1. Kon Yehova su amor ta laga bo sinti?

APÒSTEL HUAN a skirbi: “Dios ta amor.” (1 Huan 4:8) E palabranan ei ta kòrda nos di un bèrdat importante: tantu bida komo amor ta bini di Dios. Yehova ta stima nos masha tantu mes! Anto su amor ta laga nos sinti nos safe, kontentu i satisfecho.

2. Segun Mateo 22:37-40, kiko ta e dos mandamentunan di mas importante, i dikon tin biaha ta difísil pa nos obedesé e di dos?

² Lesa Mateo 22:37-40. Komo kristiannan nos mester demostrá amor; nos no tin opshon. E ta un mandamentu. Segun ku nos ta haña sa ki klase di Dios Yehova ta, ta fásil pa nos obedesé e promé mandamentu. Esei ta pasobra Yehova ta perfekto. E ta interesá den nos, e ta trata nos bon i ku kariño. Pero, kisas pa obedesé e di dos mandamentu no ta dje fásil ei. Dikon nò? Pasobra nos rumannan den kongregashon—ku tambe ta nos próhimo—ta imperfekto. Tin biaha e kosnan ku nan ta hasi i bisa ta hùrt nos i ta laga nos sinti ku nan no ta stima nos. Teniendo kuenta ku esei, Yehova a laga algun hende ku a skirbi buki di Beibel siña nos dikon nos mester stima otro i kon pa hasi esei. Un di nan tabata Huan.—1 Huan 3:11, 12.

3. Kiko Huan a enfatisá?

³ Den su kartanan, Huan a enfatisá ku tur kristian  mester demostrá amor. De echo, den su Evangelio, el a usa e palabra griego pa “stima” i “amor” mas ku e otro tres Evangelionan huntu. Huan lo tabatin un shen aña asina ora el a skirbi su Evangelio i su otro tres kartanan. E bukinan di Beibel ei ta siña nos ku tur loke nos ta hasi mester ta motivá pa amor. (1 Huan 4:10, 11) Pero, a tuma tempu pa Huan mes siña esei.

4. Ta semper Huan a demostrá amor na otro hende?

⁴ No ta semper Huan a demostrá amor na otro hende. Por ehèmpel, na un okashon Hesus ku su disipelnan tabata na kaminda pa Herúsalèm i nan a para un ratu na Samaria. E hendenan den un pueblo samaritano no a demostrá nan hospitalidat. Kiko Huan a hasi? El a puntra Hesus: “Bo ke pa nos manda kandela baha for di shelu i kaba ku nan?” (Luk. 9:52-56) Anto un otro biaha, Huan no demostrá amor na e otro apòstelnan. Aparentemente e ku su ruman hòmber a pidi nan mama pa puntra Hesus pa duna nan un puesto importante den e Reino. Ora e otro apòstelnan a haña sa loke Santiago i Huan a hasi, nan a rabia masha pisá! (Mat. 20:20, 21, 24) Pero apesar ku Huan a kometé tur e fayonan ei, Hesus tabata stim’é.—Huan 21:7.

5. Kiko nos lo trata den e artíkulo akí?

⁵ Den e artíkulo akí, nos lo trata e ehèmpel di Huan i algun kos ku el a skirbi tokante amor. Segun ku nos ta hasi esei, nos lo siña kon pa demostrá nos rumannan ku nos ta stima nan. Tambe nos lo mira den ki manera importante un kabes di famia por demostrá ku e ta stima su famia.

6. Kon nos por sa ku Yehova ta stima nos?

⁶ Hopi biaha nos ta pensa ku amor ta djis un sintimentu ku bo por ekspresá ku bunita palabra. Pero si nos tin berdadero amor, nos lo demostrá esei ku akshonnan tambe. (Kompará ku Santiago 2:17, 26.) Tuma Yehova komo ehèmpel. E ta stima nos. (1 Huan 4:19) I e ta ekspresá su amor usando bunita palabra ku nos por lesa den Beibel. (Sal. 25:10; Rom. 8:38, 39) Pero, Dios no ta stima nos ku palabra so ma tambe pa medio di su echonan. Huan a skirbi: “Pa medio di esaki Dios a revelá e amor ku e tin pa nos: Dios a manda su Yu unigénito na mundu pa nos por haña bida pa medio di dje.” (1 Huan 4:9) Sí, Yehova a permití  su yu stimá sufri i muri pa nos. (Huan 3:16) Pues, nos tin sigur ku Yehova ta stima nos mashá.

7. Kon nos por sa ku Hesus ta stima nos?

⁷ Hesus a bisa su disipelnan ku e tabata stima nan. (Huan 13:1; 15:15) Ma e no a djis bisa nan esei so, el a demostrá esei ku echo tambe. El a bisa: “Ningun hende no tin un amor mas grandi ku esun ku ta entregá su alma pa su amigunan.” (Huan 15:13) Sí, tantu Yehova komo Hesus a demostrá ku nan ta stima nos. Mirando tur esei, kiko abo ta motivá pa hasi?

