1. Uno zangi yaKalunga yeji kutulingisanga twivwenga ngachilihi?

KAPOSETOLO Yowano asonekele ngwenyi: “Kalunga ikiye zangi.” (Yowa. 1, 4:8) Uno mazu kana eji kutwanukisanga chishina muka chachilemu? Kuli Kalunga uze atengele kuyoya kukiko nawa kwafuma zangi. Yehova atuzanga. Kaha zangi yenyi yeji kutulingisanga tulivwe kupwa vakukingiwa, nakupwa vakuwahilila nakusuuluka.

2. Kweseka naMateu 22:37-40, jishimbi muka jivali jize japwa jajilemu, kaha mwomwo ika chinahase kutukaluhwila kukavangiza lushimbi lwamuchivali?

² Vaka-Kulishitu vosena vatela kusololanga zangi mwomwo lwapwa lushimbi. (Tangenu Mateu 22:37-40.) Nge tunatachikiza kanawa Yehova, kaha chinahase kupwa chachashi kwononoka lushimbi lwaYesu lwatete, mwomwo Yehova apwa wakukupuka. Shikaho lwola lwosena eji kutuzakamanga nakutusolwela likoji. Oloze chinahase kutukaluhwila kwononoka lushimbi lwaYesu lwamuchivali. Mwomwo ika? Mwomwo vandumbwetu vaze vapwa vakwetu kavapwa vakukupukako. Lwola lumwe vanahase kuhanjika chipwe kulinga vyuma vize navitwivwisa kupihya. Yehova atachikijile ngwenyi natumonanga ukalu kana. Ngocho ahwiminyinyine vaka-kusoneka Mbimbiliya vamwe, vasoneke ovyo chapwila chachilemu kusolwelanga vakwetu zangi namwakuyisolwela. Mutu umwe vahwiminyinyine shina Yowano.—Yowa. 1, 3:11, 12.

3. Vyuma muka ahanjikile Yowano kupandama kuzangi?

³ Mumazu asonekele, Yowano ashindakanyine ngwenyi vaka-Kulishitu vatela kusololanga zangi. Mumukanda wenyi uze wahanjika hakuyoya chaYesu, Yowano azachisa  lizu “zangi” mapapa kakavulu kuhambakana vakwavo vaze vasonekele mikanda yeka yaMujimbu Wamwaza. Yowano apwile namyaka kafwe 100, halwola asonekele mukanda waMujimbu Wamwaza namikanda yeka yitatu yayindende. Mikanda kana yasolola ngwayo vaka-Kulishitu vatela kusololanga zangi muvyuma vyosena vize navalinganga. (Yowa. 1, 4:10, 11) Chipwe ngocho, hahichile lwola numba Yowano atachikize ovyo chapwila chachilemu kusololanga zangi.

4. Kutala Yowano asolwelelenga vakwavo zangi lwola lwosena tahi?

⁴ Omu Yowano apwile mukweze, kasolwelenga zangi lwola lwosenako. Chakutalilaho, omu Yesu natumbaji twenyi vapwile nakuhita muSamaliya hakuya kuYelusalema, kwapwile limbo limwe lyamuSamaliya lize kalyavatambwile nachisamboko. Jino chuma muka alingile Yowano? Ikiye nandumbwenyi Yakova valombele Yesu mangana avetavise vasanyike kakahya kufuma mwilu kezenga nakunongesa vatu vosena mulimbo kana. (Luka 9:52-56) Halwola lukwavo nawa, Yowano ahonene kusolwela vakwavo vaposetolo zangi. Ikiye nandumbwenyi Yakova valwezele nevo avahanjikileko kuli Yesu mangana akavahane vihela vyavilemu muWangana. Omu vakwavo vaposetolo vatachikijile chuma kana, vapihililile chikuma. (Mateu 20:20, 21, 24) Chipwe ngocho Yesu atwalileho kuzanga Yowano chamokomoko natutenga twenyi.—Yowa. 21:7.

5. Vyuma muka natushimutwila muchihande chino?

⁵ Muchihande chino, natushimutwila hachakutalilaho chaYowano navyuma vimwe vize asonekele kupandama kuzangi. Natulinangula nawa jijila tunahase kusolwelamo zangi kuli vandumbwetu. Kaha nawa natulinangula jila yayilemu yize mutwe watanga nahase kusolwelamo ngwenyi azanga tanga yenyi.

