1. Anini, samanay a mahapinang ita awaay ko olah no tamdaw?

PAIRASOLAY ko Fangcalay Cudad itini salikoray a romiˈad, ‘awaay ko olah’ no tamdaw. (2 Timoti 3:1, 3) Anini, mahapinangay ita matatodongay koniya sapairasol. Tinakoen, adihayay raramod malalikongay a maliwasak, malalaˈisay ko raramod, cowa ka matinako no wawa ko olah no wama wina. Adihayay paro no lomaˈ hato ngaˈayay nengnengen, kawra malaliyasay ko kalalaˈed no paro no lomaˈ. O cecay talicayan no paro no lomaˈ sanay: “O wama, wina ato wawa cowa ka masasowal, o sangaˈayay a widang nangra o tingnaw, pipan, soci anca tasalamaan.” Soˈlin malacafayay ko kitiraan, kawra hato kafahalanto a tamdaw sanay.

2-3. (1) Sowal i Loma 12:10, o cima ko papaihkalen ita to damsayay? (2) Oniya lalakaw mamilengo to maanan?

² Cowa ka ciharateng kita o mamadenga noniya awaay ko olah a hekal. (Loma 12:2) Mihaenay o mamaolah kita to paro no lomaˈ, maolah to salikaka, paihkal to damsayay cangraanan. (ˈOsien ko Loma 12:10.) O manan ko damsayay? Oniya sowal, mikiriwiˈay sakadademaken i kalalaˈed no lomaˈ a dihkoay a olah. O salikaka o paro no lomaˈ ita, mihaenay pairaen ita ko mahaenay tangongolay a olah cangraanan. Paihkal kita to damsayay, wa ngaˈayto makedec a malacecay midoko ci Yihofaan.—Mika 2:12.

³ Nengnengen ita ko tinakoan no Fangcalay Cudad, miharateng to sasamaan kita minanam cangraanan, palahad ato paihkal to damsayay.

4. Mikitini pitadtad no Yakop 5:11, mahapinangay ita hakowaay ko tangongol no olah ni Yihofa kitaanan?

⁴ Mikitini Fangcalay Cudad ngaˈayay mahapinang ita, adihayay ko makapahay capeling ni Yihofa, tinakoen sanay ko Fangcalay Cudad “o olah ko Kawas.” (1 Yohani 4:8) Mafanaˈ to mahaenay a Kawas ci Yihofa sapiingidaw kita Cingraanan. Roma i, somowalayho ko Fangcalay Cudad ‘matomesay to damsayay’ ci Yihofa. (ˈOsien ko Yakop 5:11.) Oniya sowal padihkoay to falocoˈ, mahapinangay ita tangongolay ko olah ni Yihofa kitaanan.

5. Samaanay ci Yihofa paihkal to siniˈaday a falocoˈ? Wa ngaˈay kita samaan mitodong Cingraanan?

⁵ Sinanoten ko Yakop 5:11 sinael palalitingan ko damsayay ni Yihofa to roma kasemeran a capeling, o siniˈadaay a falocoˈ. (Kasadakan 34:6) O cecay pakayraan ni Yihofa siniˈada kitaanan i, misododay to raraw ita. (ˈOlic 51:1) Itini Fangcalay Cudad, o siniˈadaay cowa ko pisodod aca, mahawpay ano maˈaraw ita misemsem ko tao, mifekaday i falocoˈ ko ciˈicelay a olah, makalimay sapadamaaw to tao. Sowal ni Yihofa, o olah Ningra kitaanan mikikakaay to olah no wina to wawa. (Isaya 49:15) Siniˈadaay ci Yihofa kitaanan, mansa ano misemsem kita i, makalimay sapadamaaw kitaanan. (ˈOlic 37:39; 1 Korinto 10:13) Malecaday, ira ko siniˈadaay falocoˈ ita to salikaka, wa misodod cangraanan, ano pakararaw cangra kitaanan i, cowa ko a ˈinteh ko falocoˈ ita. (Ifiso 4:32) Roma i, paihkal to siniˈada kalimlaan a pakayraan i, padama to salikaka miremo to pasangaray. Pakayni paihkal to damsayay o saˈakawangay a taˈarawan, mikitini i kaolah ita a siniˈada to tao, o mitodongay ci Yihofaan.—Ifiso 5:1.

