1. Lizrandzru dzra Xikwembu Nkulukumba dzri ku yentxa u titwa hi ndlela yini?

‘XIKWEMBU NKULUKUMBA i lizrandzru.’ (1Yh 4:8) Mazritu lawo ma hi dzrimuxa ntiyiso wa lisima, wa leswaku Xikwembu Nkulukumba i mutumbuluxi wezru nakone i xihlovo xa lizrandzru. Yehovha awa hi zrandzra! Nakone lizrandzru dzrakwe dzri hi yentxa hi titwa na hi sizrelelekile, na hi nyonxile nakone hi nga pfumali ntxhumu.

2. Hi ku ya hi buku dzra Mattheo 22:37-40, he yini milawu yibidzri leyikulu? Ha yini swi nga ha hi kazratelaka ku landzra nawu wa wubidzri?

² Vakriste a va fanelanga ku hlawula leswaku va ta kombisa lizrandzru kumbe im-him. Vo zrumiwa ku dzri kombisa. (Dondzra Mattheo 22:37-40.) Loko hi ya hi mu tiva ku yampswa Yehovha, swi ta hi nabyalela ku yingiseta nawu wa ku sungula. Henhla ka hinkwaswu, Yehovha a hetisekile; awa zron’weka hi mun’wana ni mun’wana wezru nakone a hi khoma hi lizrandzru. Kambe swi nga ha hi kazratela ku landzra nawu wa wubidzri. Ha yini? Hikusa vamakwezru lava nga kusuhi na hine a va hetisekanga. Minkama yimbeni va nga ha hlaya kumbe ku hi yentxela mintxhumu leyi nga ha hi yentxaka hi nga titwi ha hombe kumbe hi titwa na hi nga zrandzriwi. Yehovha a a swi tiva leswaku hi ta langutana ni xikazratu lexo. Xileswo, a huhutele van’we ka vatsrali va Bibele akuva va hi komba ndlela leyi hi nga kombisaka lizrandzru ha yone ka van’wana ni leswaku ha yini hi fanela ku dzri kombisa. Mun’we ka vatsrali volavo ku ve Yohane.​—1Yh 3:11, 12.

3. I yini leswi Yohane a swi tshimisisiki mayelanu ni lizrandzru?

³ Ka mabuku lawa Yohane a ma tsraliki, a tshimisise ngopfu leswaku vakriste va fanela ku kombisana lizrandzru. Loko a dzrungula  hi ta wutomi bya Yesu, Yohane a tizrise ngopfu mazritu “lizrandzru” ni “a zrandzre” ku tlula lawa ma nga ka mabuku ya Mattheo, Marka na Luka. Yohane a a ni kolomu ka 100 wa malembe loko a tsrala Evhangeli yakwe ni mapapela mazrazru. Mabuku lawo, lama huhuteliwiki, ma hi dondzrisa leswaku hinkwaswu leswi hi swi yentxaka swi fanela swi susumeteliwa hi lizrandzru. (1Yh 4:10, 11) Nambitanu, Yohane a hlwelile ku swi dondzra leswo.

4. Xana Yohane a kombise lizrandzru minkama hinkwayu ka vambeni?

⁴ Loko Yohane a ha li mumpswha, a hi minkama hinkwayu a kombisiki lizrandzru. Hi xikombiso, khambi dzrimbeni, Yesu ni vadondzrisiwa vakwe va khalute hi le Samariya na va ya Yerusalema. Vhanu va kukazri va le Samariya va yale ku va yamukela. Yohane a yangulise kuyini? A vutise Yesu leswaku awa swi zrandzra akuva ndzrilo wu xika hi le tilweni kutani wu hisa vhanu lavayani kumbe im-him. (Lk 9:52-56) Hi khambi dzrin’wana, Yohane a tlhele a hluleka ku kombisa lizrandzru ka vapostolakulobye. Swi tikomba na yene, kun’we ni makwavu Yakobe va hlohlotele mamana wavu akuva a kombela Yesu leswaku a va beka ka xiyimu lexi tlakukiki a Mfun’wini wa Xikwembu Nkulukumba. Loko vapostola van’wana va swi twile leswo va hlundzruke ngopfu! (Mt 20:20, 21, 24) Kambe Yesu a nga tsrhikanga ku zrandzra Yohane hi kola ka swihoxo leswi a swi yentxiki.​—Yh 21:7.