6. Uno Yehova asolola ngachilihi ngwenyi atuzanga?

⁶ Kakavulu tunahase kushinganyeka ngwetu kuzanga mutu chapwa kumwivwila kuwaha chipwe kuhanjika mazu amwaza kuli ikiye. Olozenyi zangi yamwenemwene twatela kuyisololanga nawa namuvilinga. (Esekesenuko WaYakova 2:17, 26.) Chakutalilaho, Yehova atuzanga. (Yowa. 1, 4:19) Kaha zangi kana ayisolola kuhichila muMazu enyi aze vasoneka muMbimbiliya. (Samu 25:10; Loma 8:38, 39) Chipwe ngocho, zangi kana eji kuyisololanga nawa namuvilinga. Yowano asonekele ngwenyi: “Omu mukiko Kalunga asolwelele zangi yenyi kuli etu hakutuma Mwanenyi umwe kaha wakulipwila mukaye mangana tukahase kupwa nakuyoya kuhichila muli ikiye.” (Yowa. 1, 4:9) Yehova asuwile Mwanenyi  azanga ezenga nakutufwila. (Yowa. 3:16) Echi chasolola nge Yehova atuzanga chikupu.

7. Vyuma muka alingile Yesu mangana asolole ngwenyi atuzanga?

⁷ Yesu alwezelenga tumbaji twenyi ngwenyi avazanga chikuma. (Yowa. 13:1; 15:15) Vyuma ahanjikilenga navize alingilenga vyasolwele nge azangile tumbaji twenyi kuhakilako vene nayetu. Yesu ahanjikile ngwenyi: “Naumwe wauchi ali nazangi yakuhambakana eyi, mutu kwecha mwono wenyi hali masepa jenyi.” (Yowa. 15:13) Uno kushinganyeka havyuma atulingila Yehova naYesu nachitukunyula tulinge ika?

8. Chuma muka twatela kulinga chize vavuluka hali WaYowano 1, 3:18?

⁸ Natusolola ngwetu twazanga Yehova naYesu kachi nge natuvononokanga. (Yowa. 14:15; Yowa. 1, 5:3) Yesu atuhana lushimbi ngwenyi tulizangenga navakwetu. (Yowa. 13:34, 35) Shikaho twatela kusolola ngwetu twazanga vandumbwetu kuhichila muhanjikiso namuvilinga. (Tangenu WaYowano 1, 3:18.) Vyuma muka twatela kulinga mangana tusolole ngwetu twazanga vandumbwetu?

9. Uno zangi yakafwile Yowano alinge ika?

⁹ Nge Yowano azangile kachi atwamine naise nakuta ishi mangana vapwenga najimbongo jajivulu. Oloze azachishile kuyoya chenyi mangana akafwe vakwavo valinangule hali Yehova naYesu. Mulimo asakwile kuzata Yowano kawapwile wawashiko. Chakutalilaho, vamuyanjishilenga, kaha kusongo yalikulukaji lyamyaka lyakulivanga, omu apwile kashinakaji, vamukashile. (Vili. 3:1; 4:1-3; 5:18; Kuso. 1:9) Chipwe ngocho, nahalwola vamukashile, Yowano atwalileho lika kushinganyeka hali vandumbwenyi. Chakutalilaho, omu apwile halitungu lyaPatamu asonekele vyuma vize vamumwenesele, nakuvituma kuvikungulwilo mangana vandumbwenyi vatachikize vyuma vize “vyatela kulingiwa kalinwaha.” (Kuso. 1:1) Chasoloka nge omu Yowano afumine mukamenga kuPatamu, hakiko asonekele Mukanda waMujimbu Wamwaza wakuyoya chaYesu namulimo wenyi. Asonekele nawa mikanda yeka yitatu yayindende mangana akolezeze vandumbwenyi. Namuhasa kulondezeza ngachilihi Yowano hamuchima wenyi wakulisuula?

10. Namusolola ngachilihi ngwenu mwazanga vatu?

¹⁰ Vyuma namusakula kulinga mukuyoya chenu, navisolola nge mwazanga vakwenu. Kaye kaSatana kasaka muzachise lwola lwenu nangolo jenu mangana mulinganyalise enu vavene hakulilunjikila jimbongo chipwe kuya fuma. Oloze vaka-kwambulula Wangana mukaye kosena veji kulisuulanga kuzachisa lwola lwavo hakwambulula mujimbu wamwaza, nakukafwa vatu vapandame kuli Yehova. Kaha vamwe vapwa vaka-kwambulula vashimbu yosena.

