ບົດຄວາມສຶກສາທີ 2
ຮຽນຈາກ “ລູກສິດຜູ້ທີ່ພະເຢຊູຮັກ”
“ໃຫ້ພວກເຮົາຮັກກັນຕໍ່ໆໄປ ເພາະຄວາມຮັກມາຈາກພະເຈົ້າ.”—1 ຢຮ. 4:7
ເພງ 105 “ພະເຈົ້າເປັນຄວາມຮັກ”
ໃຈຄວາມສຳຄັນ *
1. ເຈົ້າຮູ້ສຶກແນວໃດທີ່ຮູ້ວ່າພະເຈົ້າຮັກເຈົ້າ?
ໂຢຮັນຂຽນວ່າ “ພະເຈົ້າເປັນຄວາມຮັກ.” (1 ຢຮ. 4:8) ຄຳເວົ້ານີ້ເຮັດໃຫ້ເຮົາຮູ້ຄວາມຈິງທີ່ສຳຄັນວ່າພະເຈົ້າເປັນຜູ້ໃຫ້ຊີວິດ. ດັ່ງນັ້ນ ຄວາມຮັກກໍຕ້ອງມາຈາກເພິ່ນຄືກັນ. ພະເຢໂຫວາຮັກເຮົາ ຄວາມຮັກນີ້ເຮັດໃຫ້ເຮົາຮູ້ສຶກອົບອຸ່ນ ປອດໄພ ແລະມີຄວາມສຸກ.
2. ຕາມມັດທາຍ 22:37-40 ກົດໝາຍສອງຂໍ້ທີ່ສຳຄັນທີ່ສຸດແມ່ນຫຍັງ ແລະເປັນຫຍັງຈຶ່ງຍາກທີ່ເຮົາຈະເຮັດຕາມຂໍ້ທີສອງ?
2 ເຮົາທີ່ເປັນຄລິດສະຕຽນຕ້ອງສະແດງຄວາມຮັກເພາະນີ້ເປັນຄຳສັ່ງຂອງພະເຢຊູ. (ອ່ານມັດທາຍ 22:37-40) ເມື່ອເຮົາໄດ້ມາຮູ້ຈັກພະເຢໂຫວາ ມັນກໍງ່າຍທີ່ເຮົາຈະເຮັດຕາມຄຳສັ່ງຂໍ້ທຳອິດທີ່ບອກໃຫ້ຮັກພະເຢໂຫວາເພາະເພິ່ນເປັນພະເຈົ້າທີ່ສົມບູນແບບ. ເພິ່ນຄິດເຖິງຄວາມຮູ້ສຶກຂອງເຮົາ ຮັກ ແລະເປັນຫ່ວງເຮົາ. ແຕ່ເຮົາອາດຮູ້ສຶກວ່າຍາກທີ່ຈະເຮັດຕາມຄຳສັ່ງຂໍ້ທີສອງເຊິ່ງກໍຄືໃຫ້ຮັກຄົນອື່ນ ຍ້ອນວ່າພີ່ນ້ອງເປັນຄົນບໍ່ສົມບູນແບບແລະບາງເທື່ອເຂົາເຈົ້າກໍເວົ້າຫຼືເຮັດບໍ່ດີຕໍ່ເຮົາ. ພະເຢໂຫວາຮູ້ວ່າບາງເທື່ອມັນກໍຍາກທີ່ເຮົາຈະຮັກຄົນອື່ນ. ດັ່ງນັ້ນ ເພິ່ນຈຶ່ງໄດ້ໃຫ້ບາງຄົນຂຽນຄຳແນະນຳໃນຄຳພີໄບເບິນເພື່ອສອນເຮົາໃຫ້ຮູ້ວ່າ ເປັນຫຍັງເຮົາຄວນສະແດງຄວາມຮັກຕໍ່ຄົນອື່ນແລະເຮົາຈະສະແດງຄວາມຮັກນັ້ນແນວໃດ. ຜູ້ໜຶ່ງທີ່ຂຽນເລື່ອງຄວາມຮັກກໍຄືໂຢຮັນ.—1 ຢຮ. 3:11, 12
3. ໂຢຮັນໄດ້ເນັ້ນເລື່ອງຫຍັງ?
3 ໂຢຮັນຂຽນວ່າຄລິດສະຕຽນຕ້ອງສະແດງຄວາມຮັກ. ໂຢຮັນໃຊ້ຄຳວ່າ “ຮັກ” ຫຼາຍກວ່າຄົນອື່ນໆທີ່ຂຽນເລື່ອງຊີວິດຂອງພະເຢຊູລວມກັນໃນຄຳພີໄບເບິນ. ໂຢຮັນຂຽນປຶ້ມໂຢຮັນແລະຈົດໝາຍອີກສາມສະບັບຕອນທີ່ລາວອາຍຸປະມານ 100 ປີ. ປຶ້ມເຫຼົ່ານັ້ນກະຕຸ້ນຄລິດສະຕຽນໃຫ້ເຮັດທຸກສິ່ງດ້ວຍຄວາມຮັກ. (1 ຢຮ. 4:10, 11) ແຕ່ວ່າໂຢຮັນກໍຕ້ອງໃຊ້ເວລາເພື່ອຈະຮຽນຮູ້ທີ່ຈະຮັກຄົນອື່ນຄືກັນ.