5. I yini leswi hi taka swi dondzra ka nhlokomhaka leyi?

⁵ Ka xidondzro lexi, hi ta vona xikombiso xa Yohane, ni swin’wana leswi a swi tsraliki mayelanu ni lizrandzru. Leswi swi ta hi dondzrisa ndlela ya ku kombisa lizrandzru ka vamakwezru va xinuna ni va xisati. Hi ta tlhela hi vona ndlela ya lisima leyi tinhloko ta mindangu ti nga kombisaka ha yone leswaku ti zrandzra ndangu.

6. I yini leswi Yehovha a swi yentxiki akuva a kombisa leswaku awa hi zrandzra?

⁶ Hi ntolovelo, hi pimisa leswaku lizrandzru i matwitela ya ku xonga lawa hi ma kombisaka hi mazritu. Kambe a lizrandzru dzra xihlayelamfuzri dzri kombisiwa hi mintizro. (Tlhela u vona Yakob 2:17, 26.) Hi xikombiso, Yehovha awa hi zrandzra. (1Yh 4:19) A hi kombisa lizrandzru dzrakwe hi mazritu ya ku xonga lama kumekaka a Bibeleni. (Ps 25:10; Ro 8:38, 39) Kambe, lexi xi hi kholwisaka leswaku Xikwembu Nkulukumba awa hi zrandzra a hi leswi a swi hlayaka ntsena, kambe ni leswi a hi yentxelaka swone. Yohane a tsrale leswi: ‘Ka vonekisiwi lizrandzru la Xikwembu Nkulukumba ku hine hi leswaku Xikwembu Nkulukumba a zrumile N’wanakwe, lwe wa ku va swakwe, a ta misaveni, akuva hi hanya ha yene.’ (1Yh 4:9) Yehovha a pfumelele leswaku N’wanakwe lwa  zrandzrekaka a xaniseka a tlhela a fa hi kola ka hine. (Yh 3:16) Kutani hi nga dumba hi ku helela leswaku Yehovha awa hi zrandzra.

7. Xana Yesu a swi kombise hi ndlela yini leswaku awa hi zrandzra?

⁷ Yesu a tiyisekise vadondzrisiwa vakwe leswaku a a va zrandzra ngopfu. (Yh 13:1; 15:15) A kombise lizrandzru dzroledzro ka vone a tlhela a dzri kombisa ka hine namunhla ku nga li ntsena hi mazritu kambe ni hi swiyentxo. Yesu a te: ‘A ku na mhunu lwa nga ni lizrandzru loli tlulaka la loko mhunu a bekela vanakulobye a wutomi byakwe.’ (Yh 15:13) Kutani, ku yanakanyisisa hi leswi Yehovha na Yesu va hi yentxeliki swone swi fanela ku hi susumetela ku yentxa yini?

8. Hi ku ya hi 1 Yohan 3:18, i yini leswi hi fanelaka ku swi yentxa?

⁸ Hi komba Yehovha na Yesu leswaku ha va zrandzra hi ku va yingiseta. (Yh 14:15; 1Yh 5:3) Nakone Yesu ha byakwe a tlhele a hi nyika nawu wa leswaku hi zrandzranana. (Yh 13:34, 35) Hi fanela ku kombisa lizrandzru ka vamakwezru, ku nga li hi mazritu ntsena kambe ni hi swiyentxo. (Dondzra 1 Yohan 3:18.) Kambe hi ntshimantshima, i yini leswi hi fanelaka ku swi yentxa akuva hi kombisa leswaku ha va zrandzra vamakwezru?

