1. ¿Ken timomachiliaj ijkuak tikmatij Jehová techtlasojtla?

APÓSTOL Juan okijkuilo: “Dios Ye n tlasojtlálistli”, non itlaj miak ipati (1 Juan 4:8). Tikmatij toTajtsin Dios okichi ma tiyoltokan uan non techilnamiktia ye noijki techtlasojtla. Ik non, kuali timomachiliaj uan tiyolpakij.

2. (1) Ijkon ken kijtoua Mateo 22:37-40, ¿tlen ome tlamantli technauatia Jehová ma tikchiuakan? (2) ¿Tleka uelis tikitaskej oui tikintlasojtlaskej oksekimej?

² Akinmej tikchiuaj ken Cristo nochipa moneki titetlasojtlaskej porque ijkon technauatia Jehová (xiktlajtolti Mateo 22:37-40). Ijkuak okachi tikixmatij Jehová, okachi amo oui tiktlasojtlaj, ijkon tikchiuaj porque Jehová yolkuali, nochipa techtlasojtla uan techpaleuia. Pero xamo okachi oui tikintlasojtlaskej tokniuan porque noijki tlajtlakolejkej ken tejuan uan ualeua kijtouaj noso kichiuaj itlaj tlen techyolkokoua. Jehová yokimatiaya oui tikintlasojtlaskiaj oksekimej, ik non, okinnauati sekimej tlen okijkuilojkej Biblia ma techititikan tleka moneki timotlasojtlaskej uan ken uelis tikchiuaskej. Se omotokayotiaya Juan (1 Juan 3:11, 12).

3. ¿Tlen kiteititia tlen Juan okijkuilo?

³ Amochmej tlen Juan okinmijkuilo kiteititiaj moneki  titetlasojtlaskej. Itech Evangelio de Juan ijkuilitok tlen okichi Jesús, ompa okachi miak uelta okijkuilo moneki timotlasojtlaskej. Itech Mateo, Marcos uan Lucas amo okachi okijkuilojkej. Ijkuak Juan okijkuilo amochtli uan eyi cartas tlen kipiaj itoka, yokipiaya kanaj cien xiuitl. Nonmej amochmej techititiaj nochi tlen tikchiuaj moneki tikchiuaskej porque titetlasojtlaj (1 Juan 4:10, 11). Juan noijki yolik omomachti omonekiaya tetlasojtlas.

4. Xikijto ken okiteititi Juan amo otetlasojtlaya.

⁴ Ijkuak Juan okatka telpochtli amo nochipa okiteititi otetlasojtlaya. Se tonal ijkuak Jesús iuan imachtijkauan oyayaj Jerusalén uan opanokej ik Samaria, amo okinkalotijkej itech se altepetsintli. ¿Tlen okijto Juan? Okitlajtlani Jesús: “¿Tikneki matitlanawatikah mawetsi tletl de ilwikak para makimpojpolo?” (Luc. 9:52-56). Okse tonal amo okiteititi okintlasojtlaya oksekimej apóstoles. Ye uan Santiago okiluijkej inantsin ma kilui Jesús ma kitlali se ik iyekma uan okse ik ipochma ijkuak tlanauatiskia. Okualankej ijkuak oksekimej apóstoles okimatkej (Mat. 20:20, 21, 24). Maski Juan ijkon okichi Jesús ok okitlasojtlak (Juan 21:7).

5. ¿Tlen timomachtiskej?

⁵ Itech nin tlamachtil tikitaskej tlen okipaleui Juan ma tetlasojtla uan noijki tlen okijkuilo. Tikitaskej ken tikteititiskej tikintlasojtlaj tokniuan. Noijki tikitaskej tlen moneki kichiuaskej tetajmej uan ijkon kiteititiskej kitlasojtlaj infamilia.

6. ¿Ken yotechititi Jehová techtlasojtla?