4. ໂຢຮັນສະແດງຄວາມຮັກຕໍ່ຄົນອື່ນບໍ?
4 ຕອນທີ່ໂຢຮັນຍັງໜຸ່ມມີບາງເທື່ອທີ່ລາວບໍ່ໄດ້ສະແດງຄວາມຮັກ ເຊັ່ນ ມີເທື່ອໜຶ່ງທີ່ພະເຢຊູກັບພວກລູກສິດໄດ້ເດີນທາງຜ່ານຊາມາເຣຍເພື່ອໄປເຢຣູຊາເລັມ ມີບ້ານໜຶ່ງຂອງຄົນຊາມາເຣຍບໍ່ຢາກຕ້ອນຮັບພະເຢຊູກັບພວກລູກສິດ. ແລ້ວໂຢຮັນເຮັດແນວໃດ? ລາວເວົ້າກັບພະເຢຊູວ່າ ໃຫ້ໄຟຈາກຟ້າລົງມາຈູດເຂົາເຈົ້າເລີຍເບາະ! (ລກ. 9:52-56) ແລະຍັງມີອີກເທື່ອໜຶ່ງທີ່ໂຢຮັນບໍ່ໄດ້ສະແດງຄວາມຮັກຕໍ່ໝູ່ທີ່ເປັນອັກຄະສາວົກນຳກັນ. ລາວກັບຢາໂກໂບທີ່ເປັນອ້າຍນ້ອງກັນໄດ້ໃຫ້ແມ່ໄປຂໍຕຳແໜ່ງທີ່ສຳຄັນຈາກພະເຢຊູເຊິ່ງເປັນການເຫັນແກ່ໂຕແທ້ໆ. ແລະເມື່ອອັກຄະສາວົກຄົນອື່ນໆຮູ້ເລື່ອງນີ້ ເຂົາເຈົ້າກໍຄຽດຫຼາຍ! (ມທ. 20:20, 21, 24) ເຖິງວ່າໂຢຮັນຈະເຮັດສິ່ງທີ່ບໍ່ດີແບບນັ້ນ ແຕ່ພະເຢຊູກໍຍັງຮັກລາວ.—ຢຮ. 21:7
5. ເຮົາຈະຮຽນຫຍັງໃນບົດຄວາມນີ້?
5 ໃນບົດຄວາມນີ້ ເຮົາຈະມາຮຽນເລື່ອງຂອງໂຢຮັນແລະບາງສິ່ງທີ່ລາວຂຽນກ່ຽວກັບຄວາມຮັກ. ແລະເມື່ອຮຽນເລື່ອງຂອງໂຢຮັນ ເຮົາຈະເຫັນວິທີທີ່ເຮົາຈະສະແດງຄວາມຮັກຕໍ່ພີ່ນ້ອງ ແລະວິທີທີ່ຫົວໜ້າຄອບຄົວຈະສະແດງຄວາມຮັກຕໍ່ຄອບຄົວຂອງລາວເອງ.
ສະແດງຄວາມຮັກໂດຍການກະທຳ
ພະເຢໂຫວາສະແດງຄວາມຮັກຕໍ່ເຮົາໂດຍສົ່ງລູກຊາຍຂອງເພິ່ນມາຕາຍເພື່ອເຮົາ (ເບິ່ງຂໍ້ 6-7)
6. ພະເຢໂຫວາສະແດງຄວາມຮັກຕໍ່ເຮົາແນວໃດ?
