1. Aw Gɔd in lɔv de mek yu fil?

APƆSUL Jɔn bin rayt se, “Gɔd na lɔv.” (1 Jɔn 4:​8) Wi no se na Gɔd mek layf, bɔt di wɔd dɛn we Jɔn bin rayt ɛp wi fɔ mɛmba se lɔv kɔmɔt frɔm Gɔd. Jiova lɛk wi! In lɔv de mek wi fil sef, wi gladi, ɛn satisfay.

2. Akɔdin to Matyu 22:​37-40, wetin na di tu kɔmand dɛn we pas ɔl? Wetin mek sɔntɛnde i nɔ kin izi fɔ lɛ wi obe di sɛkɔn wan?

² Fɔ sho lɔv na kɔmand frɔm Jizɔs. So Kristian dɛn nɔ go pik di tɛm we dɛn want fɔ sho lɔv ɔ di tɛm we dɛn nɔ want fɔ sho lɔv. (Rid Matyu 22:​37-40.) We wi sabi Jiova gud gud wan, sɔntɛm i go izi fɔ lɛ wi obe di fɔs kɔmand. Bikɔs Jiova pafɛkt, i bisin bɔt wi ɛn i de trit wi fayn. Bɔt sɔntɛm i nɔ go izi fɔ lɛ wi obe di sɛkɔn kɔmand. Wetin mek? Na bikɔs wi brɔda ɛn sista dɛn we na wi neba dɛn, na pipul dɛn we nɔ pafɛkt. So sɔntɛnde, dɛn kin tɔk ɛn du tin dɛn we kin mek wi fil lɛk dɛn nɔ bisin bɔt wi ɛn dɛn nɔ de trit wi fayn. Jiova bin no se tin lɛk dat go apin, na dat mek i bin mek sɔm man dɛn we rayt di Baybul rayt sɔm patikyula advays dɛn we go ɛp wi fɔ no wetin mek wi fɔ sho lɔv to wi brɔda ɛn sista dɛn, ɛn aw wi go du dat. Wan pan di man dɛn we bin rayt dɛn advays dɛn de na Jɔn.—1 Jɔn 3:​11, 12.

3. Wetin Jɔn bin de rayt bɔt bɔku tɛm?

³ Jɔn bin rayt bɔku tɛm se Kristian dɛn fɔ sho lɔv. Infakt, we Jɔn bin de rayt bɔt Jizɔs in layf, i bin yuz wɔd dɛn lɛk “lɔv” ɛn “lɛk” pas di we aw dɛn rayt bɔt am na  Matyu, Mak, ɛn Lyuk. Jɔn bin ol lɛk ɔndrɛd ia we i rayt di Gɔspɛl we gɛt in nem ɛn in tri lɛta dɛn. Di tin dɛn we Jiova bin dayrɛkt Jɔn fɔ rayt ɛp wi fɔ no se lɔv fɔ afɛkt ɔltin we Kristian de du. (1 Jɔn 4:​10, 11) Bɔt nɔto wantɛm wantɛm Jɔn bin lan da lɛsin de.

4. Jɔn bin de sho lɔv to ɔda pipul dɛn ɔltɛm?

⁴ We Jɔn bin yɔŋ, i nɔ bin de sho lɔv ɔltɛm. Fɔ ɛgzampul, wan tɛm, Jizɔs ɛn in disaypul dɛn bin de go na Jerusɛlɛm, ɛn dɛn pas na Sameria. Wan Samɛritan vilej bin de usay di pipul dɛn nɔ gri fɔ wɛlkɔm dɛn. Wetin Jɔn bin du? I bin aks Jizɔs if lɛ dɛn mek faya kam dɔŋ frɔm ɛvin ɛn kil ɔl di pipul dɛn na di vilej. (Lyuk 9:​52-56) Wan ɔda tɛm, Jɔn nɔ bin sho se i lɛk di ɔda apɔsul dɛn. In ɛn in brɔda Jems bin bɛl dɛn mama fɔ mek i go beg Jizɔs fɔ gi dɛn ay pozishɔn fɔ sidɔm nia am na di Kiŋdɔm. We di ɔda apɔsul dɛn bin yɛri bɔt dat, dɛn bin vɛks bad bad wan. (Mat. 20:​20, 21, 24) Bɔt pan ɔl we Jɔn bin de mek ɔl dɛn mistek dɛn de, Jizɔs bin lɛk am.—Jɔn 21:​7.

