1. Ano an nagpaparisa na nawawaran na nin pagkamuot sa mga kapamilya an mga tawo ngunyan?

IHINULA kan Bibliya na sa huring mga aldaw, an mga tawo mawawaran nin “pagkamuot sa mga kapamilya.” (2 Tim. 3:1, 3) Nahihiling ta nang nauutob ngunyan an propesiyang ini. Halimbawa, minilyon na mga mag-agom an nagdidiborsiyo na nagreresulta sa kaanggutan sa lambang saro asin namamatian kan mga aki na dai sinda namumutan. Dawa an mga pamilya na magkairibanan sa sarong harong puwedeng magin garo dai magkabiristo. Sinabi nin sarong family counselor: “An ina, ama, saka an mga aki disconnected sa lambang saro pero connected sa kompyuter, tablet, smartphone, o video game console. Dawa ngani nakaistar an pamilya sa sarong harong, haros dai ninda midbid an lambang saro.”

2-3. (a) Sigun sa Roma 12:10, sairisay an dapat tang pahilingan nin mamumuton na pagpadangat? (b) Ano an pag-uulayan ta sa artikulong ini?

² Habo tang magin arog kan bakong mamumuton na mga tawo sa kinaban na ini. (Roma 12:2) Imbes, kaipuhan niyatong magpahiling nin mamumuton na pagpadangat bako lang sa satong mga kapamilya kundi pati man sa mga tugang ta sa pagtubod. (Basahon an Roma 12:10.) Ano an mamumuton na pagpadangat? Iyan an pagpadangat na namamatian sa lambang saro kan dayupot na magkakapamilya. Iyan an klase nin pagkamuot na dapat tang ipahiling sa satong espirituwal na pamilya, sa satong Kristiyanong mga tugang. Pag nagpapahiling kita nin mamumuton na pagpadangat, nakakatabang kitang magdanay an pagkasararo  na mahalagang marhay na kabtang kan tunay na pagsamba.—Miq. 2:12.

³ Para magkaigwa nin mamumuton na pagpadangat asin maipahiling iyan, aramon ta kun ano an manunudan ta sa mga halimbawa sa Bibliya.

4. Ano an sinasabi sa sato kan Santiago 5:11 manungod sa pagkamuot sa sato ni Jehova?

⁴ Ihinahayag kan Bibliya an magagayon na kuwalidad ni Jehova. Halimbawa, sinasabi kaiyan na “an Diyos pagkamuot.” (1 Juan 4:8) Sa deskripsiyon pa sanang iyan, gugustuhon ta nang maparani sa saiya. Pero sinasabi man kan Bibliya na si Jehova “mamumuton nanggad.” (Basahon an Santiago 5:11.) Magayunon nanggad na deskripsiyon sa kun gurano kita kanamumutan ni Jehova!

5. Paano si Jehova nagpapahiling nin pagkahirak, asin paano ta siya maaarog?

⁵ Mangnuhon na sa Santiago 5:11 ikinonektar an mamumuton na pagpadangat ni Jehova sa saro pang kuwalidad na nakakaparani sa sato sa saiya—an saiyang pagkahirak. (Ex. 34:6) An sarong paagi na ipinapahiling ni Jehova sa sato an saiyang pagkahirak iyo an pagpapatawad sa mga sala ta. (Sal. 51:1) Sa Bibliya an pagkahirak urog pa sa pagpatawad sana. An pagkahirak sarong makusugon na emosyon na namamatian nin sarong indibidwal pag nahihiling niya an saro na nagsasakit asin napapahiro siya kaiyan na tabangan an tawong iyan. Sinabi ni Jehova na an makusog na pagmawot niyang tabangan kita urog pa kisa sa namamatian nin sarong ina para sa saiyang aki. (Isa. 49:15) Pag nasa kasakitan kita, pinapahiro si Jehova kan pagkahirak niya na tabangan kita. (Sal. 37:39; 1 Cor. 10:13) Makakapahiling kita nin pagkahirak sa satong mga tugang paagi sa pagpatawad sa sainda asin dai paghinanakit pag nakulgan ninda kita. (Efe. 4:32) An saro pang mahalagang paagi na makakapahiling kita nin pagkahirak sa satong mga tugang iyo an pagtabang sa sainda pag napapaatubang sinda sa mga problema. Pag pinapahiro kita nin pagkamuot na magin mahihirakon, inaarog niyato si Jehova, an pinakanangungurog na halimbawa sa pagpahiling nin mamumuton na pagpadangat.—Efe. 5:1.

