1. Σαρ κερέλα-τουμέν τι νιωθίνεν η αγάπη ι Ντεβλέσκι;

 «Ο ΝΤΕΒΕΛ ισί αγάπη», γραφιντάς ο απόστολος Ιωάννης. (1 Ιωάν. 4:8) Τζανάσα ότι η ζωή αβέλα κατά Ντεβέλ. Αλλά ανταλά λάφια βοηθίνενα-αμέν τι ντας-αμέν γκοντί ότι η αγάπη-ντα αβέλα λέσταρ. Ο Ιεχωβά μανγκέλα-αμέν! Λέσκι αγάπη κερέλα-αμέν τι νιωθίνας αρακχαντέ, ευτυχισμέ ντα πφερντέ.

2. Καλά ισί ο ντούι πιο μπαρέ εντολές σαρ βακερένα ο εδάφια Ματθαίος 22:​37-40, ντα σόσκε μπορεί τι ισί δύσκολος τι ντας καν κι δεύτερη;

² Ο Χριστιανοί ναστί τραμπίνενα άμα κα σικαβέν αγάπη. Λιντέ εντολή τι κερέν-λες ανταβά. (Διαβάνεν Ματθαίος 22:​37-40) Επειδή τζανάσα λατσσές ι Ιεχωβάς, μπορεί τι ισί αμένγκε εύκολος τι ντας καν κι πρώτη εντολή. Ανταβά αβέλα-πες επειδή ο Ιεχωβά ισί τέλειος. Πφαμπόλα αμένγκε ντα σικαβέλα αμένγκε λατσσιπέ. Αλλά μπορεί τι ισί αμένγκε δύσκολος τι ντας καν κι δεύτερη εντολή. Σόσκε; Επειδή ο πφραλά ντα ο πφενιά, σο ισί μπουτ πασέ αμέντε, νανέ τέλειοι. Μπάζιμα οντουλέντζαρ σο βακερένα ή κερένα μπορεί τι αγαβάς ότι να πφαμπόνα αμένγκε ντα ότι να σικαβένα αμένγκε λατσσιπέ. Ο Ιεχωβά τζανέλας ότι κα τθεράας ανταγιά δυσκολία, οτθάρ αντράλ μερικέ τζενένταρ σο γραφιντέ ι Αγία Γραφή σικλιαρέλα-αμέν σόσκε πρέπει τι σικαβάς αγάπη ο εκ ι γιαβερέσκε ντα σαρ τι κεράς-λες ανταβά. Εκ οντουλέ τζενένταρ ισινέ ο Ιωάννης-ντα.​—1 Ιωάν. 3:​11, 12.

3. Καλέ πραγμάσκε κερντάς λάφι ο Ιωάννης;

³ Οντουλέντε σο γραφιντάς, ο Ιωάννης βακερέλα ότι ο Χριστιανοί πρέπει τι σικαβέν αγάπη. Ντα κι ιστορία σο γραφιντάς  ι Ιησούσκε ζωγιάκε, βακερέλα λάφια σαρ «αγάπη» ντα «μανγκάβα» πιο μπουτ φαρ κατά γιαβερά τριν Ευαγγελιστές γιεκ. Ο Ιωάννης ισινέ πασέ σελ μπρεσένγκο κάνα γραφιντάς πο Ευαγγέλιος ντα πο τριν επιστολές. Ανταλά βιβλία ι Γραφιάκε σικλιαρένα-αμέν ότι η αγάπη πρέπει τι τσσίντελ-αμέν τι κεράς σαρέ ο πράγματα σο κεράσα. (1 Ιωάν. 4:​10, 11) Όμως, έπρεπε τι νακχέλ χάνικ βακίτι για τι σικλιόλ-λες ανταβά ο Ιωάννης.

