1. Aha do na patuduhon na so marsihaholongan be akka halak saonari on?

NUNGNGA dipaboa hian di Bibel, “dang marroha holong” be akka halak na di portibi on. (2 Tim. 3:1, 3) Jala boi do taida i masa saonari on. Uppamana, marjuta keluarga na sursar alani marsirang. Marbadai ma natua-tuana jala dang dihaholongi be gellengna. Haru keluarga na tinggal sajabu pe boi do dang akrab. Sahalak penasehat keluarga mandok, “Sibuk do bapakna, omakna, dohot gellengna mangulahon ulaonna be. Sibuk do nasida markomputer, mamakke tablet, martelepon, jala marvideo game. Nang pe nasida tinggal sajabu, hira na so marsitandaan do nasida.”

2-3. (a) Sesuai tu Rom 12:10, ise do na ikkon tahaholongi? (b) Aha do na lao taulas di artikel on?

² Unang ma hita songon halak na di portibi on na so patuduhon holong. (Rom 12:2) Ikkon berupaya do hita patuduhon holong, dang holan tu anggota keluargatta, alai dohot do tu sude dongan sahaporseaon. (Jaha Rom 12:10.) Holong na songon dia do na ikkon tapatudu tu dongan sahaporseaon? Holong songon na tapatudu tu anggota keluargatta na mambahen hita gabe akrab. Molo songon i do caratta makkaholongi akka dongan gabe marsada ma hita lao manomba Jahowa.​—Mik. 2:12.

³ Taparsiajari ma di artikel on piga-piga contoh na sian Bibel lao mangurupi hita patuduhon holong.

4. Aha do na boi taboto taringot Jahowa sian 2 Musa 34:6?

⁴ Dipaboa do di Bibel akka parange ni Jahowa na massai  denggan. Uppamana, didok do “holong do Debata”. (1 Joh. 4:8) Alani holongna i, gabe lomo ma rohatta jonok tu Ibana. Didok do muse di Bibel “gok holong ni roha” do Jahowa. (Jaha 2 Musa 34:6.) On patuduhon massai dihaholongi Debata do hita.

5. Songon dia do Jahowa patuduhon asi ni roha, jala songon dia do hita boi maniru Ibana?

⁵ Adong dope parange ni Jahowa na boi mambahen hita jonok tu Ibana. Di 2 Musa 34:6, holong ni Debata dihaitton do tu asi ni rohana. (Jak. 5:11) Sada cara ni Jahowa lao patuduhon asi ni rohana, i ma manalpuhon hasalaatta. (Ps. 51:1) Di Bibel, asi ni roha i dang sekedar manalpuhon hasalaan. Asi ni roha, i ma pakkilalaan na tubu di roha ni sasahalak tikki diida ibana adong halak na susa. Jala pakkilalaan on ma na mangonjar rohana lao mangurupi. Dipaboa do muse di Bibel, dao do umbalga pakkilalaan ni Jahowa lao mangurupi hita sian pakkilalaan ni sahalak ina lao mangurupi anakna. (Jes. 49:15) Jadi tikki susa hita, asi ni roha ni Jahowa i ma na mangonjar rohana lao mangurupi hita. (Ps. 37:39; 1 Kor. 10:13) Hita pe boi do patuduhon asi ni roha tu akka dongan, molo tasalpuhon hasalaan ni nasida jala dang mangingot-ingot aha na mambahen haccit rohatta. (Eps. 4:32) Alai cara na uppetting lao patuduhon asi ni roha tu akka dongan, i ma mangurupi nasida di tikki susa. Jadi holong do na mangonjar rohatta lao patuduhon asi ni roha tu na asing. Molo taulahon i na tatiru do Jahowa, ai Ibana do sitiruon na dumenggan lao patuduhon holong.​—Eps. 5:1.

6. Songon dia do si Jonatan dohot si Daud patuduhon na marsihaholongan nasida?

⁶ Jolma na so sempurna pe boi do patuduhon holong tu na asing. Adong do contohna di Bibel, songon si Jonatan dohot si Daud. Bibel mandok, “Gabe holong ma rohana tu si Daud. Dihaholongi  si Jonatan do si Daud dos songon makkaholongi dirina. Jala gabe marale-ale ma nasida.” (1 Sam. 18:1) Nungnga dipillit be si Daud lao manggattihon si Saul gabe raja. Dukkon i, gabe muruk hian ma si Saul, jala naeng dipamate ma si Daud. Alai dang setuju si Jonatan, anak ni si Saul i, lao pamatehon si Daud. Marjanji do si Jonatan dohot si Daud, na toktong do nasida marale-ale jala marsiurupan.​—1 Sam. 20:42.

