1. Kuziba kuti Jehova ulatuyanda kupa kuti tulimvwe biyeni?

MWAAPOSTOLO Johane wakalemba kuti: “Leza nduyando.” (1 Joh. 4:8) Majwi aaya atuyeezya kasimpe kayandikana kakuti, Leza nguutupa buumi alubo nguukasensa kaluyando. Jehova ulatuyanda. Eezi zipa kuti tulimvwe katukwabilidwe, tubotelwe akuti tukkutisikane.

2. Kweendelana alugwalo lwa Matayo 22:37-40, njiili milawu iibili mipati alubo nkamboonzi nikukonzya kutuyumina kuswiilila wachibili?

² Nkani yakutondeezya bamwi luyando teeyakulisalila pe pesi mulawu. (Bala Matayo 22:37-40.) Kuti twamuziba kabotu Jehova, kulakonzya kutuubila kuswiilila mulawu wakusaanguna. Nkamboonzi? Nkaambo Jehova ulimaninide, ulaandaba andiswe alubo ulatufwida luzyalo. Pesi kulakonzya kutuyumina kuswiilila mulawu wachibili. Nkamboonzi? Nkaambo basimayakilane besu bali aafwiifwi loko andiswe mbakwesu abachizi batamaninide pe. Chimwi chiindi balakonzya kwaambuula amwi majwi naakuti kuchita zimwi zintu zipa kuti tubonaanga tabakwe ndaba pe andiswe. Jehova wakalizi kuti kwakali kuyootuyumina kuswiilila mulawu ooyu nkinkaako, wakapa kuti bamwi balembi baBbayibbele balembe aamwi makani aali atala akuti nkamboonzi nitweelede kutondeezya bamwi luyando akuti nga tulalutondeezya biyeni. Umwi wabalembi aaba mwaapostolo Johane.—1 Joh. 3:11, 12.

3. Johane wakaambaanzi atala aluyando?

³ Kwaziindi zyiingi, Johane wakaamba kuti maKristu beelede kutondeezyania luyando. Mubbuku lyakwe lyaambuula atala abuumi bwaJesu, Johane wakabelesya bbala lyakuti “luyando” alyakuti “kuyanda” kwiinda mbaabelesedwe kuti twaswaanizya  bbuku lyaMatayo, Marko alyaLuka. Johane wakali aaminyaka iili kuma100 chiindi naakalemba bbuku lyaambuula atala abuumi bwaJesu aamwi mabbuku aakwe aatatu. Mabbuku aaya atugwasya kubona kuti muKristu weelede kutondeezya luyando muzintu zyoonse nzyachita. (1 Joh. 4:10, 11) Pesi chimwi chiindi Johane kwakali kumuyumina kutondeezya luyando.

4. Niinzi chitondeezya kuti Johane kwakali kumuyumina kutondeezya luyando chimwi chiindi?

⁴ Naakasaanguna-saanguna kweenda aJesu, chimwi chiindi Johane kwakali kumuyumina kutondeezya luyando. Muchikozyano, chimwi chiindi Jesu abasikwiiya bakwe bakayinda kuSamariya nibakali kuya kuJerusalemu. Bamwi bantu bakuSamariya bakakaka kubatambula. Johane wakachita biyeni? Wakabuzya Jesu kuti bakumbile na mulilo kuti useluke kuzwa kujulu ubanyonyoone bantu aabo. (Lk. 9:52-56) Aali chimwi chiindi, Johane wakakachilwa kutondeezya luyando kuli bamwi baapostolo. Johane amukulana wakwe Jakkobo bakabuzya banyina kuti bakabakumbilile kuli Jesu kuti azoobape zyuuno zisumpukide muBwaami bwakwe. Bamwi baapostolo bakanyema chiindi nibakamvwa zyakachitwa aJakkobo aJohane. (Mt. 20:20, 21, 24) Nikuba kuti Johane wakachita zintu zyoonse eezi, Jesu wakali kumuyanda kali boobo.—Joh. 21:7.

5. Tulalanga-langaanzi muchiiyo eechi?

⁵ Muchiiyo eechi, tulalanga-langa chikozyano chaJohane amakani ngaakalemba aali atala aluyando. Mpawo tulayiya kuti nga tulabatondeezya biyeni luyando bakwesu abachizi. Alubo tulabona nzila iiyandikana baalumi mbubakonzya kutondeezya kuti balaziyanda mpuli zyabo.

