1. Unfa di lobi di Gadu abi ta mbei i ta fii?

APÖSUTU Johanisi bi taki taa: „Masa Gadu, hën hatiböö da lobi” (1 Joh. 4:8). Gadu hën da u libi. Ma di soni di Johanisi taki aki ta lei u taa a Gadu lobi kumutu tu. Jehovah lobi u, nöö di soni dë ta mbei u fii bunu seei.

2. Andi da dee tu möön gaan wëti, te u luku di soni di sikifi a Mateosi 22:37-40, nöö faandi mbei a sa ta taanga da u so juu fuu hoi di u tu wëti?

² Wan Keesitu sëmbë musu u lei taa a lobi wotowan, u di a dë wan wëti di Keesitu sëmbë musu hoi. (Lesi Mateosi 22:37-40.) Te u ko sabi soni u Jehovah, nöö an o ta taanga da u fuu hoi di fosu wëti. Jehovah an ta mbei föutu. A ta buta pakisei a u, söseei a ta libi bunu ku u. Fëën mbei te u ko sabi soni u Jehovah, nöö an ta taanga da u fuu hoi di fosu wëti. Ma a sa ta taanga da u fuu hoi di u tu wëti. Faandi mbei u taki sö? Wë di soni aki dë sö u di dee baaa ku dee sisa fuu da zöndu libisëmbë. Nöö so juu de sa ta taki soni, nasö du soni di sa hati u. Jehovah sabi di soni aki. Fëën mbei a mbei sëmbë sikifi soni a Bëibel, di ta lei u faandi mbei u musu ta lobi u na u, söseei di ta lei u unfa u musu ta du ën. Wan u dee sëmbë dee a bi tei u du di soni aki, da Johanisi.​—1 Joh. 3:11, 12.

3. Andi Johanisi bi taki u lobi?

³ Dee soni dee Johanisi bi sikifi, ta lei taa Keesitu sëmbë musu ta lobi wotowan. Di Johanisi bi sikifi soni di nama ku di libi u Jesosi, a bi sikifi soni di nama ku lobi. A bi sikifi soni di nama ku lobi möön fa dee buku Mateosi, Maikusi, ku Lukasi, ta taki soni u lobi. Johanisi bi sa abi söwan 100 jaa, di a bi sikifi dee fö buku di ta tja di në fëën. Dee fö buku dë ta lei u taa  lobi hën musu ta mbei u ta du hii soni di u ta du (1 Joh. 4:10, 11). Ma tökuseei di soni aki an bi puu taa Johanisi seei bi musu lei u lobi wotowan tu.

4. Hii juu Johanisi bi ta lei taa a lobi wotowan u?

⁴ Di Johanisi bi dë wan njönku kijoo, nöö na hii juu a bi ta lei taa a lobi wotowan. Wan daka, Jesosi ku dee bakama fëën bi ta pasa a Samalia nango a Jelusalen, nöö Johanisi seei bi dë a dendu tu. Dee sëmbë u wan u dee pisiwata u Samalia, an bi tei de ku wai. Andi Johanisi bi du? Wë a bi hakisi Jesosi ee de bi sa mbei faja kumutu a liba ala ko tjuma hii dee sëmbë u di kamian dë tuu (Luk. 9:52-56). A wan woto daka, Johanisi an bi lei taa a lobi dee woto apösutu. A kan taa hën ku hën baaa Jakobosi, de bi hakisi de mama faa go hakisi Jesosi faa da de wan gaan faantiwöutu a di Könuköndë u Gadu. Di dee woto apösutu ko jei taa sö de bi du, hën hati u de boonu te na soni (Mat. 20:20, 21, 24). Ma hii fa Johanisi bi mbei dee föutu aki, tökuseei Jesosi bi lobi ën.​—Joh. 21:7.

5. Andi woo luku a di woto aki?

⁵ A di woto aki woo taki soni u Johanisi. Nöö woo luku so u dee soni dee a bi sikifi dee nama ku lobi. Di soni aki o heepi u fuu ko si unfa u sa lei taa u lobi dee baaa ku dee sisa fuu. Woo taki tu u wan fanöudu fasi fa wan hedima u wosudendu sa lei taa a lobi dee sëmbë fëën wosudendu.

