1. Rukundo ya Ruhanga neekureetera kwehurira ota?

‘RUHANGA ni rukundo,’ nikwo entumwa Yohaana yaahandiikire. (1 Yoh. 4:8) Ebigambo byorobi ebi nibitwijutsya amazima makuru ngu Ruhanga niwe bukomooko bw’amagara, kandi obukomooko bwa rukundo. Yehova naatukunda! Rukundo ye neetureetera kuhurira twine oburinzi, okushemererwa, n’okumarwa.

2. Kurugiirira ahari Matayo 22:37-40, ebiragiro bibiri ebikuru ni biiha, kandi ahabw’enki kirikubaasa kuguma kworobera ekya kabiri?

² Aha Bakristaayo, okugirira abandi rukundo ti nshonga ei twine kucwamu. N’ekiragiro. (Shoma Matayo 22:37-40.) Twamanya gye Yehova, nikibaasa kutatugumira kworobera ekiragiro ky’okubanza. Ahakuba Yehova n’ohikiriire, naafayo kandi n’omunyambabazi omu ku arikututwariza. Kwonka nitubaasa kugumirwa kworobera ekiragiro kya kabiri. Ahabw’enki? N’ahabw’okugira ngu ab’eishe-emwe bagyenzi baitu ti bahikiriire. Obumwe nibabaasa kugamba nari kukora ebirikutureetera kuteekateeka ngu ti b’embabazi nari ngu tibarikutufaho. Yehova akaba naamanya ngu nitwija kuhikwaho embeera egumire egi, n’ahabw’ekyo akahiga abahandiiki bamwe ba Baibuli kuha obuhabuzi oburikworeka ahabw’enki twine kukundana n’oku twine kukundana. Omwe aha bahandiiki aba ni Yohaana.​—1 Yoh. 3:11, 12.

3. Yohaana akagamba munonga ahari ki?

³ Yohaana akahandiika butunu ngu Abakristaayo baine kukundana. Nangwa arikuhandiika n’ahari Yesu, akakoresa ebigambo “okukunda” na “yaakunzire” kukira abahandiiki b’Engiri  abandi boona hamwe. Yohaana akaba aine emyaka nka igana obu yaahandiika Engiri ye n’amabaruha ge ashatu. Ebi yaahandiikire nibyoreka ngu buri kimwe eki Omukristaayo arikukora aine kuba naahigwa rukundo. (1 Yoh. 4:10, 11) Kwonka, kikatwara obwire Yohaana kubaasa kwega eishomo eryo.

4. Mbwenu shi Yohaana butoosha akaba naagirira abandi rukundo?

⁴ Obu Yohaana yaabaire akiri omushaija muto, obumwe akaba atarikugirira abandi rukundo. Nk’eky’okureeberaho, eizooba rimwe Yesu n’abeegi be bakaraba omuri Samaria barikuza Yerusaalemu. Kimwe aha byaro bya Samaria kikanga kuba efura aharibo. Yohaana akatwaza ata? Akashaba ngu ayete omuriro kuruga omu iguru kucwekyereza abatuuzi b’ekyaro ekyo boona! (Luk. 9:52-56) Aha izooba erindi, akaremwa kworeka ngu naakunda entumwa bagyenzi be. We n’omurumuna orikwetwa Yakobo bakagyemesereza nyinabo kushaba Yesu kubaha emyanya y’ahaiguru barikutegyeka nawe omu Bukama. Entumwa abandi ku baamanyire eki Yohaana na Yakobo baakora, bakagira ekiniga! (Mat. 20:20, 21, 24) N’obu Yohaana yaakozire enshobe ezo zoona, Yesu akaba naamukunda.​—Yoh. 21:7.

5. Nituza kushwijuma ki omu kicweka eki?

⁵ Omu kicweka eki, nituza kushwijuma eky’okureeberaho kya Yohaana n’ebintu bimwe ebi yaahandiikire ahari rukundo. Twakora tutyo, nitwija kwega oku turikubaasa kugirira ab’eishe-emwe rukundo. Kandi nituza n’okwega omuringo mukuru oku nyineeka arikubaasa kuhamya ngu naakunda ab’eka ye.

