1. Eaa toou manako no runga i to Iehova aroa?

“KO TE Atua oki te aroa,” i tata ei te apotetoro ko Ioane. (1 Ioa. 4:8) Te akakite maira teia i te tuatua mou puapinga: Ko te Atua oki te Tumu o te ora, koia katoa te Tumu o te aroa. Te aroa maira a Iehova ia tatou! Ka paruru, ka mataora, e ka merengo tatou i roto i tona aroa.

2. Ia Mataio 22:37-40, eaa te nga akaueanga maata rava atu, e eaa ka ngatā ei ia tatou i te akono i te rua o te akaueanga?

² No te au Kerititiano, kare ratou e iki me ka akaari ratou i te aroa e me kare. E akaueanga te reira. (E tatau ia Mataio 22:37-40.) Me kite tatou ia Iehova, ka māmā i reira ia tatou i te akono i te akaueanga mua. No te mea e apa kore a Iehova; te manako maira aia e ka akono marū aia ia tatou. Inara, penei ka ngatā ia tatou i te akono i te rua o te akaueanga. Eaa te tumu? No te mea e tu apa ua to te au taeake e te au tuaine—to tatou tangata tupu vaitata tikai. I tetai au taime, penei ka tuatua ratou i tetai au tuatua tarevake e ka rave i tetai au apinga taukore. Kua kite a Iehova e ka tupu teia kia tatou, no reira kua akauru aia i tetai aronga tata Pipiria kia apii ia tatou i te tumu ka akaari ei tatou i te aroa ki tetai e tetai, e akapeea me rave i te reira. Ko Ioane tetai o teia aronga tata.​—1 Ioa. 3:11, 12.

3. Eaa ta Ioane i akakite putuputu no runga i te aroa?

³ I roto i tana puka, kua akakite putuputu a Ioane ki te au Kerititiano kia akaari i te aroa. Te tataanga aia no runga i te oraanga o Iesu, e maata atu ta Ioane taangaanga anga i te tuatua “aroa” e te “akaperepere” i ta Mataio, Mareko e Luka. E tai anere o Ioane mataiti i tata ei aia i tana puka e tana au reta e toru. Akaari mai tana au tataanga akauruia e kia riro te aroa i te akakeu i ta tatou  ka rave. (1 Ioa. 4:10, 11) Inara, kua pou ia Ioane tetai tuatau i te apii i te reira.

4. Kua akaari ua ana rai a Ioane i te aroa ki etai ke?

⁴ I to Ioane mapu anga, kare aia i akaari ua ana i te aroa. Ei akaraanga, i tetai atianga, kua aere a Iesu e tana au pipi na roto ia Samaria ki Ierusalema. I Samaria kare te tangata i āriki mai ana ia ratou. Eaa ta Ioane i rave? Kua pati aia kia Iesu kia akatopa mai i te ai no runga i te rangi e kia takore i te au tangata i roto i tera oire! (Luka 9:52-56) I tetai akaou atianga, kare a Ioane i akaari ana i te aroa ki tona au oa apotetoro. Kua akakeu aia e tona teina ko Iakobo i to raua metua vaine kia pati kia Iesu kia oronga i te taoonga teitei kia raua i roto i te Patireia. Te akarongo anga te au apotetoro i ta Iakobo e Ioane i rave, kua kiia ratou te riri! (Mata. 20:20, 21, 24) Inara, noatu te au tarevake ta Ioane i rave, kua akaperepere rai a Iesu iaia.—Ioa. 21:7.

5. Eaa ta tatou ka akamanako i roto i teia apii?

⁵ I roto i teia apii, ka akamanako tatou i to Ioane akaraanga e tetai au apinga tana i tata no runga i te aroa. E ka apii tatou akapeea me akaari i te aroa ki to tatou au taeake e te au tuaine. Ka apii katoa tatou i tetai ravenga puapinga kia akaari te pu ngutuare i te aroa ki tona ngutuare tangata.

