1. Vɛɛ kaala Mɛlɛka chɔm naa wo tosa yɛ ma sinaŋ?

MI CHƆŊ poonyiaa aa: “Wana kaalaa Mɛlɛka cho ni.” (1 Chɔŋ 4:​8, NWT) Diomnda tɛtɛlɛlaŋ ndaŋ la loonuŋ naa a tonya sɔvɛ sɔviɔɔ hoo okɔɔ. Ndu cho ni maa, Mɛlɛka ke naa yoomoo ni, nduyɛ ndu koni kaalaa chɛŋ vɛlɛ o ba ni. Chɛhowa kaala naa tau. Ndu manda naa ni, nduyɛ mi kaala o chɔm naa wo tosa miŋ wa a kɔl kɛndɛ tau vɛlɛ miŋ hini kɔl.

2. A mɛɛ Maatiu 22:​37-40 dimi yɛ, ɔɔ sawala tiɔɔŋ nda hiou sawalaŋ kpou wo, nduyɛ le yɛɛ i wa yɛ ikala le sawa diiŋ ndɔɔ diikɔŋndo?

² Naa Kilisiɔŋnda nɔ miŋ chɔm kaalaa. Ŋ nɔ miŋ nuuviaa lakafɛi le hei le kanifuule, sawaa i cho ni. (Nuawɔ Maatiu 22:​37-40.) Te ŋ sina pɛ Chɛhowa nyɛkɛndɛi, i wa tɛtɛlɛ le miŋ diikuŋ sawa tasoo hoo. Ndu cho ni, Chɛhowa kaalaa. Wana walaŋndo Chɛhowa cho ni. O buulaŋ le naa, nduyɛ mbo chɔm sinapɛŋgoo a mɛɛ o bii naa yɛ. Kɛ lepum mii wa ikala le sawa diiŋ ndɔɔ diikɔŋndo. Le yɛɛ? Kanifuule, puaapiliaa a ndepiliaa naa vɛlɛ a wanaa naŋ chiɛɛliaŋnda a cho walaŋ te. Le hei, lepum ma dimi ɔɔ tosa sɔɔŋ tɛɛmbuu naa kɔllo woŋ. Chɛhowa sina maa, i cho wa naa ikala o ba le sawa diiŋ ndɔɔ hoo diikɔŋndo. Lelaŋ, mbo soliŋ waŋnda apum kpeku le ma poonyiaa le sabu i cho suɛi sɔvɛ le miŋ kaaliaŋ vellaa velle wo, a mɛɛ naŋ tosa ndi yɛ. Nduyɛ, Chɔŋ wa waŋndo o pilɛ o waŋnda haa tɛɛŋ.—1 Chɔŋ 3:​11, 12.

3. A yɛɛ okɔɔ Chɔŋ poonyiaa yɛ tau?

³ O yaula Chɔŋ poonyiaa laŋ niŋ mbo kindila maa Kilisiɔŋnda nɔ ma chɔm kaalaa. Nduyɛ pɛŋ, o yau o poonyiaa a yoomu Chiisu wo okɔɔ wo niŋ, mbo soliŋ diomndo hoo “kaalaa” kpeku mbo hiau yaula yaala cheleŋ soo a yoomu Chiisu wo okɔɔ wo. Naapum Chɔŋ wa wɔsilaŋ kɛmɛ mbo poonyiaa yauwo hoo,  a yaula cheleŋnda nɔ diola ndɔlaŋ ndo. Nduyɛ yaula ndɔlaŋ ndaŋ kpou, la chɔm maa kaalaa nɔ ni mbo nyindu Kilisiɔŋnda le nyɛ o nyɛ tosaa. (1 Chɔŋ 4:​10, 11) Kɛ a koŋ kpou, o chua fɛŋ teleŋ vilɛi malaŋ Chɔŋ kandu kaalaa chɔmndo.