6 ເຮົາມັກຈະຄິດວ່າຄວາມຮັກເປັນຄວາມຮູ້ສຶກດີໆທີ່ເຮົາເວົ້າອອກມາ ແຕ່ຄວາມຮັກແທ້ຕ້ອງສະແດງອອກໂດຍການກະທຳນຳ. (ສົມທຽບກັບຢາໂກໂບ 2:17, 26) ຕົວຢ່າງເຊັ່ນ: ພະເຢໂຫວາຮັກເຮົາ. (1 ຢຮ. 4:19) ເພິ່ນເວົ້າກັບເຮົາຜ່ານທາງຄຳພີໄບເບິນ. (ເພງ. 25:10; ຣມ. 8:38, 39) ແຕ່ເຮົາໝັ້ນໃຈວ່າພະເຢໂຫວາບໍ່ພຽງແຕ່ຮັກເຮົາໂດຍທາງຄຳເວົ້າເທົ່ານັ້ນ ແຕ່ໂດຍທາງການກະທຳນຳ. ໂຢຮັນຂຽນວ່າ: “ພະເຈົ້າສະແດງຄວາມຮັກຕໍ່ພວກເຮົາຢ່າງຊັດເຈນເມື່ອພະອົງໃຫ້ລູກຄົນດຽວຂອງພະອົງເຂົ້າມາໃນໂລກ ເພື່ອເພິ່ນຈະເປີດໂອກາດໃຫ້ພວກເຮົາໄດ້ຊີວິດ.” (1 ຢຮ. 4:9) ພະເຢໂຫວາຍອມໃຫ້ລູກຊາຍທີ່ເພິ່ນຮັກມາທົນທຸກທໍລະມານແລະຕາຍເພື່ອເຮົາ. (ຢຮ. 3:16) ດັ່ງນັ້ນ ເຮົາກໍໝັ້ນໃຈໄດ້ວ່າພະເຢໂຫວາຮັກເຮົາຫຼາຍແທ້ໆ.
7. ພະເຢຊູສະແດງຄວາມຮັກຕໍ່ເຮົາແນວໃດ?
7 ພະເຢຊູບອກພວກລູກສິດວ່າເພິ່ນຮັກເຂົາເຈົ້າ. (ຢຮ. 13:1; 15:15) ເພິ່ນສະແດງຄວາມຮັກຕໍ່ເຂົາເຈົ້າບໍ່ພຽງແຕ່ທາງຄຳເວົ້າເທົ່ານັ້ນແຕ່ໂດຍທາງການກະທຳນຳ. ເພິ່ນບອກວ່າ: “ບໍ່ມີຜູ້ໃດມີຄວາມຮັກທີ່ຍິ່ງໃຫຍ່ກວ່າຜູ້ທີ່ໄດ້ຍອມສະລະຊີວິດຂອງຕົວເອງເພື່ອໝູ່ຂອງລາວ.” (ຢຮ. 15:13) ເມື່ອເຮົາຄິດເຖິງສິ່ງທີ່ພະເຢໂຫວາແລະພະເຢຊູເຮັດເພື່ອເຮົາ ສິ່ງນີ້ຄວນກະຕຸ້ນເຮົາໃຫ້ຢາກເຮັດຫຍັງ?
8. ຕາມ 1 ໂຢຮັນ 3:18 ເຮົາຄວນເຮັດຫຍັງ?
8 ເຮົາສະແດງໃຫ້ເຫັນວ່າເຮົາຮັກພະເຢໂຫວາແລະພະເຢຊູໂດຍເຊື່ອຟັງພວກເພິ່ນ. (ຢຮ. 14:15; 1 ຢຮ. 5:3) ແລະເຊື່ອຟັງຄຳສັ່ງຂອງພະເຢຊູທີ່ບອກໃຫ້ເຮົາຮັກກັນ. (ຢຮ. 13:34, 35) ດັ່ງນັ້ນຖ້າເຮົາຮັກພີ່ນ້ອງແທ້ໆ ເຮົາຈະບໍ່ພຽງແຕ່ບອກວ່າເຮົາຮັກເຂົາເຈົ້າເທົ່ານັ້ນ ແຕ່ຈະສະແດງໃຫ້ເຂົາເຈົ້າເຫັນໂດຍທາງການກະທຳນຳ. (ອ່ານ 1 ໂຢຮັນ 3:18) ແລ້ວເຮົາຕ້ອງເຮັດຫຍັງແດ່ເພື່ອສະແດງໃຫ້ເຫັນວ່າເຮົາຮັກພີ່ນ້ອງ?
ຮັກພີ່ນ້ອງ
9. ຄວາມຮັກກະຕຸ້ນໂຢຮັນໃຫ້ເຮັດຫຍັງ?
