1. Sar cherel-ame te simțosaras-ame i iubirea le Devleschi?

„O DEL silo iubirea”, scriisardea o apostolo Ioan. (1 Ioan 4:8) Anda so phendea vo hachiaras iech baro ciacimos: Catar o Del avel i viața, hai lestar avel vi i iubirea. O Iehova iubil-ame, hai Leschi iubirea cherel-ame te simțosaras-ame andi siguranța, fericime hai le ilența bucurime.

2. Cadea sar phenel-pe ando Matei 22:37-40, save si le mai bare dui porunci hai sostar daștilas te avel amenghe pharo te încăras i duito?

² Sar slujitori le Devlesche trebul te sicavas iubirea. Ci daisaras te alosaras te sicavas sau nici cadai calitatea, si iech porunca. (Citisar Matei 22:37-40.) Cana arăsas te prinjianas mai mișto le Iehovas, si amenghe ușoro te încăras i iechto porunca, cai phenel te iubisaras les. Vo silo perfecto hai phiravel-pe șucar amența hai lașimaia. Tha daștil te avel amenghe mai pharo te încăras i duito porunca, cai phenel te iubisaras amare pașardes. Sostar? Anda codoia că amare phrala, cai sile o mai pașe amendar, sile imperfecți. Butivar, von daștinas te cheren buchia cai duchaven-ame sau ci sicaven amenghe lașimos. O Iehova jianglea că va avela te nachas prin cadai situația. Anda codoia, vo cărdea chichiva manușen te scriin andi Biblia sfaturi lașe cai ajutin-ame te hachiaras sostar si importanto te sicavas iubirea hai sar daisaras te cheras cadaia. Iech anda lende sas o Ioan. (1 Ioan 3:11, 12)

3. So sicadea o Ioan ande so scriisardea?

³ Ande lesche scrieri, o Ioan sicadea butivar chichi de importanto si te sicavas iubirea. Mai but, ande leschi evanghelia vo folosisardea le cuvintea „iubirea” hai „te iubisaras”  mai butivar sar sea le coaver trin evangheliști ande iech than. Cana scriisardea i evanghelia cai phiravel lesco anav hai le trin lila, le Ioanos sas-les cam 100 bărș. So scriisardea tela inspirația sicavel că sea so cheras trebul te cheras anda iubirea. (1 Ioan 4:10, 11) Tha vi o Ioan trebuisardea te sichiol cadai buchi.

4. Sicadea o Ioan sea o timpo iubirea?

⁴ Cana sas-lo tărno, o Ioan ci sicadea sea o timpo iubirea. Sar exemplo, cana jianas caring o Ierusalimo, o Isus hai lesche discipoli nachle prin Samaria. Le manușa anda iech gav ci sicade lenghe ospitalitatea. So cărdea o Ioan? Vo hai lesco phral o Iacov pușle le Isusos dacă daștinas te cheren te avel iag anda cerii hai te mudarel sea le manușen anda codo gav. (Luca 9:52-56) Aver data, o Ioan ci sicadea iubirea caring le coaver apostoli. Cadea sar jianas, vo hai o Iacov cărde penga deia te manghel le Isusostar te del-le bare thana ando Regato, pașa leste. Cana așunde so cărde, le coaver apostoli holearde-pe. (Mat. 20:20, 21, 24) Tha, chiar cana o Ioan cărdea sea cadal greșeli, o Isus iubisardea-les. (Ioan 21:7)

5. So va dichaia ande cado articolo?

⁵ Ande cado articolo, va dichaia o exemplo le Ioanosco hai chichiva buchia cai scriisardea-le anda i iubirea. Cadea, va avela te hachiaras sar daisaras te sicavas vi ame iubirea caring amare phrala hai pheia. Sa cadea, va avela te dichas sar daștil iech șăro la familiaco te sicavel iubirea caring peschi familia.