4. Baa teleŋ o teleŋ Chɔŋ ndoo chɔm acheleŋnda kaalaa ni?

⁴ Teleŋ Chɔŋ wa feleŋgɔnɔ wo, o cho teleŋndaŋ fau le ndoo chɔm kaalaa le. Le taamaseliiyo, a teleŋ pilɛ, ma kua yooŋgu kɛndɔɔ dimioo a Chiisu latulu o tanda Sameeliaa wo niŋ. Mɛɛ nda fuuluu o sɔndɔkɔlɔ pum, mi wanaa wa loŋ nda kɛɛ le nda yiyaa. Yɛɛ Chɔŋ ndoo tosa yɛ? Mi ndu nda pɔmbɔ ndɔ Chemisi dimul Chiisu maa, o nyuna Finya ndɔ o choo choo niŋ le mbo yɔŋ yiŋnde, mi le huŋ diu diu wanaa kaŋ kpou. (Luku 9:​52-56) A teleŋ cheleŋ vɛlɛ, mi Chɔŋ kɛɛ le chaaŋaa nduaa buɛiya kaalaa chɔmndo. Mi ndu nda pɔmbɔ ndɔ Chemisi hiau kala nda kɔɔli le Chiisu dimullo maa, o ke nda foofola bɛndaŋ o Masale ndɔleŋ niŋ. Nduyɛ mɛɛ buɛiya a piliaa tuei a nyɛ nda tosa hoo wo okɔɔ, ma duaunuŋ tumbe tau. (Maa. 20:​20, 21, 24) Kɛ a biondɔŋnda Chɔŋ ndoo tosalaŋ ndaŋ kpou, Chiisu ndoo kaala ndu tau.—Chɔŋ 21:​7.

5. Yɛɛ naŋ cho yɛ yaasiaa o buŋgɛi hei niŋ?

⁵ O buŋgɛi hei niŋ, ŋ cho yaasiaa a taamasi Chɔŋ ndo okɔɔ, nduyɛ miŋ che sɔɔŋ ŋtiŋ, ŋ o poonyiaa a kaalaa okɔɔ woŋ. Te ŋ wa pɛ buŋgɛi hei yaasiaa, ŋ cho chɔ mɛɛ naa bɛɛ chɔm puaapiliaa a ndepiliaa naa kaalaa yɛ. Ŋ cho vɛlɛ pɛɛku nɛi sɔvɛ wana cho yuŋgoo bolleŋndo chɔm wanaa cho o yuŋgu ndɔɔ niŋnda kaalaa wo.

6. Vɛɛ Chɛhowa chɔm yɛ maa o kaala naa?

⁶ Lepum miŋ yiyaŋ maa, acheleŋnda kaalaa chɔmndɔ cho yiyaŋ kɛndɔɔ nɔɔ a nda okɔɔ ɔɔ sɔɔŋ kɛndɔŋ nda dimullo ni. Kɛ sɔɔŋ naŋ tosal nda woŋ chɔm kpeekpei ni maa ŋ kaala nda. (Tuuwɔ Chemisi 2:​17, 26.) Le taamaseliiyo, Chɛhowa kaala naa tau. (1 Chɔŋ 4:​19) Le mbo chɔm maa o kaala naa, mbo tosa a sabu ma poonyiaa diomnda ndɔlaŋ o Baabuiyo niŋ. (Sam 25:​10; Luomaŋ. 8:​38, 39) Nduyɛ ŋ sina maa, o cho ko diomnda cho o Baabuiyo niŋndaŋ te chɔm maa o kaala naa le. Kanifuule, mbo tosa vɛlɛ sɔɔŋ le naa kaala ndɔɔ chɔmndo. Mi Chɔŋ poonyiaa aa: “Nɛi Mɛlɛka chɔm naa kaala o kaala naa wo wo, ndu cho hoo ni. Mbo viam Po ndɔ pilɔɔ kpe o chieeŋndo niŋ le mi ŋ sɔla yoomu kpeekpeiyo a ndu.” (1 Chɔŋ 4:​9) Mi Chɛhowa chɛl mi Po ndɔ kaalaa saŋga, nduyɛ mbo sɔla piɔmndo le naa. (Chɔŋ 3:​16) Hei chɔm kpendekele maa Chɛhowa kaala naa.

