1. Xú káʼnii eʼni makumaaʼ ga̱jma̱a̱ numuu ngajua ndrígóo Dios rá.

APÓSTOL Juan niʼnirámáʼ “Dios nandoo kaʼyulú” (1 Juan 4:8). Ajngáa dí niʼthí, rúʼko̱ naʼni marmáʼáan a̱jkiu̱lú dí gíʼdoo wéñuʼ numuu: Dí Dios niʼniáanlú ga̱jma̱a̱ nandoo kaʼyulú. ¡Ngajua ndrígóo naʼniulú rí xamiñulú!, dí makuwáanʼ gagi ga̱jma̱a̱ rí nda̱a̱ dí gáʼyulúʼ.

2. a) Xó má naʼthí náa Mateo 22:37-40, ndiéjunʼ nindxu̱u̱ timbá kiʼtáñajunʼ dí gíʼdoo numuu rá. b) Ndíjkha dí maʼni a̱jma̱ kiʼtáñajunʼ nguáná maʼniulú gakhii muʼnimbulúʼ rá.

² Ikháán bi̱ ni̱ndxu̱lú cristiano rí maʼndulú kuʼñúún a̱ngiu̱lú na̱nguá nindxu̱u̱ mbá dí muraʼwíi muʼni. Nindxu̱u̱ mbá kiʼtáñajunʼ (atraxnuu Mateo 22:37-40). * Índo̱ nuniʼnilú májánʼ Jeobá, mbáa xúʼko̱ tséʼniulú gakhii muʼnimbulúʼ dí timbá kiʼtáñajunʼ. Maski ajndu Jeobá nindxu̱u̱ mbáa bi̱ tsikieʼkhuunʼ mú, nagawíin a̱jkiu̱u̱n kaʼyulú. Mú mbáa nguáná maʼniulú gakhii muʼnimbulúʼ dí maʼni a̱jma̱ kiʼtáñajunʼ. Náá numuu rá. Mbáa ga̱jma̱a̱ numuu dí a̱ngiu̱lú nguáná muthulú dí maʼni gawúnlú o muniulúʼ dí raʼkhí. Jeobá nijmiuu tikhun xa̱bi̱i̱ mu muniraʼmáʼ tikhu consejo rí xóo ma̱ndoo  mambáyulú rí maʼndulú kuʼyamijná. Mbáa dí ikhaa ninindxu̱u̱ Juan (1 Juan 3:11, 12).

3. Ndiéjunʼ niʼthí Juan rá.

³ Náa i̱yi̱i̱ʼ dí niʼnirámáʼ apóstol Juan niʼthí, rí cristiano gíʼmaa rí maʼndún kuyamijná. Índo̱ niʼnirámáʼ niʼthí rí xóo nixtáa ga̱jma̱a̱ Jesús, náa evangelio ndrígóo naʼthí itháán ga̱jma̱a̱ numuu ngajua, ki xóo náa i̱ʼwáʼ evangelio. Juan gíʼdoo má 100 tsiguuʼ índo̱ niʼnirámáʼ evangelio rí kayá má mbiʼyuu ga̱jma̱a̱ ajtsú carta ndrígóo. Náa i̱yi̱i̱ʼ dí niʼnirámáʼ, ikhí nasngájma dí ngajua gíʼmaa marigá náa cristianos (1 Juan 4:10, 11). Maski ajndu ikhaa niʼnirámáʼ rígi̱, mú ndijyúuʼ majmañuu ikha rígi̱.

