1. Ana chinonyelo chakwete Yehofa chikusatukamuchisya chamtuli?

NDUMETUME Yohane jwalembile kuti “Mlungu ali chinonyelo.” (1 Yoh. 4:8) Maloŵe gelega gakutukumbusya ya usyesyene wakusosekwa mnope wakuti, Mlungu juŵapanganyisye yindu yosope alisoni jwachinonyelo. Yehofa akusatunonyela. Chinonyelo chakwechi chikusatukamuchisya kuŵa ŵakusangalala, ŵangali woga soni kuŵa ŵakwikutila.

2. Ana lilemba lya Mateyu 22:37-40, likulosya kuti ni malamusi gaŵili gapi gagali gekulungwa mnope? Ligongo chichi ndaŵi sine yikusaŵa yakusawusya kupikanila lilamusi lyaŵilili?

² Mklistu jwalijose akusosekwa kwanonyela ŵane. Kwanonyela ŵane lili lilamusi lyatukusosekwa kulikuya. (Aŵalanje Mateyu 22:37-40.) Patummanyilile chenene Yehofa, yikusaŵa yangasawusya kupikanila lilamusi lyandanda lyakuti tumnonyeleje jwalakwe. Yili myoyo ligongo lyakuti Yehofa ali jwamlama soni akusatenda yindu mwakutuganichisya. Nambope mpaka yiŵe yakusawusya kupikanila lilamusi lyaŵili lyakuti twanonyeleje ŵane. Ligongo abale ni alongo ŵetu ŵatukusasosekwa kwanonyelaŵa ali ŵangali umlama. Ndaŵi sine jemanjaji mpaka atende yindu yakulosya kuti ngakutuganichisya soni kutunonyela. Yehofa jwamanyilile kuti yeleyi mpaka yitendekwe. Myoyo ŵasalile ŵandu ŵane kuti alembe m’Baibulo yindu yampaka yitukamuchisye kuti tukomboleje kwanonyela ŵane. Jumo mwa ŵanduŵa ali Yohane.—1 Yoh. 3:11, 12.

3. Ana Yohane jwasasile chichi mwakuwilisyawilisya?

³ Yohane jwagombelechesye kuti Aklistu akusosekwa kuŵa ŵakunonyelana. Pandaŵi jiŵalembaga yakwamba umi wa Yesu,  Yohane jwakamulichisye masengo maloŵe gakuti “chinonyelo” soni “kunonyeledwa” kwa mawulendo gejinji, kupunda muŵatendele Mateyu, Maliko, soni Luka. Yohane jwaliji ali akwete yaka ya m’ma 100 pandaŵi jiŵalembaga yikalata yakwe yitatu soni yakwamba umi wa Yesu. Yaŵalembileyi yikusatukamuchisya kumanyilila kuti yatukusatenda mpela Aklistu, tukusosekwa kuyitenda mwachinonyelo. (1 Yoh. 4:10, 11) Nambopetu Yohane yamjigalile ndaŵi jelewu kuti akomboleje kwanonyela ŵane.

4. Ana Yohane jwanonyelaga ŵane ndaŵi syosope?

⁴ Yohane paŵaliji jwachinyamata, ndaŵi sine jwalepelaga kwanonyela ŵane. Mwachisyasyo, pandaŵi jine Yesu yimpepe ni ŵakulijiganya ŵakwe ŵaliji paulendo wakwawula ku Yelusalemu. Ali paulendowu, ŵayiche m’musi wine wa ku Samaliya, nambo ŵandu nganiŵapochela chenene jemanjaji. Ana Yohane jwatesile chichi? Jwalakwe jwamsalile Yesu kuti agambe kuŵilasya moto kutyochela kwinani kuti watinisye Asamaliyaŵa. (Luk. 9:52-56) Pandaŵi jinesoni, Yohane jwalepele kwanonyela ŵandumetume achimjakwe. Jwalakwe yimpepe ni Yakobo juŵaliji mpwakwe ŵasalile mama ŵawo kuti akamsalile Yesu kuti chiŵape udindo wapenani mu Uchimwene wakwe. Ŵandumetume ŵane paŵapikene yeleyi ŵatumbile mnope. (Mat. 20:20, 21, 24) Atamose kuti Yohane jwalemwesyaga, nambope Yesu ŵamnonyelaga mnope.—Yoh. 21:7.

