1. Jehovä kuyamanqantsikqa, ¿imanö kanapaqtan yanapamantsik?

“DIOSQA kuyakïmi” nir apostol Juan qellqanqampitaqa, imëkatam yachakuyta puëdintsik (1 Juan 4:8). Jehovämi kawëkaqta katsimantsik y pëqa pï mëpitapis mas kuyakoqmi, tsëmi següru y kushishqa sientikuntsik.

2. (1) Mateu 22:37-40 ninqanchöqa, ¿mëqan ishkë mandamientukunatatan mas cäsukunantsik? (2) ¿Imanirtan ishkë kaq mandamientuta cäsukuyqa fäciltsu kanman?

² Diosmi kuyakoq kanapaqqa mandamantsik, manam kikintsiktsu tsëtaqa akrantsik (leyi Mateu 22:37-40). Jehoväqa manam imachöpis pantantsu. Y pëqa noqantsikpaq yarpachakurninmi kuyëpa tratamantsik. Tsëmi Jehoväpita mas yachakurqa, punta kaq mandamientuta cäsukuyqa mas fäcil-lla kanqa. Tsënö kaptimpis, wawqi panintsikkunapis imallachöpis pantaq karnin mana allipa tratamashqa o parlapämashqam, qateqnin kaq mandamientuta cäsukuyqa fäciltsu kanman. Jehoväqa tsëta musyarmi juknintsik juknintsik imanö y imanir kuyanakunapaq kaqta wakin nunakunatawan Bibliachö qellqatsirqan, jukqa apostol Juanmi karqan (1 Juan 3:11, 12).

3. ¿Imata ruranapaqtan Juanqa nirqan?

³ Jutinta apaq librukunachöqa, cristiänukuna kuyanakunapaqmi Juanqa qellqarqan. Mateu, Marcus, Lücas y Juan librukunapitaqa, Juan qellqanqanchömi kuyakuypaq mas parlan. Pëqa 100 watayoqnönam karqan jutin apanqan libruta y kiman cartakunata qellqanqan witsanqa. Tsë qellqanqanchömi rikätsikurqan kuyakur imatapis  ruranapaq kaqta (1 Juan 4:10, 11). Juanqa tiempuwanraqmi kuyakoq këta yachakurqan.

4. Juk kutikunachö Juan mana allita ruranqampita parlakaramuy.

⁴ Jövin karqa Juanqa manam alläpa kuyakoqtsu karqan. Juk kutim Jesuswan qateqninkuna Jerusalenman ëwëkar, Samariapa juk markampa pasëkäyaptin allitsu chaskiyarqan. Tsëmi Juanqa ciëlupita nina urämur tsë nunakunata ushakäratsinanta munarqan (Lüc. 9:52-56). Juk kutichönam wakin apostolkunapaq yarpachakurqantsu. Pëwan wawqin Santiägum, Gobiernunchö Jesus alli cargukunaman churanampaq mamäninta mañakunampaq niyarqan. Tsëta musyëkurqa wakinqa alläpam cölerakuyarqan (Mat. 20:20, 21, 24). Tsëkunachö mana allita rurashqa kaptimpis, Jesusqa pëta kuyarqanmi (Juan 21:7).

5. ¿Imatatan këchö yachakushun?

⁵ Këchöqa Juanpita y kuyakoq këpaq qellqanqankunapitam yachakurishun. Wawqi panintsikkunata imanö kuyanapaq, y familiata dirigeqkuna familiankunata imanö kuyayänampaq kaqtam yachakushun.

6. ¿Imanötan musyantsik Jehovä kuyamanqantsiktaqa?

⁶ Kuyakoq nunaqa manam parlanqanllawantsu kuyakoq kanqanta rikätsikun, sinöqa ruranqankunawanmi (Santiägu 2:17, 26 ninqantawan igualaratsi). Këllaman pensarishun: “Jehoväqa kuyamantsikmi” (1 Juan 4:19). Y kuyakoq kanqantaqa rikätsikun, Bibliachö shumaq palabrakunata qellqatsinqanwanmi (Sal. 25:10; Rom. 8:38, 39). Kuyamanqantsiktaqa rikantsik imëkata ruramunqanwanmi, manam ninqanllawantsu. Juanmi këta qellqarqan: “Këchömi noqantsikpaqqa Diospa kuyakïnin rikakashqa karqan, japallanlla Tsurinta nunakunaman Dios kachamushqa kanqanchö, tsënöpa përëkur noqantsik imëyaqpis kawëta tarinapaq” (1 Juan 4:9). Jehoväqa noqantsikrëkurmi kuyë tsurin sufrinanta y wanunanta permitirqan (Juan 3:16). Tsëmi Pë kuyamanqantsiktaqa alli musyantsik.

