1. Rudo ra Mwari rinoita kuti muzwe kudini?

“MWARI rudo,” wakatara kudaro muphostori Juau. (1Ju. 4:8) Masoko aya anotiedzurira cokwadi cimweni cinokosha: Mwari ndiye Manyuko e upenyu, uyewo Manyuko e rudo. Rudo rake rinotiita kuti tigare takacengeteka, tecipfara uye takakwana.

2. Maererano na Mateu 22:37-40, mitemo ipi miiri uye ngei zvecitinesera kuzwira mutemo wecipiri?

² Ku aKristu, azvisanangurhwi kupangidza rudo kuti ndopangidza rudo here kana kuti haiwa. Utori mutemo. (Erengai Mateu 22:37-40.) Patinoguma pakunyasa kuzia Djehovha tinoona zviri nyore kuzwira mutemo iwona. Djehovha munhu akakwana; ayena anotibata ne rudo. Asi tingakwanisa kuneserhwa pakuzwira mutemo we cipiri. Ngei? Ngekuti hama no hanzvadzi dzedu—pamwepo no anyacigarisano edu—anhu asikazi kukwana. Pa nguwa imweni, awona angakwanisa kureketa kana kuita zviro zvatisikadi. Djehovha aizia kuti taizosongana ne dambudziko iri, ndiyo ndaa Djehovha akafemera atari e Bhaibheri kuti atare mazano akaringana nge zve kupangidzirana rudo pakati pe hama. Umwe wakatara izvi ndi Juau.—1Ju. 3:11, 12.

3. Juau wainyanya kureketa nge zvei?

³ Mu tsamba dzake, Juau unokohomedzesa kuti aKristu anodikana kupangidza rudo. Kureketa zvazviri, mu ngano yake ye upenyu wa Djesu, Juau unonyanya kuseenzesa masoko e kuti “rudo” uye “akada” kudarika amweni.  Juau wainga aano makore 100 paakatara Evhangeri. Zvitarhwa izvi zvakafemerhwa zvinopangidza kuti rudo rinodikana kuseenza mu zviro zvese zvinoizwa nge muKristu. (1Ju. 4:10, 11) Kunyazi zvakadaro, zvakatora nguwa kuti Juau azvifundire.

4. Juau wairumbwa ecipangidza rudo ku amweni nguwa dzese here?

⁴ Juau paainga ari djaha, anguwapi dzese dzaaipangidza rudo. Ngo muezaniso, pa nguwa imweni, Djesu no afundi ake aiita rhwendo re kuenda ku Djerusarema ecipinga no mu Samariya. Muzi umweni we mu Samariya, wakaramba kupangidza rupo kaari. Juau wakaitei? Iyena wakakumbira kuti muriro ubve kudenga uye uparadze agari ese e mu thaundi re Samariya! (Ru. 9:52-56) Pa nguwa imweni, Juau aazi kupangidza rudo ku aphostori doni. Iyena no hama yake Tiyago akabambidzira mai awo kuti akumbire Djesu kuti aapase zvigaro zvepamusoro pa dii rake mu Umambo. Aaphostori amweni paakazia zvakaizwa ndi Tiyago na Juau, akatsamwa maningi! (Mt. 20:20, 21, 24) Kunyazi pa zviro zvese zvaishaiswa na Juau, Djesu waimuda.—Ju. 21:7.

5. Ticaongororei mu fundo ino?

⁵ Mu fundo ino, ticaongorora muezaniso wa Juau uye zviro zvinganani zvaakatara zvakaringana ne rudo. Paticazviita, ticafunda kuti tingapangidzira kudini rudo ku hama no hanzvadzi dzedu. Uyewo ticafunda mushobo unokosha unopangidza kuti musoro we mhuri anoda mhuri yake.