9. I yini leswi lizrandzru dzri susumeteliki Yohane kuva a swi yentxa?

⁹ Yohane a a ta va a titsrhamele ni tatana wakwe ka ntizro wa ku phasa tinhlampfi akuva a kuma mali. Kambe a matsrhan’wini ya leswo a hlawule ku tizrisa wutomi byakwe akuva a dondzrisa xihlayelamfuzri mayelanu na Yehovha na Yesu. Wutomi lebyi Yohane a byi langiki a byi nga nabyali. Leswi a a zron’wekela ntizro wa ku zrezra, Yohane a xanisiwile a tlhela a hlongoliwa a tikweni, a ku heleni ka dzana dzra ku sungula a Nguveni Yezru, na a duhwalile. (Min 3:1; 4:1-3; 5:18; Mpf 1:9) Nambi loko a pfaleliwile, Yohane a kombise lizrandzru ka vambeni. Hi xikombiso, loko a li a xihlaleni xa Patmos a tsrale buku dzra Apfuletelo a va a dzri zrumelela mabandla akuva ma tiva ‘leswi a swi fanekela ku humelela’. (Mpf 1:1) Swi nga yentxeka ntsrhaku ka loko a ntsrhuxiwile a Patmos, Yohane a tsrale Evhangeli dzrakwe mayelanu ni wutomi ni ntizro wa Yesu. A tlhele a tsrala mapapela mazrazru akuva a kutxa ni ku tiyisa vamakwavu. A wuton’wini byakwe, Yohane a titsrone swa kukazri. Xana hi nga mu yetisela hi ndlela yini?

10. U nga swi kombisa hi ndlela yini leswaku u zrandzra vhanu?

¹⁰ Ndlela leyi u tizrisaka ha yone a wutomi byaku yi nga kombisa leswaku wa va zrandzra vambeni kumbe im-him. A misava ya Sathana yi djula leswaku hi tizrisa ntamu ni nkama wezru akuva hi tikumela mali yinyingi ni ku va ni ndhuma. Kambe a matsrhan’wini ya ku yentxa leswo, vakriste a misaveni hinkwayu va tizrisa nkama wunyingi akuva va zrezra madzrungula lamanene ni ku pfuna vhanu akuva va va vanghanu va Yehovha. Van’wana va tizra swanga vazrezri va nkama hinkwawu.

11. Xana vakriste vanyingi va ku dumbeka va dzri kombisa hi ndlela yini lizrandzru dzravu ha Yehovha ni vamakwezru?

¹¹ Vakriste vanyingi va tizra siku hinkwadzru akuva va wundla mindangu yavu. Nambi swi li tanu, vamakwezru lavo va ku dumbeka va yentxa hinkwaswu leswi va nga swi kotaka akuva va seketela nhlengeletanu ya Xikwembu Nkulukumba. Hi xikombiso, van’we va pfunisa ka ntizro wa ku pfuna lava weliwiki hi timhangu, ka ntizro wa ku yaka, nakone hinkwavu va nga pfunisa hi ku nyikela hi mali. Va yentxa hinkwaswu leswo akuva va kombisa lizrandzru dzravu ha Yehovha ni vapfumelikulobye. Na hine hi nga kombisa lizrandzru ka vamakwezru hi kuva  hi kumeka mintlhanganwini vhiki ni vhiki hi tlhela hi hlengela ka yone. Nambi loko hi kazralile, ha ya mintlhanganwini. Nambi loko hi txhava, ha nyikela tinhlamulo. Nambi loko hi langusana ni swikazratu ha tiyisanana, loko mintlhanganu yi nga si sungula ni loko yi helile. (Hb 10:24, 25) Hi swi tlangela swinene hinkwaswu leswi vamakwezru va xinuna ni va xisati va swi yentxaka!

12. Xana Yohane a swi kombise hi ndlela yini leswaku a a zrandzra vamakwezru?

¹² Yohane a a kombisa leswaku a a zrandzra vamakwezru hi ku va kulungela ni ku va nyika swilayu. Hi xikombiso, ka mapapela yakwe, Yohane a kulungeli vamakwezru hi lipfumelo ni mintizro yavu leyinene. Kambe a tlhele a nyika vamakwezru swilayu leswi kongomiki. (1Yh 1:8–2:1, 13, 14) Hi ndlela leyi fanaka, na hine hi fanela ku kulungela vamakwezru hi mintxhumu leyinene leyi va yi yentxaka. Kambe loko mun’we ka vone a sungula ku hanya hi ndlela leyi nga liki yinene, hi ndlela ya lizrandzru hi nga bulisana na yene hi mu komba leswaku mahanyela wolawu a hi manene. Swi djula xixixi ku va hi yentxa leswo, kambe a Bibele dzri li a munghanu wa ntiyiso a lota mumbeni.​—Pr 27:17.

