1. O le ā e tatou te lagonaina ona o le alofa o le Atua?

NA TUSI le aposetolo o Ioane “o le Atua o le alofa lava ia.” (1 Ioa. 4:8) Ua faamanatu mai e lenei faaupuga faigofie iā i tatou se upu moni tāua: O le Atua o le puna o le ola, ma o ia foʻi o le puna o le alofa. E alofa Ieova iā i tatou! O lona alofa e tatou te lagonaina ai le malupuipuia, fiafia ma le faamalieina.

2. E tusa ai ma le Mataio 22:37-40, o ā poloaʻiga silisili e lua, ma aiseā e ono faigatā ai ona tatou usitaʻia le poloaʻiga lona lua?

² E lē mafai ona tuua i le faitalia a se Kerisiano pe e na te faaali atu le alofa pe leai. Ae ua faatonuina Kerisiano uma ia faaali atu le alofa. (Faitau le Mataio 22:37-40.) Pe a tatou iloa lelei Ieova, e ono faigofie ona tatou usitaʻia le poloaʻiga muamua. Talu ai e lelei atoatoa Ieova, e magafagafa la o ia ma e feutagaʻi ma i tatou i se auala agalelei. Peitaʻi, e ono faigatā ona tatou usitaʻia le poloaʻiga lona lua. Aiseā? Talu ai e lē lelei atoatoa o tatou uso ma tuafāfine o nisi o tatou tuaoi vavalalata. E iai taimi e latou te ono faia ai ni faamatalaga po o ni gaoioiga lē alofa ma lē agalelei. E silafia e Ieova o le a tatou fesagaʻia lenei luʻi. O lea, na ia faagaeeina ai tusitala o le Tusi Paia ina ia faaaofia i a latou tusitusiga fautuaga tāua i le māfuaaga ma auala e tatau ona tatou faaalia ai le alofa o le tasi i le isi. O se tasi o na tusitala, o Ioane.​—1 Ioa. 3:11, 12.

3. O le ā na faamatilatila e Ioane?

³ Na faamatilatila i tusitusiga a Ioane, le tatau i Kerisiano ona faaalia le alofa. O le mea moni, i lana tusi e faatatau i le soifuaga o Iesu e tele atu taimi na faaaogā ai e Ioane le upu “alofa” ma le “alolofa” nai lo o isi faievagelia pe a tuufaatasi  a latou tusitusiga. E pe ā ma le selau tausaga o Ioane ina ua ia tusia lana tusi e faatatau i le soifuaga o Iesu ma isi ana tusi e tolu. Ua faailoa mai e na tusitusiga faagaeeina o mea uma e faia e se Kerisiano, e tatau ona uunaʻia e le alofa. (1 Ioa. 4:10, 11) Peitaʻi, na umi se taimi faatoʻā aʻoaʻoina e Ioane lenā lesona.

4. Pe na faaalia e Ioane le alofa i taimi uma?

⁴ A o talavou Ioane, e lē o taimi uma na ia faaalia ai le alofa. O se faaaʻoaʻoga, na iai le taimi na ō faatasi ai Iesu ma ona soo i Ierusalema e ui atu i Samaria. E leʻi faaalia e tagata i se tamaʻi aai i Samaria le agaga talimālō iā i latou. O le ā le auala na tali atu ai Ioane? Na ia talosaga iā Iesu pe e finagalo e la te fai atu ma lona uso o Iakopo ina ia alu ifo le afi mai i le lagi e faaumatia ai lenā aai atoa. (Luka 9:52-56) Na iai foʻi le taimi e leʻi faaalia ai e Ioane le alofa i isi aposetolo. Na la tauanauina ma lona uso o Iakopo lo la tinā e talosaga iā Iesu ina ia o la nonofo i lona itu taumatau ma lona itu tauagavale i lona Malo. O lea, na matuā feita isi aposetolo ina ua faalogo i le mea na talosaga ai Ioane ma Iakopo. (Mata. 20:20, 21, 24) Ae e ui i mea sesē a Ioane, ae na alofa pea Iesu iā te ia.​—Ioa. 21:7.

