1. Ndlela leyi Xikwembu xi hi rhandzaka hayona yi endla hi titwa njhani?

MUAPOSTOLA Yohane u tsale a ku: “Xikwembu i rirhandzu.” (1 Yoh. 4:8) Marito lawa ma hi byela mhaka yin’wana ya nkoka: Xikwembu i Xihlovo xa vutomi, hi hala tlhelo i Xihlovo xa rirhandzu. Yehovha wa hi rhandza! Ndlela leyi a hi rhandzaka hayona yi endla hi titwa hi sirhelelekile, hi tsaka ni ku eneriseka.

2. Hi ku ya hi Matewu 22:37-40, hi hiyi milawu yimbirhi leyikulu naswona hikwalahokayini swi nga hi tikelaka ku yingisa lowa vumbirhi?

² Leswi hi nga Vakreste, swa boha leswaku hi va ni rirhandzu. Hi lerisiwa ku endla tano. (Hlaya Matewu 22:37-40.) Loko hi n’wi tiva kahle Yehovha, swi ta hi olovela ku yingisa nawu wo sungula. Sweswo swa koteka hikuva Yehovha u hetisekile, wa anakanyela naswona wa khathala hi hina. Kambe swi nga hi tikela ku yingisa nawu wa vumbirhi. Hikwalahokayini? Hikuva vamakwerhu evandlheni a va hetisekanga. Mikarhi yin’wana va nga hi tlhava hi marito kumbe va endla swilo leswi nga hi tsakisiki. Yehovha a a swi tiva leswaku hi ta langutana ni swiphiqo swo fana ni leswi, hikwalaho u huhutele vatsari van’wana va Bibele leswaku va vulavula hi ndlela leyi hi nga rhandzanaka hayona nileswaku hikwalahokayini hi fanele hi rhandzana. Un’wana wa vatsari volavo i Yohane.—1 Yoh. 3:11, 12.

3. I yini leswi Yohane a vulavuleke ha swona ngopfu?

³ Eka tibuku leti a ti tsaleke, Yohane u vulavule ngopfu hi leswaku  Vakreste va fanele va va ni rirhandzu. Eka buku yakwe leyi vulavulaka hi vutomi bya Yesu, u tirhise ngopfu marito lama nge “rirhandzu” na “rhandzile” ku tlula vatsari lavan’wana vanharhu va Tievhangheli. A a ri ni malembe ya kwalomu ka 100 loko a tsala Evhangeli yakwe ni mapapila manharhu. Rungula rakwe leri a ri tsaleke ri kombisa leswaku xin’wana ni xin’wana lexi Mukreste a xi endlaka xi fanele xi susumetiwa hi rirhandzu. (1 Yoh. 4:10, 11) Hambiswiritano, swi n’wi tekele nkarhi ku komba van’wana rirhandzu.

4. Xana Yohane a swi n’wi olovela mikarhi hinkwayo ku komba van’wana rirhandzu?

⁴ Loko Yohane a ha ri muntshwa, mikarhi yin’wana a swi n’wi tikela ku komba van’wana rirhandzu. Hi xikombiso, siku rin’wana Yesu ni vadyondzisiwa vakwe va hundze hi le Samariya loko va ya eYerusalema. Vaaki va le ximutanini xin’wana xa le Samariya a va va kombanga malwandla. Xana Yohane u endle yini? U vutise Yesu loko a lava va vitana ndzilo wu xika hi le tilweni wu ta lovisa vaaki va ximutana xexo hinkwaxo! (Luka 9:52-56) Siku rin’wana, Yohane u tlhele a tsandzeka ku komba vaapostolakulobye leswaku wa va rhandza. Yena ni makwavo Yakobo va kombele mana wa vona leswaku a va kombelela swikhundlha swo hlawuleka eka Yesu eMfun’weni wa Xikwembu. Loko vaapostola lavan’wana va twa mhaka yoleyo, va dye makala! (Mat. 20:20, 21, 24) Ku nga khathariseki swihoxo hinkwaswo leswi Yohane a swi endleke, Yesu a a n’wi rhandza ngopfu.—Yoh. 21:7.

5. Hi ta bula hi yini eka nhlokomhaka leyi?

⁵ Eka nhlokomhaka leyi, hi ta bula hi Yohane ni swin’wana leswi a swi tsaleke mayelana ni rirhandzu. Loko hi ri karhi hi endla tano, hi ta vona ndlela leyi hi nga va kombaka hayona vamakwerhu leswaku ha va rhandza. Hi ta tlhela hi vona ndlela leyi nhloko ya ndyangu yi nga swi kombisaka hayona leswaku yi rhandza ndyangu wa yona.

