1. Ngo ma nyuto ni mar tye manok adada i pol pa odi i kare-ni?

BAIBUL otito con ni i kare me agikki, dano “pe gibimaro dano wadgi.” (2 Tem. 3:1, 3) Watye ka neno cobbe pa lok pa lanebi meno i kare-ni. Me labolle, lunyodo mapol guketo nyomgi woko, dok pi meno gibedo ki kiniga i kingi dok lutinogi giwinyo ni pe kimarogi. Kadiwa jo me odi ma gibedo i ot acel pol kare nongo pe gingene i kingi. Laco mo ma tye lami tam i kom kwo me ot owaco ni, “Mego, wego, kacel ki lutino pe giloko i kingi, dok gitero cawa malac ka tic ki kompiutagi, tabulet, cim, nyo tuko tuko me vidio. Kadi bed ni jo me odi magi gibedo i ot acel, nongo pe gitye ki wat maber i kingi.”

2-3. (a) Ma lubbe ki Jo Roma 12:10, omyero wanyut mar pi angagi? (b) Gin ango ma wabinyamo i pwony man?

² Pe wamito ni warweny marwa woko calo dano mapol i lobo-ni. (Rom. 12:2) Me ka meno, wamito ni wadong mar pe pi jo me odiwa keken, ento bene pi luworo luwotwa. (Kwan Jo Roma 12:10.) Kodi mar ango ma kitye ka lok iye kany? Man obedo kodi mar ma tugo cwiny jo me odi me bedo lurem macok. Meno aye kodi mar ma omyero wadong pi omege ki lumege me kacokke. Ka wanyuto mar i kinwa, ci wakonyo me gwoko note ma pire tek adada i woro me ada.​—Mika 2:12.

³ Me konyowa me dongo ki nyuto mar, kong dong wanenu gin ma watwero pwonyo ki i labol mogo me Baibul.

4. I yo ma nining ma Nia 34:6 konyowa me niang tut pa mar pa Jehovah piwa?

⁴ Baibul tittiwa kit pa Jehovah. Me labolle, Baibul waco ni “Lubanga aye mar.” (1 Jon 4:8) Lok meno keken nyikowa cok bote. Ento Baibul bene owaco i kom Jehovah ni “marre ma pe lokke dwong.” (Kwan Nia 34:6.) Meno pud dong yo mamwonya adada me tito kit ma Jehovah marowa kwede!

5. Jehovah nyuto kica nining, dok watwero lubo lanenne nining?

⁵ Nen ni Nia 34: 6 loko i kom mar pa Jehovah kacel ki kite mukene ma bene nyikowa cok bote​—ma en aye kicane. (Yak. 5:11) Yo acel ma Jehovah nyuto kwede kicane botwa aye ki weko balwa. (Jab. 51:1) I Baibul, kica pe kwako weko bal keken. Kica obedo bene kit ma ngat moni winyo kwede ka en oneno dano tye ka deno can ci man otugo cwinye me temo konyo dano meno. Jehovah owaco ni miti ma en tye kwede me konyowa tek loyo mar ma mego bedo kwede i kom latinne. (Ic. 49:15) Ka watye ki peko, kica pa Jehovah tugo cwinye me konyowa. (Jab. 37:39; 1 Kor. 10:13) Watwero timo kica ki utmegiwa ka waweko balgi dok pe wamako lok i cwinywa ka gutimo gin mo ma ocwero cwinywa. (Ep. 4:32) Ento yo ma pire tek loyo ma watwero nyuto kwede kica aye me konyo omegiwa ka gitye i peko. Ka mar otugo cwinywa me nyuto kica bot jo mukene, nongo watye ka lubo lanen pa Jehovah, ma en aye ngat ma nyuto mar madwong loyo ducu.​—Ep. 5:1.

6. Yonacan ki Daudi gunyuto mar i kingi nining?

⁶ Baibul tye ki labol pa dano mapol ma gitye ki roc ma gunyuto mar. Kong wanenu labol pa Yonacan ki Daudi. Baibul tittiwa ni: “Yonacan omoko i kom Daudi matek macalo lareme, omarre macalo  kome kene.” (1 Cam. 18:1, NW) Kiwiro Daudi macalo kabaka me leyo kaka Caulo. I nge meno, Caulo obedo ka tute matek wek enek Daudi woko. Wod pa Caulo ma nyinge Yonacan pe ocwako wonne i tutene me neko Daudi. Yonacan ki Daudi gucikke i kingi ni gibibedo lurem dok gibikonye i kingi.​—1 Cam. 20:42.