6. Ci Yonatan aci Tafiti samaanay tano damsayay a macacada?

⁶ Mikitini i Fangcalay Cudad, wa ngaˈay mahapinang cowa ka lefot a tamdaw wa ngaˈay paihkal to damsayay. Ci Yonatan aci Tafiti o  ngaˈayay a tinakoan. Sowal no Fangcalay Cudad: “Ci Yonatan aci Tafiti malo ngaˈayay a widang, maolahay ci Yonatan ci Tafitian malecaday ko kaolah to niyah.” (1 Samuil 18:1) Manilnilay no Kawas ci Tafiti mala midotocay a hogti. Ikor, tada ˈintehay ci Sawlo ci Tafitian, mihalakaay sapipatayaw cingraanan. Kawra wawa ni Sawlo ci Yonatan cowa pikapot to wamaan. Makaketonay ci Yonatan aci Tafiti madadama, caay pihai to manan a demakan mipalak to kalawidang nangra.—1 Samuil 20:42.

7. O maanan a lalangian ngangaˈay micara ci Yonatanan aci Tafitian a mala ngaˈayay widang?

⁷ Haratengen ita iraay ko manan a lalangian to mamicara toniya kalawidang, mamatongal mahapinag tano damsayay macacada ci Yonatan aci Tafiti tada kalimlaanto. Cecay lalangian i, ikakaay ko mihecaan ni Yonatan ci Tafitian to 30 miheca. Ano o tao i, mahaen ko harateng nangra alatek: Oniya pakalongay kaemangayho, awaay ko nalifetan, wa samaan kako malawidang cingraanan hani? Cowa pihaen ci Yonatan miharateng, misakahmaw ci Tafitian.

8. Miharateng kiso ci Yonatan hano malo ngaˈayay widang ni Tafiti?

⁸ Roma i, iraay ko lalangian ni Yonatan a maˈinap ci Tafitian. O wawa no hongti ci Sawlo cingra, na ngangaˈay misaˈosi to citatodongay ko niyah midotoc a mala hongti. (1 Samuil 20:31) Kawra misapoeneray ci Yonatan, madimadiayho ci Yihofaan, mansa misarocod cingra midama to misaˈosian ni Yihofa, midopo ci Tafitian mala midotocay a hongti. Madimadiay ci Yonatan ci Tafitian, soˈlin mangolaw ko wama, cowa pifalah to widang noniyah.—1 Samuil 20:32-34.

9. Minengneng ci Yonatan ci Tafitian o sakalalifet noniyah sanay han? Tadtaden.

⁹ Matomesay ko damsayay ni Yonatan ci Tafitian, mansa cowa ka sakalalifet saan ko pinengneng ci Tafitian. O idahiyay a mipanaˈ ci Yonatan, o timoloay a sofitay. Pakahemekay ko tamdaw cingraanan ato wama ci Sawloan, saan: ‘Mikikakaay to lidep ko kaliki, mikikakaay ko timolo to layong.’ (2 Samuil 1:22, 23) Mihaenay na mamaliko ci Yonatan to katimolo no niyah. Kawra cowa pisatakalaw cingra, cowa ka maˈinap to malaˈosiay ni Tafiti a demak. Masafelitay, tada masemeray ci Yonatan to timolo ato pakasoˈlin ni Tafiti ci Yihofaan. Soˈlinay i, itiniay ikor no patayen ni Tafiti ci Koliyat, itiyaay tangongol ko kaolah ni Yonatan ci Tafitian. Wa ngaˈay kita samaan paihkal to mahaenay a damsayay i salikaka hani?

10. ‘Mikitini falocoˈ fanefek a masasiolah’ o manan ko tatodong?