6. Jehova wakatondeezya biyeni kuti ulatuyanda?

⁶ Bantu biingi bayeeya kuti luyando lutondeezegwa mumajwi luzutu. Pesi luyando lwachoonzyo lweelede kusindikilwa amichito. (Kozyanisya a Jakobo 2:17, 26) Muchikozyano, Jehova ulatuyanda. (1 Joh. 4:19) Tulizizi eezi nkaambo muBbayibbele muli majwi aatondeezya kuti ulatuyanda. (Int. 25:10; Rom. 8:38, 39) Pesi tulaachoonzyo chakuti Leza ulatuyanda kutali akaambo kazintu nzyaakatubuzya muBbayibbele luzutu pesi akaambo kazintu nzyaakatuchitila. Johane wakalemba kuti: “Lino oobu mbolwakayubununwa luyando lwa Leza kulindiswe, Leza wakatuma Mwanaakwe simuzyalwaalikke munyika ikutegwa tukonzye kuba abuumi kwiinda mulinguwe.” (1 Joh. 4:9) Jehova wakazumizya mwana wakwe kuti apenzegwe akuti atufwide. (Joh. 3:16) Nisimpe kuti Jehova ulatuyanda.

7. Jesu wakatondeezya biyeni kuti ulatuyanda?

⁷ Jesu wakabuzya basikwiiya bakwe kuti wakali kubayanda. (Joh. 13:1; 15:15) Wakatondeezya  kuti ulabayanda kuswaanizya andiswe kutali mumajwi luzutu pesi amumichito. Jesu wakati: “Kunyina uujisi luyando lwiinda loolu, lwakuti muntu umwi atuulile beenzinyina buumi bwakwe.” (Joh. 15:13) Kuziba nzibakatuchitila Jehova aJesu kupa kuti tuyande kuchitaanzi?

8. Kweendelana alugwalo lwa 1 Johane 3:18, niinzi nzitweelede kuchita?

⁸ Tulakonzya kutondeezya kuti tulamuyanda Jehova aJesu kwiinda mukubaswiilila. (Joh. 14:15; 1 Joh. 5:3) Jesu wakatulayilila kuti tuyande bamwi. (Joh. 13:34, 35) Tatweelede kunoowamba luzutu kuti tulabayanda bakwesu abachizi pesi tweelede kutondeezya kwiinda mumichito. (Bala 1 Johane 3:18.) Niinzi nzitweelede kuchita kuti tutondeezye kuti tulabayanda?

9. Luyando lwakapa kuti Johane achiteenzi?

⁹ Johane wakali kukonzya kwiinkilila kunembo kakkala awisi kabachita bbizinesi lyabo lyakuzuba baswi. Pesi wakalipeda kwabuumi bwakwe boonse kuti agwasye bamwi kwiiya kasimpe atala aJehova aJesu. Johane wakali kuyooswaanana abuyumu-yumu akaambo kazintu nzyaakasala kuchita. Wakapenzegwa alubo wakasungwa kumamanino amwaanda wakusaanguna kali wachembaala. (Mil. 3:1; 4:1-3; 5:18; Ciy. 1:9) Nikuba naakasungidwe akaambo kakukambawuka atala aJesu, Johane wakatondeezya kuti wakali kubayanda bamwi. Muchikozyano, naakali kukasuwa kaPatimosi, wakalemba bbuku lyaCiyubunuzyo akulitumizya kumbungano zisiyene-siyene kuchitila kuti bazibe zintu “zyeelede kucitika.” (Ciy. 1:1) Kweelede kuti naakaangununwa kuPatimosi, Johane wakalemba bbuku lyakwe lyaambuula atala abuumi bwaJesu amulimu wakwe. Alubo wakalemba mabbuku aakwe aatatu kuchitila kuti asungwaazye akusimya bakombinyina. Kujana twachitobelezya biyeni chikozyano chaJohane chakulipeda?

10. Kujana watondeezya biyeni kuti ulabayanda bamwi?

¹⁰ Ulakonzya kutondeezya kuti ulabayanda bamwi kwiinda muzintu nzusala mubuumi bwako. Nyika yeendelezegwa aaSaatani tayiyandi pe kuti ugwasye bamwi pesi iyanda kuti umaninsye chiindi chako amanguzu aako kuli kuyanduula mali akuti ube ampuwo. Pesi maKristu munyika yoonse balikweezya anzila zyoonse kumaninsya chiindi chabo kabalikwaambilizya makani mabotu akugwasya bantu kuti babe beenzinyina baJehova. Bamwi nga basala kuchita mulimu ooyu kwachiindi choonse.