11. Uno vaka-kwambulula vavavulu veji kusololanga ngachilihi ngwavo vazanga Yehova navandumbwavo?

¹¹ Vaka-Kulishitu vavavulu vazata milimo yakukaye mangana vawane mwakuyoyela najitanga javo. Chipwe ngocho, ava vandumbwetu veji kukundwizanga liuka lyaKalunga kweseka nomu vanahashila. Chakutalilaho, vamwe veji kuyanga nakukafwa vaze vali muukalu wakulijila. Veka veji kwazananga mumulimo wakutungatunga. Kaha vosena vatwama nakutokwa chakuhana wana kumulimo wamukaye kosena. Veji kulinganga vyuma kana mwomwo vazanga Kalunga navakwavo vatu. Tunahase nawa kusolola ngwetu twazanga vandumbwetu hakupwanga kukukunguluka chalumingo hichalumingo nakwazanangamo. Tweji kuyanga kukukunguluka  kana numba tuhu tunazeye. Tweji kwazanangamo chamokomoko nakwivwa woma. Kaha nawa tweji kukolezezanga vandumbwetu shimbu kanda kukunguluka nahanyima yakukunguluka numba tuhu nayetu tuli naukalu wetu. (Hepe. 10:24, 25) Tweji kusakwililanga vandumbwetu hamilimo veji kukilikitanga.

12. Jila muka yikwavo yize Yowano asolwelelemo ngwenyi azangile vandumbwenyi?

¹² Yowano asolwele ngwenyi azangile vandumbwenyi, hakuvasangejeka nakuvahuhumuna nawa. Chakutalilaho, mumikanda yize avasonekelele, avasangejekele halufwelelo lwavo nahamilimo yamwenemwene vapwile nakuzata, nakuvahuhumuna nawa hashili vapwile nakulinga. (Yowa. 1, 1:8–2:1, 13, 14) Nayetu nawa twatela kusangejekanga vandumbwetu havyuma vyamwaza veji kulinganga. Oloze nge tunamono ndumbwetu naputuka kusolola muchima waupi chipwe kulinga vyuma vyavipi, kaha twatela kusolola ngwetu twamuzanga hakumukafwa mujila yakuzangama. Numba tuhu chapwa chachikalu kuhuhumuna sepa lyamutu, oloze Mbimbiliya ngwayo masepa vamwenemwene veji ‘kulihotolanga’ nakulyolola.—Vishi. 27:17.

13. Chuma muka chize katwatela kulingako?

¹³ Lwola lumwe tunahase kusolola ngwetu twazanga vandumbwetu hakulihenda kuvyuma vimwe. Chakutalilaho, katweshi kusulakana washi havyuma navahanjika vandumbwetuko. Achishinganyekenu hachuma chasolokele omu Yesu apwile nakuzata mulimo wenyi hano hamavu. Alwezele tumbaji twenyi ngwenyi hakusaka vakayoye, vatelelele kulya nyama yenyi nakunwa manyinga enyi. (Yowa. 6:53-57) Mazu kana evwishile kupihya tumbaji vavavulu, ngocho vamusezele. Oloze masepa jenyi vamwenemwene kuhakilako naYowano kavamusezeleko. Pamo valikomokelele hamazu kana, mwomwo kavevwishishile vyuma ahanjikile Yesuko. Oloze hakuwana nge vapwile masepa jenyi vakushishika, kavapihililile nakumona ngwavo mazu ahanjikile amapiko. Vamufwelelele mwomwo vatachikijile ngwavo ahanjikile muchano. (Yowa. 6:60, 66-69) Shikaho chapwa chachilemu chikuma kuhona kupihililanga washi havyuma navahanjika masepa jetu. Oloze twatela kuvahana lwola mangana valumbunune vyuma vanahanjika.—Vishi. 18:13; Kwambu. 7:9.

14. Mwomwo ika katwatela kuhunga vandumbwetuko?

¹⁴ Yowano atuhuhumuna nawa tuhone  kuhunganga vandumbwetu. Nge katweshi kukavangiza kuhuhumuna kanako, kaha tunahase kuhana Satana kengililo. (Yowa. 1, 2:11; 3:15) Chuma kana chasolokele kuli vaka-Kulishitu vamwe kusongo yalikulukaji lyamyaka lyakulivanga. Satana azachile nangolo hakulingisa vatu jaKalunga valihunge, nakuhona kupwa vakulinunga. Halwola Yowano asonekelele vandumbwenyi mikanda, muvikungulwilo mwengilile malunga vaze vapwile nashipilitu yaSatana. Chakutalilaho, Ndeyotelefwe anehelenga vihandwa muchikungulwilo chimwe. (Yowa. 3, 9, 10) Kavumbikilenga vakulwane vaze vatuminenga kulizavu lyakutwaminyinako. Kaha vaze vatambwilenga nachisambo vatu vaze ahungile, avahangilenga muchikungulwilo. Muchima kana wapwile waupi sulumunu! Namakumbi ano, Satana ali nakuzata nangolo mangana ahonese vatu jaKalunga kupwa vakulinunga. Shikaho katwatela kuhunga vandumbwetu nakuhona kuvakafwako.

