1. Munoonela sai osuwela wira Muluku onniniphenta?

MURUMMWA Yohani aalempe so: “Muluku ti ophenta”. (1 Yoh. 4:8) Moolumo ala vakhaani anninuupuxerya ekeekhai yuulupale. Ekeekhai ene tiila: Muluku yoowo ori maphattuwelo a ekumi nave tori maphattuwelo a ophenta. Tthiri Yehova onniniphenta vanceene! Nto oniphenta wawe onniniiriha okhala oovareleleya ni oohakalala.

2. Sooruma xeeni suulupale sinilavuliwa Matheyo 22:37-40? Xeeni okathi mukina vanivila aya wiiwelela yooruma ya nenli?

² MaKristau khakhanle oothanla akhala wira pooti ophenta wala nnaari. Mwaha woowi ophenta yooruma. (Mmusome Matheyo 22:37-40.) Okathi naamusuwenle ahu oratteene Yehova, vaaninikhweela wiiwelela yooruma yoopacerya. Masi Yehova toomalela. Nto owo onninithokorerya mwa enamuna yooloka ni mooreerela murima. Masi hiyo apinaatamu vanninivila wiiwelela yooruma ya nenli. Mwaha wa xeeni? Mwaha woowi anna ni arokora yaawo ari akhwiihu toohimalela. Nto okathi mukina awo pooti ohimya etthu enrowa oniwereya vanceene. Yehova onnisuwela wira naamukhalana mixankiho iyo. Tivonto aarumme awe atthu akina olepa mBiibiliyani malakiheryo ooluluwanya voohimya sa moota nikhanle ahu ophentana mukina ni mukhwaawe. Mutthu mmosa aalempe voohimya sa ophenta aari Yohani.—1 Yoh. 3:11, 12.

3. Etthu xeeni Yohani aattittimihenrye awe vanceene?

³ Yohani aahittittimiherya vanceene wira maKristau ahaana wooniherya ophenta. Tthiri eliivuru ya mBiibiliyani Yohani olempe awe voohimya sa okumi wa Yesu, owo oorumeela ikwaha sinceene nuulumo noowi “ophenta” wala “oophentiwa” ovikana Ivangelyo  sikina ntoko sa Matheyo, Marko ni Luka. Woonasa wene Yohani aarina iyaakha 100 vaavo aalempe awe Evangelyo awe ni ikarta tthaaru . Iliivuru iyo sotheene aalempe awe sinniniixuttiha wira itthu sotheene nimpaka ahu sihaana weettihiwa ni ophenta. (1 Yoh. 4:10, 11) Masi waahivira okathi wira Yohani okhale mutthu oophenta.

4. Niireke okathi wotheene Yohani anaaphenta atthu akina?

⁴ Vaavo aari awe mmiravo, khahiyo wira okathi wotheene Yohani aari mutthu oophenta. Mwa ntakiheryo, okathi omosa Yesu ni arummwa awe yaarowa oYerusalemu aviraka oSamariya. Nto atthu a muttetthe mmosa wa oGalileya yaahikhootta owaakhela. Yohani oonenle sai? Owo aahinvekela Yesu omweemererya ovekela okhuruwa mooro wiirimu wira aapwetexe atthu otheene a muttetthe ole. (Luka 9:52-56) Nave okathi mukina, Yohani aahooniherya wira khaaphenta arummwa akina. Yohani ni Yakobo yaahinvekela maama aya wira yanvekele Yesu wira aavahe nipuro noottittimiheya Moomweneni, mukina okilaathi moono woolopwana mukina moono woothiyana. Nto vaavo arummwa akina yaasuwenle aya ele Yohani ni Yakobo yaapanke aya, awo yaahinanariwa. (Math. 20:20, 21, 24) Masi hata Yohani aapanke soovonya iwo, Yesu aanimphenta vanceene.—Yoh. 21:7.