7. Aha do na boi mangabbati si Jonatan marale-ale tu si Daud?

⁷ Massai balga do holong ni si Jonatan dohot si Daud. Alana toktong do nasida marale-ale nang pe adong na mangabbati. Uppamana, hira-hira 30 taon ma uttua umur ni si Jonatan sian si Daud. Boi do ro tu roha ni si Jonatan dang cocok si Daud gabe ale-alena, ala upposo do si Daud jala otik dope pengalamanna. Alai dang songon i pandangan ni si Jonatan tu si Daud. Sangap do ibana dibahen si Jonatan.

8. Boasa boi tadok ale-ale na burju do si Jonatan?

⁸ Boi do sebenarna cemburu si Jonatan tu si Daud. Ala ibana do anak ni Raja Saul, jadi boi do dohononna ibana do na ikkon manggattihon bapakna gabe raja. (1 Sam. 20:31) Alai serep do roha ni si Jonatan, jala setia do ibana tu Jahowa. Didukung ibana do keputusan ni Jahowa na mamillit si Daud gabe raja. Setia do ibana tu si Daud, nang pe gabe muruk si Saul alani i.​—1 Sam. 20:32-34.

9. Sian dia do taboto na so dianggap si Jonatan si Daud sainganna?

⁹ Ala dihaholongi si Jonatan do si Daud, dang dianggap ibana gabe saingan si Daud i. Pemanah na malo do si Jonatan, jala sahalak tentara na barani. Ditanda halak do si Jonatan dohot bapakna si Saul, ‘ukkatop sian lali’ jala ‘umgogo sian singa’. (2 Sam. 1:22, 23) Alani i, boi do sebenarna dianggarhon si Jonatan sudena i. Alai dang olo si Jonatan bersaing manang cemburu tu si Daud. Gariada longang do roha ni si Jonatan mangida habaranion ni si Daud dohot pos ni rohana tu Jahowa. Dung dipamate si Daud si Goliat, gabe dihaholongi si Jonatan ma si Daud, dos songon dirina. Saonari songon dia do hita boi patuduhon holong sisongon i tu akka donganta?

10. Aha do lapatanna ‘marsihaholongan sian nasa roha’?

¹⁰ Bibel mandok “marsihaholongan ma hamu sian nasa roha”. (1 Ptr. 1:22) Jahowa do sitiruon di hita. Massai holong do rohana tu hita. Alani i, molo setia hita tu Ibana “dang adong na boi manirang hita sian holong ni Debata”. (Rom 8:38, 39) Lapatan ni hata “sian nasa roha” di bahasa Junani, i ma marsitutu patuduhon holong. Alai sipata dang mura patuduhon holong tu akka dongan. Alani i, tikki adong na mambahen haccit rohatta, porlu do hita ‘marsihaholongan asa boi sabar tu na asing. Toktong marsada jala mardame ala ditogu-togu tondi parbadia’. (Eps. 4:1-3) Molo berupaya hita mardame dohot akka dongan, dang gabe hasalaan ni nasida be na taida. Ai songon i do cara ni Jahowa mangida hita, jadi tatiru ma Ibana.​—1 Sam. 16:7; Ps. 130:3.

11. Boasa maol patuduhon holong tu akka dongan?

¹¹ Dang sai mura patuduhon holong  tu akka donganta. Tarlumobi tikki taida adong na hurang denggan sian nasida. On do na hea masa tu halak Kristen di abad na parjolo. Uppamana, songon si Euodia dohot si Sintike. Semangat do nasida mangurupi si Paulus di ulaon marbarita. Alai hea do nasida marsoal. Alani i, dijujui si Paulus ma “asa marsada ni roha nasida marhobas tu Tuhan” i.​—Plp. 4:2, 3.

12. Boha do carana asa lam bagas holongta tu akka dongan?

¹² Boha do carana asa lam bagas holongta tu akka dongan? Molo lam tatanda dongan sahaporseaotta, boi ma taattusi pakkilalaan ni nasida. Gabe tapatudu ma holongta tu nasida. Boi do hita marale-ale tu nasida, nang pe uttua manang upposo nasida sian hita. Jala nang pe dang sarupa latar belakangta. Taingot ma uttua do si Jonatan hira-hira 30 taon sian si Daud, alai marale-ale do nasida. Jadi, adong do dongan di huria na uttua manang na upposo sian hamu na boi gabe ale-alemuna? Molo berupaya hita marale-ale dohot akka donganta, tarida ma na tahaholongi do nasida.​—1 Ptr. 2:17.

