1. Nḓila ine Mudzimu a ni funa ngayo i ita uri ni ḓipfe hani?

MUAPOSTOLA Yohane o ṅwala uri “Mudzimu ndi lufuno.” (1 Yoh. 4:8) Ri a zwi ḓivha uri Mudzimu o sika zwithu zwoṱhe zwi tshilaho. Fhedzi zwe Yohane a zwi ṅwala, zwi ri humbudza uri na lufuno lu bva kha Yehova. Yehova u a ri funa. Nḓila ine a ri funa ngayo i ita uri ri pfe ro tsireledzea, ro takala na u fushea.

2. U ya nga Mateo 22:37-40, ndi ifhio milayo mivhili mihulwane nahone ndi ngani zwi tshi nga ri konḓela u tevhedza mulayo wa vhuvhili?

² Vhakriste vho ṋewa mulayo wa uri vha tea u funana. (Vhalani Mateo 22:37-40.) Musi ri tshi ḓivha Yehova khwine, zwi a ri lelutshela u tevhedza mulayo wa u thoma wa uri ri fune Yehova Mudzimu. Zwo leluwa ngauri Yehova o fhelela, u na ndavha na riṋe nahone u ri fara nga vhuthu. Fhedzi zwi nga ri konḓela u tevhedza mulayo wa vhuvhili. Ndi ngani? Ndi ngauri vhahashu vhane vha vha tshipiḓa tsha vhahura, vha na tshivhi. Nga zwiṅwe zwifhinga vha nga ita zwithu zwine zwa si ri fare zwavhuḓi. Yehova u a zwi ḓivha uri a zwi nga ḓo leluwa u tevhedza mulayo wa vhuvhili, ndi ngazwo o ita uri vhaṅwe vhaṅwali vha Bivhili vha ambe uri ndi ngani ri tshi tea u funa vhaṅwe na nḓila ine ra nga zwi ita ngayo. Muṅwe wa vhenevho vhaṅwali ndi Yohane.—1 Yoh. 3:11, 12.

3. Yohane o ombedzela mini?

³ Kha bugu dze Yohane a dzi ṅwala, o ombedzela uri Vhakriste vha tea u funana. Kha bugu ye Yohane a ṅwala ine ya  amba nga ha vhutshilo ha Yesu musi e kha ḽifhasi, o ṅwala nga ha lufuno u fhira vhaṅwe vhaṅwali vhoṱhe vha Evangeli vho ṱangana. Yohane o vha e na miṅwaha i ṱoḓaho u vha 100 musi a tshi ṅwala bugu ya Yohane na marifhi awe mararu. Dzenedzo bugu dze a dzi ṅwala dzi ri funza uri zwoṱhe zwine ra zwi ita zwi tea u ṱuṱuwedzwa nga lufuno. (1 Yoh. 4:10, 11) Fhedzi zwo dzhiela Yohane tshifhinga tshilapfu uri a gude zwenezwo.

4. Naa mathomoni Yohane o sumbedza vhaṅwe lufuno tshifhinga tshoṱhe?

⁴ Mathomoni Yohane o vha a sa sumbedzi lufuno tshifhinga tshoṱhe. Sa tsumbo, nga tshiṅwe tshifhinga Yesu na vhafunziwa vhawe vho pfuka nga Samaria vha tshi khou u ya Yerusalema. Vhathu vha muṅwe muḓana wa Samaria vho hana u vha ṱanganedza. Yohane o ita mini? Yohane na Yakobo vho mbo ḓi vhudzisa Yesu arali vha tshi nga vhidza mulilo ṱaḓulu wa ḓa wa fhelisa vhathu vhoṱhe vha wonoyo muḓana. (Luka 9:52-56) Nga tshiṅwe tshifhinga, Yohane o kundelwa u sumbedza lufuno kha vhaṅwe vhaapostola. Zwi vhonala u nga ene na Yakobo vho humbela mme avho uri a ye u vha humbelela kha Yesu uri a vha ṋee vhuimo ha nṱha Muvhusoni wa Mudzimu. Vhaṅwe vhaapostola vho sinyuwa vhukuma musi vha tshi pfa zwe Yakobo na Yohane vha ita. (Mat. 20:20, 21, 24) Yesu o dzula a tshi funa Yohane naho o ita honoho vhukhakhi hoṱhe.—Yoh. 21:7.