6. Djehovha akapangidza kudini kuti anotida?

⁶ Patinorangarira nge zve rudo, tino rudo rinopangidzwa nge zviito zvakasiyana siyana. (Ezanisai na Tiyago 2:17, 26.) Ngo muezaniso, Djehovha anotida. (1Ju. 4:19) Uye ayena anotibvunza nge zve rudo rake eciseenzesa Bhaibheri. (Pis. 25:10; Aro. 8:38, 39) Kunyazi zvakadaro tino cokwadi cekuti Mwari anotida, haiwa nge zvaanoreketa, asi nge zviya zvaakaita. Juau wakatara kuti: “Na izvi rudo ra Mwari rakapangidzwa katiri, kuti Mwari akatuma Mwana wake akaberekwa ari umwe ega mu nyika kuitira kuti isusu tione upenyu peciseenzeswa ayena.” (1Ju. 4:9) Djehovha akatendera Mwana wake anodiwa kuti atambudzike uye kuti atifire. (Ju. 3:16) Munotenda here kuti Djehovha anotida?

7. Djesu akapangidza kudini kuti anotida?

⁷ Djesu akakohomedzesa afundi ake kuti  anoada. (Ju. 13:1; 15:15) Ayena akapangidza afundi ake kuti anoada. “Akuna munhu ano rudo hinga iri,” akadaro Djesu, “kuti munhu ape upenyu wake ngekuda shamwari dzake.” (Ju. 15:13) Patinoona zvetakaizirhwa ndi Djehovha na Djesu zvinotitora kuti tiitei?

8. 1 Juau 3:18 inotibvunza kuti tinodikana kuitei?

⁸ Tinopangidza kuti tinoda Djehovha na Djesu nge kuazwira. (Ju. 14:15; 1Ju. 5:3) Uye Djesu akatisiira mupango wekuti tidanane. (Ju. 13:34, 35) Atidikani kupangidza ku hama no hanzvadzi dzedu kuti tinodzida nge muromo basi, asi nge zviito. (Erengai 1 Juau 3:18.) Tingaitei pakupangidza kuti tinoda hama no hanzvadzi dzedu?

9. Rudo rakaita kuti Juau aitei?

⁹ Juau hingana wakasanangura kugara eciseenza na baba ake pa basa rekuedza howe. Pano kudaro, Juau wakapedzera upenyu wake ecibetsera anhu kuti azie Djehovha na Djesu. Upenyu wakasanangurhwa na Juau wainga usiripi nyore. Iyena wakateererhwa, uye kumagumo ke makore ekutanga, paainga acena, iyena wakazofuruswa. (Zvi. 3:1; 4:1-3; 5:18; Zva. 1:9) Kunyazi paainga akasungwa Juau waiparidzira nge zva Djesu, waipangidzira kuti unoda amweni. Ngo muezaniso, paainga ari pa citsuwa ce Patmos iyena wakaedzurira kuti zvaainga aoneswa zvaidikana kuendeswa ku ungano kuti ungano dziziye “zvaizoitika nokukasika.” (Zva. 1:1) Hino, pamweni paya paakazosudzunurhwa, Juau wakatara ngano ye upenyu uye basa ra Djesu. Iyena wakatarawo tsamba nhatu kuti abambise hama no hanzvadzi. Mungateedzera kudini upenyu wekudzipira hingana Juau?

10. Mungapangidza kudini kuti munoda anhu?

¹⁰ Mungapangidza kuti munoda anhu ne zviya zvamunosanangura kuita mu upenyu wenyu. Mu nyika ya Sathani, anhu anopedza simba no nguwa eciedza kuona mare kana kuona mbiri. Mukusiyana na izvona, aziisi e Umambo anopedza nguwa yese eciparidzira anhu masoko anopfadza uye anoabetsera kuti agare shamwari dza Djehovha. Amweni awo anopedza nguwa yakareba eciparidzira no kufundisa.