6. Paano nagpahiling si Jonathan asin David nin mamumuton na pagpadangat sa lambang saro?

⁶ Igwa sa Bibliya nin mga istorya manungod sa bakong perpektong mga tawo na nagpahiling nin mamumuton na pagpadangat. Pag-isipan an halimbawa ni Jonathan asin David. Sinasabi kan Bibliya: “Nagin dayupot na marhay na mag-amigo si Jonathan saka si David, asin namutan siya ni Jonathan nin siring sa saiyang sadiri.” (1 Sam. 18:1, NWT) Si David an linahidan na magin hadi kasunod ni Saul. Pagkatapos kaiyan, nauring marhay si Saul ki David kaya pinurbaran niya ining gadanon. Pero dai sinuportaran kan aki ni Saul na si Jonathan an saiyang ama sa mga pagpurbar kaini na gadanon si David. Nanuga si Jonathan asin David na magdadanay sindang mag-amigo asin pirming susuportaran an lambang saro.—1 Sam. 20:42.

7. Ano an puwede kutang nakaulang ki Jonathan asin David na magin mag-amigo?

⁷ An mamumuton na pagpadangat ni Jonathan asin David lalo nang pambihira kun ikokonsiderar ta an nagkapirang bagay na puwede kutang nakaulang sa sainda na magin mag-amigo. Halimbawa, si Jonathan matua nin mga 30 taon ki David. Puwede kutang naisip ni Jonathan na mayo man sindang pagkakapareho kan mas hoben asin mas bakong eksperyensiyadong si David. Pero, dai minansay ni Jonathan o trinatar si David bilang mas hababa sa saiya.

8. Taano ta sa hiling mo marahayon na amigo si Jonathan ki David?

⁸ Puwede kutang nauri si Jonathan ki David. Bilang aki ni Hading Saul, puwede kutang ininsistir ni Jonathan na siya an dapat na magmana kan trono. (1 Sam. 20:31) Pero mapakumbaba si Jonathan, asin maimbod siya ki Jehova. Kaya lubos niyang sinuportaran an desisyon ni Jehova na si David an sunod na magin hadi. Maimbod man siya ki David, dawa kan magresulta iyan sa grabeng kaanggutan ni Saul.—1 Sam. 20:32-34.

9. Ibinilang daw ni Jonathan na karibal si David? Ipaliwanag.

⁹ May mamumuton na pagpadangat si Jonathan ki David, kaya dai niya ini ibinilang na karibal. Si Jonathan matibay na parapana asin makusog an buot na parapakilaban. Siya asin an saiyang amang si Saul may reputasyon na ‘mas maliksi kisa mga agila’ asin ‘mas makusog kisa mga leon.’ (2 Sam. 1:22, 23, An Marahay na Bareta Biblia) Kaya, puwede kutang ipinaghambog ni Jonathan an pambihirang mga bagay na nagibo niya. Pero, dai nakipagkumpetensiya si Jonathan o nauri ki David. Sa kabaliktaran, naghanga si Jonathan ki David sa kusog nin buot asin pagtitiwala kaini ki Jehova. Sa katunayan, nagpuon na mamutan ni Jonathan si David nin siring sa saiyang sadiri pagkatapos kaining gadanon si Goliat. Paano ta maipapahiling an siring na mamumuton na pagpadangat sa satong mga tugang?

