1. Mwaha odhivela wa Mulugu ononamo avi?

‘MULUGU odhivela.’ (1 João 4:8) Madhu ala a murumiwi Juwawu enonubusedha ebaribari yokweya: Mulugu, Ntxela na egumi, Ntxela na odhivela. Yehova anonidhivela vanlubale! Mwaha wa odhivela waye nnakala obareleyene, ohagalala ni owakwanelene.

2. Ninga munawogela Mateus 22:37-40, malamulo menli manlubale baavi, ki mwahaya bwaddi ekala yorusa wiwelela nanabili?

² Wa makiristawu ebaribari, wooniha odhivela kahi ethu yosakula. Mbwenye nlamulo. (Omwileri Mateus 22:37-40.) Nabajhagawene omunona Yehova onakala ninga ethu yokweya wiwelela nlamulo noobajha. Mwaha oliye doologomana, ononipwatha, ni anoneddiha nuupama. Vano wiwelela nlamulo nanabili podi okala ethu yorusa. Mwaha wa di? Mwaha wi addibilihu ni arogolihu — ethanbwe onaddamela — athu othega. Malabo mamodha podi owoga ethu obe werana ethu enanuukula. Yehova ahinona wi nnerege ofwanyiwa makathamiho ala. Bumwahaya adhe aavethelege anamaleba Bibliya wihina elebe dholaga dha odhivela ni makalelo owoniha odhivela wula. Namaleba mmodha di Juwawu. — 1 João 3:11, 12.

3. Ethu baani Juwawu ahudhinheye wodhela odhivela?

 ³ Malivuru alembe Juwawu, anoothabwa owoga wihina makiristawu edhivelanege. Alebaga wodhela Yesu, Juwawu ohulabihedha ndhu na “odhivela” wapitha anamaleba amodha a malivuru Evanjelyu. Alebaga livuru na Evanjelyu vamodha ni makarta aye mararu anna yaka 100. Malivuru ala enonikavihera onona wi dhithu dhatedhene nnerihuna neregena nuudhivela. (1 João 4:10, 11) Mbwenye wahivira mudhidhi wowinjhivene wihina Juwawu akale muthu odhivela.

4. Okuma ezombwe yaye Juwawu owoniha odhivela?

⁴ gaali muzombwe, malabo mamodha Juwawu koniha odhivela. Motajhiha, labo nimodha Yesu ni anamahara aye yakuma oJerusale edhowaga oSamariya. Athu a murudda mmodha wo Samariya kiyamwakenle Yesu vamodha ni anamahara aye. Juwawu onenlemo avi? Oliye omukoha Yesu egi: ‘Gilobe mootho odhulu wihina odhe wapahevo?’ (Luc. 9:52-56) Mudhidhi mmodhaya, Juwawu kawoninhe odhivela arumiwi amodha. Onakala ninga oliye vamodha ni ddibile Tiyago, yahimuruma mamiwa wihina amulobe Yesu wi avahe owedha Mumweneni wa Mulugu. Arumiwi amodha nunona yahitakaleliwa vanlubale! (Mat. 20:20, 21, 24) Naarive agaviriganihe dila dhowinjhivadhene Yesu kahile omudhivela Juwawu. — João 21:7.

5. Nnahudhere ddi peeno?

⁵ Ohudhera wula, nnere woona yotajhiha ya Juwawu ni dhithu alembiye wodhela odhivela. Eyo enere onikavihera wawoniha odhivela addibila ni arogola. Teto nnere woona makalelo anamatela enonihiwa wi enodhivela murala wewa.