5. Ana chitukambilane chichi munganiji?

⁵ Munganiji, chitukambilane ya Yohane soni yindu yine yaŵalembile pangani ja kwanonyela ŵane. Yeleyi chiyitukamuchisye kulola yampaka tutende kuti twanonyeleje abale ni alongo ŵetu. Kaneko chitulolesoni yampaka atende achalume ŵali mitwe ja maŵasa pakulosya kuti akusiŵanonyela ŵandu ŵa mwiŵasa mwawo.

6. Ana Yehofa jwatesile chichi pakulosya kuti akusatunonyela?

⁶ Ndaŵi sine tukusaganisya kuti kwanonyela ŵane kukusawonechela kupitila mu yakuŵecheta yetu. Nambo chinonyelo chisyesyene chikusawonechela kupitila mu yitendo yetu. (Alole lilemba lya Yakobo 2:17, 26.) Mwachisyasyo, Yehofa akusatunonyela. (1 Yoh. 4:19) Jwalakwe akusalosya kuti akusatunonyela kupitila m’Maloŵe gakwe Baibulo. (Sal. 25:10; Alo. 8:38, 39) Nambope tukusamanyilila kuti Mlungu akusatunonyela kupitila mu yindu yakusatenda soni yakusaŵecheta. Yohane jwalembile kuti, “Mlungu ŵalosisye chinonyelo chakwe kwa uwe mwamti myi: Jwalakwejo jwakwete mwanache jumpepe, nambo ŵamtumile pa chilambo chapasi pano kuti kupitila mwa jwalakwejo tukole  umi.” (1 Yoh. 4:9) Yehofa jwakundile kuti mwanache jwakwe jwakunonyelwa alaje soni kuwa ligongo lya m’weji. (Yoh. 3:16) Ana yaŵatesileyi ngayikututendekasya kusimichisya kuti Yehofa akusatunonyela yisyesyene?

7. Ana Yesu jwatesile chichi pakulosya kuti akusatunonyela?

⁷ Yesu ŵasalile ŵakulijiganya ŵakwe kuti ŵanonyelaga mnope. (Yoh. 13:1; 15:15) Jwalakwe ŵalosisye kuti ŵanonyelaga jemanjaji soni kuti akusatunonyela m’weji kupitila mu yindu yaŵatesile. Yesu jwasasile kuti, “Chinonyelo chekulungwa chele mundu kukomboleka kola kwa achimjakwe chili kupeleka umi wakwe kwa jemanjajo.” (Yoh. 15:13) Patukuganichisya yaŵatutendele Yehofa ni Yesu, ana tukusosekwa kutenda chichi?

8. Ana lilemba lya 1 Yohane 3:18, likusasala kuti tukusosekwa kutenda chichi?

⁸ Tukusalosya kuti tukusamnonyela Yehofa soni Yesu mwakupikanila yakusatusalila. (Yoh. 14:15; 1 Yoh. 5:3) Pajatu Yesu ŵatulamwile kuti tunonyelaneje. (Yoh. 13:34, 35) Myoyo tukagambaga kwasalila abale ni alongo ŵetu kuti tukusitwanonyela. Tukusosekwa tulosyeje kuti tukwanonyela kupitila mu yindu yatukusatenda. (Aŵalanje 1 Yohane 3:18.) Ana ni yindu yine yapi yampaka tutende pakulosya kuti tukusanonyela jemanjaji?

