1. Ino raha tsapanao izikoa fa hainao fa tiany Jehovah mare anao?

KARAHA ty raha nisoratiny apostoly Jaona: “Zan̈ahary io fitiavan̈a.” (1 Jaona 4:8) Raha zen̈y mampatsiaro atsika fa Jehovah tsy vitany loharanony fahin̈ana fo fa loharanony fitiavan̈a koa. Farandraha tiany eky atsika! Ke fahaizantsika zen̈y mahavy atsika matsiaro ho voaro, sambatra, ndreky afapô.

2. Ino didy aroe farany maventy koran̈iny Matio 22:37-40? Nan̈ino ma mety ho sarotro amintsika han̈araka didy faharoe io?

² Vakia Matio 22:37-40. Mila man̈aboaka fitiavan̈a atsika Kristianin̈y. Raha zen̈y tsy safidy fa didy. Atsika koa fa mahay Jehovah tsarabe, tsy sarotro amintsika man̈araka didy farany maventy sady voanalohany. Atsika lastio mahay fa izy lavorary, tsara fan̈ahy, sady mitady raha mahatsara atsika. Fa mety ho sarotro amintsika ndraiky man̈araka didy faharoe in̈y, fotony iro piaramanompo amintsika aby io tsy lavorary. Ndraikindraiky atsika mety hihevitry fa iro io ratsy jery na tsy mijery atsika foeky. Mety baka amy raha ataondro na baka amy raha volan̈indro mahavy atsika mieritreritry zen̈y. Hainy Jehovah raha zen̈y. Zen̈y an̈isany nahavy izy nan̈iraka olo, karaha ataony Jaona, nanoratra Baiboly. Koran̈iny amizio ao antony mahavy atsika mila man̈aboaka fitiavan̈a ndreky fomba han̈anaovantsika zen̈y.​—1 Jaona 3:11, 12.

3. Ino raha namafisiny Jaona?

³ Namafisiny Jaona tamy taratasy nisoratiny fa Kristianin̈y tsy maintsy man̈aboaka fitiavan̈a. Jaona ten̈a matetiky nampiasa volan̈a griky nadika “tia” ndreky “tian̈a” izikoa fa nitantara fiain̈anany Jesosy, mandilatra nindro panoratra Filazantsara telo hafa mitambatra. Kadiriny zato taon̈o tio i Jaona taminizy nanoratra Filazantsaranany ndreky taratatsy  telo hafa. Hita baka amy raha nisoratiny aby io fa tokony ho fitiavan̈a fo antony mahavy atsika man̈ano raha, na ino na ino raha ataontsika. (1 Jaona 4:10, 11) Fa izy fo, elaela Jaona vo nahay raha zen̈y!

4. Nahavita nan̈aboaka fitiavan̈a fo ma i Jaona?

⁴ Tamy Jaona mbala tanora, nisy lera izy tsy nan̈aboaka fitiavan̈a. Tandraraiky, Jesosy ndreky pianatranany tamy zen̈y handeha ta Jerosalema, ke iro nandalo ta Samaria antsendriky. Nisy tanàna samaritanin̈y hely zay tao tsy nan̈ano karibo antran̈o iro foeky. Hainao ino raha nataony Jaona? Izy nangataka lalan̈a tamy Jesosy, handatsaka môtro baka andan̈itry, baka ho ripaka olo jiaby tamy tanàna io! (Lioka 9:52-56) Nisy lera koa izy tsy nan̈aboaka fitiavan̈a tamindro apostoly hafa aby io. Ny raha nisy baka, mamandro nandeha tamy Jesosy, nangataka iro roeny Jakoba rahalahiny hamezan̈a plasy an̈abo amy Fanjakan̈any Zan̈ahary. Kanefa mety iro roe lahy fo izy nan̈iraka mamandro io. Ke neloko nifaotafaota apostoly hafa aby io izikoa fa naharen̈y zen̈y. (Mat. 20:20, 21, 24) Ndray izy man̈ano zen̈y, mbala tiany Jesosy fo Jaona, ndray nan̈ano hadisovan̈a maro.​—Jaona 21:7.

