1. Dirava ena lalokau dainai emu hemami be ede bamona?

APOSETOLO IOANE na e gwa, “Dirava na lalokau.” (1 Ioa. 4:8) Una hereva ese e hadibadamu ḡauna be ina: Dirava, mauri Badina, na lalokau Badina danu. Oibe, Iehova na ita e lalokau henidamu! Iena lalokau dainai ta dibamu ita na e gimadamu, ta moalemu bona ḡau ta ai asita dabumu.

2. Mataio 22:37-40 ai haheḡani badadia rua be dahaka, bona dahaka dainai nega haida haheḡani iharuana ibadinana na auka?

² Kristen taudia na Baibul ena haheḡani dainai lalokau bae hahedinarai na mai anina bada. (Mataio 22:37-40 ba duahi.) Iehova ta dibaia namonamomu neganai, ena haheḡani ginigunana baita badinaiamu na dia auka. Badina Iehova na ḡoevadae bona nega iboudiai ita e lalodamu bona e kara namo henidamu. To, reana haheḡani iharuana baita badinaiamu na auka. Dahaka dainai? Badina tadikakada​—ita dekeda taudia​—na dia ḡoḡoevadadae. Nega haida, reana edia hereva eiava kara ese ita be hahisidamu. Iehova na mai dibana ita na hekwakwanai unu bamodia baita davarimu dainai, Baibul e torea taudia haida e ḡaukaralaidia ita bae hadibada dahaka dainai bona edena dalai lalokau baita hahedinaraia na namo. Una toretore tauna ta na, Ioane.​—1 Ioa. 3:11, 12.

3. Ioane ese lalokau be ede e herevalaia toma?

³ Ioane na ena revareva ai e hahedinaraia, Kristen taudia ese lalokau bae hahedinaraia na ḡau badana. Ioane ese Iesu sivaraina e torea neganai, Mataio, Mareko, bona Luka padadiai Ioane mo ina hereva “lalokau” e herevalaia momo. Ioane laḡanina 100 bamona neganai, ia ese Evanelia bukana Ioane bona ma revareva toi e toredia. Unu Baibul bukadia  ese ita e hadibadamu, lalokau ese eda kara bona hereva baine biagu na ḡau badana. (1 Ioa. 4:10, 11) To, Ioane na laḡani haida lalodiai una kara e dibaia.

4. Ioane be hanaihanai ma haida ediai lalokau e hahedinaraiava, a?

⁴ Ioane na eregabena neganai, lalokau na se hahedinaraia momova. Heḡereḡere nega ta, Iesu bona ena hahediba taudia na Ierusalem baela totona, Samaria hanua ai e raka vareai. Samaria hanua ta ai taunimanima na se urava idia bae abidia dae. Ioane be dahaka e kara? Ia bona tadikakana ese Iesu e nanadaia eto, ‘O uramu lahi guba amo baia gwauraia, baine diho bona una hanua taudia iboudiai baine habuadia, a?’ (Luka 9:52-56) Nega ma ta ai, Ioane ese aposetolo taudia ma haida ediai lalokau se hahedinaraia. Ia bona tadikakana Iakobo ese sinadia e hamaoroa Iesu baine noia, Basileia lalonai idia raruosi dagi badana baine henidia bona Iesu badinai bae helai. Aposetolo ma haida na una e kamonai neganai, e badu dikadika! (Mat. 20:20, 21, 24) Ena be Ioane na kerere momo e kara, to Iesu ese e lalokau henia.​—Ioa. 21:7

5. Ina stadi ai dahaka baita herevalaimu?

⁵ Ina stadi ai, ita ese Ioane ena haheitalai bona lalokau e herevalaia dalana baita herevalaiamu. Unu amo tadikakada ilalokau henidia dalana baita dibaiamu. Bona ruma bese kwarana ese ena famili baine lalokau henidia dalana badana baita dibaiamu.