5. Wetin wi go tɔk bɔt insay dis atikul?

⁵ Insay dis atikul, wi go tɔk bɔt Jɔn in ɛgzampul ɛn sɔm pan di tin dɛn we i bin rayt bɔt lɔv. As wi de du dat, wi go lan aw wi go sho lɔv to wi brɔda ɛn sista dɛn. Wi go lan bak bɔt wan impɔtant we we di wan dɛn we de oba dɛn famili go sho se dɛn lɛk dɛn famili.

6. Aw Jiova dɔn sho se i lɛk wi?

⁶ Sɔntɛnde, wi go de tink se fɔ sho se wi lɛk ɔda pipul dɛn, wi jɔs nid fɔ fil gud bɔt dɛn na wi at ɛn tɔk fayn to dɛn. Bɔt if wi rili lɛk pɔsin, wi fɔ du tin dɛn we de sho se wi lɛk am. (Luk Jems 2:​17, 26.) Fɔ ɛgzampul, Jiova lɛk wi. (1 Jɔn 4:​19) Ɛn i sho dat bay di fayn wɔd dɛn we i mek dɛn rayt insay di Baybul. (Sam 25:​10; Rom. 8:​38, 39) Bɔt nɔto di tin dɛn we Jiova tɔk nɔmɔ mek wi no se i lɛk wi. Wi no bak se i lɛk wi bay di tin dɛn we i de du. Jɔn bin rayt se: “Na dis we Gɔd sho se i lɛk wi, we i sɛn in wangren Pikin we insɛf sɛf mek, fɔ kam na di wɔl so dat i go mek wi gɛt layf.” (1 Jɔn 4:​9) Jiova bin alaw in Pikin we i rili lɛk fɔ kam sɔfa ɛn day fɔ wi. (Jɔn 3:​16) Dis tin we Jiova du mek wi shɔ se i rili lɛk wi.

7. Wetin Jizɔs bin du fɔ sho se i lɛk wi?

⁷ Jizɔs bin tɛl in disaypul dɛn se i lɛk  dɛn. (Jɔn 13:​1; 15:​15) I nɔ bin jɔs tɔk se i lɛk wi ɛn dɛn, bɔt i bin du tin dɛn fɔ sho se i lɛk wi ɛn i lɛk dɛn bak. I bin tɛl dɛn se: “Nɔbɔdi nɔ gɛt lɔv pas di pɔsin we gi in layf fɔ in padi dɛn.” (Jɔn 15:​13) We wi tink bɔt wetin Jiova ɛn Jizɔs dɔn du fɔ wi, aw dat fɔ afɛkt wi?

8. Wetin 1 Jɔn 3:​18 se wi fɔ du?

⁸ Wi go sho se wi lɛk Jiova ɛn Jizɔs bay we wi de obe dɛn. (Jɔn 14:​15; 1 Jɔn 5:​3) Ɛn Jizɔs bin tɛl wi se wi fɔ lɛk wi brɔda ɛn sista dɛn. (Jɔn 13:​34, 35) Wi nɔ fɔ jɔs tɛl wi brɔda ɛn sista dɛn se wi lɛk dɛn, bɔt wi fɔ sho se wi lɛk dɛn bay di tin dɛn we wi de du. (Rid 1 Jɔn 3:​18.) Wetin na sɔm tin dɛn we wi go du fɔ sho se wi lɛk dɛn?

9. Wetin lɔv bin mek Jɔn du?

⁹ Jɔn fɔ dɔn kɔntinyu fɔ de wit in papa fɔ du di fishin wok ɛn fɔ mek mɔ mɔni. Bɔt i nɔ bin du dat. Bifo dat, i bin yuz in layf fɔ ɛp ɔda pipul dɛn fɔ lan di tru bɔt Jiova ɛn Jizɔs. Nɔto izi layf Jɔn bin disayd fɔ liv. Dɛn bin de mek i sɔfa, ɛn we di fɔstɛm Kristian dɛn tɛm bin want fɔ dɔn, dɛn bin sɛn am na ɛgzayl; i bin dɔn ol da tɛm de. (Akt 3:​1; 4:​1-3; 5:​18; Rɛv. 1:​9) Ivin we Jɔn bin de na prizin bikɔs i bin de prich bɔt Jizɔs, i bin stil sho se i de tink bɔt ɔda pipul dɛn. Fɔ ɛgzampul, we i bin de na di ayland we dɛn kɔl Patmɔs, i bin rayt di buk we nem Rɛvɛleshɔn ɛn sɛn am to di kɔngrigeshɔn dɛn so dat dɛn go no di tin dɛn “we go apin jisnɔ.” (Rɛv. 1:​1) Ɛn sɔntɛm, afta we dɛn fri Jɔn frɔm di prizin na Patmɔs, na da tɛm de i bin rayt di Gɔspɛl bɔt Jizɔs in layf ɛn prichin wok. I bin rayt tri lɛta dɛn bak fɔ ɛnkɔrej in brɔda ɛn sista dɛn. Aw yu go falamakata dis we aw Jɔn bin sho lɔv ɛn nɔ jɔs bisin bɔt insɛf?