11. Aparidzi akawanda akagondeka anopangidza kudini kuti anoda hama no hanzvadzi?

¹¹ AKristu akawanda akagondeka, anopedza nguwa yese ku basa kuti akwanise kuriritira mhuri dzawo. Kunyazi zvakadaro, aparidzi aya anobetsa sangano ra Mwari pa zvese zvaanokwanisa. Ngo muezaniso, amweni anokwanisa kubetsera panoitika tsaona, amweni anokwanisa kuseenza pa basa rekuwaka, uye ese ano mukana we kupa mipiro yawo ku basa re nyika yese. Aona anoita izvi ngekuti anoda Mwari ne adoni awo. Masumana ese tinopangidza kuti tinoda Djehovha nge kupinda uye kudairawo pa misangano ye ungano. Kunyazi takaremba, tinopinda misangano. Kunyazi tecitya, tinodairawo. Uyewo kunyazi tino matambudziko edu pacedu, tinobambisawo amweni pa misangano. (Ahe. 10:24, 25) Tinotenda maningi basa re hama no hanzvadzi dzedu!

12. Juau wakapangidzazve kudini kuti anoda hama no hanzvadzi dzake?

¹² Juau akapangidza rudo ku hama no hanzvadzi dzake haiwa basi nge kuasimba, asi kuapasawo mazano. Ngo muezaniso, mu  tsamba dzake Juau wakasimba kutenda ke hama dzake uye mabasa akanaka, asiwo wakaapasa mazano anosimba akaringana no zvitema. (1Ju. 1:8–2:1, 13, 14) Kuitawo hingana Juau, tinodikana kusimba hama dzedu nge zviro zvakanaka zvaanoita. Asi kana muitiro wakashata wecikura pa munhu, tingapangidzira rudo, takangwarira tecimubvunza zvaanodikana kuita. Zvinoda ushingi kuti tipase zano shamwari yedu, asi Bhaibheri rinoti shamwari dze zvirokwazvo dzinorodzerana kana kuti dzinogadzirisana.—Zvie. 27:17.

13. Atidikani kuitei?

¹³ Nguwa dzimweni, tinopangidza rudo redu ku hama dzedu haiwa nge zvatinoita. Ngo muezaniso, atitsamwi nokukasika nge zviro zvaanoreketa. Onai zvakaitika kuna Djesu pa mazuwa ekupedzesera pasi pano. Ayena akabvunza afundi ake kuti awona aone upenyu, aidikana kurhya nyama yake uye kumwa ngazi yake. (Ju. 6:53-57) Masoko aya akabaya afundi ake uye ajinji akhona akatomusiya—asi shamwari dzake dze cokwadi, dzakarumbwa dzina Djesu, kutobatanidzawo Juau. Awona akasara naye. Awona aazi kuzwisisa zvakareketwa na Djesu, ndiyo ndaa akashamiswa ndizvona. Ngokudaro, shamwari dza Djesu dzakagondeka adzizi kuona zvakareketa Djesu hingana zvakashata uye zvoita kuti atsamwe. Pano kudaro, awona akamugonda, ecizia kuti ayena aireketa cokwadi. (Ju. 6:60, 66-69) Atidikani kukasika kutsamwa nge zviro zvinoreketwa nge hama dzedu! Tisati tadaro, tinopa mukana wekupanganidza zviya zvatisikazi kuzwisisa.—Zvi. 18:13; Mup. 7:9.

14. Ngei tisikadikani kutendera kuti uzondi ugare mu mwoyo medu?

¹⁴ Juau wakatingwadza kuti tisazonde hama no hanzvadzi dzedu. Kana tikasama kuseenzesa zano irona, tinonga tecipasa mukana Sathani. (1Ju. 2:11; 3:15) Izvona zvakaitikawo ku anhu amweni kumapeto ke zana remakore K.A. Sathani waiita zvese kuti akande uzondi uye kuparadzanisa anhu a Mwari. Juau paakatara tsamba dzake, anhu aipangidza mwiya wa Sathani ainga apinda mu ungano.  Ngo muezaniso, Dhiyotrofesi waiparadzanisa anhu mu ungano. (3Ju. 9, 10) Iyena wainga asikareremedzi aemereri anohambira e dare rinotungamirira. Iyenazve wakatoedza kudzingira anhu aitambira arendo zvakanaka. Waidzikudzadi! Sathani ucirikuedza kuparadzanisa anhu a Djehovha mazuwa ano. Ngatisambotendere kuti uzondi utibvise pana Djehovha.