4. Σικαβέλας πάντα αγάπη κο γιαβερά ο Ιωάννης;

⁴ Κάνα ισινέ τερνό, ο Ιωάννης να σικαβέλας πάντα αγάπη. Για παράδειγμας, εκ φαρ σο τζάνας κι Ιερουσαλήμ, ο Ιησούς πι μαθητέντζαρ νακχλέ κατά Σαμάρεια. Ο τζενέ εκχέ γκαβέστε κι Σαμάρεια να μανγκλέ τι φιλοξενίνεν-λεν. Σο κερντάς ο Ιωάννης; Πουτσλάς ι Ιησούς άμα μανγκέλας τι βακερέν τι περέλ γιακ κατά ουρανός ντα τι πφαμπαρέλ σαριλέν οντουλέ γκαβέστε! (Λουκ. 9:​52-56) Εκ γιαβέρ φαρ, ο Ιωάννης να σικαντάς αγάπη ι γιαβερέ μαθητένγκε. Βοβ ντα λέσκο πφραλ ο Ιάκωβος μάλλον τσσουντέ πουμαρέ νταγιά τι μανγκέλ κατά Ιησούς τι ντελ-λεν σημαντικές θέσεις πασέ λέστε κι Βασιλεία. Κάνα ο γιαβερά μαθητές σικλιλέ σο κερντάας ο Ιάκωβος ντα ο Ιωάννης, χολιασάλε μπουτ! (Ματθ. 20:​20, 21, 24) Αλλά παρόλο σο ο Ιωάννης κερέλας λάθη, ο Ιησούς μανγκέλας-λες.​—Ιωάν. 21:7.

5. Σο κα ντικχάς ανταλέ μαθημάστε;

⁵ Ανταλέ μαθημάστε, κα ντικχάς ο παράδειγμας ι Ιωαννίσκο ντα μερικά πράγματα σο γραφιντάς για την αγάπη. Καζόμ κα κεράς-λες ανταβά, κα σικλιάς σαρ μπορίνασα τι σικαβάς αγάπη αμαρέ πφραλένγκε ντα πφενίνγκε. Επίσης, κα σικλιάς σαρ μπορίνελα εκχέ σημαντικέ τροπόσαρ ο σορό κι κάθε φαμιλί τι σικαβέλ ότι μανγκέλα πι φαμιλί.

6. Σαρ σικαντάς ο Ιεχωβά ότι μανγκέλα-αμέν;

⁶ Μπουτ φαρ σκεφτίνασα ότι για τι μανγκάς ι τζενέν πρέπει σάντε τι νιωθίνας ή τι βακεράς λατσσέ πράγματα λένγκε. Αλλά για τι σικαβάς ότι μανγκάσα-λεν μπαγιά, πρέπει τι κεράς-ντα λατσσέ πράγματα. (Ντικχέν Ιακώβου 2:​17, 26) Για παράδειγμας, ο Ιεχωβά μανγκέλα-αμέν. (1 Ιωάν. 4:​19) Ντα σικαβέλα πι αγάπη αντράλ κατά σουκάρ λάφια σο ισί γραμμέ κι Γραφή. (Ψαλμ. 25:​10· Ρωμ. 8:​38, 39) Όμως, ισινάμ σίγουροι ότι ο Ιεχωβά μανγκέλα-αμέν, όχι σάντε οντουλένταρ σο βακερέλα, αλλά οντουλένταρ-ντα σο κερέλα. Ο Ιωάννης γραφιντάς: «Αντικάς σικάντιλι αμένγκε η αγάπη ι Ντεβλέσκι: ο Ντεβέλ μπουτσσαντάς πι μοναδικέ Τσσαβές κο ντουνιάς για  τι τθεράς αμέν ζωή λέσταρ». (1 Ιωάν. 4:9) Ο Ιεχωβά μουκχλάς πι αγαπημέ Τσσαβές τι τσσίντελ μπουτ ντα τι μερέλ αμένγκε. (Ιωάν. 3:​16) Οντουλέσκε, ισινάμ σίγουροι ότι ο Ιεχωβά μανγκέλα-αμέν.

7. Σαρ σικαντάς ο Ιησούς ότι μανγκέλα-αμέν;

⁷ Ο Ιησούς βακερντάς πι μαθητένγκε ότι μανγκέλας-λεν. (Ιωάν. 13:1· 15:​15) Σικαντάς πι μπαρί αγάπη λένγκε ντα αμένγκε, όχι σάντε οντουλέντζαρ σο βακερντάς, αλλά οντουλέντζαρ-ντα σο κερντάς. Βακερντάς: «Καέκ να τθερέλα πιο μπαρί αγάπη ανταλάταρ, τι ντελ πι ζωή πι αμαλένγκε». (Ιωάν. 15:​13) Κάνα σκεφτίνασα σαρέ οντουλά σο κερντάς αμένγκε ο Ιεχωβά ντα ο Ιησούς, σο πρέπει τι μανγκάς τι κεράς;

8. Σο πρέπει τι κεράς σαρ βακερέλα ο εδάφιος 1 Ιωάννη 3:18;

