1. Со амэндэ по ди кодэлэстар, кай о Иегова амэн любий?

О АПОСТОЛО Иоанно пистросардя: «О Дэл исин любовь» (1 Иоан. 4:8). Кадэла алава драго сыкавэн, кай о Дэл када кодэва, кастар жал най кати и жызня, но и любовь. О Иегова амэн любий. Через лэстири любовь амэ лошалэ и бахталэ, ай кадяжэ амэндэ драго по ди.

2. Савэ дуй законоря, сар пистромэ андэ Матфея 22:37—40, со май важни и васо дэкала ԥарэс тэ ритярас о дуйто законо?

² Трэбуй кай о христианино тэ авэл любовь? Канешно! О христианино на витидэл можэт во тэ любий чи най. Кадя камэл о Дэл. И пала када пистромэ андэ дуй со май важни законоря. (Адиносар Матфея 22:37—40.) Амэнди найԥарэс тэ ритярас о пэрво законо, андэ саво ԥэнэнпэ: «Любисар лэ Дэвлэс». Важ кода кай о Иегова совершэно, во любий амэн и добро каринг амэндэ. Ай тэ ритярас о дуйто законо най кадя вушэро. Васо? Важ кода кай амэнди шолпэ андэ яқа кода, со най кадя терэн амарэ ԥрала и ԥэя. Дэкала вонэ моӷут тэ на шон сама, чи тэ холярэн амэн алавэнца чи диласа. О Иегова ӷанэнас, кай через када авэла ԥарэс и ԥэндя дэсавэ пэстирэ служытелёнэнди тэ запистрон андэ Библия, васо трэбуй тэ любисарас ек еқэс и сар када тэ терас. Ек анда кацавэ служытеля сас о апостоло Иоанно (1 Иоан. 3:11, 12).

3. Со о Иоанно ԥэнэнас пала любовь?

 ³ О Иоанно най еқварэс ԥэнэнас, со кай и христианоря трэбуй тэ авэл любовь. Андэ Евангелия лэ Иоанностар и алава «любовь» и «тэ любисарас» май часто пистромэ, чем андэ авэр трин Евангелия. Кала о Иоанно пистрояс кадэя Евангелия и пэстирэ трин письморя, лэсти сас варикай 100 лет. Кадэла библейски книӷи сытярэн, со кай и христианоря андэ всавори дила трэбуй тэ дицол и любовь (1 Иоан. 4:10, 11). Но екжэно о Иоанно кадэлэсти най сразу сытеля.

4. Вся и время о Иоанно любияс аврэн?

⁴ Кала о Иоанно сас тэрно, во най вся и время сыкавэлас пэстири любовь. Подам дума пала дуй маменторя, савэ сас андэ лэстири жызня. Еқварэс, о Иисусо пэстирэ учениконэнца жалас анда Иерусалимо через и Самария. Котэ и мануша анда ек гав на закамлэ лэн тэ прилэн пэстэ. Сар пэс андярдя о Иоанно? Во ԥэндя лэ Иисусости: «Ӷосподо, камэс амэ ԥэнаса, кай па нэбо тэ сжал и яг и тэ сԥабарэл лэн?» (Луки 9:52—56). Ай акэ инке ек маменто, саво сыкавэл, кай лэ Иоанности на хутилэлас любовь каринг авэр апостолоря. Во и лэско ԥрал о Иаково манглэ лэ Иисусос через пэстири дэй, кай во тэ дэл лэнди май лашо ҭан андэ лэ Дэвлэско Царство. Кала пала када уӷанглэ апостолоря, вонэ фартэ холяйлэ пэр лэндэ (Матф. 20:20, 21, 24). Хоть о Иоанно пэс кадя андярэлас, о Иисусо всаек лэс фартэ любияс (Иоан. 21:7).

5. Пала со амэ подаса андэ кадэя статья?

⁵ Андэ кадэя статья амэ подаса дума пала Иоанно и пала кода, со во пистросардя важ и любовь. Када поможыя амэнди тэ полас, сар тэ любисарас лэ ԥралэн и лэ ԥэян. Кадяжэ амэ уӷанаса, сар и хулая моӷут пэ дила тэ сыкавэн, кай любин пэстирэ ерес.

6. Сар о Иегова сыкадя, кай любий амэн?

