1. ¿Keniuj kichiua xionmomachili inetasojtalis Dios?

TATITANIL Juan kijkuiloj seki tajtolmej tein amo ouijkej, sayoj ke tein kijtosnekij semi kipia ipatiuj: “Dios netasojtalis” (1 Juan 4:8, TNM). Nejin tajtolmej kinextiaj ke Dios, akin techmakak tonemilis, no itech ualeujtok netasojtalis. Jiova techtasojta uan inetasojtalis kichiua maj amo timouikan, maj tiyolpakikan uan maj kuali timomachilikan.

2. 1) ¿Katiyejua ome tanauatilmej tein okachi tayekantokej moajsij itech Mateo 22:37-40? 2) ¿Keyej xa tepitsin ouij techkisas tiktakamatiskej ojpatika tanauatil?

² Xikonixtajtolti Mateo 22:37-40. Itatojtokakauan Cristo amo ueli kiixpejpenaj ox tetasojtaskej oso amo, ta nejin se tanauatil. Keman okachi tikixmatij Jiova, okachi amo ouij techkisa tiktakamatiskej yekinika tanauatil, porin Jiova amo tajtakolej uan nochipa technextilia netasojtalis uan toka motekipachoua. Sayoj ke xa tepitsin ouij techkisas tiktakamatiskej ojpatika tanauatil. ¿Keyej? Porin tokniuan itech nechikol, akin no moneki tikintasojtaskej, tajtakolejkej uan kemansa uelis kichiuaskej oso kijtoskej teisa tein amo techyolpaktis oso techyolkokos. Yejua ika, Jiova kichiuak maj sekin akin kijkuilojkej Biblia techmachtianij keyej moneki timotasojtaskej uan keniuj tikchiuaskej. Semej yejua Juan (1 Juan 3:11, 12).

3. ¿Toni miakpa kijtoj Juan?

³ Itech amatajkuilolmej tein Juan kijkuiloj, miakpa kijtoj ke tiitatojtokakauan Cristo moneki titetasojtaskej.  Tein melauj, itech amatajkuilol kampa ika tajtoj inemilis Jesús, okachi miakpa ixnesi netasojtalis ke itech amatajkuilolmej tein kijkuilojkej Mateo, Marcos uan Lucas. Juan kipiaya kemej 100 xiujmej keman kijkuiloj amatajkuilol Juan uan okseki eyi amamej. Nejin amatajkuilolmej tein Jiova kichiuak maj kijkuilouani kinextiaj ke nochi tein kichiua itatojtokakauj Cristo moneki kichiuas porin tetasojta (1 Juan 4:10, 11). Nejon se taman tein Juan monekik momachtis.

4. Xikonijto kemanian Juan amo kinextij netasojtalis.

⁴ Keman Juan telpochok katka amo nochipa kinextij netasojtalis. Kemej neskayot, se tonal, Jesús uan imomachtijkauan yayaj Jerusalén uan panotiajkej itech xolalmej tein moajsiaj Samaria. Itech semej nejon xolalmej amo kuali kinselijkej. ¿Toni kichiuak Juan? Kinekia kitajtanis Dios maj kiualtitanini tit oso tekol uan maj ika kinixpolouani akin ompa nemiaj (Luc. 9:52-56). Okse tonal, amo inintech tanemilij okseki tatitanilmej. Nesi ke yejua uan iikniuj Santiago kiluijkej ininmomaj maj kitajtaniani Jesús maj kinmakani okachi kuali tekimej itech iTekiuajyo. Keman okseki tatitanilmej kimatkej, semi kualankej (Mat. 20:20, 21, 24). Maski Juan kichiuak nochi nejin, Jesús kitasojtaya (Juan 21:7).

5. ¿Toni tikitaskej itech nejin tamachtilis?

⁵ Itech nejin tamachtilis, tikitaskej ineskayo Juan uan seki taman tein kijkuiloj keman ika tajtoj netasojtalis. No timomachtiskej keniuj uelis tiknextiskej ke tikintasojtaj tokniuan. Uan tikitaskej se taman tein semi moneki tein uelis kichiuaskej takamej akin kipiaj ininchankauan uan ijkon kinextiskej ke kintasojtaj.

6. ¿Keniuj technextiliani Jiova ke techtasojta?