⁸ Σικαβάσα ότι μανγκάσα ι Ιεχωβάς ντα ι Ιησούς κάνα ντάσα-λεν καν. (Ιωάν. 14:​15· 1 Ιωάν. 5:3) Ντα ο Ιησούς βακερντάς αμένγκε τι μανγκάς ο εκ ι γιαβερές. (Ιωάν. 13:​34, 35) Να ερεσέλα τι βακεράς αμαρέ πφραλένγκε ντα πφενίνγκε ότι μανγκάσα-λεν. Πρέπει τι σικαβάς-ντα οντουλέντζαρ σο κεράσα ότι μανγκάσα-λεν. (Διαβάνεν 1 Ιωάννη 3:​18) Σο μπορίνασα τι κεράς για τι σικαβάς ότι μανγκάσα-λεν;

9. Σο κερντάς ο Ιωάννης επειδή μανγκέλας ι γιαβερέν;

⁹ Ο Ιωάννης κα μπορίνελας τι μπεσέλ πι νταντέσαρ σο λέσκι μπουτί ισινέ τι ασταρέλ ματσσέν ντα αντικάς τι νικαβέλ λοβέ. Αλλά αντίς τι κερέλ-λες ανταβά, ντινάς σαρί πι ζωή για τι βοηθίνελ γιαβερέν τι σικλιόν ι αλήθεια ι Ιεχωβάσκε ντα ι Ιησούσκε. Η ζωή σο τραμπιντάς τι τθερέλ να ισινέ εύκολη. Γκιλέ λέσαρ κόντρα, ντα κάνα πφουρίλιλο, τσσουντέ-λες φυλακή. (Πράξ. 3:1· 4:​1-3· 5:​18· Αποκ. 1:9) Ατζέ-ντα κάνα ισινέ κι φυλακή επειδή κερέλας λάφι ι Ιησούσκε, ο Ιωάννης σικαντάς ότι μανγκέλας ι γιαβερέν. Για παράδειγμας, καζόμ ισινέ κι Πάτμος, γραφιντάς ο βιβλίος Αποκάλυψη ντα μπουτσσαντάς-λες κο κχανγκιριά για τι τζανέν «οντουλά σο πρέπει τι αβέν-πες ατζεχάνικ». (Αποκ. 1:1) Σοράν, μάλλον κάνα νικίστιλο κατά φυλακή κι Πάτμος, γραφιντάς πο Ευαγγέλιος. Οντουλέ Ευαγγελιόστε βακερντάς ι Ιησούσκε ζωγιάκε ντα λέσκε εργόσκε. Γραφιντάς τριν επιστολές-ντα για τι ντελ ζορ πι πφραλέν ντα πι πφενίν. Σαρ μπορίνενα τι σικαβέν αγάπη σαρ ο Ιωάννης;

10. Σαρ μπορίνενα τι σικαβέν ότι μανγκένα ι τζενέν;

¹⁰ Μπορίνενα τι σικαβέν ότι μανγκένα ι τζενέν κατά τρόπος σο τραμπίνενα τι χρησιμοποιήνεν τουμαρί ζωή. Ο ντουνιάς ι Μπενγκέσκο μανγκέλα τι ντεν σαρό τουμαρό σαάτι ντα σαρί τουμαρί ζορ για τι κερέν λοβέ ή τι κερέν μπαρό ναβ. Αλλά ο Χριστιανοί σαρό κο ντουνιάς ντένα καζόμ αβέλα-πες πιο μπουτ πουμαρέ σαατίσταρ για τι βακερέν ο λατσσέ αμπέρια ντα τι βοηθίνεν τζενέν τι αβέν πασέ κο Ιεχωβά. Ντα μερικοί τραμπίνενα τι κερέν-λες ανταβά ολοχρόνια.

