1. Ga Mbori nyemuse nasa rani ani du wai?

GU MOKEDI nangia Yoane akepai ki ya, “Mbori nga nyemuse.” (1 Yo. 4:8) Gu taata afugo re natingida rani na pa gu bangua rengo nga: Mbori nga Mburu unga, na ko a nga Mburu nyemuse. Yekova ima kpinyemu rani! Gako nyemuse nasa rani ani du ni bandabanda rani, kidu na ngbarago, na kidu wenengai.

2. Ringbisihe kuti Matayo 22:37-40, gini abangua rugute ue duho, na tipagine duhe ti ni ti kura aregbo ni kpakarakpakaraha ka mangapai kuti gu uehe?

² AKristano du wa ka i yugu nyemuse. Mbiko si nga ndiko fuyo. (Oni gedi Matayo 22:37-40.) Ho ani aye ni ka ino Yekova wenengai, si ima rengba kadu taata furani ani mangipai kuti bambata bangua rugute. Si wo mbiko gupai nga Yekova ni rengberengbe ko. Ko naberãpa rani aberã na ko ni wene ko koyo du ani ni. Ono si ima rengba ka kpakara furani ani mangipai kuti ue bangua rugute. Tipagine? Bambiko awirinarani nga aguyo du dagba agu akuarani yo a Ziazia Kekeapai afura tipa yo ane re nga kpakpa aboro. Ti kura aregbo, i ima rengba ka pe gupai watadu ka manga gupai rengbe ka sarani ani bihe nga i aberãnga pa rani te na i akpinga nyemu rani a te. Yekova aima ino gupai nga si nika kpakara akpakara furani ani mangipai kuti gu rugute re, sidu, ko amangisunge na bete gu kura aboro nake akitabu nga ga Ziazia Kekeapai i yugu ndu gupai furani si aida ani yugu nyemuse ti ni fu akuarani na wai rengbe ani ka yugoho. Boro sa dagba agu aboro yo nake agu akitabu nga ga Ziazia Kekeapai re angia Yoane.—1 Yo. 3:11, 12.

3. Ginipai Yoane anyakasi paha?

³ Rogo agu apai yo Yoane akehe, ko anyakasi gupai nga aKristano du wa ka i yugu nyemuse. Rogo agu akitabu yo nga ga  Ziazia Kekeapai Yoane akehe nga gu nape pa agu apangbanga du tipa ga Yesu raka, ko amangisunge na gu fugo nga “nyemuse” bara dunguhe kisusi wai i amangisunge na ni rogo agu akitabu Matayo, Marako, na Ruka akehe. Garã Yoane adu wa sa kama ho ko ake gu Kitabu Wene Pangbanga ni nga ga Yoane gbiati gu gako awaraga biata ko akehe. Agu akitabu nga ga Ziazia Kekeapai re nayugo gupai furani nga, si naida mburu agu apai dunduko ani amangaha ru rii nyemuse. (1 Yo. 4:10, 11) Ono tie, si aima dia Yoane na gbanga regbo tipa ko ini gupai re.

4. Ya mo Yoane anaayugo nyemuse fu kura aboro ti aregbo dũ?

⁴ Ho Yoane adu ni ni paranga kumba, ko anaayugonga nyemuse ti aregbo dunduko te. Ni kpiapai, ti kura regbo sa, Yesu na gako abawiriki aandu nunguro ku Yerusarema yo i kini kuru vuru Somorona. Agu aboro naadu rogo kura wiri tooni gbaria sa Somorona yo aká ka dia yo kugume. Ginipai Yoane amangihe? Ko asanahe tipa we ye ngbangbaturũ yo na ki gbarasi agu aboro naadu rogo gu gbaria re dunduko! (Rk. 9:52-56) Ti kura regbo berewe, Yoane aayugongo nyemuse fu akurako amokedi te. Si nawira gupai nga ko gbiati wirinako nangia Yakoba asosodi nayo tipa ri ndu ka sana Yesu tipa ko fu nyanyakipa bangiriba fuyo rogo gako Kindo. Ho kura amokedi aini gupai ni aYoane na Yakoba amangihe, i aima zinga nikerehe! (Mt. 20:20, 21, 24) Ono wa Yoane avura manga agi aingahe re dunduko, Yesu aima kpinyemu ko.—Yo. 21:7.