6. Iehova be edena dala ai e hahedinaraiamu ita na e lalokau henidamu?

⁶ Reana baita laloamu lalokau na hemami ta eiava hereva namodia mo baita gwaurai karana. To, namona na lalokau na eda kara amo baita hahedinaraia. (Iakobo 2:17, 26 ida ba haheḡereḡerea.) Heḡereḡere, Iehova ese ita na e lalokau henidamu. (1 Ioa. 4:19) Bona Baibul ai e tore herevadia amo e hahedinaraia ita na e lalokau henidamu. (Sal. 25:10; Roma 8:38, 39) Danu dia ena hereva ai mo, to ena kara amo ta dibamu ita na e lalokau henidamu. Ioane na e gwa: “Dirava ena lalokau na ini e hahedinarai henida toma: Dirava ese ia Natuna vara-edeana tanobada ai e siaia, ia bagunai baita mauri helaoreana.” (1 Ioa. 4:9) Iehova ese Natuna lalokauna e heni, ita daidai e hisihisi bona e mase. (Ioa. 3:16) Una dainai ta diba momokanimu Iehova ese ita na e lalokau henidamu.

7. Iesu be dahaka e kara unu amo e hamomokania ita na e lalokau henidamu?

⁷ Iesu ese ena hahediba taudia na e hamaorodia ia ese idia na lalokau henidiava. (Ioa. 13:1; 15:15) Iesu na ena hereva bona  kara amo e hamomokania ia ese ena hahediba taudia bona ita danu e lalokau henidamu. Iesu na e gwa: “Lalokau herea-daena binai, ta ese ena mauri baine atoa diho, turana daidiai.” (Ioa. 15:13) Iehova bona Iesu ese ita daidai e kara karadia baita lalomu neganai, una ese be durudamu dahaka baita kara?

8. Ioane Ginigunana 3:18 ena hereva heḡereḡerena, dahaka baita kara be namo?

⁸ Iehova bona Iesu baita kamonai henidiamu neganai, ta hahedinaraiamu idia na ta lalokau henidiamu. (Ioa. 14:15; 1 Ioa. 5:3) Bona Iesu na ita e haḡanida baita helalokau heheni na ḡau badana. (Ioa. 13:34, 35) Namona na eda hereva bona kara amo baita hahedinaraia tadikakada na ta lalokau henidiamu. (1 Ioane 3:18 ba duahia.) Edena dalai baita hamomokania ita ese idia na ta lalokau henidiamu?

9. Lalokau dainai Ioane be dahaka e kara?

⁹ Ioane bema ura neganai, tamana ida bema noho bona edia haoda bisnes-na amo moni momo bema abi. To ia na unu se kara toma. Ioane na ena mauri e ḡaukaralaia ma haida ediai, Iehova bona Iesu sivaraidia e hadibalaidia. To ena mauri lalonai hekwakwanai momo e davari, heḡereḡere taunimanima ese e daḡedaḡe heniava, bona ia e buruka neganai motumotu ta ai e hadiburaia. (Apos. 3:1; 4:1-3; 5:18; Apok. 1:9) Ena be Iesu sivaraina e harorolaiava dainai e hadiburaia, to Ioane na dounu haida e lalodia badava. Heḡereḡere, Patamo motumotu ai Ioane na matahanai ta e abia. E ita ḡaudia na e tore bona kongrigeisin iboudiai e siaia henidia unu amo idia ese “asi vanahana bae vara ḡaudia” bae diba. (Apok. 1:1) Bena, Patamo motumotu ena dibura ruma amo e ruhaia neganai, Ioane ese Iesu ena mauri bona haroro ḡaukara sivaraidia na iena Evanelia bukana ai e torea. Danu, ia ese revareva toi e toredia tadikakana baine hagoadadia helaoreana. Edena dalai oi ese Ioane ba tohotohoa diba?

10. Edena dalai ba hamomokania oi ese taunimanima na o lalokau henidiamu?

¹⁰ Emu mauri lalonai o karamu ḡaudia amo ba hahedinaraia oi ese taunimanima na o lalokau henidiamu. Satana ena tanobada na e uramu sibomu emu namo mo ba laloa, bona emu nega bona goada ba ḡaukaralaia moni momo bavabi, eiava momo ese bae imodaimu. To, tanobada heḡeḡemadai Kristen taudia na edia nega bada e henimu, taunimanima ediai sivarai namona e harorolaiamu bona e durudiamu Iehova turana ai baela. Haida be ful-taim haroro bona hahediba ḡaukaradia e karamu.