6. Unfa Jehovah lei taa a lobi u?

⁶ U lo’ u si kuma te u ta pakisei bunu u wan sëmbë, ta fan suti ku ën, nöö di soni dë ta lei taa u lobi ën. Ma ee u kë lei wan sëmbë taa u lobi ën tuutuu, nöö u musu ta du soni tu di ta lei taa u lobi ën. (Luku Jak. 2:17, 26.) Wë Jehovah lobi u (1 Joh. 4:19). Nöö dee soni dee a sikifi a di Bëibel ta lei taa a lobi u tuutuu (Ps. 25:10; Lom. 8:38, 39). Ma na dee soni dee a ta piki u a di Wöutu fëën wanwan nöö ta mbei u dë seiki taa a lobi u. A ta du soni tu u lei taa a lobi u. Johanisi bi sikifi taa: „Nöö u si taa Masa Gadu lobi u tuu. Biga a tei di wan kodo Womi Mii fëën tö di a abi, manda ko a di goonliba aki fuu sa feni di teego libi u Masa Gadu” (1 Joh. 4:9). Jehovah bi da pasi u di Womi Mii fëën tja sitaafu fuu hedi, söseei a bi da pasi faa dëdë fuu hedi tu (Joh. 3:16). Dee soni aki ta lei u gbelingbelin unfa Jehovah lobi u tjika.

7. Andi Jesosi bi du u lei taa a lobi u?

⁷ Jesosi bi piki dee bakama fëën taa a lobi de. Ma na piki nöö a bi ta piki de taa a lobi de (Joh. 13:1; 15:15). Ma a bi ta du soni tu u lei  taa a lobi de. Jesosi bi taki taa: „Biga na wan sëmbë sa lobi sëmbë ku sö wan gaan lobi kuma di sëmbë di o lasi ën libi fëën mati hedi” (Joh. 15:13). Andi u musu kë du te u ta pakisei dee soni dee Jehovah ku Jesosi du da u?

8. Andi 1 Johanisi 3:18 ta piki u taa u musu ta du?

⁸ U ta lei taa u lobi Jehovah ku Jesosi, te u ta piki de buka a soni (Joh. 14:15; 1 Joh. 5:3). Jesosi bi piki u gbelingbelin taa u musu ta lobi u na u (Joh. 13:34, 35). U musu ta piki dee baaa ku dee sisa fuu taa u lobi de, ma u musu ta lei de tu unfa u lobi de tjika. (Lesi 1 Johanisi 3:18.) Andi ku andi u sa du u lei de taa u lobi de?

9. Andi Johanisi bi du u di a lobi wotowan?

⁹ Johanisi bi sa fika ku hën tata, nöö a mbei möni ku di fisi wooko di de bi ta du. Ma a bi disa di wooko dë go heepi sëmbë u de ko sabi soni u Jehovah ku Jesosi. Soni bi ta taanga da Johanisi. Sëmbë bi ta du ku ën, nöö di a bi ko gaan sëmbë kaa, hën de bi söötö ën buta a dunguwosu (Tjab. 3:1; 4:1-3; 5:18; Ako. 1:9). Hii fa Johanisi bi dë a dunguwosu u di a bi ta konda soni u Jesosi da sëmbë, tökuseei a bi lei taa a bi ta buta pakisei a wotowan. Di a bi dë a di paati de kai Patimosi, hën a bi sikifi di buku Akoalimbo manda da dee kemeente, u de bi sa sabi andi bi o pasa bakaten (Ako. 1:1). Nöö a kan taa di a bi kumutu a dunguwosu a Patimosi, nëën a bi sikifi di buku fëën di ta taki soni u di libi u Jesosi, ku di diniwooko fëën. A bi sikifi dii biifi tu, u da dee baaa ku dee sisa fëën taanga. Unfa u sa djeesi Johanisi?

10. Unfa i sa lei taa i lobi wotowan?

¹⁰ I sa lei taa i lobi wotowan, ku di soni di i buta taa joo du ku i libi. Di goonliba u Saatan aki, bi o kë fii ta tei di ten ku di kaakiti fii, fii ta du soni da iseei. A bi o kë fii mbei möiti fii ko abi te a hia möni, nasö fii ko dë wan nëbai sëmbë. Ma dee tuutuu Keesitu sëmbë dee dë a hii së u di goonliba a di ten aki, ta tei di ten ku di kaakiti u de u paaja di bunu buka, söseei u de heepi sëmbë u de ko dë mati u Jehovah. So u de ta du di wooko aki hiniwan daka seei.

11. Unfa sömëni Keesitu sëmbë ta lei taa de lobi Jehovah ku dee baaa ku dee sisa u de?

¹¹ Sömëni Keesitu sëmbë a di ten aki, musu ta wooko hiniwan daka u de sa sölugu deseei, söseei u de sa sölugu dee sëmbë u de wosudendu. Ma tökuseei dee Keesitu sëmbë aki, ta du hii soni di de sa du da di ölganisaasi u Gadu. So u de nango heepi te wan gaan hogi pasa a wan kamian, söseei so u de nango heepi mbei kamian ka u ta dini Gadu. Hii sëmbë ta da möni u heepi du dee wooko di di ölganisaasi musu du a hii së u goonliba. De ta du dee soni aki u di de lobi Gadu, söseei u di de lobi wotowan. Te u nango a dee komakandi hiniwan wiki, nöö u ta da piki a de, nöö u ta lei taa u lobi dee baaa ku dee sisa fuu. Hii fa u ta wei so juu, tökuseei u nango a dee komakandi fuu. So juu senuwe ta naki u, ma tökuseei u ta da piki. Söseei hii fa u ta abi bookohedi, tökuseei u ta fan ku useei ta da useei taanga te u go a dee komakandi (Heb. 10:24, 25). U ta tei ën u bigi seei taa dee baaa ku dee sisa fuu ta mbei hii dee möiti aki!

