1. Go tseba gore Modimo o a re rata go dira gore re ikwe bjang?

MOAPOSTOLA JOHANE o ngwadile gore: “Modimo ke lerato.” (1 Joh. 4:8) Re a tseba gore Modimo ke yena a re filego bophelo, eupša mantšu ao a rego “Modimo ke lerato” a re gopotša gore lerato le tšwa go Modimo. Jehofa o a re rata! Tsela yeo a re ratago ka yona e dira gore re ikwe re šireletšegile, re thabile e bile re kgotsofetše.

2. Mateo 22:37-40 e re botša ka ditaelo dife tše pedi tše dikgolo, gona ke ka baka la’ng go ka ba thata go latela taelo ya bobedi?

² Bakriste ga se ba swanela go kgetha ge e ba ba ka bontšha lerato goba ba ka se le bontšhe. Go bontšhana lerato ke taelo yeo ba e neilwego yeo ba swanetšego go e latela. (Bala Mateo 22:37-40.) Ge re tseba Jehofa gabotse, go ka ba bonolo go latela taelo ya pele yeo e lego ditemaneng tše ka gobane Jehofa o phethagetše, o na le taba le rena e bile o botho. Eupša re ka hwetša go se bonolo gore re latele taelo ya bobedi. Ka baka la’ng? Ka gobane bana babo rena le dikgaetšedi, bao Beibele e rego ke ba bangwe ba baagišani ba rena, ba dira diphošo. Ka dinako tše dingwe ba ka bolela goba ba re dira dilo tšeo di re kwešago bohloko. Jehofa o be a tseba gore go ka se be bonolo gore re latele taelo yeo ya bobedi. Ka baka leo, o ile a diriša bangwadi ba Beibele go re ruta gore ke ka baka la eng re swanetše go ratana le gore re ka dira seo bjang. Yo mongwe wa batho bao a ilego a ba diriša e be e le Johane.—1 Joh. 3:11, 12.

3. Johane o ile a gatelela taba efe?

³ Mangwalong ao Johane a a ngwadilego, o gateletše taba ya gore Bakriste ba swanetše go bontšha lerato. Ka Ebangeding  yeo Johane a e ngwadilego, o dirišitše mantšu “lerato” le “go rata” gantši kudu go feta kamoo a dirišitšwego Ebangeding ya Mateo, ya Mareka le ya Luka di kopane. Johane o be a na le mengwaga e ka bago e lekgolo ge a be a ngwala Ebangedi ya Johane le mangwalo a gagwe a mangwe a mararo. Dipuku tšeo di re ruta gore lerato ke lona le swanetšego go re tutueletša go dira dilo ka moka. (1 Joh. 4:10, 11) Eupša Johane o tšere nako e telele gore a ithute seo.

4. Na Johane o be a dula a bontšha ba bangwe lerato?

⁴ Ge Johane e be e sa le lesogana, ga se ka mehla moo a bego a dula a bontšha ba bangwe lerato. Ka mohlala, nakong e nngwe ge Jesu le barutiwa ba gagwe ba be ba eya Jerusalema, ba ile ba diriša tsela yeo e fetago Samaria. Batho ba motseng o mongwe wa Samaria ba ile ba gana go ba amogela. Johane o ile a dira’ng? Yena le ngwanabo Jakobo, ba ile ba kgopela Jesu gore a ba dumelele go laela mollo o tšwago legodimong gore o fediše batho ka moka ba motseng woo! (Luka 9:52-56) Le nakong e nngwe Johane o ile a se bontšhe baapostola ba bangwe lerato. Yena le Jakobo ba ile ba botša mmago bona gore a kgopele Jesu gore a ba fe maemo Mmušong wa gagwe. Ge baapostola ba bangwe ba ekwa seo Jakobo le Johane ba se dirilego, ba ile ba galefa kudu. (Mat. 20:20, 21, 24) Le ge Johane a ile a dira diphošo tšeo ka moka, Jesu o be a mo rata.—Joh. 21:7.

5. Re tlo ithuta’ng sehlogong se?

⁵ Sehlogong se, re tlo ithuta ka mohlala wa Johane le ka dilo tše dingwe tšeo a di ngwadilego ge a be a bolela ka lerato. Mohlala wa gagwe gotee le dilo tšeo a di ngwadilego di tlo re thuša go bona gore re ka bontšha bjang bana babo rena le dikgaetšedi lerato. Re tlo ithuta le ka tsela e bohlokwa yeo hlogo ya lapa e ka bontšhago gore e rata lapa la yona.