13. I yini leswi hi nga fanelangakiki ku swi yentxa?

¹³ Minkama yimbeni, hi nga kombisa leswaku ha va zrandzra vamakwezru hi leswi hi kalaka hi nga swi yentxi. Hi xikombiso, a hi khunguvanyeki hi ku kahlula hi leswi va swi hlayaka. Pimisa hi leswi yentxekeliki Yesu na a ha li lani misaveni loko a li kusuhi ni ku fa. Yene a byele vadondzrisiwa vakwe leswaku, akuva va kuma wutomi, a va fanela ku da nyama yakwe ni ku nwa ngati yakwe. (Yh 6:53-57) Vadondzrisiwa va txhavile hi ku twa mazritu wolawu ya Yesu kutani vanyingi va tsrhike ku mu landzrela. Kambe vanghanu va ntiyiso va Yesu, ku patsra na Yohane, a va mu tsrhikanga. Va tame va dumbeka ka yene nakone va tame va mu namazrela. A va swi twisisanga leswi Yesu a swi hlayiki nakone va hlamalile ha swone. Kambe vanghanu volavo va ku dumbeka a va tekelanga ku pimisa leswaku a hlaye leswi hoxekiki kumbe ku mu kwatela. A matsrhan’wini ya leswo, a va mu dumba hikusa a va swi tiva leswaku minkama hinkwayu a a khanela ntiyiso. (Yh 6:60, 66-69) Na hine a hi djuli ku hatla hi khunguvanyeka hi leswi vanghanu vezru va swi hlayaka. Kambe a matsrhan’wini ya leswo, loko hi nga swi twisisi ha hombe leswi vanghanu vezru va  swi hlayaka, hi djula ku va nyika mukhandlu wa kuva va tlhamuxela.​—Pr 18:13; Ekl 7:9.

14. Ha yini hi nga fanelanga hi pfumela leswaku livengo dzri nhingena a timbilwini tezru?

¹⁴ Yohane a tlhele a hlaya leswaku a hi fanelanga hi nyenya vamakwezru. Loko hi nga ma landzri mazritu lawo, hi pfulela Sathana ndlela akuva a hi kongomisa. (1Yh 2:11; 3:15) Hi leswi swi yentxekeliki van’wana a ku heleni ka dzana dzra ku sungula a Nguveni Yezru. Sathana a yentxe hinkwaswu a nga swi kotaka akuva vhanu va Xikwembu Nkulukumba va yavana va tlhela va nyenyana. A nkameni lowu Yohane a tsraliki mapapela yakwe, vavanuna lava a va ni miyanakanyu ya ku fana ni ya Sathana va nghene bandleni. Mun’we wa vavanuna volavo, a ku li Diyotrefa, lweyi a byaliki ku yavana ka dzrin’we dzra mabandla. (3Yh 9, 10) A a yeyisa vakulu lava a va li valaviseli lava a va yimela Huvo leyi Zrangelaka wa nkama wolowo. A ve a dzringisa ku hlongola vhanu lava a va kombisa malwandla ka vhanu lava yene a a nga va zrandzri. A a tikulisa swinene! Sathana a ha tama a dzringisa hi ntamu hinkwawu ku byala ku yavana a xikazri ka vhanu va Xikwembu Nkulukumba. Hi nga txhuki hi pfumela livengo dzri hi tsrhindzreta kule ni vamakwezru.

15. Xana i yini leswi tinhloko ta mindangu ti fanelaka ku swi dzrimuka?

¹⁵ Yin’we ya tindlela leti nhloko ya ndangu yi nga kombisaka ha yone leswaku yi zrandzra va ndangu i ku va hlayisa hi tlhelo dzra nyama. (1Tm 5:8) Kambe a nga fanelanga a dzrivala leswaku, a mintxhumu ya nyama a yi nga ti xi hetisisa xivileleko xavu xa moya. (Mt 5:3) Vona xikombiso lexinene lexi Yesu a xi bekeliki tinhloko ta mindangu. A Evhangeli dzra Yohane dzri hi byela leswaku loko Yesu a li kusuhi ni ku fa a mhandzrini ya nxanisa, a ha tama a zron’weka hi va ndangu wakwe. Yohane a a yime tlhelweni ka Mariya, mamana wa yesu, nkama lowu na Yesu a dlayiwa. Nambi leswi Yesu a a twa ku vavisa ngopfu swinene, a kombele Yohane leswaku a sala a hlayisa Mariya. (Yh 19:26, 27) Vamakwavu va Yesu va xinuna ni va xisati a va ta swi kota ku sala va hlayisa Mariya hi tlhelo dzra nyama, kambe swi tikomba na ni mun’we wa vone a va nge si ndzruluka vadondzrisiwa. Xileswo, Yesu a a djula ku tiyiseka leswaku a ku ta va ni lweyi a a ta sala a hlayisa Mariya ku nga li hi tlhelo dzra nyama ntsena, kambe ni hi tlhelo dzra moya.