5. Gini apai ani nika sakapai tipaha rogo gi kekeapai re?

⁵ Rogo gi kekeapai re, ani nika wisigopai tipa ga Yoane kpiapai gbiati gu kuraapai ko akehe tipa nyemuse. Wa ani nikaa wisigoho, ani nika wirika wai rengbe ani ka yugo nyemuse fu awirinarani. Ani nika wirikapai a tipa nyanyakipa gene nga gu rengbe bariikporo ka yugo gupai ngbaha nga ni ima kpinyemu gani aborokporo.

6. Wai du Yekova ayugu gako nyemuse tipa rani?

⁶ Ani ima rengba ka berã gupai nga, tipa ani kpinyemu aboro, gupai si aida ani mangihe gbua nga kaa berã wene aberãpai tipa yo watadu kaa peka wene apai fuyo. Ono ka ani kpinyemu yo nzunzu, si naida ani yuguhe ni manga ani wene apai fuyo. (Oni ringbisinga ha na Yakoba 2:17, 26.) Ni kpiapai, Yekova ima kpinyemu rani. (1 Yo. 4:19) Na ko nayugo gako nyemuse rogo gu wene afugoyo du ni kekehe rogo Ziazia Kekeapai. (Tam. 25:10; Rom. 8:38, 39) Ono ani ima inoho nga Mbori ima kpinyemu rani, angianga mbiko kina gupai ko  apehe sa ya, ono mbiko gupai ko amangaha a. Yoane akepai ki ya: “Gi i ayugu ga Mbori nyemuse tipa rani ti ni re, nga Mbori akedi bangisa Wiriko ku zegino, ani du ni ungarani mbiko ko.” (1 Yo. 4:9) Yekova ambu Wiriko ko naima kpinyemu gbe ko rungo na ki kpi tipa rani. (Yo. 3:16) Sidu, ani ima du na kido nga Yekova ima kpinyemu rani.

7. Ginipai Yesu amangihe tipa ka yugo gupai nga ko ima kpinyemu rani?

⁷ Yesu ape gupai fu gako abawiriki nga ko ima kpinyemu yo. (Yo. 13:1; 15:15) Ko ayugu bakio wai ko akpinyemu yo na wai ko nakpinyemu rani angianga kina rogo agu apai yo ko agumbaha ya ono rogo agu apai yo a ko amangihe. Yesu aya: “A nga boro sa du na bakere nyemuse susi gi nga, boro bagi kpioni tipa abadiangbani te.” (Yo. 15:13) Ho ani aberã ni kurii gupai aYekova na Yesu namangihe furani, si nasarani ani mangi ginipai?

8. Ginipai 1 Yoane 3:18 apehe nga ani mangihe?

⁸ Ani nayugo gupai nga ani ima kpinyemu aYekova na Yesu ni gia ani sangbayo. (Yo. 14:15; 1 Yo. 5:3) Na Yesu afu zinahe furani ani kpinyemu akuarani. (Yo. 13:34, 35) Si aidanga ani yugu nyemuse fu awirinarani kina rogo afugo yo sa te, ono si naida ani yuguhe ayugo a rogo agu apai yo ani amangaha. (Oni gedi 1 Yoane 3:18.) Gini apai rengbe ani ka mangaha ka yugo gupai nga ani ima kpinyemu yo?