5. O le ā o le a tatou talanoaina i lenei suʻesuʻega?

⁵ O le a tatou talanoaina i lenei suʻesuʻega le faaaʻoaʻoga a Ioane ma nisi o mea na ia tusia e faatatau i le alofa. A o tatou faia faapea, o le a tatou aʻoaʻoina ai le auala e faaalia ai le alofa i o tatou uso ma tuafāfine. O le a tatou aʻoaʻoina ai foʻi se auala tāua e faamaonia ai e le ulu o le aiga e alofa i lona aiga.

6. Ua faapefea ona faaalia e Ieova lona alofa mo i tatou?

⁶ E masani ona tatou manatu o le alofa o se faalogona māfana e faailoa atu i a tatou upu agalelei. Ae o le alofa moni, e tatau ona faaalia atu i a tatou upu ma gaoioiga. (Faatusatusa i le Iakopo 2:17, 26.) O se faaaʻoaʻoga, e alofa Ieova iā i tatou. (1 Ioa. 4:19) E faailoa mai e Ieova lona alofa iā i tatou i ana upu agalelei o loo faamauina i le Tusi Paia. (Sala. 25:10; Roma 8:38, 39) Peitaʻi, ua tatou mautinoa e alofa le Atua iā i tatou, ona ua ia faaalia mai i ana fetalaiga ma ana gaoioiga. Na tusi Ioane: “O le mea lenei ua faaalia mai ai le alofa o le Atua iā i tatou, auā na auina mai e le Atua lona Atalii e toʻatasi i le lalolagi, ina ia tatou maua ai le ola e ala iā te ia.” (1 Ioa. 4:9) Na faatagaina e le Atua lona Alo pele e mafatia ma maliu mo i tatou. (Ioa. 3:16) O lea, ua tatou matuā mautinoa e alofa Ieova iā i tatou.

7. O le ā na faia e Iesu e faamaonia ai lona alofa mo i tatou?

⁷ Na faamautinoa atu e Iesu i ona aposetolo  lona alofa tele iā i latou. (Ioa. 13:1; 15:15) Na ia faamaonia lona alofa tele iā i latou ma i tatou, e ala i ana fetalaiga ma mea na ia faia. Na fetalai mai Iesu: “E leai lava se tasi e sili atu lona alofa nai lo o lenei, o le foaʻiina atu lea e se tasi o lona ola mo ana uō.” (Ioa. 15:13) O lea, pe a tatou manatunatu i mea na faia e Ieova ma Iesu mo i tatou, o le ā e tatau ona tatou faia?

8. O ā mea o loo taʻua i le 1 Ioane 3:18 e tatau ona tatou faia?

⁸ O lo tatou usitaʻi iā Ieova ma Iesu ua faamaonia atu ai e tatou te alolofa iā i laʻua. (Ioa. 14:15; 1 Ioa. 5:3) Na poloaʻia i tatou e Iesu ina ia faaalia le alofa o le tasi i le isi. (Ioa. 13:34, 35) E tatau ona tatou faaalia i a tatou upu ma gaoioiga e tatou te alolofa i o tatou uso ma tuafāfine. (Faitau le 1 Ioane 3:18.) O ā ni mea patino e tatou te faia e faamaonia ai e tatou te alolofa i o tatou uso ma tuafāfine?