7. Yɛɛ Chiisu tosa yɛ le chɔmndo maa o kaala naa?

 ⁷ Mi Chiisu dimul buɛiyaa nduaa maa o kaala nda. (Chɔŋ 13:​1; 15:​15) Nduyɛ mbo chɔm mɛɛ kpɛ o kaala nda vɛlɛ a naa yɛ, o cho ko o diomnda ndɔlaŋ niŋ te, kɛ a nyɛ o tosa wo. Mbo dimi aa: “Kaala o kaala hiu lɛ hoo le, o waŋndo kaala ndiaamɔɔwaa nduaa, o koŋ kɔɔli mbo sɔla piɔmndo le nda wo.” (Chɔŋ 15:​13) Yɛɛ yiyaŋndo a kaala Chɛhowa nda Chiisu chɔm naa wo nyindu yɛ naa le tosaa?

8. Yɛɛ Chɔŋ Tasoo 3:​18 dimi yɛ maa ŋ nɔ miŋ tosa?

⁸ Ŋ chɔm maa ŋ kaala Chɛhowa nda Chiisu te ŋ diikuŋ nda pɛ. (Chɔŋ 14:​15; 1 Chɔŋ 5:​3) Nduyɛ Chiisu ke naa sawaa maa, ŋ nɔ miŋ kaaliaŋ vellaa velle. (Chɔŋ 13:​34, 35) Ŋ nɔ ko miŋ dimul puaapiliaa a ndepiliaa naa maa ŋ kaala nda le, kɛ ŋ nɔ miŋ tosa sɔɔŋ ŋ chɔm maa ŋ kaala nda woŋ. (Nuawɔ Chɔŋ Tasoo 3:​18.) Sɔɔŋ kuɛɛ naŋ tosa yɛ le chɔmndo maa ŋ kaala nda?

9. Yɛɛ kaala Chɔŋ ndoo nɔ wo nyindu yɛ ndu le tosaa?

⁹ Chɔŋ ndoo tiuba mbo wa a finya ndɔ latulu, nduyɛ mi ndaa hiou lachi a yulaleŋ ndale yɔɔyaa leŋ tosaa le kanioŋ sɔlaa. Kɛ mbo soliŋ yoomu ndɔɔ kpou kpeku le acheleŋnda malaa ma pɛɛku a Chɛhowa nda Chiisu okɔɔ. Kɛɛsiaa ndoo tosa le Chiisu tolɔɔ kɔɔli wo ve kɛɛsiaa pɔmbɔ le kanifuule, ma tusi ndu nyɛpalaa choo. Nduyɛ ma duau ndu o chiɛi manyumndo niŋ teleŋ o wa o yuwɛiyo. (Walta. 3:​1; 4:​1-3; 5:​18; Sɔɔŋ. 1:​9) Mi che bɛɛ o wa o chiɛi manyumndo niŋ, kɛ mbo hiau lachi a yooŋgu kɛndɔɔ dimioo le chɔmndo maa o kaala acheleŋnda. Le taamaseliiyo, teleŋ o wa o biyɔɔ niŋ o lɛŋnde Patimɔɔ leŋ niŋndo Mɛlɛka chɔm ndu yilaŋndoŋ ni. Nduyɛ, mbo poonyiaa muŋ o yau Sɔɔŋ Chɔɔmaŋndoŋ niŋ, okoŋ mbo yɔŋ ndu o kundalaŋ niŋ le mi chaaŋaa nduaa Kilisiɔŋnda sina ‘sɔɔŋ wa hunɔɔ suŋ yɔŋnɔŋ ndoŋ.’ (Sɔɔŋ. 1:​1) Nduyɛ wana che pɛ maa, a teleŋ o fula o biyɔɔ niŋ o lɛŋnde Patimɔɔ leŋ niŋndo o poonyiaa yau soo a yoomu Chiisoo okɔɔ wo ni. Okoŋ kɔɔli, mbo poonyiaa vɛlɛ yaula yaala cheleŋ le puaapiliaa a ndepiliaa nduaa dɛɛniaa vɛlɛ a nda yoomuaŋ lueiyo. Vɛɛ ŋ tual lɛ taamasi Chɔŋ ndo kɔɔli le kaa sala soliaŋndo nɔɔ?