5. Mwaha ola ninrowa othokorerya exeeni?

⁵ Mwaha ola, ninrowa othokorerya ntakiheryo na Yohani ni itthu sikina olempe awe voohimya sa ophenta. Vaavo ninrowa ahu othokoreryaka nnimwiixutta moota wowooniherya wira ninnaaphenta anna ni arokora. Nave nnimoona wira ti vootepa otthuneya ahooleli a itthoko wooniherya wira annaaphenta atthu otheene a vatthokoni vaya.

6. Yehova oonihenrye sai wira onniniphenta vanceene?

⁶ Hiyo pooti wuupuwelaka wira waaphenta atthu akina, onitaphulela okhalana moonelo wooloka ni olavula moolumo ooreerela murima. Masi wira ophenta wahu okhale wekeekhai, ohaana wooneya ni miteko. (Mulikanyihe ni Yakobo 2:17, 26.) Mwa ntakiheryo, Yehova onniniphenta vanceene. (1 Yoh. 4:19) Nto moolumo oovara murima nimphwanya ahu mBiibiliyani annooniherya wira Yehova onniniphenta. (Esal. 25:10; aRom. 8:38, 39) Masi hiyo ninnikupali wira Yehova onniniphenta ohiya paahi mwaha wa itthu onihimya awe masi mwaha wa itthu onnipakela awe. Yohani aalempe so: “Moota Muluku oonihenrye awe oniphenta wawe ti nno: Owo oomuruma Mwanawe mmoseene orwa vathi-va, wira niphwanye okumi mwaha wa yoowo”. (1 Yoh. 4:9) Yehova aaheemererya wira Mwanawe amphentexa awe ohaawe ni okhwe wira onoopole. (Yoh. 3:16) Nto niireke eyo khenookupalihani wira Yehova onniniphenta vanceene?

7. Etthu xeeni Yesu opanke awe enooniherya wira onniniphenta vanceene?

 ⁷ Yesu aanaaleela awiixutti awe wira aanaaphenta vanceene. (Yoh. 13:1; 15:15) Yesu aahooniherya wira aanaaphenta vanceene awiixutti awe ni onniniphenta vanceene ohiya mwaha wa itthu ohimmye awe masi-tho mwaha wa itthu opanke awe. Yesu aahimmye so: “Khuuvo orina ophenta wuulupale, onvikana ole onileva okumi awe mwaha wa apatthani awe”. (Yoh. 15:13) Vaavo nnuupuwela ahu ele Yehova ni Yesu anipakenle aya, eyo ehaana oniiriha opaka exeeni?

8. 1 Yohani 3:18, onniruma opaka exeeni?

⁸ Ninnooniherya wira ninniphenta Yehova ni Yesu niwiiwelelaka. (Yoh. 14:15; 1 Yoh. 5:3) Yesu ooniruma wira nihaana ophentana mukina ni mukhwaawe. (Yoh. 13:34, 35) Hiyo nihihimyeke ni moolumo paahi wira ninnaaphenta anna ni arokora, masi itthu nimpaka ahu sihaana wooniherya wira ninnaaphenta vanceene. (Mmusome 1 Yohani 3:18.) Nihaana opaka exeeni wira nooniherye wira ninnaaphenta anna ni arokora?

9. Ophenta waamwiirinhe Yohani opaka exeeni?

⁹ Yohani anwerya okhala ni paapa awe omweettaka nakoso a ototha ihopa wira ophwanyeke musurukhu munceene. Masi ohiya opaka eyo, owo aaniimananiha waakhaliherya atthu wiixutta ekeekhai voohimya sa Yehova ni Yesu. Masi musuweleke wira yoothanla Yohani aapanke awe khahiyo yaari yookhweya. Yohani aanilupatthiwa, nave wanikisa wa eseekulu yoopacerya, Yohani uuluvanle ene aahiroihiwa elapo ekina. (Mit. 3:1; 4:1-3; 5:18; Wiis. 1:9) Nlelo otthukweliwe ene, Yohani khaahiyale waalaleerya atthu voohimya sa Yesu. Nave aahooniherya wira aanaaphenta atthu akina. Mwa ntakiheryo, ori ene esisiro ya oPatmo, Yohani aahivekeliwa ni Muluku olepa eliivuru ya Wiisuupulula. Nave aahiroiha mmulokoni wira atthu otheene esuwele “itthu saarowa wiiraneya voohipisa”. (Wiis. 1:1) Woonasa wene nuumala Yohani otaphuliwa esisiro ya oPatmo, vanikhala ntoko wira owo aahilepa evangelyo awe voohimya sa okumi ni muteko woolaleerya wa Yesu. Nave Yohani aahilepa ikarta tthaaru wira aalipihe ni waamaliha anna ni arokora. Munrowa otakiha sai wiimananiha wa Yohani?