11. Σαρ σικαβένα μπουτ πιστά πφραλά ότι μανγκένα ι Ιεχωβάς αλλά εμ πουμαρέ πφραλέν ντα πφενίν;

¹¹ Μπουτ αφοσιωμέ Χριστιανοί πρέπει τι κερέν μπουτ σαάτια μπουτί για τι νικαβέν ο μαντρό πουμένγκε ντα πουμαρέ φαμιλιάκε. Όμως, ανταλά πιστά πφραλά κερένα σο νακχέλα λένγκε βαστένταρ ι Ντεβλέσκε οργανωσιάκε. Για παράδειγμας, μερικοί βοηθίνενα κάνα αβένα-πες καταστροφές, γιαβερά κερένα μπουτί κι οικοδόμηση ντα σαρέ μπορίνενα τι ντεν πουμαρέ λοβένταρ ι εργόσκε σο αβέλα-πες σαρό κο ντουνιάς. Κερένα-λεν σαρέ ανταλά επειδή μανγκένα ι Ντεβλές ντα ι τζενέν. Κάθε εβδομάδα, σικαβάσα ότι μανγκάσα ι πφραλέν ντα ι πφενίν κάνα τζάσα κο συναθροίσεις ντα ντάσα απαντήσεις. Παρόλο σο ισινάμ  κχινέ, ισινάμ οτθέ. Παρόλο σο μπορεί τι αγχώντιβασα, ντάσα απαντήσεις. Ντα παρόλο σο σαρέ τθεράσα αμαρέ προβλήματα, ντάσα ζορ ι γιαβερέν πριν ή σοράν κατά συνάθροιση. (Εβρ. 10:​24, 25) Καζόμ μπουτ εκτιμίνασα ο έργος σο κερένα αμαρέ πφραλά ντα πφενιά!

12. Καλέ γιαβερέ τροπόσαρ σικαβέλα ο Ιωάννης ότι μανγκέλας πι πφραλέν ντα πι πφενίν;

¹² Ο Ιωάννης σικαβέλας ότι μανγκέλας πι πφραλέν ντα πι πφενίν, όχι σάντε κάνα ισαρέλας-λεν, αλλά κάνα ντέλας-λεν συμβουλές-ντα. Για παράδειγμας, πι επιστολέντε, ισαρντάς πι πφραλέν ντα πι πφενίν επειδή ισινέ πιστοί ντα κερένας λατσσέ πράγματα, αλλά ντινάς-λεν ξεκάθαρες συμβουλές-ντα ι αμαρτιάκε. (1 Ιωάν. 1:​8–2:1, 13, 14) Αντικάς αμέν-ντα χρειαζίντιβελα τι ισαράς αμαρέ πφραλέν ντα πφενίν ι λατσσέ πραγματένγκε σο κερένα. Αλλά άμα εκ τζενό αρχίνελα μα τι σκεφτίνελ σωστά ή τι τθερέλ εκ μπέτι συνήθεια, σικαβάσα λέσκε αγάπη κάνα βακεράσα λέσκε λατσσιμάσαρ οντουβά σο πρέπει τι ασουνέλ. Πρέπει τι αβάς μπίνταρανε για τι ντας συμβουλή εκχέ αμαλέστε, αλλά η Γραφή βακερέλα ότι ο λατσσέ αμαλά βερναρίνενα, ή γιαβέρσοϊ διορθώνενα, ο εκ ι γιαβερές.​—Παρ. 27:17.

13. Σο δεν πρέπει τι κεράς;

¹³ Μπάζιμα, σικαβάσα ότι μανγκάσα αμαρέ πφραλέν ντα πφενίν οντουλέντζαρ σο να κεράσα. Για παράδειγμας, να χολιάνασα σουγκό οντουλέντζαρ σο βακερένα. Ανέν τουμαρέ γκοντιάτε σο αβιλό-πες χάνικ πριν τι μερέλ ο Ιησούς. Βοβ βακερντάς πι μαθητένγκε ότι για τι λεν ζωή έπρεπε τι χαν λέσκο σώμας ντα τι πιν λέσκο ρατ. (Ιωάν. 6:​53-57) Μπουτ μαθητές ι Ιησούσκε να μπεϊντιντέ ανταλά λάφια ντα μουκχλέ-λες. Αλλά λέσκε λατσσέ αμαλά, σαρ ο Ιωάννης, ατσσιλέ λέσαρ. Να αγαντέ οντουβά σο βακερντάς λένγκε ο Ιησούς ντα μάλλον σαστισάλε. Αλλά λέσκε αφοσιωμέ αμαλά να σιγκιαρντέ τι βακερέν ότι λέσκε λάφια να ισινέ λατσσέ ούτε χολιασάλε. Οκιά μπάνταρ, ντινέ λέσκε μπέσα σόσκε τζανένας ότι σο-ντα βακερέλας ισινέ μπαγιά. (Ιωάν. 6:​60, 66-69) Καζόμ σημαντικός ισί αμένγκε-ντα μα τι χολιάνας σουγκό οντουλέντζαρ σο βακερένα αμαρέ αμαλά! Αντίς τι κεράς-λες ανταβά, πρέπει τι ντας-λεν ι ευκαιρία τι εξηγίνεν σο μανγκένα τι βακερέν.​—Παρ. 18:​13· Εκκλ. 7:9.