5. Ino raha hianarantsika amy lahatsoratra ty ato?

⁵ Handiniky raha nataony Jaona ndreky sasany amy raha nisoratany momba fitiavan̈a io atsika ato. Amy zen̈y ho hitantsika akory mety han̈aboahantsika fitiavan̈a io amindro rahalahy ndreky ranabavintsika aby io. Ho hitantsika koa fomba araiky maventy mety han̈aboahany lohany fianakavian̈a fa izy tia olo tran̈o araiky aminany.

6. Akory nan̈aboahany Jehovah fa tiany ankitin̈y atsika?

⁶ Mety hieritreritry atsika fa fihetsehampô fo fitiavan̈a io, ke atsika koa fa mivolan̈a raha tsara aminolo, efa pare edy. Fa zen̈y tsy ampy, fotony fitiavan̈a io mila aboaka amy raha atao. (Ampiràn̈a amy Jakoba 2:17, 26.) Diniha baka! Farandraha tiany Jehovah eky atsika. (1 Jaona 4:19) Naboakany tamy volan̈anany raha zen̈y, ary tsara mare fomba ivolan̈any Baiboly izio. (Sal. 25:10; Rom. 8:38, 39) Nan̈ino ma atsika resy lahatra fa tiany Jehovah marin̈y atsika? Fotony izy tsy vitany nivolan̈a fa tiany atsika, fa mbala naboakany tamy raha nataony koa raha zen̈y. Karaha ty ho Jaona: ‘Karaha ty nahitan̈a fitiavany Zan̈ahary atsika: Nirahiny tamy donia ty Zanany lahitokan̈a, baka atsika hahazo fiain̈ana baka amy Zanany io.’ (1 Jaona 4:9) Nambelany Jehovah hijaly ndreky hofoaty Zanany ten̈a tiany io baka atsika ho avotro. (Jaona 3:16) Ke tsy tokony hisalasala foeky atsika fa tiany Jehovah ankitin̈y atsika!

7. Akory nan̈aboahany Jesosy fa atsika tiany?

 ⁷ Jesosy nan̈amia toky pianatranany fa iro io tiany. (Jaona 13:1; 15:15) Tiany mare koa atsika. Tsy tamy volan̈anany fo nan̈aboahany raha zen̈y, fa tamy raha nataony koa. Ho izy: “Tsisy manan̈a fitiavan̈a maventy mandilatra ty: Olo araiky mahatindry ain̈inany han̈avotany namany.” (Jaona 15:13) Maventy ankitin̈y fitiavan̈a zen̈y! Ten̈a be ankitin̈y raha vitany Jehovah ndreky Jesosy tamintsika. Tokony ho ino vokatranizen̈y amintsika?

8. Koa zahan̈a 1 Jaona 3:18, ino raha tokony hataontsika?

⁸ Aboakantsika fa tia Jehovah ndreky Jesosy ankitin̈y atsika, izikoa man̈araka volan̈andro. (Jaona 14:15; 1 Jaona 5:3) Ohatra iziô, Jesosy nan̈iraka atsika hifankatia. (Jaona 13:34, 35) Akory mety han̈arehantsika zen̈y? Tsy maintsy aboakantsika amy raha volan̈intsika ndreky amy raha ataontsika fa atsika tia piaramanompo. (Vakia 1 Jaona 3:18.) Alô atsika hizaha ohatra vitsivitsy mety han̈anaovantsika zen̈y.