8. Kiko 1 Huan 3:18 ta bisa ku nos mester hasi?

⁸ Nos ta demostrá ku nos ta stima Yehova i Hesus ora nos ta obedesé nan. (Huan 14:15; 1 Huan 5:3) Un mandamentu ku Hesus a duna nos ta pa nos stima otro. (Huan 13:34, 35) Nos no mester djis bisa ku nos ta stima nos rumannan, ma nos mester demostrá esei ku echo tambe. (Lesa 1 Huan 3:18.) Kon nos por hasi esei?

9. Kiko amor a motivá Huan pa hasi?

⁹ Huan su famia tabatin un negoshi di piska. E por a skohe pa traha ku su tata i gana plaka. Pero en bes di esei, el a usa e restu di su bida pa yuda otro hende siña e bèrdat tokante Yehova i Hesus. E bida ei no tabata fásil. El a ser persiguí, i ora e tabata di edat avansá, nan a mand’é den eksilio. (Echo. 3:1; 4:1-3; 5:18; Rev. 1:9) Asta ora e tabata prezu, el a demostrá ku e tabata stima su rumannan. Por ehèmpel, ora e tabata riba e isla di Patmos, el a skirbi e buki di Revelashon i el a manda esei na e kongregashonnan ya asina nan por a sa “e kosnan ku tin ku sosodé pronto.” (Rev. 1:1) Djei, probablemente despues ku nan a lag’é liber for di Patmos, el a skirbi su Evangelio tokante e bida i sirbishi di Hesus. Tambe el a skirbi tres karta pa animá i fortalesé su rumannan. Kon nos por hasi e mesun sakrifisionan ku Huan a hasi?

10. Kon nos por demostrá ku nos ta stima hende?

¹⁰ E manera ku bo ta hiba bo bida ta demostrá si di bèrdat bo ta stima hende òf nò. E mundu di Satanas ke pa bo pensa riba bo mes so. Sí, e ke pa bo usa tur bo tempu i energia purbando di gana plaka òf purbando di bira bon konosí. En bes di hasi esei, tin rumannan rònt mundu ku ta usa tur nan tempu predikando e bon notisia i yudando hende hala serka Yehova. Algun di nan asta ta hasi esei fultaim.

11. Kon hopi di nos ta demostrá ku nos ta stima Yehova i nos rumannan?

¹¹ Hopi di nos tin trabou fultaim di manera ku nos por kuida nos mes i nos famia. Pero, asina mes nos ta apoyá Dios su organisashon fielmente. Por ehèmpel, algun di nos ta duna yudansa ora di desaster natural i tin di nos ta traha riba proyekto di konstrukshon. Anto nos tur por hasi donashon pa e obra mundial. Nos ta hasi tur esei pasobra nos ta stima Dios i nos próhimo. Tur siman nos ta demostrá ku nos ta stima nos rumannan ora nos ta bai reunion i partisipá den nan. Nos por ta morto kansá, pero asina mes nos t’ei presente. Aunke nos por ta bon nèrvioso, nos ta duna komentario. I tin biaha nos mes tin nos problemanan, pero nos ta animá otro promé i despues di reunion. (Heb. 10:24, 25) Nos ta  masha gradisidu pa tur e trabou ku nos rumannan ta hasiendo!

12. Den ki manera Huan a demostrá ku e tabata stima su rumannan?

¹² Un otro manera ku Huan a demostrá ku e tabata stima su rumannan ta di duna nan elogio. Por ehèmpel, den su karta el a elogiá nan pa nan fe i bon obranan. Pero, e echo ku el a spièrta nan tokante piká tambe a demostrá ku e tabata stima nan. (1 Huan 1:8–2:1, 13, 14) Nos tambe mester elogiá nos rumannan pa e bon kosnan ku nan ta hasi. Pero, si nos ripará ku un ruman ta birando negativo òf ta kuminsá hasi algu ku por daña su amistat ku Yehova, nos ta demostr’é ku nos ta stim’é ora nos usa takto i papia franko kuné. Ta bèrdat ku nos mester di kurashi pa nos ta franko ku un bon amigu. Pero, Beibel ta bisa ku berdadero amigu lo korigí otro.—Pro. 27:17.

13. Kiko nos mester evitá di hasi?

¹³ Un otro manera ku nos ta demostrá ku nos ta stima nos rumannan ta di evitá di hasi sierto kosnan. Por ehèmpel, nos no ta rabia lihé ora nan bisa algu. Laga nos wak kiko a pasa durante Hesus su bida riba tera. El a bisa su disipelnan ku si nan ke haña bida, nan mester a kome su karni i bebe su sanger. (Huan 6:53-57) Loke el a bisa ei a shòk hopi di su disipelnan i nan a stòp di siguié. Pero, Hesus su amigunan fiel, manera Huan, a keda. Nan no a komprondé loke Hesus a bisa, anto probablemente loke el a bisa a sorprendé nan. Sinembargo, nan no a pensa ku loke el a bisa tabata robes òf ofensivo. Al kontrario, nan a konfia den dje pasobra nan tabata sa ku semper e tabata papia bèrdat. (Huan 6:60, 66-69) Pues, ta masha importante pa nos evitá di sinti nos ofendí i rabia lihé pa loke nos rumannan ta bisa! Mas bien, nos ta duna nan e oportunidat pa splika loke nan ke men.—Pro. 18:13; Ekl. 7:9.