14. Σόσκε δεν πρέπει τι μουκχάς τι μπαριόλ μίσος αντρέ αμαρέ γκίστε;

¹⁴ Ο Ιωάννης βακερντάς αμένγκε επίσης μα τι μισίνας αμαρέ πφραλέν ντα πφενίν.  Άμα να ντάσα καν κι συμβουλή ανταγιά, μουκχάσα ι Μπενγκές τι κερέλ-αμέν σο μανγκέλα. (1 Ιωάν. 2:​11· 3:​15) Ανταβά αβιλό-πες μερικέ πφραλένγκε κάνα ο Ιωάννης ισινέ πφουρό. Αζομάν, ο Μπενγκ κερέλας σο νακχέλας λέσκε βαστένταρ για τι ανέλ μίσος ντα διχόνοια αντρέ κο λαός κι Ντεβλέσκο. Κάνα ο Ιωάννης γραφιντάς πο επιστολές, τζενέ σο ισινέ αντρέ κι κχανγκιρί κερένας οντουλά σο μανγκέλας ο Μπενγκ. Για παράδειγμας, ο Διοτρεφής ανέλας διχόνοια εκχέ κχανγκιριάτε. (3 Ιωάν. 9, 10) Να σικαβέλας σεβασμός κο πρεσβύτεροι σο μπουτσσαβέλας ο κυβερνών σώμας. Ντα προσπαθίνελας τι πάλντελ κατά κχανγκιρί οντουλέν σο φιλοξενίνενας τζενέν σο να χοΐνελας-λεν. Σο μπέτι ισινέ οντουβά σο κερντάς! Ο Μπενγκ αντιβές-ντα μαρέλα-πες τι χαλαβέλ ι ενότητα σο τθερέλα ο λαός ι Ντεβλέσκο. Ποτές μα τι μουκχάς ο μίσος τι χωρίνελ-αμέν.

15. Σο πρέπει τι ντελ-πες γκοντί ο σορό ι φαμιλιάκο;

¹⁵ Εκ σημαντικός τρόπος για τι σικαβέλ ότι μανγκέλα πι φαμιλί ο σορό ι φαμιλιάκο ισί τι ανέλ ο μαντρό κο κχερ. (1 Τιμ. 5:8) Πρέπει όμως τι ντελ-πες γκοντί ότι οντουβά σο ισί μπουτ πιο σημαντικός ισί τι βοηθίνελ πι φαμιλί τι τθερέλ εκ λατσσί φιλία ι Ιεχωβάσαρ. (Ματθ. 5:3) Ντικχέν ο παράδειγμας σο μουκχλάς ο Ιησούς κο σορέ κι φαμιλίνγκε. Σαρ βακερέλα ο Ευαγγέλιος ι Ιωαννίσκο, κάνα ο Ιησούς μερέλας οπράλ κο κας, να τσσιναντάς τι σκεφτίνελ πι φαμιλί. Οτθέ πασέ, ισινέ ο Ιωάννης γιεκ ι Ιησούσκε νταγιάσαρ, ι Μαριάσαρ. Παρόλο σο ντουκχάλας μπουτ, ο Ιησούς μανγκλάς κατά Ιωάννης τι φροντίνελ ι Μαριά. (Ιωάν. 19:​26, 27) Ο Ιησούς τθερέλας πφραλέν σο σίγουρα ντένας κι Μαρία σο-ντα χρειαζίντιβελας. Αλλά σαρ ντικχίντιβελα καέκ λένταρ να αβιλόας ατζέ λέσκο μαθητής. Οτθάρ, ο Ιησούς μανγκέλας τι αβέλ σίγουρος ότι εκ τζενό κα φροντίνελας ι Μαριά ντα κα ντέλας-λα ι ζορ σο χρειαζίντιβελας τι υπηρετίνελ ι Ιεχωβάς.

