1. Ino luyando lwa Leza lumupa kulimvwa buti?

MWAAPOSTOLO Johane wakalemba kuti, “Leza nduyando.” (1Joh. 4:8) Majwi aaya atuyeezya kaambo kamasimpe kakuti: Leza, Ikasensa kabuumi, alimwi Ngokasensa kaluyando. Jehova ulatuyanda. Luyando lwakwe lutupa kulimvwa kukwabililwa, kukkomana, alimwi akukkutila.

2. Kweelana alugwalo lwa Matayo 22:37-40, milawo nzi yobilo mipati, alimwi nkaambo nzi ncocili ciyumu kuutobela mulawo wabili?

² Kubanakristo, kutondezya luyando taali makani aakulisalila buya pe. Pele mulawo buya. (Amubale Matayo 22:37-40.) Ikuti twamuzyiba kabotu Jehova, ciyootuubaubila kuutobela mulawo wakusaanguna. Amana buya, Jehova ulilondokede, ulatubikkila maano alimwi ulatweendelezya kabotu. Pele cilakonzya kutuyumina kuutobela mulawo wabili. Nkaambo nzi? Nkaambo kakuti bakwesu abacizyi, aabo mbotuyanzana limwi kapati, tabalondokede. Aboobo, zimwi ziindi balakonzya kutucitila zintu zitondezya kubula luyando naa kutabikkilwa maano. Jehova wakalizyi kuti ciyootuyumina kuutobela mulawo wabili, nkakaambo kaako wakabelesya bantu ibakalemba Bbaibbele, kutuyiisya kaambo ncotweelede kutondezya luyando kuli umwi aumwi alimwi ambotukonzya kulutondezya. Umwi wabasikulemba Bbaibbele aaba ngu Johane.—1Joh. 3:11, 12.

3. Ino ncinzi ncaakaamba Johane kujatikizya luyando?

³ Mumakani ngaakalemba, Johane cakwiinduluka-induluka wakatondezya kuti Banakristo beelede kutondezya luyando.  Mubbuku lyamu Bbaibbele ndyaakalemba Johane ilitwaambila buumi bwa Jesu, mabala aakuti “luyando” alimwi “akuyandwa” alibelesyedwe kapati kwiinda mubbuku lya Matayo, Marko, alimwi a Luka. Johane wakajisi myaka yakuzyalwa iili 100 ciindi naakalemba bbuku lya Johane alimwi aambi otatwe aajisi zina lyakwe. Eeli bbuku lituyiisya kuti zintu zyoonse nzyotucita zyeelede kweendelezyegwa aluyando. (1Joh. 4:10, 11) Nokuba boobo, cakatola ciindi kuti Johane aaiye makani aaya.

4. Sena lyoonse Johane wakali kutondezya luyando kuli bamwi?

⁴ Ciindi Johane naakacili mwana-mwana, talili lyoonse naakali kutondezya luyando. Mucikozyanyo, aciindi cimwi, Jesu alimwi abasikwiiya bakwe bakali kuya ku Jerusalemu kwiinda mu Samariya. Bantu bamumunzi umwi wa Samariya bakakaka kubatambula. Ino Johane wakacita buti? Walo amwanookwabo Jakobo bakalomba Jesu kuti aambile mulilo kuzwa kujulu kutegwa ubanyonyoone bantu boonse bamumunzi ooyu. (Lk. 9:52-56) Aciindi cimwi, Johane wakaalilwa kutondezya luyando kubaapostolonyina. Walo amwanookwabo Jakobo bakoongelezya banyina kuti balombe Jesu kutegwa abape zyuuno zisumpukide mu Bwami. Ciindi baapostolo bamwi nobakazyiba ncobakacita ba Jakobo a Johane, bakanyema kapati! (Mt. 20:20, 21, 24) Pele nokuba kuti Johane wakalubizya mumbazu zyoonse eezyi, Jesu wakali kumuyanda.—Joh. 21:7.

5. Ncinzi ncotutiilange-lange mucibalo eeci?

⁵ Mucibalo eeci, tulalanga-langa cikozyanyo ca Johane alimwi azintu zimwi nzyaakalemba kujatikizya luyando. Ciindi notucita boobo, tulaiya mbotukonzya kutondezya luyando kubakwesu abacizyi. Kuyungizya waawo, tulaiya nzila iiyandika kapati silutwe wamukwasyi mbwakonzya kutondezya kuti ulauyanda mukwasyi wakwe.