9 ທີ່ຈິງ ໂຢຮັນອາດຈະເຮັດວຽກຫາປານຳພໍ່ແລະຫາເງິນຫຼາຍໆກໍໄດ້. ແຕ່ລາວໃຊ້ຊີວິດທີ່ມີຢູ່ເພື່ອສອນຄົນອື່ນໃຫ້ຮູ້ຈັກພະເຢໂຫວາແລະພະເຢຊູ. ຊີວິດທີ່ໂຢຮັນເລືອກບໍ່ແມ່ນຊີວິດທີ່ສະດວກສະບາຍ. ລາວຖືກຂົ່ມເຫງແລະຖືກເນລະເທດຍ້ອນປະກາດເລື່ອງຂອງພະເຢຊູ ແລະເທື່ອສຸດທ້າຍທີ່ລາວຖືກແບບນີ້ກໍເປັນຕອນທີ່ລາວອາຍຸຫຼາຍແລ້ວ. (ກຈກ. 3:1; 4:1-3; 5:18; ພນມ. 1:9) ເຖິງວ່າລາວຈະຖືກຂັງຄຸກ ແຕ່ລາວກໍຍັງສະແດງຄວາມຮັກຕໍ່ພີ່ນ້ອງ. ຕົວຢ່າງເຊັ່ນ: ຕອນທີ່ຢູ່ເກາະປັດໂມລາວໄດ້ຂຽນປຶ້ມພະນິມິດແລະສົ່ງໄປຫາພີ່ນ້ອງໃນປະຊາຄົມຕ່າງໆເພື່ອເຂົາເຈົ້າຈະຮູ້ສິ່ງທີ່ຈະ “ຕ້ອງເກີດຂຶ້ນໃນໄວໆນີ້.” (ພນມ. 1:1) ເບິ່ງຄືວ່າຫຼັງຈາກທີ່ລາວຖືກປ່ອຍໂຕອອກຈາກເກາະປັດໂມ ລາວໄດ້ຂຽນປຶ້ມໂຢຮັນທີ່ເວົ້າເຖິງຊີວິດແລະວຽກຮັບໃຊ້ຂອງພະເຢຊູ ແລະລາວຍັງໄດ້ຂຽນຈົດໝາຍອີກສາມສະບັບເພື່ອໃຫ້ກຳລັງໃຈແລະຊ່ອຍໃຫ້ພີ່ນ້ອງມີຄວາມເຊື່ອເຂັ້ມແຂງ. ເຮົາຈະຮຽນແບບໂຢຮັນແນວໃດໃນການເສຍສະລະຕົວເອງ?
10. ເຈົ້າຈະສະແດງໃຫ້ເຫັນແນວໃດວ່າເຈົ້າຮັກຄົນອື່ນ?
10 ວິທີທີ່ເຈົ້າໃຊ້ຊີວິດສະແດງໃຫ້ເຫັນວ່າເຈົ້າຮັກຄົນອື່ນບໍ? ໂລກຂອງຊາຕານຢາກໃຫ້ເຮົາໃຊ້ເວລາແລະກຳລັງທີ່ເຮົາມີເພື່ອຈະຫາເງິນໄດ້ຫຼາຍໆແລະສ້າງຊື່ສຽງໃຫ້ກັບຕົວເອງ. ແຕ່ຄລິດສະຕຽນທີ່ຢູ່ທົ່ວໂລກບໍ່ໄດ້ເຮັດແບບນັ້ນເພາະເຂົາເຈົ້າໄດ້ໃຊ້ເວລາແລະເຫື່ອແຮງທີ່ມີຢູ່ເພື່ອປະກາດຂ່າວດີແລະຊ່ອຍຄົນອື່ນໃຫ້ມາເປັນໝູ່ກັບພະເຢໂຫວາ ແລະບາງຄົນເຖິງຂັ້ນເຮັດວຽກຮັບໃຊ້ເຕັມເວລາ.
ເຮົາສະແດງວ່າຮັກພີ່ນ້ອງແລະຄອບຄົວໂດຍສິ່ງທີ່ເຮົາເຮັດ (ເບິ່ງຂໍ້ 11, 17) *
11. ຄລິດສະຕຽນຫຼາຍຄົນສະແດງໃຫ້ເຫັນແນວໃດວ່າເຂົາເຈົ້າຮັກພະເຢໂຫວາແລະຮັກພີ່ນ້ອງ?
11 ຄລິດສະຕຽນຫຼາຍຄົນຕ້ອງເຮັດວຽກອາຊີບເພື່ອຈະຫາລ້ຽງຕົວເອງແລະຄອບຄົວ. ແຕ່ເຂົາເຈົ້າກໍຍັງສະໜັບສະໜູນອົງການຂອງພະເຢໂຫວາໃນຫຼາຍໆວິທີເທົ່າທີ່ເຮັດໄດ້ເຊັ່ນ: ບາງຄົນກໍຊ່ອຍວຽກບັນເທົາທຸກເມື່ອເກີດໄພພິບັດ ບາງຄົນກໍຊ່ອຍໃນໂຄງການກໍ່ສ້າງ ແຕ່ທຸກຄົນກໍບໍລິຈາກເງິນສຳລັບວຽກງານທົ່ວໂລກ. ເຂົາເຈົ້າເຮັດສິ່ງເຫຼົ່ານີ້ຍ້ອນວ່າຮັກພະເຢໂຫວາແລະຮັກພີ່ນ້ອງຄົນອື່ນໆ. ໃນແຕ່ລະອາທິດເຮົາຍັງສະແດງໃຫ້ເຫັນວ່າເຮົາຮັກພີ່ນ້ອງໂດຍເຂົ້າຮ່ວມປະຊຸມແລະມີສ່ວນອອກຄຳຄິດເຫັນ. ເຖິງວ່າເຮົາອາດຈະເມື່ອຍແຕ່ເຮົາກໍໄປປະຊຸມ ແລະເຖິງວ່າເຮົາອາດຈະຕື່ນເຕັ້ນຫຼືບໍ່ກ້າແຕ່ເຮົາກໍອອກຄຳຄິດເຫັນ ແລະເຖິງວ່າເຮົາແຕ່ລະຄົນຈະມີບັນຫາສ່ວນຕົວ ແຕ່ເຮົາກໍຍັງໃຫ້ກຳລັງໃຈພີ່ນ້ອງທັງກ່ອນແລະຫຼັງການປະຊຸມ. (ຮຣ. 10:24, 25) ເຮົາຮູ້ສຶກເຫັນຄຸນຄ່າສິ່ງທີ່ພີ່ນ້ອງເຮັດຫຼາຍແທ້ໆ!