16. Xana he byini wutiyanguleli lebyi Yohane a a li na byone?

 ¹⁶ Yohane a a ni wutiyanguleli byinyingi. Swanga mupostola, a a fanela ku zrangela a ntizro wa ku zrezra. Handle ka leswo swi nga yentxeka a a txhatile, kutani a a fanela ku hlayisa ndangu wakwe hi tlhelo dzra nyama ni hi tlhelo dzra moya. (1Ko 9:5) I yini leswi tinhloko ta mindangu ti nga swi dondzraka ka xikombiso xa Yohane?

17. Ha yini nhloko ya ndangu yi fanele ku hlayisa va ndangu hi tlhelo dzra moya?

¹⁷ Swi nga yentxeka nhloko ya ndangu ya kukazri yi ni wutiyanguleli byinyingi. Hi xikombiso, yi fanela ku va mutizri lwenene akuva mahanyela yakwe ma dzrumisa Yehovha. (Ef 6:5, 6; Ti 2:9, 10) Swi nga yentxeka yi ni wutiyanguleli a bandleni, bya ku fana ni ku byisa vamakwezru ni ku zrangela ntizro wa nsimu. Hi nkama wu li wun’we, i swa lisima ku va yi dondzra Bibele ni nsati wakwe kun’we ni vana. Yi ni wutiyanguleli bya ku hlayisa ndangu wa yone hi tlhelo dzra nyama, yi hlayisa matitwela yavu ni ku va hlayisa hi tlhelo dzra moya. Loko yi yentxa leswo, hinkwavu a ndangwini va ta titwa na va nyonxe ngopfu swinene.​—Ef 5:28, 29; 6:4.

18. Hi kwini ku dumba loku Yohane a a li na kone?

¹⁸ Yohane a hanye wutomi bya ku leha nakone a kumane ni swinyingi. A lwisani ni swikazratu swinyingi leswi a swi ta va swi tsranise lipfumelo dzrakwe. Kambe minkama hinkwayu a a yentxa hinkwaswu leswi a nga swi kotaka akuva a landzra milawu ya Yesu, ku patsra ni wa ku zrandzra vamakwezru. Hi mhaka ya leswo, Yohane a a dumba leswaku Yehovha na Yesu a va mu zrandzra, ni leswaku a va ta mu nyika ntamu wa ku tiyiselela xikazratu xin’wana ni xin’wana. (Yh 14:15-17; 15:10; 1Yh 4:16) A ku na ntxhumu lexi Sathana ni misava yakwe a va ta xi yentxa akuva Yohane a tsrhika ku kombisa lizrandzru ka vamakwezru hi mazritu ni hi swiyentxo.

19. Xana a buku dzra 1 Yohan 4:7 dzri hi kutxa ku yentxa yini, nakone ha yini?

¹⁹ Ku fana na Yohane, na hine hi hanya ka misava leyi fumiwaka ha Sathana, lani vhanu va kone va kalaka va nge na lizrandzru. (1Yh 3:1, 10) I ntiyiso leswaku Sathana a swi djula ngopfu ku va hi tsrhika ku zrandzra vamakwezru. Kambe yene a to kota ku yentxa leswo ntsena loko hi mu pfumelela. Xileswo, tiyimiseli ku tama u zrandzra vamakwezru va xinuna ni va xisati, ni ku kombisa lizrandzru ledzro hi mazritu ni hi swiyentxo. Loko u yentxa leswo u ta tsrhava hi ku hamba xiyenge xa ndangu wa Yehovha nakone wutomi byaku byi ta nyonxisa swinene.​—Dondzra 1 Yohan 4:7.