6. Yehova ayorekire ata ngu naatukunda?

⁶ Nitukira kuteekateeka ahari rukundo nk’enyehurira y’okufayo erikworekwa omu bigambo by’embabazi. Kwonka rukundo kubaasa kuba eyaabuzima, eine kugyendera hamwe n’ebikorwa. (Gyeragyeranisa Yakobo 2:17, 26.) Nk’eky’okureeberaho, Yehova naatukunda. (1 Yoh. 4:19) Kandi naayoreka oku arikutukunda kurabira omu bigambo birungi ebiri omu Baibuli. (Zab. 25:10; Rom. 8:38, 39) Kwonka, nituhamya ngu Ruhanga naatukunda ti ahabw’ebi arikugamba byonka, beitu n’ebi arikukora. Yohaana akahandiika ati: “Omuri eki nimwo okukunda kwa Ruhanga kwayorekyeirwe omuriitwe, obu yaatuma omwana we omwe nyamunegyere, ngu tube abahuriire ahabwe.” (1 Yoh. 4:9) Yehova akaikiriza Omwana we omukundwa kubonabona n’okufa ahabwaitu. (Yoh. 3:16) Mbwenu shi hariho okubangaanisa kwona ngu Yehova naatukunda?

7. Yesu akakora ki kutuhamiza ngu naatukunda?

 ⁷ Yesu akahamiza abeegi be ngu naabakunda. (Yoh. 13:1; 15:15) Akooreka rukundo mpango ei yaabaire abainiire, naitwe ei atwiniire ahabw’ebi yaagambire n’ebi yaakozire. “Tihariho rukundo erikukira egi,” Yesu nikwo yaagizire, “omuntu kufeera banywani be.” (Yoh. 15:13) Twateekateeka aha bi Yehova na Yesu batukoreire, tushemereire kukwatwaho tuta?

8. Kurugiirira ahari 1 Yohaana 3:18 twine kukora ki?

⁸ Nitworeka ngu nitukunda Yehova na Yesu turikuboorobera. (Yoh. 14:15; 1 Yoh. 5:3) Kandi Yesu akatuha ekiragiro kya butunu ngu twine kukundana. (Yoh. 13:34, 35) Titwine kugamba bugamba ngu nitukunda ab’eishe-emwe na banyaanyazi-itwe, beitu twine n’okworeka ngu nitubakunda omu bikorwa byaitu. (Shoma 1 Yohaana 3:18.) Mbwenu shi nitubaasa kworeka tuta butunu ngu nitubakunda?

9. Rukundo ekahiga Yohaana kukora ki?

⁹ Yohaana ashemereire kuba yaabaire naatuura na ishe arikukora omurimo gw’eka yaabo ogw’okujuba kwebaisaho. Kwonka nabwo, obwire obundi akaba naabumara arikuhwera abandi kwega amazima agarikukwata ahari Yehova na Yesu. Eki Yohaana yaacwiremu kukora kikaba kitoorobi. Akabonabona ahabw’okuhiiganisibwa, kandi ekyasha ky’okubanza kiri haihi kuhendera obu yaabaire ari omugurusi, akatwarwa n’omu buzaahe. (Byak. 3:1; 4:1-3; 5:18; Kush. 1:9) Nangwa n’obu yaabaire akomirwe ahabw’okubuurira ahari Yesu, akooreka ngu akaba naateekateeka aha bandi. Nk’eky’okureeberaho, obu yaabaire ari aha kirwa Patumo, akahandiika okworekwa oku yaatungire, kandi yaakwohereza omu bibiina kugira ngu bimanye “ebyabaire nibyenda kubaho juba.” (Kush. 1:1) Bwanyima ya Yohaana kukomoororwa kuruga aha kirwa Patumo, akahandiika ebirikukwata ahari Yesu n’obuheereza bwe. Kandi akahandiika n’amabaruha ashatu kubaasa kugumya ab’eishe-emwe na banyaanya. Noobaasa kutooreza ota Yohaana omu kwefeerereza?

10. Noobaasa kworeka ota ngu nookunda abantu?

¹⁰ Noobaasa kworeka ngu nookunda abantu kurugiirira aha bi orikucwamu kukora. Entebeekanisa ya Sitaane egyendereire kukureetera kukoresa obwire bwawe n’amaani gaawe, orikuteeraho kukora esente n’okwekorera eiziina. Omu mwanya gw’ekyo, ababuurizi b’Obukama abarikwefeerereza omu nsi yoona nibamara obwire bwingi barikubuurira amakuru marungi n’okuhwera abantu kwirira haihi Yehova. Abamwe nibabaasa kubuurira n’okwegyesa abandi obutwire.