12. ໂຢຮັນຍັງໄດ້ສະແດງຄວາມຮັກຕໍ່ພີ່ນ້ອງໂດຍເຮັດຫຍັງອີກ?
12 ໂຢຮັນສະແດງໃຫ້ເຫັນວ່າຮັກພີ່ນ້ອງໂດຍບໍ່ພຽງແຕ່ຊົມເຊີຍເຂົາເຈົ້າເທົ່ານັ້ນ ແຕ່ຍັງໄດ້ໃຫ້ຄຳແນະນຳເຂົາເຈົ້າ. ຕົວຢ່າງເຊັ່ນ: ໃນຈົດໝາຍທີ່ໂຢຮັນຂຽນ ລາວບໍ່ພຽງແຕ່ຊົມເຊີຍຄວາມເຊື່ອແລະສິ່ງດີໆທີ່ພີ່ນ້ອງເຮັດ ແຕ່ລາວຍັງໄດ້ໃຫ້ຄຳແນະນຳແບບກົງໄປກົງມາເພື່ອບໍ່ໃຫ້ພີ່ນ້ອງເຮັດບາບ. (1 ຢຮ. 1:8–2:1, 13, 14) ຄ້າຍຄືກັນ ເຮົາກໍຕ້ອງຊົມເຊີຍພີ່ນ້ອງໃນສິ່ງດີໆທີ່ເຂົາເຈົ້າເຮັດ ແຕ່ຖ້າເຫັນວ່າພີ່ນ້ອງບາງຄົນເລີ່ມມີຄວາມຄິດແລະນິດໄສທີ່ບໍ່ດີ ເຮົາກໍຕ້ອງສະແດງຄວາມຮັກໂດຍກ້າເຕືອນເຂົາເຈົ້າແບບກົງໆ ແຕ່ກໍຕ້ອງເວົ້າແບບອ່ອນໂຍນ. ການເຮັດແບບນີ້ຕ້ອງໃຊ້ຄວາມກ້າຫຼາຍ ແຕ່ຄຳພີໄບເບິນບອກວ່າໝູ່ແທ້ຈະເຕືອນກັນແລະຊ່ອຍກັນໃຫ້ເຮັດສິ່ງທີ່ຖືກຕ້ອງ.—ສຸພາ. 27:17
13. ເຮົາຈະສະແດງຄວາມຮັກຕໍ່ພີ່ນ້ອງໂດຍເຮັດຫຍັງ?