6. Ethu baani erilena Yehova enoniha wi anonidhivela?

⁶ Malabo owinjhiva, nnubuwela wi odhivela yubuwelo enonihiwa ni madhu. Mbwenye odhivela webaribari winonihiwa ni dhowera. (Omusugwe Tiago 2:17, 26.) Motajhiha, Yehova anonidhivela. (1 João 4:19) Oliye anoniha wi anonidhivela wodhela madhu apama enafwanyeya mBibliyani. (Sal. 25:10; Rom. 8:38, 39) Mbwenye enanivaha ebaribari wi Yehova anonidhivela kahi madhuve baahi, mbwenye ndhe ananereliye. Juwawu ohuleba egi: ‘Mulugu anonihe odhivela ni makalelo ala: Oliye omuruma mwanaye nammodha aye mwilaboni wihina nikalena egumi wodhela oliye.’ (1 João 4:9) Yehova ohenya wi mwanaye anamudhiveliye onihiwe  goyi ni anikwele. (João 3:16) Ela ethu enanivaha ebaribari wi Yehova anonidhivela.

7. Yesu anonihe avi wi anonidhivela?

⁷ Yesu ahiwoga ni anamahara aye wihina onowadhivela. (João 13:1; 15:15) Oliye koninhe odhivela waye mwaha wa madhu aye baahi, mbwenye mwaha wa dhowera dhaye. Yesu ohuwoga egi: ‘Kaavo anna odhivela winlubale opitha ole anakwela akwaye.’ (João 15:13) Nuubuwela ndhe anerele Yehova ni Yesu dhinanthukulela werana ddi?

8. Ninga munawogela 1 João 3:18, nerege ddi?

⁸ Nnoniha wi nnomudhivela Yehova vamodha ni Yesu mwaha wawiwelela. (João 14:15; 1 João 5:3) Yesu ohunivaha nlamulo nodhivelana mmodha ni mukwaye. (João 13:34, 35) Kanadhivelege addibila ni arogola ni ndhe nnawogihu baahi, mbwenye ni ndhe nnerihuna. (Omwileri 1 João 3:18.) Wihina noonihe wi nnowadhivela neregena ddi?

9. Odhivela wamuthukulenle Juwawu werana ddi?

⁹ Juwawu ere okala ni ababe etotaga oba wi egulihe. Mbwenye oliye wivelela wihina ahudhihe athu amodha ebaribari wodhela Yehova vamodha ni Yesu. Yothoma ya Juwawu kiyaali ethu yokweya. Mwaha wa olaleya oliye oharahariwa ofiyedha ofugeliwa mukambura. Dila yogomihera afwanyiwiye makathamiho ala waali omagomihero wa nsaka noobajha, aguluvale ni agaali mukambura. (Atos 3:1; 4:1-3; 5:18; Apo. 1:9) Juwawu owoniha odhivela naarive agaali mukambura. Motajhiha, agaali eliga yo Patmos oliye oleba livuru na Apocalipse ovahedha mulogo wihina dhinone dhithu ‘dhaapadduwe mowaguva.’ (Apo. 1:1) Podi wera agakumme mukambura, Juwawu oleba livuru naaye na Evanjelyu anawogiye wodhela mabasa ni egumi ya Yesu. Oliye oleba karta tharu wihina aalibihena addibila ni arogola. Juwawu ohilibihera vanlubale. Nnaamutajhihe avi?

10. Onoonihe avi wi onowadhivela athu?

¹⁰ Mweddelo wawo podi woniha akala onowadhivela athu obe naari. Elabo ya Saddana enafuna wi niyubuwelege yekihu, nubuwelege korowa ni ovuwa. Mbwenye, makiristawu eli wapela elabo yatene enojha mudhidhi elaleyaga muthenga dhapama ni wakavihera amodha omunona Yehova. Amodha adhaari a mudhidhi watene.