5. Ri ḓo amba nga ha mini kha ino thero?

⁵ Kha ino thero, ri ḓo amba nga ha tsumbo ye Yohane a ri vhetshela yone na nga ha zwithu zwe a zwi ṅwala nga ha lufuno. Ri ḓo guda uri ri nga sumbedza hani vhahashu lufuno. Ri ḓo dovha ra guda nḓila ya ndeme ine ṱhoho ya muṱa a nga sumbedza ngayo uri u funa muṱa wawe.

6. Yehova o ita mini u sumbedza uri u a ri funa?

⁶ Ri nga humbula u nga u funa vhathu zwi sokou guma kha u vha takalela na u amba navho zwavhuḓi. Fhedzi arali ri tshi vha funa zwa vhukuma, ri fanela u zwi sumbedza nga u vha itela zwithu zwavhuḓi. (Vhambedzani Yakobo 2:17, 26.) Sa tsumbo, Yehova u a ri funa. (1 Yoh. 4:19) U ri vhudza uri u a ri funa nga maipfi avhuḓi o ṅwalwaho Bivhilini. (Ps. 25:10; Vharoma 8:38, 39) Fhedzi zwine zwa ita uri ri vhe na vhungoho ha uri Mudzimu u a ri funa ndi zwine a zwi ita, hu si zwine a ri vhudza fhedzi. Yohane o ṅwala uri: “Mudzimu o ri dzumbululela nḓila ine a ri funa ngayo, nga u rumela Murwa wawe muthihi fhedzi shangoni uri ri kone u wana vhutshilo ngae.” (1 Yoh. 4:9) Yehova o tendela Murwa wawe  ane a mu funa a tshi tambula na u fa a tshi itela riṋe. (Yoh. 3:16) Zwenezwo zwi ri ṋea vhuṱanzi ha uri Yehova u a ri funa.

7. Yesu o sumbedza hani uri u a ri funa?

⁷ Yesu o vhudza vhafunziwa vhawe uri u a vha funa. (Yoh. 13:1; 15:15) Ho ngo sokou amba fhedzi uri u a vha funa, u katela na riṋe, fhedzi o zwi sumbedza na nga zwe a ita. Yesu o ri: “A hu na a re na lufuno lu fhiraho lwa ane a fela khonani dzawe.” (Yoh. 15:13) Musi ri tshi humbula nga ha zwe Yehova na Yesu vha ri itela zwone, ri tea u ḓiimisela u ita mini?

8. Ri tea u ita mini u ya nga 1 Yohane 3:18?

⁸ Ri sumbedza uri ri funa Yehova na Yesu nga u vha thetshelesa. (Yoh. 14:15; 1 Yoh. 5:3) Yesu o ri laya uri ri funane. (Yoh. 13:34, 35) A ro ngo tea u sokou vhudza vhahashu uri ri a vha funa fhedzi, ri tea u zwi sumbedza na nga zwine ra zwi ita. (Vhalani 1 Yohane 3:18.) Ri nga ita mini u itela u vha sumbedza uri ri a vha funa?

9. Lufuno lwo ṱuṱuwedza Yohane uri a ite mini?

⁹ Yohane o vha a tshi nga ita tshelede nga u bvela phanḓa kha bindu ḽa khovhe na khotsi awe. Nṱhani hazwo, o shumisa tshifhinga tshawe u swika a tshi fa u itela u thusa vhaṅwe u guda nga ha Yehova na Yesu. Zwenezwo zwo vha zwi songo leluwa. O tovholwa nahone mafheloni a ḓana ḽa u thoma ḽa miṅwaha musi o no kalaha, o fariwa a iswa tshiṱangadzimeni tsha Patimo. (Mish. 3:1; 4:1-3; 5:18; Nzumb. 1:9) Musi Yohane o valelwa dzhele nga nṱhani ha u huwelela, o sumbedza uri u a funa vhaṅwe. Sa tsumbo, musi e tshiṱangadzimeni tsha Patimo, o ṅwala Bugu ya Nzumbululo nahone a i rumela kha zwivhidzo uri vha ḓivhe “zwine zwa ḓo itea hu si kale.” (Nzumb. 1:1) Zwi nga itea uri musi o no bva tshiṱangadzimeni tsha Patimo, o ṅwala bugu ya Yohane ine ya amba nga vhutshilo ha Yesu musi e kha ḽifhasi. O dovha a ṅwala marifhi mararu u itela u ṱuṱuwedza na u khwaṱhisa vhahawe. Yohane o tshila vhutshilo ha u ḓidzima zwiṅwe zwithu. Ni nga mu edzisa hani?