16. Καλά ευθύνες τθερέλας ο Ιωάννης;

¹⁶ Ο Ιωάννης τθερέλας μπουτ ευθύνες. Σαρ απόστολος, ντέλας ο λατσσό ο παράδειγμας κο έργος. Επίσης, μπορεί τι ισινέ παντριμέ, οτθάρ έπρεπε εμ τι ανέλ ο μαντρό κο κχερ εμ τι βοηθίνελ πι φαμιλί τι τθερέλ εκ λατσσί φιλία ι Ιεχωβάσαρ. (1 Κορ. 9:5) Σο σικλιόνα ο σορέ ι φαμιλίνγκε αντιβές;

17. Σόσκε ισί σημαντικός ο σορό ι φαμιλιάκο τι βοηθίνελ πι φαμιλί τι τθερέλ εκ λατσσί φιλία ι Ιεχωβάσαρ;

¹⁷ Εκ πφραλ σο ισί ο σορό ι φαμιλιάκο  μπορεί τι τθερέλα μπερεκέτι σημαντικές ευθύνες. Για παράδειγμας, πρέπει τι αβέλ λατσσό πι μπουτιάτε ντα αντικάς τι ντελ δόξα ι Ιεχωβάς. (Εφεσ. 6:5, 6· Τίτο 2:9, 10) Ντα μπορεί τι τθερέλα ευθύνες κι κχανγκιρί, σαρ ισί τι ντελ ζορ ι πφραλέν ντα τι ντελ λατσσό παράδειγμας κο έργος. Καζόμ κερέλα-λεν ανταλά, ισί σημαντικός μα τι τσσιναβέλ τι σικλιαρέλ-πες κατά Γραφή γιεκ πι ρομνιάσαρ ντα πι τσσαβέντζαρ. Βον κα εκτιμίνεν σαρέ οντουλά σο κερέλα για τι αβέν λατσσές κι υγεία, τι αβέν χαρούμενοι ντα τι υπηρετίνεν ι Ιεχωβάς.​—Εφεσ. 5:​28, 29· 6:4.

18. Καλέ πραγμάσκε ισινέ σίγουρος ο Ιωάννης;

¹⁸ Ο Ιωάννης τζουβντιλό μπουτ μπρεσά ντα κερντάας μπουτ σουκάρ πράγματα πι ζωγιάτε. Νακχλάς μπουτ δυσκολίες-ντα σο κα μπορίνενας τι κερέν-λες τι χασαρέλ πι πίστη. Αλλά πάντα κερέλας ο πιο λατσσό για τι ντελ καν κι Ιησούσκε εντολές, σαρ ισί η εντολή τι μανγκέλ πι πφραλέν ντα πι πφενίν. Αντικάς, ισινέ σίγουρος ότι ο Ιεχωβά ντα ο Ιησούς μανγκένας-λες ντα ότι κα ντένας-λες ι ζορ τι νακχαβέλ σο-ντα δοκιμασία τθερέλας. (Ιωάν. 14:​15-17· 15:​10· 1 Ιωάν. 4:​16) Ο Μπενγκ ντα λέσκο ντουνιάς ναστί τσσιναντέ ι Ιωαννής τι μανγκέλ πι πφραλέν ντα πι πφενίν ντα τι σικαβέλ πι αγάπη οντουλέντζαρ σο βακερέλας ντα κερέλας.

19. Σο βακερέλα αμένγκε τι κεράς ο εδάφιος 1 Ιωάννη 4:7, ντα σόσκε;

¹⁹ Σαρ ο Ιωάννης, αντικάς αμέν-ντα τζουβντιάσα εκχέ ντουνιάστε σο κερέλα κουμάντος ο Μπενγκ, ο ντεβέλ ανταλέ ντουνιάσκο σο ισί πφερντό μίσος. (1 Ιωάν. 3:1, 10) Παρόλο σο μανγκέλα τι κερέλ-αμέν τι τσσιναβάς τι μανγκάς αμαρέ πφραλέν ντα πφενίν, ναστί κα κερέλ-λες ανταβά άμα να κα μουκχάς-λες αμέν. Τι αβάς αποφασισμέ τι μανγκάς αμαρέ πφραλέν ντα πφενίν ντα τι σικαβάς-λες ανταβά οντουλέντζαρ σο βακεράσα ντα κεράσα. Κάνα σικαβάσα αγάπη κα νιωθίνας πφερντέ σο ισινάμ αντρέ κι φαμιλί κι Ιεχωβάσκι, ντα κα αβάς μπαγιά ευτυχισμέ.​—Διαβάνεν 1 Ιωάννη 4:7.