14. Dikon nos no mester odia nos rumannan?

¹⁴ Un kos mas ku Huan a bisa nos ta pa nos no odia nos rumannan. Si nos no hasi kaso di e konseho ei, nos ta dunando Satanas chèns pa influensiá nos. (1 Huan 2:11; 3:15) Esei ta loke a pasa ku algun ruman na final di promé siglo. Satanas tabata hasi tur loke e tabata por pa kousa odio i divishon den kongregashon.  Pa ora ku Huan a skirbi su kartanan, algun hende ku tabata pensa meskos ku Satanas a slùip drenta e kongregashon. Por ehèmpel, un di nan tabata Diótrefes. Su meta tabata pa kousa divishon den kongregashon. (3 Huan 9, 10) E no tabatin niun tiki rèspèt pa e ansianonan ku kuerpo gobernante a manda pa bishitá nan kongregashon. El a asta purba di saka for di kongregashon e rumannan ku a mustra hospitalidat na hende ku e no tabata gusta. Esta arogante no! Te ainda Satanas ta sigui purba di dividí Dios su pueblo. Laga nos nunka permití odio hala nos leu for di nos rumannan.

15. Kiko un kabes di famia mester kòrda?

¹⁵ Ta bèrdat ku un manera importante ku un kabes di famia ta demostrá ku e ta stima su famia ta di perkurá pa nan nesesidat material. (1 Tim. 5:8) Pero, e mester kòrda ku e kosnan ei lo no satisfasé nesesidat spiritual di su famia. (Mat. 5:3) Wak ki ehèmpel Hesus a pone pa tur kabes di famia. E buki di Huan ta bisa ku miéntras Hesus tabata riba e staka di tormento, e tabata preokupá pa su famia. Na e okashon ei, Maria, mama di Hesus, tabata einan tambe. Apesar ku Hesus tabata den agonia, el a pidi Huan pa kuida su mama p’e. (Huan 19:26, 27) Hesus tabatin ruman ku por a perkurá pa Maria den sentido material, pero parse ku ainda niun di nan no a bira su disipel. Pues, Hesus kier a hasi sigur ku tabatin un hende pa no djis perkurá pa su mama materialmente pero tambe spiritualmente.

16. Ki responsabilidat Huan tabatin?

¹⁶ Huan tabatin hopi responsabilidat. E tabata un apòstel, i e tabata masha zeloso den e trabou di prediká. Kisas e tabata kasá tambe, pues e mester a perkurá pa su famia den sentido material i tambe spiritual. (1 Kor. 9:5) Ki lès tur kabes di famia por siña for di dje?

17. Kon un kabes di famia por demostrá ku e ta stima su famia?

¹⁷ Kisas un kabes di famia tin hopi kos importante di hasi. Por ehèmpel, e mester ta un bon trahadó pa asina su kondukta por trese gloria na Yehova. (Efe. 6:5, 6; Tito 2:9, 10) Kisas e ta un ansiano  òf sirbidó ministerial tambe. Debí na esei, e tin ku pastoriá òf saka grupo di sirbishi. Apesar di tur esei, ta masha importante pa e studia Beibel regularmente ku su esposa i su yunan. Su famia lo ta masha kontentu ku e esfuerso ku e ta hasi pa kuida nan den sentido material, emoshonal i spiritual.—Efe. 5:28, 29; 6:4.

18. Di kiko Huan tabatin sigur?

¹⁸ Huan a biba largu i a pasa den hopi kos. El a pasa den hopi difikultat ku por a suak su fe. Pero, asina mes el a hasi tur su esfuerso pa obedesé Hesus su mandamentu, inkluso esun pa stima su rumannan. P’esei, Huan tabatin sigur ku Yehova i Hesus tabata stim’é i ku nan lo a yud’é soportá kualke prueba. (Huan 14:15-17; 15:10; 1 Huan 4:16) Ni Satanas ni su mundu no por a stòp Huan di stima su rumannan i di demostrá esei ku echo i palabra.

19. Ki animashon nos ta haña na 1 Huan 4:7, i dikon ta importante pa nos sigui e konseho ei?

¹⁹ Meskos ku Huan, nos ta biba den un mundu dominá pa Satanas. E no tin amor pa niun hende. (1 Huan 3:1, 10) Aunke e tin gana di stòp nos di stima nos rumannan, e no por hasi esei a ménos ku nos permitié. P’esei, laga nos ta determiná pa stima nos rumannan. Sí, demostrando esei ku echo i palabra. E ora ei, nos lo tin e goso di ta parti di Yehova su famia i tin un bida ku di bèrdat ta bale la pena.—Lesa 1 Huan 4:7.