13 ບາງເທື່ອເຮົາກໍສະແດງຄວາມຮັກຕໍ່ພີ່ນ້ອງໂດຍຄວບຄຸມຕົວເອງບໍ່ໃຫ້ເຮັດບາງຢ່າງ. ຕົວຢ່າງເຊັ່ນ: ເຮົາຈະບໍ່ຄຽດງ່າຍກັບສິ່ງທີ່ພີ່ນ້ອງເວົ້າ. ລອງຄິດເຖິງເຫດການທີ່ເກີດຂຶ້ນບໍ່ດົນກ່ອນທີ່ພະເຢຊູຕາຍ. ພະເຢຊູບອກພວກລູກສິດຂອງເພິ່ນວ່າ ຖ້າເຂົາເຈົ້າຢາກໄດ້ຊີວິດ ເຂົາເຈົ້າຕ້ອງກິນຊີ້ນແລະເລືອດຂອງເພິ່ນ. (ຢຮ. 6:53-57) ລູກສິດຫຼາຍຄົນຮັບບໍ່ໄດ້ທີ່ພະເຢຊູເວົ້າແບບນີ້ ເຂົາເຈົ້າຈຶ່ງປະຖິ້ມເພິ່ນ. ແຕ່ວ່າໝູ່ແທ້ຂອງເພິ່ນເຊິ່ງໜຶ່ງໃນນັ້ນກໍແມ່ນໂຢຮັນ ບໍ່ໄດ້ເຮັດແບບນັ້ນ ເຖິງວ່າເຂົາເຈົ້າອາດຈະຕົກໃຈແລະບໍ່ເຂົ້າໃຈໃນສິ່ງທີ່ພະເຢຊູເວົ້າ. ແຕ່ເຂົາເຈົ້າກໍບໍ່ໄດ້ຮູ້ສຶກວ່າຮັບບໍ່ໄດ້ຈົນຖິ້ມເພິ່ນໄປ. ເຂົາເຈົ້າຍັງໄວ້ໃຈເພິ່ນແລະໝັ້ນໃຈວ່າເພິ່ນເປັນຄົນທີ່ເວົ້າຄວາມຈິງ. (ຢຮ. 6:60, 66-69) ດັ່ງນັ້ນ ເປັນເລື່ອງສຳຄັນຫຼາຍແທ້ໆທີ່ເຮົາຈະບໍ່ຄຽດງ່າຍກັບສິ່ງທີ່ພີ່ນ້ອງເວົ້າ ແຕ່ເຮົາຈະໃຫ້ໂອກາດເຂົາເຈົ້າໄດ້ອະທິບາຍເຫດຜົນ.—ສຸພາ. 18:13; ຜູ້ປ. 7:9
14. ເປັນຫຍັງເຮົາບໍ່ຄວນຊັງພີ່ນ້ອງ?
14 ໂຢຮັນຍັງເຕືອນເຮົາວ່າບໍ່ໃຫ້ຊັງພີ່ນ້ອງ. ເພາະຖ້າເຮົາຊັງພີ່ນ້ອງ ເຮົາກໍກຳລັງເປີດທາງໃຫ້ຊາຕານ. (1 ຢຮ. 2:11; 3:15) ເລື່ອງນີ້ເກີດຂຶ້ນກັບບາງຄົນໃນທ້າຍສະຕະວັດທຳອິດ. ຕອນນັ້ນຊາຕານພະຍາຍາມເຮັດໃຫ້ຜູ້ຮັບໃຊ້ຂອງພະເຈົ້າກຽດຊັງກັນແລະແຕກແຍກກັນ. ຕອນທີ່ໂຢຮັນຂຽນຈົດໝາຍ ມີບາງຄົນທີ່ມີນິດໄສຄືກັບຊາຕານໄດ້ເຂົ້າມາໃນປະຊາຄົມ. ຜູ້ໜຶ່ງກໍຄືດີໂອເທເຟທີ່ພະຍາຍາມສ້າງຄວາມແຕກແຍກໃນປະຊາຄົມ. (3 ຢຮ. 9, 10) ລາວບໍ່ໄດ້ໃຫ້ກຽດຕົວແທນຈາກຄະນະກຳມະການປົກຄອງທີ່ມາຢາມປະຊາຄົມ ລາວເຖິງຂັ້ນພະຍາຍາມໄລ່ພີ່ນ້ອງທີ່ມາຕ້ອນຮັບຄົນທີ່ລາວບໍ່ມັກອອກຈາກປະຊາຄົມ. ລາວຈັ່ງແມ່ນຍິ່ງຈອງຫອງເນາະ! ໃນທຸກມື້ນີ້ຊາຕານກໍພະຍາຍາມເຮັດໃຫ້ປະຊາຊົນຂອງພະເຈົ້າກຽດຊັງກັນແລະແຕກແຍກກັນ. ຂໍໃຫ້ເຮົາຢ່າຍອມໃຫ້ຄວາມກຽດຊັງມາເຮັດໃຫ້ເຮົາແຕກແຍກກັນ.
ຮັກຄອບຄົວ
ພະເຢຊູຂໍໃຫ້ໂຢຮັນເບິ່ງແຍງແມ່ຂອງເພິ່ນເລື່ອງວັດຖຸແລະເລື່ອງຄວາມເຊື່ອ. ດັ່ງນັ້ນຫົວໜ້າຄອບຄົວໃນທຸກມື້ນີ້ກໍຕ້ອງເບິ່ງແຍງຄອບຄົວໃຫ້ມີສິ່ງຈຳເປັນແບບນີ້ຄືກັນ. (ເບິ່ງຂໍ້ 15-16)
15. ຫົວໜ້າຄອບຄົວຕ້ອງຈື່ຫຍັງໄວ້?
