1. How the love wey God get de make you feel?

APOSTLE John write for Bible say, “God na love.” (1 John 4:⁠8) That simple thing wey John talk remind us of this important truth: As life come from God, na so love still come from God. Jehovah love us! The love wey e get for us de make us dey happy and de feel-am say we dey safe.

2. As e dey for Matthew 22:37-40, which two commandment dey important pass, and why e fit hard us to obey the second one?

² As Christians, no be we go choose whether we go show love or we no go show love. Na command. (Read Matthew 22:37-40.) E fit no hard us to obey the first commandment when we don know Jehovah well. Na so because Jehovah no de make mistake. E de care about us and e dey kind to us. But, the second commandment fit hard us to obey. Why? Na because our brothers and sisters wey be part of the neighbor wey that Bible verse talk about, de make mistake. Sometimes, they fit talk or do something wey go make us feel say they no care about us and love us. Jehovah know say no be easy thing for us to obey that command. So Jehovah use some of the people wey write Bible to teach us why we suppose to show love to each other and how we go do-am. One of this people na John.​—1 John 3:11, 12.

3. Wetin John talk plenty times?

³ For the Bible books wey John write, e talk-am plenty times say Christians must show love. For the story wey  John write about Jesus, e use the word love pass the number of times wey both Matthew, Mark, and Luke use-am. John dey about one hundred years when e write the book of John and e three letters. This Bible books teach us say make love de push us to do everything wey we de do. (1 John 4:10, 11) But, e take time before John learn that lesson.

4. Na everytime John show other people love?

⁴ When John be young man, no be everytime e show love. For example, one time, Jesus and e disciples de travel pass Samaria go Jerusalem. But the people for one village for Samaria no gree do good to them. Wetin John do? John and e brother ask Jesus whether they fit make fire come from heaven to destroy everybody for that village! (Luke 9:52-56) For another time, John fail to show love to the other apostles. Maybe na John and e brother James, tell their mama make e tell Jesus to give them important position for the Kingdom. When the other apostles hear wetin James and John don do, they no dey happy at all! (Matt. 20:20, 21, 24) Even with all this mistake wey John make, Jesus still love-am.​—John 21:7.

5. Wetin we go talk about for this topic?

⁵ For this topic, we go talk about the example of John and some things wey e write about love. As we de talk about-am, we go learn how we fit show love to our brothers and sisters. We go still learn about one important way wey family head go fit show say e love e family.

6. How Jehovah don show say e love us?

⁶ We fit de think say to love people, we go only need to get good thing for mind for them or tell them better word. But if we really love them, we need to do better things to show-am. (Compare James 2:17, 26.) For example, Jehovah love us. (1 John 4:19) And e de use the better things wey e talk for Bible to tell us say e love us. (Ps. 25:10; Rom. 8:38, 39) But we know say God no just love us because of the things wey e de talk, but e still love us because of the things wey e de do. John write for Bible say: “Na this one make us know say God love us: E send e special Son come the world so that we fit get life through the Son.” (1 John 4:9) Jehovah gree make the Son wey e love suffer and die for us. (John 3:16) So we really dey sure say Jehovah love us.

7. Wetin Jesus do to show say e love us?

 ⁷ Jesus tell e disciples say e love them. (John 13:1; 15:15) Jesus no only use the things wey e talk to show say e really love e disciples and us, but e still show-am for the things wey e do. Jesus talk say: “Nobody get love wey big pass this one, for one person to die for e friends.” (John 15:13) When we think about the things wey Jehovah and Jesus don do for us, how this one suppose affect us?

8. Wetin 1 John 3:18 talk say make we do?

⁸ We de show say we love Jehovah and Jesus when we de obey them. (John 14:15; 1 John 5:3) And Jesus command us say make we love each other. (John 13:34, 35) We no go only show say we love our brothers and sisters for mouth, but we go still show say we love them for the things wey we de do. (Read 1 John 3:18.) Wetin be some things wey we fit do to show say we love them?

9. Wetin love make John do?

⁹ John for stay with e papa and make money as e de do their family business wey be to catch fish. But instead, e use the rest of e life to help other people learn the truth about Jehovah and Jesus. The kind life wey John choose to live no easy. People suffer John and they arrest-am when e don old. (Acts 3:1; 4:1-3; 5:18; Rev. 1:9) Even when e dey prison because e de preach about Jesus, John still show say e love other people. For example, when e dey the island wey them de call Patmos, e write the book of Revelation to congregations so that they go know wetin “go soon happen.” (Rev. 1:1) Then, maybe after they release John from Patmos, e write the story about the life of Jesus and e preaching work. John still write three letters to encourage e brothers and sisters. Like John, how you fit do everything wey you fit do to help people?

10. How you fit show say you love people?

¹⁰ You fit show say you love people with wetin you de use your life do. This world wey Satan de control want make you spend all your time and power for only yourself, make you de make money or dey popular. But, Christians for the whole world de use plenty time as they fit, to preach the good news and help people near Jehovah. Some de even fit preach and teach full-time.