⁶ Ueliskia tiknemiliskej ke tikintasojtaj oksekin komo sayoj tikmachiliaj nejon netasojtalis oso komo tikiniluiaj kualtsitsin tajtolmej. Sayoj ke, komo yekmelauj tikintasojtaj moneki tiknextiskej ika tein tikchiuaj (no xikonita Santiago 2:17, 26). Kemej neskayot, Jiova techtasojta (1 Juan 4:19). Uan technextilia nejon netasojtalis ika kualtsitsin tajtolmej tein moajsij itech Biblia (Sal. 25:10; Rom. 8:38, 39). Sayoj ke amo sayoj tikmatij ke techtasojta ika tein kijtoua, ta no ika tein kichiua. Juan kijkuiloj: “Dios technextilij ya ne itetasojtalistsin ijkuin: Dios techualtitanilij ya ne iyojtsin Konetsin nikan taltikpak para ma tejuan tikpiakan ne nachipa  nemilis” (1 Juan 4:9). Jiova kikauak maj iKonetsin akin semi kitasojta tajyouiani uan maj toka momikiliani (Juan 3:16). Yejua ika tikneltokaj ke yejuatsin techtasojta.

7. ¿Keniuj kinextij Jesús ke techtasojta?

⁷ Jesús kiniluij itatojtokakauan ke kintasojtaya (Juan 13:1; 15:15). Sayoj ke kinextij ke semi kintasojtaya yejuan uan ke no semi techtasojta tejuan amo sayoj ika tein kijtoj, ta no ika tein kichiuak. Yejua kijtoj: “Ne tetasojtalis ten kachi ueyi yejua nijin: ‘Moneki ma se kitemaka inemilis para ijkon kinpaleuis oksekin itasojikniuan’” (Juan 15:13). Keman itech titanemiliaj tein Jiova uan Jesús toka kichiuanij, ¿toni moneki tikchiuaskej?

8. ¿Toni kijtoua 1 Juan 3:18 ke moneki tikchiuaskej?

⁸ Tiknextiaj ke tikintasojtaj Jiova uan Jesús keman tikintakamatij (Juan 14:15; 1 Juan 5:3). Uan Jesús technauatij nejin: “Ximoyoltasojtatiyakan se uan okse” (Juan 13:34, 35). Nejon netasojtalis moneki tikinnextiliskej tokniuan amo sayoj ika totajtoluan, ta no ika tein tikchiuaj (xikonixtajtolti 1 Juan 3:18). ¿Toni taman uelis tikchiuaskej?

9. ¿Toni kichiuak Juan porin kintasojtaya oksekin?

⁹ Juan ueliskia mokauas iuan ipopaj uan kitanis tomin itech tekit tein kipiayaj ichankauan, akin kintemouayaj pescados. Sayoj ke amo kichiuak nejon, ta itech nochi xiujmej tein nemikok, kinpaleuij oksekin maj kiixmatinij Jiova uan Jesús. Tein kiixpejpenak kichiuas kiualkuilij ouijkayomej. Kitajyouiltijkej uan itamian yekinika siglo, keman semi xiuejya katka, uejka kiuikakej (Hech. 3:1; 4:1-3; 5:18; Apoc. 1:9). Maski tsaktoya porin kiteixmatiltiaya Jesús kinextij ke ininka motekipachouaya oksekin. Kemej neskayot, keman kitsakuatoj ompa Patmos, kijkuiloj tein Dios kiitaltij uan kintitanilij tokniuan itech nechikolmej uan ijkon kimatiskiaj “keniu mochiuakiu nochi ten [...] moneki mochiuas” (Apoc. 1:1). Satepan, xa keman kikixtijkej, kijkuiloj amatajkuilol kampa ika tajtoj inemilis uan itanojnotsalis Jesús. No kinijkuilouilij tokniuan eyi amamej porin kinekia kinyolchikauas. ¿Keniuj uelis tikchiuaskej kemej Juan akin nochipa kitemoj kinpaleuis oksekin?

10. ¿Keniuj uelis tiknextiskej ke tikintasojtaj taltikpakneminij?

¹⁰ Uelis tiknextiskej ke tikintasojtaj taltikpakneminij ika tein tikixtaliaj tikchiuaskej. Itech nejin taltikpak kampa Satanás taixyekana, kitemouaj maj tiktayekanaltikan timotomintiskej oso timoteixmatiltiskej. Sayoj ke, itech nochi taltikpak moajsij tokniuan akin kitayekanaltiaj kiteixmatiltiskej tein kichiuas iTekiuajyo Dios uan kinpaleuiskej taltikpakneminij maj kuali mouikakan iuan Jiova. Sekin hasta ueli kichiuaj miak tonalmej.

11. ¿Keniuj kinextiaj miakej tokniuan ke kitasojtaj Jiova uan no kintasojtaj tokniuan?