9. O le ā na uunaʻia e le alofa Ioane e fai?

⁹ Na mafai e Ioane ona galulue faatasi ma lona tamā i le pisinisi faifaiva a le latou aiga, ina ia maua ai ni tupe se tele. Nai lo o le faia o lenā mea, ae na ia faaaogāina le taimi na totoe o lona olaga e aʻoaʻoina ai isi i le upu moni e faatatau iā Ieova ma Iesu. E leʻi faigofie le olaga na filifilia e Ioane. Na mafatia o ia ona o sauāga, ma i le faaiʻuga o le senituri muamua T.A. ina ua toeaina o ia na faaaunuua ai i se motu. (Galu. 3:1; 4:1-3; 5:18; Faaa. 1:9) E ui ina faafalepuipuiina o ia ona o lana talaʻiga e faatatau iā Iesu, ae na ia faamaonia lona alofa mo isi. O se faaaʻoaʻoga, a o iai Ioane i le motu o Patamo, na ia tusiaina ai le faaaliga na ia maua mai iā Iesu. Na auina atu foʻi e Ioane na faaaliga i faapotopotoga ina ia latou iloa ai “mea ua toeitiiti ona tutupu.” (Faaa. 1:1) Mulimuli ane ina ua faasaʻoloto Ioane mai i le motu o Patamo, na ia tusiaina ai lana tusi e faatatau i le olaga ma le faiva a Iesu. Na ia tusia foʻi ana tusi e tolu e faalaeiau ma faamalosia ai ona uso ma tuafāfine. E faapefea ona e faaaʻoaʻo i le olaga faataulaga o Ioane?

10. E faapefea ona faamaonia e tatou te alolofa i tagata?

¹⁰ E faamaonia atu e tatou te alolofa i tagata, e ala i filifiliga e tatou te faia i o tatou olaga. E manaʻo le lalolagi a Satani e faaalu uma lo tatou malosi ma le taimi mo i tatou lava e suʻe ai tupe ma ia taʻutaʻua. Ae e faataulaga e tagata talaʻi i le lalolagi aoao le tele o lo latou taimi e talaʻia ai le tala lelei ma fesoasoani i tagata e mafuta vavalalata iā Ieova. O nisi ua mafai ona latou talaʻi ma aʻoaʻo atu faataimi atoa.

11. E faapefea ona faamaonia e le toʻatele o tagata talaʻi e latou te alolofa iā Ieova ma o latou uso ma tuafāfine?

¹¹ E toʻatele Kerisiano faamaoni o loo faigaluega faataimi atoa e tausia ai i latou ma o latou aiga. E ui i lea, ae o loo lagolagoina e nei Kerisiano faamaoni le faalapotopotoga a le Atua i so o se mea e latou te mafaia. O se faataʻitaʻiga, o nisi o i latou o loo mafai ona fesoasoani iā i latou o loo aafia i mala faalenatura, o nisi o loo galulue i galuega faufale ma e mafai e tagata uma ona fai foaʻi tauofo mo le galuega i le lalolagi aoao. Ua latou faia nei mea ona e latou te alolofa i le Atua ma isi. I vaiaso taʻitasi e tatou te faamaonia atu e tatou te alolofa i o tatou uso ma tuafāfine e ala i lo tatou auai i sauniga a le faapotopotoga ma faia ai ni o tatou sao. E ui ina tatou lē lavavā i nisi o taimi ae e tatou te auai pea i sauniga. E ui atonu e tatou te matamumuli ae e lē taofia ai le faia o tatou tali. E ui lava foʻi e tofu uma i tatou ma faafitauli ae e tatou te  faalaeiau i isi a o leʻi amata po o le māeʻa foʻi o le sauniga. (Epe. 10:24, 25) Maʻeu lo tatou talisapaia o galuega o loo faia e o tatou uso ma tuafāfine!

12. O le ā le isi auala na faamaonia ai e Ioane lona alofa mo ona uso ma tuafāfine?

¹² Na faaalia e Ioane lona alofa i ona uso ma tuafāfine, e ala i lona faamālō atu ma avatu fautuaga mo i latou. O se faataʻitaʻiga, ina ua tusi atu Ioane i ona uso ma tuafāfine, na ia faamālō atu iā i latou ona o lo latou faatuatua ma galuega lelei. Ae, na ia avatu foʻi iā i latou ni fautuaga tuusaʻo e faatatau i le agasala. (1 Ioa. 1:8–2:1, 13, 14) E manaʻomia foʻi ona tatou faamālō atu i o tatou uso ma tuafāfine ona o mea lelei o loo latou faia. Ae pe a e mātauina se uiga po o se masaniga leaga i se tasi, e tatou te faaalia le alofa e ala i le faailoa atu i ai o lona sesē i se auala agalelei. E manaʻomia ona tatou lototetele e avatu se fautuaga i se uō. Auā ua taʻua i le Tusi Paia o uō moni, e latou te faamaʻai pe faasaʻoina isi.​—Faata. 27:17.