6. Jehofa o bontšha bjang gore o a re rata?

⁶ Re ka nagana gore re ka bontšha bangwe gore re a ba rata feela ka go no ba botša dilo tše dibotse. Eupša re swanetše go ba bontšha le ka ditiro gore re a ba rata. (Bapiša le Jakobo 2:17, 26.) Ka mohlala, Jehofa o a re rata. (1 Joh. 4:19) O diriša Beibele go re botša gore o a re rata. (Ps. 25:10; Baroma 8:38, 39) Re a tseba gore Jehofa ga a no re botša gore o a re rata, eupša re bona le ka dilo tšeo a re direlago tšona gore o a re rata. Johane o ngwadile gore: “Re utolletšwe lerato la Modimo ka se, gobane Modimo o rometše Morwa wa gagwe yo a tswetšwego a nnoši lefaseng gore re hwetše bophelo ka yena.” (1 Joh. 4:9) Jehofa o dumeletše Morwa wa gagwe gore a tlaišwe le go re hwela. (Joh. 3:16) Se se dira gore re se ke ra belaela gore Jehofa o a re rata.

7. Jesu o dirile eng go bontšha gore o a re rata?

 ⁷ Jesu o ile a botša barutiwa ba gagwe gore o a ba rata. (Joh. 13:1; 15:15) O ile a bontšha ka seo a ilego a se dira gore o a ba rata le gore le rena o a re rata. Jesu o itše: “Ga go yo a nago le lerato le le fetago le, gore motho a gafe moya wa gagwe ka baka la bagwera ba gagwe.” (Joh. 15:13) Ge re nagana ka dilo tšeo Jehofa le Jesu ba re diretšego tšona, re swanetše go dira’ng?

8. Johane wa Pele 3:18 e re re swanetše go dira’ng?

⁸ Re bontšha gore re rata Jehofa le Jesu ka go ba kwa. (Joh. 14:15; 1 Joh. 5:3) Jesu o re laetše gore re ratane. (Joh. 13:34, 35) Ga se ra swanela go no botša bana babo rena le dikgaetšedi gore re a ba rata, eupša re swanetše go bontšha le ka dilo tšeo re di dirago gore re a ba rata. (Bala 1 Johane 3:18.) Ke dilo dife tšeo re ka di dirago go bontšha gore re a ba rata?

9. Johane o ile a dira’ng ka ge a be a na le lerato?

⁹ Johane a ka ba a ile a kgetha go dula le tatagwe gomme a dira tšhelete ka go šoma kgwebong ya ka gabo ya go rea dihlapi. Eupša o ile a kgetha go diriša bophelo bja gagwe ka moka go thuša batho go ithuta ka Jehofa le Jesu. Bophelo bjo Johane a bo kgethilego bo be bo se bonolo. O ile a tlaišwa gomme mo e ka bago ka 96 C.E. ge e be e šetše e le mokgalabje, o ile a golegwa. (Dit. 3:1; 4:1-3; 5:18; Kut. 1:9) Le ge a be a le kgolegong, Johane o ile a bontšha gore o be a rata ba bangwe. Ka mohlala, ge a be a le sehlakahlakeng sa Patimo o ile a ngwala puku ya Kutollo ke moka a e romela diphuthego gore di kgone go tseba dilo tšeo “di tlago go direga kgauswinyane.” (Kut. 1:1) Go ka dirago gore ka morago ga gore Johane a lokollwe kgolegong kua Patimo, o ile a ngwala puku ya Ebangedi yeo e bolelago ka bophelo bja Jesu le modiro wo a bego a o dira ge a be a le mo lefaseng. O ile a ngwala le mangwalo a mararo go kgothatša le go matlafatša bana babo le dikgaetšedi. O ka ekiša bjang tsela yeo Johane a ilego a phela bophelo bja gagwe ka yona?

10. O ka bontšha bjang gore o rata batho ba bangwe?

¹⁰ O ka bontšha gore o rata ba bangwe ka seo o kgethago go se dira bophelong bja gago. Lefase le la Sathane le nyaka gore o nagane ka wena feela le go itirela tšhelete goba gore o nyake go tuma. Eupša Bakriste lefaseng ka moka ba fetša nako ya bona e ntši ba ruta batho ditaba tše dibotse le go ba thuša gore ba be le segwera le Jehofa. Ba bangwe ba kgetha gore modiro wa bona e be feela go botša batho ditaba tše dibotse.

