1. Bwe luzolo lwa Nzambi lukusaka?

NTUMWA Za watsoneka ti: “Nzambi Nkwa luzolo.” (1 Za 4:8, NWT) Tuzebi ti Nzambi wasala luzingu. Kâ mwa ntelo yo, yitumbamburi ti luzolo kwe Yandi lutûkaka. Yehova beto kazololo! Luzolo lwandi mbo lusaka ti tabâ mu kondo kwa bunkuta, mu nsayi, mpe nsatu zeto zalungana.

2. Tintwari na Matie 22:37-40, ntumunu zole ziyikôle bunene ni ze, mpe mu bungu dia nti wulendi bâ musamu wa mpasi kwe beto mu tumamana ntumunu ya nzole?

² Bakristo ka bafweti’â basola ko tala ti luzolo basongela peleko kâni. Songela luzolo ntumunu yena. (Tanga Matie 22:37-40.) Bu tutomo kwizi zabaka Yehova, kampe ka wukwizi’â bâka musamu wa mpasi ko mu tumamana ntumunu ya ntete, mu bungu ti Yehova wa lunga wena. Mbo katukipaka mpe mbo katubongelaka na nsayi yayansoni. Kâ, wulendi bâ musamu wa mpasi mu tumamana ntumunu ya nzole. Mu bungu dia nti? Mu bungu ti mpangi zeto​—zi tuvulu bâka penepene—​nkwa masumu zena. Ntangu zakaka, ka basaka keba ko peleko ka babâka na nsayi ko bu batâka mpe bu bayirikaka misamu. Yehova wazaba ti misamu mio mbo miaketi tu turila, ntiangu kasola bitsoniki biakaka bia Bibila biatsoneka malongi masongelaka mu bungu dia nti, mpe bwe tufweti songela luzolo kwe bantu bakaka. Wumosi wa bitsoniki biango ni Za.​—1 Za 3:11, 12.

3. Ngano Za bwe keri vulu tâka mu bungu dia luzolo?

 ³ Mu matsonoko mandi, Za wavulu kârila ti Bakristo bafweti songela luzolo. Bu katsoneka tinsamu tia luzingu lwa Yezu, Za wasarila ntelo ya “luzolo” na ya “zolo” yôka lutangu lu basarila zo mu buku dia Matie, dia Marke na dia Like. Za mvula kampe 100 zabâ nandi bu katsoneka Evanzile’andi na mikanda miandi. Matsonoko mo ma Bibila mbo matulongesaka ti luzolo lufweti twarisaka misamu miamiansoni mi yirikaka Bakristo. (1 Za 4:10, 11) Kâ, ntangu yayingi yafwanakana kwe Za mu longoka malongi mo.

4. Ngano ntangu zazansoni Za mbo keri songelaka luzolo?

⁴ Bu kabâ ntwenia, ntangu zazansoni Za keri’â songelaka luzolo ko. Mu tifwani, Yezu na milongoki miandi bu beri kwendaka ku Yerusaleme, ni bayokela ku Samaria. Hata dimosi dia Samaria diakala mu ba songela ndiambu. Ngano Za nti kasa? Za walomba kwe Yezu tala ti tiya tulendi tûka ku zulu mpe twafukisa bantu babansoni ba ku hata dio! (Like 9:52-56) Tilumbu tiakaka mpe, Za ka songela luzolo ko kwe ntumwa zakaka. Kampe yandi na Zaki bawisa nguri’awu ngatu kalomba kwe Yezu kabahana bibuka bia mfunu mu Timfumu. Ntumwa zakaka bu zayizi zaba misamu mia yirika Zaki na Za, nkesi zatomo ba baka! (Mat. 20:20, 21, 24) Ni bu sa ti Za wayirika misamu mio miamiansoni, Yezu yandi kwa keri zoloko.​—Za 21:7.

5. Nti tutaluzula mu timoko ti?

⁵ Mu timoko ti mbo tutaluzula tifwani tia Za na misamu miakaka mi katsoneka mitariri luzolo. Buna, mbo tukwizi longoka bwe tulendi songela luzolo kwe mpangi zeto. Mbo tutaluzula mpe mpila ya mfunu mfumu-kanda yi kalendi songela luzolo kwe kanda diandi.

