1. Rudo hwa Mwari hunotiita kuti tijizwe kudini?

MUPOSTORI Johani wakananga kudari: “Mwari, rudo.” (1 Johani 4:8) Tinoziva kuti Mwari ndiyena wakasika upenyu. Asi magama mashoma aya anotibesera kuzwisisa kuti rudo hunovha kwaari. Jehovha anotida! Rudo hwake hunotiita kuti tijizwe takangwaririka, takadakara pomwe no kukwana.

2. Mukuzwirana no bhuku ra Mateu 22:37-40, ngojapi mupango muviri mukuru zve ngenyi zvingava zvecinesa kuzwira mupango wocipiri?

² Makristu aakheti dangani anoda kukhombija rudo kana kuti haiwa, kukhombija rudo utori mupango. (Verenganyi Mateu 22:37-40.) Patinoguma pa kunasa kuziva Jehovha, tinozvivona zvicikanesi kuzwira mupango wo kutanga. Kusiyapo zvese izvi Jehovha wakakwana. Iyena anotitaja munjira yaushoni. Asi kangaije tingavona zvecinesa kuzwira mupango wo cipiri. Ngenyi? Ngokuti hama no hambzaji jedu jinogara na itusu ajizivi kukwana. Pa mukuvo umweni ivona vangatonanga kana kuita zviro ngo njira iciripi yo rudo. Jehovha anozviziva kuti itusu tingasongana no zvineso zvakadari. Ngokudaro, iyena wakafemera vatari vamweni vo Bhaibheri kuti vatarevo mbhangiro inovonesa kuti ngenyi tinodikana kukhombijira rudo kuno vamweni zve tingazviitisa kudini. Umwe wo vatari vondhovo ndi Johani.—1 Johani 3:11, 12.

3. Johani wakagogomejera cinyi pa mabhuku aakatara?

³ Pa matahwa ake Johani wakagogomejera kuti Makristu aidikana kukhombijira rudo. Pa bhuku ro Bhaibheri rakatahwa ndi Johani rinobhuya ngo pamusoro po upenyu wa Jesu, magama o kuti “rudo,” no kuti “wakatida,” iyena wakamashandisa kazinji kupinda mashandisihwe aakaithwa mu bhuku ra Mateu,  Marko na Ruka. Johani wainga waanozana ro makore paakatara bhuku rake no karata ndhatu. Pa matahwa aya akafemehwa, anokhombija kuti rudo hunopsasa zvese zvinoithwa ngo Mukristu. (1 Johani 4:10, 11) Pikija zvakadaro, pakatora mukuvo wakareba maningi kuti Johani ave no cijijo ici.

4. Kureva kuti Johani mukuvo wese waikhombija rudo kuno vamweni here?

⁴ Johani paainga mujaha, aacaikhombijepi rudo mukuvo wese. Inga muezaniso, pa vhaza imweni, Jesu no vajiji vake vakaita hwendo kuvha ku Jerusarema mbhera Samariya. Vandhu vamweni vo kudhorobha ro Samariya vakaramba kuvaashira. Johani wakazoitenyi? Iyena no hama yake Jakobo vakakumbira kuti Jesu aviise muriro waidikana kupeja vese vainga mudhorobhemo! (Luka 9:52-56) Pa mukuvo umweni Johani aazivi kukhombija rudo kuno vapostori vamweni. Zvinovoneka inga kuti iyena na Jakobo vakakumbira mai wavo kuti vaende koovhunja Jesu kuti vawane zvigaro zvinosisira mu Umambo. Vapostori vamweni pavakazviziva, vakanyangajwa! (Mateu 20:20, 21, 24) Pikija hazvo kuti Johani wakaposa kakawanda, Jesu waindomuda.—Johani 21:7.

5. Tinozojijenyi pa musoro uno?

⁵ Pa musoro uno tinozovona muezaniso wa Johani, no zvimweni zvaakatara ngo pamusoro po rudo. Tinozojija kuti tingakhombijisa kudini rudo kuno hama no hambzaji jedu. Tinozojijazve njira imweni inosisira maningi inodikana kuithwa ngo musoro wo mbhuri kuti avonese kuti anoda mbhuri yake.