6. Mbuti Jehova mbwatondezya kuti ulatuyanda?

⁶ Tulakonzya kuyeeya kuti kuyanda bantu nkulimvwa buyo naa kwaamba zintu zibotu kujatikizya mbabo. Pele kutegwa luyando lube lwini-lwini, lweelede kutondezyegwa amumilimo. (Amweezyanisye Jakobo 2:17, 26.) Mucikozyanyo, Jehova ulatuyanda. (1Joh. 4:19) Alimwi ulalutondezya luyando oolo kwiinda mumajwi mabotu aalembedwe mu Bbaibbele. (Int. 25:10; Rom. 8:38, 39) Pele tulizyi kuti Leza ulatuyanda ikutali buyo akaambo kazintu nzyatwaambila pele akaambo kazintu nzyacita. Johane wakalemba kuti: “Lino oobu mbolwakayubununwa luyando lwa Leza kulindiswe, Leza wakatuma Mwanaakwe simuzyalwaalikke munyika ikutegwa tukonzye kuba abuumi kwiinda mulinguwe.” (1Joh. 4:9) Jehova wakazumizya kuti Mwanaakwe uuyandwa  apenge alimwi akutufwida. (Joh. 3:16) Sena inga twadooneka kuti Jehova ulatuyanda ncobeni?

7. Ncinzi Jesu ncaakacita kutondezya luyando ndwajisi kulindiswe?

⁷ Jesu wakaambila basikwiiya bakwe kuti ulabayanda. (Joh. 13:1; 15:15) Wakatondezya mbwaakali kubayanda basikwiiya bakwe alimwi andiswe, kutali buyo kwiinda muzintu nzyaakaamba pele amuzintu nzyaakacita. Jesu wakaamba kuti: “Kunyina uujisi luyando lwiinda loolu, lwakuti muntu umwi atuulile beenzinyina buumi bwakwe.” (Joh. 15:13) Twayeeya kujatikizya ncaakatucitila Jehova alimwi a Jesu, ino tweelede kucita nzi?

8. Ino lugwalo lwa 1 Johane 3:18 lutwaambila kucita nzi?

⁸ Tulatondezya kuti tulamuyanda Jehova alimwi a Jesu kwiinda mukubamvwida. (Joh. 14:15; 1Joh. 5:3) Alimwi cacigaminina Jesu wakatulailila kuti katuyandana. (Joh. 13:34, 35) Tatweelede kubaambila buyo kuti tulabayanda bakwesu abacizyi, pele alimwi tweelede kutondezya kuti tulabayanda kwiinda muzintu nzyotucita. (Amubale 1 Johane 3:18.) Ino nzintu nzi nzyotukonzya kucita cacigaminina izitondezya kuti tulabayanda?

9. Ino luyando lwakamupa kucita nzi Johane?

⁹ Naakali kuyanda Johane, naakazumanana kubeleka abausyi mumulimo wamukwasyi wakuzuba nswi. Pele wakabelesya buumi bwakwe boonse kugwasya bantu kwiiya kasimpe kajatikizya Jehova alimwi a Jesu. Buumi mbwaakasala Johane tiibwakali buuba-uba. Wakapenzyegwa, mpoonya ciindi naakacembaala, wakabikkwa muntolongo. (Mil. 3:1; 4:1-3; 5:18; Ciy. 1:9) Nociba ciindi naakali muntolongo, Johane wakatondezya kuti wakali kubayanda bamwi. Mucikozyanyo, ciindi naakali muntolongo ansumbu iitegwa Patimo, wakalemba bbuku lya Ciyubunuzyo akulituma kumbungano kutegwa bazyibe zintu “zyeelede kucitika lino-lino.” (Ciy. 1:1) Mpoonya, kulibonya kuti naakaangununwa kuzwa ku Patimo, Johane wakalemba bbuku lya Makani Mabotu kujatikizya buumi bwa Jesu alimwi amulimo wakwe. Alimwi wakalemba magwalo otatwe aayitwa zina lyakwe kutegwa akulwaizye alimwi akuyumya bakwesu abacizyi. Ncinzi ncomukonzya kwiiya kukulyaaba kwa Johane?

10. Ino inga mwatondezya buti kuti mulabayanda bantu?

¹⁰ Mulakonzya kutondezya kuti mulabayanda bantu kwiinda muzintu nzyomusala kucita mubuumi. Nyika ya Saatani iyanda kuti kamuyeeya buyo kujatikizya buumi bwanu alimwi ambomukonzya kujana mali naa kuba ampuwo. Muciindi caboobo, bakambausi ba Bwami ibalyaabide munyika yoonse, balabeleka kusikila mpobagolela kukambauka makani mabotu, alimwi akugwasya bantu kuba acilongwe a Jehova. Bamwi mane balacikonzya kukambauka alimwi akuyiisya ciindi coonse.

