хушк-бьра һʹьз дькьн?

¹¹ Гәләк хушк у бьра дьхәбьтьн кӧ әʹбура хԝә у малбәта хԝә бькьн. Ле диса жи, әв мьзгинванед амьн бь дьл у щан пьштгьрийа тʹәшкиләта Хԝәде дькьн. Мәсәлә, һʹәму мьзгинван дькарьн бь пʹәра пьштгьрийа шьхӧле Пʹадшатийе бькьн. Ӧса жи, һьнә мьзгинван паши тʹәшԛәлед тʹәбийәте аликʹари дьдьн йан жи проектед авакьрьнеда дьхәбьтьн. Бь ви аԝайи, әԝана избат дькьн кӧ әԝана Хԝәде у инсана һʹьз дькьн. Һәр һʹәфтә,  әм дьчьн щьвина, чьмки әм хушк у бьра һʹьз дькьн. Әм чьԛас ԝәстийайи бьн жи, әм дьчьнә щьвина. Әм чьԛас шәрмокә бьн жи, әм ль щьвина щабед хԝә дьдьн. Ӧса жи, чьԛас проблемед мә һәбьн жи, әм пешийа у паши щьвате кәсед дьн дьшьдиньн (Ибрани 10:24, 25). Әм бона шьхӧлед кӧ мьзгинванед дьн дькьн гәләк рʹази нә!

12. Йуһʹәнна ча избат дькьр кӧ әԝ хушк у бьра һʹьз дькә?

¹² Йуһʹәнна хушк у бьра һʹьз дькьр, у ләма әԝи нә тʹәне пʹайе ԝан дьда, ле ширәт жи дьда ԝан. Мәсәлә, дь нәʹмед хԝәда, Йуһʹәнна һьм сәва баԝәрийа ԝан у кьрьнед ԝан йед баш пәсне ԝан да, һьм жи дәрһәԛа гӧнәкьрьнеда рʹастә-рʹаст ширәт да ԝан (1 Йуһʹәнна 1:8–2:1, 13, 14). Мина Йуһʹәнна, гава хушк у бьра тьштед баш дькьн, гәрәке әм пʹайе ԝан бьдьн. Ле һәгәр кәсәк ньһерʹандьн йан хәйсәтәки нәбаш пешда тинә, гәрәке әм бь нәрми ширәте бьдьн ԝи. Һьлбәт һеса нинә кӧ әм ширәте бьдьн һәваләки, ле Кʹьтеба Пироз дьбежә кӧ достед рʹасти ширәта дьдьн һәвдӧ (Мәтʹәлок 27:17).

13. Гәрәке әм чь нәкьн?

¹³ Щарна, әм һьнә тьшта накьн, чьмки әм хушк у бьра һʹьз дькьн. Мәсәлә, әм сәва готьнед ԝан зу әʹщьз набьн. Бинә бәр чʹәʹве хԝә кӧ незики хьлазийа әʹмре Иса Мәсиһ, чь ԛәԝьми. Әԝи шагьртед хԝәрʹа гот кӧ жь бо кӧ әԝана жийане бьстиньн, гәрәке әԝана гоште ԝи бьхԝьн у хуна ԝи вәхԝьн (Йуһʹәнна 6:53-57). Гәләк шандийед Иса Мәсиһ һаԛас әʹщебмайи ман кӧ ԝана тʹәрка ԝи да. Ле бәле, достед ԝи йед рʹаст – мәсәлә Йуһʹәнна – бь амьни тʹәви ԝи ма. Мина кәсед дьн, ԝана жи фәʹм нәдькьр кӧ Иса Мәсиһ дьхԝәст чь бьгота, у дьԛәԝьмә әԝана жи сәва готьнед ԝи әʹщебмайи ман. Ле бәле, әԝана нәдьфькьрин кӧ готьнед ԝи шаш ьн. Әԝана баԝәр бун кӧ готьнед ԝи рʹаст ьн, ләма әԝана итʹбарийа хԝә ԝи дьанин (Йуһʹәнна 6:60, 66-69). Гәләк фәрз ә кӧ әм жи сәва готьнед һәвалед хԝә зу әʹщьз нәбьн у нәхәйдьн. Гәрәке әм мәщале бьдьн ԝана кӧ әԝ готьнед хԝә зәлал бькьн (Мәтʹәлок 18:13; Ԝаиз 7:9).

14. Гәрәке әм чьма изне нәдьн кӧ дь дьле мәда нәфрʹәти мәзьн бьбә?

¹⁴ Ӧса жи, Йуһʹәнна әм тʹәми кьрьнә кӧ әм хушк у бьра нәфрʹәт нәкьн. Һәгәр әм ве ширәте пек нәйньн, Шәйтʹан дькарә  ль сәр мә һʹӧкӧм бькә (1 Йуһʹәнна 2:11; 3:15). Незики хьлазийа ԛьрʹна йәке, һʹале һьнә хушк у бьра ӧса бу. Шәйтʹан пʹьрʹ хирәт дькьр кӧ дь нав ԝанда нәфрʹәте пешда бинә у йәктийа ԝан хьраб бькә. Ԝәхта кӧ Йуһʹәнна нәʹмед хԝә дьньвисин, дь щьватада һьнә кәс кʹәтьбун бәр байе Шәйтʹан. Мәсәлә, мәрьвәки бь наве Дийотрәфис дӧтирәти дьхьст нав щьвате (3 Йуһʹәнна 9, 10). Дийотрәфис йәки ԛӧрʹә бу, у әԝи ԝан рʹуспийа кӧ кʹома рʹебәрийе шандьбу, ԛәбул нәдькьр. Бь сәрда, әԝи дьхԝәст ԝәки кәсед кӧ бьред щабдар ль малед хԝә дькьрьн меван, жь щьвате бен дәрхьстьн. Иро жи, Шәйтʹан чь жь дәсте ԝи те дькә кӧ дӧтирәтийе нав мә хә. Бьра әм тʹӧ щара изне нәдьн кӧ нәфрʹәти йәктийа мә хьраб бькә.