13. O le ā e lē tatau ona tatou faia?

¹³ O nisi taimi, o mea e tatou lē faia e faamaonia ai e tatou te alolofa i o tatou uso ma tuafāfine. O se faaaʻoaʻoga, e lē vave ona tatou feita i se tala e latou te fai mai. Seʻi manatu i se mea na tupu a o soifua Iesu i le lalolagi. Na ia fetalai atu i ona soo e latou te maua le ola e faavavau pe a aai i lona tino ma inu lona toto. (Ioa. 6:53-57) E mataʻutia na fetalaiga, ma e toʻatele ona soo e leʻi fia faalogo i ai o lea, na latou tuua ai o ia. Ae e leʻi tuua Iesu e ana uō moni e aofia ai ma Ioane. Na latou faamaoni ma pipii pea iā Iesu. E latou te leʻi malamalama i fetalaiga a Iesu ma atonu na faateʻia ai foʻi i latou. Ae e leʻi manatu nei uō faamaoni a Iesu e sesē ana fetalaiga ma feita ai. Na latou maufaatuatuaina Iesu, auā na latou iloa o le upu moni lea na ia fetalai i ai. (Ioa. 6:60, 66-69) Maʻeu le tāua o le lē vave ona tatou feita i se tala a se uō e fai mai! Ae ia tuu i ai le avanoa e faamatala mai ai le uiga o lana tala.​—Faata. 18:13; Fai. 7:9.

14. Aiseā e lē tatau ai ona tatou ʻinoʻino i o tatou uso ma tuafāfine?

¹⁴ Ua faalaeiau foʻi i tatou e Ioane ina ia aua neʻi tatou ʻinoʻino i o tatou uso ma tuafāfine. Pe a tatou lē utagiaina lenei fautuaga, ua tatou tuua la i tatou e taaʻina e Satani. (1 Ioa. 2:11; 3:15) O le mea lenā na tupu i nisi i le faaiʻuga o le senituri muamua T.A. I lenā taimi,  na faatupu ai e Satani le ʻinoʻino ma fevaevaeaʻiga i le faapotopotoga. E oo ane i le taimi na tusia ai e Ioane ana tusi, ae ua ō atu faananā i le faapotopotoga ni tamāloloa na faaalia uiga o Satani. O se faataʻitaʻiga, na faatupu e Tioterifi fevaevaeaʻiga i totonu o le faapotopotoga. (3 Ioa. 9, 10) E leʻi faaaloalo o ia i ovasia asiasi na auina atu e le vaega pule. Na taumafai foʻi Tioterifi e faateʻa ese ma le faapotopotoga i latou na faaalia le agaga talimālō i ē e leʻi fiafia i ai. Pagā le faamaualuga o lenā tagata! O loo taumafai malosi pea Satani e faatupu fevaevaeaʻiga i tagata o le Atua i aso nei. O lea, ia aua lava neʻi o tatou ʻinoʻino i o tatou uso ma tuafāfine ma fevaevaeaʻi ai.