9. Nandrisiky Jaona han̈ano ino ma fitiavan̈a?

⁹ Ôtry ataony Jaona iziô, izy afaka nanohy nan̈arato niaraka tamy babany fo, fotony zen̈y tadivolandro. Fa tsy zen̈y raha nataony. Izy nifidy hampiasa angovonany ndreky fotoan̈anany han̈ampian̈a olo hahay ny marin̈y momba Jehovah ndreky Jesosy. Kanefa tsy mora fiain̈ana nifidiny Jaona io! Nan̈ino? Fotony izy niaritry fan̈injehan̈a. Nalefa sesitany tamy nosy Patmo koa izy, tamy faramparany taonjato voanalohany. Efa natoe izy tamy zen̈y. (Asa. 3:1; 4:1-3; 5:18; Apok. 1:9) Fa ndray izy nigadra tamy nosy io, izy mbala nieritreritry raha mahatsara olo fo. Tan̈y izy nanoratra bokiny Apokalypsy. Izio baka tio nalefany tamy fiangonan̈a, misy hahaizandro raha ‘hiboaka tsy ho ela.’ (Apok. 1:1) Nanoratra momba tantarany Jesosy ndreky fanompoan̈anany koa izy, izikoa fa nafaka gadra tamy nosy Patmo. Filazantsarany Jaona ikahian̈a izio. Nanoratra taratasy telo koa izy tafara tatỳ, hankahirezan̈a iro rahalahy ndreky ranabavy aby io. Nahafoe ten̈a i Jaona! Akory mety angalantsika tahaka izy?

10. Akory an̈aboahanao fa anao be fitiavan̈a?

¹⁰ Arakaraka safidy ataonao amy fiain̈ana ahitan̈a fa anao be fitiavan̈a. Kanefa tiany doniany Satana ho tia ten̈a anao, ke hampiasa fotoan̈anao ndreky angovonao jiaby itadiavan̈a vola fo na hahavy anao hanjary olo malaza. Mampahery mahita safidy tsara ataony panompony Jehovah maro erantany. Iro mahafoe ten̈a, ke manokan̈a fotoan̈a be iro hitorian̈a vaovao tsara ndreky han̈ampian̈a olo hifandray tsara amy Jehovah. Sasany amindro man̈ano fanompoan̈a manontolo andra foeky.

11. Ino aby raha ataony piaramanompo maro, ke ahitan̈a fa iro ten̈a tia Zan̈ahary sady tia piaramanompo?

¹¹ Marobe koa Kristianin̈y tsy mivadiky tsy maintsy miasa man̈ariva andra, na mampikiaka andra foeky, hamiloman̈a vady amanjanaka. Ndray iô zen̈y, mahafoe ten̈a iro ke man̈ano zay vitandro hanohan̈ana fandaminan̈any Jehovah. Sasany amindro miezaka man̈ampy olo tatrany antambo na man̈ampy amy fan̈oren̈ana. Man̈ano fan̈amezan̈a koa atsika jiaby, hanohan̈ana asa atao erantany. Man̈ano raha jiaby zen̈y atsika fotony atsika tia Zan̈ahary sady tia olo. Tia piaramanompo koa atsika, izikoa fa mazoto mivory sady tia mandray anjara amy fivorian̈a isaka herin̈iandra. Misy lera aby atsika efa kajo mare, fa mbala tsy mahafoe fivorian̈a fo. Mifen̈y mamaly teny fo koa atsika ndray mavozo. Mety misy problemo mampiasaloha atsika an̈y, kanefa mbala von̈ono fo atsika mampahery olo hafa, aloha ndreky afarany fivorian̈a. (Heb. 10:24, 25)  Matsiaro sambatra mare atsika manan̈a iro rahalahy ndreky ranabavy aby io!

12. Akory koa nan̈aboahany Jaona fa tiany iro piaramanompo taminany aby io?

¹² Naboakany Jaona fa tiany iro piaramanompo taminany aby io, ke iro tsy vitany niderainy fa namezany torohevitry tsara koa. Ohatra iziô, izy nidera iro rahalahy ndreky ranabavy aby io fotony iro nanan̈a finoan̈a ndreky nan̈ano asa tsara. Fa nisy lera koa izy nan̈amia torohevitry mivantan̈a momba fahotan̈a. (1 Jaona 1:8–2:1, 13, 14) Karaha zen̈y koa, mila deraintsika iro piaramanompo aby io izikoa fa man̈ano raha tsara. Akory fo basy izikoa misy amindro io manomboko manan̈a toetsain̈y ratsy na fahazaran̈a ratsy, ke atahoran̈a ho robaka fifandraisan̈andro amy Jehovah? Tia iro ankitin̈y atsika izikoa manan̈a korazy ke tsy misalasala man̈amia torohevitry iro, sady mifen̈y ho tsara fan̈ahy fo izikoa fa man̈ano zen̈y. Koran̈iny Baiboly fa ten̈a naman̈a ankitin̈y anao, izikoa man̈ano zen̈y.​—Ohab. 27:17.