7. ¿Imanötan kuyamanqantsikta Jesus rikätsikurqan?

⁷ Jesuspis kuyanqantam qateqninkunata nirqan (Juan 13:1; 15:15). Pëkunata kuyanqantaqa manam shimillapatsu rikätsikurqan, sinöqa pëkunarëkur y noqantsikrëkur ruranqanwanmi. Kënömi  nirqan: “Manam ni pipis këpita mas kuyakoqqa kantsu: pipis amïgunkunarëkur kawëninta qoqpitaqa” (Juan 15:13). Jehoväwan Jesus noqantsikpaq imëkata rurayanqampita, ¿imatatan rurashwan?

8. 1 Juan 3:18 ninqannö, ¿imatatan ruranantsik?

⁸ Jehovätawan Jesusta kuyanqantsiktaqa rikätsikuntsik pëkunata wiyakurmi (Juan 14:15; 1 Juan 5:3). Y Jesusqa, juknintsik juknintsik kuyanakunapaqmi mandamarqantsik (Juan 13:34, 35). Wawqi panintsikkunata kuyanqantsiktaqa manam shimillapatsu rikätsikuntsik, sinöqa pëkunapaq ruranqantsikwanmi (leyi 1 Juan 3:18). Peru, ¿imakunatatan pëkunapaq rurashwan?

9. ¿Imatatan apostol Juan rurarqan kuyakoq karnin?

⁹ Juanqa papäninwan quedakur y pescäduta rantikur atska qellëta gananampa rantinmi, llapan kawëninwan Jehoväpita y Jesuspita rasumpa kaqta nunakunata yachatsirqan. Tsënö kawakuyqa manam fäciltsu karqan. Diospita yachatsikunqanrëkurmi chikiyarqan y edäyashqana këkaptimpis juk lädumanmi qarquyarqan (Hëch. 3:1; 4:1-3; 5:18; Rev. 1:9). Jesuspita yachatsikunqanrëkur carcelarëkarpis Juanqa cristiänu mayinkunapaq yarpachakunqantam rikätsikurqan. Këman yarpärishun, Patmus islachö këkarmi Jehovä musyatsinqanta qellqarqan y congregacionkunamanmi apatsirqan ichikllachöna ima pasanampaq kaqta musyayänampaq (Rev. 1:1). Tiempu pasariptinnam tsë islapita yarqamurqan, tsëpitanam kawënimpita y Jesus yachatsikunqampita qellqarqan. Y congregacionchö wawqi panikunata yanapanampaqmi kima cartakunata qellqarqan. Noqantsikpis apostol Juannö ruranapaqqa, ¿imatan yanapamäshun?

10. ¿Imanötan rikätsikushwan nunakunata kuyanqantsikta?

¹⁰ Nunakunata kuyanqantsiktaqa rikätsikuntsik imata ruranapaq akranqantsikwanmi. Satanaspa munëninta ruraq nunakunaqa tiempuntsikta y kallpantsikta rïcu kanapaq y reqishqa kanapaq utilizänatam munayan. Tsënö kaptimpis entëru Patsachömi Diosta mëtsikaq sirweqkunaqa llapan puëdiyanqanmannö nunakunata Jehoväpita yachëkätsiyan. Wakinqa llapan tiempunkunawanmi yachatsikuykäyan.

11. ¿Imanötan mëtsikaq wawqi panintsikkuna Jehoväta y wawqi paninkunata kuyayanqanta rikätsikuyan?