10. Aw yu go sho se yu lɛk pipul dɛn?

¹⁰ Yu go sho se yu lɛk pipul dɛn bay wetin yu disayd fɔ du wit yu layf. Setan in wɔl go want fɔ mek yu spɛn ɔl yu tɛm ɛn trɛnk fɔ tink bɔt yusɛf, tray fɔ mek mɔni fɔ yusɛf, ɔ fɔ mek nem fɔ yusɛf. Bɔt Kristian dɛn we nɔ jɔs bisin bɔt dɛnsɛf de spɛn bɔku pan dɛn tɛm fɔ prich di gud nyuz ɛn ɛp ɔda pipul dɛn fɔ kam nia Jiova. Sɔm dɛn de ivin yuz ɔl dɛn tɛm fɔ prich ɛn tich.

11. Aw bɔku fetful pɔblisha dɛn kin sho se dɛn lɛk Jiova ɛn dɛn brɔda ɛn sista dɛn?

¹¹ Bɔku Kristian dɛn kin nid fɔ wok fultaym so dat dɛn go sɔpɔt dɛnsɛf ɛn dɛn famili. Bɔt stil, dɛn fetful pɔblisha dɛn ya de du ɔl wetin dɛn ebul fɔ sɔpɔt Gɔd in ɔganayzeshɔn. Fɔ ɛgzampul, sɔm dɛn kin ebul fɔ ɛp pan dizasta rilif wok, ɔda wan dɛn kin ɛp fɔ bil ples dɛn fɔ wɔship, ɛn ɔlman gɛt di ɔnɔ fɔ gi kɔntribyushɔn fɔ sɔpɔt di prichin wok ɔlsay na di wɔl. Dɛn kin du ɔl dɛn tin dɛn ya bikɔs dɛn lɛk Gɔd ɛn ɔda pipul dɛn. Ɛni wik, wi go sho se wi lɛk wi brɔda ɛn sista dɛn bay we wi de atɛnd mitin ɛn gi kɔmɛnt. Pan ɔl we sɔntɛnde wi kin taya, wi kin stil go mitin. Pan ɔl we wi kin fred, wi kin stil gi kɔmɛnt. Ɛn pan ɔl we wi kin gɛt wi yon prɔblɛm dɛn, wi kin ɛnkɔrej ɔda brɔda ɛn sista dɛn bifo ɛn afta mitin. (Ibru. 10:​24, 25) Wi kin gladi we wi kin si di wok we wi brɔda ɛn sista dɛn de du.

12. Wetin na wan ɔda we we Jɔn bin sho se i lɛk in brɔda ɛn sista dɛn?

 ¹² Jɔn bin sho bak se i lɛk in brɔda ɛn sista dɛn bay we i nɔ jɔs tɛl dɛn tɛnki fɔ di tin dɛn we dɛn bin de du, bɔt bay we i bin advays dɛn. Fɔ ɛgzampul, we Jɔn bin de rayt in lɛta dɛn, i bin tɛl di brɔda ɛn sista dɛn tɛnki fɔ dɛn fet ɛn di gud wok dɛn we dɛn bin de du, bɔt i bin gi dɛn siriɔs advays bɔt sin. (1 Jɔn 1:​8–2:​1, 13, 14) Wisɛf nid fɔ tɛl wi brɔda ɛn sista dɛn tɛnki fɔ di gud tin dɛn we dɛn de du. Bɔt if wi si se pɔsin dɔn bigin gɛt bad abit, wi fɔ sho se wi lɛk am bay we wi tek tɛm advays am. Wi go nid fɔ gɛt maynd fɔ advays wi padi, bɔt di Baybul se tru padi de shap ɔ kɔrɛkt in kɔmpin.—Prɔv. 27:​17.

