1. Cossa che ti te senti par causa del amor de Dio par ti?

“DIO l’è amor.” (1 Gio. 4:8) Noantri savemo che l’è stato Geovà darne la vita, ma le parole de Gioani le ne ricorda che el amor el vien de Geovà. Par causa del amor che Geovà el ga par noantri, ghemo protession, semo contenti e ghemo una bela vita.

2. (a) De acordo con Mateo 22:37-40, quali zeli i due comandamenti pi importanti? (b) Parché che pol esser fadiga obedir al secondo comandamento?

² Come seghidori de Gesù, noantri ghemo de obedir el comandamento de amar ai altri. (Ledi Mateo 22:37-40. *) Obedir al primo comandamento l’è pi fàcile, parché Geovà l’è perfeto e tanto de pi che lo cognossemo, tanto de pi vedemo che lu l’è bondoso e el se preocupa con noantri. Ma pol esser che ne fà fadiga obedir al secondo comandamento. Parché? Parché i nostri fradei i ze imperfeti e lori i pol dir o far robe che le ne assa disgustadi. Geovà belche el savea che questo ndaria suceder con noantri. Par quela che el ga doperà arquanti scritori dela Bìblia par parlar parché che ghemo de mostrar amor e come che podemo farlo. Gioani l’è stato un de questi scritori. —  1 Gio. 3:11, 12.

3. Cossa che Gioani el ga dito che tuti noantri ghemo de far?

 ³ Gioani el gavea intorno de 100 ani quando el ga scrito el Vangelo e le so tre carte. Nei so libri, Gioani el ga scrito che noantri ghemo de mostrar amor. Quando Gioani el ga scrito sora la vita de Gesù, el ga doperà la parola “amor” e el verbo “amar” de pi che i altri tre Vangeli insieme. Quel che Gioani el ga scrito ne insegna che tuto quel che femo el ga de esser par amor. (1 Gio. 4:10, 11) Ma ghe ga metesto tempo a Gioani par imparar questo.

4. Sarà che Gioani el ga sempre mostrà amor?

⁴ Quando Gioani l’era gióveno, gnanca sempre lu l’è stato bon de mostrar amor. Par esémpio, quando Gesù e i so dissìpoli i era drio ndar a Gerusalen, le persone nte un posto de Samaria no li ga mia tratadi tanto ben. Cossa che Gioani el ga fato? Lu el ga domandà a Gesù se lori i podea mandar vegner do fogo del cielo par coparli. (Luc. 9:52-56) Nantro esémpio l’è stato quando Gioani e el so fradel Tiago, i ga dito a so mare domandar a Gesù el meio posto nel Regno de Dio. Quel che lu el ga fato, no’l ga mia mostrà amor par i apòstoli e lori i ze restadi tanto cativi! (Mat. 20:20, 21, 24) Ma Gesù el ga seità amar a Gioani stesso che lu el gavesse sbalià. — Gioani 21:7.

5. Cossa che ndaremo imparar in questo stùdio?

⁵ In questo stùdio, ndaremo imparar de pi sora el esémpio de Gioani e arquante robe che lu el ga scrito sora el amor. Questo ndarà giutarne a mostrar amor par i nostri fradei e sorele. Ndaremo anca veder cossa che l’è importante che i paroni de fameia i fae par mostrar che i ama la so fameia.

6. Come che Geovà el ga mostrà che el ne ama?

⁶ Noantri mostremo che amemo le persone quando parlemo, ma mostremo che li amemo pròpio par meso de quel che femo. (Vedi anca Tiago 2:17, 26.) Par esémpio, Geovà el ne ama e lu el ne mostra questo par meso dele bele parole che ghen’è nela Bìblia. (1 Gio. 4:19; Sal. 25:10; Rom. 8:38, 39) Ma, quel che ne assa ancora pi sicuri che Geovà el ne ama, l’è quel che el ga fato par noantri. Gioani el ga scrito: “Par questo el amor de Dio el se ga manifestà nel nostro caso, parché Dio el ga mandà el so Fiol unigénito al mondo, parché noantri podéssino guadagnar la vita par meso de lu.” (1 Gio. 4:9) Geovà el ga assà el so  Fiol, che lu el ama, sofrir e morir par noantri. (Gioani 3:16) Alora, podemo esser sicuri che Geovà el ne ama!

7. Come che Gesù el ga mostrà che el ne ama?

⁷ Gesù el ga dito ai so dissìpoli che lu li amea tanto. (Gioani 13:1; 15:15) Ma Gesù anca el ga mostrà el so amor par lori e par noantri par meso de quel che lu el ga fato. Gesù el ga dito: “Nissun el ga amor pi grando de quel che el dà la so vita par i so amighi.” (Gioani 15:13) Alora, come Geovà e Gesù, cossa noantri ghemo de far?