6. Yehovha u swi kombise njhani leswaku wa hi rhandza?

⁶ Hakanyingi hi ehleketa leswaku rirhandzu ri kombisiwa hi marito lama nga ni nsovo. Kambe rirhandzu ra xiviri ri kombisiwa hi marito ni hi swiendlo. (Ringanisa na Yakobo 2:17, 26.) Hi xikombiso, Yehovha wa hi rhandza. (1 Yoh. 4:19) U hi byela ndlela leyi a hi rhandzaka hayona hi ku tirhisa Bibele. (Ps. 25:10; Rhom. 8:38, 39) Ha tiyiseka leswaku Yehovha wa hi rhandza hikuva u hi kombisa sweswo hi marito ni hi swiendlo. Yohane u te: “Xikwembu xi kombise leswaku xa hi rhandza, hi ku rhumela N’wana wa xona la tswariweke a ri swakwe emisaveni leswaku hi ta kuma vutomi  ha yena.” (1 Yoh. 4:9) U pfumelele N’wana wakwe loyi a n’wi rhandzaka leswaku a xanisiwa a tlhela a fa hikwalaho ka hina. (Yoh. 3:16) Swi lo tlangandla, leswaku Yehovha wa hi rhandza hakunene!

7. Yesu u swi kombise njhani leswaku wa hi rhandza?

⁷ Yesu u byele vadyondzisiwa vakwe leswaku wa va rhandza. (Yoh. 13:1; 15:15) U swi kombise hi marito ni hi swiendlo leswaku wa va rhandza swin’we na hina. U te: “A nga kona loyi a nga ni rirhandzu ro tlula leri, lerova a kala a fela vanghana vakwe.” (Yoh. 15:13) Rirhandzu leri Yehovha na Yesu va hi kombeke rona, ri fanele ri hi susumetela ku endla yini?

8. I yini leswi hi faneleke hi swi endla hi ku ya hi 1 Yohane 3:18?

⁸ Hi fanele hi yingisa Yehovha na Yesu ku kombisa leswaku ha va rhandza. (Yoh. 14:15; 1 Yoh. 5:3) Yesu u tlhele a hi lerisa leswaku hi rhandzana. (Yoh. 13:34, 35) Hi fanele hi komba vamakwerhu leswaku ha va rhandza hi marito ni hi swiendlo. (Hlaya 1 Yohane 3:18.) Hi nga swi kombisa njhani leswaku ha va rhandza?

9. Rirhandzu ri endle leswaku Yohane a endla yini?

⁹ Yohane a a ta va a hlawule ku tirha swin’we ni tatana wakwe eka bindzu ra ka vona ro phasa tihlampfi. Ematshan’wini ya sweswo, u hlawule ku pfuna van’wana va dyondza ntiyiso mayelana na Yehovha na Yesu. Vutomi lebyi a byi hlawuleke a byi nga olovi. U xanisiwile swinene naswona loko se a dyuharile u pfaleriwe ejele. (Mit. 3:1; 4:1-3; 5:18; Nhlav. 1:9) Hambiloko a pfaleriwile hikwalaho ko chumayela hi Yesu, u kombise leswaku u rhandza vanhu van’wana. Hi xikombiso, loko a ri exihlaleni xa Patmosi, u tsale buku ya Nhlavutelo kutani a yi rhumela emavandlheni leswaku ma ta tiva “swilo leswi faneleke swi endleka ku nga ri khale.” (Nhlav. 1:1) Endzhaku ka loko a tshunxiwile ePatmosi, u tsale buku yakwe ya Evhangeli leyi vulavulaka hi vutomi bya Yesu ni ntirho lowu a wu endleke. U tlhele a tsala ni mapapila manharhu leswaku a khutaza ni ku tiyisa vamakwavo. U nga n’wi tekelela njhani Yohane?

10. U nga swi kombisa njhani leswaku u rhandza vanhu?

¹⁰ U nga kombisa leswaku u rhandza vanhu hi ku hlawula leswi u lavaka ku swi endla hi vutomi bya wena. Vanhu lava lawuriwaka hi Sathana va lava u tirhisa nkarhi ni matimba ya wena leswaku u tiendlela mali ni ndhuma. Kambe Vakreste emisaveni hinkwayo va heta nkarhi wa vona wo tala va ri karhi va chumayela mahungu lamanene leswaku va pfuna vanhu va va ni vuxaka lebyinene na Yehovha. Van’wana va vona i vachumayeri va nkarhi hinkwawo.