6. Bwe Yehova katusongela luzolo?

⁶ Tulendi banza ti mu zolo muntu, tufweti bâ kwa na mabanza ma mbote mu yandi peleko tufweti mu têla misamu mia mbote. Kâ ngatu luzolo lwabâ lwa matieleka, tufweti lwasongela mu nsalulu. (Fwanakasa na Zaki 2:17, 26.) Mu tifwani, Yehova beto kazololo. (1 Za 4:19) Mpe mbo katusongelaka luzolo lwandi mu nzila ya ntelo za toma ze mu Bibila. (Mik. 25:10; Rom. 8:38, 39) Nzambi mbo katusongelaka mpe luzolo lwandi mu mio mi kayirikaka. Za watsoneka ti: ‘Luzolo lwa Nzambi, ebu lwamonekene, ha kati dieto Nzambi watambika Mwana’andi wa wumosi ha nsi, ngatu tabaka luzingu mu yandi.’ (1 Za 4:9) Yehova wabika ti Mwana’andi wu katomono zolo wamona mpasi mpe wafwa mu bungu  dia beto. (Za 3:16) Buna tulendi bâ na lukwikulu ti Yehova beto kazololo.

7. Ngano Yezu nti kasa mu songela ti beto kazololo?

⁷ Yezu watêla milongoki miandi ti bawu keri zoloko. (Za 13:1; 15:15) Wasongela ti bawu katomo zolo, mpe beto katomono zolo, ka mu mio mio’â ko kwa mi katâ, kâ mpe mu mio mi kayirika. Yezu watâ ti: ‘Ka kwena luzolo ko luyôkele, na lwa wô hana luzingu lwandi mu bungu dia ndiku zandi.’ (Za 15:13) Bu tudimbitilaka misamu mia yirika Yehova na Yezu mu bungu dia beto, ngano nti wututumaka mu sa?

8. Ngano 1 Za 3:18 nti yitutumaka mu sa?

⁸ Mbo tusongelaka ti Yehova na Yezu bawu tuzololo bu tubatumamanaka. (Za 14:15; 1 Za 5:3) Yezu watutuma ti tazolosonoko beto na beto. (Za 13:34, 35) Luzolo lo mbo tusongelaka lo mu mio mi tutâka na mio mi tuyirikaka. (Tanga 1 Za 3:18.) Nti tulendi sa mu songela ti bawu tuzololo?

9. Ngano luzolo nti lwatuma Za mu sa?

⁹ Za lenda dieri nandi mu tatamana mu bâ na tata’andi mpe mu sala mbongo mu tisalu tia kanda tia lobaka mbizi. Kâ kani kasila bo, wasarila luzingu lwandi mu bakisa bantu bakaka mu longoka matieleka matariri Yehova na Yezu. Luzingu lwa sola Za ka lwabâ luzingu lwa nienze ko. Wamona mpasi mu bungu dia nkwamusu, mpe penepene na nsuka ya mbandu ya ntete, bu keri wa nuna, wakota boloko. (Bis. 3:1; 4:1-3; 5:18; Nza. 1:9) Ni bu sa ti ku boloko keri mu bungu ti nkumbu ya Yezu keri kwe samuni, Za wasongela ti mpangi zandi keri zoloko. Mu tifwani, bu keri ku ile ya Patmose, watsoneka buku dia Nzabukusu mpe watambika dio kwe bimvuka ngatu bazaba ‘mio mifweti kwiza [ntamana].’ (Nza. 1:1) Kampe bu bamudukisa ku boloko ku Patmose, Za watsoneka Evanzile’andi ya luzingu na tisalu tia samuna tia Yezu. Watsoneka mpe mikanda mitatu mu tindisa na mu yika mpangi zandi ngolo. Ngano bwe tulendi landila mpila ya tihanina Za?

10. Bwe lendi songela ti bantu ba zoloko?

¹⁰ Mpila yi natina luzingu lwaku yilendi songela ti bantu ba zoloko. Nza ya Satana yizololo ti wayôkesa ntangu’aku yayansoni na ngolo zaku mu bungu dia nge beni, mu dinga mu baka mbongo na mu kuna nkumbu. Kani basila bo, Bakristo mbo batihanaka mu nza ya mukaka mu yôkesa ntangu’awu yayansoni mu samuna nsangu za mbote na mu bakisa bantu ngatu babâ penepene na Yehova. Bakaka mbo babâka na lenda dia samuna na dia longesa ntangu zazansoni.

