1. Sar osetinaja amen sebepi e Devleso mangipe?

„O DEVEL tano mangipe“, pisinđa o apostol Jovan (1. Jov. 4:8). Akija jednostavno izjava podsetini amen ki jekh važno buti: Ando Devel avela o đivdipe, ama Olestar avela hem o mangipe. O Jehova mangela amen! Sebepi oleso mangipe, amen osetinaja so hijam bezbedna, bahtale hem zadovoljna.

2. Premalo Matej 22:37-40, kola tane o duj najbare zapovestija hem sose podijekh puti šaj te ovel amenđe pharo te ićera amen ki dujto zapovest?

² O hrišćanija našti te birinen da li ka mothoven mangipe ja na. Odija tani zapovest. (Čitin Matej 22:37-40.) Ked šukar ka penđara e Jehova, na ka ovel amenđe pharo te ićera amen ki prvo zapovest. Odova tano sose o Jehova tano savršeno. Ov brinini pe amendar hem šukar tano premalo amende. Ama, šaj te ovel amenđe pharo te ićera amen ki dujto zapovest. Sose? Sose amare phralja hem phenja, kola tane maškaro okola kola tane amenđe najpaše, tane nesavršena. Podijekh puti, šaj te phenen ili te ćeren diso so ka povredini amen. O Jehova đanđa so ka ovel amen asavko izazov. Odolese, ov pe duhoja vodinđa e manušen kola pisinđe i Biblija, te pisinen ando odova kobor tano važno te mothova mangipe jekh jekhese hem sar šaj te ćera odova. Jekh ando odola piscija hine o Jovan (1. Jov. 3:11, 12).

3. So o Jovan pisinđa ando mangipe?

 ³ Ando sa so pisinđa, dikhaja so o Jovan vaćerđa ando odova kobor tano važno o hrišćanija te mothoven mangipe. Ked pisinđa ando e Isuseso životi, o Jovan ko po jevanđelje koristinđa o lafija „mangipe“ hem „te mangen“ pobuter nego o piscija ando avera trin jevanđelja. O Jovan hine le oko šel berš ked pisinđa po Jevanđelje hem avera pe trin lila. Sa so ov pisinđa mothovi amenđe so o mangipe mora te ovel glavno motiv aso sa o buća kola ćerena o hrišćanija (1. Jov. 4:10, 11). Ama, e Jovanese valjanđa vreme te bi sikljola odova.

4. Da li o Jovan uvek mothovđa mangipe?

⁴ Ked o Jovan hine terno, ov na mothovđa uvek mangipe. Ki jekh situacija, ov propovedinđa e Isuseja, hem avere apostolencar, đi putujinđe ko Jerusalim prekali Samarija. O manuša ando jekh gav ki Samarija na manglje te ugostinen len. Sar o Jovan reagujinđa? Ov hem oleso phral manglje te vićinen i jag ando nebo te uništini odova celo gav! (Luka 9:52-56). Ki jekh aver situacija, o Jovan na mothovđa mangipe premalo avera apostolija. Ov hem oleso phral, rodinđe andi pi daj te pućel e Isuse te bešen uzalo leste ko Kraljevstvo. Ked avera apostolija šunđe so rodinđe o Jovan hem oleso phral, but holjanđe! (Mat. 20:20, 21, 24). Ama, iako o Jovan hine le pe mane, o Isus ipak manglja le (Jov. 21:7).

5. Sostar ka vaćera ko akava članko?

⁵ Ko akava članko ka vaćera ando e Jovaneso primer hem ka osmotrina disave buća kola pisinđa ando mangipe. Ka dikha sar šaj te mothova mangipe premalo amare phralja hem phenja. Hem ka osmotrina sar jekh poglavari šaj te mothovi so mangela pe porodica.