4. Lá nisngájma ngajua Juan náa eʼwíinʼ rá.

⁴ Nákha Juan ninindxu̱u̱ tikhu xa̱bu̱, na̱nguá nisngajma ngajua náa eʼwíinʼ. Mbá xkri̱da, índo̱ ni̱jkha̱ gáʼtaraʼa ga̱jma̱a̱ Jesús náa Jerusalén ma̱ngaa náa Samaria. Xa̱bu̱ bi̱ kúwá ikhí na̱nguá nindúún gundri̱gui̱i̱ májánʼ Jesús ma̱ngaa bi̱ na̱jkha̱ gajmíi̱n. Ndiéjunʼ niʼthí Juan rá. Ikhaa niʼthí ¡wáa gaʼni magajtaa aguʼ mekhuíí mu maʼni gámbíin xúgíinʼ xa̱bu̱! (Lucas 9:52-56). Imbo̱ʼ miʼtsu̱u̱, Juan na̱nguá nisngájma rí nandoo kaʼñún a̱ngui̱i̱n bi̱ ni̱ndxu̱ún apóstol. Ikhaa ga̱jma̱a̱ ndxájuu Santiago ninda̱ʼa̱a̱ rudún dí maʼthúu̱n Jesús mu maxnúún ñajunʼ rí gíʼdoo numuu, índo̱ gaʼtáñajunʼ, índo̱ eʼwíinʼ apóstol nidxawíín dí niʼni Juan ga̱jma̱a̱ Santiago ¡ra̱ʼkhá tháán nikiʼnii! (Mateo 20:20, 21, 24). Mú maski ajndu mbaʼa dí raʼkhí niʼni Juan, Jesús nindoo kaʼyoo má xúʼko̱ (Juan 21:7).

5. Ndiéjunʼ guʼnigajmaa náa artículo rígi̱ rá.

⁵ Náa artículo rígi̱, muʼnigajmaa xkridoo Juan ga̱jma̱a̱ ngajua dí niʼnirámáʼ náa i̱yi̱i̱ʼ ndrígóo. Índo̱ guʼnigajmaa, majmañulúʼ xú káʼnii gaʼndulúʼ kuʼñúún a̱ngiu̱lú. Ma̱ngaa majmañulúʼ dí gíʼdoo numuu rí mbáa bi̱ kayá edxu̱u̱ náa mbá guʼwá maʼndoo kaʼñún bi̱ xtáa gajmíi̱n.

6. Xú káʼnii nisngájma Jeobá rí nandoo kaʼyulú rá.

⁶ Mu maʼndulú kuʼñúún a̱ngiu̱lú gíʼmaa rí makumulúʼ kuʼñúún ma̱ngaa guʼthúún ajngáa rí maʼni makuwá gagi. Mu makujmaa á mu gajkhun nandulú kuʼñúún gíʼmaa musngajmá ga̱jma̱a̱ rí nuʼni (atayáá ma̱ngaa Santiago 2:17, 26). Jeobá nandoo kaʼyulú (1 Juan 4:19). Numuu dí naʼthúlú ajngáa mitsaanʼ dí kiʼnirámáʼ náa Biblia (Sal. 25:10; Rom. 8:38, 39). Nduʼyáá gajkhun dí Dios nandoo kaʼyulú, raʼkháa índo̱ naʼthí, naʼni.  Juan niʼnirámáʼ: “Numuu rí Dios nindoo kaʼñún wéñuʼ xa̱bu̱ numbaaʼ rí asndu nixnáa A̱ʼdióo bi̱ mbáwíi, mu xúgínʼ bi̱ gaguaʼdáá fe xákhañun, makuwá kámuu mbiʼi” (1 Juan 4:9). Jeobá niniñuuʼ dí A̱ʼdióo bi̱ mbáwíi mamínuuʼ ma̱ngaa rí makhañúu ga̱jma̱a̱ numulú (Juan 3:16). Rígi̱ nasngájma kaʼwu dí Jeobá nandoo kaʼyulú.

7. Xú káʼnii nisngájma Jesús dí nindoo kaʼyulú rá.

⁷ Jesús niʼthúún discípulos ndrígóo dí nandoo kaʼñún (Juan 13:1; 15:15). Ma̱ngaa náa ikháanʼlu, ra̱ʼkhá i̱ndó niʼthí, ga̱jma̱a̱ rí niʼni. Náa Juan 15:13 naʼthí: “Nimbáa na̱nguá gíʼdoo ngajua xóo rígi̱: Rí mbáa maxnáximinaʼ ga̱jma̱a̱ numún bi̱ nambáxu̱u̱ gajmíi̱n”. Índo̱ nundxa̱ʼwa̱míjnalú dí niʼni ga̱jma̱á ni̱ndxu̱lú Jeobá ma̱ngaa Jesús. Ndiéjunʼ gíʼmaa muʼni rá.