15. Musoro we mhuri unodikana kuedzurirei?

¹⁵ Mushobo unokosha ungapangidzira kuti mwamuna unoda mhuri yake ngewe kuiriritira. (1Ti. 5:8) Iyena unodikana kurangarira kuti zviro zvekunyama azvigutisi zve kumwiya. (Mt. 5:3) Onai muezaniso wakasiya Djesu ku musoro we mhuri. Maererano no Vhangeri ra Juau, Djesu paainga ooda kufa pa mutanda wekutambidzika, ayena airangarira mhuri yake. Juau wainga ana mai a Djesu, Mariya, pa mbuto yaiuraiwa Djesu. Kunyazi paainga ari pa nguwa yekurhwadziwa kukuru, Djesu akaita kuti Juau ariritire Mariya. (Ju. 19:26, 27) Djesu ainga ano hama dzaizokwanisa kuriritira zvekunyama zva Mariya, zvinoita hingana kuti awona ese apana wainga agara mufundi wa Djesu. Ndiyo ndaa Djesu waida kugara no rugondo rokuti mai ake aone zvekurhya zve kunyama uye zve kumwiya.

16. Juau wainga ano ubaba upi?

¹⁶ Juau waitwara ubaba wakakura. Nge kugara umwe we aphostori, iyena wakatungamirira basa rekuparidzira. Kudai ainga akawaka, angadai aidikana kugurirana pakuriritira mhuri yake zve kunyama ne zve kumwiya. (1Ako. 9:5) Misoro ye mhuri inofundei?

17. Ngei zvecidikana kuti musoro we mhuri uriritire zvinodikanwa zve mhuri yake?

¹⁷ Hama ino mhuri ingakwanisa kugara no zvekuita zvakawanda. Ngo muezaniso, iyona unodikana kuseenza no simba pa basa rake, kuitira kuti muhambiro wake ukudze Djehovha. (Aef. 6:5, 6; Tit. 2:9, 10) Uye iyona ingakwanisa kugara no ubaba mu ungano, hinga kuusha uye kutungamirira basa rekuparidzira. Pa nguwa imweyo zvinokosha kuti iyona ifunde Bhaibheri ne mukadzi wake nguwa dzese. Iwona acatenda no mwoyo wese simba raanoita kuitira  kuti arumbwe eciatsigira pane zve kunyama, mu ndangariro uye pa kunamata.—Aef. 5:28, 29; 6:4.

18. Juau wainga ano rugondo ripi?

¹⁸ Juau wakararama nguwa yakareba uye wainga akabatika maningi. Iyena wakasongana no zvineso zvese zvaikwanisa kuteredza kutenda kake. Asi iyena waiita zvaaikwanisa nguwa dzese kuti azwire mutemo wa Djesu, kutobatanidzawo mutemo wekuda hama no hanzvadzi. Pakupedzesera, Juau wakagara no cokwadi cekuti Djesu waimuda uye kuti aizomupasa simba rokunyisa dambudziko ripi haro. (Ju. 14:15-17; 15:10; 1Ju. 4:16) Apana cingaizwa na Sathani pamwepo no nyika yake zvaikwanisa kuimisa Juau, pakupangidzira rudo.

19. 1 Juau 4:7 inotikohomedzesa kuitei, uye ngei?

¹⁹ Kuita hingana Juau, tirikuraramawo mu nyika iri kutongwa na Sathani, muzondi wedu mukuru. (1Ju. 3:1, 10) Kunyazi iyena ecida kuti tisiye hama dzedu, iyena aakwanisi kuita izvi, asi acazvikwanisa kana tikamurekerera ecizviita. Ngatishingei kuda hama no hanzvadzi dzedu, pakupangidza rudo iri nge zvatinoreketa uye nge zvatinoita. Kana tikadaro ticapfara nge kugara dii re mhuri ya Djehovha uye ticapfadzwa nge upenyu.—Erengai 1 Juau 4:7.