6. Sar o Jehova mothovđa so mangela amen?

⁶ But manuša mislinena so o mangipe tano samo jekh šužo osećanje kova mothovi pe šuže lafencar. Ama, o ćaćutno mangipe mora te mothovi pe hem delijencar (Uporedin e stihonencar andi Jakovljeva 2:17, 26). Na primer, o Jehova mangela amen (1. Jov. 4:19). Oleso mangipe dićhola ko šuže lafija kola tane pisime ki Biblija (Ps. 25:10; Rimlj. 8:38, 39). Ama, amen hijam uverime so o Devel mangela amen na samo sebepi odova so phenela, nego hem sebepi o buća kola ćerela. O Jovan pisinđa: „O Devel mothovđa mangipe premalo amende ađahar so bićhalđa pe jedinobijande Ćhave ki phuv te bi prekalo leste dobinaja životi“ (1. Jov. 4:9). O Jehova dozvolinđa oleso Ćhavo te patini  hem te merel sebepi amaro (Jov. 3:16). Ćaće, nane amen nijekh razlog te sumnjina so o Jehova mangela amen.

7. Sar o Isus mothovđa so mangela amen?

⁷ O Isus but putija phenđa pe učenikonenđe so mangela len (Jov. 13:1; 15:15). Kobor but manglja len, o Isus na mothovđa samo lafencar već hem delijencar. „Nane pobaro mangipe ando okova“, phenđa o Isus, „ked neko dela po životi aso pe amala“ (Jov. 15:13). Ko so valjani te ova podstaknime ked razmislinaja ando odova so o Jehova hem o Isus ćerđe amenđe?

8. Premali 1. Jovanova 3:18, so valjani te ćera?

⁸ Ked hijam poslušna e Jehovase hem e Isusese, amen mothovaja so mangaja len (Jov. 14:15; 1. Jov. 5:3). O Isus zapovedinđa amenđe te manga jekh jekhe (Jov. 13:34, 35). Amaro mangipe premalo amare phralja hem phenja na valjani te mothova samo lafencar već hem delijencar. (Čitin 1. Jovanova 3:18.) Kola tane disave buća kola šaj te ćera te bi mothovaja mangipe premalo lende?

9. Ko so o mangipe podstakninđa e Jovane?

⁹ O Jovan šajinđa te aćhol pe dadeja hem te zaradini aso životi ađahar so bi astari maćhen. Umesto odova, ov koristinđa po životi te bi pomožini averenđe te sikljon o ćaćipe ando Jehova hem o Isus. O životi kova o Jovan birinđa na hine lokho. Ov hine progonimo, hem ko krajo ando prvo veko ked već hine phuro, đelo ko izgnanstvo (Dela 3:1; 4:1-3; 5:18; Otkr. 1:9). Čak đi hine ko phanlipe sebepi so propovedinđa ando Isus, o Jovan mislinđa upro avera. Na primer, đi hine ko ostrvo Patmos, ov pisinđa o otkrivenje kova dobinđa hem bićhalđa le e skupštinenđe te bi đanena „so pana hari ka desini pe“ (Otkr. 1:1). Tegani, palo odova so hine oslobodimo ando Patmos, o Jovan pisinđa po jevanđelje ando Isuseso životi hem andi olesi služba. Ov pisinđa hem trin lila kola ohrabrinđe hem zorjaćerđe e phralen hem e phenjen. Sar šaj te ove samopožrtvovano sar o Jovan?

10. Sar šaj te mothove so mangeja e manušen?

¹⁰ Tu šaj te mothove so mangeja e manušen ked birineja so ka ćere ko to životi. E Satanaso sveto mangela te ćhivel tut te trošine sa to vreme hem sa ti snaga upro tute ađahar so ka trudine tut te zaradine so pobuter pare hem te ove penđardo. Ki aver strana, o samopožrtvovana objaviteljija, ko prvo than ćhivena o propovedibe andi šukar vest hem odova te pomožinen averenđe te oven pana popaše e Jehovaja. Disave olendar čak punovremeno propovedinena hem sikavena e manušen.