10. Ni nga sumbedza hani uri ni funa vhaṅwe?

¹⁰ Ni nga sumbedza uri ni funa vhaṅwe nga nḓila ine na shumisa ngayo tshifhinga tshaṋu. Saṱhane u ṱoḓa ni tshi fhedza tshifhinga tshaṋu na nungo dzaṋu ni tshi khou lingedza u ita tshelede kana u ḓiitela dzina. Fhedzi Vhakriste vha fhedza tshifhinga tshinzhi nga hune vha nga kona ngaho vha tshi khou huwelela mafhungo maḓifha na u thusa vhaṅwe uri vha vhe na vhushaka ha tsini na Yehova. Vhaṅwe vha ita na u dzhenela tshumelo ya tshifhinga tshoṱhe.

11. Vhunzhi ha vhahashu vha sumbedza hani uri vha funa Yehova na vhahavho?

¹¹ Vhunzhi ha vhahashu vha a shuma uri vha ḓiṱhogomele na u ṱhogomela miṱa yavho. Naho zwo ralo, vhenevha vhahashu vha a tikedza ndangulo ya Mudzimu nga hune vha nga kona ngaho. Sa tsumbo, vhaṅwe vha thusa kha mushumo wa u phalala vho welwaho nga khombo, vhaṅwe vha thusa kha u fhaṱa zwifhaṱo zwa ndangulo nahone roṱhe ri ṋeela nga tshelede. Ri ita zwenezwo ngauri ri funa Mudzimu na vhaṅwe. Vhege iṅwe na iṅwe ri sumbedza uri ri funa vhahashu nga u ya miṱanganoni ya tshivhidzo na u shela mulenzhe khayo. Ri ya kha yeneyo miṱangano naho ro neta. Ri a fhindula naho ri tshi nga vha ro tshuwa. Musi miṱangano i sa athu u thoma na musi yo no fhela, ri ṱuṱuwedza vhaṅwe naho riṋe vhaṋe ri na thaidzo. (Vhahev. 10:24, 25) Ri a dzhiela nṱha zwine vhahashu vha ita u itela u ri sumbedza lufuno.

12. Ndi ifhio iṅwe nḓila ye Yohane a sumbedza ngayo uri u funa vhahawe?

 ¹² Yohane o sumbedza uri u funa vhahawe. Ho ngo zwi sumbedza nga u vha khoḓa fhedzi, o zwi sumbedza na nga u vha kaidza. Kha marifhi e a vha ṅwalela, Yohane o khoḓa vhahawe nge vha vha na lutendo na u ita zwithu zwavhuḓi, fhedzi o dovha a vha kaidza uri vha si ite tshivhi. (1 Yoh. 1:8–2:1, 13, 14) Na riṋe ri tea u khoḓa vhahashu nga zwithu zwavhuḓi zwine vha zwi ita. Fhedzi arali hu na muthu ane a vha na mavhonele a si avhuḓi kana ane a khou ita zwithu zwine zwa nga ita uri a si tsha vha na vhushaka havhuḓi na Yehova, ri nga mu khakhulula nga vhuthu. Zwi ṱoḓa tshivhindi uri ni kaidze khonani yaṋu, fhedzi Bivhili i ri khonani dza vhukuma dzi a ṱuṱulana kana u khakhululana.—Mir. 27:17.