9. Nyemuse afõngbadu Yoane yo ko mangi ginipai?

⁹ Yoane aima rengba ka nye fuo bako i naamanga marã ti gayo sunge baga atĩo. Ono kuba gure, ko amangisunge na yangada gako raka dunduko kaa undo aboro i wiriki rengo tipa aYekova na Yesu. Gu raka Yoane asiaha aadunga taata te. Ko aima mbu be arungosiro, na mbembedi kuti digido bambata sa kama agarã ho ko adu ni gbinza kumba, ko azubo kusayo rogo gako ringara. (Amo. 3:1; 4:1-3; 5:18; Yugo. 1:9) Ho Yoane adu ni bambukiso yo mbiko tungusapai tipa Yesu, ko aima yugo gupai nga ko ima kpinyemu aboro. Ni kpiapai, ho ko adu ni rogo gu kisanga nga Patemo, ko ake gu kitabu nga ga Yugoti na ki kedihe fu adungurati tipa i ini “agu apai nikamanga mbembedi.” (Yugo. 1:1) Si nawira wa fuo i kusi Yoane Patemo yo, ko ake Kitabu Wene Pangbanga tipa ga Yesu raka na gako sunge tungusapai. Ko ake awaraga biata a tipa ka ngarasa awirinako na ka nyakasa yo. Waigu rengbe mo ka wirika gu sino naadu ti Yoane nga ga futise ka manga ga Mbori pai?

10. Waigu rengbe mo ka yugo gupai nga mo ima kpinyemu aboro?

¹⁰ Mo rengbe ka yugo gupai nga mo ima kpinyemu aboro rogo gu gene yo mo asia ka mangapai ngbaha na gamo raka. Ga Satana zegino naida gupai nga mo naaberã kina pa tiro na kini asadi ka undo kina tiro, na mo asadi ka manga marã watadu kadu ni baworimo. Ono tie, aKristano rogo zegino dunduko nadia bakere regbo kuti tungusa wene pangbanga na kini undo aboro i mbedi na Yekova. Agu akurayo na rengba kaa mangasunge tungusapai na yugopai ti aregbo dũ.

11. Gini agene agu abatungusipai du ni ruruyo ayugo gayo nyemuse ngbaha tipa Yekova gbiati awirinayo?

¹¹ Dungu aKristano si aida i naamangasunge marã na aregbo dũ tipa ka ngerafuo tiyo gbiati gayo aborokporo. Wa vura duhe wo, agi abatungusipai du ni ruruyo re nasongoda ga Mbori riigbu rogo ai gu gene rengbe yo ka mangaha rogoho. Ni kpiapai, agu akurayo naundo ti regbo agberãngo, aguyo namangasunge meka arago nga ga Kindo, na aboro dunduko du na momu ka fu marã tipa si songodi gu sunge namanga rogo zegino dunduko. I namanga agi apai re mbiko gayo nyemuse tipa  Mbori gbiati kura aboro. Rogo aposo yo dunduko ni basasa, ani nayugo gupai nga ani ima kpinyemu awirinarani ni ndu ani kupati agu adunguratise nga ga dungurati na kini fu akaragapai baha yo. Ka si vura du vurũ nga ani na mbugo, ani nandu andu tipa agu adunguratise re. Ka ani vura du na gunde, ani nafu karagapai afu. Na wa vura duhe nga ani dunduko du na gaani akpakarapai ti ni, ani nangarasa akuarani mbata fu dunguratise na tifuoho. (Eb. 10:24, 25) Nairiwo gu tambuahe du ani na ni tipa gu sunge awirinarani amangaha!

12. Gini kura gene Yoane ayugu gako nyemuse ngbaha fu awirinako?

¹² Yoane ayugu gako nyemuse tipa awirinako angianga ni tambua ko kina tambua tambua yo sa ya ono ni fuko rugute fuyo a. Ni kpiapai, rogo agu awaraga yo Yoane akehe, ko atambua awirinako tipa gayo idapase na gayo wene asunge, ono ko aima fu nyanyaki rugute fuyo a tipa ingaapai. (1 Yo. 1:8–2:1, 13, 14) Wakina gure a, si naida ani tambua awirinarani tipa gu weneapai i amangaha. Ono ka boro tona kaa yugo gbegberẽ asino watadu kaa manga gupai naima rengba ka gbarasa gani pabakure na Yekova, ani ima rengba ka yugo nyemuse ni gumba ani gupai ngba wene gene fu ni nga gu si aida ni gihe. Wingbaduse du si aidaha tipa ka fu rugute fu bakurearani, ono Ziazia Kekeapai nape gupai nga ndikidi abakure nabeda tiyo dagbatiyo watadu nafu rugute dagbatiyo.—Snz. 27:17.