⁶ Amo san moneki ikaj tikiluiskej tiktlasojtlaj. Moneki tikititiskej (noijki xikita Santiago 2:17, 26). Jehová techititia techtlasojtla (1 Juan 4:19). Tikmatij techtlasojtla porque ika iTlajtol kualtsin techtlapouia (Sal. 25:10; Rom. 8:38, 39). Amo san techiluia techtlasojtla, ye techititia. Juan okijkuilo: “Dios otechnextili techtlasojtla, ijkuak okwaltítlanki Cristo itech nin tlaltíkpaktli non san Ye se Ikone, para matikpiakah yolílistli por Cristo” (1 Juan 4:9). Jehová okitekauili ma kitlajyouiltikan iKone uan topatka ma kimiktikan (Juan 3:16). Ik non, tikmatokej ye techtlasojtla.

7. ¿Ken okiteititi Jesús techtlasojtla?

 ⁷ Jesús okinmilui imachtijkauan okintlasojtlaya (Juan 13:1; 15:15). Amo san okinmilui, ye okinmititi okintlasojtlaya uan tejuan noijki techititia techtlasojtla. Ye okijto: “Akin motemakas makimiktikah ipatka itlakaikniwah, saikpanoa kintlasojtla” (Juan 15:13). Jehová uan Jesús yokichijkej miak tlamantli topatka, ¿axkan tejuan tlen moneki tikchiuaskej?

8. ¿Tlen moneki tikchiuaskej ijkon ken kiteititia 1 Juan 3:18?

⁸ Tla tikintlakamatij Jehová uan Jesús, kijtosneki tikintlasojtlaj (Juan 14:15; 1 Juan 5:3). Noijki Jesús otechnauati ma timotlasojtlakan (Juan 13:34, 35). Amo san ma tikinmiluikan tokniuan tikintlasojtlaj, moneki tikinmititiskej (xiktlajtolti 1 Juan 3:18). ¿Tlen moneki tikchiuaskej uan ijkon tikinmititiskej tikintlasojtlaj tokniuan?

9. ¿Ken okiteititi Juan otetlasojtlaya?

⁹ Juan uelis nochipa yetoskia iuan itajtsin, michkitskiskia iuan ifamilia uan kitlaniskia miak tomin. Pero ye okinek kinpaleuis oksekimej ma kixmatikan Jehová uan Jesús. Tlen ye okipejpenki okatka oui. Okitlajyouiltijkej uan itech itlamian siglo 1 uejka okitsakuatoj ijkuak yokipiaya miak xiuitl (Hech. 3:1; 4:1-3; 5:18; Apoc. 1:9). Maski otsaktoka porque otetlapouiaya itech Jesús, okitaya ken kinpaleuis oksekimej. Ijkuak okitsakuatoj itech isla Patmos okijkuilo tlen okinextilijkej uan okintitlanili tokniuan para ma kimatikan “tlan ayakmó wejkawas tlamochiwas” (Apoc. 1:1). Xamo ijkuak ayakmo otsaktoka okijkuilo tlen okichi Jesús uan ken otetlapoui. Noijki okijkuilo eyi cartas para kinyolchikauas tokniuan. ¿Ken uelis tikchiuaskej ken Juan?

10. ¿Ken tikteititiskej tikintlasojtlaj tokniuan?

¹⁰ Uelis tikteititiskej tikintlasojtlaj tokniuan ika tlen tikpejpenaj tikchiuaskej. Akinmej kinyekana Satanás kinekij ma tikmotemolikan miak tomin uan ma techixmatikan. Pero itech nochi tlaltikpak miakej tokniuan nochipa tetlapouiaj tlen Jehová kichiuas uan noijki kinpaleuiaj oksekimej ma kixmatikan. Sekimej mojmostla ijkon kichiuaj.

11. ¿Ken kiteititiaj miakej tokniuan kitlasojtlaj Jehová uan inmikniuan?