⁶ Сар о мануш можэт тэ сыкавэл, кай любий варикас? Варико гиндой, кай хутила просто тэ ԥэнэс, кай любис. Но и чачуни любовь дицол пэ дила (Диқэн Иакова 2:17, 26.) Подам дума пала Иегова. Во любий амэн (1 Иоан. 4:19). Ай сар во када сыкавэл? Лэстири любовь дицол андэ алава, савэ амэ адиносарас андэ Библия (Пс. 25:10; Рим. 8:38, 39). Но пэстири любовь во доԥэндя най кати лэ алавэнца, ай и ла диласа. О Иоанно пистросардя: «О Дэл сыкадя пэстири любовь каринг амэндэ через кода, кай бишалдя андэ люма пэстирэ Шавэс, саво лэстэ ек кацаво, кай через лэстэ амэ тэ жувас» (1 Иоан. 4:9). О Иегова отдя пэстирэ Шавэс, кай во тэ мэрэл важ амэндэ  (Иоан. 3:16). Амэ диқас, кай о Иегова фартэ любий амэн!

7. Сар о Иисусо сыкадя, кай любий амэн?

⁷ О Иисусо ԥэнэнас пэстирэ учениконэнди, кай любий лэн (Иоан. 13:1; 15:15). Кода, сар дэ фартэ во любияс пэстирэ учениконэн, сыкавэн най кати лэстирэ алава, но и дила. Во ԥэндя: «Нико на любий май фартэ, чем кодэва, ко отдэл пэстири жызня пала пэстирэ друӷоря» (Иоан. 15:13). Чаче, о Иегова и о Иисусо фартэ бут со важ амэндэ стердэ. Со важ када амэ трэбуй тэ закамас тэ терас?

8. Со амэ трэбуй тэ терас, сар пистромэ андэ 1 Иоанна 3:18?

⁸ Кала амэ кандас лэ Иеговас и лэ Иисусос, амэ сыкавас, кай любисарас лэн (Иоан. 14:15; 1 Иоан. 5:3). О Иисусо приԥэндя амэнди тэ любисарас ек еқэс (Иоан. 13:34, 35). Амэ трэбуй най кати тэ ԥэнас лэ ԥралэнди и лэ ԥэянди, кай любисарас лэн, но и тэ сыкавас када диласа. (Адиносар 1 Иоанна 3:18.) Сар амэ можэм када тэ терас?

9. Со камэлас тэ терэл о Иоанно через и любовь?

⁹ О Иоанно моӷ тэ ашэлпэ пэстирэ дадэса и тэ затерэл кодэлэса, кай тэ астарэл о мащё. Но во витидя кода, кай тэ поможый лэ манушэнди тэ уӷанэн о чачимос пала Иегова и пала Иисусо. О дром, саво во витидя, сас найвушэро. Васо? Важ кода кай лэс преследовали важ и вера и варикай в концэ андо пэрво вико, кала во сас фартэ ԥуро, лэс бишалдэ, кай тэ жувэл по Патмосо (Деян. 3:1; 4:1—3; 5:18; Отк. 1:9). Но дажэ, кала лэс бэшардэ, во на парашэлас тэ гиндой пала авэр. Кала во сас по Патмосо, во пистросардя и книӷа Откровение и бишалдя ла лэ ԥралэнди и лэ ԥэянди, кай вонэ тэ уӷанэн пала кода, со ӥто трэбуй тэ авэл (Отк. 1:1). Файма, кала лэс одмэклэ, во пистросардя и Евангелия, андэ сави росԥэндя пала лэ Иисусостири жызня и служэния. Кай тэ подритярэл и тэ дэл зор лэ ԥралэнди и лэ ԥэянди, во кадяжэ пистросардя трин письморя. Сости амэ сытювас лэ Иоанностар?

10. Сар тумэ можэте тэ сыкавэн, кай любин лэ манушэн?

¹⁰ Тумари любовь каринг и мануша дицол андэ кода, пэр со май бут ужал тумари время. И люма, савяса хулаий о Сатана, сытярэл, кай вся пэско зор и время тэ отдэс кодэлэсти, кай май бут тэ затерэс или тэ ашэс ашунгло. Но лэ Дэвлэско народо па вся и люма витидэл авэр дром. Вонэ на жалуин пэско зор и время, кай тэ росԥэнэн кода, со пистромэ андэ Библия и тэ поможын лэ манушэнди тэ авэн май пашэ каринг о Иегова. Дэсавэ андар лэндэ дажэ служын полновременно.

11. Сар и христианоря сыкавэн, кай любин лэ Иеговас и лэ ԥралэн и лэ ԥэян?

¹¹ Бут лэ Дэвлэстирэ служытеля, савэ на парашэн лэс тэ кандэн, цыло дес терэн бути, кай тэ проправарэн пэс и пэстирэ ерес. Но кадяжэ вонэ терэн вся, кай тэ подритярэн и дила андэ лэ Дэвлэстири арӷанизацыя. Варико поможый котэ, кай сас ураӷано, землетрясении и авэр варисо андэ природа. Ай варико терэл дила пэ строительни проекторя. Вся када вонэ терэн важ кода, кай любин лэ Дэвлэс и лэ манушэн. Кадяжэ, кажно христианино можэт тэ дэл ловэ, кай тэ терэн и дила важ о Дэл па вся и ԥув. Всаворэ амэ кажно курко сыкавас, кай любисарас лэ ԥралэн и лэ ԥэян, кала авас пэ собрании. Амэ авас андо Зало Царства, дажэ кала цыелям. Дас каминтарии, дажэ кала пэрэжываем. И подритярас аврэн, дажэ кала екжэнэнди ԥарэс (Евр. 10:24, 25). Амэ фартэ блаӷодарни  амарэ ԥралэнди и ԥэянди пала вся, со вонэ терэн!