11. Bwe bisamuni biabingi bia kwikama bisongelaka ti Yehova na mpangi zawu bawu ba zololo?

¹¹ Bakristo ba kwikama babingi bafweti sala ntangu yayingi ngatu batikipa mpe bakipa makanda mawu. Kâ, mbo bayikaka organizasio ya Yehova moko mu mpila zazansoni zi balendaka. Mu tifwani, bakaka lenda die nawu dia hana lubakusu mu ntangu ya makuba ma nza (catastrophes naturelles), bakaka balendi sala mu tisalu tia ntungulu, mpe bantu babansoni lenda die nawu dia hana makabu mu bungu dia tisalu tisalamaka mu nza yayansoni. Mbo basaka mio miamiansoni mu bungu ti Nzambi bazololo na bampwana’awu. Tumingu twatwansoni, mbo tusongelaka ti mpangi zeto za tuzololo bu tukwendaka ku tukutakanu twa timvuka na bu tuhanaka mvutu. Ni bu sa ti tulendi bâ ba fwatika, mbo tukwendaka ku tukutakanu to. Ni bu sa ti tulendi bâ na lwaka, mbo tuhanaka mvutu. Mpe, ni bu sa ti muna muntu misamu miandi mie nandi,  mbo tutindisaka mpangi zeto ntete lukutakanu lwabatika peleko ha manima ma lukutakanu. (Ebr. 10:24, 25) Ntia mpila matondo tuvutulaka mu tisalu ti salaka bisamuni biakaka!

12. Mu ntia mpila yakaka Za kasongela ti mpangi zandi za kazolo?

¹² Mu songela luzolo kwe mpangi zandi Za sîka keri basîkaka mpe malongi keri bahanaka. Mu tifwani, mu mikanda miandi Za wasîka mpangi zandi mu bungu dia timinu tiawu na mu bungu dia bisalu biawu bia mbote, kâ wabahana mpe malongi ma delakana mu musamu wutariri masumu. (1 Za 1:8–2:1, 13, 14) Mpila mosi mpe, tufweti sîkaka mpangi zeto mu bungu dia misamu mia mbote mi bayirikaka. Kâ tala ti mpangi ye kô yibatikiri mu bâ na ndiatulu peleko bifu bia mbi, tulendi songela luzolo bu tumutêla mîna mie nandi nsatu na nsayi yayansoni. Butindi salu bwena mu hana malongi kwe ndiku, kâ Bibila mbo ditâka ti, ndiku za matieleka mbo zitilwengesaka peleko mbo zitisembaka.​—Bin. 27:17.

13. Nti tufweti sila keba?

¹³ Ntangu zakaka, mbo tusongelaka ti mpangi zeto za tuzololo mu misamu mi tulembo yirikaka. Mu tifwani, ka tukulu’â fwemaka ko mu bungu dia misamu mi batâka. Banza’eti musamu wa turila Yezu ku nsuka ya luzingu lwandi ha mutoto. Yezu watâ kwe milongoki miandi ti, bafweti dia musunia’andi mpe bafweti nwa menga mandi ngatu babaka luzingu. (Za 6:53-57) Musamu wo watomo ba fwemesa mpe wasa ti milongoki miamingi miamuyambirika​—kâ ndiku zandi za kwikama ntiana Za, ka zamuyambirika ko. Musamu wa tâ Yezu ka babakula wo ko, kampe bayituku mpe. Kâ ndiku za kwikama za Yezu ka zabanza ko ti musamu wa tâ Yezu wa mbi weri mpe ka wa bafwemesa ko. Kani basila bo, bamukwikila mu bungu ti bazaba ti matieleka keri tâka. (Za 6:60, 66-69) Nguria mfunu wena mu lembo kulu fwemaka mu misamu mi tâka ndiku zeto! Kâ, mbo tubahanaka bweso bwa bangula musamu wu tuta lembo wisasana.​—Bin. 18:13; Ekl. 7:9.

14. Mu bungu dia nti tufweti lembo bêlaka na diki mu mpangi zeto?

¹⁴ Za watutindisa mpe mu lembo bâka na diki mu mpangi zeto. Tala ti ka tulendi’â malongi mo ko, Satana mbo katusakanana. (1 Za 2:11; 3:15) Musamu wo wa turila bantu bakaka ku nsuka ya mbandu ya ntete. Mu ntangu yîna, Satana wayêla mu kotesa diki na mu hambasa kanda dia Nzambi. Mu ntangu Za  yi katsoneka mikanda miandi, mu timvuka mwa yizi kota bantu beri na mabanza mamosi na Satana. Mu tifwani, Diotrefese watomo kotesa tihambula mu timvuka timosi. (3 Za 9, 10) Diotrefese keri’â zitisaka bimonikisi bia Timvuka titwarisaka ko. Wayêla mu kuma mu timvuka bô beri songelaka ndiambu kwe bantu ba keri lembo zoloko. Ntia mpila lumpampani! Lumbu ti, Satana yêla kwa kata kwe yêle mu hambasa kanda dia Nzambi na mu benda dio ku lweka lwandi. Kani kabwe ka tubikandi ti diki diatuhambasa.