9. Ana Yohane jwatesile chichi ligongo lya kwanonyela abale?

⁹ Yikaliji yakomboleka kuti Yohane akamuleje masengo gakuwulaga somba yimpepe ni babagwe. Jwalakwe akapataga mbiya syejinji. Nambope Yohane jwasagwile kuti ŵajiganyeje ŵane usyesyene wakwamba Yehofa soni Yesu. Nambotu yaŵasagwileyi yamtendekasisye kuti asimane ni yakusawusya yejinji. Jwalakwe jwalagasidwe mnope soni chakumbesi kwa yaka 100 yandanda, ŵamŵisile mundende ligongo lya kulalichila. Pandaŵiji ŵaliji jwamchekulupe. (Mase. 3:1; 4:1-3; 5:18; Chiw. 1:9) Atamose pandaŵi jele ŵamtaŵile ligongo lya kulalichila yakwamba Yesu, jwalakwe jwatesile yindu yakulosya kuti akusiŵanonyela abale. Mwachisyasyo, paŵaliji ku ukayidi pa chilumba cha Patimosi, jwalakwe jwalembile buku ja Chiwunukuko. Paŵamalisisye kulemba bukuji ŵajitumisye kumipingo kuti abale amanyilile yindu yaŵasakaga “Mlungu kuyitenda.” (Chiw. 1:1) Yohane paŵatyosile pa chilumba cha Patimosi, jwalembile buku ja Ngani Syambone jajikusasala ya umi wa Yesu soni utumiki wakwe. Jwalakwe jwalembilesoni yikalata yitatu pakusaka kwalimbikasya abale ni alongo. Ana mpaka atende chichi kuti aŵe ŵakulipeleka mpela Yohane?

10. Ana mpaka tulosye chamtuli kuti tukusanonyela ŵandu?

¹⁰ Yindu yatusagwile kutenda paumi wetu yikusalosya naga tukusanonyela ŵandu. Chilambo cha Satanachi chikusasaka kuti tumalileje ndaŵi soni machili getu pakulikamuchisya jika, ni chakulinga chakuti tukole mbiya syejinji soni kuti tuŵe ŵakumanyika mnope. Nambo mwakulekangana ni yeleyi, Aklistu masiku agano akusalipeleka mnope pakulalichila ngani syambone pachilambo chosope. Jemanjaji akwakamuchisya ŵandu kuti aŵe paunasi wambone ni Yehofa mwamti ŵane akusatenda yeleyi lisiku lililyose.

11. Ana Aklistu ŵakulupichika akusatenda yindu yapi pakulosya kumnonyela Yehofa soni Aklistu achimjawo?

¹¹ Aklistu ŵakulupichika ŵajinji akusakamula masengo mwakulipeleka pakusaka kuti alisamalileje jika soni kulikamuchisya liŵasa lyawo. Atamose yili myoyo, jemanjaji akusalipeleka mnope pakujikamuchisya Gulu ja Yehofa. Mwachisyasyo, ŵane akusakamuchisya kumalo kwa kutendekwe ngosi syachilengedwe, pele ŵane akusakamula masengo gayakutaŵataŵa. Nambosoni jwalijose akusapeleka mbiya syakamuchisya pa masengo ga pachilambo chosope. Akusatenda yeleyi ligongo lyakuti akusamnonyela  Yehofa soni achimjawo. Wiki jilijose tukusalosya kuti tukusanonyela abale ni alongo ŵetu patukusimanikwa pamisongano soni patukujigala nawo mbali. Atamose pandaŵi jatupesile, tukusatenda yakomboleka kuti tukasimanikweko. Atamose tuli mkulaga ni yindu yine yakwe nambope tukusajangaga pamisonganoji. Yisyene kuti wosope tukusasimana ni yakusawusya nambope tukusalimbikasyana patuli pamisongano. (Aheb. 10:24, 25) Kusala yisyene tukusayamichila mnope yambone yakusatenda abale ni alongo ŵetu.

12. Ana Yohane jwatesile chichi pakulosya kuti akusiŵanonyela abale ni alongo?

¹² Yohane jwalosisye kuti akusiŵanonyela abale ni alongo mwakwapasoni chamuko payindu yaŵalemwesyaga. Mwachisyasyo, mu chikalata chakwe, Yohane jwayamichile abale ni alongoŵa ligongo lya chikulupi chawo soni masengo gaŵatendaga. Nambope jwalakwe jwapele jemanjaji chamuko chamachili pangani jakutenda ulemwa. (1 Yoh. 1:8–2:1, 13, 14) M’wejisoni tukusosekwa twayamichileje abale ni alongo ŵetu payindu yambone yakusatenda. Nambope naga tukuyiwona kuti Mklistu mjetu atandite kutenda yindu yakusakala, mpaka tulosye kuti tukusamnonyela mwakumjamuka. Kuti yeleyi yikomboleche pakusasosekwa kulimba mtima nditu. Nambope, Baibulo jikusalala kuti mjetu jwambone akusasosekwa kuti atujamucheje.—Mis. 27:17.