8. Xó má naʼthí náa 1 Juan 3:18, ndiéjunʼ dí gíʼmaa muʼni rá.

⁸ Índo̱ nuʼnimbulú kuʼyáá Jeobá ga̱jma̱a̱ Jesús xúʼko̱ nusngajmá rí nandulú kuʼñúún (Juan 14:15; 1 Juan 5:3). Jesús niʼthí dí gíʼmaa maʼndulú kuʼyamijná (Juan 13:34, 35). Mú raʼkháa i̱ndó muʼthá rí nandulú kuʼñúún a̱ngiu̱lú, ndayóoʼ dí muʼgíʼ muʼni (atraxnuu 1 Juan 3:18). * Ndiéjunʼ gáʼyóoʼ muʼni mu musngajmá rí nandulú kuʼñúún xá.

9. Ndiéjunʼ nixkajxi̱i̱ maʼni Juan ga̱jma̱a̱ numuu ngajua rí gíʼdoo náa eʼwíinʼ rá.

⁹ Juan ma̱ndoo maguanúu ga̱jma̱a̱ anu̱u̱ mu mbain e̱gi̱ʼ mu xúʼko̱ maxnúún rí ndañún bi̱ kúwá náa guʼwún. Ikhaa niraʼwíí dí mambáñún eʼwíinʼ majmañún dí gajkhun ga̱jma̱a̱ numuu Jeobá ma̱ngaa Jesús. Dí niraʼwíí maʼni ninindxu̱u̱ gakhii. Numuu dí nimínuuʼ, rúʼko̱ dí nigíʼnuu iwáá kayuuʼ índo̱ na̱jkha̱ rámbá siglo timbá ga̱jma̱a̱ nindxu̱u̱ má xa̱bu̱ nikhi̱i̱ ma̱ngaa nixkháá náa xuajñuu (Hechos 3:1; 4:1-3; 5:18; Apoc. 1:9). Índo̱ Juan kraʼaa náa guʼwá e̱jua̱nʼ dí rígá náa isla rí mbiʼyuu Patmos, niʼnirámáʼ visión rí nigiʼdoo ma̱ngaa nikuʼma náa congregación mu mbuyáá dí “nánguá má mbayuuʼ marigá” (Apoc. 1:1). Ikha jngó, nda̱wa̱á rí nigájnáa náa guʼwá e̱jua̱nʼ, Juan niʼnirámáʼ náa evangelio ndrígóo dí xóo nixtáa ma̱ngaa rí xóo niʼtáraʼa ga̱jma̱a̱ Jesús. Ma̱ngaa niʼnirámáʼ náa mbá najtsú carta mu maxnúún tsiakii a̱ngui̱i̱n. Xú káʼnii gándoo guʼyaridáá xkridoo Juan rá.

10. Xú káʼnii gándoo gatasngajmá rí nandaaʼ xtañún xa̱bu̱ rá.

¹⁰ Ma̱ndoo matasnga̱jmá rí nandaaʼ xtañún xa̱bu̱ ga̱jma̱a̱ rí xóo natraʼwíí matani. Náa numbaaʼ dí kúwáanʼ náa naʼtáñajunʼ Gixa̱a̱, naʼni dí majmaa mbiʼi ga̱jma̱a̱ tsiakii ndrígáaʼ, mu matiejunʼ mu xúʼko̱ maraʼdáá mbújkha̱a̱. Mú bi̱ nutaraʼa numuu Reino ikhiin nuniñaaʼ xúgíʼ dí rígá náa numbaaʼ mu xúʼko̱ majmúún mbiʼi ndrígu̱ún mutaraʼa. Tikhun nutaraʼa itháán ga̱jma̱a̱ nuni kajxi̱ ñajuunʼ Dios.