10. Munrowa wooniherya sai wira munnaaphenta atthu?

¹⁰ Ele munipaka anyu mookumini mwanyu, munimooniherya akhala wira munnaaphenta atthu aahiiso nnaari. Muhiliyale wira olumwenku ola wa Satana oniphavela wira murumeeleke okathi ni ikuru sanyu sotheene wira mwiiphwanyihe mireerelo. Woonasa wene, mwiimananihaka ophwanya musurukhu munceene aahiiso ophavela ovuwa. Olelo-va, olumwenku wotheene maKristau eekeekhai anniimananiha olaleya Omwene. Anniviriha okathi wira alaleye ihapari sooreera ni waakhaliherya atthu okhalana waataana wooloka ni Yehova. Anna ni arokora akina annilaleerya ni owiixuttiha atthu okathi munceene.

11. MaKristau oororomeleya anooniherya sai wira annimphenta Yehova ni anna ni arokora?

¹¹ MaKristau manceene oororomeleya, annivara muteko khula nihiku wira aphwanyeke yoowiikhuuriha awo ni emusi aya. Hata vari siiso, anna ni arokora awo oororomeleya annipaka sotheene aniwerya aya wira akhaliherye mutthenkeso wa Muluku. Mwa ntakiheryo, anna akina annikhaliherya vaavo sinikhumelela aya ihasara sa ephattu, akina annikhaliherya oteka ipa sinirumeeliwa ni mutthenkeso ahu, nave khula mutthu okhalana eparakha ya ovaha musurukhu awe wira okhaliherye muteko onivariwa olumwenku wotheene. Ohiya-vo, khula esumana ninnooniherya wira ninnaaphenta anna ni arokora nirowelaka mithukumano ni wiirela mpantta. Hata nikhulumunwe ene, hiyo ninnirowela mithukumano. Nave hata nixankale ene hiyo  ninniimananiha okomentari. Nave-tho, hata niri ene mixankiho sahu hiyo ninnimananiha waalipiha anna ni arokora mmithukumanoni. (aHeeb. 10:24, 25) Tthiri hiyo ninnixukhurela vanceene itthu sotheene anivara aya anna ni arokora awo.

12. Mwa enamuna xeeni ekina Yohani oonihenrya awe wira aanaaphenta anna ni arokora?

¹² Yohani aahooniherya wira aanaaphenta anna ni arokora, aattottopelaka ni waavaha miruku. Mwa ntakiheryo, ikarta Yohani aalempe awe aahaattottopela anna ni arokora mwaha wa waamini waya ni miteko sooloka yaavara aya. Nave-tho owo aahaavaha miruku sooluluwanya voohimya sa opaka etampi. (1 Yoh. 1:8–2:1, 13, 14) Mwa enamuna emosaru, hiyo nihaana waattottopela anna ni arokora mwaha wa itthu sooloka anipaka aya. Masi akhala wira munna aahiiso murokora oopacerya opaka itthu saarowa ohonona waataana wawe ni Yehova, nihaana omooniherya wira ninnimphenta ninvahaka malakiheryo anrowa omukhaliherya vanceene. Ekeekhai wira vanitthuneya olipa murima wira ninvahe miruku mpatthani ahu, masi musuweleke wira Biibiliya onihimya wira mpatthani eekeekhai onnimukhaliherya mpatthani awe, niire so, onninvaha miruku wira omukhaliherye.—Mir. 27:17.