13. Ri tea u iledza u ita mini?

¹³ Nga zwiṅwe zwifhinga ri nga khetha u sa ita zwiṅwe zwithu u itela u sumbedza vhahashu uri ri a vha funa. Sa tsumbo, ri nga khetha u sa ṱavhanya u sinyuswa nga zwine vha zwi amba. Humbulani nga ha zwe zwa itea musi Yesu o no vha tsini na u vhulawa. O vhudza vhafunziwa vhawe uri vha tea u ḽa ṋama yawe na u nwa malofha awe uri vha wane vhutshilo vhu sa fheli. (Yoh. 6:53-57) Vhunzhi ha vhafunziwa vhawe vho tshuwiswa nga eneo mafhungo nahone vha mu ṱutshela, fhedzi khonani dzawe dza vhukuma a dzo ngo mu ṱutshela, u katela na Yohane. Vho vha vha sa pfesesi zwe Yesu a zwi amba nahone khamusi na vhone vho vha vho mangala. Fhedzi a vho ngo khukhulisea vha humbula uri u khou amba zwithu zwo khakheaho. Nṱhani hazwo, vho mu fhulufhela ngauri vho vha vha tshi zwi ḓivha uri u amba ngoho. (Yoh. 6:60, 66-69) Zwenezwo zwi ri thusa u vhona uri a ro ngo tea u ṱavhanya u khukhuliswa nga zwine khonani dzashu dza amba. Nṱhani hazwo, ri vha ṋea tshibuli tsha uri vha ṱalutshedze zwine vha khou amba zwone.—Mir. 18:13; Muh. 7:9.

14. Ndi ngani ri songo tea u vhenga vhahashu?

¹⁴ Yohane o dovha a ri ṱuṱuwedza uri ri songo vhenga vhahashu. Arali ra sa thetshelesa yeneyo nyeletshedzo, Saṱhane a nga ri xedza. (1 Yoh. 2:11; 3:15) Zwenezwo zwo itea kha vhaṅwe Vhakriste mafheleloni a ḓana ḽa u thoma ḽa miṅwaha. Nga tshenetsho tshifhinga, Saṱhane o lingedza nga nungo dzoṱhe u ita uri Vhakriste vha vhengane na u ita uri tshivhidzo tshi fhandekane. Nga tshifhinga  tshee Yohane a vha a tshi khou ṅwala marifhi awe, ho vha hu na vhanna vhe vha vha vha tshi khou fhandekanya tshivhidzo. Vhenevho vhanna vho vha vhe na mahumbulele a Saṱhane. Sa tsumbo, Diotirefe o vha a tshi khou ita uri tshivhidzo tshine a vha khatsho tshi fhandekane. (3 Yoh. 9, 10) O vha a sa ṱhonifhi vhahulwane vha dalelaho zwivhidzo vhe vha vha vho rumiwa nga tshigwada tshi langaho. O lingedza na u pandela tshivhidzoni vhathu vhane vha ṱanganedza vhathu vhane a vha vhenga. O sumbedza uri u a ḓihudza vhukuma. Saṱhane u kha ḓi lingedza u fhandekanya vhathu vha Mudzimu na ṋamusi. A ro ngo tea u vhenga vhahashu na u litsha u vha tikedza.

15. Ndi mini zwine ṱhoho ya muṱa ya tea u zwi humbula?

¹⁵ Iṅwe nḓila ine ṱhoho ya muṱa a nga sumbedza ngayo uri u funa muṱa wawe ndi nga u ita uri vha vhe na zwithu zwine vha zwi ṱoḓa uri vha kone u tshila. (1 Tim. 5:8) Fhedzi u tea u humbula uri tsha ndemesa ndi u thusa muṱa wawe uri u vhe na vhushaka havhuḓi na Yehova. (Mat. 5:3) Humbulani nga ha tsumbo ye Yesu a i vhetshela ṱhoho dza miṱa. Bugu ya Yohane i ri vhudza uri Yesu o vha a tshi khou humbula nga ha muṱa wawe musi a tshi khou fa kha danda. Yohane o vha o ima na Maria mme a Yesu henefho he Yesu a ombelwa hone kha danda. Naho Yesu o vha a tshi khou pfa vhuṱungu, o humbela Yohane uri a ṱhogomele Maria. (Yoh. 19:26, 27) Yesu o vha e na vharathu na dzikhaladzi vhe vha vha vha tshi nga ṱhogomela mme awe, fhedzi zwi vhonala u nga vho vha vha sa athu u vha vhafunziwa vhawe. Nga zwenezwo, Yesu o vha a tshi khou ṱoḓa muthu ane a ḓo ṱhogomela mme awe na u vha thusa uri vha dzule vhe na vhushaka havhuḓi na Yehova.