12. Сар инке о Иоанно сыкавэлас пэстири любовь каринг и ԥрала и ԥэя?

¹² О Иоанно сыкавэлас, кай любий лэ ԥралэн и лэ ԥэян най кати кодэлэса, кай хвалияс лэн, но и кодэлэса, кай ԥэнэнас, со на трэбуй тэ терэн. Например, андэ пэстирэ письморя, во най кати лэн похвалисардя важ лэндири вера и лащи дила, но и ворта ԥэндя, кай вонэ трэбуй тэ полэн, со када ӷрехо и тэ парудёнпэ (1 Иоан. 1:8—2:1, 13, 14). Амэ кадяжэ трэбуй тэ хвалисарас лэ ԥралэн и лэ ԥэян. Но кала амэ шас сама, кай варикастэ найлашо настроё или найдраго пэс андярэн, амэнди трэбуй ковлэс пала када лэсти тэ ԥэнас. Кадя амэ сыкавас, кай любисарас лэс. Кай када тэ стерас, трэбуй тэ авас смили. Но, сар ԥэнэнпэ андэ Библия: «Сар о састри парнярэл о састри, кадя жэ и о мануш можэт тэ поможый лэ друӷости». Чачунэ друӷоря поможын ек еқэсти тэ ашэн май лашэ (Прит. 27:17).

13. Со амэнди на трэбуй тэ терас?

¹³ Кадяжэ амари любовь каринг и ԥрала и ԥэя дицол андэ кода, кай амэ на грабисавас тэ холявас пэ лэндирэ алава. Сэрэн кодэва маменто, кала о Иисусо ԥэндя пэстирэ учениконэнди: «Сар тумэ на хан и тила лэ манушэстирэ Шавэсти и на пэн лэско рат, тоди андэр тумэндэ нинай жызня» (Иоан. 6:53—57). Дэсавэ ученикоря через кадэла алава фартэ холяйлэ и ашадэ лэ Иисусос. Но и чачунэ друӷоря, кадяжэ и о Иоанно, на ашадэ лэс. Вонэ на полинэ пала со о Иисусо ԥэнэнас, но на линэ тэ гиндон, кай о Иисусо сас нэ право и кай во камэл лэн тэ холярэл. Вонэ патянас лэсти, важ кода кай драго полэнас, кай во сытярэл лэ чачимасти (Иоан. 6:60, 66—69). Если амаро друӷо ԥэндя кода, состар амэнди ашэля ԥарэс по ди, на трэбуй тэ грабисавас тэ холявас. Фэдэр тэ виашунас лэс, кай тэ полас, со во камля тэ ԥэнэн (Прит. 18:13; Эккл. 7:9).

14. Васо на трэбуй тэ домэкас, кай амэ тэ вэрыцысарас ек еқэс?

¹⁴ Кай тэ на хулаий пар мэндэ о Сатана, о Иоанно кадяжэ пистросардя, кай амэнди нащи тэ вэрыцысарас лэ ԥралэн и лэ ԥэян (1 Иоан. 2:11; 3:15). Кацаво жэ сас кай дэсавэ христианоря, савэ жувэнас андо пэрво вико. О Сатана терэлас вся, кай лэ Дэвлэстирэ служытеля тэ на ладин и тэ вэрыцын ек еқэс. Каринг кодэя время, кала о Иоанно  пистросардя пэстирэ письморя, андэ собрания ужэ сас мануша, савэ камэнас тэ терэн кода жэ, со и о Сатана. Ек анда кацавэ мануша сас о Диотрефо, через саво и ԥрала андэ собрания на линэ тэ ладин. Во на столас патив пэ ԥрала, савэн бишалэлас о Руководящё совето андэ собрания. Во дажэ камэлас тэ видаравэл анда собрания лэ христианонэн, ко прилэлас пэстэ кодэлэ манушэн, савэ лэсти на чалёнас (3 Иоан. 9, 10). Пэ скати жэ во дэ наӷло! О Сатана и адес терэл вся, кай машкар лэ Дэвлэстирэ служытеля тэ вэрыцын ек еқэс. Давайте на домэкаса, кай лэстэ када тэ вижал!