13. Ana tukusosekwa kuŵambala kutenda chichi?

¹³ Ndaŵi sine mpaka tulosye kuti tukusanonyela abale ŵetu mwakuŵambala kutenda yindu yine. Mwachisyasyo, ngatukusasosekwa kutumbila mwachitema naga atuŵechetele mwangaŵajilwa. Aganichisye yindu yayatendekwe chakumbesi kwa umi wa Yesu pachilambo chapasi. Jwalakwe ŵasalile ŵakulijiganya ŵakwe kuti naga akusaka kuja kupata umi wangamala, akusosekwa kulya chilu chakwe soni kumwa miyasi jakwe. (Yoh. 6:53-57) Yaŵaŵecheteyi yasakalisye ŵandu ŵajinji mwamti ŵalesile kumkuya. Nambo ŵakulijiganya ŵakwe ŵakulupichika kupwatikapo Yohane nganamleka. Mwangakayichila jemanjaji ŵasimonjile mnope ni yaŵaŵechete Yesuyi mwamti nganayipikanichisyaga. Nambope nganaganisyaga kuti Yesu jwaŵechete yindu yakulemwecheka, myoyo nganatumbila. Mmalo mwakwe ŵakulupililaga kuti Yesu akusaŵecheta yisyesyene. (Yoh. 6:60, 66-69) Myoyo ngatukusosekwa kutumbila mwachitema ni yindu yaŵechete achimjetu. Mmalo mwakwe twapeje mpata kuti atusalile yakugopolela.—Mis. 18:13; Jwak. 7:9.

14. Ligongo chichi ngatukusosekwa kwaŵenga ŵane?

 ¹⁴ Yohane jwatulimbikasisye kuti tukaŵengaga abale ni alongo ŵetu. Naga tukulepela kutenda yeleyi nikuti mpaka yiŵe yangasawusya kuti Satana atusokonasye. (1 Yoh. 2:11; 3:15) Yeleyi ni yayatendechele Aklistu ŵane chakumbesi kwa yaka 100 yandanda. Satana jwatendekasyaga ŵandu ŵa Mlungu kuti aŵenganeje soni kugaŵikangana. Pandaŵi jele Yohane jwalembaga yikalata yakwe, ŵandu ŵaŵakwete nganisyo mpela sya Satanasi ŵaliji ali ajinjile mumpingo. Mwachisyasyo, Diyotilife ŵatendekasisye kuti ŵandu ŵa mumpingo wine agaŵikangane. (3 Yoh. 9, 10) Jwalakwe nganiŵachimbichisyaga achakulungwa ŵamumpingo ŵaŵatumidwaga ni likuga lyakulongolela. Jwalakwe jwayikanaga pakwatyosya mumpingo ŵandu ŵaŵapochelaga chenene abale ŵeleŵa. Ndamo jeleji jaliji jakusakala. Satana mpaka atutendekasyesoni kuti twaŵenjeje abale ni alongo ŵetu. Nambotu yeleyi mpaka yitugaŵikanganye.

