1. ¿La makgkatsiyaw xlakata Dios kinkapaxkiyan?

APÓSTOL Juan tsokgli akgtum tachuwin nema tasiya pi ni lu tuwa, pero lhuwa tuku kilhchanima: «Dios tapaxkit» (1 Juan 4:8). Chuna, Dios, tiku xmalakatsukina latamat, na xmalakatsukina tapaxkit. Jehová kinkapaxkiyan, chu xtapaxkit tlawa pi tlan namakgkatsiyaw, napaxuwayaw chu namakgkatsiyaw pi nitu kinkatsankganiyan.

2. 1) Chuna la wan Mateo 22:37-40, ¿tuku akgtiy limapakgsin nema lu xlakaskinka? 2) ¿Tuku xlakata max tsinu tuwa namakgkatsiyaw nakgalhakgaxmataw xliʼakgtiy limapakgsin?

² Kstalaninanin Cristo, ni laksakkgo komo napaxkinankgo o ni: wata kalimapakgsikan chuna natlawakgo (kalikgalhtawakga Mateo 22:37-40). Akxni tlakg lakgapasaw Jehová tlakg ni tuwa katimakgkatsiw nakgalhakgaxmataw xapulana Limapakgsin, xlakata Jehová ni kgalhi talakgalhin chu putum kilhtamaku kinkalakgalhamanan chu kinkalimasiyaniyan pi kinkalilakgaputsayan. Pero max tsinu tuwa makgkatsiyaw nakgalhakgaxmataw xliʼakgtiy limapakgsin. ¿Tuku xlakata? Xlakata kinatalankan, tiku na kintalatamankan litaxtukgo, makglakgalhinanin chu min kilhtamaku tlawakgo chu wankgo tuku nitlan o tuku nitlan kinkamamakgkatsinikgoyan. Xlakata katsi uma, Jehová tlawalh pi makgapitsi tiku tsokgwilikgolh Biblia xlichuwinankgolh tuku xlakata chu la xlalimasiyaniw tapaxkit. Chatum tiku tsokgli xlakata uma, wa Juan (1 Juan 3:11, 12).

3. ¿Tuku tlakg lichuwinalh Juan?

 ³ Klibros nema tsokgli Juan, liwana lichuwinalh pi kstalaninanin Cristo kilalimasiyanitkan tapaxkit. Chu kʼEvangelio nema tsokgli tlakg makglhuwa lichuwinan tapaxkit nixawa maktutu Evangelios. Xkgalhi 100 kata akxni Dios malakpuwanilh natsokga xʼEvangelio chu maktutu xcartas. Tuku tsokgli, liwana masiya pi tapaxkit wa tuku xlimakgpuwantinit chatum kstalanina Cristo akxni wi tuku natlawa (1 Juan 4:10, 11). Asta Juan linilh kilhtamaku nakatsini uma.

4. Kalichuwinanti pulaktum akxni Juan ni limasiyalh tapaxkit.

⁴ Akxni kgawasaku xwanit, Juan ni putum kilhtamaku limasiyalh tapaxkit. Akgtum kilhtamaku, Jesús chu kstalaninanin x’amakgo kJerusalén chu titaxtukgolh kSamaria, chu kʼakgtum aktsu xkachikin Samaria ni liwana kamakgamakglhtinanka. ¿Tuku tlawalh Juan? Xlakaskin pi xtaktalh lhkuyat kʼakgapun chu xkamasputulh latamanin xalak uma kachikin (Luc. 9:52-56). Atanu kilhtamaku ni kalimasiyanilh tapaxkit amakgapitsi apóstoles. Chuna la takatsi, xla chu Santiago, xtala, wanikgolh xtsekan pi kskinilh Jesús pi tlan xpaxtutawilakgolh kTamapakgsin. Akxni amakgapitsin katsikgolh, lu sitsikgolh (Mat. 20:20, 21, 24). Maski Juan lhuwa tuku nitlan tlawalh, Jesús xpaxki (Juan 21:7).

5. ¿Tuku nalichuwinanaw kʼuma artículo?

⁵ Kʼuma artículo, nalichuwinanaw xlakata Juan chu makgapitsi tuku tsokgli xlakata tapaxkit. Nakatsiniyaw la tlan nakalimasiyaniyaw kinatalankan pi kapaxkiyaw chu na nakatsiniyaw pulaktum tuku lu xlakaskinka tlan natlawakgo tiku pulalinkgo familia xlakata tlan nakalimasiyanikgo tapaxkit tiku xalak xchikkan.

6. ¿La kinkalimasiyaninitan Jehová pi kinkapaxkiyan?