6. Akapeea a Iehova te akaari anga mai i tona aroa no tatou?

⁶ Penei e manako ana tatou e ka akaari ua tatou i te aroa na roto i te au tuatua meitaki. Inara ko te aroa tika tikai, kia turuia te reira ki ta tatou ka rave. (Akaaite kia Iakobo 2:17, 26.) Ei akaraanga, te aroa maira a Iehova ia tatou. (1 Ioa. 4:19) E te akakite maira aia i tona aroa na roto i te au tuatua manea tei tataia i roto i te Pipiria. (Sala. 25:10; Roma 8:38, 39) Ka papu ia tatou e te aroa maira te Atua ia tatou na roto i tana tuatua e tana ka rave. Tata a Ioane: “Kua kitea to te Atua aroa ia tatou nei, koia i tono mai i tana Tamaiti anau tai ki te ao nei, kia ora tatou iaia.” (1 Ioa. 4:9) Kua oronga mai a Iehova i tana tamaiti kia tamamaeia e kia mate no tatou. (Ioa. 3:16) Kare e ekoko e te aroa maira a Iehova ia tatou.

7. Eaa ta Iesu i rave no te akapapu i tona aroa no tatou?

⁷ Akakite a Iesu ki tana au pipi e te aroa ra aia ia ratou. (Ioa. 13:1; 15:15) Kua akapapu aia i tona aroa no ratou e no tatou, kare ua na roto i tana i tuatua, mari ra na roto katoa i tana i rave. “Kia oronga  te tangata i tona uaorai ora no tona au taunga,” i karanga ai a Iesu, “kare rava e tangata aroa maata atu i te reira.” (Ioa. 15:13) Me akamanako tatou i ta Iehova e ta Iesu i rave no tatou, eaa i reira ta tatou ka rave?

8. Eaa ta 1 Ioane 3:18 e akakite maira kia rave tatou?

⁸ Ka akaari tatou i te aroa no Iehova e no Iesu na te akarongo anga kia raua. (Ioa. 14:15; 1 Ioa. 5:3) Kua akaue mai a Iesu ia tatou kia aroa tatou ia tatou uaorai. (Ioa. 13:34, 35) Kare ua tatou e akaari i te aroa ki te au taeake e te au tuaine na roto i te tuatua, mari ra kia akaari katoa i te reira na roto i ta tatou ka rave. (E tatau ia 1 Ioane 3:18.) Eaa ta tatou ka rave kia akapapu i to tatou aroa no ratou?

9. Eaa ta te aroa i akakeu ia Ioane kia rave?

⁹ Ka rauka ia Ioane i te angaanga ki tona metua tane e kia puapingaia ta ratou angaanga tautai. Inara, kua akaatinga aia i te toenga o tona oraanga no te tauturu i tetai ke kia kite ia Iehova e Iesu. Ko teia oraanga ta Ioane i iki, kare i te mea māmā. Kua takinga kinoia aia, e i te openga o te anere mataiti mua i tona ruaine anga, kua akaateaia aia ki tetai enua ke. (Anga. 3:1; 4:1-3; 5:18; Apo. 1:9) I roto i te are auri, kua akapapu a Ioane i tona aroa no etai ke. Ei akaraanga, i te enua ko Patamo, kua tata aia i te orama tei orongaia kiaia, e kua tuku atu ki te au putuputuanga kia kite ratou i te au mea i “vaitata i te tupu.” (Apo. 1:1) Muri ake i tona tukuia anga mai ki vao i te are auri i Patamo, kua tata a Ioane i tana puka no te oraanga e te angaanga orometua a Iesu. Tata katoa aia e toru reta no te akamaroiroi e te akamatutu i te au taeake e te au tuaine. Akapeea koe me aru i to Ioane oraanga akaatinga?

10. Akapeea koe me akaari i toou aroa no te tangata?

¹⁰ Ka rauka ia koe te akaari i toou aroa no te tangata na te ikianga i taau ka rave. Inangaro nei to Satani akatereanga kia akapou koe i toou taime e te maroiroi ki runga ia koe uaorai, kia maata taau moni me kore kia rongonui koe. Inara, te akapou nei te au Kerititiano takapini i te ao i to ratou taime no te tutu aere i te nuti meitaki e te tauturu i te tangata kia akavaitata kia Iehova. Kua rauka i tetai pae i te tavini tamou i roto i te angaanga tutu aere e te apii.