11. Ababuurizi abeesigwa nibooreka bata ngu nibakunda Yehova n’ab’eishe-emwe na banyaanyabo?

¹¹ Abakristaayo baingi abeesigwa baine kukora emirimo y’obutwire kubaasa kwebaisaho n’ab’omu maka gaabo. Kwonka, ababuurizi aba abeesigwa nibashagika ekibiina kya Ruhanga nk’oku barikubaasa. Nk’eky’okureeberaho, nibeehayo kuhwera haabaho ekihikiirizi, abamwe nibahwera omu kwombeka ebyombeko by’ekibiina, kandi buri omwe aine omugisha gw’okuhayo ahabw’omurimo ogurikukorwa omu nsi yoona. Nibakora ebintu ebi ahakuba nibakunda Ruhanga n’abantu bagyenzi baabo. Buri saabiiti, nitworeka ngu nitukunda ab’eishe-emwe na banyaanyazi-itwe turikuza omu nteerane kandi tukazejumbamu. Nangwa n’obu turikuba turuhire, nituza omu nteerane ezi. Nangwa n’obu turikuba tutiinire, nitugarukamu. Kandi n’obu turaabe twine oburemeezi obwaitu,  nitugumya abandi, enteerane zitakatandikire na zaahwa. (Heb. 10:24, 25) Ka nitusiima ebi ababuurizi bagyenzi baitu barikukora!

12. Ni muringo ki ogundi ogu Yohaana yaayorekire ngu naakunda ab’eishe-emwe na banyaanya?

¹² Yohaana akooreka ngu naakunda bagyenzi be ti ahabw’okubasiima kwonka, beitu n’okubahana kyayetengyesa. Nk’eky’okureeberaho, omu baruha ezi Yohaana yaahandiikire, akasiima ab’eishe-emwe na banyaanya ahabw’okwikiriza kwabo n’emirimo yaabo mirungi, kwonka nabwo akabahana butunu aha bikwatiraine n’ekibi. (1 Yoh. 1:8–2:1, 13, 14) Naitwe, twine kusiima ab’eishe-emwe na banyaanyazi-itwe ahabw’ebirungi ebi barikukora. Kwonka omuntu yaatandika kugira emiteekateekyere mibi nari emize mibi, nitworeka ngu nitumukunda turikumuhana omu muringo gw’obwengye. Nikyetengyesa obumanzi kuhana omunywani, kwonka Baibuli neegira ngu abanywani abaabuzima nibatyazana, nari nibahaburana.​—Enf. 27:17.

13. Tushemereire kwetantara kukora ki?

¹³ Obumwe, nitworeka ngu nitukunda ab’eishe-emwe na banyaanyazi-itwe turikwetantara kukora ebintu ebimwe. Nk’eky’okureeberaho, titurikurahuka kuguubwa kubi ahabw’ebi barikugamba. Yetegyereze ekyabaireho, Yesu ari haihi kuhendera obuheereza bwe omu nsi. Akagambira abeegi be ngu kubaasa kutunga amagara agatahwaho, baine kurya omubiri gwe kandi bakanywa n’eshagama ye. (Yoh. 6:53-57) Ebigambo ebyo bikateganisa baingi aha beegi be, kwonka banywani be abaabuzima otwariiremu na Yohaana tibirabateganiise. Bakaguma bamuhamiireho. Tibarayetegyereize eki Yesu yaagambire, kandi baine kuba baayebuurize amakuru gaabyo. Kwonka, banywani ba Yesu aba tibarateeberiize ngu ebi yaagambire bigwire reero bakaguubwa kubi. Omu mwanya gw’ekyo, bakamwesiga ahabw’okumanya ngu naagamba amazima. (Yoh. 6:60, 66-69) Ka ni kikuru kutarahuka kuguubwa kubi ahabw’ebi banywani baitu barikugamba! Kureka, nitubaha omugisha gw’okushoboorora eki tutaayetegyereza.​—Enf. 18:13; Mub. 7:9.

14. Ahabw’enki tutashemereire kwikiriza rwango kuza omu mutima gwaitu?

¹⁴ Kandi Yohaana akatuhiga kutagirira ab’eishe-emwe rwango. Twayanga kukuratira obuhabuzi obwo, nituha Sitaane omugisha gw’okutuhabisa. (1 Yoh. 2:11; 3:15) Eki kikahika ahari bamwe ekyasha ky’okubanza Y.A.K  kiri haihi kuhendera. Sitaane akaba ariyo naakora kyona ekirikubaasika kureetaho rwango n’okubaganisamu abantu ba Ruhanga. Obu Yohaana yaahandiika amabaruha ge, abashaija abaine emiteekateekyere nk’eya Sitaane bakaba bataahire omu kibiina. Nk’eky’okureeberaho, Diotorefe akaba naareeta okwebaganisamu omu kibiina kimwe. (3 Yoh. 9, 10) Akaba atarikuha ekitiinisa abajwekyerwa b’akakiiko akareeberezi. Kandi bamwe abaabaire bari efura kwonka abu yaabaire atarikukunda, akateeraho kubabinga omu kibiina. Ka yaabaire ari omuntu w’ebihagi! Sitaane na hati naakiteeraho kubaganisamu abaheereza ba Ruhanga n’okubahabisa obunaku obu. Ka tuteereho kutaikiriza rwango kutubaganisamu.

