1. Иегова силерге ынак боорга, чүнү миннир-дир силер?

«БУРГАН — ынакшыл-дыр» — деп, Иоанн элчин бижээн (1 Ин. 4:8). Бурган чүгле чуртталганың Берикчизи эвес, а ынакшылдың үнер дөзү деп, бо сөстер көргүзүп турар. Иегова биске аажок ынак! Ооң ачызында боттарывысты өөрүшкүлүг болгаш айыыл чок кылдыр миннип чоруур бис.

2. Кандыг ийи айтыышкын эң-не чугула база ооң ийи дугаарын сагыыры чүге берге? (Матфей 22:37—40).

² Христианнар ынакшылды илередир ужурлуг бе? Ынчанмайн, канчаар. Ол дээрге Бурганның эң-не кол ийи айтыышкынында бижиттинген негелде-дир. (Номчуптуңар: Матфей 22:37—40). Иегованы эки билген тудум, «Бурганга ынак бол» дээн бир дугаар айтыышкынны сагыыры биске белен боор. Чүге дизе Иегованың кандыг-даа четпес талалары чок, Ол биске ынак болгаш, эки хамаарылганы көргүзүп турар. А «чоок кижиңге ынак бол» дээн ийиги айтыышкынны сагыыры ындыг кончуг белен эвес. Чүге дизе акы-угбаларывыстың четпес талаларын эскерери биске белен. Чамдыкта олар чугаазы болгаш соок хамаарылгазы-биле бисти хомудадып болур. Иегова бисти ындыг бергелерге таваржыр деп билгеш, Бижилгени бижип турган бараалгакчыларының чамдыызын, чижээ, Иоанн элчинни, аравыста ынакшылды чүге илередирин бижиир кылдыр оттурган (1 Ин. 3:11, 12).

3. Ынакшылдың дугайында Иоанн чүнү чугаалап турганыл?

³ Христианнар ынакшылды илередир ужурлуг деп, Иоанн чаңгыс удаа эвес сагындырган. Иоанн бодунуң бижээн Буянныг медээзинде «ынакшыл» биле «ынак болуру» деп сөстерни,  өске үш Буянныг медээлерге бодаарга, хөй катап ажыглаан. Ол чагааларны бижип турган үеде Иоанн чүс хире харлыг турган. Ол библейжи номнар чуртталганың шупту талаларынга ынакшылды илередирин өөредип турар (1 Ин. 4:10, 11). Ынчалза-даа Иоанн боду ол кичээлди дораан шиңгээдип албаан.

4. Иоанн өскелерге ынакшылды үргүлчү көргүзүп турган бе?

⁴ Иоанн аныяанда ынакшылды үргүлчү илеретпейн чораан. Ооң чуртталгазындан ийи болуушкунну сактып кээлиңер. Кажан Иисус өөреникчилери-биле Иерусалимче Самария таварыштыр бар чыдырда, ында суурнуң чурттакчылары оларга экииргек хамаарылганы көргүспээн. Ону көргеш, Иоанн: «Дээрги! Күзээр силер бе? Дээрден дүшкеш, оларны узуткап каарын отка чугаалаалы бе?» — деп Иисуска чугаалаан (Лк. 9:52—56). Иоанн элчиннерге хамаарыштыр база ынакшылды чедир илеретпейн турган. Ол Иаков дээр акызы-биле Бурганның Чагыргазынга бедик туруш-байдалды ээлеп алырын күзээш, авазын Иисусче чоргузупкан. Ону билип кааш, өске элчиннер дыка хорадаан (Мф. 20:20, 21, 24). Иоанның четпес талалары турган-даа болза, Иисус аңаа аажок ынак турган (Ин. 21:7).

5. Бо статьяга чүнү сайгарар бис?

⁵ Бо статьяга Иоанның чижээн база ынакшыл дугайында ооң чүнү бижээнин сайгарып көөр бис. Оон ыңай ха-дуңмавыска ынакшылды база өг-бүле баштыңнары чоок улузунга ынакшылды канчаар илередирин сайгарар бис.

6. Иегова биске ынакшылын канчаар көргүскен?