11. Akapeea te au papuritia tiratiratu me akaari to ratou aroa no Iehova, te au taeake e te au tuaine?

¹¹ E maata te au Kerititiano tiratiratu e angaanga moni nei no te akono ia ratou uaorai e to ratou ngutuare. Noatu te reira, te turuturu ra ratou i ta te Atua akaaerenga na te au ravenga ka rauka ia ratou. Ei akaraanga, kua rauka i tetai pae i te tauturu i te au angaanga tauturu tumatetenga, ko tetai pae i roto i te au angaanga patu are, e ka rauka i te katoatoa i te oronga i te moni tauturu no te au angaanga i teianei ao. Kua rave ratou i teia no to ratou aroa i te Atua e no te tangata. I te au epetoma ravarai, ka akaari tatou i te aroa no te au taeake e te au tuaine na te aere anga ki te au uipaanga putuputuanga e te paupau i reira. Noatu to tatou roiroi, ka aere rai tatou ki te au uipaanga e me te ru ra tatou, ka paupau rai tatou. Me e au manamanata to tatou, ka akamaroiroi tatou i tetai ke i mua  ake e i muri ake i te uipaanga. (Ebe. 10:24, 25) Kia akameitaki tatou i ta te au taeake e rave ra!

12. Akapeea a Ioane te akaari anga i te aroa no te au taeake e te au tuaine?

¹² Kua akaari a Ioane i tona aroa no te au taeake e te au tuaine na te akameitakianga e te akoanga ia ratou. Ei akaraanga, i roto i tana au reta, kua akameitaki a Ioane i te au taeake no to ratou akarongo e te angaanga meitaki, e kua oronga aia i tetai akoanga pakari no runga i te ara. (1 Ioa. 1:8–2:1, 13, 14) Mei te reira rai, ka anoanoia tatou kia akameitaki i te au taeake no te angaanga meitaki ta ratou e rave ra. Inara me kite tatou i tetai e akaari ra i tetai tu me kore peu te ka takino i tona pirianga kia Iehova, ka akaari tatou i te aroa na te ako anga marū iaia. Ka anoanoia te tu ngakau toa no te rave i teia, no reira te Pipiria i karanga ai e ka akakina me kore ka akatikatika te au oa meitaki i tetai.​—Mase. 27:17.

13. Eaa ta tatou ka kopae i te rave?

¹³ Tetai taime, ka akaari tatou i te aroa ki te au taeake e te au tuaine na roto i te au mea kare tatou e rave. Ei akaraanga, kare tatou e viviki i te riri no ta ratou ka tuatua mai. Akamanako ana i tei tupu i te tuatau openga o to Iesu oraanga i te enua nei. Akakite aia e ka rauka i tana au pipi te ora mutu kore me kai ratou i tona kopapa e te inu i tona toto. (Ioa. 6:53-57) E tuatua rikarika teia ki te maataanga e kua akaruke ratou—inara kua aru tiratiratu tona au oa mou tikai iaia, pera katoa a Ioane. Kare ratou i mārama i ta Iesu tuatua e penei kua poitirere ratou i te reira. Kare to Iesu au oa tiratiratu i manako ana e kua tarevake tana tuatua, e kare ratou i riri ana. Kua irinaki e kua kite ratou e e tuatua mou tana. (Ioa. 6:60, 66-69) No reira auraka tatou e viviki i te riri i te au tuatua a to tatou au oa! Mari ra, e oronga kia ratou i tetai atianga kia akamārama i ta ratou tuatua.​—Mase. 18:13; Kohe. 7:9.

14. Eaa te tumu kare tatou e makitakita i te au taeake e te au tuaine?

¹⁴ Akamaroiroi katoa mai a Ioane auraka tatou e makitakita i to tatou au taeake e te au tuaine. Me kare tatou e akarongo ki teia ako, te tuku ra tatou ia  Satani kia akatere ia tatou. (1 Ioa. 2:11; 3:15) Kua tupu ana teia ki tetai pae i te openga o te anere mataiti mua T.N. Kua tauta a Satani i te akatupu i te ke e te tu makitakita i rotopu i te au tavini o te Atua. Te tuatau i tata ai a Ioane i tana au reta, kua kitea ia mai e kua aite te manako o tetai pae ki to Satani. Ei akaraanga, kua akatupu a Dioterepe i tetai akatakakeanga i roto i tetai putuputuanga. (3 Ioa. 9, 10) Kare aia i akangateitei i te aronga pakari tei tonoia mai e te pupu akaaere. Kua tauta katoa aia i te akaatea i te aronga tei āriki ia ratou. E tu kino tikai tona! Te tauta pakari nei rai a Satani i te akatupu i te ke i roto i te iti tangata o te Atua i teia tuatau. No reira auraka rava e tuku i te tu makitakita kia akatakake ia tatou.