11. How plenty publishers wey hold Jehovah tight de show say they love Jehovah and their brothers and sisters?

¹¹ Many Christians need to work full-time so that they go fit support theirself and their family. Even with that one, this publishers wey hold Jehovah tight, de support e organization for any way wey they fit. For example, some of them de go help other brothers and sisters wey things like heavy rain scatter their house, other ones de support construction work, and everybody fit contribute money for the worldwide work. Them de do this things because they love God and other people. Every week, we de show say we love our brothers and sisters when we de go our meeting and de answer question. Even when we don tire, we still de go meeting. Even though say fear de catch us, we still de answer question for meeting. And even as we get our own problems, we de encourage people before meeting and after meeting. (Heb.  10:24, 25) We really dey happy for the work wey our brothers and sisters de do!

12. Which other way John show say e love e brothers and sisters?

¹² John show say e love e brothers and sisters when e greet them for wetin they do and when e give them advice. For example, for the letters wey John write, e praise the brothers and sisters for their faith and the good things wey them de do, and e still give them strong correction about sin. (1 John 1:8–2:1, 13, 14) For the same way, we need to praise our brothers and sisters for the good things wey them de do. But if person start to think for bad way or do something wey fit spoil e friendship with Jehovah, make we sofri tell-am wetin e need to hear. We need strong heart to advice our friend. But Bible talk say better friends de correct each other, as iron de make another iron sharp.​—Prov. 27:17.

13. Wetin we no suppose do?

¹³ Sometimes, we de show say we love our brothers and sisters when we no do some things. For example, we no go de quick vex because of the things wey them de talk. Think about one thing wey happen when Jesus don de near the end of e life for this earth. E tell e disciples say they go get life if they chop e flesh and drink e blood. (John 6:53-57) The thing wey Jesus talk shock them sotey plenty of the disciples leave Jesus. But e real friends no leave-am and John na part of them. They no understand wetin Jesus talk, and maybe the thing surprise them. But this better friends wey Jesus get no think say the thing wey Jesus talk dey wrong and vex because of-am. Instead, they trust Jesus because they know say na truth e talk. (John 6:60, 66-69) E really dey important make we no de quick vex because of the thing wey our friends talk! Instead, we go allow them explain wetin they mean.​—Prov. 18:13; Eccl. 7:9.

14. Why we no go ever start to hate our brothers and sisters for inside our heart?

¹⁴ John still advice us make we no hate our brothers or sisters. If we no obey that advice, we de give Satan chance to use us do wetin e like. (1 John 2:11; 3:15) This kind thing happen to some people around the year 100 C.E. Satan do everything wey e fit do to make servants  of God hate theirself and separate from each other. When John write e letters, men wey de think like Satan, don enter the congregation. For example, one man wey e name na Diotrephes de cause trouble to scatter one congregation that time. (3 John 9, 10) E no de respect the elders wey governing body send to visit congregations. E even try to remove people from congregation wey de care for people wey e no like. This one show say e really dey proud! Satan still de do everything wey e fit do today to scatter servants of God. Make we no ever hate our brothers and sisters and stop to support each other.

15. Wetin family head go remember?

¹⁵ One important way wey family head de show say e love e family na to provide wetin e family need to survive. (1 Tim. 5:8) But, e need to remember say, the number one important thing na to help e family hold Jehovah tight. (Matt. 5:3) See the fine example wey Jesus show family head. The book of John tell us say, when Jesus de die ontop the pole, e still de think about e family. John stand near Mary, wey be Jesus mama, for the place wey they hang Jesus. Even as Jesus de feel strong pain, e tell John make e care for Mary. (John 19:26, 27) Jesus get brothers and sisters wey go make sure say Mary get the things wey e need, but maybe any one of them never be disciple that time. So Jesus want make sure say Mary get the things wey e need to survive and continue to serve Jehovah.

16. Which work them John get?

¹⁶ John get plenty work for hand. John na one of the apostles, and so e put the preaching work for front. And maybe e don marry, so e go need to take care of e family and still help them dey tight with God. (1 Cor. 9:5) Wetin this one teach family head today?

17. Which important work family head get to do for e family and how e family go benefit?

¹⁷ Brother wey be family head fit get plenty important work wey e de do. For example, e must work hard for e work place so that e character go make people praise Jehovah. (Eph. 6:5, 6; Titus 2: 9, 10) And the brother fit get different-different work for congregation, like to encourage and care for brothers and sisters, and to dey front for the preaching work. Apart from that one, na important thing for the brother to always study Bible with e wife and children. They go really glad for everything wey e de do to help them dey strong for body, to dey happy, and to dey tight with Jehovah.​—Eph. 5:28, 29; 6:4.

18. Wetin John dey sure of?

¹⁸ John live long life, and many fine things happen for e life. E face plenty things for e life wey for make e faith weak. But e always do e best to obey the things wey Jesus command, and part of this command na to love e brothers and sisters. Because of this one, John dey sure say Jehovah and Jesus love-am and they go give-am power to endure any problem wey e go face. (John 14:15-17; 15:10; 1 John 4:16) Satan and this world wey e de control no stop John make e no show e brothers and sisters love for the things wey e talk and do.

19. Wetin 1 John 4:7 encourage us to do, and why?

¹⁹ Like John, we de live for world wey Satan de control, and e no love anybody at all. (1 John 3:1, 10) Na true say e want make we stop to love our brothers and sisters, but e no go fit make that one happen unless we allow-am to do-am. Make we make up our mind to love our brothers and sisters and show the love for the things wey we de talk and do. Then we go get the joy to be part of Jehovah family, and life go really sweet us.​—Read 1 John 4:7.