16. Yohane o vha e na vhuḓifhinduleli vhufhio?

¹⁶ Yohane o vha e na vhuḓifhinduleli vhunzhi. O vha o farakanea vhukuma kha mushumo wa u huwelela samusi o vha e muapostola. Khamusi o vha e na mufumakadzi nahone a tshi tea u ṱunḓela muṱa wawe na u u thusa u vha na vhushaka havhuḓi na Mudzimu. (1 Vhakor. 9:5) Ṱhoho dza miṱa ṋamusi dzi guda mini kha zwenezwo?

17. Ndi ngani zwi zwa ndeme uri ṱhoho ya muṱa i thuse muṱa wayo uri u dzule u na vhushaka havhuḓi na Yehova?

¹⁷ Wahashu wa tshinnani ane a vha ṱhoho ya muṱa a nga vha na vhuḓifhinduleli ho vhalaho  vhu re ha ndeme. Sa tsumbo, u tea u finya dza khwaṱha kha mushumo wa u ḓitshidza uri a rendise Yehova. (Vhaef. 6:5, 6; Tito 2:9, 10) Zwiṅwe hafhu, a nga vha e na vhuḓifhinduleli tshivhidzoni vhu ngaho ha u ṱuṱuwedza na u ṱhogomela vhahashu na u ranga phanḓa kha mushumo wa u huwelela. Zwi dovha zwa vha zwa ndeme uri a gude Bivhili na mufumakadzi wawe na vhana tshifhinga tshoṱhe. Vha ḓo livhuwa vhukuma nḓila ine a ḓidina ngayo uri vha dzule vhe na mutakalo wavhuḓi, vho takala nahone vhe na vhushaka havhuḓi na Yehova.—Vhaef. 5:28, 29; 6:4.

18. Yohane o vha e na vhuṱanzi ha mini?

¹⁸ Yohane o tshila miṅwaha minzhi nahone o ṱangana na zwithu zwinzhi zwi takadzaho. O dovha a ṱangana na zwithu zwinzhi zwi konḓaho zwe zwa vha zwi tshi nga fhelisa lutendo lwawe. Fhedzi o dzula a tshi ita zwine a nga kona uri a ite zwe Yesu a laya zwi ngaho u funa vhahawe. Nga zwenezwo, Yohane o vha e na vhuṱanzi ha uri Yehova na Yesu vha a mu funa na uri vha ḓo mu ṋea nungo dza u kunda thaidzo iṅwe na iṅwe. (Yoh. 14:15-17; 15:10; 1 Yoh. 4:16) Saṱhane na shango ḽawe a vho ngo litshisa Yohane u funa vhahawe na u sumbedza lwonolo lufuno nga zwe a amba na zwe a ita.

19. Luṅwalo lwa 1 Yohane 4:7 lu ri ṱuṱuwedza u ita mini nahone ndi ngani?

¹⁹ U fana na Yohane, na riṋe ri tshila shangoni ḽi vhuswaho nga Saṱhane a si na lufuno. (1 Yoh. 3:1, 10) Naho a tshi ṱoḓa u ri litshisa u funa vhahashu, a nga si zwi kone, nga nnḓa ha musi ro tou mu tendela. Ro ḓiimisela u funa vhahashu na u sumbedza uri ri a vha funa nga zwine ra amba na zwine ra ita. Musi ri tshi sumbedza lufuno lwo raloho, ri ḓo takala uri ri tshipiḓa tsha muṱa wa Yehova nahone vhutshilo hashu vhu ḓo takadza.—Vhalani 1 Yohane 4:7.