11. Xú káʼnii esngajmá mbaʼin a̱ngiu̱lú dí nandún kuyáá Jeobá ga̱jma̱a̱ a̱ngiu̱ún rá.

¹¹ Mbaʼin a̱ngiu̱lú ndayóoʼ dí muñajunʼ, mu xúʼko̱ mutsi rí nda̱ñu̱u̱n ikhiin ma̱ngaa bi̱ kúwá náa guʼwún. A̱ngiu̱lú bugi̱ numbayíí má xúʼko̱ xuajñuu Dios asndu xóo má naʼngu̱u̱n. Tikhun dí ikhiin nuyambáá náa narígá gamiéjunʼ, náa naguma guʼwá, eʼwíinʼ nurajkua̱a̱ mbújkha̱a̱ náa caja. Nuni rígi̱ numuu rí nandún kuyáá Dios ga̱jma̱a̱ a̱ngiu̱ún. Ma̱ngaa nusngajmá rí nandulú  kuʼñúún a̱ngiu̱lú índo̱ nuxnalú comentario náa reunión. Gajkhun má nguáná naʼni néʼngulú, mu nuʼni tsiakimijna makuwáanʼ náa reunión, ga̱jma̱a̱ nguáná asndu namíñulú gúxna comentario. Ma̱ngaa xúgiáanʼ guaʼdáá xkujndu, mú índo̱ na̱jkua̱ náa reunión nduʼyáaʼ tsiakii (Heb. 10:24, 25). Ra̱ʼkhá tháán nuxníin núma̱a̱ wéñuʼ a̱ngiu̱lú bi̱ nuni xígi̱ kaʼnii.

12. Xú káʼnii imbo̱ʼ dí nisngájma Juan rí nindoo kaʼñúún a̱ngui̱i̱n rá.

¹² Juan nisngájma rí nindoo kaʼñúún a̱ngui̱i̱n, niʼthúún dí májánʼ dí kúwá runi ma̱ngaa nixnúún consejo. Mbá xkri̱da náa carta dí niʼnirámáʼ, niʼthúún rí ñajunʼ dí kúwá runi nindxu̱u̱ májánʼ ga̱jma̱a̱ fe rí guaʼdáá ma̱ngaa nixnúún mbájmbu tikhu consejo ga̱jma̱a̱ numuu aʼkhá (1 Juan 1:8–2:1, 13, 14). Xúʼko̱ má kayuuʼ, gíʼmaa muʼthúún a̱ngiu̱lú dí májánʼ kúwá runi. Mú a mu mbáa naʼni dí raʼkhí, guxnáá consejo xúʼko̱ nusngajmáá rí nandulú kuʼyáá. Gajkhun má, ndayóoʼ rí xámiñulu mu muxnáá consejo mbáa mígiulú. Náa Biblia naʼthí bi̱ nambájxu̱u̱n gajkhun, numbayumijná ga̱jma̱a̱ nuxprigumijná (Prov. 27:17).

13. Ndiéjunʼ dí ragíʼmaa mu̱ʼni̱ rá.

¹³ Nguáná nusngájma rí nandulú kuʼñúún a̱ngiu̱lú ga̱jma̱a̱ dí tséʼni. Mbá xkri̱da, tsekiʼnáanʼ mbá nacha̱ índo̱ nuthi mbá dí naʼni gawúnlú. Guʼyáá dí nigíʼnuu Jesús, índo̱ na̱jkha̱ rajngiyúu mbiʼi mu murugua̱a̱, niʼthúún discípulo ndrígóo dí ikhiin muphu xuyuuʼ ga̱jma̱a̱ muwan eʼdiuu mu xúʼko̱ ma̱ndoo makuwá (Juan 6:53-57). Discurso rígi̱ niʼniún tsiánguá tikhun ikha jngó niniñaa, mú Juan ga̱jma̱a̱ eʼwíinʼ túniña̱a̱ʼ. Maski tákru̱ʼu̱u̱n dí niʼthí. Niguájun jmbu náa Jesús ga̱jma̱a̱ na̱nguá ndiyáá náa dí raʼkhí dí niʼthí ma̱ngaa táʼni gawúunʼ. Dí phú nini nikumu̱ún kuyáá ga̱jma̱a̱ ndiyáá dí niʼthí nindxu̱u̱ gajkhun (Juan 6:60, 66-69). Gíʼdoo wéñuʼ numuu rí xagawúnlú nacha̱ dí gúthi mígiulú, dí phú gíʼmaa muʼni guʼthúún náa dí tákru̱ʼu̱lú májánʼ (Prov. 18:13; Ecl. 7:9).