11. Makiristawu enoniha avi odhivela enniwana ni Mulugu vamodha ni addibila?

¹¹ Makiristawu owinjhiva enowilibihera wapara mabasa wihina yijhihe ni ojhiha emudhi yewa. Naari dhigarive ndo, addibila ayo enokavihera nikuru na Mulugu. Motajhiha, amodha enokavihera yapadduwa ng’ovi, omagiwa wa nyumba dha Omwene, athu atene ehikanna gari yokavihera mabasa enapariwa elabo yatene. Sumana dhatedhene, iyo podi woniha wi nnowadhivela addibila noonaga mutugumano teto nakomentarigi. Iyo nnodhowa omutugumanoni naari nigaali ogomene. Naari dhinirusaga nnokomentari. Naari nifwanyiwaga makathamiho mwigumini mwehu nnowalibiha addibilihu, mutugumano dhihinabajhe ni dhamala. (Heb. 10:24, 25) Nnotamalela vanlubale dhithu enerana addibila ni arogola!

12. Juwawu onihe avi wi owadhivela addibila?

¹² Juwawu uhoniha wi owadhivela addibila ni arogola mwaha watamalela ni wavaha dholaga. Motajhiha, mmakartani aye,  Juwawu ohatamalela addibila mwaha nroromelo newa ni dhowera dhewa dhapama. Mbwenye oliye ahavaha dholaga addibila ale. (1 João 1:8–2:1, 13, 14) Ni iyowa, nnofwanelela watamalela addibila mwaha dhithu dhapama eneriwana. Mbwenye akala ddibila ohubajha okanna dhilemelelo dhohikala pama ni dhonyakavala, nnere woniha wi nnomudhivela nanvaha dholaga dhapama ni dhofwanelela. Enohoweleya oliba murima wihina ninvahe dholaga mukwihu, mbwenye Bibliya onihina athu yandanne enophanihana obe enosumululana mmodha ni mukwaye. — Pro. 27:17.

13. Ethu baani nihinafwanelelihu werana?

¹³ Malabo mamodha nnowoniha wi nnowadhivela addibilihu mwaha wa dhithu nihinerihuna. Motajhiha, iyo kannaguvela onyanyuwa mwaha wa dhithu enawogiwa. Wubuwele ethu epadduwe ni Yesu malabo aye oogomihera. Oliye owoga wihina, anamahara aye yegi yakele egumi yohimala, enohoweleya ojha nningo naaye ni ong’wa nikame naaye. (João 6:53-57) Madhu ala yahatakalela vanlubale athu yamuhara Yesu, amodha ohiya weedda nuliye. Mbwenye akwaye ebaribari, vamodha ni Juwawuya, kiyamusukumile. Aliwa yomuroromela Yesu. Awogile Yesu kiyonelemo ni yahitikina vanlubale. Mbwenye aliwa kiyatakaleliwe ni Yesu. Yomuroromela Yesu mwaha yahinona wi dhithu dhatedhene awogiye dhaali dhebaribari. (João 6:60, 66-69) Ni iyowa kanaguvege otakaleliwa ni dhithu enawoga akwihu. Yapadduwa ethu nihonenlihumo pama, nnafuna naavahe ofuru wi ewoge epadduwe. — Pro. 18:13; Ecl. 7:9.

14. Mwahaya bwaddi sapama ohenya wi ntxiga nikale mmurimani mwehu?

¹⁴ Juwawu ohunaddela wihina kanawiddege addibilihu. Nahiwelela yolaga ela nnere omutalela Saddana mpido. (1 João 2:11; 3:15) Omagomihero wa nsaka noobajha yahipadduwa ethu emodhave. Saddana aherana dhithu dhatedhene andiliye wihina agawe ni iddanihe nlogo na Mulugu. Mudhidhi Juwawu alembiye karta nna wahikala athu yavolonwe mmulogoni yanna moonelo mmodhave ni Saddana. Mmodhaya di Diyotrefi, awiddaninhe addibila mmulogoni. (3 João 9, 10) Oliye kaariha  anamaholela newene anameeddela mulogo yarumiwa nnikuru nolamulela na mudhidhi yole. Oliye owawigaramo ale yawakela addibila yarumiwa. Aali muthu owithukula! Peeno Saddana onoweera ele anandiye wihina agawe nlogo na Mulugu. Kanenye wihina ntxiga nnimwalanihe naaddibilihu.