13. Ginipai si aidanga ani mangihe ya?

¹³ Ti kura aregbo, ani nayugo gaani nyemuse fu awirinarani rogo gupai yo ani amanganga ha ya. Ni kpiapai, ani azinganga ni ipo mbiko gupai i agumbaha te. Oni berẽnga kurii gupai naamangi ti regbo ga Yesu raka auru kpotosende. Ko ape gupai fu gako abawiriki nga tipa i gbia unga, si naida i ri pasio ko na ki mbiri kureko. (Yo. 6:53-57) Gu fugo ko agumbaha re aangbanga ti dungu ga Yesu abawiriki te, sidu, i kini mbu pekafuo ko. Ono ndikidi abakurea Yesu wa Yoane anye kindi na ko. I aagianga tiyo na gupai Yesu apehe te, na si nangera wa ngbayo aima zera be gupai re a. Ono tie, i aaberãnga gupai nga gupai ko apehe re adu ni irairaha na si ki sa gupai nga i koto te. Kuba gure, i aima kido kutiko mbiko i aima ino gupai nga ko aape rengo. (Yo. 6:60, 66-69) Si ni nyanyakipa pai furani ka ani kotonga ni ipo mbiko gupai abakurearani napehe ya! Kuba gure, si naida ani mbu yo i saki rogo gupai yo i napehe.—Snz. 18:13; Batu. 7:9.

14. Tipagine si aidanga ani mbu sogote ti ni si sono ngbaduraniyo ya?

 ¹⁴ Yoane angarasi rani a ka ani sogonga awirinarani ya. Ka ani amanganga pai kuti gu rugute re ya, Satana ima rengba kadu na maapai kurirani. (1 Yo. 2:11; 3:15) Gipai re aima manga gu kura agu aboro naaraki ti digido bambata kama agarã Fuo Batikayo Kristo. Ti gu regbo re, Satana aˈasadi nyanyaki ka sa ga Mbori amoyambu i sogo tiyo dagbatiyo na ki kparaka. Ti gu regbo Yoane ake gako awaraga, agu aboro nayugu ngbatunga gu toro du ti Satana aima rimo ku rogo dungurati. Ni kpiapai, Dioturepe akusi kere kparakaro rogo dungurati. (3 Yo. 9, 10) Ko anaayugo zanga irisa fu agu abaakumba riigbu bipasunge anaakeda yo. Ko aˈasadi a ka bafa agu aboro rogo dungurati kusayo nanaadia agu aboro kugume ko anaasoga yo. Gupai ko anaamangaha re aima gberã ni kerehe! Satana naasada kindi nyanyaki ka kparaka ga Mbori aboro areme. Ka ani ya mbunga sogote si kparaka rani na awirinarani ya.

15. Ginipai si aida bariikporo tingidihe?

¹⁵ Nyanyakipa gene sa bariikporo ayugo gupai ngbaha nga ni ima kpinyemu gani aborokporo nga, nifu ni agu ahe fu gani aborokporo si aidaha rogo raka yo. (1 Tim. 5:8) Ono tie, si naida ni tingidi gupai nga, si ni nyanyakipa pai fu ni ni undo gani aborokporo i du na wene pagume na Yekova. (Mt. 5:3) Oni berẽnga kurii gu wene kpiapai Yesu amoihe fu abariikporo. Gu kitabu nga ga Yoane nagumba gupai furani nga, ho Yesu aakpi ni ti ngbunduru ngua-rungosi, ko aaberãpa gako aborokporo kindi. Yoane aru na Maria nangia na Yesu pati gu ba i aaimo Yesu rogoho. Wa Yesu avura du vurũ rogo kere igirã, ko aya fu Yoane ko ngere fuo Maria. (Yo. 19:26, 27) Zanga kapa, awirina Yesu aduadu ti ni naaima rengba ka ngerafuo agu azingo nga ga borose nangia ga Maria, ono si nangera wa boro ho dagbayo yo naada ni gako bawiriki ti gu regbo re te. Yesu aaida ka bi gupai nga boro nika duadu ho nikaa ngerafuo Maria na kini ngarasi ri tipa ri naairiso Yekova kindi.