11. Mbuti basikumwaya banji basyomeka mbobatondezya kuti balamuyanda Jehova alimwi abasyominyina?

¹¹ Banakristo banji ibasyomeka beelede kubeleka mulimo wakumubili kutegwa bacikonzye kuligwasya alimwi akulanganya mikwasyi yabo. Nokuba boobo, balaigwasyilizya mbunga ya Leza munzila iili yoonse njobakonzya. Mucikozyanyo, bamwi balacikonzya kugwasyilizya nokwacitika ntenda, ibamwi balabeleka mumilimo yamayake alimwi boonse balijisi coolwe cakusanga mali kumulimo wanyika yoonse. Balacita zintu zyoonse eezyi akaambo kakuti balamuyanda Leza alimwi abantunyina. Nsondo ansondo, tulatondezya kuti tulabayanda bakwesu abacizyi kwiinda mukujanika kumiswaangano yambungano alimwi akutola lubazu. Nokuba kuti zimwi ziindi inga tulikatede, tulaunka kumiswaangano eeyo. Nokuba kuti inga tuliyoowede, tulapa bwiinguzi. Alimwi nokuba kuti toonse tulijisi mapenzi,  tulabakulwaizya bamwi kautanatalika muswaangano alimwi anowamana. (Heb. 10:24, 25) Eelo kaka tulalumba kapati kumulimo ngobabeleka babelesima!

12. Muunzila nzi aimwi Johane mwaakatondezya kuti wakali kubayanda bakwesu alimwi abacizyi?

¹² Johane wakatondezya kuti ulabayanda bakwesu abacizyi ikutali buyo kwiinda mukubalumbaizya, pele alimwi wakali kubapa lulayo. Mucikozyanyo, mumagwalo aakwe, Johane wakabalumbaizya bakwesu abacizyi akaambo kalusyomo lwabo amilimo mibotu, pele alimwi wakabapa lulayo lwacigaminina kujatikizya cibi. (1Joh. 1:8–2:1, 13, 14) Mbubwenya buyo, andiswe tweelede kubalumbaizya bakwesu alimwi abacizyi akaambo kazintu zibotu nzyobacita. Pele kuti umwi watalika kuba abube naa cilengwa cibyaabi, cabupampu tulakonzya kutondezya luyando kwiinda mukumupa lulayo. Kuyandika busicamba kutegwa tucikonzye kumupa lulayo mulongwe, pele Bbaibbele lyaamba kuti mulongwe mwini-mwini inga wamukwenga naa kumululamika mweenzinyina.—Tus. 27:17.

13. Ncinzi ncotuteelede kucita?

¹³ Zimwi ziindi, tulatondezya kuti tulabayanda bakwesu abacizyi kwiinda mukutacita zintu zimwi. Mucikozyanyo, tatufwambaani kunyema akaambo kazintu nzyobaamba. Amuyeeye buyo cakacitika mubuumi bwa Jesu anyika. Wakaambila basikwiiya bakwe kuti, kutegwa bakajane buumi, bakeelede kulya mubili wakwe akunywa bulowa bwakwe. (Joh. 6:53-57) Basikwiiya ba Jesu banji, tiibakacikkomanina ncaakabaambila, aboobo bakacileka kumutobela. Pele aabo ibakali kumuyanda ncobeni, mbuli Johane tiibakamusiya pe. Nokuba kuti tiibakacimvwisya ncaakabaambila Jesu alimwi akuti cakabagambya, tiibakayeeya kuti ncaakaamba cakalilubide alimwi kunyina nibakanyema. Muciindi caboobo, bakamusyoma nkaambo bakalizyi kuti wakali kwaamba kasimpe. (Joh. 6:60, 66-69) Eelo kaka cilayandika kutafwambaana kunyema akaambo kazintu nzyobaamba balongwe besu! Muciindi caboobo, tweelede kubapa coolwe cakupandulula ncobaamba.—Tus. 18:13; Muk. 7:9.

14. Nkaambo nzi ncotuteelede kusulaika bakwesu abacizyi?

¹⁴ Johane alimwi wakatulailila kutabasulaika bakwesu naa bacizyi. Kuti twaalilwa kulutobela lulayo oolu, Saatani ulakonzya kutunyonganya. (1Joh. 2:11; 3:15) Eeci cakabacitikila bamwi kumamanino aamwaanda wamyaka wakusaanguna C.E. Aciindi eeco, Saatani wakasolekesya kupa kuti bantu ba Leza batalike  kusulaikana alimwi akwaandaana. Kusikila ciindi Johane naakalemba magwalo aayitwa zina lyakwe, baalumi ibakatondezya muuya mbuli wa Saatani bakalinjide kale mumbungano. Mucikozyanyo, Diotrefe wakali kupa kuti kube kwaandaana kupati akati kabakwesu abacizyi mumbungano imwi. (3Joh. 9, 10) Tanaakali kubalemeka balangizi beendeenda ibakali kutumwa akabunga keendelezya. Mane buya wakali kubatandila kunze aambungano aabo ibakali kubatambula bantu mbaatakali kuyanda. Eelo kaka ooyu wakali muuya mubyaabi kapati! Amazuba aano Saatani ulasolekesya canguzu kubaandaanya bantu ba Leza. Tatweelede kusulaika bakwesu alimwi akucileka kubagwasya.