15. Anamatela yubuwelege ethu baani?

¹⁵ Mulobwana egi onihe wi onodhivela emudhaye fuwasapela epaddi yomwilini. (1 Tim. 5:8) Mbwenye sapama wubuwela wihina dhithu dhomwilini kadhinakavihere epaddi yewa yomuzimuni. (Mat. 5:3) Kabeni noone yotajhiha yapama Yesu aahiyedhiye anamasogolela emudhi. Murumiwi Juwawu ohuleba wihina Yesu agaali vantxikwani na goyi ahididelave wasamalela amudhi aye. Juwawu aali vamodha ni Mariya, maye Yesu, mudhidhi Yesu apiwaga. Naari oonaga widdela Yesu omuloba Juwawu wi amusamalele Mariya. (João 19:26, 27) Podi wera addibila vamodha ni arogola a Yesu yere omusamalela Mariya, mbwenye podi wera kaavo amulabela Yehova. Yesu afuna akanne ebaribari wi Mariya ere ohala asamaleliwaga epaddi yomwilini ni yomuzimuni.

16. Mutholo baani anna Juwawu?

¹⁶ Juwawu ahikanna mutholo dhinlubale. Ninga murumiwi, ohowela wasogolela mabasa olaleya. Ohiya eyo enakala ninga ahitela. Oliye osamalela epaddi yomwilini vamodha ni yomuzimuni yamudhaye. (1 Cor. 9:5) Ethu baani anamatela enahudheriwa ni Juwawu?

17. Mwahaya bwaddi sofuneya anamatela ojhiha murala wewa epaddi yomuzimuni?

¹⁷ Anamatela ehikanna mutholo dhinlubale. Motajhiha, oliye anofwanelela wilibihera wapara mabasa wihina dhowera dhaye dhinvuwihege Yehova. (Efé. 6:5, 6; Tito 2:9, 10) Podi wera oliye ohukanna mutholo mmulogoni, ninga wakukula addibila ni wasogolela mabasa oolaleya. Naari dhigari ndo enohoweleya omuhudhera Bibliya ni mwariye vamodha nanaye. Osamalela epaddi yomwilini, yakala aredda, mmubuweloni vamodha ni epaddi yomuzimuni mutholo wanamatela. Mulobwana akwanihedhaga mutholo dhaye atene vamuralani enere omutamalela. — Efé. 5:28, 29; 6:4.

18. Ebaribari baani anna Juwawu?

¹⁸ Juwawu ohujhavo egumi yaye. Ebaribari wihina ohufwanyiwa makathamiho owinjhiva yehe nroromelo naaye. Mbwenye ahilibihera wiwelela nlamulo na Yesu nowadhivela addibila vamodha ni arogola. Bumwahaya, Juwawu ororomela wi Yehova ni Yesu yomudhivela ni wihina yere onvaha kopolo wi avilelena makathamiho. (João 14:15-17; 15:10; 1 João 4:16) Kayivo ethu Saddana vamodha ni elabo yaye yeriwana yamukoddihe Juwawu wadhivela addibile alabihedhaga madhu ni dhowerana.

19. 1 João 4:7 ananikongomedha werana ddi, ni mwaha wa ddi?

¹⁹ Ninga Juwawu, nnakala elabo enasugweriwa ni Saddana ehinadhivela athu. (1 João 3:1, 10) Saddana ere ohagalala nahahiye wadhivela addibilihu vamodha ni arogolihu. Mbwenye anaande nenya. Bumwahaya, odidele wadhivela addibila ni arogola odhivela wula wonihege ni madhu vamodha ni dhowera dhawo. Ndo, onere ohagalala ni emudhi ya Yehova, teto onere ojhavo egumi yawo. — Omwileri 1 João 4:7.