13. Ino raha tsy tokony hataontsika?

¹³ Misy raha tsy tokony hataontsika izikoa tiantsika haboaka fa tia piaramanompo ankitin̈y atsika. Ohatra iziô, atsika tsy tokony ho mora meloko amy raha volan̈indro. Nisy fotoan̈a Jesosy nivolan̈a tamy pianatranany fa iro koa tihahazo fiain̈ana, iro mila mihinan̈a nofotronany ndreky migiaka lionany. (Jaona 6:53-57) Neloko mare ankamarozany pianatranany izikoa fa naharen̈y zen̈y, ke nialandro izy. Sasany ndraiky tsy niala izy foeky, an̈isanizen̈y Jaona, fotony iro io ten̈a kamaradiny Jesosy. Tsy ten̈a nazava tamindro raha tiany Jesosy volan̈iny tamy fotoan̈a zen̈y, ary mety lany fan̈ahy foeky iro. Kanefa, tsy nataondro nampaneloko iro foeky raha nivolan̈iny Jesosy in̈y. Iro natoky izy, fotony haindro fa Jesosy nivolan̈a ny marin̈y fo. (Jaona 6:60, 66-69) Hitantsika baka amy zen̈y fa atsika tsy tokony ho mora meloko amy raha volan̈iny namantsika. Koa misy koran̈a tsy mazava, ambelantsika iro han̈azava hevitrindro.​—Ohab. 18:13; Mpito. 7:9.

14. Nan̈ino atsika tsy tokony hankahala piaramanompo amintsika?

¹⁴ Apostoly Jaona koa nampirisiky atsika tsy hankahala piaramanompo amintsika. Izikoa atsika tsy man̈araka torohevitry zen̈y, efa Satana edy mamolavola atsika. (1 Jaona 2:11; 3:15) Efa nahazo iro Kristianin̈y tamy taonjato voanalohany tan̈y raha  zen̈y. Nifen̈y angovo jiaby Satana nan̈ano raha nahavy iro panompony Zan̈ahary aby io tsy hifankatia ndreky hisaratsaraka. Tamy fotoan̈any Jaona nanoratra taratasinany io, efa nisy olo nanan̈a toetsain̈iny Satana tan̈ivony fiangonan̈a. Ohatra araiky amy zen̈y Diotrefa. Nan̈ano raha hampisaratsaraka fiangonan̈a izy. Tsy nasiany fotiny koa iro antipan̈ahy nirahiny filankevipitantan̈ana handeha hamangy iro tan̈y. Tiany Diotrefa hiroasin̈y tsy an̈isany fiangonan̈a lastio lan̈iany olo nan̈ano karibo antran̈o olo tsy tiany aby io. Nasaky kony izy! (3 Jaona 9, 10) Firaka iziô, Satana mbala mitady hevitry fo hampisaratsaraka olony Zan̈ahary. Kanefa tsy tokony ho atsika foeky hanan̈a fô ratsy amy piaramanompo ke tsy ho tia iro. Ndray atsika tokony hanohan̈a ndreky han̈ampy iro fo!

15. Ino raha tsy mila adin̈any lohany fianakavian̈a?

¹⁵ Fomba araiky maventy han̈aboahany lohany fianakavian̈a fa ten̈a tia olo tran̈o araiky aminany, miasa mare izy mamelon̈o iro. (1 Tim. 5:8) Fa mbala bebenizen̈y, fan̈ampiany iro hihavan̈a tsara amy Jehovah, ary raha zen̈y tsy mila adin̈any. (Mat. 5:3) Ho vitany tsara han̈ano zen̈y, izikoa izy mangala tahaka Jesosy. Hita amy Filazantsara nisoratiny Jaona ao, fa mbala nitady raha hahatsara fianakavian̈anany fo i Jesosy ndray efa hofoaty! Izy taminio efa nijaly mare fotony nihanton̈o taminy hazofijalian̈a, kanefa mbala niangavy Jaona fo izy hikarakara reniny. (Jaona 19:26, 27) Samby tio i Jaona ndreky Maria taminio. Nan̈ino ma izy niangavy i Jaona hikarakara i Maria, kanefa izy nisy zandry maro nety nahavita nikarakara mamandro io? Fotony zandriny aby io taminio mbala tsendriky nisy nan̈aradia izy, kanefa tiany Jesosy hisy olo fo hikarakara Maria ndreky han̈ampy izy hanohy hanompo Jehovah.