¹⁰ Sowal no Fangcalay Cudad, ‘wa mikitini falocoˈ fanekfek a masasiolah’ kita. (1 Pitiro 1:22) Toniya pakayraan, patirengay ci Yihofa to sangaˈayay taˈarawan ita. Tada fanekfekay ko olah kitaanan, mihaenay ano madimadi kita Cingraanan, awaay ko manan mamiconged to olah Ningra kitaanan. (Loma 8:38, 39) Mihongyakan itini a “fanekfek” a Hipray sowal, o “macowat tahatolas” sanay ko tatodong. Latekay, misaaliay kita mihadak to taˈangayay ˈicel ngaˈ, paihkal to damsayay i salikaka. O sasowalen ato midemakan no tao, cowa pakahemek kitaanan, wa ‘tano olah a masasisodod, pakayni rihadayay a kakelec, misarocod a mitadiˈec i fangcalay saocor a malacecay.’ (Ifiso 4:1-3) Ano misaˈicel kita midama to kakelec no kasakopang, cowato ko mamisamacay to dangoc to salikaka. Wa misaˈicel kita tano pinengneng ni Yihofa a minengneng to salikaka.—1 Samuil 16:7; ˈOlic 130:3.

11. Sapaihkalaw to damsayay hano cowa ko madoloay no latekay?

 ¹¹ Latekay, paihkal to damsayay i salikaka cowa ko madoloay, mangalef ano mafanaˈay kita to dangoc nangra i, tada pasangaray. Itini sakacecay hahekalan a Krisciyang iraay ko mahaenay pasangaray. Ci Iuotia aci Sintiki malacafayay ci Pawloan milasil to ngaˈayay lihaf i, awaay ko pasangaray nengnengen. Kawra pakayni maanan a lalangian, cowa ka langaˈay cangra, mansa palimoˈotan ni Pawlo cangra ‘ka malacecay ko harateng a matayal saki tapang.’—Filipi 4:2, 3.

12. Wa samaan kita palahad to damsayay i salikaka hani?

¹² Anini, sasamaan palahad to damsayay i salikaka hani? Matongal to kafanaˈan ita to salikaka, wa madoloto a cipinang cangraanan, wa madoloto palahad to tangongolay olah cangraanan. Soˈlin caka hecad ko mihecaan ato lalengawan, wa ngaˈay mala ngaˈayay widang. Haratengen, o mihecaan ni Yonatan ikakaay ci Tafitian to 30 miheca, kawra patirengay cangra to ngaˈayay kalawidang. Wa ngaˈay kiso talaˈayaw ciharateng to coka hecad ko mihecaan a tamdaw itini kasakopang han? Mihaen ko demak iso, paihkalay kiso to soˈlinay ‘maolah to polong no kasacefang a salikaka.’—1 Pitiro 2:17.

13. Latekay hano mikiriwiˈ ko piingid ita to roma salikaka hani?

¹³ Tano damsayay ko picada ita to salikaka, tatodong noniya sowal mahecaday ko kaolah ita to kahacecay a tamdaw han? Cowa ka hatira, mikiriwiˈay kita miingid toyanan a mahecaday ko nanaman a salikaka coko mararaway koni. Sowal ni Yis sahtoay o “widang” ningra ko tarokos, kawra mikiriwiˈay ko olah ningra ci Yohanian. (Yohani 13:23; 15:15; 20:2) Soˈlin mahaen, cowa ka pisakakinih ko falocoˈ ni Yis, cowa ka pikiriwiˈ a maolah ci Yohanian. Tinakoen, tiya micangacang ci Yohani ato salikaka ningra ci Yakop ci Yisan itini Hongti Kitakit no Kawas, pafeli cangranan to kalimlaan a saˈaroan i, sowal ni Yis: ‘Maroˈ i kawanan ako ato kawili ako, cowa ko kako ko misaˈosiay.’ (Marko 10:35-40) Mitodong kita ci Yisan, coka ngaˈay misakakinih to widang no  niyah, mihaen ko demak wa paira to maliwasakay, o hatiniay a demak coka kangaˈay mifekad itini kasakopang no Krisciyang.—Yakop 2:3, 4; Yuta 17-19.