¹¹ Diosta mana dejëpa sirweq mëtsikaq cristiänukunam familiankunata manteniyänampaq llapan junaqkuna trabajayan. Tsënö karpis wawqi panikunata yanapayänampaqmi imëkata rurayan. Wakinqa desgraciakuna pasanqanchömi yanapakuyan. Wakinnam Diosta adorana wayikunata rurayan. Y llapantsikmi qellënintsikwan yanapakuyta puëdintsik. Tsënömi Diosta y wawqi panikunata kuyayanqanta rikätsikuyan. Peru manam tsëllatsu, wawqi panintsikkunata kuyanqantsiktaqa rikätsikuntsik pishipashqa këkarpis cada semäna reunionkunaman ëwar, mantsakuykarpis reunionchö parlakurnin y imëka problëmayoq këkarpis reunion manaraq qallaptin y ushariptin wawqi panintsikkunawan parlakurmi (Heb. 10:24, 25). Alläpam agradecikuntsik kuyashqa wawqi panintsikkuna tsëta rurayanqampita.

12. ¿Imanö mastan apostol Juanqa cristiänu mayinkunata kuyanqanta rikätsikurqan?

 ¹² Apostol Juanqa cristiänu mayinkunata kuyanqanta rikätsikurqan rurayanqankunapita parlaparnin y consejarninmi. Këllaman pensarishun cartakunqanchöqa Diosman confiakuyanqampita y alli kaqta rurayanqampitam felicitarqan. Tsënö karpis jutsa rurëpita alli cuidakuyänampaqmi consejarqan (1 Juan 1:8-2:1, 13, 14). Tsënöllam noqantsikpis wawqi panintsikkunataqa alli rurayanqampita shumaq parlapärishwan. Tsënö kaptimpis wawqi panintsikkunata mana allita rurëkaqta rikarninqa kuyarninmi consejanantsik. Tsëta ruranapaqqa valientim kanantsik. Bibliachöqa alli amïgukuna consejanakuyanqantam nin (Prov. 27:17).

13. ¿Imatatan rurashwantsu?

¹³ Wawqi panintsikkunata kuyanqantsiktaqa rikätsikuntsik, llakitsinqankunata mana rurar y mana allita parlayanqampita raslla mana cölerakurmi. Jesus wanunampaq ichikllana pishikaptin ima pasakunqanman pensarishun. Pëmi qateqninkunata nirqan, ëtsanta mikur y yawarninta upur-raq imëyaqpis kawayänampaq kaqta (Juan 6:53-57). Jesus tsënö ninqanta wiyarmi wakinkunaqa mantsakarnin ëwakuyarqan. Peru Juan y wakin kaq amïgunkunaqa, mana entiendir y mantsakashqa këkarpis, Jesustaqa manam dejayarqantsu. Tsënö karpis, manam Jesus pantashqa kanqanta pensartsu cölerakuyarqan, Jesus rasumpa kaqllata parlaptinmi pëman confiakuyarqan (Juan 6:60, 66-69). Manam wawqi panintsikkuna parlayanqampitaqa raslla cölerakushwantsu. Tsëpa rantinqa imanir tsë pasakunqampitam shumaq parlashwan (Prov. 18:13; Ecl. 7:9).

14. ¿Imanirtan wawqi panintsikkunata chikishwantsu?

¹⁴ Apostol Juanqa wawqi panintsikkunata mana chikinapaqpis nirqanmi, tsëta mana cäsukurqa Satanas munanqantam rurëkashwan (1 Juan 2:11; 3:15). Tsëmi pasarqan apostolkuna kawayanqan witsan cristiänukunawampis. Satanasqa Diospa sirweqninkuna chikinakur rakikäyänampaqmi imëkata rurarqan. Tsëmi Juan cartakunqan witsanqa congregacionkunachöpis, Satanas pensanqannö  pensaqkuna yuriyarqanna. Jukqa karqan Diotrefesmi, pëqa congregacionchö wawqi panikuna chikinakur rakikäyänampaqmi imëkata rurëkarqan. Congregacionkunata watukaq mandayanqan wawqi panikunatapis manam respetaqtsu. Orgullösu karmi, pë chikinqan kaqkunata alli tratayaptin congregacionpita wawqi panikunata qarquyta munarqan (3 Juan 9, 10). Kanan witsampis Satanasqa imëkanöpam rakikätsimënintsikta munan. Tsëqa, ama imëpis chikinakur rakikäshuntsu.