13. Nihaana osyaka opaka exeeni?

¹³ Okathi mukina ninnooniherya wira ninnaaphenta anna ni arokora mwaha wa itthu nihimpaka ahu. Mwa ntakiheryo hiyo khannaakuvela oveeheya mwaha wa itthu anihimya aya. Nkahaya muupuwele itthu siiraneyale wanikisa wa okumi wa Yesu valaponi. Yesu aahaaleela awiixutti awe wira yahaana okhuura erutthu awe ni owurya ephome awe wira aphwanye ekumi. (Yoh. 6:53-57) Moolumo ale a Yesu yaahaanyoonyiha vanceene awiixutti. Akina yaahihiya omutthara Yesu. Masi apatthani awe eekeekhai omuhela muhina Yohani khiyaamuhiyale. Awo khayiiwexenxe etthu Yesu aahimmye awe, nto yaahixanka. Masi awiixutti ale khiyaakuvenle wuupuwela wira Yesu aahihimya etthu yoohiloka nave khiyaaveeheyale. Ohiya opaka eyo, awo yaanimuroromela Yesu maana yaanisuwela wira okathi wotheene Yesu aalavula ekeekhai. (Yoh. 6:60, 66-69) Nave hiyo, khanimphavela waakuveya oveeheya mwaha wa itthu apatthani ahu anihimya aya. Ohiya-vo, hiyo nihaana waavaha eparakha wira anitthokiherye ele yaaphavela aya ohimya.—Mir. 18:13; Mus. 7:9.

14. Xeeni vari aya vooloka ohaanyokha anna ni arokora?

¹⁴ Yohani oonitumererya wira nihaana osyaka waanyokha anna ni arokora. Akhala wira hiyo  khanintthara miruku iyo, hiyo pooti opacerya weettela miruku sa Satana. (1 Yoh. 2:11; 3:15) Eyo ti etthu yiiraneyale wanikisa wa eseekulu yoopacerya. Satana aahipaka sotheene aawerya awe wira anna ni arokora apaceryeke onyokhana ni okawanyeya. Okathi Yohani aalempe awe ikarta sawe, alopwana akina yaarina moonelo wa Satana yaahikela mmulokoni. Mmosa a alopwana awo aari Diotrefe yoowo aakumiherya okawanyeya mmulokoni. (3 Yoh. 9, 10) Diotrefe khaattittimiha axitokweene yeetteetta okathi ole, yaawo yaakhala nipuro na nikhuuru noolamulela na okathi ole. Nave Diotrefe aaniimananiha owoomola atthu otheene yaawaakhela vate vaya atthu yaale ahaaphavela awe. Tthiri itthu Diotrefe aapaka awe saari sootakhala! Olelo-va, Satana onniimananiha vanceene wira atthu a Muluku akhaleke ookawanyeya. Nto nihikhala-khale neemereryaka wira onyokhana oniirihe okawanyeya ni anna ni arokora.

15. Etthu xeeni ahooleli a itthoko anireerela aya ohiliyala?

¹⁵ Enamuna yootepexa oloka muhooleli a vatthokoni onooniherya awe wira onnaaphenta atthu a vatthokoni vawe ori waavaha itthu sa weerutthuni sinaathowa. (1 Tim. 5:8) Masi muhooleli a etthoko ohaana osuwela wira etthu yootepexa oloka ori waakhaliherya atthu a etthoko awe okhalana waataana wooloka ni Yehova ohiya paahi waavaha itthu sa weerutthuni. (Math. 5:3) Nkahaya nwehe ntakiheryo nooloka Yesu aavanhe awe ahooleli a itthoko. Moovarihana ni Evangelyo ya Yohani, okathi Yesu aakhwaawe vamwirini va nihaaxeryo, owo khaahiyale othokorerya emusi awe. Musuweleke wira Yohani eemenle opuro omosa ni Maria, maama awe Yesu, okathi ole Yesu iiviwa awe vamwirini va nihaaxeryo. Nnaamwi oona owereya vanceene, Yesu aahimuleela Yohani wira omukhapeleleke Maria. (Yoh. 19:26, 27) Ekeekhai wira axinnawe ni axirokora awe Yesu yanwerya omukhapelela Maria. Masi vanikhala ntoko wira khuuvo mmosa a axinnawe yaari atthareli awe okathi ole Yesu aakhwaawe. Tivonto Yesu aaphavela osuwelexa akhala wira aamukhala mutthu aarowa omukhapelelaka Maria mukhalelo wa weerutthuni nave-tho mukhalelo wa omunepani.