6. Sar sicavel o Iehova peschi iubirea caring amende?

⁶ Butivar gândisaras-ame ca iubirea sar ca iech sentimento lașio cai sicavas-les averenghe prin le cuvintea șucar cai phenas-le. Tha caște avel ciaci, i iubirea ci trebul sicadi numai prin so phenas, tha, vi prin so cheras. (Dich vi o Iacov 2:17, 26.) Sar exemplo, o Iehova iubil-ame hai sicavel amenghe iubirea prin le șucar cuvintea, scriime andi Biblia. (1 Ioan 4:19; Ps. 25:10; Rom. 8:38, 39) Cu sea cadala, vo sicavel amenghe că iubil-ame na numai prin lesche cuvintea tha vi prin so cherel. O Ioan scriisardea: „Prin cadaia sas sicadi i iubirea le Devleschi caring amende: o Del bișaldea andi lumea pesche Șiaves unico-năștime ca ame te avel-ame viața prin leste”. (1 Ioan 4:9) O Iehova mechlea ca lesco mai cuci Șiavo te suferil hai te merel anda amende. (Ioan 3:16) Cadea că, daisaras te avas siguri că o Iehova iubil-ame ciaces!

7. Sar sicadea o Isus peschi iubirea caring amende?

 ⁷ O Isus phendea le discipolenghe că iubisarel-len. (Ioan 13:1; 15:15) Vo sicadea peschi bari iubirea caring lende, tha vi caring amende, na numai prin so phendea tha vi prin so cărdea. O Isus mothodea: „Chanicas nai-les iubirea mai bari sar codoles cai del peschi viața anda pesche amala”. (Ioan 15:13) Sar trebulas te sicavas vi ame parpale iubirea le Iehovasche hai le Isusosche?

8. Cadea sar phenel-pe ande 1 Ioan 3:18, so trebulas te cheras?

⁸ Sicavas amari iubirea caring o Iehova hai o Isus cana ascultisaras lendar. (Ioan 14:15; 1 Ioan 5:3) O Isus dea ame i porunca te iubisaras-ame iech averes. (Ioan 13:34, 35) Trebul te sicavas amari iubirea caring amare phrala na numai prin so phenas, tha vi prin so cheras. (Citisar 1 Ioan 3:18.) Sar daisaras te cheras cadai buchi?

9. So cărdea o Ioan anda iubirea?

⁹ O Ioan daisardeas te cherel mai dur buchi pesche dadeia hai te cherel but love, anda codoia că lesca familia sas-la iech afacerea mașența. Tha vo alosardea te folosisarel peschi viața caște ajutil averen te sichion o ciacimos anda o Iehova hai o Isus. I viața cai alosardea-la o Ioan ci sas ușoro. Vo nachlea prin persecuții hai, caring o sfârșito le secolosco I, cana sas-lo deja zurales phuro, sas-lo bișaldo ando exilo. (Fap. 3:1; 4:1-3; 5:18; Rev. 1:9) Chiar cana sas-lo phandado anda codoia că predichisardea anda o Isus, o Ioan sicadea că iubisardea averen. Sar exemplo, cana sas-lo pi insula Patmos, scriisardea o lil Revelația hai bișaldea-la le congregațienghe, caște jianen ‘so trebul te întâmplol-pe na pa but timpo’. (Rev. 1:1) Pala codoia, daștil-pe că pala soste sas-lo eliberime, o Ioan scriisardea peschi evanghelia anda i viața hai o servicio le Isusosco. Mai but, vo scriisardea vi trin lila pesche phralenghe caște zuriarel-le. Sar daștil te avel vi ame iech viața pherdi sacrificio, cadea sar le Ioanos?

10. Sar te sicavas amari iubirea caring le manușa?

¹⁰ Daisaras te sicavas amari iubirea caring le manușa prin o modo sar alosaras te traisaras amari viața. I lumea le Satanoschi camelas te gândisaras-ame numai amende hai te folosisaras amaro timpo hai zuralimos caște cheras but love sau te cheras-ame prinjiande. Tha le slujitori le Iehovasche anda sea i lumea sicaven sacrificio hai cheren penghe timpo caște predichin i vestea lași hai te ajutin le manușen te pașion le Iehovastar. Chichiva anda lende reușin chiar te slujin cu timp integral.

