1. From iu savve God lovem iu, hao nao datwan mekem iu feel?

APOSOL John sei “God hem love.” (1 John 4:8) Iumi savve God wakem evri samting. Bat toktok blo John helpem iumi for tingim love tu hem kam from God. Jehovah barava lovem iumi! From iumi savve lo datwan, iumi feel sef and hapi.

2. Wanem nao tufala important law wea Matthew 22:37-40 storyim, and why nao hem no isi for obeyim mek-tu law?

² Tufala law lo Bible sei olketa Christian mas lovem God and pipol. (Readim Matthew 22:37-40.) Taem iumi savve gud lo Jehovah, maet hem isi for followim datfala first law for lovem hem. From hem perfect, hem evritaem tingim iumi and kaen lo iumi. Bat maet hem no isi for obeyim mek-tu law for lovem pipol. Why nao olsem? Bikos pipol, wea insaed diswan hem olketa brata and sista blo iumi, olketa no perfect. So maet samfala taem olketa duim samting wea no kaen or no showimaot love. From Jehovah hem savve hem no isi for iumi lovem evriwan, hem iusim samfala wea raetem Bible for teachim iumi why iumi shud showimaot love lo narawan and hao iumi savve duim datwan. John nao wanfala wea raet abaotem love.​—1 John 3:11, 12.

3. Wanem nao John sei abaotem love?

³ Staka taem insaed olketa Bible buk wea John raetem, hem sei olketa Christian mas showimaot love. Lo buk blo John wea hem storyim laef blo Jesus, John iusim tufala word “love” and “lovem” staka taem winim olketa Bible buk blo Matthew, Mark, and Luke. John hem samting  olsem 100 years taem hem raetem Bible buk blo John and thrifala leta blo hem. Iumi lanem from olketa Bible buk hia, iumi mas lovem evriwan. (1 John 4:10, 11) Bat John seleva tu mas waka hard for showimaot love lo evriwan.

4. Waswe, John showimaot love lo evriwan?

⁴ Taem John hem young man, hem no showimaot love lo samfala. For example, wanfala taem Jesus and olketa disaepol go pas lo Samaria for go lo Jerusalem. Pipol lo wanfala vilij lo Samaria no kaen lo olketa. Wanem nao John duim? Hem askem Jesus sapos hem and brata blo hem James, savve talem fire for kam daon from skae for finisim evriwan lo vilij hia! (Luke 9:52-56) Narataem, John no showimaot love lo olketa nara aposol. Maet hem and James talem mami blo tufala for askem Jesus sapos tufala savve sidaon lo left and raet saed blo Jesus insaed lo Kingdom. Taem olketa nara aposol savve wanem James and John duim, olketa barava kros lo tufala! (Matt. 20:20, 21, 24) Nomata John duim olketa samting hia, Jesus lovem hem.​—John 21:7.

5. Wanem nao bae iumi lanem lo disfala study?

⁵ Lo disfala study, bae iumi lukluk lo example blo John and samfala samting wea hem raetem abaotem love. Datwan bae helpem iumi for lanem hao iumi savve showimaot love lo olketa brata and sista. And tu, bae iumi lanem wanem olketa dadi savve duim for showimaot love lo famili.

6. Wanem nao Jehovah duim wea showimaot hem lovem iumi?

⁶ Maet iumi tingse iumi showimaot love lo pipol taem iumi tingim olketa and talem naes samting lo olketa. Bat iumi shud duim tu olketa gudfala samting for olketa. (Comparem James 2:17, 26.) For example, Jehovah lovem iumi. (1 John 4:19) Hem talem iumi hem lovem iumi lo olketa naesfala toktok lo Bible. (Sams 25:10; Rome 8:38, 39) Bat nara samting wea mekem iumi savve Jehovah lovem iumi hem olketa samting wea hem duim for iumi. John sei: “Love wea God garem for iumi hem showaot taem hem sendem kam spesol Son bilong hem long world mekem iumi savve kasem laef bikos long hem.” (1 John 4:9) Jehovah sendem kam spesol Son blo hem wea safa and dae for iumi. (John 3:16) Diswan mekem iumi sure Jehovah lovem iumi.

7. Wanem nao Jesus duim wea showimaot hem lovem iumi?

 ⁷ Nara example hem Jesus. Hem talem olketa disaepol hem lovem olketa. (John 13:1; 15:15) And hem duim samting wea showimaot hem barava lovem olketa and iumi tu. Jesus sei: “Man wea barava showimaot bigfala love nao hem man wea willing for dae for olketa fren bilong hem.” (John 15:13) Taem iumi ting abaotem samting Jehovah and Jesus duim for iumi, wanem nao bae iumi laek for duim?