¹¹ Miakej tokniuan moneki tekitiskej miak tonalmej uan ijkon uelis moixpanoltiskej uan kinixpanoltiskej ininchankauan. Maski ijkon, mochikauaj no tapaleuiskej itech nochi tein moixtalia itech inechikol Dios. Kemej neskayot, sekin tapaleuiaj keman mochiuaj tetsaujmej, oksekin tekitij keman mochijchiuaj kalmej uan tinochin ueli titapaleuiaj ika tomin. Ika nochi nejin tiknextiaj ke tiktasojtaj Dios uan no taltikpakneminij. Uan no, nochi semanas tikinnextiliaj tokniuan  ke tikintasojtaj keman tiouij nechikolmej maski tisioujtokej, keman titanankiliaj maski timouij uan keman tiktemouaj tikinyolchikauaskej achto ke peuas nechikol oso keman tami, maski no tikpiaj kuejmolmej (Heb. 10:24, 25). Semi tiktasojkamatij nochi tein kichiuaj tokniuan.

12. ¿Keniuj no kinextij Juan ke kintasojtaya tokniuan?

¹² Juan kinnextilij tokniuan ke kintasojtaya keman kinyolchikauak, sayoj ke no keman kinyolmajxitij. Kemej neskayot, itech amamej tein kijkuiloj kinyolchikauak porin semi takuaujtamatiaj uan kichiuayaj tein kuali, sayoj ke no kinnejmachtij maj amo tajtakolchiuanij (1 Juan 1:8-2:1, 13, 14). No ijkon, semi kuali komo tikinyolchikauaj tokniuan porin kichiuaj tein kuali. Sayoj ke komo tikitaj ke se tokniuj peua kinextia se amo kuali tanemilil oso kichiua tein amo kuali, uelis tiknextiliskej ke tiktasojtaj komo tikiluiaj ika kuali tajtolmej tein moneki kikakis. Monekis tiknextiskej yolchikaualis, sayoj ke Biblia kijtoua ke akin yekmelauj kuali mouikaj mopaleuiaj (Prov. 27:17).

13. ¿Toni moneki amo tikchiuaskej?

¹³ No uelis tikinnextiliskej tokniuan ke tikintasojtaj keman amo tikchiuaskej seki taman. Kemej neskayot, maj amo niman timoyolkokokan keman teisa techiluiskej. Maj titanemilikan itech se taman tein panok keman Jesús yetoya nikan taltikpak. Yejua kiniluij itatojtokakauan ke komo kinekiaj nemiskej nochipaya monekia kikuaskej inakayo uan tayiskej iesyo (Juan 6:53-57). Miakej amo kiuelkakkej tein kijtoj uan kikaujkej. Sayoj ke akin yekmelauj kuali iuan mouikayaj, kemej Juan, amo kikaujkej. Amo kiajsikamatiaj toni kijtosnekia uan xa amo kichiayaj maj kijtouani nejon. Sayoj ke amo moyolkokojkej nion kinemilijkej ke mopolojtoya, ta iuan takuaujtamatkej porin kimatiaj ke nochipa kijtouaya tein melauj (Juan 6:60, 66-69). Semi kipia ipatiuj maj amo niman timoyolkokokan keman tokniuan teisa kijtoskej, ta okachi kuali maj tikauakan maj techiluikan toni kijtosnekiaj (Prov. 18:13; Ecl. 7:9).

14. ¿Keyej moneki amo tikintauelitaskej tokniuan?

¹⁴ Juan no technejmachtij maj amo tikintauelitakan tokniuan. Komo amo tiktakamatij tein tanejmachtij, Satanás uelis kichiuas maj tikchiuakan tein yejua kineki  (1 Juan 2:11; 3:15). Yejua nejon kinpanok seki tokniuan itamian yekinika siglo. Satanás kitemouaya maj itekitikauan Dios motauelitanij uan moxexelouanij. Keman Juan kijkuiloj iamauan, itech nechikol moajsiaj seki takamej akin kichiuayaj kemej Satanás. Semej katka Diótrefes, akin kichiujtoya maj itech se nechikol tokniuan moxexelouanij. Amo kinpoujkaitaya oso kinmouiskaitaya tokniuan takalpanouanij akin oloch taojtokaltianij kintitaniaj. Kemej semi moueyimatia, hasta kitemoj kintokas itech nechikol akin kinekiaj kuali kinseliskej tokniuan akin kintauelitaya (3 Juan 9, 10). Axkan, Satanás kisentoka kitemoua kinxexelos itekitikauan Dios. Maj amo keman tikintauelitakan tokniuan porin nejon uelis kichiuas maj timoxexelokan.