15. Eaa ta te au pu ngutuare ka akamaara?

¹⁵ Tetai ravenga puapinga no te pu ngutuare kia akaari i te aroa no tona ngutuare koia oki na te akono anga i to ratou au anoano pae kopapa. (1 Timo. 5:8) Ka akamaara ra aia, e puapinga ake kia akonoia to ratou au anoano pae vaerua. (Mata. 5:3) Akamanako ana i te akaraanga ta Iesu i akanoo no te au pu ngutuare. Ia Iesu i runga i te rakau tamamaeanga, te manako ra rai aia i tona ngutuare tangata. Te tu ra a Ioane i te pae ia Maria, te metua vaine o Iesu. I roto i tona turanga mamae tikai, kua pati a Iesu kia Ioane kia akono ia Maria. (Ioa. 19:26, 27) Kare e ekoko e ka rauka i to Iesu au teina e te tuaine i te akono ia Maria i te pae kopapa. Inara, kua inangaro a Iesu kia akonoia a Maria i te pae kopapa e te pae vaerua.

16. Eaa te au apainga a Ioane?

¹⁶ E maata ta Ioane au apainga. Ei apotetoro, kua maroiroi aia i roto i te angaanga tutu aere. E penei kua akaipoipo aia, e ka anoanoia aia kia akono i tona ngutuare tangata i te pae kopapa e te pae vaerua. (1 Kori. 9:5) Eaa te apiianga no te au pu ngutuare i teia tuatau?

17. Eaa ra i puapinga ai no te au pu ngutuare kia akono i to ratou ngutuare i te pae vaerua?

¹⁷ Tetai taeake e akono ra i tona ngutuare, penei e maata tana apainga puapinga. Ei akaraanga, ka anoanoia aia kia  angaanga pakari i ko i tana ngai angaanga e kia riro tona tu ei akapaapaa ia Iehova. (Ephe. 6:5, 6; Tito 2:9, 10) E penei e au apainga tana i roto i te putuputuanga, mei te akamaroiroi e te akono anga i te au taeake e te au tuaine, e te rave anga i te angaanga orometua. Pera katoa, e mea puapinga kia apii putuputu aia i te Pipiria ki tana vaine e te tamariki. Ka rekareka maata ratou i tana tauta anga kia akono ia ratou i te pae kopapa, te pae ngakau, e te pae vaerua.​—Ephe. 5:28, 29; 6:4.

18. Eaa ta Ioane i papu?

¹⁸ Kua tavini a Ioane no tetai tuatau roa e e maata katoa tana i rave. Kua tupu te au manamanata tukeke kiaia te ka akaparuparu i tona akarongo. Inara kua tauta ua rai aia i te akono i ta Iesu akaueanga, kia aroa i te au taeake e te au tuaine. Kua papu ia Ioane e te aroa maira a Iehova e Iesu iaia, e ka oronga mai i te maroiroi kia akakoromaki i te au manamanata. (Ioa. 14:15-17; 15:10; 1 Ioa. 4:16) Kare i rauka ia Satani e tana akatereanga i te tāpu ia Ioane kia akaari i te aroa no te au taeake e te au tuaine i roto i tana tuatua e tana i rave.

19. Eaa ta 1 Ioane 4:7 e akamaroiroi maira ia tatou kia rave, e no teea ra?

¹⁹ Mei ia Ioane rai, te noo nei tatou i roto i to Satani ao, te atua aroa kore o teia akatereanga. (1 Ioa. 3:1, 10) Inangaro ra aia ia tatou kia kore e akaari i te aroa no te au taeake e te au tuaine, inara kare tatou e akatika ki te reira. No reira kia tauta tatou i te aroa i to tatou au taeake e te au tuaine na roto i ta tatou tuatua e ta tatou ka rave. Me akaari tatou i tera aroa, ka riro tatou ei tuanga no to Iehova ngutuare e ka mataora to tatou oraanga.​—E tatau ia 1 Ioane 4:7.