12. Na un woto fasi Johanisi bi ta lei taa a lobi dee baaa ku dee sisa fëën?

¹² Johanisi bi ta lei taa a lobi dee baaa ku dee sisa fëën, u di a bi ta gafa de. Ma a bi ta da de köni tu, u de saanfa de musu du soni. A dee biifi di Johanisi bi sikifi, a bi gafa dee baaa ku dee sisa fëën u di de bi abi wan taanga biibi, söseei u di de bi ta du soni a wan bunu fasi. Ma  a bi piki de tu, u de ta köni u de an go du wan gaan zöndu (1 Joh. 1:8–2:1, 13, 14). Useei musu ta gafa dee baaa ku dee sisa fuu u dee bunu soni di de ta du. Ma ee wan sëmbë ko ta tja hënseei a wan fasi di an bunu, nöö u musu leti ën buta a pasi u di u lobi ën. U musu a’ hati fuu go bai wan mati fuu a wan soni di a ta du di an bunu, biga di Bëibel ta piki u taa tuutuu mati ta leti deseei buta a pasi.​—Nöng. 27:17.

13. Andi wa musu du?

¹³ So juu u ta lei taa u lobi dee baaa ku dee sisa fuu, te u ta hoi useei fu wa du wan soni. U sa ta du di soni aki, te hati fuu an ta boonu hesi te de taki wan soni di hati u. Boo buta pakisei a wan soni di bi pasa ku Jesosi kölö sö ufö a dëdë. A bi piki dee bakama fëën taa ee de kë libi u teego, nöö de bi musu njan di sinkii fëën, nöö de bebe di buuu fëën (Joh. 6:53-57). Sömëni u dee bakama fëën an bi lobi di soni di a bi taki dë, nöö di soni dë mbei de bi go disëën. Ma dee tuutuu mati fëën bi fika ku ën, nöö Johanisi bi dë wan u dee mati dë. Wë dee mati u Jesosi aki seei, an bi fusutan di soni di a taki. Nöö a kan taa di soni di a bi taki, bi toobi de tu. Ma de an bi si kuma di soni di Jesosi bi taki dë an bi bunu, söseei de an bi go disëën u di soni dë hedi. De bi ta futoou ën, u di de bi sabi taa a bi ta taki tuutuu soni (Joh. 6:60, 66-69). Wë a dë fanöudu u hati fuu an ta boonu hesi poi, te wan mati fuu taki wan soni di toobi u. Ka u hati fuu boonu, nöö u musu da de pasi u de konda andi de bi kë taki.​—Nöng. 18:13; Peleik. 7:9.

14. Faandi mbei nöiti u musu buuse dee baaa ku dee sisa fuu?

¹⁴ Johanisi bi taki tu taa wa musu buuse dee baaa ku dee sisa fuu. Ee wa haika di soni di Johanisi bi taki, nöö woo da Saatan pasi faa mbei u du soni di an bunu (1 Joh. 2:11; 3:15). Di soni aki hën bi pasa ku so u dee fesiten Keesitu sëmbë. A di ten dë Saatan bi ta mbei hii möiti, u dee dinima u Gadu ko ta buuse deseei, söseei u de an ko ta libi makandi möön kuma wan famii. A di pisiten di Johanisi bi sikifi dee biifi fëën, nöö wanlö womi di bi kë du di seei soni di Saatan bi kë du, bi ko a di kemeente. Wan u dee womi aki de bi ta kai Dioteefesi, nöö a bi ta du soni u mbei dee baaa ku dee sisa an libi fiifii ku deseei möön (3 Joh. 9, 10). An bi ta lesipeki dee keling-gaanwomi di di tii kulupu bi ta manda go luku di kemeente ka a dë. A bi ta kë puu sëmbë a di kemeente, ee dee sëmbë dë bi ta tei sëmbë di an lobi,  ku wai. Di soni di a bi ta du dë an bi bunu seepiseepi! A di ten aki seei Saatan ta mbei taanga möiti u tapa dee sëmbë u Gadu u de an libi fiifii ku deseei. Nöiti u musu buuse dee baaa ku dee sisa fuu, ma u musu ta heepi de a soni hii juu.