10. Vɛɛ ŋ chɔm yɛ maa a kaala waŋnda?

¹⁰ Nyɛ ŋ kɛɛsiaa le tosaa o yoomu numndo niŋndo chɔm kɛsɛ ni maa a kaala waŋnda. Chieeŋ Setanaa yeema num ma soliŋ teleŋ numndo a yoomuma numndaŋ kpou kpeku le numpila. O yeema num ma kindiŋ le kanioŋ nuuviaa tau ɔɔ ma fula tɔɔ. Kɛ o ba pilɔɔ choo, Kilisiɔŋaa tonyaa chieeŋndo balɔɔ silɔ cho teleŋ ndaa a yoomuma ndaŋ kpou soliŋndo kpeku le waŋnda yooŋgu kɛndɔɔ dimullo a nda malaa ma sɔɔŋguu Chɛhowa ikɛi kpɛɛluŋ. Mi apum yɔŋguŋ pɛŋ le hei tosaa o wali lɔɔlɔɔ Mɛlɛkaa niŋ.

11. Vɛɛ puaapiliaa a ndepiliaa naa bɔɔbɔɔ chɔm yɛ maa a kaala Chɛhowa vɛlɛ a chaaŋaa ndaa?

¹¹ Mi Kilisiɔŋaa bɔɔbɔɔ tosa walta yɛ yɛlaŋ lepaa o lepaa, le halikpeŋ ma sɔla nyɛm nda hauba woŋ, a le yuŋgula ndalaŋ malaa. Kɛ a koŋ kpou, ma yɔŋguŋ a kɔllo kpou le kɔɔna Chɛhowaa tooloo mɛɛ nda tiuba yɛ. Le taamaseliiyo, mi apum yɔŋguŋ le wanaa kpundɔɔ komalla malaa, a le chiɛila kɔɔnaa taŋgullo. Nduyɛ wana o wana tiuba mbo yɔŋgu nyɛsɔlaa le wali dimiaa yooŋgu kɛndɛ cho tosaŋndo chieeŋndo balɔɔ silɔ wo tooloo. Le mɛɛ nda nɔ kaalaa le Mɛlɛka a chaaŋaa ndaa waŋchieeya yɛ nda tosa hei ni. Ŋ chɔm maa ŋ kaala puaapiliaa a ndepiliaa naa, te ŋ wa pɛ kɔlaŋ o bɔŋaŋnda leKilisiɔŋndaŋ lɔɔlɔɔ, nduyɛ miŋ wa mulilaŋ yɔŋgoo. Mi che bɛɛ lepum miŋ wa  a saŋgɛi yɔkɔɔ, kɛ miŋ kuɛ. Nduyɛ mi che bɛɛ mi siɔmbulaŋ la wa naa, kɛ miŋ kindiŋ le mulilaŋ yɔŋgoo. O faŋaŋ okoŋ kɔɔli, mi che bɛɛ naa kpou nɔ bahawɛilaŋ, kɛ miŋ dɛɛniaŋ vellaa velle tuupa mi bɔŋaŋndo kanduŋ ɔɔ te bɔŋaŋndo chuu pɛ. (Hibu. 10:​24, 25) Ŋ nɔ bɔɔ balika melaa le sɛmbɛ puaapiliaa a ndepiliaa naa cho dɔwɔɔ wo!