8. De acordo con 1 Gioani 3:18, cossa che ghemo de far?

⁸ Gesù el ne ga dato el comandamento de amar un ai altri. (Gioani 13:34, 35) Noantri mostremo el nostro amor a Geovà e a Gesù quando obedimo a lori. (Gioani 14:15; 1 Gio. 5:3) Cossita, noantri ghemo de mostrar el nostro amor ai nostri fradei e sorele par meso de quel che parlemo, ma anca par meso de quel che femo. (Ledi 1 Gioani 3:18. *) Ma cossa che ghemo de far par mostrar che amemo i nostri fradei?

9. Come che Gioani el ga mostrà el so amor ai altri?

⁹ Gioani el podaria guadagnar una mùcia de soldi se el seitesse a pescar insieme col so pare, ma el ga doperà la so vita par giutar i altri a imparar la verità sora Geovà e sora Gesù. Lu el ga infrontà tante dificoltà, l’è stato perseghio e nel fin del primo sècolo, quando l’era belche vècio, i lo ga metesto in preson. (Ati 3:1; 4:1-3; 5:18; Apo. 1:9) Anca cossita, lu el ga mostrà el so amor par i altri quando l’era preso nela ìsola de Patmo. Par esémpio, lu el ga scrito el libro de Apocalisse par dir ale congregassion le robe che le ndaria “suceder presto”. (Apo. 1:1) Fursi, l’è stato dopo de Gioani esser molà dela preson che lu el ga scrito el Vangelo sora la vita e el laoro de Gesù. Lu anca el ga scrito le tre carte che le ga incoraià i so fradei. Come che noantri podemo far compagno a lu?

10. Come che te pol mostrar che te ami le persone?

¹⁰ El mondo de Sàtana el vol che noantri pensemo sol in noantri stessi e che doperemo el nostro tempo e le nostre forse par guadagnar de pi soldi. Ma in tuto el mondo, i fradei i fà el meio che i pol par predicar e giutar le persone a rivarse a Geovà. Arquanti i pol doperar tanto del so tempo nela predicassion. Alora, quel che scoliemo far nela nostra vita mostra se amemo le persone o nò.

11. Come che tanti i mostra el so amor a Geovà e ai fradei?

¹¹ Tanti fradei i ga de laorar tanto par dar quel che la so fameia la ga de bisogno par viver. Ancora cossita, lori i fà el so meio par giutar la organisassion de Geovà. Par esémpio, arquanti i giuta quando i fradei i infronta brute dificoltà, altri i giuta nele costrussion e tuti i pol far donativi par la òpera mondial. Tute le stimane, i servi de Geovà i mostra amor un ai altri quando i va ale riunion e i dà i so comentari, anca se i ga vergogna. Ancora che i sìpia strachi o cansi par causa dei so problemi, lori i incoraia un ai altri vanti e dopo dele riunion. (Ebr. 10:24,  25) Sicuro che tuti i resta contenti de esser intrà fradei che i fà questo.

12. De che nantra maniera Gioani el ga mostrà el so amor ai fradei?

¹² Gioani el ga mostrà che el amea ai so fradei parché lu li ga lodà, ma anca el ghe ga dato consili. Par esémpio, nele so carte, Gioani el ga lodà i fradei par causa dela fede che lori i gavea e dele bele robe che i fea. Ma lu el ga anca parlà quel che lori i gavea de cambiar. (1 Gio. 1:8–2:1, 13, 14) Anca noantri ghemo de lodar i nostri fradei e sorele par quel che lori i fà. Ma quando un fradel el scomìnsia a far qualcossa sbaliada, noantri mostremo che lo amemo quando parlemo con lu de maniera amorosa. Ghe vol coraio par darghe un consìlio a un amigo, ma i veri amighi i fà anca questo. — Pro. 27:17.

13. Cossa che no ghemo de far?

¹³ Noantri anca mostremo che amemo i nostri fradei quando no femo arquante robe. Par esémpio, quando no restemo disgustadi par causa de qualche roba che lori i ne dise. Quando semo disgustadi con qualche fradel, volemo scoltarlo par saver cossa che lu el ga volesto dir. (Pro. 18:13; Ecl. 7:9) Pensemo in quel che Gesù el ga dito ai so dissìpoli un tempo vanti de morir. Lu el ga dito a lori che i gavea de magnar dela so carne e bever del so sangue par viver par sempre. (Gioani 6:53-57) I dissìpoli i ze restadi spaventadi con quel che Gesù el ga dito e tanti i lo ga abandonà. Anca i veri amighi de Gesù, come Gioani, no i lo ga capio, ma ancora cossita lori i ze stati leai a lu. Lori no i ze restadi disgustadi, gnanca i ga pensà che Gesù el gavea fato un bruto sbàlio. Invesse, lori i se ga fidà in Gesù parché i savea che lu sempre el parlea la verità. (Gioani 6:60, 66-69) Alora, gnanca noantri volemo restar disgustadi con qualche roba che i nostri fradei i ne dise.