¹¹ Miakej tokniuan nochipa tekipanouaj para kinmakaskej tlen ika mopanoltiskej infamilias. Pero noijki mochijchikauaj kipaleuiskej ialtepe Jehová. Sekimej tlapaleuiaj kanin tlaxixini, tlapaleuiaj kanin kinchijchiuaj kalmej para monechikoskej uan tinochtin uelis tiktemakaskej tomin para ma tetlapouikan tokniuan itech nochi tlaltikpak. Ijkon kiteititiaj kitlasojtlaj toTajtsin Dios uan oksekimej. Maski tisotlauaj, nochi semanas tikteititiaj tikintlasojtlaj tokniuan porque inmiuan timonechikouaj. Maski timomojtiaj titlanankiliaj. Noijki tikteititiaj tikintlasojtlaj ijkuak timonechikouaj porque tikinyolchikauaj maski tejuan noijki tikpiaj ouijkayotl (Heb. 10:24, 25). Tikintlasojkamatiliaj nochi tlen kichiuaj.

12. ¿Ken okiteititi Juan okintlasojtlaya tokniuan?

¹² Juan okinmititi okintlasojtlaya tokniuan  ijkuak okinmilui kuali tlen okichijtokaj pero noijki okinmilui tlen omonekiaya kichiuaskej. Itech cartas tlen okinmijkuilo okinmilui kuali tlen okichiuayaj, okinmilui okipiayaj chikauak intlaneltokilis pero noijki okinnejmachti amo ma tlajtlakolchiuakan (1 Juan 1:8-2:1, 13, 14). Tejuan noijki moneki tikinmiluiskej kuali tlen kichiuaj tokniuan. Pero tla tikitaj ikaj mokuayejyekoua noso kichijtok itlaj amo kuali, ma tikiluikan tlen moneki pero ma tiktlakaitakan, ijkon tikititiskej tiktlasojtlaj. Xamo oui tikiluiskej tlen moneki pero Biblia kijtoua akinmej kuali mouikaj mopaleuiaj uan moyektlaliaj (Prov. 27:17).

13. ¿Tlen amo moneki tikchiuaskej?

¹³ Noijki uelis tikteititiskej tikintlasojtlaj tokniuan tla amo tikchiuaj seki tlamantli. Amo san niman ma tikualanikan ijkuak itlaj techiluiskej. Ma tikitakan tlen opanok ijkuak ayamo okimiktiayaj Jesús. Ye okinmilui imachtijkauan nochipa yoltoskiaj tla kikuaskiaj inakayo uan ieso (Juan 6:53-57). Miakej okualankej uan okikajtejkej pero Juan uan oksekimej amo okikajtejkej. Yejuan amo okajsikamatkej tlen okijto Jesús pero amo okualankej nion okijtojkej omotlapololtijtoka. Yejuan okineltokayaj Jesús nochipa okijtouaya tlen melauak, ik non, itech otlaneltokakej (Juan 6:60, 66-69). Non techititia amo san niman ma tikualanikan ijkuak itlaj techiluiaj tokniuan, tikmatokej yejuan amo kinekij techiluiskej tlen amo kuali (Prov. 18:13; Ecl. 7:9).

14. ¿Tleka amo ma tikinkokolikan tokniuan?

¹⁴ Juan noijki otechilui amo ma tikinkokolikan tokniuan, tla ijkon tikchiuaj, tikkauilijtoskej Satanás ma techyekana (1 Juan 2:11; 3:15). Ijkon okinpanok tokniuan itech achto siglo. Satanás okichiuaya ma mokokolikan uan amo ma mouikakan. Ijkuak Juan okintlajkuilili yokatkaj sekimej tlen omokuayejyekouayaj ken Satanás. Ijkon okichi Diótrefes, ye okichijtoka ayakmo ma mouikakan tokniuan (3 Juan 9, 10). Amo okintlakaitaya tokniuan tlen Cuerpo Gobernante okintitlaniaya ma  kintlajpalotij tokniuan. Diótrefes sapanoua omoueyinekiaya, ik non, okinekiaya kinkixtis tokniuan itech tlanechikol porque okinkalotiayaj oksekimej tlen ye amo inmiuan omouikaya. Axkan Satanás noijki kineki amo ma timouikakan iuan tokniuan uan ayakmo san sekan ma tiktekichiuilikan Jehová. Amo ma tikinkokolikan uan ijkon nochipa inmiuan timouikaskej.