15. Baanyineeka baine kwijuka ki?

¹⁵ Omuringo gumwe mukuru ogu nyineeka arikworekamu ngu naakunda ab’eka ye n’okubareeberera omu by’omubiri. (1 Tim. 5:8) Kwonka aine kwijuka ngu, eby’omubiri tibirikuhaazya ebyetengo by’ab’eka ye eby’omwoyo. (Mat. 5:3) Yetegyereze eky’okureeberaho eki Yesu yaateeraireho baanyineeka. Kurugiirira aha Ngiri ya Yohaana, obu Yesu yaabaire ari aha muti omu busaasi bwingi, nabwo akaba naakiteekateeka aha b’eka ye. Yohaana akaba ayemereire na Mariamu nyina wa Yesu omu mwanya ogu Yesu yaabaire ahanikirwemu. Oyihireho Yesu okuba omu busaasi bwingi, akakora entebeekanisa kugira ngu Yohaana areeberere Mariamu. (Yoh. 19:26, 27) Yesu akaba aine beene nyina abaabaire nibabaasa kureeberera Mariamu omu by’omubiri, kwonka nikireebeka tihaine n’omwe omuribo owaabaire yaahindukire omwegi wa Yesu. N’ahabw’ekyo Yesu akaba naayenda kuhamya ngu Mariamu yaaguma naareebererwa omu by’omubiri n’omu by’omwoyo.

16. Yohaana akaba aine bujunaanizibwa ki?

¹⁶ Yohaana akaba aine obujunaanizibwa bw’amaani. Ahabw’okuba omwe aha ntumwa, akaba naayebembera omu murimo gw’okubuurira. Kandi ashemereire kuba yaabaire aine omukazi, n’ahabw’ekyo akaba aine kuringaaniza obujunaanizibwa bw’okureebera eka ye omu by’omubiri n’omu by’omwoyo. (1 Kor. 9:5) Eki nikyegyesa ki baanyineeka?

17. Ahabw’enki ni kikuru ngu baanyineeka bareeberere ab’amaka gaabo omu by’omwoyo?

¹⁷ Ow’eishe-emwe ori nyineeka naabaasa  kuba aine obujunaanizibwa bwingi. Nk’eky’okureeberaho, aine kukora n’amaani aha murimo gw’okwebaisaho kugira ngu entwaza ye ehimbisise Yehova. (Efe. 6:5, 6; Tit. 2:9, 10) Kandi naabaasa kuba aine obujunaanizibwa omu kibiina, nk’okutaayaayira ab’eishe-emwe kubagumya, n’okwebembera omu murimo gw’okubuurira. Kandi, ni kikuru ngu agume naayegyesa omukazi we n’abaana be. Nibaija kusiima okuteeraho kwe kubareeberera omu by’omubiri, enyehurira, n’omu by’omwoyo.​—Efe. 5:28, 29; 6:4.

18. Yohaana akaba aine buhame ki?

¹⁸ Yohaana akahangaara munonga yaakora bingi. Akatunga oburemeezi butari bumwe na bumwe obwabaire nibubaasa kutuubya okwikiriza kwe. Kwonka butoosha akaba naayorobera ebiragiro bya Yesu, otwariiremu eky’okukunda ab’eishe-emwe na banyaanya. N’ekyarugiremu, Yohaana akaba naahamya ngu Yehova na Yesu nibamukunda, kandi bakaba nibamuha amaani g’okusingura okugyezibwa kwona. (Yoh. 14:15-17; 15:10; 1 Yoh. 4:16) Tihaine eki Sitaane n’abantu b’ensi ye baabaire nibabaasa kukora kuremesa Yohaana kugirira abandi rukundo.

19. Ebiri omuri 1 Yohaana 4:7 nibituhiga kukora ki, kandi ahabw’enki?

¹⁹ Nka Yohaana, nitutuura omu nsi eijwiremu emiteekateekyere ya Sitaane, ruhanga w’obusingye obu oine rwango. (1 Yoh. 3:1, 10) N’obu araabe naayenda ngu turekyere aho kukunda ab’eishe-emwe na banyaanyazi-itwe, ekyo tarikubaasa kukikora okwihaho twamwikiriza kukikora. Ka tumariirire kukunda ab’eishe-emwe na banyaanyazi-itwe, tukigambe ngu nitubakunda, kandi tukyoreke omu bikorwa. Obwo nitwija kutunga okumarwa ahabw’okuba omu ka ya Yehova, kandi nitwija kushemererwa buzima.​—Shoma 1 Yohaana 4:7.