⁶ Komo wi tiku paxkiyaw, ni kajwatiya talakaskin nawaniyaw. Komo xlikana paxkiyaw talakaskin nalimasiyaniyaw xlakata tuku tlawayaw (katamalakxtupi Santiago 2:17, 26). Akgtum liʼakxilhtit, Jehová kinkapaxkiyan (1 Juan 4:19). Chu kinkalimasiyaniyan xtapaxkit xalaktlan tachuwin nema tatekgsa kBiblia (Sal. 25:10; Rom. 8:38, 39). Pero katsiyaw pi kinkapaxkiyan ni kaj xlakata tuku wan, nachuna xlakata tuku tlawa. Juan tsokgli: «Chuna Dios kinkalimasiyanin xtapaxkit: Dios malakgachalh kkakilhtamaku kaj xachastum xKgawasa xlakata kaj xpalakata xlikgalhiw latamat» (1 Juan 4:9). Jehová mastalh talakaskin pi xKgawasa xpatinalh chu xnilh kimpalakatakan  (Juan 3:16). Wa xlakata liwana katsiyaw pi kinkapaxkiyan.

7. ¿La limasiyalh Jesús pi kinkapaxkiyan?

⁷ ¿Chu tuku nawanaw xlakata Jesús? Xla kawanilh kstalaninanin pi xkapaxki (Juan 13:1; 15:15). Pero kalimasiyanilh pi lu xkapaxki chu nachuna akinin ni kaj xlakata tuku wa, nachuna xlakata tuku tlawalh. Wa: «Ni anan tiku tlakg paxkinan, kajwatiya tiku makamasta xlatamat xpalakata xʼamigos» (Juan 15:13). Akxni lilakpuwanaw tuku Jehová chu Jesús tlawakgonit kimpalakatakan, ¿tuku xlilat natlawaputunaw?

8. Chuna la wan 1 Juan 3:18, ¿tuku kilitlawatkan?

⁸ Limasiyayaw pi paxkiyaw Jehová chu Jesús akxni kakgalhakgaxmataw (Juan 14:15; 1 Juan 5:3). Chu Jesús kinkalimapakgsin nalapaxkiyaw chatunu chatunu (Juan 13:34, 35). Uma tapaxkit ni kaj kintachuwinkan nakalimasiyaniyaw kinatalankan, nachuna xlakata tuku tlawayaw (kalikgalhtawakga 1 Juan 3:18). Pero ¿tuku tlan natlawayaw xlakata nakalimasiyaniyaw pi kapaxkiyaw?

9. Xlakata Juan xpaxkinan, ¿tuku tlawalh?

⁹ Juan tlan xtitatamakgxtakgli xtlat chu xtitlajalh tumin komo xtiliskujli taskujut nema xkgalhi xfamilia. Pero nichuna tlawalh, wata maklakaskilh xlatamat xlakata nakamakgtaya amakgapitsin xlakata nakatsinikgo tuku xaxlikana xlakata Jehová chu Jesús. Latamat nema laksakli tuwa xwanit. Putsastalanika chu akxni ksputmaja xapulana siglo, akxni xlina kata, chilinka (Hech. 3:1; 4:1-3; 5:18; Apoc. 1:9). Asta akxni xmanukanit kpulachin xlakata xlichuwinan Jesús, limasiyalh pi xkalilakgaputsa amakgapitsin. Akgtum kilhtamaku akxni xwi kʼisla xla Patmos, tsokgwililh tuku Dios makatsinilh chu kamalakgachanilh congregaciones xlakata xkatsikgolh «tuku ama la nialh makgas kilhtamaku» (Apoc. 1:1). Alistalh, akxni xtamakxtukanita kPatmos, tsokgwililh xlakata xlatamat Jesús chu la lichuwinalh Dios. Na katsokgnanilh maktutu cartas xnatalan xlakata xkamatliwakglhli chu xkamakgpuwantinilh. ¿La tlan nastalaniyaw xliʼakxilhtit Juan?

10. ¿La tlan nalimasiyayaw pi kapaxkiyaw latamanin?

¹⁰ Tlan nalimasiyayaw pi kapaxkiyaw amakgapitsin xlakata tuku laksakaw natlawayaw kkilatamatkan. Xkakilhtamaku Satanás lakaskin pi kamaklakaskiw kinkilhtamakujkan chu kilitliwakgakan xlakata natlajayaw lhuwa tumin chu lu nakinkalakgapaskanan. Pero kxlikalanka katiyatni wilakgo kstalaninanin Cristo tiku limaxtukgo lhuwa kilhtamaku xlakata nalichuwinankgo xalaktlan tamakatsinin chu nakamakgtayakgo latamanin natalakatsuwinikgo Jehová. Makgapitsi asta tlan chuna tlawakgo putuminika kilhtamaku.

11. ¿La limasiyakgo lhuwa natalan pi paxkikgo Jehová chu xnatalankan?