15 ວິທີໜຶ່ງທີ່ຫົວໜ້າຄອບຄົວຈະສະແດງໃຫ້ເຫັນວ່າຮັກຄອບຄົວກໍຄືຈັດຫາສິ່ງຈຳເປັນໃຫ້ກັບຄອບຄົວ. (1 ຕມ. 5:8) ແຕ່ລາວຕ້ອງຈື່ວ່າສິ່ງທີ່ສຳຄັນທີ່ສຸດແມ່ນຊ່ອຍໃຫ້ຄອບຄົວມີສາຍສຳພັນທີ່ດີກັບພະເຢໂຫວາ. (ມທ. 5:3) ພະເຢຊູເປັນຕົວຢ່າງທີ່ດີໃຫ້ກັບຫົວໜ້າຄອບຄົວໃນເລື່ອງນີ້. ໂຢຮັນຂຽນວ່າຕອນທີ່ພະເຢຊູຖືກຄຶງຢູ່ເທິງເສົາທໍລະມານແລະຮູ້ສຶກເຈັບປວດຫຼາຍ ເພິ່ນໄດ້ຂໍໃຫ້ໂຢຮັນເບິ່ງແຍງມາຣີແມ່ຂອງເພິ່ນເຊິ່ງຕອນນັ້ນໂຢຮັນຢືນຢູ່ຂ້າງມາຣີ. (ຢຮ. 19:26, 27) ທີ່ຈິງພະເຢຊູກໍມີນ້ອງຫຼາຍຄົນທີ່ສາມາດເບິ່ງແຍງແມ່ເລື່ອງວັດຖຸໄດ້ ແຕ່ຕອນນັ້ນເຂົາເຈົ້າຍັງບໍ່ທັນເຊື່ອໃນພະເຢຊູເທື່ອ. ດັ່ງນັ້ນພະເຢຊູຈຶ່ງຝາກໄວ້ກັບໂຢຮັນເພື່ອຈະໝັ້ນໃຈວ່າ ແມ່ຂອງເພິ່ນຈະໄດ້ຮັບການເບິ່ງແຍງເລື່ອງວັດຖຸແລະເລື່ອງຄວາມເຊື່ອ.
16. ໂຢຮັນມີໜ້າທີ່ຮັບຜິດຊອບຫຍັງແດ່?
16 ໂຢຮັນມີໜ້າທີ່ຮັບຜິດຊອບຫຼາຍຢ່າງ. ເນື່ອງຈາກລາວເປັນອັກຄະສາວົກຄົນໜຶ່ງ ລາວຈຶ່ງຕ້ອງນຳໜ້າໃນວຽກປະກາດ. ລາວອາດຈະແຕ່ງດອງແລ້ວ ດັ່ງນັ້ນລາວຕ້ອງເບິ່ງແຍງຄອບຄົວໃຫ້ມີສິ່ງຈຳເປັນເລື່ອງວັດຖຸແລະເລື່ອງຄວາມເຊື່ອ. (1 ກຣ. 9:5) ຫົວໜ້າຄອບຄົວໃນທຸກມື້ນີ້ໄດ້ບົດຮຽນຫຍັງ?
17. ເປັນຫຍັງຈຶ່ງສຳຄັນທີ່ຫົວໜ້າຄອບຄົວຈະຊ່ອຍຄອບຄົວໃຫ້ມີຄວາມເຊື່ອເຂັ້ມແຂງ?
17 ພີ່ນ້ອງຊາຍທີ່ເປັນຫົວໜ້າຄອບຄົວອາດມີໜ້າທີ່ຮັບຜິດຊອບທີ່ສຳຄັນຫຼາຍຢ່າງເຊັ່ນ: ລາວຕ້ອງດຸໝັ່ນເຮັດວຽກເພາະການເປັນຄົນດຸໝັ່ນຈະເຮັດໃຫ້ພະເຢໂຫວາໄດ້ຮັບກຽດ. (ອຟຊ. 6:5, 6; ຕຕ. 2:9, 10) ແລະລາວອາດຈະຍັງມີໜ້າທີ່ຮັບຜິດຊອບໃນປະຊາຄົມເຊັ່ນ: ໃຫ້ກຳລັງໃຈພີ່ນ້ອງແລະນຳໜ້າໃນວຽກປະກາດ. ແລະທີ່ສຳຄັນລາວຍັງຕ້ອງຊ່ອຍລູກແລະເມຍໃຫ້ມີຄວາມເຊື່ອທີ່ເຂັ້ມແຂງໂດຍສຶກສາຄຳພີໄບເບິນກັບເຂົາເຈົ້າເປັນປະຈຳ. ລູກກັບເມຍຈະເຫັນຄ່າລາວທີ່ພະຍາຍາມເບິ່ງແຍງຄອບຄົວໃຫ້ມີສິ່ງຈຳເປັນທາງດ້ານຮ່າງກາຍ ອາລົມຄວາມຮູ້ສຶກ ແລະທາງດ້ານຄວາມເຊື່ອ.—ອຟຊ. 5:28, 29; 6:4
“ເປັນທີ່ຮັກຂອງຂ້ອຍຢູ່ສະເໝີ”
18. ໂຢຮັນໝັ້ນໃຈໃນເລື່ອງຫຍັງ?