11. Bagoeledi ba bantši ba bontšha bjang gore ba rata Jehofa le Bakristegotee le bona?

¹¹ Bakriste ba bantši ba swanelwa ke go šoma gore ba kgone go itlhokomela le go hlokomela malapa a bona. Eupša Bakriste bao ba thekga mokgatlo wa Modimo ka tsela le ge e le efe yeo ba ka kgonago. Ka mohlala, ba bangwe ba šoma modirong wa tlhakodišo, ba bangwe ba šoma go aga meago ya mokgatlo, e bile ka moka ga rena re na le tokelo ya go ntšha meneelo ya go thekga modiro wa rena wo o dirwago lefaseng ka moka. Bakriste bao ba dira dilo tše ka moka go bontšha gore ba rata Jehofa le batho ba bangwe. Beke e nngwe le e nngwe re bontšha gore re rata bana babo rena le dikgaetšedi ka go ba gona dibokeng le go tšea karolo go tšona. Le ge ka dinako tše dingwe re ikwa re lapile, ga re lofe dibokeng. E bile le ge re ka tšhoga, re no araba ka dibokeng. Le ge yo mongwe le yo mongwe a na le mathata a gagwe, re a kgothatšana pele ga diboka goba ka morago ga diboka. (Baheb. 10:24, 25) Ruri re leboga dilo ka moka tšeo bana babo rena le dikgaetšedi ba di dirago!

12. Ke ka tsela efe e nngwe gape yeo Johane a ilego a bontšha gore o be a rata bana babo le dikgaetšedi?

 ¹² Johane ga se a bontšha gore o rata bana babo le dikgaetšedi feela ka go no ba reta, eupša o ile a bontšha gore o a ba rata le ka go ba nea keletšo. Ka mohlala, mangwalong a gagwe o ile a reta bana babo gore ba na le tumelo e bile ba dira mediro e mebotse. Eupša o ile a ba nea le keletšo ka taba ya go dira sebe. (1 Joh. 1:8–2:1, 13, 14) Le rena re swanetše go reta bana babo rena ge ba dira dilo tše dibotse. Eupša ge motho a thoma go dira dilo tšeo di ka senyago tswalano ya gagwe le Jehofa, re swanetše go mmontšha lerato ka go mo nea keletšo. Ga go bonolo go eletša motho yo mongwe, eupša Beibele e re bagwera ba nnete ba a eletšana.—Die. 27:17.

13. Ke’ng seo re sego ra swanela go se dira?

¹³ Ka dinako tše dingwe re bontšha gore re rata bana babo rena le dikgaetšedi ka dilo tšeo re sa di dirego. Ka mohlala, ga re no kgopišwa gabonolo ke dilo tšeo ba di bolelago. Nagana ka seo se ilego sa direga ge Jesu a be a le mo lefaseng. O ile a botša barutiwa ba gagwe gore ba be ba swanetše go ja nama ya gagwe le go nwa madi a gagwe gore ba tle ba phele ka mo go sa felego. (Joh. 6:53-57) Barutiwa ba bantši ba Jesu ba ile ba se rate mantšu ao ke moka ba se sa mo latela. Eupša bagwera ba Jesu ba nnete, go akaretša le Johane, ba ile ba tšwela pele ba mo latela. Ba be ba makaditšwe ke mantšu ao a Jesu e bile ba sa a kwešiše, eupša ga se ba ka ba no nagana gore mantšu ao a tšwile tseleng ke moka ba kgopišega. Ba ile ba mo tshepa ka gobane ba be ba tseba gore o bolela nnete. (Joh. 6:60, 66-69) Go bohlokwa kudu gore re se ke ra kgopišwa gabonolo ke dilo tšeo bana babo rena le dikgaetšedi ba di bolelago! Go e na le moo re swanetše go ba fa nako ya gore ba hlalose gore ba ra go re’ng.—Die. 18:13; Mmo. 7:9.

14. Ke ka baka la’ng le ka mohla re se ra swanela go hloya bana babo rena le dikgaetšedi?

¹⁴ Johane o re eleditše le gore re se ke ra hloya bana babo rena le dikgaetšedi. Ge e ba re ka se theetše keletšo yeo, gona re tla be re dumelela Sathane gore a re laole. (1 Joh. 2:11; 3:15) Seo se ile sa diragalela Bakriste ba bangwe ba pele. Sathane o ile a dira sohle seo a ka se kgonago gore bahlanka ba Modimo ba se ke ba ratana le go ba aroganya. Nakong ya ge Johane a be a ngwala mangwalo a gagwe, batho bao ba bego ba sa nyake gore batho ba Modimo ba kwane ba be ba šetše ba le gona ka phuthegong. Ka mohlala, Dioterefe o  ile a dira gore ka phuthegong e nngwe go be le dikarogano. (3 Joh. 9, 10) O be a sa hlomphe bagolo bao sehlopha se bušago se bego se ba roma gore ba etele diphuthego. E bile o ile a leka le go raka ba bangwe ka phuthegong bao ba bego ba amogela batho bao a sa ba ratego. Ruri Dioterefe o be a na le mekgwa e mebe! Le lehono Sathane o sa dira sohle seo a se kgonago go dira gore batho ba Modimo ba arogane e bile ba se ke ba thekgana. Le ka mohla ga se ra swanela go hloya bana babo rena le go tlogela go ba thekga.