6. Jehovha wakakhombijisa kudini rudo hwake kwatiri?

⁶ Itusu tingarangarira kudari, kuti tide vandhu tinodikana basi kuva no mazwiro akanaka ngo pamusoro pavo kana kuvavhunja zviro zvakanaka. Asi kudari itusu tecivadadi kamare, tinodikana kuzvikhombija ngo zviito. (Ezanisanyi na Jakobo 2:17, 26.) Inga muezaniso, Jehovha anotida. (1 Johani 4:19) Iyena anovonesa rudo hwake kwatiri ngo magama atinowana mu Bhaibheri. (Nduyo 25:10; VaRoma 8:38, 39) Tino cokwadi co kuti Mwari anotida. Kusiyapo kutida ngo magama ake basi, iyena anokhombija kuti anotida ngo zviito zvake. Johani wakatara kudari: “Rudo hwa Mwari hwakavoneswa kudaro kotiri: Mwari wakatumira nyika yo pasi Mwana wake umwe ega, kuti tirarame ndiyena.” (1 Johani 4:9) Jehovha wakatendera kuti Mwana wake anodiwa, atambujike no kutifira. (Johani 3:16) Izvi zvinotiita kuti tive no cokwadi co kuti Jehovha anotida.

7. Ngozvapi zvakaita Jesu kuti akhombije kuti anotida?

 ⁷ Jesu wakavhunja vateveri vake kuti iyena waivada maningi. (Johani 13:1; 15:15) Iyena wakakhombija kuti iyena waida maningi vajiji vake kubatanijavo na itusu ngo zviro zvaakananga no kuita. Iyena wakati: “Akuna ano rudo hukuru kupinda wiya anopa uhomi hwake ngo ndava yo xamwari.” (Johani 15:13) Tinopsasiswa kudini patinorangarira ngo pamusoro po zvatakaitihwa ndi Jehovha na Jesu?

8. Inga zvinonangwa pana 1 Johani 3:18, ngozvapi zvatinodikana kuita?

⁸ Itusu tinovonesa kuti tinoda Jehovha na Jesu patinovazwira. (Johani 14:15; 1 Johani 5:3) Jesu wakativhunja kuti tinodikana kudisana ngocedu. (Johani 13:34, 35) Atidikani kukhombija rudo kuno hama no hambzaji jedu ngo magama basi. Asi tinodikana kukhombijavo kuti tinovada ngo zviro zvatinonga teciita. (Verenganyi 1 Johani 3:18.) Ngozvapi zviro zvimweni zvatingaita kuti tikhombije kuti tinovada?

9. Rudo hwakaita kuti Johani aitenyi?

⁹ Johani waizotogara na baba wake, ecitowana mare ngo nyagoso yo hove kuti asapote mbhuri yake. Kusiyapo zvondhozvo, iyena wakashandisa upenyu hwake hwese kuti abesere vamweni kuziva cokwadi ngo pamusoro pa Jehovha na Jesu. Upenyu hwainga hwakasana Johani aucaingepi hwakareruka. Iyena wakateverehwa maningi phedo no kupejisa basa rake mu zana ro kutanga ro makore, paainga waamusharuka naari ku ushoko. (Maitiro o Vapostori 3:1; 4:1-3; 5:18; Apokalipsi 1:9) Paainga ari mu kadheya ngo ndava yo kucumaera ngo pamusoro pa Jesu, Johani wakavonesa kuti iyena wairangariravo vamweni. Inga muezaniso, paainga pa cirundu co ku Patimosi, iyena wakatara civoniso caakavoneswa, wotumira ku ungano, kuti ijona jizive “bziro bzinozokasika kuitika.” (Apokalipsi 1:1) Sure kwazvo paakabudiswa ku cirundu co Patimosi, Johani wakatara vhangeri rake rinobhuya ngo pamusoro po upenyu hwa Jesu no mushando wake. Iyena wakatarazve karata ndhatu jaizovangisa hama no hambzaji jake. Mungatevejeresa kudini kujiramba kwakaitari Johani?

10. Mungakhombijisa kudini kuti imwimwi munoda vandhu?

¹⁰ Imwimwi mungakhombija kuti munoda vandhu ngo zvamunokheta kuita mu upenyu hwenyu. Nyika ya Sathana inoda kuti imwimwi mupeje nguva yenyu no simba mecipsaka zviro zvenyu basi. Kusiyapo zvondhozvo, Makristu anopeja mukuvo wavo vecicumaera masoko akanaka o Umambo no kubesera vandhu kuti vave no ushamwari na Jehovha. Vamweni vanoita basa iri nguva jese.