11. Vahuweleri vo tala va swi kombisa njhani leswaku va rhandza Yehovha ni vamakwavo?

¹¹ Vakreste vo tala va tirha mitirho ya ku tihanyisa leswaku va ta tiwundla swin’we ni mindyangu ya vona. Hambiswiritano, va endla hinkwaswo leswi va nga swi kotaka leswaku va seketela nhlangano wa Xikwembu. Hi xikombiso, van’wana va pfuneta entirhweni wo phalala, van’wana eku akeni ka miako ya vugandzeri naswona hinkwerhu hi nga nyikela hi seketela ntirho wa misava hinkwayo. Va endla tano hikwalaho ka leswi va rhandzaka Xikwembu ni vanhu. Vhiki ni vhiki hi kombisa leswaku hi rhandza vamakwerhu hi ku va kona etinhlengeletanweni ta vandlha hi tlhela hi hlamula. Hambileswi hi vaka hi karhele kambe hi va kona etinhlengeletanweni teto. Hambileswi hi vaka hi chuhile kambe ha hlamula. Hambileswi hinkwerhu hi nga ni swiphiqo, ha khutazana loko nhlengeletano yi nga si sungula kumbe loko yi herile. (Hev. 10:24, 25)  Ha wu tlangela swinene ntirho lowu vamakwerhu va wu endlaka!

12. Hi yihi ndlela yin’wana leyi Yohane a swi kombiseke hayona leswaku u rhandza vamakwavo?

¹² Yohane u kombise leswaku u rhandza vamakwavo hi ku va bumabumela ni hi ku va nyika switsundzuxo. Hi xikombiso, eka mapapila yakwe, u bumabumele vamakwavo hikwalaho ka ripfumelo ni mitirho ya vona leyinene kambe u tlhele a va nyika xitsundzuxo mayelana ni xidyoho. (1 Yoh. 1:8–2:1, 13, 14) Hilaha ku fanaka, hi fanele hi bumabumela vamakwerhu hikwalaho ka swilo leswinene leswi va swi endlaka. Kambe loko hi vona un’wana a sungula ku ngheniwa hi moya wo biha, hi nga kombisa leswaku ha n’wi rhandza hi ku n’wi tsundzuxa hi ndlela ya musa. Swi lava xivindzi ku tsundzuxa munghana kambe Bibele yi vula leswaku vanghana va ntiyiso va lotana kumbe va tsundzuxana.—Swiv. 27:17.

13. Hi fanele hi papalata ku endla yini?

¹³ Mikarhi yin’wana, hi komba vamakwerhu leswaku ha va rhandza hi ku papalata ku endla swilo swo karhi. Hi xikombiso, a hi hatli hi kwata loko va vula swin’wana. Ehleketa hi leswi endlekeke loko Yesu a ri kusuhi ni ku dlayiwa. U byele vadyondzisiwa vakwe leswaku loko va lava ku kuma vutomi lebyi nga heriki va fanele va dya nyama ni ku nwa ngati ya yena. (Yoh. 6:53-57) Marito wolawo a ma tsema nhlana lerova vadyondzisiwa vakwe vo tala va tshike ku n’wi landzela kambe vanghana vakwe va ntiyiso a va tshikanga, ku katsa na Yohane. A va nga swi twisisi leswi Yesu a swi vuleke naswona na vona swi va hlamarisile. Hambiswiritano, a swi va kwatisanga naswona a va nga swi teki tanihi leswi hoxeke. Kurinasweswo, va n’wi tshembile hikuva a va swi tiva leswaku mikarhi hinkwayo u vulavula ntiyiso. (Yoh. 6:60, 66-69) Hikwalaho, i swa nkoka leswaku hi papalata ku hatla hi kwata loko vanghana va hina va vula swin’wana. Ematshan’weni yo kwata, hi fanele hi va nyika nkarhi wo hlamusela leswi va swi vulaka.—Swiv. 18:13; Ekl. 7:9.

14. Hikwalahokayini hi fanele hi papalata moya wa rivengo?

¹⁴ Yohane u tlhele a hi tsundzuxa leswaku hi papalata ku venga vamakwerhu. Loko hi nga xi yingisi xitsundzuxo xolexo, Sathana u ta hi hambukisa. (1 Yoh. 2:11; 3:15) Leswi swi humelerile eka van’wana enkarhini wa vaapostola. Sathana u we a pfuka leswaku a byala moya wa rivengo ni wa ku avana exikarhi ka vanhu  va Xikwembu. Hi nkarhi lowu Yohane a tsaleke mapapila yakwe ha wona, vavanuna lava a va ri ni moya wo fana ni wa Sathana se a va ri kona evandlheni. Hi xikombiso, Diyotrefo a a vanga ku avana lokukulu evandlheni rin’wana. (3 Yoh. 9, 10) A a nga va xiximi vayimeri va huvo leyi fumaka lava a va endzela mavandlha. U ringete ni ku hlongola van’wana evandlheni lava a va komba vanhu lava a a nga va rhandzi malwandla. A a ri ni moya wa ku biha swinene! Ninamuntlha, Sathana wa ha lwa hi matimba leswaku a va nga ku avana exikarhi ka vanhu va Xikwembu. Onge hi nga ka hi nga ri pfumeleli rivengo leswaku ri hi ava hi le xikarhi!