13. Wetin wi nɔ fɔ du?

¹³ Sɔntɛnde, wi go sho se wi lɛk wi brɔda ɛn sista dɛn bay we wi nɔ du sɔm tin dɛn. Fɔ ɛgzampul, wi nɔ go vɛks kwik bikɔs ɔf wetin dɛn se. Tink bɔt sɔntin we bin apin we Jizɔs bin de na dis wɔl. I bin tɛl in disaypul dɛn se fɔ mek dɛn gɛt layf, dɛn go nid fɔ it in bɔdi ɛn drink in blɔd. (Jɔn 6:​53-57) Dis tin we Jizɔs bin tɔk bin shɔk bɔku pan in disaypul dɛn, ɛn dɛn bin lɛf am. Bɔt Jɔn ɛn Jizɔs in ɔda tru tru padi dɛn bin kɔntinyu fɔ de wit am. Dɛn nɔ bin ɔndastand wetin Jizɔs tɔk, ɛn sɔntɛm dɛnsɛf bin sɔprayz. Bɔt Jizɔs dɛn in fetful padi dɛn ya nɔ bin jɔs tink se wetin i tɔk na bad tin ɛn dɛn vɛks pan am. Bifo dat, dɛn bin trɔst am bikɔs dɛn no se wetin i tɔk na tru. (Jɔn 6:​60, 66-69) So i rili impɔtant fɔ mek wi nɔ de vɛks kwik bikɔs ɔf wetin wi padi dɛn se. Bifo dat, wi fɔ gi dɛn chans fɔ ɛksplen wetin dɛn min.—Prɔv. 18:​13; Ɛkli. 7:​9.

14. Wetin mek wi nɔ fɔ ɛva et wi brɔda ɛn sista dɛn?

¹⁴ Jɔn bin ɛnkɔrej wi bak se wi nɔ fɔ et wi brɔda ɔ sista dɛn. If wi nɔ fala da advays de, wi go bigin du tin lɛk Setan. (1 Jɔn 2:​11; 3:​15) Dis bin apin to sɔm pipul dɛn di tɛm we di fɔstɛm Kristian dɛn tɛm bin want fɔ dɔn. Insay dɛn tɛm dɛn de, Setan bin de du ɔlkayn tin fɔ mek Gɔd in pipul dɛn et dɛnsɛf ɛn fɔ mek dɛn nɔ gɛt wanwɔd. Bay di tɛm we Jɔn bin rayt in lɛta dɛn, sɔm bad pipul dɛn we bin de biev lɛk Setan bin  dɔn jɔyn di kɔngrigeshɔn. Fɔ ɛgzampul, Dayɔtrifis bin de mek wanwɔd nɔ de na di kɔngrigeshɔn. (3 Jɔn 9, 10) I nɔ bin de rɛspɛkt di wan dɛn we di gɔvnin bɔdi bin de sɛn. I bin de ivin tray fɔ drɛb di wan dɛn na di kɔngrigeshɔn we bin de du gud to pipul dɛn we i nɔ bin lɛk. I bin de rili biev bad. Ivin insay wi tɛm, Setan stil de tray fɔ mek Gɔd in pipul dɛn nɔ gɛt wanwɔd ɛn fɔ mek dɛn lɛf fɔ sɔpɔt dɛnsɛf. Wi nɔ fɔ ɛva alaw dat fɔ apin.

15. Wetin pɔsin we de oba in famili fɔ mɛmba?

¹⁵ Wan impɔtant tin we pɔsin we de oba in famili go du fɔ sho se i lɛk dɛn na we i de gi dɛn di tin dɛn we dɛn nid fɔ liv. (1 Tim. 5:​8) Bɔt i fɔ mɛmba se di tin we impɔtant mɔ na fɔ ɛp in famili fɔ gɛt tayt padi biznɛs wit Jiova. (Mat. 5:​3) Tink bɔt di fayn ɛgzampul we Jizɔs bin sɛt fɔ di wan dɛn we de oba dɛn famili. Jɔn in Gɔspɛl bin ɛp wi fɔ no se di tɛm we Jizɔs bin de day na tik, i bin stil de tink bɔt in famili. Jɔn bin tinap nia Jizɔs in mama, Meri, na di say we dɛn bin de kil Jizɔs. Bɔt pan ɔl we Jizɔs bin de pan siriɔs pen, i bin tɛl Jɔn fɔ kia fɔ Meri. (Jɔn 19:​26, 27) Jizɔs bin gɛt brɔda ɛn sista dɛn we fɔ bin dɔn kia fɔ Meri ɛn gi am di tin dɛn we i nid, bɔt i tan lɛk se nɔn pan dɛn nɔ bin dɔn bi in disaypul yet. So Jizɔs bin want fɔ mek shɔ se Meri de wit pɔsin we go gi am di tin dɛn we i nid ɛn ɛnkɔrej am fɔ kɔntinyu fɔ sav Jiova.