15. Ana mitwe ja maŵasa jikusosekwa kukumbuchila chichi?

¹⁵ Litala limo lyele mtwe wa liŵasa ukusalosya kuti akusaliganichisya liŵasa lyakwe lili kulipatila yakusosechela ya lisiku ni lisiku. (1 Tim. 5:8) Nambope akusosekwa akumbuchileje kuti chakusosekwa mnope chili kulikamuchisya liŵasa lyawo kuti liŵe paunasi wambone ni Yehofa. (Mat. 5:3) Alole chisyasyo chaŵapeleche Yesu panganiji. Ngani syambone sya ŵalembile Yohane sikusasala kuti pandaŵi jele Yesu jwaliji pachitela chakulagachisya, jwalakwe jwaganichisyagape ya mamagwe. Yohane jwaliji yimpepe ni Maliya mamagwe Yesu, pandaŵi jele Yesujo jwawulajidwaga. Atamose kuti pandaŵiji Yesu jwapikanaga kupweteka mnope, nambope ŵamsalile Yohane kuti amsamalileje Maliya. (Yoh. 19:26, 27) Yesu ŵakwete achapwakwe soni achalumbugwe ŵele akamsamalilaga chenene Maliya. Nambope yikuwoneka kuti jemanjaji ŵaliji mkanaŵe kuŵa ŵakulijiganya ŵakwe. Myoyo Yesu jwasakaga kuti papagwe mundu jwine jwakuti ŵasamalileje mamagwe mwakuchilu soni mwausimu.

16. Ana Yohane jwakwete maudindo gapi?

¹⁶ Yohane jwakwete maudindo gejinji. Mwachisyasyo, jwalakwe jwaliji jwandumetume, myoyo jwasosekwaga kulipeleka pakukamula masengo gakulalichila. Kombolekasoni kuti jwaliji jwamlombele mwamti jwasosekwaga kulisamalila liŵasa lyakwe mwakuchilu soni  mwausimu. (1 Akoli. 9:5) Ana mitwe ja maŵasa jikulijiganya chichi pelepa?

17. Ligongo chichi mitwe ja maŵasa jikusosekwa kusamalila maŵasa gawo mwausimu?

¹⁷ Abale ŵali mitwe ja maŵasa mpaka akolesoni maudindo gane gekulungwakulungwa. Mwachisyasyo, akusasosekwa kulipeleka mnope pakukamula masengo kuti akomboleje kusamalila maŵasa gawo. (Aef. 6:5, 6; Tit. 2:9, 10) Jemanjaji mpaka akolesoni maudindo gane mumpingo mpela kutenda mawulendo ga ubusa soni kulongolela pamasengo gakulalichila. Konjechesya pelepa, akusasosekwa kulijiganya Baibulo ni achiŵamkwawo soni ŵanache ŵawo. Mwangakayichila ŵandu ŵamwiŵasa mwawo akusayamichila mnope masengo gakusatenda jemanjaji pakwakamuchisya mwakuchilu soni mwausimu.—Aef. 5:28, 29; 6:4.

18. Ana Yohane jwamanyililaga chichi?

¹⁸ Yohane ŵatemi ni umi kwandaŵi jelewu soni jwasimene ni yindu yejinji yakusangalasya. Jwalakwe ŵasimenesoni ni yakusawusya yejinji yayikajonasile chikulupi chakwe. Nambope jwapitilisye kukuya malamusi gaŵapeleche Yesu, mpela lilamusi lyakuti twanonyeleje abale ni alongo ŵetu. Yohane jwamanyililaga kuti Yehofa ni Yesu akusamnonyela soni kuti chachimpa machili kuti akombole kupilila yakusawusya yaŵasimanaga nayo. (Yoh. 14:15-17; 15:10; 1 Yoh. 4:16) Pangali chilichose chakatesile Satana soni ŵandu ŵali kumbali jakwe pakusaka kumlekasya Yohane kuti akanonyelaga ŵane.

19. Ana lilemba lya 1 Yohane 4:7, likutulimbikasya kutenda chichi?

¹⁹ M’wejisoni tukutama m’chilambo chakulamulilidwa ni Satana, jwakusiŵaŵengaga mnope ŵandu. (1 Yoh. 3:1, 10) Atamose kuti jwalakwe akusasaka kuti tuleche kwanonyela abale ni alongo ŵetu, nambope yeleyi nganiyiŵa yikomboleche naga ngatukumpa mpata. Kwende wosopewe tupitilisye kwanonyela abale ni alongo ŵetu. Mpaka tutende yeleyi kupitila mu yindu yatukusaŵecheta soni yatukusitwatendela jemanjaji. Patukwanonyela abale ŵetu yichitukamuchisya kuŵa ŵakusangalala patukumtumichila Yehofa soni tuchikola umi wambone.—Aŵalanje 1 Yohane 4:7.