MWAHA WOOSOMIYA 2
Citthu cimmwiitthucera “ntthari aafentiya ni Yesu”
“Nhihiye ufentana, kontha nifento ninkhumawa Nluku.”—1 JO. 4:7.
NCIPO 105 “Nluku nifento”
NINHALA WIITTHUCANI? *
1. Nniicoona cani nlattu woocuwela wiira Nluku nawuufentani?
“NLUKU nifento.” (1 Jo. 4:8) Ni ala moolumo vakaannyaala, apostolu Joau aanawiira unuupusera ikhweeli yuulupale: Nluku unonkhumakhuma ukumi, ciicammo phinonkhumakhuma nifento. Yehova naanifenta! Nlattu woocuwela wiira naanifenta, hiiva ninawiicoona ukhala ookhikiceriya ni ootteeliya.
2. Toko cinhimyaaya Matewus 22:37-40, malamuloni meeli akhanle moolupale, ni kontha isiyani pooti unirika wiiwelela nlamulo nonayeelinno?
2 Makristau khanlamuliya uthanla wakhala wiira ahaana athoonyeraka nifento awula mena. Nno nikhanle nlamulo. (Nsome Matewus 22:37-40. *) Nancuwelaka Yehova sana-saana, pooti uhinirika wiiwelela nlamulo noopacera. Kontha Yehova khapahuwile, naaniwacera otheene cihu ni naanithoonyera maana. Masi pooti unirika wiiwelela nlamulo nonayeelinno. Kontha isiyani? Kontha mayamunneehu ni asirokorihu—ale akhanle akhunanihu—akhanle atthu oopahuwa. Imaara cikhwaawe, ayo pooti unuulumela awula unipanka citthu coohinamaana. Yehova aanaacuwela wiira wanhala unirika wiiwelela nno nlamulonno. Phimaana, uyo ahaaruma atthu wantikha mbiiblyani ikano cinniitthuciha kontha isiyani nihaana naafentaka akhwiihu ni manannani ninlamuliyeehu waafenta. Ntthu mmoca Nluku anrumilyaawe wantikha nnyo ikanonnyo, aari apostolu Joau.—1 Jo. 3:11, 12.
3. Isiyani Joau yuulumilyaawe ikwaha cinci?
3 Nhina ilivuru co mbiiblyani Joau cantikhilyaawe, uyo hothoonyera wiira makristau ahaana yaafentaka akhwaaya. Nlivuruni wawe inoopela mwaha makhalelo a Yesu ukati waaryaawe watuninyani, Joau horomola moolumo “nifento” ni “ufenta” ikwaha cinci, uvikana ikwaha ciromoliyaaya nhina ivangeeliyu cikhwaawennyo. Joau aarina myaakha 100 ukati wantikhilyaawe ivangeeliyu ineehaneliya ncina nawe, ni iwarakha cawe tthaaru. Nnyo ilivuru co mbiiblyaninnyo, cinaaniitthuciha wiira citthu cotheene cimpankeehu cihaana cikurumiciyaka ninifento. (1 Jo. 4:10, 11) Masi wahovira ukati mwinci wiira Joau eetthuce uthoonyera ninfento.
4. Niireke Joau aanaathoonyera nifento ukati wotheene?
4 Ukati Joau waaryaawe mmirawo, ikwaha cikiina uyo khaathoonyera nifento. Wootakihera, ikwaha imoca, Yesu wamoca naattharyaawe yahokhuma u Yerusalemu ni yahorwaa u Samariya. Atthu yaakhala aliteeya amoca o Samariya khayaamwaakhelenle ratta Yesu naattharyaawe. Joau aapankile isiyani uyo ukatyuuyo? Uyo ahonkoha Yesu, anlepelaka wiira akuruse mooro wiirimu wiira awiivakace ale atthwaale! (Luka 9:52-56) Ukati nkhwaawe, Joau ciicammo khaathoonyenre wiira aanaafenta maapostolu akhunanawe. Pooti ukhalaka wiira Joau wamoca ni Tiyaku, muulupalyaawe, yahaaruma anumwanaya wiira yanlepele Yesu waavahacera oyeeli ukhulupale muumweneni wa Nluku. Ukati maapostolu akiinaayo waacuwenlyaaya iyo itthwiiyo, ayo yahorusiya! (Mat. 20:20, 21, 24) Masi Yesu khaahiile unfenta Joau nlattu wo citthu caavonyaawe.—Joau 21:7.