15. I yini leswi nhloko ya ndyangu yi faneleke yi swi tsundzuka?

¹⁵ Nhloko ya ndyangu yi kombisa leswaku yi rhandza ndyangu wa yona hi ku wu wundla. (1 Tim. 5:8) Yi fanele yi tlhela yi tsundzuka ku pfuna ndyangu wa yona wu va ni vuxaka lebyinene ni Xikwembu. (Mat. 5:3) Xiya xikombiso lexinene lexi Yesu a xi vekeleke tinhloko ta mindyangu. Evhangeli ya Yohane yi kombisa leswaku loko Yesu a ri ekusuhi ni ku fa emhandzini ya nxaniso, a ha ehleketa hi ndyangu wa ka vona. Yohane a ri etlhelo ka Mariya mana wa Yesu, endhawini leyi Yesu a a beleriwe eka yona. Hambileswi Yesu a a twa ku vava swinene, u kombele Yohane leswaku a sala a hlayisa Mariya mana wakwe. (Yoh. 19:26, 27) Yesu a a ri na vona vamakwavo lava a va ta swi kota ku sala va hlayisa Mariya kambe swi tikomba onge a a nga ri kona loyi a ri mudyondzisiwa wakwe hi nkarhi wolowo. Yesu a a lava leswaku Mariya a sala a hlayisiwa hi munhu loyi a a ta n’wi khutaza ku ya emahlweni a tirhela Yehovha.

16. Hi byihi vutihlamuleri byo tala lebyi Yohane a a ri na byona?

¹⁶ Yohane a a ri ni vutihlamuleri byo tala. Leswi a a ri muapostola, a a fanele a chivirika entirhweni wo chumayela. Nakambe swi nga endleka leswaku a a ri ni ndyangu hikwalaho a a fanele a wu wundla ni ku tlhela a wu pfuna wu va ni vuxaka lebyinene na Yehovha. (1 Kor. 9:5) Tinhloko ta mindyangu ti dyondza yini emhakeni leyi namuntlha?

17. Hikwalahokayini swi ri swa nkoka leswaku nhloko ya ndyangu yi pfuna ndyangu wa yona wu va ni vuxaka na Yehovha?

¹⁷ Swi nga endleka makwerhu loyi a nga nhloko ya ndyangu a ri ni vutihlamuleri byo tala. Hi xikombiso, u fanele a gingiriteka laha  a tirhaka kona leswaku a nga yisi xisandzu evitweni ra Yehovha. (Efe. 6:5, 6; Tito 2:9, 10) Nakambe swi nga endleka a ri ni vutihlamuleri evandlheni, byo tanihi ku va murisi ni ku rhangela entirhweni wo chumayela. Hi hala tlhelo, u fanele a dyondza Bibele nkarhi ni nkarhi ni ndyangu wakwe. Ndyangu wakwe wu ta tsaka ngopfu loko a wu wundla ni ku wu pfuna leswaku wu va ni vuxaka lebyinene na Yehovha.—Efe. 5:28, 29; 6:4.

18. I yini leswi Yohane a a tiyiseka ha swona?

¹⁸ Yohane u hanye malembe yo tala naswona u vone swilo swo tala swo tsakisa. U langutane ni mitlhontlho yo tala leyi a yi ta va yi tsanise ripfumelo rakwe. Kambe u we a pfuka leswaku a yingisa swileriso swa Yesu, ku katsa ni xileriso xo rhandza vamakwavo. Yohane a a tiyiseka leswaku Yehovha na Yesu va n’wi rhandza naswona va ta n’wi nyika matimba yo tiyisela miringo. (Yoh. 14:15-17; 15:10; 1 Yoh. 4:16) Sathana ni vanhu vakwe va tsandzekile ku sivela Yohane ku komba vamakwavo leswaku wa va rhandza hi marito ni hi swiendlo.

19. Yohane wo Sungula 4:7 yi hi khutaza ku endla yini naswona hikwalahokayini?

¹⁹ Ku fana na Yohane, hi hanya ni vanhu lava lawuriwaka hi Sathana, xikwembu xa misava leyi lexi nga ni mona. (1 Yohane 3:1, 10) U lava hi tshika ku rhandza vamakwerhu kambe a nge swi koti sweswo handle ka loko ho n’wi pfumelela. Onge hi nga tiyimisela ku komba vamakwerhu leswaku ha va rhandza hi marito ni hi swiendlo! Loko hi endla tano, hi ta tsaka hileswi hi nga xiphemu xa ndyangu wa Yehovha naswona hi ta tiphina swinene hi vutomi.—Hlaya 1 Yohane 4:7.