¹¹ Lhuwa kstalaninanin Cristo tiku ni makgxtakgkgo Dios lhuwa kilhtamaku xliskujatkan xlakata nakgalhikgo tuku maklakaskinkgo xlakan chu xfamiliajkan. Maski chuna, chuntiya makgtayakgo xkachikin Dios chuna la matlanikgo. Akgtum liʼakxilhtit, makgapitsi makgtayanankgo niku wi tuku masputunanit, amakgapitsi makgtlawakgo kimpukgalhtawakgakan chu kimputumkan tlan xatapaxuwan namastayaw kintuminkan xlakata nalitlawakan kintaskujutkan kxlikalanka katiyatni. Chuna limasiyakgo pi paxkikgo Dios chu xtalatamankan. Nachuna, akgatunu semana kalimasiyaniyaw tapaxkit kinatalankan akxni anaw ktamakxtumit maski tlakgwanitaw, akxni mastayaw kintakgalhtinkan maski pekuanaw  chu akxni kamakgpuwantiniyaw kinatalankan akxni nina tsuku chu akxni sputa kintamakxtumitkan maski akinin na kgalhiyaw kintaʼakglhuwitkan (Heb. 10:24, 25). Lu kapaxtikatsiniyaw putum tuku tlawakgo kinatalankan.

12. ¿Tuku atanu tlawapa Juan xlakata xkalimasiyanilh xtapaxkit xnatalan?

¹² Juan ni kajwatiya kalimasiyanilh tapaxkit natalan xlakata kawanilh laktlan tachuwin, nachuna xlakata kamaxkilh tastakyaw. Akgtum liʼakxilhtit, kxcartas kawanilh laktlan tachuwin xlakata xtakanajlakan chu xatlan xtaskujutkan, chu na kawanilh pi skgalalh xtawilakgolh xlakata talakgalhin (1 Juan 1:8–2:1, 13, 14). Akinin, na tlan nakawaniyaw kinatalankan laktlan tachuwin xlakata tuku tlan tlawakgo. Pero komo akxilhaw pi wi tiku kgalhima akgtum nitlan tayat o akgtum nitlan talismanin, tlan nalimasiyaniyaw tapaxkit akxni lakatitum nawaniyaw tuku xlikatsit. Talakaskin ni napekuanaw akxni chuna natlawayaw, xlakata Biblia wan pi xaxlikana amigos lastakyawakgo (Prov. 27:17).

13. ¿Tuku ni kilitlawatkan?

¹³ Na tlan nakalimasiyaniyaw tapaxkit kinatalankan xlakata tuku ni natlawayaw. Akgtum liʼakxilhtit, ni tunkun kilisitsitkan xlakata tuku nakinkawanikanan. Kalilakpuwaw tuku lalh akxni nina xniy Jesús. Xla kawanilh kstalaninanin pi xlakata tlan xkgalhikgolh latamat nema ni kgalhi lisputni xliwatkan xwanit xliwa Jesús chu xkgalhni (Juan 6:53-57). Lhuwa tiku litaʼakglhuwikgolh chu asta makgxtakgkgolh. Pero xaxlikana xʼamigos, chuna la Juan, ni makgxtakgkgolh chu chuntiya stalanikgolh. Xlakan ni akgatekgskgolh tuku wa Jesús chu max kaks kamalakawanilh, pero ni tunkun lakpuwankgolh pi nitlan xwanit tuku xkilhwama. Wata lipawankgolh xlakata xkatsikgo pi xla ankgalhin xwan tuku xaxlikana (Juan 6:60, 66-69). Lu xlakaskinka pi ni tunkun nalisitsiyaw tuku nawankgo kinatalankan, wata kakamaxkiw talakaskin nakinkawanikgoyan tuku xwamputunkgo (Prov. 18:13; Ecl. 7:9).

14. ¿Tuku xlakata ni xlilat nakasitsiniyaw kinatalankan?

¹⁴ Juan na kinkalistakyawan pi ni nakasitsiniyaw kinatalankan. Komo ni natlawayaw xtastakyaw, max namastayaw talakaskin pi Satanás nakinkamatlawiyan tuku nitlan (1 Juan 2:11; 3:15). Chuna kaʼakgspulalh makgapitsi akxni ksputma xapulana siglo. Satanás xtlawa putum tuku xmatlani  xlakata xlakskujnin Dios xlasitsinikgolh chu ni makxtum xtawilakgolh. Akxni Juan katsokgnanilh, anta kcongregación xtanukgonit makgapitsi tiku xkgalhikgo uma xtapuwan Satanás. Chatum tiku chuna xlikatsi wa Diótrefes, tiku xtlawanit pi xʼanalh tapapitsit kʼakgtum congregación. Ni xkamaxkikgo kakni superintendentes viajantes tiku xkamalakgachakgo lakgkgolotsin tiku xpulalinankgo. Lu tlankajwa xwanit chu asta xkatamakxtuputun kcongregación tiku tlan xkamakgamakglhtinankgo tiku xla ni xkaʼakxilhputun (3 Juan 9, 10). Satanás chuntiya tlawama putum tuku matlani xlakata namapapitsi xkachikin Dios. Nikxni kamastaw talakaskin pi tasitsi nakinkamapapitsiyan.