5. Isiyani inhaleehu wiitthuca nhina ula mwahoola?
5 Nhina ula mwahoola, ninaahala woona ntakihero na Joau ni ninaahala woopela mwaha citthu cantikhilyaawe aacaka nifento. Iyo inaahala uniitthuciha mananna owaafenta mayamunneehu ni asirokorihu. Ciicammo, ninaahala woona mananna ahooleli itthoko cinlamuliyaaya uthoonyera wiira anawaafenta amucyaaya.
NIFENTO NINTHOONYERIYA NI CITTHU CIMPANKEEHU
Yehova thoonyenre wiira naanifenta, unveleeliha wawe Mwanawekhwile wiira anoopole (Nwehe iparaagarafu 6-7)
6. Isiyani Yehova ipankilyaawe inthoonyera wiira naanifenta?
6 Hiiva atthunaka ninoopuwela wiira nifento unkhala unicivela akhwiihu ni uwuulumela citthu comaana. Masi nifento neekhweeli ciicammo ninthoonyeriya ni citthu cimpankeehu. (Nwehe ciicammo Tiyaku 2:17, 26.) Wootakihera, Yehova naanifenta. (1 Jo. 4:19) Uyo nothoonyera wiira naanifenta ni moolumo omaana ahenlyaawe mbiiblyani. (Isaa. 25:10; Aroo. 8:38, 39) Masi itthu innikupaliha wiira Nluku naanifenta khinakhala paahi itthu inoolumaawe, masi ciicammo cikhanle citthu cinnipankelaawe. Apostolu Joau hantikha: “Coo phithoonyiheriyeehu nifento na Nluku: Nluku honveleeliha watuninyani mwanawe ompacera, wiira ula aniphwanyihe ukumi woohimala.” (1 Jo. 4:9) Yehova honhiya Mwanawe nonfentaawe wiira ahuve ni akhwe wiira anoopole hiiva. (Joau 3:16) Phimaana, pooti wankupaliihu wiira Yehova khweeliini naanifenta.
7. Yesu thoonyenre cani wiira naanifenta?
7 Yesu ahaakhuluveliha attharyaawe wiira aanawaafenta cinene. (Joau 13:1; 15:15) Ni uyo hothoonyera wiira aanawaafenta ni naanifenta hiiva kahi paahi ni citthu coolumaawe, masi ciicammo ni citthu caapankaawe. Yesu heera: “Khaavo rina nifento nuulupale unvikana ule novaha ukumyaawe wiira awoopole apatthannyaawe.” (Joau 15:13) Noopuwelaka citthu Yehova ni Yesu cinipankenlyaaya, isiyani ninlamuliyeehu upheela upanka?
8. Toko cinthoonyeraaya 1 Joau 3:18, isiyani inlamuliyeehu upanka?
8 Hiiva ninthoonyra wiira ninanfenta Yehova ni Yesu neewelelaka malamulwaaya. (Joau 14:15; 1 Jo. 5:3) Ni Yesu honivaha nlamulo no waafenta akhunanihu. (Joau 13:34, 35) Hiiva nihaana nithoonyeraka wiira ninawaafenta mayamunneehu ni asirokorihu kahi paahi ni citthu cinoolumeehu, masi ciicammo ni citthu cimpankeehu. (Nsome 1 Joau 3:18. *) Masi isiyani khweeliini ninlamuliyeehu upanka inhala uthoonyera wiira ninawaafenta mayamunneehu?