14. Náá numuu dí ragíʼmaa muniʼñááʼ maga̱ja̱a̱ náa a̱jkiu̱lú rí nawiyulú kuʼñúún a̱ngiu̱lú rá.

¹⁴ Juan niʼthí ma̱ngaa dí xáwiyulú kuʼñúún a̱ngiu̱lú. Á mu tséʼnimbánii consejo ndrígóo, gámii maʼni dí Gixa̱a̱ maʼni dí xákuwáanʼ mbajnduʼ (1 Juan 2:11; 3:15). Rígi̱ dí  nigiʼnúún tikhun cristiano bi̱ nikúwá índo̱ na̱jkha̱ rambáa siglo timbá. Gixa̱a̱ niʼni xúgíʼ xóo má niʼngo̱o̱ mu mawiyúun kuyamijná a̱ngiu̱lú mú xúʼko̱ xákuwa mbá kambájxu̱u̱n. Índo̱ Juan niʼnirámáʼ carta, tikhun nusngajmá rí nuni xó má nandoo Gixa̱a̱ náa congregación. Mbáa dí ikhaa ninindxu̱u̱ Diótrefes, numuu dí xtáa raʼni wajíin a̱ngiu̱lú náa congregación (3 Juan 9, 10). Na̱nguá ndiʼyamajkhún a̱ngiu̱lú bi̱ nikungui̱i̱nʼ Cuerpo Gobernante. Rí asndu nixkawíin tikhun a̱ngiu̱lú náa congregación bi̱ nuniu̱u̱n rí májánʼ bi̱ ikhaa tsiyóoʼ gaʼñún. ¡Ra̱ʼkhá tháán raʼkhí dí niʼni! Xúʼko̱ má rí mbiʼi xúgi̱, Gixa̱a̱ xtáa raʼni xúgíʼ xó má naʼngo̱o̱ mu markuajíin a̱ngiu̱lú. Mú nditháan xuniʼñamijná.

15. Ndiéjunʼ gíʼmaa mbaʼyoo májánʼ mbáa xa̱bu̱ nikhi̱i̱ rá.

¹⁵ Mbá rí gíʼdoo wéñuʼ numuu rí naʼni mbáa xa̱bu̱ dí nasngájma rí nandoo kaʼñún bi̱ kúwá náa goʼwóo índo̱ naxnún rí nda̱ñu̱u̱n (1 Tim. 5:8). Mú, gíʼmaa marmáʼáan a̱jkiu̱u̱n dí maxnúún rí nda̱ñu̱u̱n xambáñún mu mambájxu̱u̱n májánʼ gajmiún Dios (Mat. 5:3). Guʼyáá xkri̱da dí nijmuu Jesús náa naʼthí ga̱jma̱a̱ numuu mbáa xa̱bu̱ nikhi̱i̱. Náa evangelio ndrígóo Juan naʼthí, índo̱ Jesús kiʼdujmaa má náa ixi̱, nixmiéjuunʼ ga̱jma̱a̱ numún bi̱ kúwá náa goʼwóo. Ikhí wíji̱ Juan ga̱jma̱a̱ María. Maski ajndu Jesús na̱jkha̱ rakháñuu, mú niʼthúu̱n Juan dí mañewu̱u̱n ru̱dúu̱ (Juan 19:26, 27). Gajkhun má gíʼdiin eʼwíinʼ a̱ngui̱i̱n, mú ikhiin nixmiéjunʼ itháán rí muxnáá rí gáʼyóoʼ María. Ga̱jma̱a̱ na̱nguá ni̱ndxu̱ún discípulo, ikha jngó Jesús nindoo dí maxtiewa̱a̱n májánʼ María ma̱ngaa rí mambájxu̱u̱ ga̱jma̱a̱ Dios.