11. Sar disave objaviteljija mothovena so mangena e Jehova hem e phralen hem e phenjen?

¹¹ But amare phralja hem phenja mora celo dive te ćeren buti te šaj on hem olengi porodica te ovel len sa so valjani lenđe. Ama, on dena sa pestar te bi podržinena e Devlesi organizacija. Na primer, disave olendar pomožinena ked ovela dijekh prirodno katastrofa, avera ćerena buti ki gradnja, a sare dena dobrovoljna prilogija hem podupirinena o propovedibe ko celo sveto. Sa odova, on ćerena sebepi so mangena e Devle hem pe pašutnen. Ked svako kurko đaja ko amare sastankija hem učestvujinaja ko program, amen mothovaja so mangaja amare phralen. Redovno đaja ko sastankija iako hijam umorna. Komentarišinaja iako isi amen trema. Hem iako svako amendar isi le problemija, hrabrinaja jekh jekhe angleder  hem palo sastanko (Jevr. 10:24, 25). But hijam zahvalna aso sa so ćerena amare phralja hem phenja!

12. Ko kova pana način o Jovan mothovđa so mangela pe phralen hem pe phenjen?

¹² O Jovan mothovđa so mangela pe phralen hem pe phenjen na samo ađahar so pohvalinđa len, nego hem ađahar so savetujinđa len. Na primer, ko pe poslanice, o Jovan pohvalinđa len asi olengi vera hem aso olenge šukar delija, ama hem upozorinđa len ko greh (1. Jov. 1:8–2:1, 13, 14). Hem amen valjani te pohvalina e phralen hem e phenjen aso šukar buća kola ćerena. Ama, ako neko olendar počmini te razvijini dijekh lošno stav ja navika, amen taktično ka vaćera olencar odolestar hem ko asavko način ka mothova so mangaja len. Valjani amenđe hrabrost te bi daja savet amare amalese, ama i Biblija phenela so o prava amala oštrinena jekh jekhe, ili avere lafencar ispravinena jekh jekhe (Posl. 27:17).

13. So na valjani te ćera?

¹³ Disavo puti, odoleja so na ćeraja disave buća, šaj te mothova so mangaja amare phralen hem phenjen. Na primer, na ka holjana sigate ako phenena diso so na sviđini pe amenđe. Dikhen so ulo hari angleder so o Isus mulo. O Isus phenđa pe učenikonđe so mora te han oleso telo hem te pijen oleso rat te bi dobinena večno životi (Jov. 6:53-57). But učenikija hine šokirime ked šunđe odola lafija hem na sledinđe više e Isuse. Ama, olese ćaćutne amala, maškaro kola hine hem o Jovan, aćhilje oleja. On aćhilje oleja iako hem on hine iznenadime ked šunđe odola lafija hem iako na haljilje len. Ipak, olese ćaćutne amala na mislinđe so odova so o Isus phenđa tano pogrešno hem na holjanđe sebepi odola lafija. Umesto odova, on hine len poverenje upro leste sose đanđe so vaćeri o ćaćipe (Jov. 6:60, 66-69). But tano važno te na holjana sigate ked šunaja diso so phenena amare amala! Umesto odova, valjani te da len prilika te objasninen so mislinena (Posl. 18:13; Prop. 7:9).

14. Sose niked na valjani te dozvolina te mrzina amare phralen hem e phenjen?

¹⁴ Pana jekh buti ki koja o Jovan podstakninđa amen tani te na mrzina amare phralen hem phenjen. Ako na ićeraja amen ko akava savet, o Beng bi šaj te utičini upro amende (1. Jov. 2:11; 3:15). Disave hrišćanija ko  prvo veko doživinđe odova. O Beng ko sa o načinija pokušinđa te ćhivel i mržnja maškaro e Devleso narodo hem te razdvojini le. Ked o Jovan pisinđa pi poslanica, ki skupština već khuvđe disave manuša kola pokušinđe te ćeren o buća kola o Beng manglja. Na primer, o Diotref ćerđa ozbiljna podele ki skupština (3. Jov. 9, 10). Ov na poštujinđa okolen kola predstavinđe o vodeće telo. Ov čak pokušinđa te uspudini andi skupština sarinen kola hine gostoljubiva premalo phralja kola olese na sviđinđe pe. Kobor samo hine ponosno! O Beng hem ponodri dela sa pestar te rumini o jekhipe kova isi maškaro e Devlese sluge. Niked na mangaja te dozvolina i mržnja te razdvojini amen ando amare phralja hem phenja!