MWAAFENTE MAYAMUNNEENYU NI ASIROKORINYU
9. Isiyani Joau yaalakenlyaawe upanka nlattu wo waafenta akhunanawe?
9 Unari wiira Joau ahopheela, uyo pooti waavaraawe nteko woomenca ihopa nkhayi naathumwaane, wiira aakavihere amucyaawe ukhalana nsurukhu. Masi uhiya upanka iyo, Joau aholakela uvaherera ukumyaawe wiira aakavihere akhunanawe wiitthuca ikhweeli ca Yehova ni Yesu. Makhalelo Joau yaathanlilyaawe yaari oorikarikaca. Uyo aholupatthiya ni wahoolo, ukati wooluvanlyaawe, uyo ahotthukiya. (Mite. 3:1; 4:1-3; 5:18; Apoka. 1:9) Hataa akhalaka nkhattya, Joau khaahiile waafenta akhunanawe. Wootakihera, ukati waaryaawe u Paatimu, uyo ahantikha ilivuru yo Apokalipise ni ahoveleeliha mmalokoni wiira mayamunna acuwele “citthu [caahala] wiirannya woohipica.” (Apoka. 1:1) Wahoolo, atthunaka apostolu Joau natthukuliye nkhattya, uyo ahantikha ivangeeliyu inooluma makhalelo a Yesu. Uyo ciicammo ahantikha iwarakha tthaaru wiira aalipihe mayamunnaawe ni asirokorawe. Joau ahovaherera ukumyaawe ni ahaamini uleva citthu cikhwaawe. Ninlamuliya untakiha cani?
10. Manannani cinhaleenyu uthoonyera wiira nnawaafenta atthu?
10 Itthu inlakeleenyu uvara muukumini winyu, pooti uthoonyera wakhala wiira nnawaafenta atthu awula mena. Atthu o ntuninyani ya Sotwani anaanikurumica uhiwuupuwela akhwiihu ni anaanikurumica wiira nikhalane nsurukhu mwinci ni mihakhu. Masi makristau enci ntuninyani motheene uhiya upanka iyo, anaalakela uleva ukatyaaya wiira alalyeere ihapari comaana ni yaakavihere atthu umpatthanana Yehova. Ni makristau akhwaawe anawiivahera ukati wotheene wiira avare nteko woolalyeera ni wo wiitthuciha.
Citthu cimpankeehu cinaathoonyera wiira ninawaafenta mayamunneehu ni amuciihu (Nwehe iparaagarafu 11, 17) *
11. Makristau enci anthoonyera cani wiira ananfenta Yehova ni anawaafenta mayamunnaaya?
11 Makristau enci ahaana yavaraka nteko khula nihuku wiira akhitiri wiicaaverya iyoolya ayova ni amucaaya. Hataa ukhalaka commo, ayo mayamunna ookhuluvelyaayo anaapanka yotheene inkhitiryaaya wiira akavihere mphwinko woothotokanihiya wa Nluku. Wootakihera, ahaavo ankavihera yakhumelelaka ihasara, akhwaawe anaakavihera nteko wootekateka wo mumphwinkoni wa Yehova ni otheene cihu pooti uvaha micanko wiira nikavihere nteko woolalyeera ntuninyani motheene. Khula isumana, hiiva ninaakhalana ukati woothoonyera wiira ninawaafenta mayamunneehu narwaaka umikutthaanoni ni nakomentariki. Hataa noocyaaka, hi ninaarwaa umikutthaanoni. Hataa nittettemelaka, hi khaninhiya ukomentari. Ni hataa nikhalanaka masakheehu, hi khaninhiya waalipiha akhwiihu cihinancera mikutthaano ni camalaka. (Mabere. 10:24, 25) Ninaasukhurweela venci citthu cotheene mayamunneehu ni asirokorihu cimpankaaya!