11. Pablisa momo be edena dalai Iehova bona tadikaka taihu e lalokau henidiamu?

¹¹ Abidadama Kristen taudia momo na ful-taim moni ḡaukara e karamu, unu amo sibodia bona edia ruma bese bae naridia. To idia na dala idauidau ai Dirava ena orea e duruamu. Heḡereḡere, disaster e varamu gabudiai e hedurumu, konstraksen projek haida ai e ḡaukaramu, eiava kontribiusin amo tanobada heḡeḡemadai ḡaukarana e duruamu. Unu e kara tomamu badina Iehova bona tadikakadia e lalokau henidiamu. Wiki ta ta heboudia ai ta heboumu bona haere ta henimu neganai, ta hamomokaniamu tadikakada na ta lalokau henidiamu. Ena be tauanida na e hesikumu, to dounu hebou ta laomu. Ena be ta garimu, to dounu hebou ai haere ta henimu. Bona ena be ita ta ta na mai eda hekwakwanai, to hebou do se hematamamu o hebou e oremu murinai ta hahegoada hehenimu. (Heb. 10:24, 25) Tadikakada na unu e kara  tomamu dainai edia ḡaukara namodia na ta lalo badamu!

12. Ioane ese tadikakana ediai lalokau e hahedinaraia dalana ma ta be dahaka?

¹² Ioane ese tadikakana e lalokau henidia dalana ma ta na, dia e hanamodiava mo to nega maorodia ai sisiba herevadia e gwauraiva. Heḡereḡere, Ioane na ena revareva ai ena tadikaka taihu edia abidadama bona ḡaukara namodia dainai e hanamodia, to edia kara dika dainai e sisiba henidiava danu. (1 Ioa. 1:8–2:1, 13, 14) Una heḡereḡerena, bema tadikaka bona taihu na ḡaukara namodia e karamu, namona na baita hanamodia. To, bema matamanai ta itaiamu tadikaka o taihu ta e karaiamu karana ese ena hetura karana Iehova ida na be hadikaiamu, lalokau karana na mai manauda ida baita sisiba henia. Ena be reana baita garimu turada baita sisiba henia, to namona na baita boga-auka, badina Baibul na e gwaumu auri ese auri e seḡeamu heḡereḡerena tura korikorina ese turana e duruamu.​—Her. 27:17.

13. Namona be dahaka basita kara?

¹³ Nega haida, tadikakada baita lalokau henidia dalana ma ta na ina: Bema ta na hereva kererena ta e gwauraiamu, namona na basita badu haraḡa. Mani Iesu do tanobada ai e nohova neganai, ia enai e vara ḡauna ta aita herevalaia. Iesu na ena hahediba taudia e hamaorodia mauri hanaihanai bae abia totona, ia hidiona bae ania bona rarana bae inua. (Ioa. 6:53-57) Una hereva ese hahediba taudia momo e hahekwakwanaidia dainai, momo ese Iesu e rakatania. To Iesu turana korikoridia, Ioane danu, ese Iesu e badinaia tarikatarika. Vaia Iesu ena hereva anina na asie lalopararalaia, to idia ese Iesu ena hereva na se badulaia eiava se eto una hereva na kerere. To Iesu e abidadama henia badina dibadia ia e gwaurai herevadia na momokani. (Ioa. 6:60, 66-69) Una dainai turada ese hereva kereredia e gwauraimu neganai, basita badulai haraḡa! To, namona na nega baita henidia edia hereva anidia bae gwauraia hedinarai totona.​—Her. 18:13; Koh. 7:9.

14. Dahaka dainai tadikakada basita inai henidia?

¹⁴ Danu Ioane na e gwa tadikakada basita inai henidia. Bema una sisiba basita badinaiamu, ita na Satana ena dala ta kehoamu. (1 Ioa. 2:11; 3:15) Kristen ginigunadia ediai una na e vara. Una negai, Satana na e ḡaukara goadava Dirava ena hesiai taudia padadiai heiriheiri bona parara baine  havaraia. Ioane ese ena revareva e torea neganai, Satana ena kara e tohotohova taudia haida na kongrigeisin lalonai e vareai. Heḡereḡere, Diotrefe na ena kara dainai kongrigeisin e hapararadiava. (3 Ioa. 9, 10) Ia ese gavanin bodi ena gwaukau taudia se matauraidiava. Bona bema ta na ia ese se ura henidiava taudia e abidia daeva, ia na e urava una tadikaka o taihu na kongrigeisin amo baine atoa siri. Una na kara dika rohorohona. Hari danu, Satana na dounu e hekwarahimu Dirava ena taunimanima baine hapararadia. Namona na tadikakada na basita inai henidia.