12. O nɛi cheleŋ kuɛɛ niŋ Chɔŋ ndoo chɔm yɛ maa o kaala puaapiliaa a ndepiliaa nduaa?

¹² Mi Chɔŋ chɔm maa o kaala puaapiliaa a ndepiliaa nduaa, o cho ko le nda chandɔɔ le kɛ mbo sila vɛlɛ nda. Le taamaseliiyo, mi che bɛɛ mbo chandu puaapiliaa a ndepiliaa nduaa le tiindaŋ ndaa a le walta kɛndɛla nda wa tosaa laŋ o yaula o poonyial nda laŋ niŋ, kɛ mbo ke nda sila kala kalaa le ma mal sɔɔŋ wɔɔŋndoŋ tosaa. (1 Chɔŋ 1:​8–2:​1, 13, 14) O nɛi pilɛ koŋ choo, ŋ nɔ ko miŋ chandu puaapiliaa a ndepiliaa naa le walta kɛndɛla nda tosalaŋ te. Kɛ, te ŋ che pɛ maa puaapilɛnɔɔ ɔɔ ndepilɛnɔ naa kandu suɛi tɛɛmbuu chaŋyɛi nduɛi a Chɛhowa ve tosaa, ŋ nɔ miŋ ke ndu sila yeemaŋndo o nɛi chaa niŋ. Kɔl simulaa yeemaŋ ni le chaaŋ naa silaa. Baabuiyo dimi pɛŋ maa, mi chaŋyaŋ kpeekpeiyoŋ miŋgi opilɛ a o cheleŋndo o nɛi.—Pulɔ. 27:​17.

13. Yɛɛ naŋ nɔ yɛ miŋ tosa kposoŋ te?

¹³ Le miŋ chɔm maa ŋ kaala puaapiliaa a ndepiliaa naa, ŋ nɔ miŋ chɛl mi sɔɔŋ nda dimi woŋ tɛɛmbuu naa kɔl te. Le taamaseliiyo, lepum ma dimi suɛi tɛɛmbuu naa kɔllo ve. Yiyaŋndɔ a nyɛ yɔŋnuŋndo okɔɔ teleŋ Chiisu wa o chieeŋndo choo wo. Mbo dimul buɛiyaa nduaa maa le ma sɔla yoomu kpeekpeiyo, mɛɛ ma de dialuŋ ndɔŋ, nduyɛ ma kol kooma nduaŋ. (Chɔŋ 6:​53-57) Buɛiyaa Chiisuaa ndaa bii nyɛ Chiisu ndoo dimi wo bila le. Le hei, mi a bɔɔbɔɔ mal ndu. Mɛɛ chaaŋaa nduaa kpeekpeiya ma lo ndu ikɛi mɛɛ Chɔŋ cho naa yɛ. Naapum nda bɛɛ mi kɔndɔfillo bii nda tau, kɛ a chɛl mi sɔɔŋ Chiisu dimi muŋ ndoŋ tɛɛmbuu nda kɔl te. Ndaa laalaŋ ndu, nduyɛ ndaa sina maa sɔɔŋ tonyaŋ o dimi ni. (Chɔŋ 6:​60, 66-69) Naa bɛɛ nɔ miŋ chɛl mi sɔɔŋ puaapiliaa a ndepiliaa dimi woŋ tɛɛmbuu naa kɔl te. Kɛ, ŋ nɔ miŋ nyuna nda le ma chɔm naa nyɛ nda yiyaŋndo.—Pulɔ. 18:​13; Ikili. 7:​9.