15. Ngano ntia musamu mfumu-kanda kafweti bambukila moyo?

¹⁵ Mpila ya mfunu mfumu-kanda yi kasongela ti kanda diandi dia kazoloko ni mu hana dio bima bia tinsuni bifwanakane. (1 Tim. 5:8) Kâ, fweti bambuka ti, nguria mfunu wena kwe yandi mu bakisa kanda diandi mu bâ na tindiku tia mbote na Yehova. (Mat. 5:3) Dimbitila’eti tifwani tia mbote tia hana Yezu kwe mfumu za makanda. Buku dia Za mbo ditutêlaka ti mu ntangu yi keri fwaka ha poto dia matimuna Yezu kanda dia kwa keri banzilaka. Za watelama penepene na Mariya, nguri ya Yezu, hâna ha beri hondelaka Yezu. Ntono mpasi za ngolo za lufwa, Yezu walomba kwe Za kakipa Mariya. (Za 19:26, 27) Yezu mpangi zeri nandi zaketi kipa nsatu za tinsuni za Mariya, kâ kampe na kani wumosi mu bawu watibêla mulongoki’andi. Buna Yezu wazolo ti bakipa Mariya mu tinsuni na mu timpeve.

16. Ntia madema Za kabâ na mo?

¹⁶ Za dema diadingi dieri nandi. Mu bungu ti ntumwa yeri, luhemo lweri nandi mu tisalu tia samuna. Kampe wa kwela mpe weri, buna wafwanakana mpe kakipa nsatu za tinsuni na za timpeve za kanda diandi. (1 Kor. 9:5) Ntia malongi mfumu za makanda zilendi baka lumbu ti?

17. Mu bungu dia nti wena musamu wa mfunu ti mfumu-kanda kakipaka nsatu za timpeve za kanda diandi?

¹⁷ Mpangi ya yibakala ye mfumu-kanda yilendi bâ na madema mamingi ma mfunu. Mu tifwani, bu kabâka ku tisalu tiandi fweti tomo salaka ngatu ndiatulu’andi yakembesa Yehova. (Efz. 6:5, 6; Tite 2:9, 10) Lendi bâ mpe na madema mu timvuka, ntiana dema dia tindisaka na dia kipaka mpangi zandi, fweti bâ mpe na luhemo lwalwingi mu tisalu tia samuna. Mu ntangu yo mpe, mfunu wena kalongokaka Bibila ntangu zazansoni na  mukento’andi mpe na bala bandi. Mbo bavutula matondo mu ngolo zi kata sarila ngatu babâ na nitu za wasa, na nsayi mpe mu bungu ti mbo kababakisa mu bâ ndiku za Yehova.​—Efz. 5:28, 29; 6:4.

18. Mu ntia musamu Za kabêla na lukwikulu?

¹⁸ Za wabâ na luzingu lwa lula mpe misamu miamingi kabwabana na mio. Watelamana misamu miamingi miaketi wolesa timinu tiandi. Kâ ntangu zazansoni mbo keri sarilaka ngolo mu tumamana ntumunu za Yezu, na ntumunu yitutumaka mu zolo mpangi zeto. Ntiangu, Za kabâ na lukwikulu ti Yehova na Yezu yandi beri zoloko, mpe mbo baketi mu hana ngolo za telamana nkwamusu zazansoni. (Za 14:15-17; 15:10; 1 Za 4:16) Satana na nza’andi ka balenda ko mu kabakasa Za mu zolo mpangi zandi na mu songela luzolo lwango mu mio mi keri tâka na mi keri yirikaka.

19. Ngano 1 Za 4:7 nti yita tu tindisa mu sa, mpe mu bungu dia nti?

¹⁹ Ntiana Za, mu nza ye mu lutumu lwa Satana na yilembo zoloko bantu twena. (1 Za 3:1, 10) Ni bu sa ti Satana zololo ti tabika mu zolo mpangi zeto, ka lenda ko tala ti beto beni ka tumuheni’â nzila ko. Tabongeno nzengolo ya zolo mpangi zeto, ya songela luzolo lwango mu mio mi tuyirikaka na mu mio mi tutâka. Tamana songela luzolo lwa mpila yo, mbo tubâ na nsayi ya bâ mu kanda dia Yehova, mpe mbo tutomo zolo luzingu.​—Tanga 1 Za 4:7.