15. Ruma bese kwarana ese dahaka baine laloatao na namo?

¹⁵ Tama ese ena ruma bese baine lalokau henia dalana ta na, tauani dalanai baine ubudia. (1 Tim. 5:8) To, namona baine helalotao, ḡau badana na ena ruma bese baine durua Iehova bae hetura henia. (Mat. 5:3) Iesu na ruma bese kwaradia ediai haheitalai namona e hahedinaraia. Ioane ena Evanelia bukana ese e hahedinaraia Iesu na hisihisi auna ai e tauadae neganai, ia na dounu ena ruma bese e lalodiava. Una negai Ioane na Iesu sinana badinai gini. Ena be Iesu na e hisihisi bada herea, to Ioane e noia Maria baine naria. (Ioa. 19:26, 27) Iesu tadina veridia ese Maria na tauani dalanai e nariava, to toana na una negai idia ta na Iesu ena hahediba ai do asi ela. Una dainai Iesu na dala e kara ta ese Maria na tauani dalanai baine naria bona baine hagoadaia Iehova baine hesiai henia totona.

16. Ioane ena maduna be dahaka?

¹⁶ Ioane ena maduna na momo. Ia na aposetolo tauna ta dainai, haroro ḡaukara e gunalaiava. Danu reana ia na headava tauna, una dainai e ḡaukara goadava tauani dalanai ena ruma bese baine naridia bona baine durudia edia hetura karana Iehova idia bae hagoadaia totona. (1 Kor. 9:5) Hari ina negai, ruma bese kwaradia be Ioane ena haheitalai amo dahaka e dibamu?

17. Dahaka dainai tama ese ena ruma bese baine durudia Iehova bae hesiai henia na ḡau badana?

¹⁷ Tadikaka ta na ruma bese kwarana dainai, reana ena maduna na momo. Heḡereḡere, moni ḡaukara ai e hekwarahimu unu amo ena kara ese Iehova ladana baine hanamoa diba. (Efe. 6:5, 6; Tito 2:9, 10)  Bona reana kongrigeisin lalonai maduna haida e huamu, heḡereḡere mamoe vadivadi e karamu bona haroro ḡaukara e gunalaiamu. Dia una mo, to hanaihanai adavana bona natuna ida Baibul bae stadilaia na mai anina bada. Unu dainai ena ruma bese na be moalemu badina tauani dalanai e naridiamu, bona e durudiamu Iehova bae hesiai henia totona.​—Efe. 5:28, 29; 6:4.

18. Ioane be dahaka e diba momokani?

¹⁸ Ioane na laḡani momo lalodiai Dirava e hesiai henia bona ekspiriens momo e davari. Ia e davari hekwakwanaidia ese ena abidadama na bema hamanokaia diba. To, Ioane na hanaihanai e ḡaukara goadava Iesu ena haheḡani iboudiai, tadikakana baine lalokau henidia haheḡanina danu, baine badina totona. Ioane na e diba momokani Iehova bona Iesu ese ia na e lalokau heniava dainai, idia ese goada e henia hekwakwanai idauidau e hanai. (Ioa. 14:15-17; 15:10; 1 Ioa. 4:16) Satana bona ena tanobada ese Ioane na se koua tadikakana baine lalokau henidia.

19. Ioane Ginigunana 4:7 ese ita ia hagoadadamu dahaka baita kara, bona dahaka dainai?

¹⁹ Ioane ena nega heḡereḡerena, ita iboudai na lalokau se hahedinaraiamu tauna, Satana, ena tanobada lalonai ta nohomu. (1 Ioa. 3:1, 10) Satana na e uramu tadikakada baita inai henidia, una dainai ena dala na basita kehoa. Namona be mai kudouda idoinai ida tadikakada baita lalokau henidia, bona eda hereva bona kara amo una lalokau baita hahedinaraia. Unu baita kara tomamu neganai, mai moaleda ida Iehova ena ruma bese lalonai baita nohomu.​—1 Ioane 4:7 ba duahia.