16. Gini asunge naadu be Yoane?

¹⁶ Yoane adu na dungu asunge beko. Ko angia mokedi, sidu, si aaida ko naamangasunge tungusapai kakaka. Si nawiraha a nga ko aima manga rogatise, sidu, si aaida ko ngerefuo gako aborokporo na agu ahe nga ga borose na kini undo yo i du na wene pagume na Mbori.  (1 Kor. 9:5) Ginipai agu abariikporo du areme awirikaha ti gupai re?

17. Waigu rengbe bariikporo ka yugo gupai nga ni ima kpinyemu gani aborokporo?

¹⁷ Gu wirina nga bariikporo ima rengba kadu na dungu nyanyakipa asunge be ni. Ni kpiapai, si naida ni mangisunge nyanyaki ho du ni ni basunge marã yo tipa gani mangaapai ye na taarimo fu Yekova. (Ef. 6:5, 6; Tito 2:9, 10) Na ni ima rengba kadu ni bakumba watadu moundo abaakumba na si kini idi gupai nga ni naandu kaa ngarasa awirina na kini ngbe kumbatayo fu gu badona nga ga tungusapai. Ti kina gu bangisa regbo re, si ni nyanyakipa pai fu ni tipa ni naawisigo Ziazia Kekeapai dedede na diani gbiati awirini. Gani aborokporo nika du na bakere tambuahe tipa agu apai dunduko ni amangaha tipa ka sa yo i du wenengai kidu na ngbarago, na tipa ka undo yo i naairiso Yekova kindi.—Ef. 5:28, 29; 6:4.

18. Yoane adu na kido tipa ginipai?

¹⁸ Yoane aima raka tipa dungu agarã na badungu weneapai naamangi rogo gako raka yo. Ko aima gbiatiko a na dungu akpakarapai nga gu naaima rengba ka rungburasi gako idapase. Ono ko anaandu kindi kumbatayo kaa giasangba ga Yesu arugute kodihe na gu rugute du tipa kpinyemu awirinako. Ni sangbana gipai re, Yoane aima du na gu kido nga aYekova na Yesu ima kpinyemu ko na i nika fu ome afu fuko ko dibe ai asada. (Yo. 14:15-17; 15:10; 1 Yo. 4:16) Satana gbiati gako zegino aarengbanga ka rugusa Yoane ti gupai nga ko kpinyemu awirinako na kini yuguhe rogo agu apai yo ko anaapehe na kini mangihe te.

19. Ginipai 1 Yoane 4:7 angarasa rani ani mangihe, na tipagine?

¹⁹ Wakina Yoane, ani naraka rogo gu zegino Satana azogaha, nga guko adunga na nyemuse tipa ai boro ya. (1 Yo. 3:1, 10) Wa vura duhe nga ko naasada ka sarani ani mbu kpinyemu akuarani, ka ko dunga na rengba ka mangaha te kina gu ka ani mbugene fuko ko mangihe wo. Ani dinga berã adia kaa kpinyemu awirinarani, na kini yugu gu nyemuse re rogo agu apai yo ani apehe na kini mangihe. Ho ani ayugo gu nyemuse re ni, ani nadu na gu ngbarago nga ga du ni papara agu aborokporo nga ga Yekova yo, na ani kidu na bakere ngbarago.—Oni gedi 1 Yoane 4:7.