12. Manannani-tho makiina Joau caathoonyenryaawe wiira aanawaafenta mayamunnaawe?
12 Joau aathoonyenre wiira aanawaafenta mayamunnaawe kahi paahi aattottopelaka, masi ciicammo aavahaka ikano. Wootakihera, nhina iwarakha cantikhilyaawe, Joau haattottopela mayamunnaawe nlattu wo waamini waya ni nlattu wo citthu comaana caapankaaya. Uyo ciicammo ahaavaha ikano mayamunna woohaakhuwakhuwa. (1 Jo. 1:8–2:1, 13, 14) Inanna imoca, hiiva nihaana naattottopelaka mayamunneehu ni asirokorihu nlattu wo citthu comaana cimpankaaya. Masi namoonaka munneehu awula nrokorihu mmoca anceraka upanka itthu yoohiloka, hiiva pooti umuulumana ratta wiira ninhimyere itthu inlamuliyaawe wiiwa. Napankaka commo, ninaahala uthoonyera wiira ninanfenta. Nihaana nilipaka nrima wiira ninvahe ikano mpatthaniihu, masi Ibiiblya ineera wiira apatthani eekhweeli anaahimeryana.—Miru. 27:17.
13. Isiyani ihinlamuliyeehu upanka?
13 Ukati nkiina, citthu cihimpankeehu cinaathoonyera wiira ninawaafenta mayamunneehu. Wootakihera, hiiva khaninaakuva urusiya nlattu wo citthu cinoolumaaya. Muupuwele itthu yaakhumelenle uhalaka vakaani uphiya ukati Yesu waahalaawe wiiviya. Yesu aheera wiira attharyaawe yahaana yalyaaka irutthwaawe ni uwurya iphomyaawe wiira ayo aphwanye ukumi woohimala. (Joau 6:53-57) Atthari a Yesu yahonyoonyiya nlattu wo itthu yoolumalyaawe ni enci yahohiya untthara. Masi apatthannyaawe eekhweeli, woohinhiya uttuli Joau, khayaahiile untthara Yesu. Ayo yahonvaresesa cinene Yesu. Atthari a Yesu khayeeweehile itthu Yesu yoolumalyaawe ni yahokhala ootikhinihiya. Waahookhalaru commo, ayo khayaakuvile wuupuwela wiira Yesu oolumile itthu yoohinamaana ni khayaakhanle oorusiya. Uhiya commo, ayo yahonkhuluvela Yesu, kontha yancuwela wiira citthu cotheene coolumaawe caari ceekhweeli. (Joau 6:60, 66-69) Hiiva ciicammo khanimpheela waakuva urusiya nlattu wo citthu cinoolumaaya apatthaniihu. Yoolumaka itthu ihinicivenle, hiiva ninawaavaha ukati wiira anihimerye isiyani khweeliini yaapheelaaya uhimya.—Miru. 18:13; Ekles. 7:9.
14. Kontha isiyani khaninlamuliya hataa vakaani waathanya mayamunneehu ni asirokorihu?
14 Joau ciicammo honihimerya wiira khaninlamuliya waathanya mayamunneehu. Nanceraka waathanya mayamunneehu, ninaahala unhulela nttala Sotwani wiira ahele mmuru wihu moopuwelelwaawe. (1 Jo. 2:11; 3:15) Iyo phi itthu yiirannyeele ukati wo makristau oopacera. Sotwani ahopanka yotheene yaakhitiryaawe wiira aakawanihe apoovu a Nluku ni yancere uthanyana. Uwakati Joau wantikhilyaawe iwarakha cawe, yahokela mmalokoni alopwana yaapheela waakawaniha mayamunna toko Sotwani caapheelaawe. Nlopwana mmoca, eehaniya Diótrefes. Uyo ahaakawaniha cinene mayamunna o nloko nimoca. (3 Jo. 9, 10) Uyo khaahisimu mahumu yootola maloko, ale yaari o mphwinko wo mahumu waahoolela ule ukatyuule. Ni Diótrefes mpaka ahomananiha uwoomola wanlokoni ale yaawaakhelela atthu uyova yanrusa. Unawoonannya wiira uyo aari nlopwana ootakhala nrima! Mahukwaala, Sotwani nanlelo nawiikurumica wiira aakawanihe apoovu a Nluku. Khaninlamuliya hataa vakaani waathanya mayamunneehu ni uhiya waakavihera.