15. Гәрәке сәред малбәте чь бир нәкьн?

¹⁵ Сәред малбәте, йед кӧ нәфәред хԝә һʹьз дькьн, бона һʹәԝщәдарийед ԝан хәм дькьн (1 Тимотʹейо 5:8). Ле бәле, гәрәке әԝана бир нәкьн кӧ мал у мьлкʹ нькарә һʹәԝщәдарийед малбәте йед рʹӧһʹани тʹер бькә (Мәтта 5:3). Иса Мәсиһ бона сәред малбәте мәсәләкә баш һишт. Ль гора кʹьтеба Йуһʹәнна, гава Иса Мәсиһ ль сәр стуне мьхкьри бу у ль бәр мьрьне бу, әԝи һәла һе ԝи чахи жи дәрһәԛа малбәта хԝә хәм дькьр. Йуһʹәнна у дийа Иса незики стуне сәкьнибун. Еша Иса Мәсиһ чьԛас гьран бу жи, әԝи Йуһʹәннарʹа гот кӧ бьра әԝ Мәрйәме хԝәй бькә (Йуһʹәнна 19:26, 27). Хушк у бьред Иса Мәсиһ ԝе һьлбәт бона һʹәԝщед физики йед Мәрйәме хәм бькьрана, ле әшкәрә йә кӧ ль ԝе дәме, әԝ һе нәбьбун шагьртед ԝи. Ләма, Иса Мәсиһ дьхԝәст кӧ Мәрйәм нә тʹәне жь алийе физикида, ле жь алийе рʹӧһʹанива жи бе хԝәйкьрьн.

16. Чь щабдарийед Йуһʹәнна һәбун?

¹⁶ Гәләк щабдарийед Йуһʹәнна һәбун. Әԝ жи йәк жь шандийа бу, у әԝи рʹебәрийа ише бәлакьрьна мьзгине дькьр. Ӧса жи, әԝ дьбәкә зәԝьщи бу, ләма лазьм бу кӧ әԝ бона һʹәԝщед нәфәред хԝә йед физики у рʹӧһʹани жи хәм бькә (1 Корьнтʹи 9:5). Гәло сәред малбәте дькарьн жь ԝи чь дәрсе бьстиньн?

17. Чьма фәрз ә кӧ сәред малбәте бона һʹәԝщед рʹӧһʹани йед нәфәред хԝә хәм бькьн?

¹⁷ Щабдарийед сәред малбәте гәләк ьн. Мәсәлә, бона рʹумәта наве  Йаһоԝа, гәрәке әԝ дь хәбата хԝәда хирәт бә (Әфәси 6:5, 6; Тито 2:9, 10). Ӧса жи, бәлки дь щьватеда жи щабдарийед ԝи һәнә. Мәсәлә, әԝ дьбәкә шьвантийе дькә у рʹебәрийа ише бәлакьрьна мьзгине дькә. Хенщи ве йәке, фәрз ә кӧ әԝ Кʹьтеба Пироз һәр һʹәфтә тʹәви жьн-зарʹед хԝә леколин бькә. Бь ве йәке, әԝ бона һʹәԝщед физики, емосийали у рʹӧһʹани йед нәфәред хԝә хәм дькә, у малбәта ԝи щәфе ԝи дьшекьриньн (Әфәси 5:28, 29; 6:4).

18. Йуһʹәнна чьда баԝәр бу?

¹⁸ Әʹмре Йуһʹәнна пʹьрʹ дьреж бу, у әԝ рʹасти гәләк тәнгасийа дьһат, йед кӧ дькарьбун баԝәрийа ԝи сьст кьрана. Ле бәле, әԝи һәртʹьм хирәт дькьр кӧ тʹәмийед Иса Мәсиһ бинә сери. Йәк жь ван тʹәмийа әв ә кӧ гәрәке әм хушк у бьра һʹьз бькьн. Ләма, Йуһʹәнна баԝәр бу кӧ Йаһоԝа у Иса Мәсиһ ԝи һʹьз дькьн у кӧ әԝе ԛәԝате бьдьн ԝи ԝәки әԝ сәри бь һʹәму тәнгасийарʹа дәрхә (Йуһʹәнна 14:15-17; 15:10; 1 Йуһʹәнна 4:16). Бәле, Шәйтʹан у дьнйа ԝи нькарьбу һʹьзкьрьна Йуһʹәннарʹа бьбә астәнг. Бь готьн у кьрьнед хԝә, әԝи һәртʹьм нишан дькьр кӧ әԝ хушк у бьра һʹьз дькә.

19. 1 Йуһʹәнна 4:7 мә һелан дькә кӧ әм чь бькьн, у чьма?

¹⁹ Мина Йуһʹәнна, әм жи дьнйа Шәйтʹанда дьжин (1 Йуһʹәнна 3:1, 10). Шәйтʹан дьхԝазә һʹьзкьрьна дь нав мәда сар бькә, ле һʹәта кӧ әм изне нәдьн ԝи, әԝе нькарьбә бьгьһижә нета хԝә. Ԝәрә әм бь готьн у кьрьнед хԝә избат бькьн кӧ әм хушк у бьред хԝә һʹьз дькьн. Һәгәр һʹьзкьрьна мә сар нәбә, әме дь малбәта Йаһоԝада ша у бәхтәԝар бьн! (1 Йуһʹәнна 4:7 бьхунә).