16. Us wok dɛn Jɔn bin gɛt?

¹⁶ Jɔn bin gɛt bɔku wok fɔ du. In na bin apɔsul, so i bin nid fɔ gɛt zil ɛn de bifo pan di prichin wok. I go bi bak se i bin mared, so i bin nid fɔ de kia fɔ in famili ɛn gi dɛn tin dɛn we dɛn nid, ɛn ɛp dɛn bak fɔ gɛt tayt padi biznɛs wit Jiova. (1 Kɔr. 9:​5) Us lɛsin di wan dɛn we de oba dɛn famili kin lan frɔm dis?

17. Wetin mek i impɔtant fɔ mek di wan dɛn we de oba dɛn famili ɛp dɛn fɔ kɔntinyu fɔ gɛt tayt padi biznɛs wit Jiova?

¹⁷ I go bi se wan brɔda we de oba in famili gɛt bɔku impɔtant wok dɛn fɔ du. Fɔ ɛgzampul, i fɔ wok tranga wan we i de na wokples ɛn biev fayn so dat i go briŋ prez to Jiova. (Ɛfi. 6:​5, 6; Tay.  2:​9, 10) Ɛn i go bi se i gɛt wok dɛn na di kɔngrigeshɔn, lɛk fɔ du shɛpadin visit ɛn fɔ de bifo fɔ du di prichin wok. Pan ɔl we i de du dɛn tin dɛn de, i impɔtant bak fɔ mek i go de stɔdi di Baybul wit in wɛf ɛn in pikin dɛn ɔltɛm. Na in gɛt di wok fɔ ɛp in famili fɔ gɛt wɛlbɔdi, fɔ gɛt gladi-at, ɛn fɔ gɛt tayt padi biznɛs wit Jiova. Dɛn go rili gladi fɔ we i de du dɛn tin dɛn ya.—Ɛfi. 5:​28, 29; 6:​4.

18. Wetin Jɔn bin shɔ bɔt?

¹⁸ Jɔn bin liv fɔ lɔng, ɛn bɔku fayn fayn tin dɛn bin apin to am. Bɔku tin nɔ bin izi fɔ am, ɛn dat bin fɔ dɔn mek i lɛf fɔ gɛt fet. Bɔt i bin de du in bɛst ɔltɛm fɔ obe Jizɔs in kɔmand dɛn, ɛn wan pan dɛn kɔmand dɛn de na fɔ lɛk in brɔda ɛn sista dɛn. Bikɔs ɔf dat, Jɔn bin shɔ se Jiova ɛn Jizɔs lɛk am ɛn dɛn go gi am di trɛnk we i nid fɔ bia ɛni prɔblɛm we i gɛt. (Jɔn 14:​15-17; 15:​10; 1 Jɔn 4:​16) Setan ɛn in wɔl nɔ bin stɔp Jɔn fɔ mek i nɔ lɛk in brɔda ɛn sista dɛn, ɛn i bin sho dat bay di tin dɛn we i bin de tɔk ɛn di tin dɛn we i bin de du.

19. Wetin 1 Jɔn 4:​7 ɛnkɔrej wi fɔ du? Wetin mek?

¹⁹ Lɛk Jɔn, wisɛf de na wɔl we Setan de kɔntrol, ɛn i nɔ lɛk ɛnibɔdi. (1 Jɔn 3:​1, 10) Setan go want fɔ mek wi lɛf fɔ sho se wi lɛk wi brɔda ɛn sista dɛn, bɔt i nɔ go ebul if wi nɔ alaw am. Lɛ wi mekɔp wi maynd fɔ lɛk wi brɔda ɛn sista dɛn, fɔ tɛl dɛn se wi lɛk dɛn, ɛn fɔ du tin we de sho se wi lɛk dɛn. We wi du dat, wi go gladi fɔ de na Jiova in famili, ɛn wi go gɛt gladi-at.—Rid 1 Jɔn 4:​7.