15. Hlogo ya lapa e swanetše go gopola eng?

¹⁵ Tsela e nngwe ya bohlokwa yeo hlogo ya lapa e bontšhago gore e rata lapa la yona ke ka go le hlokomela. (1 Tim. 5:8) Eupša hlogo ya lapa e swanetše go gopola gore go bohlokwa kudu gore e thuše lapa la yona gore le be le segwera se sebotse le Jehofa. (Mat. 5:3) Nagana ka mohlala woo Jesu a o beetšego dihlogo tša malapa. Puku ya Johane e re botša gore ge Jesu a be a ehwa koteng ya tlhokofatšo o be a tshwenyegile ka lapa la gabo. Johane o be a eme le Maria mmago Jesu kgauswi le moo Jesu a bego a bolaelwa gona. Le ge Jesu a be a ekwa bohloko kudu, o ile a kgopela Johane gore a šale a hlokometše mmagwe. (Joh. 19:26, 27) Jesu o be a na le bana babo bao ba bego ba tla šala ba hlokometše Maria, eupša go bonagala ka nako yeo go be go se le o tee wa bona yo e bego e le molatedi wa Jesu. Jesu o be a nyaka motho yo a tlago go dula a hlokometše Maria, le go mo kgothaletša gore a se ke a tlogela go hlankela Jehofa.

16. Johane o be a na le maikarabelo afe?

¹⁶ Johane o be a na le maikarabelo a mantši. Ka ge e be e le yo mongwe wa baapostola, o be a swanetše go dira modiro wa go bolela ditaba tše dibotse ka mafolofolo. Le gona ka ge go ka direga gore o be a nyetše, o be a swanetše go hlokomela lapa la gagwe le go le thuša gore le be le segwera se sebotse le Jehofa. (1 Bakor. 9:5) Dihlogo tša malapa di ka ithuta’ng go se?

17. Hlogo ya lapa e ka bontšha bjang gore e rata lapa la yona?

¹⁷ Ngwanabo rena yoo e lego hlogo ya lapa a ka ba a na le maikarabelo a mantši a bohlokwa. Ka mohlala, o swanetše go šoma ka thata ge a le mošomong gore bao a šomago le bona ba kgone go reta Jehofa. (Baef. 6:5, 6; Tito 2:9, 10) A ka ba a na le maikarabelo a mangwe  a go kgothatša bana babo rena le dikgaetšedi ka phuthegong le go etelela pele modirong wa go bolela ditaba tše dibotse. Eupša go bohlokwa gore a bontšhe mosadi wa gagwe le bana ba gagwe gore o a ba rata ka go ithuta Beibele le bona. Ba tlo leboga dilo tšeo a ba direlago tšona gore ba dule ba phetše gabotse e bile ba thabile, le gore ba dule ba na le segwera se sebotse le Jehofa.—Baef. 5:28, 29; 6:4.

18. Johane o be a kgodišegile ka eng?

¹⁸ Johane o phetše mengwaga e mentši e bile o diragaletšwe ke dilo tše dintši bophelong. O ile a welwa ke mathata a mantši ao a ka bago a ile a dira gore tumelo ya gagwe e fokole. Eupša o ile a dula a ekwa ditaelo tša Jesu, go akaretša le ya gore a rate bana babo le dikgaetšedi. Ka baka leo, o be a kgodišegile gore Jehofa le Jesu ba a mo rata le gore ba tla mo fa matla a go kgotlelela mathata le ge e le afe. (Joh. 14:15-17; 15:10; 1 Joh. 4:16) Sathane le batho ba gagwe ga se ba ka ba kgona go thibela Johane go bontšha bana babo gore o a ba rata ka seo a bego a se bolela le seo a bego a se dira.

19. Johane wa Pele 4:7 e re kgothaletša gore re dire eng, gona ka baka la’ng?

¹⁹ Go swana le Johane, re phela lefaseng leo le bušwago ke Sathane yo a sa ratego batho. (1 Joh. 3:1, 10) Ga se ra swanela go mo dumelela a re dira gore re se sa rata bana babo rena le dikgaetšedi. Anke re ikemišetšeng go dula re bontšha gore re rata bana babo rena le dikgaetšedi ka dilo tšeo re di bolelago le ka tšeo re di dirago. Ge re bontšha bana babo rena lerato leo, re tla thabela go ba karolo ya lapa la Jehofa le go phela bophelo bjo bo thabišago kudu.—Bala 1 Johane 4:7.