14. Parché che mai ghemo de odiar i nostri fradei e sorele?

¹⁴ Nel fin del primo sècolo, Sàtana el ga fato de tuto par finir cola union e col amor che ghen’era intrà el pòpolo de Dio. Nela època che Gioani el ga scrito le so carte, ghen’era òmini che i pensea compagno a Sàtana nele congregassion. Par  esémpio, Diòtrefe no’l rispetea i ansiani che i rapresentea el corpo governante in quela època. (3 Gio. 9, 10) Diòtrefe l’era pròpio orgolioso el ga fin proà parar via dela congregassion quei che i mostrea amor par le persone che lu no’l ghe piasea mia. E ancoi, Sàtana el se sforsa tanto par far questo nele congregassion. Gioani el ga dito che ghemo de star atenti par no odiar i nostri fradei. Se no stemo atenti, Sàtana el pol doperarne par intrigar la union dela congregassion. — 1 Gio. 2:11; 3:15.

15. Cossa che i paroni de fameia i ga de far?

¹⁵ Un paron de fameia el mostra che el ama la so fameia quando el ghe dà quel che la ga de bisogno par viver. (1 Tim. 5:8) Ma anca el giuta la so fameia a gaver una bona amicìssia con Geovà. (Mat. 5:3) Gesù l’è un bel esémpio par i paroni de fameia. Gioani el ga scrito che, ancora che Gesù el fusse drio morir nel pal de tortura, l’era preocupà cola so fameia. Gioani e Maria i era dela so banda e anca, che el gavesse tanti dolori, el ga domandà par Gioani tender dela so mama, Maria. (Gioani 19:26, 27) Ma parché che el ga domandà a Gioani par tender de Maria se ela la gavea altri fioi e fiole? Parché lori gnancora i era so dissìpoli e Gesù el volea esser sicuro che qualchedun el ndaria tender de Maria, ma anca dela so amicìssia con Geovà.

16. Che responsabilità Gioani el gavea?

¹⁶ Gioani el gavea tante responsabilità. Come apòstolo, lu el gavea de esser un bel esémpio nel laoro de predicassion. Pol esser che lu el fusse maridà, alora, el gavea de tender dela so fameia e anca dela amicìssia de lori con Geovà. (1 Cor. 9:5) Cossa che i paroni de fameia i pol imparar col esémpio de Gioani?

17. (a) Che responsabilità un paron de fameia el ga? (b) Come che la fameia la se sente quando lu el fà questo?

¹⁷ El paron de fameia el ga tante robe par tender. Par esémpio, lu el ga de esser brao in laorar e cossita darghe onor a Geovà. (Efe. 6:5, 6; Tito 2:9, 10) Pol esser che lu el gàpie anca le so responsabilità nela congregassion, come tender dei fradei e esser esémpio nel laoro de predicassion.  Ma lu el ga anca de studiar sempre la Bìblia cola so sposa e i fioi. L’è el pare che el ga de tender dela salute dela so fameia, esser sicuro che i ze contenti e anca giutarli a seitar servir a Geovà. Cossita, tuti nela fameia i ndarà restar contenti. — Efe. 5:28, 29; 6:4.

18. Gioani l’era sicuro de che?

¹⁸ Gioani el ga bio una bela vita e el ga vivesto tanti ani. Lu el ga infrontà tante dificoltà nela so vita, ma el ga bio sempre una forte fede. Lu anca el ga fato tuto quel che el podea par obedir ai comandamenti de Gesù, come quel de amar ai fradei e sorele. Cossita, Gioani l’era sicuro che Geovà e Gesù i lo amea e che lori i ndaria giutarlo a gaver la forsa par infrontar le dificoltà. (Gioani 14:15-17; 15:10; 1 Gio. 4:16) Alora, Gioani el ga mostrà el so amor par i fradei par meso de quel che el parlea e de quel che el fea, ancora che Sàtana e el so mondo i proesse intrigarlo.

19. Cossa che 1 Gioani 4:7 ne incoraià a far, e parché?

¹⁹ Come Gioani, anca noantri vivemo nte un mondo che l’è governà par Sàtana e lu no’l ga amor a nissun. (1 Gio. 3:1, 10) Sicuro che Sàtana el ndarà proar far tuto quel che el pol par noantri no amar pi i nostri fradei e sorele. Ma lu el sarà bon de far questo sol se noantri lo assemo. Alora, mostra che te ami i to fradei e sorele par meso de quel che te dise e de quel che te fè. Cossita, te sarè contento de far parte dela fameia de Geovà e te gavarè una vita felice. — Ledi 1 Gioani 4:7. *