7. Gin ango ma onongo twero gengo Yonacan ki mako lirem ki Daudi?

⁷ Tye me ur adada ni Yonacan ki Daudi gubedo lurem pien onongo tye jami mapol ma twero gengogi mako lirem. Me labolle, Yonacan onongo dit loyo Daudi ki mwaka 30 kulu. Yonacan onongo twero tamo ni pe etwero mako lirem ki ngat matidi dok ngecce nok kumeno. Ento Yonacan pe otamo kit meno. En onongo tye ki woro madit pi Daudi.

8. Pingo itamo ni Yonacan obedo larem maber adada bot Daudi?

⁸ Nyeko onongo twero mako Yonacan i kom Daudi. Macalo wod pa Kabaka Caulo, Yonacan onongo twero waco ni en aye etye ki twero me leyo ker pa wonne. (1 Cam. 20:31) Ento Yonacan onongo mwol dok lagen bot Jehovah. Pi meno, en omiyo cwakke ducu bot Daudi i kare ma Jehovah oyero Daudi me doko kabaka i anyim. En bene obedo lagen bot Daudi kadi bed ni man ocwero cwiny Caulo.​—1 Cam. 20:32-34.

9. Wangeyo nining ni nyeko onongo pe mako Yonacan i kom Daudi?

⁹ Kit macalo Yonacan onongo maro Daudi matek, nyeko pe omake i kome. Yonacan onongo cwinye tek dok olwenyo lweny mapol dok obedo ladiro adada i bayo atero. En ki wonne Caulo, onongo gingene adada pi bedo jo ma “ludwiro makato ocur, [dok] gubedo lutek kom makato labwor.” (2 Cam. 1:22, 23) Pi meno, Yonacan onongo twero wakke pi lweny madongo ma en olwenyo. Ento en pe otemme me nyuto ni eber eloyo Daudi dok nyeko pe omake i kom jami mabeco ma Daudi otimo. Me ka meno, en omaro Daudi pi tekcwiny ma en onyuto ki kit ma en onongo jenge i kom Jehovah. Me labolle, i kare ma Daudi oneko Goliac, Yonacan ocako maro Daudi matek adada. Watwero nyuto mar ma kit meno pi omegiwa ki lumegiwa nining?

10. Tyen lokke ngo ka Baibul owaco ni “myero wumarre kekenwu mada ki cwinywu ducu”?

¹⁰ Baibul waco ni, “myero wumarre kekenwu mada ki cwinywu ducu.” (1 Pet. 1:22) Jehovah aye oweko lanen maber loyo piwa. Marre piwa tye madwong adada ma oweko ka wabedo lugen bote ci pe tye gin mo keken ma bibalo wat meno. (Rom. 8:38, 39) Lok man ni “mada” nyuto ni ngat moni tye ka tute matek me nyuto mar. I kare mukene, wanongo ni pe yot me nyuto mar pi omegiwa ki lumegiwa. Ka gucwero cwinywa, omyero wamedde ki ‘diyo cwinywa i kom luwotwa ki mar. Waket tek me gwoko ribbe ma cwiny maleng omiyowa wek wabed acel i twec me kuc.’ (Ep. 4:1-3) Ka watute matek me gwoko “kuc,” pe wabiketo cwinywa i kom goro pa omegiwa. Wabitute matek me neno utmegiwa kit ma Jehovah nenogi kwede.​—1 Cam. 16:7; Jab. 130:3.

11. Pingo nyuto mar twero bedo tek kare mogo?

 ¹¹ Pe yot tutwal me nyuto mar bot omegiwa ki lumegiwa ka wangeyo gorogi. Man nen calo obedo ariya bot Lukricitayo mogo me cencwari me acel bene. Me labolle, Euodia ki Cintuke pe gubedo ki peko mo keken me tic “kacel [ki Paulo] pi lok me kwena maber.” Ento pi tyen lok mo, onongo ginongo tek adada me marre i kingi. Pi meno, Paulo ocuko cwinygi me “bedo ki cwiny acel i Rwot.”​—Pil. 4:2, 3.

12. Watwero dongo mar pi utmegiwa nining?

¹² Watwero nyuto mar pi omegiwa ki lumegiwa i kare-ni nining? Ka watute me ngeyo omegiwa ki lumegiwa maber ci twero doko yot botwa me niang kitgi ki nyutigi mar. Mwakagi ki tekwarogi pe myero ogengwa ki mako lirem kwedgi. Wi opo ni, Yonacan onongo dit loyo Daudi ki mwaka 30 kulu; ento en omako lirem kwede. Tika tye ngat mo i kacokkewu madit kati, nyo matidi loyi ma itwero mako lirem kwede? Ka itimo meno, ci ibinyuto ni ‘imaro utmegini.’​—1 Pet. 2:17.