15. Ncinzi silutwe wamukwasyi ncayelede kuyeeya?

¹⁵ Nzila imwi iiyandika kapati silutwe wamukwasyi mbwatondezya kuti ulauyanda mukwasyi wakwe, nkwiinda mukuupa nzyouyandika kumubili. (1Tim. 5:8) Pele weelede kuyeeya kuti ciyandika kapati kulinguwe, nkugwasya mukwasyi kuba aacilongwe cibotu a Jehova. (Mt. 5:3) Amuyeeye buyo cikozyanyo cibotu Jesu ncaakapa basilutwe bamikwasyi. Bbuku lya Johane litwaambila kuti, ciindi Jesu naakali acisamu cakupenzezya, wakacili kuyeeya kujatikizya bamukwasyi wakwe. Johane wakaliimvwi munsi-munsi a Mariya banyina Jesu, abusena mpaakali kujailwa Jesu. Nokuba kuti wakamvwide kucisa kapati, Jesu wakalomba Johane kuti kamulanganya Mariya. (Joh. 19:26, 27) Jesu wakalijisi banabokwabo ibakali kukonzya kumulanganya Mariya, pele kulibonya kuti aciindi eeci kunyina wakali sikwiiya wakwe. Aboobo Jesu wakabikkila maano kubona kuti kuli muntu uunoomulanganya Mariya alimwi akumukulwaizya kuzumanana kubelekela Jehova.

16. Ino mikuli nzi njaakajisi Johane?

¹⁶ Johane wakajisi mikuli minji kapati. Mbwaakali umwi wabaapostolo, wakeelede kuba musungu mumulimo wakukambauka. Alimwi kweelede kuti wakalikwete, aboobo wakeelede kulanganya mukwasyi wakwe kumubili akumuuya. (1Kor. 9:5) Nciiyo nzi ncobaiya basilutwe bamikwasyi mazuba aano?

17. Mukuli nzi uuyandika kapati ngwajisi silutwe wamukwasyi alimwi ino banamukwasyi inga bagwasyigwa buti?

¹⁷ Kuti mukwesu kali silutwe wamukwasyi, inga kajisi mikuli minji iiyandika. Mucikozyanyo, weelede kuba munkutwe kumulimo kutegwa Jehova atembaulwe akaambo kambwalilemeka. (Ef. 6:5, 6; Tit. 2:9, 10) Alimwi inga kajisi  mikuli imwi mumbungano, mbuli mulimo wabweembezi alimwi akusololela mumulimo wakukambauka. Aciindi nciconya, cilayandika kapati kuti kajisi bubambe bwakubala Bbaibbele lyoonse amukaintu wakwe alimwi abana. Banamukwasyi banoomulumba kapati silutwe wamukwasyi uubeleka canguzu ikubapa nzyobayandika kumubili, mumizeezo akumuuya.—Ef. 5:28, 29; 6:4.

18. Ino Johane wakasinizyide kujatikizya nzi?

¹⁸ Johane wakapona myaka minji alimwi akucitikilwa zintu zinji zikkomanisya. Alimwi wakajana buyumuyumu bunji bwalo ibwakali kukonzya kunyonganya lusyomo lwakwe. Pele wakabeleka canguzu kutobela malailile aa Jesu, kubikkilizya amulawo wakuyanda bakwesu alimwi abacizyi. Akaambo kaceeco, Johane wakalisinizyide kuti Jehova alimwi a Jesu balamuyanda alimwi akuti bayoomupa nguzu zyakuzunda buyumu-yumu buli boonse. (Joh. 14:15-17; 15:9, 10; 1Joh. 4:16) Saatani alimwi anyika yakwe kunyina nobakali kukonzya kumukasya Johane ikuyanda bakwesu abacizyi alimwi akutondezya kwiinda muzintu nzyaakaamba akucita.

19. Ncinzi lugwalo lwa 1 Johane 4:7 ncolutukulwaizya kucita, alimwi nkaambo nzi?

¹⁹ Mbubwenya mbuli Johane, tupona munyika yeendelezyegwa a Saatani, leza silunya wabweende oobu. (1Joh. 3:1, 10) Nokuba kuti uyanda kuti tucileke kubayanda bakwesu abacizyi, takonzyi kuzwidilila, ccita buyo kuti swebo twamuzumizya. Aboobo aabe makanze eesu kubayanda bakwesu abacizyi, kulutondezya luyando oolo muzintu nzyotwaamba alimwi akulusinizya kwiinda muzintu nzyotucita. Kwiinda mukucita boobo, tuyookkomana kuba cibeela camukwasyi wa Jehova akupona buumi bukkomanisya.—Amubale 1 Johane 4:7.