8. Wanem nao 1 John 3:18 sei iumi shud duim?

⁸ Iumi showimaot iumi lovem Jehovah and Jesus taem iumi obeyim tufala. (John 14:15; 1 John 5:3) Jesus givim law for iumi lovem each other. (John 13:34, 35) Hem gud for iumi talem olketa brata and sista iumi lovem olketa, and iumi shud duim samting tu for showimaot datwan. (Readim 1 John 3:18.) Wanem nao iumi savve duim wea showimaot iumi lovem olketa brata and sista?

9. Wanem nao John duim from hem lovem pipol?

⁹ John fit for gohed waka lo fishing bisnis blo dadi blo hem and garem selen from datwan. Bat hem disaed for iusim laef blo hem for helpem pipol lane abaotem Jehovah and Jesus. Samfala taem datwan no isi. Pipol persecutim hem and klosap lo end blo first century taem hem olo, hem stap lo prison. (Acts 3:1; 4:1-3; 5:18; Rev. 1:9) Nomata taem John no savve go aot for preach, hem tingim olketa brata and sista. For example, taem hem stap lo Patmos island, hem raetem toktok lo Revelation and sendem datwan lo olketa kongregeson, mekem olketa savve lo “olketa samting wea no longtaem nomoa mas happen.” (Rev. 1:1) Then bihaen John go free from Patmos, hem raet abaotem laef and ministry blo Jesus lo Bible buk John. Hem raetem tu thrifala leta for encouragem and strongim olketa brata and sista. Hao nao iumi savve followim example blo John for lovem pipol?

10. Wanem nao bae showimaot sapos iumi lovem pipol?

¹⁰ Wanem iumi disaed for duim lo laef savve showimaot sapos iumi lovem pipol. Pipol lo world blo Satan bae encouragem iumi for duim samting for iumiseleva, and busy for kasem selen or bignem. Bat pipol blo Jehovah no duim olsem. Olketa busy for preachim gud nius and for teachim pipol abaotem Jehovah, and samfala fit for duim datwan full-taem.

11. Hao nao olketa Christian wea waka full-taem showimaot olketa lovem Jehovah and olketa brata and sista?

¹¹ Staka Christian mas waka full-taem for selen mekem olketa sapotim olketa seleva or famili blo olketa. Nomata olsem, olketa duim samting for sapotim organization blo Jehovah. For example, samfala duim disaster relief waka, samfala waka lo construction, and evriwan savve givim donation for waka raonem world. Olketa duim olsem bikos olketa lovem God and pipol. Olketa showimaot olketa lovem olketa brata from olketa evritaem go lo meeting nomata olketa taed. And olketa givim koment, nomata olketa fraet. And nomata maet olketa garem problem, olketa hapi for spendem taem bifor and bihaen lo meeting for encouragem olketa narawan. (Heb. 10:24, 25) Iumi tinghae lo evri samting wea olketa brata and sista hia duim!

12. Wanem nao narafala wei John showimaot hem lovem olketa brata and sista?

 ¹² John showimaot hem lovem olketa brata and sista taem hem praisem olketa. Bat hem showimaot love tu taem hem kaonselem olketa. For example, lo olketa leta blo John, hem praisem olketa for faith blo olketa and gudfala samting wea olketa duim. Bat hem givim kaonsel tu abaotem sin. (1 John 1:8–2:1, 13, 14) Iumi tu shud praisem olketa brata and sista for gudfala samting wea olketa duim. Bat sapos iumi luksavve eniwan start for garem nogud wei or duim samting wea no stret, iumi showimaot love taem iumi storyim datwan lo hem lo kaenfala wei. Hem no isi for kaonselem wanfala fren, bat Bible sei olketa gudfala fren bae stretem each other.​—Provebs 27:17.

13. Wanem nao iumi shud no duim?

¹³ Nara wei iumi showimaot iumi lovem olketa brata and sista hem taem iumi no duim samfala samting. For example, iumi no kwiktaem feel nogud lo wanem olketa talem. Tingim samting wea happen taem Jesus lo earth. Hem talem olketa disaepol hao man wea kaikaim body blo hem and drinkim blood blo hem bae kasem laef olowe. (John 6:53-57) Wanem hem talem mekem staka disaepol feel nogud and lusim hem. Bat John and olketa nara fren blo Jesus no lusim hem. Olketa no minim wanem Jesus talem and maet olketa seke for herem datwan. Nomata olsem, olketa no tingse Jesus talem samting wea no stret and feel nogud lo hem. Olketa trustim hem bikos olketa savve hem evritaem talem tru samting. (John 6:60, 66-69) Hem important for no kwiktaem feel nogud lo wanem olketa fren blo iumi talem! Bat hem gud for askem olketa for explainim wanem olketa minim.​—Provebs 18:13; Eklesiastes 7:9.