⁶ Кижи өске улуска ынакшылды канчаар көргүзүп болур? Чамдык улус минниишкиннерин чугаалаарга, чедер деп бодаар. Ынчалза-даа ёзулуг ынакшыл чүгле сөстерден эвес, а ажыл-херектерден база көскү боор ужурлуг. (Деңнеңер: Иаков 2:17, 26.) Чижээ, Иегова биске ынак (1 Ин. 4:19). Ол бистерге ынакшылын Библияда бижээн чылыг-чымчак сөстери-биле илереткен (Ыд. ыр. 24:10; Рим. 8:38, 39). Ынчалза-даа Ол ынакшылын чүгле сөс кырынга эвес, а ажыл-херээ-биле база бадыткаан. «Улус Ону дамчыштыр амыдыралды алзын дээш, Бодунуң эр чаңгыс Оглун бо делегейже чорудупкаш, Бурган ооң-биле биске Бодунуң ынакшылын көргүскен-дир» — деп, Иоанн бижээн (1 Ин. 4:9). Иегова Бодунуң Оглун бис дээш хилинчектенип, өлүрүн чөпшээрээн (Ин. 3:16). Иегова биске, шынап-ла, ынак деп оон артык кандыг бадыткал херек боорул?

7. Иисус биске ынакшылын канчаар көргүскенил?

 ⁷ Иисус бодунуң өөреникчилеринге ынакшылды илередип чораан (Ин. 13:1; 15:15). Ооң өөреникчилеринге ынакшылы чүгле сөстеринден эвес, а ажыл-херээнден база көскү турган. «Бодунуң эш-өөрү дээш амы-тынын бээр кижиниң ынакшылындан дээди ынакшыл чок» — деп, Иисус чугаалаан (Ин. 15:13). Иегова биле Иисус биске дыка хөй чүүлдерни кылган. Ол чүүл биске кандыг салдар чедирер ужурлуг?

8. 1 Иоанн 3:18-тен алырга, чүнү канчаар ужурлуг бис?

⁸ Бис Иегова биле Иисуска ынак болганывыста, оларны дыңнаар ужурлуг бис (Ин. 14:15; 1 Ин. 5:3). А Иисус: «Бот-боттарыңарга ынак болуңар» — деп биске чагаан (Ин. 13:34, 35). Акы-угбаларга «ынак мен» деп чугаалаарындан аңгыда, ажыл херээвис-биле база ону көргүзер ужурлуг бис. (Номчуптуңар: 1 Иоанн 3:18.) Ону канчаар кылып болур бис?

9. Ынакшыл Иоанны чүнү кылырынче оттурганыл?

⁹ Иоанн ачазының чанынга артып калгаш, өг-бүлезиниң ажыл-херээн уламчылап, балыкчы бооп болур турган. Ынчалза-даа ол он-он чылдар дургузунда Иегова болгаш Иисустуң дугайында алыс шынны өскелерге билип алырынга дузалап чораан. Ооң шилип алган чуртталгазы белен эвес турган. Бүзүрели дээш Иоанн истедип сүрдүрүп чораан. А бирги вектиң төнчүзүнде, кажан ол мырыңай кырып-чөнүп калганда, ону өске черже шөлүпкен (Аж.-ч. 3:1; 4:1—3; 5:18; Ажыд. 1:9). Иисустуң дугайында суртаалдап турганы дээш хоругдалга олургаш безин, Иоанн өскелерниң дугайында бодап чораан. Патмосче шөлүттүрген үезинде ол «удавайн болур бүгү чүүлдүң» дугайында бижээш, акы-угбалар билип алзын дээш, Ажыдыышкын номун оларже чоргузупкан (Ажыд. 1:1). Ол Патмостан хосталып келгениниң соонда, Иисустуң черге суртаалының дугайында Буянныг медээни бижээн чадавас. Акы-угбаларны деткип база быжыктырар дээш, ол үш чагааны база бижээн. Иоанның бодун хайыралавайн, чурттап чораанындан чүнү өөренип алдыңар?

10. Кижилерге ынакшылды канчаар көргүзүп болур силер?

¹⁰ Чүү чүвеге чуртталгаңарны бараалгадып турарыңардан кижилерге ынакшылыңар көстүп кээр. Эрликтиң делегейи силерни өскелерге дуза кадарынга эвес, а хөй акша ажылдап, ат-сураглыг болурунче оттуруп турар. Ынчалза-даа Чагырганың суртаалчылары өске орукту шилип ап турар. Олар үезин болгаш күжүн харамнанмайн, кижилерге Бурганче чоокшулаарынга дузалап чоруур. Оларның чамдыызы безин долу бараалгап турарлар.

11. Хөй бараалгакчылар Бурганга болгаш акы-угбаларга ынакшылын канчаар көргүзүп турарыл?