MWAAFENTE AMUCIINYU
Yesu ahonlepela Joau wiira aawacere anumwaane ni aalipihe wiira ahihiye unswalela Yehova. Mahukwaala, nhooleli itthoko ciicammo haana awaceraka amucyaawe, aavahaka citthu cinaathwa ni waakavihera uhihiya unswalela Yehova (Nwehe iparaagarafu 15-16)
15. Isiyani ahooleli itthoko ihinlamuliyaaya uliyala?
15 Inanna imoca nhooleli itthoko cinlamuliyaawe uthoonyera wiira nawaafenta amucyaawe, ukhanle uwaaverya iyoolya, ikuwo ni citthu cikhwaawe cinaathwa. (1 Tim. 5:8) Masi nhooleli itthoko khanlamuliya uliyala wiira itthu yuulupale cinene ukhanle waakavihera ukhalana upatthani womaana ni Yehova. (Mat. 5:3) Moone itthu yooreera Yesu yaapankilyaawe inlamuliyaaya utakiha ahooleli itthoko. Ivangeeliyu ya Joau, inaattonkaca wiira ukati Yesu waahalaawe vakaani ukhwa nakhomeliye wanipottoni, uyo nanlelo aanaawuupuwela amucyaawe. Ukati Yesu waakhomeliyaawe, Joau ni Mariya, anumwaane Yesu, yeemelacile nipuro nimoca. Hataa Yesu oonaka uweryaa cinene, uyo ahonlepela Joau wiira anwacere Mariya. (Joau 19:26, 27) Asunnawe ni asirokorawe Yesu yanhala umwaaverya Mariya iyoolya ni citthu cikhwaawe caahalaawe upheela; masi, unkhala toko wiira ule ukatyuule, asunnawe ni asirokorawe Yesu yaari ahinakhala attharyaawe. Phimaana, Yesu aapheela wiira akhale ntthu oohala unwacera Mariya, kahi paahi anvahaka iyoolya ni citthu cikhwaawe co mwiirutthuni, masi ciicammo oohala unlipiha wiira hihiye unswalela Yehova.
16. Mirinttini caarinaawe Joau?
16 Joau ahaana mirintti cinci. Ukhala wiira aari apostolu, uyo ahaana ahoolelaka nteko woolalyeera. Ciicammo, uyo atthunaka ahothela. Phimaana, atthunaka ahaana aahephelaka amucyaawe, woohihiya waakavihera ukhalana upatthani womaana ni Yehova. (1 Akor. 9:5) Isiyani ahooleli itthonko ineetthucaaya ni ntakihero na Joau?
17. Kontha isiyani ahooleli itthoko ahaana yaakaviheraka amucyaaya ukhalana upatthani womaana ni Yehova?
17 Nhooleli itthoko pooti ukhalana mirintti cuulupale. Wootakihera, uyo haana akhalaka nanteko owiikurumica nipuro ninvaraawenteko, wiira meettelwaawe anttitthimihe Yehova. (Efesu 6:5, 6; Titu 2:9, 10) Ni uyo pooti ukhalanaka mirintti wanlokoni, toko uwootola mayamunna wiira aalipihe ni uhoolela nteko woolalyeera. Ciicammo, uyo haana uhihiya usoma Ibiiblya wamoca naamwaarawe ni asaanaawe. Uyo haana waawacera amucyaawe, aakaviheraka ukhalana ukumi womaana, ukhala ootteeliya ni waakavihera uhihiya unswalela Yehova. Nhooleli itthoko eekurumicaka upanka iyo, atthu otheene watthokoni anaahala unsukhurweela.—Efesu 5:28, 29; 6:4.