15. Vyuma muka atela kwanukanga mutwe watanga?

¹⁵ Jila yimwe yayilemu yize mutwe watanga nahase kusolwelamo ngwenyi azanga tanga yenyi shina yakuvatondela vyakulikafwa navyo mukuyoya. (Chimo. 1, 5:8) Oloze atela kwanuka nawa ngwenyi vyuma kana kavyeshi kuhasa kunganyalisa tanga yenyi kushipilituko. (Mateu 5:3) Tutalenu chakutalilaho chize Yesu asela mitwe yajitanga. Mukanda waYowano wasolola ngwawo Yesu azakaminenga lika tanga yenyi nahalwola apwile hachitondo chakuyanjishila. Yowano emanyine naMaliya, naye yaYesu kuchihela kuze vasukikile Yesu. Numba tuhu Yesu apwile nakwivwa kukola, oloze alwezele Yowano amulamineko naye. (Yowa. 19:26, 27) Yesu apwile navasongo jenyi vaze vatelelele kutondela nevo vyakulikafwa navyo. Oloze chasoloka nge halwola kana naumwe wauchi apwile kambaji. Shikaho Yesu asakile mutu uze mwamulaminako naye nakumukafwa kushipilitu.

16. Milimo muka apwilenga nayo Yowano?

¹⁶ Yowano apwile namilimo yayivulu. Hakuwana nge apwile kaposetolo, atetekelelenga mulimo wakwambulula. Kaha nawa pamo ambachile, shikaho atelelelenga kutondela tanga vyakulikafwa navyo nakuvazakama nawa kushipilitu. (Koli. 1, 9:5) Chishina muka navalinangulako mitwe yajitanga makumbi ano?

17. Mwomwo ika chapwila chachilemu mutwe watanga kuzakama tanga yenyi kushipilitu?

 ¹⁷ Ndumbwetu walunga uze apwa mutwe watanga, nahase kupwa namilimo yayivulu. Chakutalilaho, atela kuhaka mangana kumilimo kuchina kuneha katombo halijina lyaYehova. (Efwe. 6:5, 6; Chitu. 2:9, 10) Kaha nawa nahase kupwa namilimo muchikungulwilo yakufwana nge kufunga nakutwaminyina mulimo wakwambulula. Atela nawa kulinangulanga Mbimbiliya lwola lwosena napuwenyi navana venyi. Tanga yenyi nayimusakwilila chikuma hakuvazakama kumujimba, namuvishinganyeka nakushipilitu.—Efwe. 5:28, 29; 6:4.

18. Chuma muka afwelelele Yowano?

¹⁸ Yowano ayoyele myaka yayivulu kaha amwene vyuma vyavivulu mukuyoya chenyi. Amwenenga ukalu wauvulu uze watelelele kumuzeyesa kushipilitu. Oloze alihakileho kukavangiza jishimbi jaYesu kuhakilako nalushimbi lwakuzanga vandumbwenyi. Echi chamukafwile afwelele ngwenyi Yehova naYesu vamuzangile kaha nawa ngwenyi navamuhana ngolo jakumika muvyeseko. (Yowa. 14:15-17; 15:9, 10; Yowa. 1, 4:16) Satana nakaye kenyi kavahashile kuhonesa Yowano kusolwela vandumbwenyi zangiko.

19. Kweseka naWaYowano 1, 4:7, chuma muka vatukolezeza kulinga, kaha mwomwo ika?

¹⁹ Ngana mwaYowano, nayetu tuli nakuyoyela mukaye kaze vali nakuyula kuli Satana, kalunga wakatwamino kamyaka yino, wakuhona zangi. (Yowa. 1, 3:1, 10) Satana keshi kuhasa kutuhonesa kuzanga vandumbwetuko, kuvanga kaha nge tunamwitavisa kulinga ngocho. Shikaho tutwalenuho kuzanga vandumbwetu nakusololanga zangi kana muhanjikiso namuvilinga. Echi nachitukafwa tupwenga vakusuuluka hakupwa mutanga yaYehova, nakupwa nawa vakuwahilila mukuyoya.—Tangenu WaYowano 1, 4:7.