¹¹ Бодун болгаш өг-бүлезин азыраар дээш, Бурганның хөй шынчы бараалгакчылары бүдүн хүн ишти ажылдаар ужурга таваржып турар. Ынчалза-даа олар Бурганның организациязын деткиирин кызып турарлар. Чамдык улус бойдус халавындан когараан кижилерге дузалажып, а өскелер тудуг ажылында киржип турар. Оларны ону кылырынче Бурганга болгаш чанында кижилерге ынакшыл оттуруп турар. Оон ыңай кижи бүрүзү суртаал ажылын хууда акшазы-биле деткип болур. Могап-шылап калгаш безин, неделя санында чыыштарже барып, биске сүрээденчиг-даа болза, сайгарылгага киржирин кызып турар бис. Шак ынчаар акы-угбаларга ынакшылывысты көргүзүп турар бис. Боттарывыстың бергелеривис хөй-даа бол, чыыш эгезинде азы соонда артып калгаш, акы-угбаларны деткип турар  бис (Евр. 10:24, 25). Акы-угбаларның кылып турар шупту ажыл-херээ дээш, өөрүп четтирер-дир бис!

12. Иоанн акы-угбаларга ынакшылын оон ыңай канчаар көргүзүп турганыл?

¹² Иоанның акы-угбаларга ынакшылы оларны чүгле мактап турганындан аңгыда, оваарындырып турганындан база көскү. Чижээ, ол бодунуң чагааларында акы-угбаларны быжыг бүзүрели болгаш кылып чоруур ачы-буянныг ажыл-херээ дээш мактааш, бачытка шын хамаарылгалыг болурунче дорту-биле кыйгырган (1 Ин. 1:8—2:1, 13, 14). Бис база, Иоанн ышкаш, акы-угбаларны мактаар болзувусса эки. Ынчалза-даа бир акы-угбавыстың багай хөөнүн азы багай чүүлге сундулуун эскерип каар болзувусса, ооң дугайында аңаа эвилең-ээлдек сагындырып чугаалаары чугула. Ынчалдыр аңаа ынакшылывысты көргүзер бис. Ону аңаа чугаалаары берге-даа бол, ёзулуг өңнүктер бот-боттарын «чидидип» азы эки шынарларны сайзырадып алырынга дузалаар деп чүүлдү утпаалыңар (У. ч. 27:17).

13. Чүнү кылбас болзувусса эки?

¹³ Оон аңгыда, кады бүзүрээн акы-угбаларывыска хомудал шыгжап турбазывыс-биле ынакшылывысты көргүзүп болур бис. Чижээ, Иисустуң черге тургаш, бараалгап турган үезинде бир таварылганы сактып кээлиңер. Ол өөреникчилеринге: «Кижи амытан Оглунуң мага-бодун чивес база Ооң ханын ишпес болзуңарза, бодуңарда амыдырал чок болур» — дээн (Ин. 6:53—57). Ол сөстерни дыңнаан кезек өөреникчилер хомудай бергеш, Иисусту каапкаш, чорупкан. Ынчалза-даа ооң ёзулуг эштери, оларның санында Иоанн элчин, ону кагбаан. Иисустуң чугаалаан сөстерин олар чедир билбээн-даа болза, «Иисус бисти куду көрүп тур» азы «ол шын эвес чүүл чугаалап тур» деп кажан-даа бодавааннар. Харын-даа олар чүгле Иисус алыс шынны өөредип турар деп шын-на сеткилинден бүзүреп турганнар (Ин. 6:60, 66—69). Бир эвес бисти хомудадыпкан болза, ол кижиге хамаарыштыр түңнелдерни эрте үндүрбейн, ол байдалды тайылбырлаар арганы аңаа берээлиңер (У. ч. 18:13; Эккл. 7:9).

14. Бистиң чүрээвиске көөр хөөн чок чорук тыптып кээрин чүге чөпшээревес ужурлуг бис?

¹⁴ Акы-угбаларга көөр хөөн чок чорукту сайзырадыр болза, кижи Эрликтиң аспаанче кире бээр деп, Иоанн сагындырган (1 Ин.  2:11; 3:15). Шак ындыг чүүл бирги вектиң христианнары-биле болган. Эрлик Бурганның чонунуң аразынга чөрүлдээлерни болгаш көөр хөөн чок чорукту өөскүдер дээш кызып турган. Иоанн чагааларын бижип доозуп турган үезинде христиан чыыштарже Эрлик ышкаш сорулгалыг кижилер кирип келгеш турган. Оларның бирээзи — Диотреф. Ооң хайындан чыыш иштинге шыңгыы чөрүлдээлер тургустунуп келген. Хуралдарны кезип турган удуртукчу чөвүлелдиң төлээлерин безин ол хүндүлевейн турган. Оларны хүлээп турган акы-угбаларны «христиан ниитилелден үндүр сывыртаарын» Диотреф оралдажып турган (3 Ин. 9, 10). Чүдек туразы улуг кижи аа! Эрлик бөгүн база шак-ла ындыг сорулгалыг болганда, акы-угбалар аразынга чөрүлдээлер тургустунуп кээрин болдурбаалыңар!