15. ¿Toni moneki kielnamikiskej takamej akin kipiaj ininchankauan?

¹⁵ Keman se takat kinixpanoltia ichankauan, nejon se taman kemej kinextia ke kintasojta (1 Tim. 5:8). Sayoj ke nochipa moneki kielnamikis ke okachi tayekantok kinpaleuis maj kuali mouikakan iuan Jiova (Mat. 5:3). Maj tikitakan tein kichiuak Jesús. Itech amatajkuilol Juan, moijtoua ke keman Jesús pilkatoya itech kouit kisentokaya ininka motekipachouaya ichankauan. Juan uan María, imomaj Jesús, yetoyaj kampa Jesús kipilojkaj. Maski semi tajyouijtoya, Jesús kiluij Juan maj kiyekpiani imomaj (Juan 19:26, 27). María kinpiaya okseki ikoneuan akin ueliskia kiixpanoltiskej, sayoj ke nesi ke ayamo mochiuayaj itatojtokakauan Jesús. Yejua ika Jesús kitemoj akoni ueliskia kiyekpias imomaj uan kipaleuis maj kisentokani kitekitiliani Jiova.

16. ¿Toni tekimej kipiaya Juan?

¹⁶ Juan kipiaya miak tekimej. Kemej katka tatitanil, monekia nochipa kitayekanaltis tanojnotsalis. Uan no, xa kipiaya inamik. Komo ijkon, monekia kinixpanoltis ichankauan uan no monekia kinpaleuis maj kuali mouikanij iuan Jiova (1 Cor. 9:5). ¿Toni uelis kinmachtis takamej tatitanil Juan?

17. ¿Toni tekit tein semi moneki kipiaj tokniuan takamej iniuan ininchankauan, uan keniuj nejon kinpaleuia ininchankauan?

¹⁷ Tokniuan takamej akin kipiaj ininchankauan xa no kipiaj miak tekimej. Kemej neskayot, moneki chikauak tekitiskej kampa tetekitiliaj  porin nejon kichiuas maj kuali ika tajtokan Jiova (Efes. 6:5, 6; Tito 2:9, 10). Uan itech nechikol xa tayekananij oso tapaleuianij, uan yejua ika moneki kinyolchikauaskej tokniuan, kinyekpiaskej uan kinixyekanaskej itech tanojnotsalis. Sayoj ke no moneki nochipa momachtiskej Biblia iuan ininnamik uan ininkoneuan. Ininchankauan semi kitasojkamatiskej nochi tein yejuan kichiuaj porin kitemouaj maj kuali yetokan, maj yolpakikan uan porin kinpaleuiaj maj kisentokakan kitekitilikan Jiova (Efes. 5:28, 29; 6:4).

18. ¿Toni kineltokaya Juan?

¹⁸ Juan nemik miak xiujmej uan kipanok miak taman tein amo kichiaya. No kipanok tataman ouijkayomej tein ueliskia kichiuas maj amo takuaujtamatiniok iuan Jiova. Sayoj ke nochipa mochikauak kitakamatis itanauatiluan Jesús, kemej tein kijtoua ke moneki se kintasojtas tokniuan. Yejua ika, Juan kineltokaya ke Jiova uan Jesús kitasojtayaj uan ke kimakaskiaj chikaualis tein kipaleuiskia maj kixiko tein yeski ouijkayot (Juan 14:15-17; 15:10; 1 Juan 4:16). Juan nochipa kinnextilij tokniuan ke kintasojtaya ika itajtoluan uan ika tein kichiuak. Nion Satanás nion tein onkak itech taltikpak uelik kitsakuilijkej maj kinnextiliani nejon netasojtalis.

19. ¿Toni techyolchikaua maj tikchiuakan 1 Juan 4:7, uan keyej?

¹⁹ Ijkon kemej kipanok Juan, tejuan no techyoualouaj taltikpakneminij akin Satanás kinixyekana akin semi tetauelitaj (1 Juan 3:1, 10). Satanás kineki kichiuas maj amo tikintasojtakanok tokniuan, uan uelis kichiuas nejon sayoj komo tejuan tikauaj. Yejua ika, maj tikixtalikan tikintasojtaskej tokniuan uan maj tiknextikan ika totajtoluan uan ika tein tikchiuaj. Nejon kichiuas maj semi techyolpakti iniuan timoajsiskej ichankauan Jiova uan nochipa tiyolpakiskej (xikonixtajtolti 1 Juan 4:7).