15. So o poglavari mora te haljol?

¹⁵ Jekh način ko kova o poglavari mothovi so mangela pe porodica tano ađahar so obezbedini pe porodicaće sa so valjani laće (1. Tim. 5:8). Ama, ov mora te haljol so o materijalna buća našti te zadovoljinen o duhovna potrebe andi olesi porodica (Mat. 5:3). Dikhen savo primer o Isus aćhavđa okolenđe kola tane poglavarija. Ko e Jovaneso jevanđelje dikhaja so o Isus mislinđa upri pi porodica čak đi merela hine ko mučeničko stubo. Ked o Isus hine ko stubo, ko odova than hine o Jovan hem e Isusesi daj. Ði trpinđa bare dukha, o Isus vaćerđa e Jovanese te brinini pe andi olesi daj (Jov. 19:26, 27). O Isus hine le phralja hem phenja kola šajinđe te brininen pe ando e Marijake materijalna potrebe, ama izgleda so tegani niko olendar na hine oleso učenik. Odolese, o Isus manglja te ovel sigurno so neko ka brinini pe olatar hem ko materijalno, hem ko duhovno pogledi.

16. Kola odgovornostija hine le o Jovan?

¹⁶ O Jovan hine le but odgovornostija. Ov hine apostol hem odolese revno propovedinđa. Šaj hine ženimo, a odova značinđa so morandilo te brinini pe andi pi porodica ko materijalno, ama hem ko duhovno pogledi (1. Kor. 9:5). So o poglavarija šaj te sikljon ando odova?

17. Sose tano važno o poglavari te brinini pe andi pi porodica ko duhovno pogledi?

¹⁷ O phral kova tano porodično manuš isi le but odgovornostija. Na primer, ov mora te del sa pestar ki pi buti te bi ko asavko način  anela slava e Jehovase (Ef. 6:5, 6; Titu 2:9, 10). Uzo odova, ov šaj isi le hem odgovornostija ki skupština, sar soj tane te hrabrini e phralen hem e phenjen hem te pomožini lenđe. Isto ađahar, ov predvodini hem ko propovedibe. Ko isto vreme, but tano važno redovno te proučini i Biblija pe romnjaja hem pe ćhavencar. On ka oven lese but zahvalna so dela sa pestar te brinini pe olendar ko fizičko, emocionalno hem duhovno pogledi (Ef. 5:28, 29; 6:4).

18. Ko so o Jovan hine uverimo?

¹⁸ E Jovaneso životi hine dugo hem bahtalo. Ov nakhlja but bare kušnje kola šajinđe te oslabinen olesi vera. Ama, ov uvek dinđa sa pestar te ićeri pe ko e Isusese zapovestija, a jekh olendar hine te mangel pe phralen hem pe phenjen. Sebepi odova ov hine uverimo so o Jehova hem o Isus mangena le hem so ka den le snaga te nakhel sa odola kušnje (Jov. 14:15-17; 15:10; 1. Jov. 4:16). O Satana hem oleso sveto naštinđe te ćhinaven e Jovane te mangel pe phralen hem pe phenjen, hem te mothovi lenđe mangipe pe lafencar hem pe delijencar.

19. Ko so podstaknini amen i 1. Jovanova 4:7 hem sose?

¹⁹ Sar o Jovan, hem amen živinaja ko sveto kuri vladini o Beng, kova nikas na mangela (1. Jov. 3:1, 10). Iako isi le bari želja te ćhinavi amen te manga amare phralen hem phenjen, o Beng našti te ćerel odova, osim ako amen na dozvolinaja lese. Odolese, hajde te ova odlučna te manga amare phralen hem phenjen, hem amare lafencar hem amare delijencar. Tegani ka uživina ki e Jehovasi porodica hem ka ova but bahtale. (Čitin 1. Jovanova 4:7.)