18 ໂຢຮັນອາຍຸຍືນກວ່າອັກຄະສາວົກຄົນອື່ນໆ ດັ່ງນັ້ນລາວກໍຄືຊິຜ່ານອີ່ຫຍັງມາຫຼາຍຢ່າງໃນຊີວິດ ແລະກໍອາດຈະມີບັນຫາທີ່ເຮັດໃຫ້ຄວາມເຊື່ອອ່ອນລົງນຳ ແຕ່ລາວກໍຍັງເຊື່ອຟັງຄຳສັ່ງຂອງພະເຢຊູສະເໝີລວມທັງຄຳສັ່ງທີ່ໃຫ້ຮັກພີ່ນ້ອງ. ຍ້ອນແນວນັ້ນ ລາວຈຶ່ງໝັ້ນໃຈວ່າພະເຢໂຫວາແລະພະເຢຊູຮັກລາວ ແລະຈະຊ່ອຍລາວໃຫ້ມີກຳລັງທີ່ຈະຜ່ານບັນຫາທີ່ຫຍຸ້ງຍາກໄດ້. (ຢຮ. 14:15-17; 15:10; 1 ຢຮ. 4:16) ຊາຕານແລະໂລກຂອງມັນບໍ່ສາມາດຂັດຂວາງໂຢຮັນບໍ່ໃຫ້ສະແດງຄວາມຮັກຕໍ່ພີ່ນ້ອງທາງດ້ານຄຳເວົ້າແລະການກະທຳໄດ້.
19. 1 ໂຢຮັນ 4:7 ບອກເຮົາໃຫ້ເຮັດຫຍັງແລະຍ້ອນຫຍັງ?
19 ຄືກັບໂຢຮັນເຮົາຢູ່ໃນໂລກທີ່ຊາຕານປົກຄອງ ເຊິ່ງມັນບໍ່ເຄີຍຮັກໃຜເລີຍ. (1 ຢຮ. 3:1, 10) ຊາຕານຢາກໃຫ້ເຮົາເຊົາຮັກພີ່ນ້ອງ ແຕ່ມັນຈະເຮັດແບບນັ້ນບໍ່ໄດ້ຖ້າເຮົາບໍ່ຍອມເປີດທາງໃຫ້ມັນ. ຂໍໃຫ້ເຮົາຮັກພີ່ນ້ອງ ແລະສະແດງຄວາມຮັກນັ້ນໂດຍທາງຄຳເວົ້າແລະການກະທຳ. ແລະເມື່ອເຮົາເຮັດແບບນັ້ນ ເຮົາກໍເປັນສ່ວນໜຶ່ງຂອງຄອບຄົວພະເຢໂຫວາແລະມີຄວາມສຸກຫຼາຍແທ້ໆ!—ອ່ານ 1 ໂຢຮັນ 4:7
ເພງ 88 ຂໍໃຫ້ເຮົາຮູ້ທາງຂອງພະອົງ
^ ຂໍ້ 5 “ລູກສິດຜູ້ທີ່ພະເຢຊູຮັກ” ຄືຊິແມ່ນອັກຄະສາວົກໂຢຮັນ. (ຢຮ. 21:7) ນີ້ສະແດງວ່າຕອນທີ່ໂຢຮັນຍັງໜຸ່ມ ລາວຄືຊິມີຄຸນລັກສະນະທີ່ດີຫຼາຍຢ່າງທີ່ພະເຢຊູມັກ ແລະເມື່ອລາວອາຍຸຫຼາຍແລ້ວ ພະເຢໂຫວາກໍໄດ້ໃຊ້ລາວໃຫ້ຂຽນລາຍລະອຽດກ່ຽວກັບຄວາມຮັກ. ໃນບົດຄວາມນີ້ເຮົາຈະມາເບິ່ງບາງສິ່ງທີ່ໂຢຮັນຂຽນ ແລະເບິ່ງວ່າເຮົາໄດ້ຮຽນຫຍັງຈາກເລື່ອງຂອງລາວ.
^ ຂໍ້ 59 ຄຳອະທິບາຍຮູບພາບ: ຫົວໜ້າຄອບຄົວຄົນໜຶ່ງມີວຽກຫຼາຍຢ່າງ. ລາວຊ່ອຍວຽກບັນເທົາທຸກ ຊ່ອຍບໍລິຈາກເງິນສຳລັບວຽກງານທົ່ວໂລກ ແລະຊວນພີ່ນ້ອງຄົນອື່ນມາຮ່ວມການນະມັດສະການປະຈຳຄອບຄົວ.