11. Bakombi baJehova biingi mazubaano batondeezya biyeni kuti balamuyanda Jehova abakombinyina?

¹¹ Bamwi maKristu babeleka milimu yakunyika kuchitila kuti bakonzye kulisanina naakuti kusanina mpuli zyabo. Nikuba boobo, bakwesu aaba basyomeka balayigwasya mbunga munzila zisiyene-siyene. Muchikozyano, bamwi balagwasya nikwaba mapenzi aalichitikila, bamwi balagwasya mukuyaka alubo toonse tulakonzya kusanga mali iigwasilizya mumulimu wamunyika yoonse. Bachita zintu zyoonse eezi akaambo kakuti balamuyanda Leza abakombinyina. Imwi nzila njitutondeezyaayo kuti tulabayanda bakombima, nkunjila miswaangano mviki amviki akutola lubazu mulinjiyo. Nikuba kuti chimwi chiindi nga tulikatede, tatuleki pe kwiinka kumiswaangano eeyo. Nikuba kuti chimwi chiindi nga tuli kuyoowa, tatuleki pe kusandula, nikuba kuti nga tuli aazintu zitukataazya, tatuleki kusungwaazyania kayitanasaanguna aniyamana miswaangano. (Heb. 10:24, 25) Tulabalumba bakwesu abachizi akaambo kamilimu njibachita.

12. Njiili iimwi nzila iitondeezya kuti Johane wakali kubayanda bakombinyina?

¹² Johane wakatondeezya kuti ulabayanda  bakombinyina kwiinda mukubalumba akubalulamika. Muchikozyano, mumagwalo ngaakalemba, Johane wakabalumba bakombinyina akaambo kalusyomo lusimide ndubakali aalo amilimu mibotu njibakali kuchita. Pesi wakabachenjezya kuti batachiti zintu zibi. (1 Joh. 1:8–2:1, 13, 14) Munzila iikozyenie, andiswe tweelede kubalumba bakombima akaambo kazintu zibotu nzibachita. Pesi kuti umwi muntu waba achiimbo chakuchita zintu zitali kabotu, tweelede kutondeezya luyando kwiinda mukumululamika munzila yabupampu. Teekuuba pe kululamika mweenzuma pesi Bbayibbele lyaamba kuti mweenzuma wachoonzyo ulamululamika mweenzinyina.—Tus. 27:17.

13. Niinzi nzituteelede kuchita?

¹³ Chimwi chiindi tulakonzya kutondeezya kuti tulabayanda bakombima kwiinda mukutachita zimwi zintu. Muchikozyano, tatweelede kufwambaana kunyema akaambo kazintu nzibaamba. Atubone zyakachitika chiindi Jesu naakali waba aafwiifwi kufwa. Wakabuzya basikwiiya bakwe kuti bakeelede kulya nyama yakwe akunywa ganzi lyakwe kuti bakajane buumi. (Joh. 6:53-57) Nzyakaamba zyakabagambya basikwiiya bakwe zyakuti biingi bakaleka kweenda anguwe. Pesi beenzinyina bachoonzyo kuswaanizya Johane teebakaleka pe kweenda aaJesu. Bakazumanana kusyomeka kulinguwe. Kweelede kuti zyakabagambya ambabo nzyakaamba Jesu akaambo kakuti teebakali kuzimvwisisisya pe. Nikuba boobo, teebakayeeya kuti Jesu nzyakaamba tazili kabotu pe alubo teebakamunyemena pe. Pesi bakayinkilila kunembo kabamusyoma nkaambo bakalizi kuti waambuula choonzyo. (Joh. 6:60, 66-69) Kulayandikana kuti andiswe tutafwambaani kunyema akaambo kazintu nzibaambuula beenzuma. Pesi tweelede kubapa mweenya wakuti bapandulule nzibaamba.—Tus. 18:13; Muk. 7:9.

14. Nkamboonzi nituteelede kuzumizya muuya wakutayandana kuti unjile mumyoyo yesu?

¹⁴ Johane wakatusungwaazya kuti tuyande bakombima. Kuti twakachilwa kwaatobela makani aaya, ngatulikuzumizya Saatani kuti atweendelezye. (1 Joh. 2:11; 3:15) Eezi nzizyo zyakachitika kumamanino amwaanda wakusaanguna. Saatani wakabeleka changuzu kuti ape kuti bakombi baJehova baleke kuyandana. Aachiindi Johane naakalemba magwalo aakwe, bantu bali aamizeezo iikozyenie ayaSaatani bakali banjila mumbungano. Muchikozyano, Diyotrefe wakali kupa kuti  bantu bamumbungano batayandani. (3 Joh. 9, 10) Taakali kubalemeka pe bakwesu bakali kutumwa abamukabunga keendelezya. Wakali kweezya kubatandila aanze aambungano bantu bakali kubatambula kabotu bantu mbaakatali kuyanda. Eezi zyakali zibi loko. Ambulisunu, Saatani uchibeleka changuzu kupa kuti bakombi baJehova batayandani. Tatweelede kumuzumizya pe kuti ape kuti tuleke kuyandana.