“AKINHALA UHIYA WUUFENTANI”
18. Isiyani Joau yaakupalyaawe?
18 Joau ahokhala myaakha cinci ni cahonkhumelela citthu cinci cootteeliha nrima. Uyo yahonkhumelela marikariko menci yaahala uvololiha waamini wawe. Waahookhalaru commo, uyo aheekurumica wiiwelela malamulo a Yesu, toko waafenta mayamunnaawe ni asirokorawe. Phimaana, Joau ankupali wiira Yehova ni Yesu yaananfenta ni yanhala unvaha ikuru wiira avilele marikariko otheene yaahala unkhumelela. (Joau 14:15-17; 15:10; 1 Jo. 4:16) Sotwani ni atthu o ntuninyani inhoolelaawe khayaakhitinri unhiiha Joau waafenta mayamunnaawe ni uthoonyera nno nifentonno ni citthu caapankaawe ni coolumaawe.
19. Isiyani 1 Joau 4:7 innikurumicaaya upanka, ni nlattuni?
19 Toko Joau, hiiva ninkhala ituninya inhooleliya ni Sotwani, hinaafenta atthu hataa vakaani. (1 Jo. 3:1, 10) Ninaacuwela wiira Sotwani naapheelaka wiira ninahiile waafenta mayamunneehu ni asirokorihu. Masi uyo nohala ukhitiri iyo itthwiiyo hiiva natthunaka. Phimaana, nlakele waafenta mayamunneenyu ni asirokorinyu, ni mwiikurumice wiira citthu cinoolumeenyu ni cimpankeenyu cithoonyere wiira nnawaafenta. Mwapankaka commo, unaahala wuutteelani nrima nlattu woopanka mphantte ikhurupu yaamuci a Yehova, ni nnaahala ukhalana ukumi wootteeliya.—Nsome 1 Joau 4:7. *
NCIPO 88 Os Teus Caminhos Quero Entender
^ par. 5 Unkupaliya wiira “ntthari aafentiya ni Yesu” aari Joau. (Joau 21:7) Hataa ukhalaka wiira Joau aari mmirawo ukati wancuwenlyaawe Yesu, uyo ahaana makhalelo omaana. Wahoolo, ukati Joau wooluvanlyaawe, uyo ahovahiya ikuru ni Yehova wiira oolume venci nifento mmalivuruni cantikhilyaawe. Nhina ula mwahoola, ninaahala woona citthu cantikhilyaawe Joau ni ninaahaa woona mananna hiiva ninlamuliyeehu untakiha.
^ par. 2 Matewus 22:37 Woomwaakhula eerale co: “‘Unfente Yehova, Nlukwaa ninrimaa wotheene, niiroohwaa yotheene ni nimuupuwelelwaa otheene.’ 38 Nna nlamulo nna phinuulupale ni phiri noopacera. 39 Nonayeeli ninlikananaaya, phinna: ‘Unfente nkhunanaa toko cineefentaa.’ 40 Ala marumo meelyaala phanlipiherera Nlamulo notheene ni Maporofeeta.”
^ par. 8 1 Joau 3:18 Asaanaaka, nihaana nooniheraka nifento kahi nimoolumo hataa ni nlimi, masi ni citthu cimpankeehu ni wokhweeli.
^ par. 19 1 Joau 4:7 Mayamunna, nhihiye ufentana, kontha nifento ninkhuma wa Nluku, ni otheene ule nofenta yariye ni Nluku ni nancuwela Nluku.
^ par. 62 ILATARATO: Nhooleli itthoko nawiikurumica uvara nteko wookavihera yakhumelelaka ihasara, naavaha ncanko wiira akavihere nteko woolalyeera ntuninyani motheene ni nawaalattula akhwaawe wapuwani wawe ukati wooswali waamuci.