13. Pingo pe watwero mako lirem macok ki jo ducu me kacokke?

¹³ Bedo ki mar pi luye luwotwa tika tyen lokke ni wabibedo cok ki jo ducu ma i kacokkewa? Pe, meno obedo gin ma pe twere. Pe rac me bedo ki wat macok ki jo mogo loyo jo mukene pien nongo mitiwa orwatte ki meggi. Yecu olwongo lukwenane ducu ni ‘lureme’ ento en onongo tye ki mar matek pi Jon. (Jon 13:23; 15:15; 20:2) Kadi bed kit meno, Yecu pe otero Jon calo en ber loyo jo mukene. Me labolle, i kare ma Jon ki ominne Yakobo gupenyo Yecu ni ominigi kabedo ma pire tek i Ker pa Lubanga, Yecu owaccigi ni: “Lok me bedo i kom bada ma lacuc nyo me lacam pe an aye apoko.” (Mar. 10:35-40) Calo Yecu, pe omyero water luremwa macok calo pigi tek loyo jo mukene. (Yak. 2: 3, 4) Ka watimo meno, ci pe wabikonyo kacokke me bedo ki kuc.​—Juda 17-19.

14. Ma lubbe ki Jo Pilipi 2:3, gin ango ma bikonyowa me gengo cwiny me pyem?

¹⁴ Ka wanyuto mar pi utmegiwa ci wagwoko kacokke ki i cwiny me pyem. Wi opo ni Yonacan pe otemme me pyem ki Daudi, kun nene macalo ngat ma omayo kerre. Wan ducu watwero lubo lanen pa Yonacan. Pe iwek nyeko omaki i kom utmegini pi kero ki dirogi, ‘ento dano acel acel myero owor lawote macalo ngat madit loye.’ (Kwan Jo Pilipi 2:3.) Wi opo ni wan ducu watwero timo gin mo me konyo kacokke. Ka wamedde ki bedo mwol, ci wabineno kit mabeco ma omegiwa ki lumegiwa gitye kwede dok wabinongo adwogi maber ki i lanengi me niye.​—1 Kor. 12:21-25.

15. Gin ango ma ipwonyo ki i gin mutimme i kom laminwa Tanya ki lupacone?

¹⁵ Ka gin mo marac otimme atura i kwowa, Jehovah konyowa kun tiyo ki marre ma pe lokke kacel ki kony ma wanongo ki bot omege ki lumege. Nen kong gin mutimme i kom jo me ot mo acel, i nge tyeko yub me Ceng Abicel i Gure Madit ma Kwako Lobe Mapol ma wiye tye ni “Mar Pe Gik!” ma obedo i mwaka 2019, i lobo Amerika. Laminwa mo acel ma nyinge Tanya ma tye ki lutino adek dok obedo tye i gure man owaco ni, “Onongo watye ka dwoyo mutoka me dok cen i otelwa, ci mutoka mukene wiye otang ci odonyo i nyim mutokawa ka oyokowa. Pe tye ngat mo ma onongo awano, ento gin mutimme man omyelo komwa adada ma oweko wakato woko ci  wacung i dye gudi. Ngat mo ma ocung i teng gudi olwongowa me cito i mutokane wek wanong gwok. Man kara onongo obedo omego mo ma bene oa ki i gure madit meno. Dok pe en keken aye ma ocung. Wele abic ma gua ki i lobo Sweden bene gucung. Lumege gugwako kora wan ki nyara ma man oweko wawinyo maber adada! Awaco ki omege ki lumege magi ni wan wabibedo maber kadi gin guciti, ento pe guye wekowa. Gubedo kacel kwedwa kadi wa i kare ma ludaktar ma gimiyo kony guo, dok guneno ni watye ki jami ducu ma wamito. I otyeno man marac-ci, waneno mar pa Jehovah. Gin mutimme man odongo marwa matek adada pi omegiwa ki lumegiwa dok ojingo marwa kacel ki pwocwa pi Jehovah.” Tika wi po i kom kare mo ma laye lawoti onyutti mar ma onongo itye i peko?

16. Tyen lok ango ma watye kwede me medde ki nyuto mar bot luwotwa?

¹⁶ Nen kong adwogi maber ma wanongo ka wanyuto mar pi luwotwa. Wacuko cwiny omegiwa ki lumegiwa i kare ma nongo gitye i peko. Wajingo note ma tye i kin jo pa Lubanga. Wanyuto bene ni wan lupwonnye pa Yecu dok man ywayo jo ma cwinygi atir me bino i woro me ada. Ma dong pire tek loyo ducu, wamiyo deyo bot Jehovah, “Won ma lakica, Lubanga ma kweyo cwiny dano ducu.” (2 Kor. 1:3) Dong walego ni wan ducu wamedde ki dongo ki nyuto mar!