11. Sar sicaven but creștini fideli penghi iubirea anda o Iehova hai anda lenghe phrala?

¹¹ But creștini fideli trebun te cheren buchi mai but timpo caște len sama pe penghi familia. Cu sea cadala, von cheren sea so daștin caște susținin i organizația le Devleschi. Sar exemplo, unii anda lende den pengo ajutorii cana si iech dezastro, aver cheren buchi ca le proiectea de construcții hai soavră cheren donații anda i lucrarea mondialo. Von cheren sea cadal buchia anda codoia că iubin le Devles hai le manușen. Iech aver modo prin savo daisaras te sicavas amari iubirea caring amare phrala hai pheia si codoia te jias ande fiesavo curco ca le întruniri la congregațiache hai te avas activi părdal amare răspunsuri. Chiar cana sam chine, ame jias ca le întruniri. Chiar cana sam lajiavune, ame das răspunsuri. Hai, chiar cana soavrăn si ame pharimata, zuriaras avren angla hai  pala le întruniri. (Evr. 10:24, 25) Chichi de cuci si anda amende so cheren amare phrala hai pheia!

12. Sar mai sicadea o Ioan iubirea caring pesche phrala hai pheia?

¹² O Ioan sicadea peschi iubirea anda le phrala na numai cana așardea-len tha vi cana dea-le sfaturi. Sar exemplo, ande lesche lila, o Ioan așardea-le anda lengo pachiamos hai anda le lașe buchia cai cherenas-le, tha dea-le vi sfaturi directo ande soste priveal o păcato. (1 Ioan 1:8–2:1, 13, 14) Vi ame trebul te așiaras amare phralen hai pheian anda le lașe buchia cai cheren-le. Tha, cana varecas începol te aveles iech atitudinea nelași sau te cherel vareso nasul andel iacha le Iehovashe, daisaras te sicavas iubirea cana pherde lașimos das-les sfaturi. Trebul amenghe but tromai caște das sfaturi ieche amalesche, tha i Biblia sicavel că le ciace amala ‘ascuțin-pe’, sau phenen iech averesche so ci cheren mișto. (Prov. 27:17)

13. So ci trebulas te cheras?

¹³ Po iechdata sicavas iubirea anda amare phrala prin le buchia cai ci cheras-le. Sar exemplo, ci holeavas-ame sigo pe lende. Te dichas so phendea o Isus iechdata cana sas-lo pi phuv. Vo phendea le discipolenghe că, caște avel-le viața, trebulas te han anda lesco mas hai te pien lesco rat. (Ioan 6:53-57) Anda but discipoli lesche cuvintea sas cadichi de dilivane că von tiliarde, tha lesche ciace amala ci mechle-les, mașcar save sas vi o Ioan. Von sas-le loiali hai așile pașa o Isus. Nici von ci hachiarde lesche cuvintea, hai daștil-pe, că ci ajucărde-pe te așunen-le. Cu sea cadala, le ciace amala le Isusosche ci pachiane că so phendea vo sas greșime hai ci dichle lesche cuvintea sar iech dilimos. Mai but, len sas-le pachiamos ande leste hai jiangle că phenel o ciacimos. (Ioan 6:60, 66-69) Cadea că, si zurales importanto te na holeavas-ame sigo cana amare amala phenen vareso so duchavel-ame, tha te mechas-le te phenen amenghe so camle te mothon. (Prov. 18:13; Ecl. 7:9)

14. Sostar ci trebul te urâsaras amare phralen?

¹⁴ O Ioan phendea amenghe te na urâsaras amare phralen. Cana ci ascultisaras cado sfato, daisaras te arăsas ando vast le Satanosco. (1 Ioan 2:11; 3:15) Ande cadai situația sas vi unii creștini catar o sfârșito le secolosco I. O Satan cărdea sea so sas ande lesco zuralimos caște cherel le creștinen  te urân-pe hai te hulavel o poporo le Devlesco. Cana o Ioan scriisardea pesche lila, andi congregația avile murșa cai sicade sa codo spirito sar le Satanosco. Iech anda lende sas o Diotref. (3 Ioan 9, 10) Vo ci sicadea respecto caring le phrala phure cai sas bișalde catar o corpo de guvernare. Chiar încercosardea te del avri anda i congregația le phralen cai sicade ospitalitatea caring codola cas vo urâsardea-le. Ce phuchiarimos! Vi aghies, o Satan cherel bare eforturi te hulavel o poporo le Devlesco hai te țârdel-les de leschi rig. Te na mechas niciechdata ca i ura te duriarel-ame iech averestar.