15. Пала со трэбуй тэ сэрэл о хулай андо ери?

¹⁵ Сар о хулай можэт тэ сыкавэл, кай любий пэско ери? Во трэбуй тэ затерэл важ пэско ери, кай тэ авэл вся, со трэбуй важ и жызня (1 Тим. 5:8). Но кадяжэ о хулай трэбуй тэ сэрэл, кай и ловэ на поможына, кай лэ ерестэ тэ авэл лащи дружба лэ Дэвлэса (Матф. 5:3). Шон сама, сости о хулай андо ери можэт тэ сытёл лэ Иисусостар. Андэ Евангелия о Иоанно пистрой, кай, кала о Иисусо мэрэлас по столбо, во гиндояс пала пэсти дэй. Паша лэстэ сас о Иоанно и лэ Иисусостири дэй Мария. Хоть о Иисусо мучияспэ англа пэстири смэрть, но во мангля, кай о Иоанно тэ заботийпэ пала Мария (Иоан. 19:26, 27). Лэ Иисусостэ сас ԥрала и ԥэя, и канешно, вонэ на ашадоп пэстиря да. Но каринг кодэя время, файма, инке нико андар лэндэ на ашэля лэ Иисусоско ученико. Важ када во камэлас, кай тэ авэл кодэва, ко диқэла пала Мария, кай латэ тэ авэл вся, со трэбуй важ и жызня и пала кода, кай вой тэ на парашэл тэ патял.

16. Пала со трэбуй сас тэ заботийпэ о Иоанно?

¹⁶ Кай о Иоанно сас бут дила. Во сас ек анда апостолоря и диқэлас пала дила важ и служэния. Инке, файма, во сас жэнато. Если када кадя, то во трэбуй сас тэ диқэл, кай лэ ерестэ тэ авэл кода, со трэбуй важ и жызня и пала кода, кай лэндэ тэ авэл дружба лэ Иеговаса (1 Кор. 9:5). Сости када сытярэл лэ хулан андо ери?

17. Сар о хулай можэт тэ сыкавэл, кай любий пэско ери?

¹⁷ Кай о ԥрал, савэстэ исин ери, можэт тэ авэл бут дила. Например, во трэбуй драго тэ терэл и бути, кай кадэлэса тэ прославляет лэ Дэвлэс (Эф. 6:5, 6; Титу 2:9, 10). И инке  лэстэ можэт тэ авэл дила андэ собрания. Во трэбуй тэ диқэл, кай лэ ԥралэндэ и лэ ԥэяндэ тэ авэл лащи дружба лэ Иеговаса и тэ терэл вся, кай вонэ тэ ԥирэн пэ служэния. Но кадяжэ фартэ важно, кай во тэ изучает и Библия пэстирэ ереса. Кадя во сыкавэла, кай любий лэн. Лэско ери авэла фартэ блаӷодарно, кай во терэл вся, кай лэндэ тэ авэл драго по ди, тэ авэл вся, со трэбуй важ и жызня и важ и дружба лэ Дэвлэса (Эф. 5:28, 29; 6:4).

18. Андэр со фартэ патялас о Иоанно?

¹⁸ Кай о Иоанно сас долӷо и интересно жызня. Хоть лэстэ сас бут ԥаримос, через саво во моӷ тэ парашэл фартэ тэ патял. Но во терэлас вся, со па лэско зор, кай тэ кандэл лэ Иисусос, ай кадяжэ тэ ритярэл о законо, кай тэ любий лэ ԥралэн и лэ ԥэян. Во патялас, кай о Иегова и о Иисусо любин лэс и поможына лэсти тэ виритярэл любо ԥаримос (Иоан. 14:15—17; 15:9, 10; 1 Иоан. 4:16). Со кати на терэлас о Сатана и кодэла, ко залэл лэстири риг, но лэндэ на вижыля тэ стерэн кадя, кай о Иоанно тэ парашэл тэ любий лэ ԥралэн и лэ ԥэян и тэ сыкавэл кадэя любовь алавэнца и диласа.

19. Сости амэн сытярэл кода, со пистромэ андэ 1 Иоанна 4:7 и васо трэбуй кадя тэ терас?

¹⁹ Адес, сар и тоди, кала жувэлас о Иоанно, ла люмаса хулаий о Сатана, саво фартэ холинако (1 Иоан. 3:1, 10). Во камэл, кай амэ тэ парашас тэ любисарас лэ ԥралэн и лэ ԥэян. Но лэстэ нисо на вижала, если амэ када на домэкаса. Давайте алавэнца и диласа тэ сыкавас амари любовь каринг амарэ ԥрала и ԥэя. Тоди амэ аваса па чачимастэ бахталэ и лошалэ андо баро лэ Иеговаско ери. (Адиносар 1 Иоанна 4:7.)