15. Andi wan hedima u wosudendu musu hoi a pakisei?

¹⁵ Wan fasi fa wan hedima u wosudendu ta lei taa a lobi dee sëmbë fëën, hën da te a ta sölugu de (1 Tim. 5:8). Ma a musu hoi a pakisei tu taa di möön fanöudu soni, hën da a musu heepi dee sëmbë fëën u de ku Jehovah sa ko dë gaan mati (Mat. 5:3). Jesosi da wan sëmbë di dee hedima u wosudendu sa djeesi. Di buku Johanisi ta lei taa hii fa Jesosi bi dë a di posu ta dëdë, tökuseei a bi ta mëni dee sëmbë fëën. Johanisi bi dë makandi ku Jesosi mama Malia, a di kamian ka de bi peka Jesosi a di posu. Hii fa a bi fika piki u Jesosi böö koti, tökuseei a bi seeka soni u Johanisi bi sa ta sölugu hën mama (Joh. 19:26, 27). Jesosi bi abi baaa ku sisa di bi o sa sölugu Malia, ma a djei kuma a di ten dë, na wan u dee baaa ku dee sisa fëën bi ko dë bakama fëën jeti. Fëën mbei Jesosi bi kë seeka soni, sö taa Malia bi sa feni wan sëmbë di bi o ta sölugu ën, söseei di bi o ta heepi ën fu hën ku Gadu sa dë mati go dou.

16. Un faantiwöutu Johanisi bi abi?

¹⁶ Johanisi bi abi sömëni faantiwöutu. A bi dë wan apösutu, nöö a bi musu ta peleiki fajafaja. A kan tu taa a bi tööu. Nöö ee a bi dë sö, hën da a bi musu ta sölugu dee sëmbë fëën wosudendu, söseei a bi musu ta heepi de u de ku Jehovah sa dë mati (1 Kol. 9:5). Andi dee hedima u wosudendu sa lei a Johanisi?

17. Faandi mbei a dë fanöudu taa wan hedima u wosudendu musu ta heepi dee sëmbë fëën, u de ku Jehovah sa dë mati?

¹⁷ Wan baaa di dë hedima u wosudendu, sa abi sömëni faantiwöutu. A musu ta wooko taanga te a dë a wooko, sö taa a sa tja gafa ko da Jehovah (Ef. 6:5, 6; Tit. 2:9, 10). Boiti di dë, a sa abi faantiwöutu a di kemeente. Kandë a musu ta da dee baaa ku dee sisa fëën taanga, nasö kandë a musu ta tei fesi a di peleikiwooko. Ma naandë seei, a musu ta lei hën mujëë ku dee mii fëën soni u Bëibel. Wë an dë u taki taa dee sëmbë fëën o ta wai taa a ta sölugu de, taa a ta lei taa a lobi de, söseei taa a ta heepi de u de ku Jehovah sa dë mati.​—Ef. 5:28, 29; 6:4.

18. Fuun soni Johanisi bi dë seiki?

¹⁸ Johanisi bi libi gaandi, nöö sömëni soni bi miti ën di bi sa mbei di biibi fëën ko suwaki. Ma tökuseei hii juu a bi ta mbei möiti u du dee soni dee Jesosi bi taki. A bi ta lei taa a lobi dee baaa ku dee sisa fëën. Di soni aki mbei Johanisi bi dë seiki taa Jehovah ku Jesosi lobi ën, söseei taa de bi o dëën di kaakiti di a bi abi fanöudu faa hoi dou, aluwasi un pei fuka bi ta miti ën (Joh. 14:15-17; 15:10; 1 Joh. 4:16). Na wan soni di Saatan ku di goonliba fëën bi ta du, bi sa tapa Johanisi faa lei dee baaa ku dee sisa fëën taa a lobi de.

19. Andi 1 Johanisi 4:7 ta da u taanga fuu du, nöö faandi mbei a ta da u taanga fuu du ën?

¹⁹ Saatan an lo’ sëmbë. Nöö useei ta libi a wan goonliba di Saatan ta tii, leti kumafa a bi dë a di ten u Johanisi (1 Joh. 3:1, 10). Saatan bi o kë tapa u fu wa lobi dee baaa ku dee sisa fuu möön. Ma an sa du di soni dë, ee wa dëën pasi faa du ën. Fëën mbei boo ta mbei möiti hii juu, fuu ta lei dee baaa ku dee sisa fuu taa u lobi de, ku dee soni dee u ta taki, söseei ku dee soni dee u ta du. Te u ta du dee soni aki, nöö woo ta wai taa u dë a di wosudendu u Jehovah, söseei di libi o ta suti da u.​—Lesi 1 Johanisi 4:7.