13. Boasa gabe ukkompak hita tu piga-piga dongan di huria?

¹³ Memang ikkon tahaholongi do akka donganta. Alai dang berarti ikkon kompak hian hita tu sude dongan di huria. Olo do ra unjonok hita tu piga-piga dongan di huria, ala sarupa lomo ni rohatta. Ai Jesus sandiri pe, didok ibana do sude apostelna ‘ale-alena’. Alai unjonok do ibana tu si Johannes. (Joh. 13:23; 15:15; 20:2) Nang pe songon i, dang dibahen ibana lebih istimewa si Johannes sian na asing. Uppamana, tikki dipangido si Johannes dohot si Jakobus asa istimewa nasida dibahen di Harajaon ni Debata, didok Jesus do, “Dang au na manottuhon ise na lao hundul di sabola kananku manang di sabola kirikku.” (Mrk. 10:35-40) Alani i tatiru ma Jesus, unang ma tabahen akka dongan na kompak tu hita lebih istimewa sian akka dongan na asing. (Jak. 2: 3, 4) Alana boi do i mambahen huria dang marsada.​—Jud. 17-19.

14. Sesuai tu Pilippi 2:3, aha do na mangurupi hita asa unang tabahen diritta undenggan sian na asing?

¹⁴ Molo tahaholongi sude dongan di huria, unang ma adong semangat bersaing di hita. Si Jonatan dang cemburu tu si Daud. Jala dang dilului ibana cara, asa ibana gabe raja. Hita pe boi do maniru si Jonatan. Unang ma taanggap akka dongan sahaporseaotta na ummalo sian hita gabe saingan. ‘Alai toruk ma rohatta, jala sangap ma tabahen tu na asing.’ (Jaha Pilippi 2:3.) Taingot ma songon dia pe kemampuanta, mararga do hita sude di huria. Molo serep rohatta, boi ma taida akka parange na denggan sian akka donganta. Jala tatiru ma akka na denggan sian nasida.​—1 Kor. 12:21-25.

15. Aha do na boi diparsiajari hamu sian pengalaman ni si Tanya dohot keluargana?

¹⁵ Tikki toppu masa sitaonon tu hita boi do tahilala na diapuli Jahowa hita, marhite holong dohot bantuan na dilehon akka donganta. Taida ma aha na masa tu si Tanya dohot tolu gellengna. Dohot do nasida tu Kebaktian Internasional di Amerika Serikat taon 2019 “Ndang Olo Salpu Holong i”. Di ari Sabtu di pardalanan mulak tu hotel sian kebaktian i, ditabrak ma mobil ni nasida. Didok si Tanya ma, “Adong ma mobil na toppu ro tu jalurnami. Ditabrak ma mobilnami. Memang dang adong hami na lukka, alai hitir-hitir ma hami sude. Kaluar ma hami sian mobil jala jongjong di pinggir dalan. Adong ma na manggora hami jala manogihon hami asa masuk tu  mobilna. Hape dongan sahaporseaon do ibana, na baru mulak sian kebaktian i. Jala adong do muse lima delegasi na sian Swedia na so lao mangida hami. Ro ma akka donganta borua makkaol au dohot borukku. Gabe tenang ma dihilala hami. Hudokkon ma tu nasida asa unang pola dipaima hami. Alai dang olo nasida maninggalhon hami. Toktong do didongani nasida hami sappe ro petugas rumah sakit. Jala dipastihon nasida do, adong sude na dihaporluhon hami. Sian i diboto hami ma, na holong situtu do roha ni Jahowa tu hami. Pengalaman on mambahen hami lam makkaholongi dongan dohot Jahowa.” Molo hamu, adong do pengalamanmuna diurupi akka dongan?

16. Boasa ikkon toktong tapatudu holong tu akka dongan?

¹⁶ Parrohahon ma hasilna molo marsihaholongan hita sude. Boi ma tarapul akka donganta tikki mangadopi hasusaan. Lam marsada ma akka naposo ni Debata. Molo marsihaholongan hita, tarida ma na tutu hita sisean ni Jesus. Jala on boi mambahen akka halak na serep roha tertarik manomba Jahowa. Alai na paling penting, molo taulahon i tapuji ma Debata “Ama parasi roha, na lambok, jala Debata Sipangapul na sumurung”. (2 Kor. 1:3) Jadi sai anggiat ma hita sude torus berupaya pabagasson holongta tu akka dongan!