15. Niinzi nzyayelede kuziba mutwe wampuli?

¹⁵ Imwi nzila mutwe wampuli mwakonzya kutondeezya kuti ulayiyanda mpuli yakwe, nkwiipa ziyandikana zyakumubili. (1 Tim. 5:8) Pesi weelede kuziba kuti chintu chiyandikana loko nkugwasya mpuli yakwe kuti ibe abweenzinyina busimide aJehova. (Mt. 5:3) Atubone chikozyano Jesu nchaakasiila mitwe yampuli. Jesu wakatondeezya kuti wakachili kubabikkila maanu bamumpuli yakwe chiindi naakali waba aafwiifwi kufwa kali aachisamu chakupenzezya. Kali achisamu chakupenzezya, Jesu wakabona banyina kabayimvwi aamwi aJohane. Nikuba kuti wakali mumachise mapati, Jesu wakakumbila Johane kuti agwasye Mariya kuti ajane ziyandikana. (Joh. 19:26, 27) Jesu wakali abanike bakali kukonzya kupa banyina zintu zyakumubili, pesi kweelede kuti aachiindi eechi taakwe mwanike wakwe pe wakali waba sikwiiya wakwe. Jesu wakali kuyanda kuba aachoonzyo chakuti Mariya uyoogwasigwa kujana zintu zyakumubili azyamubukombi.

16. Johane wakali aamilimu iili iisiyene-siyene?

¹⁶ Johane wakali aamilimu iisiyene-siyene yakuchita. Mbukunga wakali mwaapostolo, wakeelede kusungwaala mumulimu wakukambawuka. Alubo kulakonzeka kuti wakalikwete nkinkaako, wakeelede kubeleka changuzu kuti ape bamumpuli yakwe zintu zyakumubili azyamubukombi. (1 Kor. 9:5) Mitwe yampuli yiyaanzi kuzwa kuli Johane?

17. Nkamboonzi nikuyandikana kuti mutwe wampuli upe mpuli yakwe ziyandikana zyamubukombi?

¹⁷ Mutwe wampuli ulakonzya kuba amilimu myiingi yakuchita. Muchikozyano, kuti kabeleka mulimu wakunyika weelede kubeleka changuzu kuchitila kuti ape kuti Jehova alemekwe. (Ef. 6:5, 6; Tit. 2:9, 10) Alubo kulakonzeka kuti uli aamilimu mumbungano mbuli yakusungwaazya bakwesu abachizi akubeleka changuzu mumulimu wakukambawuka. Alubo chimwi chintu chiyandikana nchayelede kuchita, nkujana chiindi chakubala Bbayibbele ampuli yakwe. Kuti wachita oobo, bamumpuli  yakwe balamulumba akaambo kakuti ulabagwasya kuti bajane ziyandikana zyakumubili, kuti babotelwe akuti basime mubukombi.—Ef. 5:28, 29; 6:4.

18. Johane wakali aachoonzyo chanzi?

¹⁸ Johane wakapona kwachiindi chilamfu. Alubo kwakachitika zintu zyiingi zibotezya mubuumi bwakwe. Pesi wakaswaanana aabuyumu-yumu busiyene-siyene bwakali kukonzya kumaninsya lusyomo lwakwe. Nikuba boobo, wakabeleka changuzu kuti atobele milawu yaJesu mbuli wakuyanda bakwesu abachizi. Eezi zyakapa kuti Johane abe achoonzyo chakuti Jehova aJesu balamuyanda akuti bakali kuyoomupa manguzu aakuti akonzye kulisimya kumapenzi ngaakali kuyooswaana. (Joh. 14:15-17; 15:10; 1 Joh. 4:16) Taakazumizya zintu zichitwa aaSaatani naakuti bantu mbayendelezya kuti zimukachizye kutondeezya bakombinyina luyando.

19. Lugwalo lwa 1 Johane 4:7 lutusungwaazya kuchitaanzi alubo nkamboonzi?

¹⁹ Mbuli Johane, andiswe tupona munyika yeendelezegwa aSaatani uutakwe luyando. (1 Joh. 3:1, 10) Saatani uyanda kuti tuleke kuyanda bakombima pesi takonzyi pe kupa kuti tuchite oobo kunze kwakuti twamuzumizya. Atubeleke changuzu kuti tukkale katuyanda bakombima kutali mumajwi luzutu pe pesi amumichito. Kuti twachita oobo, tuyoobotelwa kuba mumpuli yaJehova alubo tuyoopona buumi bubotezya.—Bala 1 Johane 4:7.