14. Le yɛɛ naŋ nɔ yɛ miŋ tul puaapiliaa a ndepiliaa naa leyɛ le?

¹⁴ Mi Chɔŋ dimi maa, ŋ nɔ miŋ tul puaapiliaa a ndepiliaa naa leyɛ le. Te ŋ kɛɛ pɛ le silaa hoo dɔwɔɔ o wali niŋ, mɛɛ ŋ cho chɛlɔɔ mi Setana nɔ naa kpaayaa choo. (1 Chɔŋ 2:​11; 3:​15)  Mi hei yɔŋnuŋ Kilisiɔŋnda apum o wɔsiŋ kɛmɛ tasoŋ niŋ. Setana wa kindiŋndo o nɛi o nɛi niŋ le mbo luei yɛletulaa leŋ a piɔuwaŋndo wanaa Mɛlɛkaa tɛɛŋ. A teleŋ Chɔŋ poonyiaa yaula ndɔla yaalaŋ ndo, puaa apum a Setana ndoo nɔ kpaayaa choo wa wa o kunda leKilisiɔŋndo niŋ. Le taamaseliiyo, Diotɛluɛfɛsi wa waŋndo opilɛ o wa hunɔɔ a piɔuwaŋndo o kunda leKilisiɔŋndo niŋndo. Ndoo ke wanaa Dialii Kuumbaŋ Choo Ve ndii viam nda lebɛɛ le. Nduyɛ, te Kilisiɔŋnda ndaa wa pɛ wanaa o hɛnaŋ te wa kɛndɛi tosallo, o soli nda o kunda leKilisiɔŋndo niŋ. Nuawɔ se suɛi wɔɔŋ bɛndu! (3 Chɔŋ 9, 10) Hau bɛɛ, Setana cho kindiŋndo kpeekpei le wanaa Mɛlɛkaa piɔuwaŋndo lueiyo tɛɛŋ. Maa ŋ chɛlnuŋ kposoŋ mi yɛletulaaleŋ le luei naa tɛɛŋ te.

15. Yɛɛ wana cho yuŋgoo bolleŋndo nɔ yɛ mbo loonuŋ?

¹⁵ Nɛiyo opilɛ o wana cho yuŋgoo bolleŋndo chɔm maa o kaala yuŋgu ndɔɔ wo, cho nda nyɛm nda hauba woŋ kioo ni. (1 Timo. 5:​8) Kɛ o nɔ mbo loonuŋ maa, chaŋyɛi yuŋgu ndɔɔ nɔ a Chɛhowa ve hiou wa isɔvɛ, a nda nyɛm nda hauba woŋ kioo. (Maa. 5:​3) Tofawɔ taamasi Chiisu kɛsi le wanaa cho yuŋgulaŋ bolle wa. Yau Chɔŋ poonyiaa a Chiisu okɔɔ wo chɔm maa, mi che bɛɛ Chiisu wa o yɔm imɔnɔɔ choo, kɛ o wa wɔ yiyaŋndo a yuŋgu ndɔɔ okɔɔ. Chɔŋ wa isisi nda kalaa Chiisu o fondaŋ ndaa kuɛ le Chiisu baŋɔɔ o yɔmndo choo wo. Mi che bɛɛ naa nyɛpalaa kala kalaa wa Chiisu choo, kɛ mbo dimul Chɔŋ maa o koma mandal ndu kala ndɔ. (Chɔŋ 19:​26, 27) Chiisu ndoo nɔ pɔmbuaa a yemaa a ndaa tiuba ma manda kala ndɔ wa, kɛ wana che pɛ maa nda kpou o kɛ kɛ ndoo simnuŋ ndɔ buɛi ndɔ le. A tonya, Chiisu ndoo yeema mi Chɔŋ ndoo hiou lachi a kala ndɔ nyɛm o hauba woŋ kioo, vɛlɛ a ndu malaa mbo hiou lachi a Mɛlɛka piɛiyo.

16. Kalaŋnda kuɛɛ Chɔŋ ndoo nɔ yɛ?

¹⁶ Chɔŋ ndoo nɔ kalaŋndaŋ tau. Wana Chiisu vem hɔlte ndɔ wo o wa ni. Lelaŋ, ndoo nɔ mbo chua chilaŋ le yooŋgu kɛndɔɔ dimioo. Naapum Chɔŋ ndoo nɔ lanɔɔ. Le hei, ndoo nɔ mbo wa kpeŋkpeŋ le yuŋgu ndɔɔ nyɛm nda hauba woŋ kioo a nda malaa o Mɛlɛka piɛiyo niŋ. (1 Kɔliŋ. 9:​5) Yɛɛ wanaa cho yuŋgulaŋ bolle wa pɛɛku yɛ o hei niŋ?