15. So trebul te hachiarel iech șăro la familiaco?

¹⁵ Iech șăro la familiaco daștil te sicavel că iubisarel pesca familia cana lel sama pe late po plano materialo. (1 Tim. 5:8) Cu sea cadala, vo trebul te hachiarel că le buchia materialo ci daștin te zuriaren po plano spiritualo lesca familia. (Mat. 5:3) Te dichas o exemplo cai mechlea-les o Isus andal șăre la familiache. Cadea sar phenel-pe andi Evanghelia pala o Ioan, o Isus gândisardea-pe ca peschi familia chiar vi angla so te merel. O Ioan beșelas pașa i Maria, i dei le Isusoschi, ando than cai o Isus sas-lo șiuto po stâlpo de tortură. Chiar cana sas-lo ande bare ducha, o Isus manglea le Ioanos te lel sama pe Maria. (Ioan 19:26, 27) Si ciaces, le phrala le Isusosche daștinas te len sama pi Maria po plano materialo, tha, cadea sar dichiol-pe, niciech anda lende ci cărdilea încă iech anda lesche discipoli. Anda codoia, o Isus camlea te avel siguro că si varecon cai te lel sama pi Maria na numai po plano materialo, tha vi te zuriarel-la spiritualo.

16. Ce phare buchia trebulas te cherel o Ioan?

¹⁶ Le Ioanos sas-les but phare buchia te cherel. Vo sas iech apostolo zeloso hai trebuisardea te sicavel iech lașio exemplo andi predicarea. Mai but, daștil-pe că sas-lo prandime hai trebuisardea te lel sama pe peschi familia po plano materialo hai vi spiritualo. (1 Cor. 9:5) So daștin te sichion le șăre la familiache catar o Ioan?

17. Sar daștil te sicavel iech șăro la familiaco că iubil pesca familia?

¹⁷ Ieche șăres la familiaco daștil te avel-les but buchia importanto te cherel. Sar exemplo, ca peschi buchi vo trebul te avel exemplaro, cadea vo așarel le Iehovas prin pesco phiraimos. (Ef. 6:5, 6; Tit 2:9, 10) Mai but, daștil te avel-les but  buchia te cherel vi andi congregația, sar avelas te păstoril hai te del iech lașio exemplo andi lucrarea de predicare. Sa cadea, si zurales importanto te încărel ande fiesavo curco i închinarea andi familia pesca rromniaia hai le șiavența. Anda leschi familia va avela zurales cuci sea so cherel caște lel sama pe lende po plano materialo, afectivo hai spiritualo. (Ef. 5:28, 29; 6:4)

18. So jianelas siguro o Ioan?

¹⁸ Le Ioanos sas-les iech viața lungo hai nachlea prin but buchia. Sas-les but zumaimata, cai daștinas te covliaren lesco pachiamos. Tha vo cărdea sea so daisardea caște încărel le porunci le Isusosche, mașcar save si vi te iubil pesche phralen hai pheian. Anda codoia, o Ioan sas-lo siguro că o Iehova hai o Isus iubinas-les hai că avelas te den-les o zuralimos caște nachel părdal orisavo zumaimos. (Ioan 14:15-17; 15:10; 1 Ioan 4:16) Nici o Satan, nici leschi lumea ci daisarde te cheren le Ioanos te na iubil pesche o phralen. Mai but, vo sicadea peschi iubirea caring lende prin so phendea hai so cărdea.

19. Cadea sar phenel-pe ande 1 Ioan 4:7, so trebul te cheras hai sostar?

¹⁹ Vi ame traisaras ande iech lumea cai sili tela o zuralimos le Satanosco, o del pherdo ura cadale sistemosco. (1 Ioan 3:1, 10) Vo camel te cherel-ame te na mai iubisaras amare phralen hai pheian, tha vo ci va daștila te cherel cadai buchi dacă ame ci mechas-les. Te avas hotărâme te iubisaras amare phralen hai pheian, te sicavas amari iubirea caring lende prin so phenas hai so cheras. Cadea, va avela te simțosaras i bari bucuria te cheras partea anda i familia le Iehovaschi hai va avaia ciaces fericime. (Citisar 1 Ioan 4:7.)