14. Sowal itini Filipi 2:3, o manan ko papadama kitaanan miliyas to malalifetay a harateng?

¹⁴ Tano damsayay kita macacada, cowa ko mamikidat to malalifetay a harateng itini kasakopang. Masowalay i fafekang, minengneng ci Yonatan ci Tafitian cowa ko sakalalifet a tamdaw, cowa ka laˈafas to saaroˈan no hongti. Oha maminanam kita to ngaˈayay taˈarawan ni Yonatan. Soˈlin ira ko inaneng no malacafayay kitanan matayal a salikaka, o pinengneng ita cangraanan aka o sakalalifet han ko pinengneng. ‘Pairaen ita ko misapoeneray, minengneng to tao ikakaay to niyah han ko harateng.’ (ˈOsien ko Filipi 2:3.) Haratengen, o kahacecay a tamdaw iraay ko sapadama i kasakopang. Misapoener ko falocoˈ ita, aka misatakalaw miharateng, wa maˈaraw ko kangaˈayen no salikaka, wa ngaˈay minanam to madimadiay taˈarawan nangra.—1 Korinto 12:21-25.

15. Mikitini nalifetan no paro no lomaˈ ni Taniya mananam ita ko maanan?

¹⁵ Ano tahalifa kita to cowa ka harateng a sapalifet i, pakaynien ni Yihofa i salikaka padama ato mihinom kitaanan, paihkal to damsayay. Nengnengen ita ko laenoay tinakoan. Miˈorongay ko fafahiyan salikaka ci Taniya to tatoloay a wawa mirienang to taykay itini Padaka 2019 miheca “Midaˈocay ko Olah” sanay a Koksay Taykay. Mahererek ko pieneman a kamok i, parakatay cangra to paliding minokay tayra i liwkang tahalifaay to latiih. Milomal ko salikaka ci Taniya toya pakayraan sanay: “Iraay ko cecay paliding fahal sanay  misongtol to paliding niyam, kao awaay ko madokaˈay. Mahadak kami i paliding tomireng i lawac no lalan, tada macekiday kami. Itiniya iraay ko cecay a tamdaw patelepay to paliding i lawac no lalan, miwangawangay tamiyanan, mitaaw tamiyanan tayra. O salikaka niyam cingra, liyas sanayho to pitaykayan. Kawra, ya patelepay to paliding coko cingra aca, iraayho ko lalima naitiniay i Reitin, taykay no taypiyaw. Mikelecay a mitakec takowanan ato fafahiyan a wawa ako, o misaalian niyam a sapadama koni itiya. Pasowalan ako cangra coka mamaan kami, kawra kamayan a materek cangra. Irato ko ising i, pacafayho cangra i tatihi niyam, mihapinang to masongilaˈay kami a midimokos. Itini toniya mifekaday a demak, padotocay matinako ako ko olah ni Yihofa, itini toniya malifetay matongalay ko olah ako to salikaka, matongalay ko olah ato piakoˈid to Kawas ci Yihofaan.” Maharatengayho iso ko salikaka na padamaay kisowanan itini tahapades kiso, paihkal to damsayay han?

16. Tano damsayay kita macacada wa paira to masamaanay makapahay a minaroˈan?

¹⁶ Haratengen, tano damsayay kita macacada wa paira to makapahay a minaroˈan. Wa ngaˈay kita mihinom to misaaliay to sadama a salikaka. Wa ngaˈay kita micowat to kakelec no kasakopang. Wa ngaˈayho kita misawacay to nisawawaan ni Yis koniyah, misolot to maolahay to kimad a tamdaw midoko ci Yihofaan. Sakakaay i, wa ngaˈay paˈdil kita ci Yihofaan, o “siniˈadaay to tamdaw a Wama Cingra, o pafeliay to kihecod sahinom a Kawas.” Nanay kita o cecacecay a tamdaw padadotoc palahad to tangongolay a olah to salikaka, paihkal cangranan to damsayay.—2 Korinto 1:3.