11. Makristu amweni anokhombijisa kudini kuti anoda Jehovha no hama no hambzaji?

¹¹ Makristu amweni anodikana kupeja mukuvo muzinji vecishanda kuti vajisapote no kusapota mbhuri yavo. Pikija zvakadaro, ivona vanoita zvavanokwanisa kuti vabesere sangano ra Jehovha. Inga muezaniso, vamweni vangakwanisa kubesera panoitika ngozi jinoitika jega, vamweni vangatoenda koshanda mu basa ro kuvaka zve vese vanomukana wo kuita mupiro kuitira basa ro nyika yese. Ivona vanoita izvo ngo kuti vanoda Mwari no Makristu amweni. Pa sumana jese tinokhombija kuti tinoda hama no hambzaji jedu ngo kwenda ku musongano no kupa mupinguro. Pikija patinonga takaremba itusu tinowanika pa musongano jese. Pikija patinonga takasuruvara itusu tinopa mupinguro. Pikija tese tecisongana no zvineso tinovangisa hama no hambzaji ticito tatanga musongano no patinopera  kuita musongano. (Vaheberi 10:24, 25) Tinobonga maningi basa rinoithwa ngo hama no hambzaji jedu!

12. Ngoyapi njira imweni yakashandiswa ndi Johani kuti akhombije kuti waida hama no hambzaji jake?

¹² Johani wakakhombija kuti anoda hama no hambzaji ngo kuvapa mbhangiro. Inga muezaniso, pa matahwa ake wakasimba hama no hambzaji ngo rutendo hwavo no mabasa akanaka avaiita. Asi iyena wakavapa mbhangiro ngo pamusoro po cishaishi. (1 Johani 1:8–2:1, 13, 14) Mukuezanavo, tinodikana kusimba hama no hambzaji jedu ngo zviro zvakanaka zvavanoita. Asi kudari ari wese eciva no mugariro wakashata tingakhombija kuti tinomuda ngo kumuvhunja zvaanodikana kuita. Zvinoda cicunge kuti tipangire shamwari. Asi Bhaibheri rinonanga kuti shamwari jokadi jinoroja kana kuti jinorungamisana ngocajo.—Mazwi Akangwara 27:17.

13. Ngozvapi zvaticikadikani kuita?

¹³ Nguva jimweni tinokhombija kuti tinoda hama no hambzaji jedu, ngo zviro zvaticikaiti. Inga muezaniso, itusu atinyangajwi ngo kukasika ngo pamusoro po zviro zvavanonanga. Vonanyi zvakaitika pa mazuva o kupejisira o upenyu hwa Jesu pasi pano. Iyena wakavhunja vajiji vake kuti kudari vecida upenyu, vaidikana kuha muviri wake no kumwa ngazi yake. (Johani 6:53-57) Zvakanangari Jesu zvakapsasa maningi vajiji vamweni, votomusiya. Asi vajiji vokadi, kubatanijavo na Johani, vakasara. Ivona avacaizwisisepi zvakanangari Jesu, vakatoshamaiswa ndizvona. Asi shamwari jakagondeka ja Jesu ajizivi kurangarira kuti zvaaingaro ananga zvainga zvakashata zvokuti vaidikana kutoguma pa kunyangajwa ndizvona. Kusiyapo izvo, ivona vakamuthemba veciziva kuti zvaanangaro ndizvona. (Johani 6:60, 66-69) Zvinosisira maningi kutama kukasika kunyangajwa ngo pamusoro po zviro zvinonangwa ngo shamwari jedu. Asi tinovasiya mbhera vagume pa kudurujira zvavaida kunanga.—Mazwi Akangwara 18:13; Mucumaeri 7:9.

14. Ngenyi atidikani kunyenya hama no hambzaji jedu?

¹⁴ Johani wakativangisa kuti titame kunyenya hama no hambzaji jedu. Kudari tikatama kuzwira mbhangiro iyi, Sathana anozoticengeja. (1 Johani 2:11; 3:15) Izvi zvakaitikira vamweni mu kupera ko zana ro kutanga Kristu Aviya. Sathana waiita zvese zvaaikwanisa kuti vandhu va Mwari vanyenyane no kuparajana. Johani paakatara karata  jake, vandhu vamweni vaikhombija mujimu uwu. Mu ungano mainga maanovandhu vaikhombijavo mugariro uwu wa Sathana. Inga muezaniso Dhiyotrefe waiparajanisa ungano. (3 Johani 1: 9, 10) Iyena aacaireremejepi vakuru vaivavhakacira vainga vatumwa ngo mukhumbi unotonga. Iyena waieja kuvhisa mu ungano vandhu vese vaida kuashira vandhu vainyenywa ndiyena. Izvi zvainga zvakashata maningi! Sathana ari kueja kupaura vandhu va Mwari kuti vatame kubesana nyamasi uno. Itusu atidikani kunyenya hama jedu no kutama kuvabesera.