15. ¿Tlen moneki kilnamiktoskej tetajmej?

¹⁵ Tetajmej kiteititiskej kintlasojtlaj infamilias tla kinmakaj tlen ika mopanoltiskej (1 Tim. 5:8). Pero moneki kilnamiktoskej miak ipati ma kinpaleuikan ma mouikakan iuan Jehová (Mat. 5:3). Ma tikitakan tlen okichi Jesús. Evangelio de Juan kijtoua ijkuak Jesús yokatka itech kuauitl ok omokuayejyekojtoka itech ifamilia. Juan uan inantsin Jesús noijki ompa okatkaj. Maski Jesús otlajyouijtoka okilui Juan ma kimalui inantsin (Juan 19:26, 27). María okinpiaya oksekimej ikoneuan tlen uelis kimakaskiaj tlen ika mopanoltiskia pero ijkuakon nion se ikni ayamo okatka imachtijka Jesús. Ik non, Jesús okitak akin uelis kipaleuiskia ma kipia tlen ika mopanoltiskia uan kipaleuiskia ma mouika iuan Jehová.

16. ¿Tlen tekitl okipiaya Juan?

¹⁶ Juan okipiaya miak tekitl. Okatka apóstol, ik non, omonekiaya nochipa tetlapouis. Xamo yokipiaya isiua, ik non, omonekiaya kimakas ifamilia tlen ika mopanoltiskia uan omonekiaya kipaleuis ma mouika iuan Jehová (1 Cor. 9:5). ¿Tlen kinmachtia tetajmej tlen okichi Juan?

17. ¿Tleka tetajmej moneki kinpaleuiskej infamilia ma mouikakan iuan Jehová?

¹⁷ Tetajmej noijki uelis kipiaskej miak tekitl. Nochipa moneki tekipanoskej ijkon oksekimej kuali tlajtoskej itech Jehová (Efes. 6:5, 6; Tito 2:9, 10). Xamo itech tlanechikol noijki tlapaleuiaj miak. Kinmaluiaj tokniuan uan nochipa moneki tetlapouiskej. Noijki nochipa moneki momachtiskej Biblia iuan infamilia. Yejuan kintlasojkamatiliskej  porque kinmakaj tlen ika mopanoltiskej, kinpaleuiaj kuali ma momachilikan uan kuali ma mouikakan iuan Jehová (Efes. 5:28, 29; 6:4).

18. ¿Tlen okimatiaya Juan?

¹⁸ Juan oyoltoka miak xiuitl uan okipanok miak tlamantli oui, non uelis kichiuaskia ayakmo ma tlaneltoka itech Jehová. Pero nochipa omochijchika kichiuas tlen Jesús otlanauati, omonekiaya kintlasojtlas tokniuan. Juan okimatiaya Jehová uan Jesús okitlasojtlayaj uan kipaleuiskiaj ma kixiko san tlen kixnamikiskia (Juan 14:15-17; 15:10; 1 Juan 4:16). Nion Satanás nion akinmej okinyekanaya amo okitsakuilijkej Juan ma kijto uan ma kiteititi okintlasojtlaya tokniuan.

19. ¿Tlen techiluia 1 Juan 4:7 ma tikchiuakan uan tleka?

¹⁹ Satanás ok tlanauatijtok uan sapanoua techkokolia (1 Juan 3:1, 10). Ye kineki ayakmo ma tikintlasojtlakan tokniuan. Amo ma tikchiuakan tlen ye kineki. Ik non, nochipa ma tikintlasojtlakan tokniuan, ma tikinmiluikan uan ma tikinmititikan. Ijkon tipouiskej itech ifamilia Jehová uan tiyolpakiskej (xiktlajtolti 1 Juan 4:7).