17. Kalaŋ sɔvɛ kuɛɛ wanaa cho yuŋgulaŋ bolle wa nɔ yɛ, nduyɛ vɛɛ keŋ chuu yɛ yuŋgula ndalaŋ tɔnɔɔ?

¹⁷ Mi puaapiliaa apum a cho yuŋgulaŋ bolle wa nɔ waltaŋ tau le tosaa. Le taamaseliiyo,  a nɔ ma tosa wallo kalaŋ o fondaŋ nda tosa wallo wo, le halikpeŋ mi Chɛhowa sɔla saŋgalaa. (Ɛfi. 6:​5, 6; Tai. 2:​9, 10) Nduyɛ naapum, mi apum nɔ kalaŋndaŋ o kunda leKilisiɔŋndo niŋ, mɛɛ kɔlaŋ yilɔɔ kɔl dɛɛniaa a chilaŋ chuaa o wali pollo niŋ cho naa yɛ. A koŋ kpou, a nɔ ma wa Baabuiyo pɛɛkoo teleŋ o teleŋ a laandaa ndaa ɔɔ a yuŋgula ndalaŋ. Mi yuŋgula ndalaŋ la naŋ kɔl tau te a ke nda pɛ nyɛm nda hauba woŋ, nduyɛ ma mala nda o Mɛlɛka piɛiyo niŋ.—Ɛfi. 5:​28, 29; 6:​4.

18. Tiindaŋ yɛɛ Chɔŋ ndoo nɔ yɛ?

¹⁸ Mi Chɔŋ viau yoomu tau. Nduyɛ ndoo nɔ sɔɔŋ yɔŋnaŋndoŋ tau. Mi sɔɔŋ bɔɔbɔɔ muŋ tosa mi tiindaŋ ndɔɔ yɔŋnuŋ pɔmbɔlɔsɔɔ wo komal ndu. Kɛ teleŋ o teleŋ, mi ndoo kindiŋ le sawala Chiisulaŋ diikɔŋndo mɛɛ sawaa le puaapiliaa a ndepiliaa kaalaa cho naa yɛ. Le hei, Chɔŋ ndoo nɔ tiindaŋndo maa Chɛhowa nda Chiisu kaala ndu, nduyɛ maa a cho ndu yoomuaŋ luei le tɔɔndaŋ kɛ kɛ biuwɔŋndo. (Chɔŋ 14:​15-17; 15:​10; 1 Chɔŋ 4:​16) Setana a chieeŋ ndɔɔ tiuba Chɔŋ kuuna le puaapiliaa a ndepiliaa nduaa kaalaa chɔmndɔ le.

19. Yɛɛ Chɔŋ Tasoo 4:​7 dɛɛniaa yɛ naa le tosaa, nduyɛ le yɛɛ?

¹⁹ Maa Chɔŋ, naa bɛɛ cho o chieeŋ Setanaa niŋ, nduyɛ Setana nɔ kaala le wana o wana le. (1 Chɔŋ 3:​1, 10) Mi che bɛɛ o cho kindiŋndo le naa kuunaa puaapiliaa a ndepiliaa naa kaalaa, kɛ naa pila chɛl ndu ni le hei tosaa. Maa ŋ kɛɛsiaŋ o kɔl le puaapiliaa a ndepiliaa naa kaalaa chɔmndo, o cho ko o nyɛ naŋ dimi wo niŋ te, kɛ o nyɛ naŋ tosa wo niŋ bɛɛ. Te ŋ tosa keŋ pɛ, mɛɛ ŋ cho wa a kɔl hiniaa le waa o yuŋgu Chɛhowaa niŋ, nduyɛ miŋ wa a kɔl kɛndɛ teleŋ o teleŋ.—Nuawɔ Chɔŋ Tasoo 4:​7.