14. Why nao iumi shud no enitaem heitim olketa brata and sista?

¹⁴ John sei tu for iumi no heitim olketa brata and sista. Sapos iumi no followim datfala kaonsel, Satan savve iusim iumi for duim wanem hem laekem. (1 John 2:11; 3:15) Datwan happen lo samfala Christian lo first century C.E. Satan iusim olketa for mekem olketa brata and sista heitim each other and no wan mind. Taem John raetem olketa leta blo hem, samfala  olsem stap insaed olketa kongregeson. For example, lo wanfala kongregeson Diotrephes talem and duim olketa samting for mekem olketa brata heitim each other. (3 John 9, 10) Hem no respectim olketa traveling elder wea governing body sendem kam. Hem no laekem olketa wea welkamim olketa brata hia, and trae for aotem olketa from kongregeson. Datwan barava nogud samting! Distaem tu, Satan no laekem iumi for wan mind and hem trae for spoelem datwan. So iumi laek gohed wan mind and no enitaem heitim olketa brata and sista blo iumi.

15. Wanem nao dadi mas duim for showimaot hem lovem famili?

¹⁵ Taem wanfala dadi provaedem wanem famili needim datwan showimaot hem lovem famili blo hem. (1 Tim. 5:8) Bat hem mas luksavve hem important tu for helpem famili blo hem for fren gud witim Jehovah. (Matt. 5:3) Tingim gudfala example wea Jesus showimaot for olketa dadi. Bible storyim taem Jesus hange lo post and klosap for dae, hem gohed for tingim Mary, mami blo hem. Mary standap witim John front lo Jesus. Nomata Jesus deal witim bigfala pain, hem askem John for lukaftarem mami blo hem. (John 19:26, 27) Hem tru, Jesus garem olketa brata and sista wea fit for lukaftarem Mary, bat luk olsem no eniwan lo olketa kamap disaepol blo Jesus yet. So Jesus chusim John from hem savve John bae provaedem wanem Mary needim, and bae hem encouragem Mary for gohed worshipim Jehovah.

16. Wanem nao samfala responsibility blo John?

¹⁶ Bible storyim John garem staka responsibility. From hem wanfala aposol, hem showimaot example for busy lo preaching waka. Luk olsem maet hem marit tu, so hem mas waka hard for provaedem wanem famili needim and helpem olketa for gohed fren gud witim Jehovah. (1 Cor. 9:5) Wanem nao olketa dadi savve lanem from example blo John?

17. Why nao hem important for dadi lukaftarem spiritual saed blo famili blo hem?

¹⁷ Wanfala brata wea garem famili maet garem staka responsibility. For example, taem hem waka for selen hem bae  duim gud datfala waka bikos datwan hem mekhae lo Jehovah. (Eph. 6:5, 6; Titus 2:9, 10) And maet hem elder tu, so bae hem busy for encouragem olketa brata and sista, and busy lo preaching waka. Nomata olsem, hem important for hem lukaftarem spiritual saed blo waef and pikinini blo hem lo wei for evritaem duim famili worship. Famili bae barava tinghae lo dadi from hem helpem olketa for gohed fren gud witim Jehovah and hem waka hard for provaedem wanem famili needim.​—Eph. 5:28, 29; 6:4.

18. Wanem gud samting nao John kasem?

¹⁸ John laef for longtaem and garem staka interesting experience. Hem kasem staka hard taem wea testim faith blo hem. Bat hem evritaem traem best for obeyim olketa law blo Jesus, olsem for lovem olketa nara Christian. From datwan, Jehovah and Jesus lovem hem and strongim hem for winim olketa hard taem. (John 14:15-17; 15:10; 1 John 4:16) Satan and pipol wea hem iusim no savve stopem John for talem and duim samting for showimaot hem lovem olketa nara Christian.

19. Wanem nao 1 John 4:7 encouragem iumi for duim, and why nao iumi laek for duim datwan?

¹⁹ Iumi tu olsem John wea stap lo world blo Satan, datfala man wea no lovem eniwan. (1 John 3:1, 10) Satan laekem iumi for no lovem olketa brata and sista, bat iumi mas no letem hem for duim datwan. Iumi laek for gohed lovem olketa brata and sista, and showimaot datwan lo wanem iumi talem, and lo wanem iumi duim. Diswan bae mekem iumi hapi from iumi barava insaed lo famili blo Jehovah.​—Readim 1 John 4:7.