16. Miritti xeeni Yohani aarina awe?

¹⁶ Yohani aahikhalana miritti sinceene. Okhala wira aari murummwa aahaana ohoolela muteko woolaleerya waavariwa okathi ole. Ohiya-vo, woonasa wene Yohani aahithela. Nto Yohani aahaana waavaha itthu sa weerutthuni amusi awe ohihiyaka waakhapelelaka mwa omunepani.  (1 aKor. 9:5) Etthu xeeni ahooleli a itthoko aniixutta aya ni ntakiheryo na Yohani?

17. Xeeni vari aya vooloka ahooleli a itthoko waakhapelela mwa omunepani atthu a etthoko aya?

¹⁷ Ahooleli a itthoko woonasa wene aakhalana miritti sinceene sa faita. Mwa ntakiheryo, omutekoni waya awo ahaana wiimananiha okhalana mweettelo wooloka wira anvuwiheke Yehova. (aEef. 6:5, 6; Tito 2:9, 10) Woonasa wene awo aakhalana miritti sinceene anireerela aya ovara mmulokoni ntoko okhapelela ipwittipwitthi sa Yehova ni ohoolela muteko woolaleerya. Okathi omosaru awo ahaana wiimananiha omusoma Biibiliya ni amwaaraya vamosa ni anaaya, niire so, omulompa Muluku vatthokoni. Muhiliyale wira muritti awe muhooleli a etthoko okhapelela mukhalelo wa omunepani ni wa weerutthuni wa etthoko awe. Nto atthu otheene a vatthokoni anooxukhurelaka vanceene wiimananiha wa muhooleli owo a etthoko.—aEef. 5:28, 29; 6:4.

18. Etthu xeeni Yohani aakupali awe?

¹⁸ Yohani aahikhala iyaakha sinceene ni aahikhalana sookumanana soohakalaliha. Owo aahikhalana mixankiho seiyo saarowa ovukula waamini wawe. Masi Yohani aahipaka sotheene aawerya awe wira iiwelele yooruma ya Yesu ya waaphenta anna ni arokora. Tivonto, Yohani aanikupali ni murima wotheene wira Yehova ni Yesu yaanimphenta ni yaamunvaha ikuru wira ovilele khula muxankiho waarowa omphwanya. (Yoh. 14:15-17; 15:10; 1 Yoh. 4:16) Tthiri khiivo etthu Satana ni olumwenku awe wootakhala yaapanke aya yaamukhoottihenrye wooniherya wira aanaaphenta anna ni arokora ni moolumo ni miteko sawe.

19. Etthu xeeni 1 Yohani 4:7, onnitumererya awe opaka ni nthowa xeeni?

¹⁹ Ntoko Yohani, hiyo ninkhala olumwenku ola onilamuleliwa ni Satana, olumwenku yoowo atthu ahinaaphenta aya akhwaaya. (1 Yoh. 3:1, 10) Ekeekhai wira Satana aaniphavela wira naahiyale waaphenta anna ni arokora, masi owo onoowerya opaka eyo akhala wira hiyo nnoomweemererya. Tivonto, mwiimananiheke waaphenta anna ni arokora ni owooniherya wira munnaaphenta ni moolumo ni miteko sanyu. Mwiira siiso, nyuwo munoohakalala vanceene wiirela mpantta emusi ya Yehova ni munoohakalalaka vanceene mookumini mwanyu.—Mmusome 1 Yohani 4:7.