15. Өг-бүлениң баштыңы чүнүң дугайында сактыр ужурлуг?

¹⁵ Өг-бүлениң баштыңы чоок улузунга ынакшылын канчаар көргүзүп болур? Ол өг-бүлезиниң хереглелдерин хандырар ужурлуг (1 Тим. 5:8). Ынчалза-даа акша биле өнчү-хөреңги Бурган-биле чоок харылзаалыг болурунга дузалавас деп чүүлдү сактыр болза эки (Мф. 5:3). Иисус өг-бүлениң баштыңнарынга кандыг үлегерни арттырганыл? Иоанның бижээн Буянныг медээзинден алырга, чагыга шаптырткан Иисус, хинчектенип тургаш безин, бодунуң өг-бүлези дээш сагыжы аарып турган. Иисус авазы Марияның дугайында сагыш човаарын ооң чанынга турган Иоанны дилээн (Ин. 19:26, 27). Иисустуң кады төрээн дуңмалары авазының дугайында сагыш човап болур турган-даа болза, оларның кайызы-даа ол үеде ооң өөреникчилери эвес турган. Ынчангаш ол авазын, Марияны, Иоаннга чагып каан.

16. Иоанн кандыг хүлээлгелерлиг турганыл?

¹⁶ Иоанның хүлээлгелери хөй турган. Ол элчиннерниң бирээзи чораан болгаш, суртаал ажылын удуртуп турган. Оон аңгыда ол кадайлыг турган чадавас. Ынчангаш ол өг-бүлезиниң Бурган биле чоок харылзаазын быжыглап база хүн бүрүде хереглелдерин хандырар ужурлуг турган (1 Кор. 9:5). Өг-бүлениң баштыңнары моон чүнү өөренип ап болур?

17. Өг-бүлениң баштыңы чоок улузунга ынакшылын канчаар көргүзүп болур?

¹⁷ Өг-бүлелиг акывыстың хүлээлгелери база хөй бооп болур. Чижээ, ол Иегованы  алдаржыдар дээш, ажылынга харыысалгалыг боор ужурлуг (Эф. 6:5, 6; Тит. 2:9, 10). Ооң ыңай суртаал ажылын удуртур, чыышта акы-угбалар дээш сагыш човаар хүлээлгелери база бар. Оон аңгыда, ол кадайы болгаш ажы-төлү-биле Библияны доктаамал өөренир ужурлуг. Шак ынчаар ол өг-бүлезинге ынакшылын көргүзер. А ооң өг-бүлези ачазының үндүрүп турар күжениишкиннери дээш өөрүп четтирер (Эф. 5:28, 29; 6:4).

18. Иоанн чүү чүвеге чигзинмейн чорааныл?

¹⁸ Иоанн солун болгаш дыка узун чуртталганы чурттап эрткен. Ооң бүзүрелин кошкадып болур бергелерге ол таваржып турган. «Акы-угбаларынга ынак бол» дээн база оон-даа өске Иисустуң чагыгларын күүседир дээш, ол бар-ла шаа-биле кызып чораан. Иегова биле Иисус меңээ ынак база кандыг-даа бергелерни ажып эртер күштү бээр деп, Иоанн быжыг бүзүреп турган (Ин. 14:15—17; 15:9, 10; 1 Ин. 4:16). Эрлик болгаш ооң талалакчылары канчаар-даа кызарга, Иоанн акы-угбаларга ынакшылын чугаа-сөзү болгаш ажыл-херээ-биле көргүзүп чораан.

19. 1 Иоанн 4:7-де сөстер бисти чүнү кылырынче оттуруп турар? Ону кылыры чүге чугула?

¹⁹ Иоанның-даа үезинде, амгы-даа үеде бо делегейни каржы-хажагай Эрлик чагырып турар (1 Ин. 3:1, 10). Акы-угбаларывыска ынакшылывыстың соой бээрин ол дыка күзеп турар. Ынчалза-даа шупту чүве бистиң боттарывыстан хамааржыр. Бир эвес боттарывыс чөпшээревес болзувусса, ол чүнү-даа чедип ап шыдавас. Ынчангаш акы-угбаларывыска ынакшылывысты чугаа-сөзүвүс болгаш ажыл-херээвис-биле көргүзээлиңер. Ынчан бис Иегованың делегей чергелиг өг-бүлезиниң кежигүнү кылдыр боттарывысты миннип, өөрүшкүлүг болгаш аас-кежиктиг боор бис. (Номчуптуңар: 1 Иоанн 4:7.)