15. Familianta rikaq nunakunaqa, ¿imatatan yarpäyänan?

¹⁵ Familianta kuyaq nunaqa, Familian necesitanqampaqmi trabajan (1 Tim. 5:8). Peru masqa familianta Bibliapita yachatsinampaqmi yarpachakunan (Mat. 5:3). Familiankunata dirigeqkuna Jesuspita imata yachakuyanqanta rikärishun. Juan libruchö qellqarëkanqannöpis, qeruchö warkurëkarpis mamäninmanqa yarparëkarqanllam. Warkurëkanqan sitiuchömi, Juanwan Jesuspa mamänin Marïaqa këkäyarqan. Pëqa alläpa sufrikarnimpis, mamäninta cuidanampaqmi Juanta nirqan (Juan 19:26, 27). Marïapa juk kaq wamrankunaqa pëta cuidayanmanchi karqan. Peru tsë witsanyaqqa, manachi Jesuspa qateqninqa ni mëqampis kayarqantsu. Tsëmi Jesusqa necesitanqankunachö y Jehoväta sirwir sïguinampaq mamanta yanapayänampaq segurakurqan.

16. ¿Ima rurëkunayoqtan apostol Juan karqan?

¹⁶ Juanqa imëka rurëyoqmi karqan, apostol karmi Diospita yachatsikuychöqa punta puntachö karqan. Y itsachi casädu karqan, tsënö kaptinqa familianta manteninampaq y Diospita yachatsinampaqchi kallpachakurqan (1 Cor. 9:5). ¿Imatatan familianta rikaqkuna pëpita yachakuyanman?

17. Familianta rikaq nunakunaqa, ¿imanirtan Diospita familiankunata yachatsiyänampaq kallpachakuyänan?

¹⁷ Familianta rikaq nunakunapis imëka rurëyoqmi kayan. Alli trabajaqmi kayänan, tsënöpam Jehoväpita alli parlayanqa (Efes. 6:5, 6; Tïtu 2:9, 10). Y congregacionchö carguyoq karqa, wawqi panikunatam watukayänan y Diospita  yachatsikurnimpis punta puntachömi kayänan. Jina warminwan y wamrankunawan Bibliata estudiayänampaqmi kallpachakunan. Familiankunaqa llapan necesitäyanqanchö y Diospa kaqchö yachatsiyanqampitam agradecikuyanqa (Efes. 5:28, 29; 6:4).

18. ¿Imapitatan Juanqa següru këkarqan?

¹⁸ Juanqa mëtsika watakunam kawarqan y imëka mana allikunapam pasarqan. Itsa tsërëkurqa Diosman yärakuyta o markäkïta dejarinman karqan. Peru Juanqa, cristiänu mayinkunata kuyanampaq mandakuyta wiyakunqannöllam, Jesus llapan mandakunqanta wiyakunampaqpis kallpachakurqan. Tsëmi Juanqa, Jehoväwan Jesus kuyayanqanta y tsarakur sïguinampaq kallpayoqta tikratsinampaq kaqta següru këkarqan (Juan 14:15-17; 15:10; 1 Juan 4:16). Cristiänu mayinkunata ninqanwan y ruranqanwan kuyanqanta rikätsikunampaqqa, manam Satanas ni chikeqnin nunakunapis Juanta michëta puëdiyarqantsu.

19. ¿Imata ruranapaqtan 1 Juan 4:7 yanapamantsik? Y ¿imanirtan tsëta rurashwan?

¹⁹ Apostol Juannöllam, chikinakuyanqan y Satanas gobernanqan munduchö kawantsik (1 Juan 3:1, 10). Pëqa wawqi panintsikkunawan chikinakunantsiktam nunan. Peru tsëtaqa logranqa shonquntsikman yëkamunanta dejashqallam. Tsëqa parlanqantsikwan y ruranqantsikkunawan wawqi panintsikkunata kuyanqantsikta rikätsinapaq churapakäshun. Tsëta rurarqa Jehoväpa familian kanqantsikta musyarmi kushishqa kawakushun (leyi 1 Juan 4:7).