15. ¿Tuku xlilakapastakatkan tiku pulalinkgo familia?

¹⁵ Xlikana pi pulaktum la limasiya tiku pulalin familia pi kapaxki tiku xalak xchik wa akxni kamaxki tuku maklakaskinkgo (1 Tim. 5:8). Pero nikxni xlipatsankgat pi tuku tlakg xlakaskinka wa xtakanajla xfamilia (Mat. 5:3). Kaʼakxilhwi xliʼakxilhtit Jesús. Chuna la wan Evangelio nema tsokgli Juan, akxni Jesús xwaka kkiwi, chuntiya xlilakpuwama xfamilia. Juan chu xtse Jesús, María, anta xwilakgo niku xmawakakanit Jesús. Maski lu xpatinama, Jesús wanilh Juan pi xkuentajtlawalh xtse (Juan 19:26, 27). María xkgalhi amakgapitsi xkamanan tiku xʼamakgo maxkikgo tuku xla xmaklakaskilh, pero max xlakan nina kstalaninanin Jesús xlitaxtukgo. Wa xlakata lakkaxwililh pi xtse xkgalhilh tuku xmaklakaskilh chu nachuna tuku xla xtakanajla.

16. ¿Tuku talakgatay xkgalhi Juan?

¹⁶ Juan lhuwa talakgatay xkgalhi. Xlakata apóstol xlitaxtu, lu xtalakaskin xlichuwinalh Dios. Chu max xmakgaxtokga. Wa xlakata, xlimaxkit xwanit xfamilia tuku xmaklakaskin chu tuku xla xtakanajla (1 Cor. 9:5). ¿Tuku kamasiyani uma lakchixkuwin?

17. ¿Tuku xlakata xlakaskinka pi tiku pulalinkgo familia kuenta natlawakgo xtakanajlakan tiku xalak xchik?

¹⁷ Tiku pulalinkgo familias na max kgalhikgo lhuwa xlakaskinka talakgatay. Lu xliskujatkan xlakata xtayatkan natlawa pi tlan nalichuwinankan Jehová (Efes. 6:5, 6; Tito 2:9, 10). Chu max na kgalhikgo taskujut kcongregación, nakapulalinkgo natalan chu lu nalichuwinankgo Dios. Pero na xlakaskinka ankgalhin nakatalikgalhtawakga Biblia xpuskat chu xlakkamanan. Xlakan lu napaxtikatsinikgo  putum tuku xla tlawa xlakata kamakgtaya tlan natawilakgo, napaxuwakgo chu chuntiya tlan naskujnanikgo Jehová (Efes. 5:28, 29; 6:4).

18. ¿Tuku liwana xkatsi Juan?

¹⁸ Juan makgas latamalh chu lhuwa tuku titaxtulh kxlatamat. Lhuwa tuku tuwa titaxtulh tuku max xtitlawalh pi xtaxlajwanilh xtakanajla. Pero ankgalhin tlawalh tuku xtalakaskin xlakata nakgalhakgaxmata xlimapakgsin Jesús, chuna la nakapaxki xnatalan. Wa xlakata, Juan liwana xkatsi pi Jehová chu Jesús xpaxkikgo chu pi xʼamakgo maxkikgo litliwakga xlakata tlan xtayanilh kaxatukawa tuku tuwa xtitaxtulh (Juan 14:15-17; 15:10; 1 Juan 4:16). Satanás chu xkakilhtamaku nila tlawakgolh pi Juan ni xkalimasiyanilh xnatalan pi xkapaxki xlakata xtachuwin chu tuku xtlawa.

19. ¿Tuku kinkamakgpuwantiniyan natlawayaw 1 Juan 4:7, chu tuku xlakata?

¹⁹ Chuna la Juan, lamaw kkakilhtamaku niku akgchipanit Satanás, chu litsama lhuwa tasitsi (1 Juan 3:1, 10). Xla lakaskin pi nialh kakapaxkiw kinatalankan, pero nila chuna katitlawalh komo ni namaxkiyaw talakaskin. Wa xlakata, liwana kalakkaxwiliw nakapaxkiyaw kinatalankan, ni kaj xlakata kintachuwinkan, nachuna xlakata tuku tlawayaw. Komo chuna natlawayaw lu napaxuwayaw xlakata makgtapakgsiyaw kxfamilia Jehová chu xlikana napaxuwayaw kkilatamatkan (kalikgalhtawakga 1 Juan 4:7).