16. Ino aby ma andraikitriny Jaona?

¹⁶ Naro mare andraikitriny Jaona! Ohatra iziô, izy tsy maintsy nazoto nitory fotony izy apostoly. Mety nisy vady koa izy, ke tsy maintsy nikarakara raha nilainy vadiny ndreky zanany sady nan̈ampy iro hihavan̈a tsara tamy Jehovah. (1 Kor. 9:5) Ino raha ianarany lohany fianakavian̈a baka aminy ohatra tsaranazy zen̈y?

17. Akory han̈aboahany lohany fianakavian̈a araiky fa izy tia olo tran̈o araiky aminany?

¹⁷ Mety ho maro andraikitry koa rahalahy araiky izikoa izy lohany fianakavian̈a. Ohatra  iziô, tsy maintsy miasa tsara izy ampiasan̈a an̈y, izikoa izy tihan̈amia voninahitry Jehovah. (Efes. 6:5, 6; Tit. 2:9, 10) Izikoa izy antipan̈ahy na pan̈ampy amy fanompoan̈a, izy mila mazoto mitory, mikarakara piaramanompo, ndreky mampahery iro. Fa tsy zen̈y fo! Mila manokan̈a fotoan̈a koa izy, isaka herin̈andra, ianaran̈a Baiboly miaraka amy vady amanjanakanany. Hay be fa ho ravoravo vady amanjanakanany izikoa izy man̈ano zen̈y! Izy tsy vitany mamelon̈o iro ndreky mampahery iro, fa mbala man̈ampy iro hihavan̈a tsara amy Jehovah fo koa.​—Efes. 5:28, 29; 6:4.

18. Ino raha natokisany Jaona?

¹⁸ An̈isanolo ela velon̈o mare i Jaona, sady naro raha tsara nandalo tamy fiain̈ananany. Niatriky raha sarotro isankarazany koa izy, fa tsy nambelany hihen̈y foeky finoan̈anany. Nifen̈y fo izy nan̈araka bekony Jesosy. Nan̈iraka olo pan̈aradia izy ho tia piaramanompo aminany ohatra i Jesosy, ke raha zen̈y narehany Jaona. Ino vokatranizen̈y? Natoky i Jaona fa tiany Jehovah ndreky Jesosy mare izy, ke hamezandro angovo hahavy izy hatôto problemo jiaby mety ho hisy. (Jaona 14:15-17; 15:10; 1 Jaona 4:16) Tsy vitany Satana ndreky donia ty foeky nisakana i Jaona tsy ho tia piaramanompo, ndreky han̈aboaka zen̈y tamy raha nivolan̈iny ndreky raha nataony.

19. Mampirisiky atsika han̈ino ma 1 Jaona 4:7? Nan̈ino?

¹⁹ Miran̈a amy raha niain̈any Jaona fo raha iain̈antsika iziô. Mbala i Satana fo pitondra donia ty, ary izy tsisy fitiavan̈a foeky. (1 Jaona 3:1, 10) Tanjon̈onany hahavy atsika tsy ho tia piaramanompo amintsika. Kanefa tsy takany foeky tanjon̈onany zen̈y, izikoa tsy raha atsika foeky ny han̈ambela izy han̈ano zen̈y. Irarian̈a atsika ho tapakevitry ho tia iro rahalahy ndreky ranabavintsika aby io, ke han̈aboaka raha zen̈y amy raha volan̈intsika ndreky raha ataontsika. Ho ravoravo mare atsika izikoa man̈ano zen̈y, fotony an̈isany fianakaviambeny Jehovah sady hanan̈a fiain̈ana ten̈a mahafapô.​—Vakia 1 Jaona 4:7.