16. Xú káʼnii ñajunʼ nigiʼdoo Juan rá.

¹⁶ Juan nigiʼdoo mbá ñajunʼ mba̱a̱. Numuu dí nindxu̱u̱ mbáa apóstol ga̱jma̱a̱ ikhaa mínaʼ ndiyóoʼ dí magíʼdu̱u̱ maʼtáraʼa, mbáa ma̱ngaa ninigún, ikha jngó ndiyóo mbaʼyoo awáán ñajunʼ, mu xúʼko̱ ma̱ndoo maxnún rí ndañún bi̱ kúwá náa goʼwóo, ga̱jma̱a̱ rí mambáñún mu mambájxu̱u̱n májánʼ gajmiún Dios (1 Cor. 9:5). Ndiéjunʼ ikha ejmañún xabuanii rígi̱ dí mbiʼi xúgi̱ rá.

17. Ndíjkha rí gíʼdoo numuu dí xa̱bu̱ nikhi̱i̱ mañewu̱u̱n bi̱ xtáa gajmíi̱n mu mambájxu̱u̱n itháán gajmiún Dios rá.

¹⁷ Mbáa ndxájulú bi̱ gíʼdiin e̱ji̱i̱n, nagiʼdoo  mbaʼa ñajunʼ, mbá xkri̱da, ndayóoʼ rí maʼni májánʼ ñajunʼ, mu xúʼko̱ makujmaa mbáa xa̱bu̱ májáanʼ náa inuu Jeobá (Efes. 6:5, 6; Tito 2:9, 10). Ma̱ngaa ma̱ndoo magiʼdoo ñajunʼ náa congregación xóo rí mani̱ndxu̱u̱ mbáa bi̱ mayéʼga edxu̱u̱ mu mañewu̱u̱n a̱ngiu̱lú o magíʼdu̱u̱ ginii maʼtáraʼa. Ma̱ngaa gíʼdoo wéñuʼ numuu dí maʼnigajmaa tsejtsí mbiʼi Biblia gajmíi̱n bi̱ kúwá náa goʼwóo. Ikhiin muxnáa núma̱a̱ wéñuʼ ga̱jma̱a̱ numuu tsiakii dí gaʼni, numuu dí xtáa rañewu̱u̱n ga̱jma̱a̱ nambáñun mu mambájxu̱u̱n itháán gajmiún Jeobá (Efes. 5:28, 29; 6:4).

18. Ndiéjunʼ rí ndiʼyoo gajkhun Juan rá.

¹⁸ Juan nixtáa mbayuuʼ ga̱jma̱a̱ mbaʼa dí nigíʼnuu. Niʼngo̱o̱ niraʼnuu xúgíʼ eni xkujndu dí maʼni makáguabaaʼ fe ndrígóo. Mú ikhaa niʼni xó má niʼngo̱o̱ mu maʼnimbánuu kiʼtáñajunʼ ndrígóo Jesús ma̱ngaa dí maʼndoo kaʼñún a̱ngui̱i̱n. Juan ndiʼyoo dí Jeobá ga̱jma̱a̱ Jesús muxnáá tsiakii mu maʼngo̱o̱ maraʼnuu gaʼkhu (Juan 14:15-17; 15:10; 1 Juan 4:16). Gixa̱a̱ táʼngo̱o̱ gaʼni dí Juan makáguabaaʼ.

19. Ndiéjunʼ naʼthúlú náa 1 Juan 4:7, dí gíʼmaa muʼni ga̱jma̱a̱ náá numuu rá.

¹⁹ Ikháá má xóo Juan, kúwáanʼ náa numbaaʼ dí naʼtáñajunʼ Gixa̱a̱ (1 Juan 3:1, 10). Ikhaa nandoo dí muniʼñááʼ raʼndulu kuyamijná. Xáʼngo̱o̱ gaʼni á mu tsiniʼñumijná, rúʼko̱ nusngajmá índo̱ nuʼthá ga̱jma̱a̱ dí nuʼni. Ga̱jma̱a̱ xúʼko̱ magiʼdoo numuu rí makuwáanʼ náa awúu̱n xuajñuu Jeobá, (atraxnuu 1 Juan 4:7). *