15. O le ā e tatau ona manatua e le ulu o se aiga?

¹⁵ O se tasi o auala tāua e faamaonia ai le alofa o le ulu o le aiga i lona aiga, o le saunia lea o meafaitino e latou te manaʻomia. (1 Timo. 5:8) Ae e tatau ona manatua e le ulu o le aiga, e lē faamalieina e meafaitino manaʻoga faaleagaga o lona aiga. (Mata. 5:3) Ia mātau le faaaʻoaʻoga na faataatia e Iesu mo ulu o aiga. O loo taʻua i le evagelia a Ioane le manatu mamafa o Iesu i manaʻoga o lona aiga, a o tautau o ia i le laau e faapuapuagatia ai. Na iai faatasi Ioane ma Maria le tinā o Iesu i le nofoaga lea na fasiotia ai Iesu. E ui i le matuitui o tigā o Iesu, ae na ia talosaga atu iā Ioane e tausia Maria. (Ioa. 19:26, 27) Na iai uso ma tuafāfine o Iesu ma na mautinoa na mafai ona latou tausia manaʻoga faaletino o Maria, peitaʻi e foliga mai e leai ma se isi o i latou ua avea ma soo o Iesu i lenā taimi. O lea la, na faamautinoa ai e Iesu e tausia manaʻoga faaletino ma le faaleagaga o Maria.

16. O ā tiute tauave o Ioane na iai?

¹⁶ E mautinoa na matuā tele tiute tauave o Ioane. Na maelega Ioane i le talaʻiga ona o ia o se tasi o le ʻauaposetolo. Atonu foʻi na faaipoipo Ioane, sa tatau la ona ia tausia lona aiga i le itu faaletino ma le itu faaleagaga. (1 Kori. 9:5) O le ā le lesona mo ulu o aiga i aso nei?

17. E faapefea ona faaalia e le ulu o se aiga e alofa i lona aiga?

¹⁷ Atonu e tele tiute tauave tāua o se uso ua avea ma ulu o se aiga. O se faataʻitaʻiga, e tatau ona ia galue mamafa i lana galuega totogi ina ia taʻuleleia ai Ieova. (Efe. 6:5, 6; Tito 2:9, 10) Atonu foʻi e iai ni ona tiute tauave i le  faapotopotoga e pei o le faia o asiasiga faaleoleo mamoe i uso ma tuafāfine ma taulamua i le galuega talaʻi. I le taimi e tasi, e tatau foʻi ona ia suʻesuʻeina e lē aunoa le Tusi Paia ma lana avā ma lana fanau. E latou te matuā talisapaia ana taumafaiga i le tausiaina o i latou i le itu faaletino, tau faalogona ma le faaleagaga.​—Efe. 5:28, 29; 6:4.

18. O le ā na mautinoa ai Ioane?

¹⁸ Na umi le taimi na soifua ai Ioane, ma na tele mea mataʻina na tutupu i lona olaga. Na tele foʻi luʻi na feagai ma Ioane na ono faavaivaia ai lona faatuatua. Ae na ia faia le mea e na te mafaia e usitaʻia ai le faatonuga a Iesu, e aofia ai ma le faatonuga ia alofa i ona uso ma tuafāfine. O lea la, na mautinoa ai e Ioane e alolofa Ieova ma Iesu iā te ia ma o le a la foaʻi atu iā te ia le malosi e onosaʻia ai so o se faafitauli. (Ioa. 14:15-17; 15:9, 10; 1 Ioa. 4:16) E leai se mea na mafai ona fai e Satani po o lana lalolagi e taofia ai Ioane mai i le lagonaina ma le faaalia atu o lona alofa mo ona uso ma tuafāfine, e ala i ana upu ma gaoioiga.

19. O le ā ua faalaeiauina i tatou e le 1 Ioane 4:7 e fai, ma aiseā?

¹⁹ O loo tatou ola foʻi i se lalolagi o loo pulea e Satani le atua lotoa o lenei faiga o mea. (1 Ioa. 3:1, 10) E manaʻo Satani e taofi i tatou mai i le faaalia o le alofa i o tatou uso ma tuafāfine. E lē mafai ona faia e Satani lenā mea, seʻi vaganā ua tatou faatagaina o ia e fai. O lea, seʻi o tatou maumauaʻi e faailoa ma faamaonia atu lo tatou alolofa i o tatou uso ma tuafāfine, e ala i a tatou upu ma gaoioiga. O le faia faapea, o le a tatou maua ai le olioli i le avea ma vaega o le aiga o Ieova. Maʻeu se olaga faamalieina!​—Faitau le 1 Ioane 4:7.