15. Musoro jo mbhuri jinodikana kuceujenyi?

¹⁵ Njira imwe inosisira maningi inovonesa kuti musoro wo mbhuri anoda mbhuri yake, ngo yo kuvapa zvavanoda kuti vakwanise kupona. (1 Timoti 5:8) Iyena anodikana kuceuja kuti, zvinosisira maningi ngo zvokuti mbhuri yake ive no ushamwari na Jehovha. (Mateu 5:3, Shanduro yeNyika Itsva) Vonanyi muezaniso wakagajwa ndi Jesu kuno musoro jo mbhuri. Mukuzwirana no vhangeri ra Johani, Jesu paaida kufa pa danda ro kutambujikira, iyena wainga ecindorangarira ngo pamusoro po mbhuri yake. Johani wainga akaima na Mariya mai wa Jesu pa ndau yaida kuuraihwa Jesu. Pikija ari pa dambujiko guru, Jesu wakawana mukuvo wo kukumbira Johani kuti asapote Mariya. (Johani 19:26, 27) Jesu wainga ano hama no hambzaji jaikwanisa kutaja Mariya ngo zvaaida zvo kunyama. Asi apana na umwe wavo wainga waamujiji wake pa mukuvo wondhowo. Jesu waida kuva no cokwadi co kuti paizova no mundhu waizosapota Mariya pomwe no kumuvangisa kuti aenderere mberi ecishandira Jehovha.

16. Ngojapi mutoro jainga na Johani?

¹⁶ Johani wainga ano mutoro jakawanda. Inga umwe wo vapostori iyena waidikana kuvangisira maningi pa basa ro kucumaera. Kangaije iyena wainga akacadha. Ngo kudaro, waizodikana kutaja zvinodiwa zvo kunyama zvo mbhuri yake no kubesera mbhuri yake kuti ive no ushamwari hwakanaka na Mwari. (1 VaKorinto 9:5) Musoro yo mbhuri inojijenyi nyamasi uno?

17. Ngenyi zvinosisira kuti musoro wo mbhuri ataje zvinodiwa zvo kumujimu zvo mbhuri yake?

¹⁷ Hama ino mbhuri kangaije ingava no mutoro muzinji inosisira. Inga muezaniso, iyena angashanda ngo simba ku basa rake kuti akuje  Jehovha. (VaEfeso 6:5, 6; Tito 2:9, 10) Kangaije angavazve no mutoro mu ungano, jakadari inga kuvangisa hama no hambzaji no kutungamirira pa basa ro kucumaera. Pa mukuvo wondhowo, zvinosisirazve maningi kuita jijo yo Bhaibheri no mukaji wake no vana mukuvo wese. Ivona vanozobonga maningi ngo zvese zvavanoitihwa kuti vave no uhomi hwaushoni zve vave vakadakara. Ngo kuti kuvabesera kwaanovaita kunoita kuti vaenderere mberi vecishandira Jehovha.—VaEfeso 5:28, 29; 6:4.

18. Johani wainga no cokwadi capi?

¹⁸ Johani wakararama makore akawanda zve wakava no upenyu unodakajisa. Iyena wakasongana no mukhaindi wese wo zvineso zvaizorembesa rutendo hwake. Asi iyena mukuvo wese waiita zvaaikwanisa kuti ateveje mupango wa Jesu, unobatanija kuda hama no hambzaji. Inga muviyo, Johani wakava no cokwadi co kuti Jehovha na Jesu vaimuda maningi, zvokuti ivona vaizomupa simba ro kuti anyise cineso ciri cese. (Johani 14:15-17; 15:10; 1 Johani 4:16) Sathana no nyika yake, avacaizokwanisepi kukamisa Johani pa kuda hama no hambzaji jake no kukhombija rudo hwondhohwo ngo magama no zviito.

19. 1 Johani 4:7 inotivangisa kuti tiitenyi?

¹⁹ Inga ndi Johani, itusu tiri kupona munyika iri kutongwa ndi Sathana, uwo acina rudo. (1 Johani 3:1, 10) Zvecivoneka kuti iyena anoda kuti titame kuda hama no hambzaji jedu, iyena aazokwanisi kutikamisa kukhombija rudo hwondhohwo kudari itusu tikatama kumutendera. Tingatema civaringo co kuda hama no hambzaji jedu no kukhombija rudo hwondhohwo ngo zviro zvatinonanga no zvatinoita. Perapo tinozodakara ngo kuva divi ro mbhuri ya Jehovha.—Verenganyi 1 Johani 4:7.