10. Ano an buot sabihon kan ‘kamutan nin udok an lambang saro nin gikan sa puso’?

¹⁰ Sinasabi sa sato kan Bibliya na “kamutan [ta] nin udok an lambang saro nin gikan sa puso.” (1 Ped. 1:22) Nagtao sa sato nin halimbawa si Jehova. Makusugon an pagkamuot niya sa sato na kun maimbod kita sa saiya, mayong makakapasuway sa sato sa saiya. (Roma 8:38, 39) An Griegong tataramon na itrinadusir na “udok” nangangahulugan nin pagmamaigot na marhay. Kun minsan, tibaad kaipuhan tang magmaigot na marhay tanganing makapahiling nin mamumuton na pagpadangat sa sarong kapagtubod. Pag nakukulgan kita kan iba, kaipuhan tang ‘padagos na pagpasensiyahan an lambang saro paagi sa pagkamuot, asin maigot na hinguwahon na mapagdanay an pagkasararong itinatao kan espiritu sa irarom nin katuninungan  na nagbubugkos sa sato.’ (Efe. 4:1-3) Pag naghihinguwa kitang mapagdanay an “katuninungan na nagbubugkos” sa sato, dai kita mapokus sa mga sala na nagigibo kan satong mga tugang. Pagmamaigutan tang mansayon an satong mga tugang nin siring sa pagmansay sa sainda ni Jehova.—1 Sam. 16:7; Sal. 130:3.

11. Taano ta tibaad dipisil kun minsan na magpahiling nin mamumuton na pagpadangat?

¹¹ Bako pirming pasil na magpahiling nin mamumuton na pagpadangat sa satong mga tugang, lalo na pag aram ta an saindang mga kaluyahan. Minalataw na nangyari iyan sa nagkapirang Kristiyano kan inot na siglo. Halimbawa, posibleng marhay na dai nagkaproblema si Eudias asin Sintique kan nagtatrabaho sindang ‘kaibanan ni Pablo para sa maugmang bareta.’ Pero nasasakitan sindang pakiibanan an lambang saro. Kaya sinadol sinda ni Pablo “na maghinguwang magkáuyon an isip bilang mga kasaro kan Kagurangnan.”—Fil. 4:2, 3.

12. Paano kita makakapahiling nin mamumuton na pagpadangat sa satong mga tugang?

¹² Paano kita makakapahiling nin mamumuton na pagpadangat sa satong mga tugang ngunyan? Kun bibistuhon tang marhay an satong mga kapagtubod, tibaad magin mas madali sa sato na masabutan sinda asin makapahiling sainda nin mamumuton na pagpadangat. Bakong ulang an edad asin pinaghalian. Girumdumon na mas matua nin mga 30 taon si Jonathan ki David, pero nagin dayupot sindang mag-amigo. Puwede mo daw na amiguhon an saro na mas matua o mas hoben sa saimo? Sa paggibo mo kaiyan, maipapahiling mo na igwa ka nin “pagkamuot sa bilog na kasararuan nin magturugang.”—1 Ped. 2:17.

13. Taano ta tibaad bakong pantay-pantay an pagkadayupot niyato sa gabos sa kongregasyon?

¹³ An pagkaigwa daw nin mamumuton na pagpadangat sa mga kapagtubod nangangahulugan na magigin pantay-pantay man an pagkadayupot niyato sa gabos sa kongregasyon? Dai, bakong realistiko iyan. Normal sana na magin mas dayupot ka sa nagkapira huling kapareho mo sinda nin interes. Inapod ni Jesus an gabos niyang apostol na “mga amigo,” pero espesyal an pagpadangat niya ki Juan. (Juan 13:23; 15:15; 20:2) Dawa arog kaiyan, dai nagpahiling nin paboritismo si Jesus. Halimbawa, kan  maghagad si Juan asin an tugang niyang si Santiago nin prominenteng posisyon sa Kahadian nin Diyos, sinabi ni Jesus sa sainda: “An pagtukaw sa sakuyang tuo o sa sakuyang wala bako kong desisyon.” (Mar. 10:35-40) Arog ni Jesus, dai kita dapat magpahiling nin paboritismo. (Sant. 2:3, 4) Huling an paboritismo makawsa nin pagkabaranga—sarong bagay na dai nanggad dapat mangyari sa Kristiyanong kongregasyon.—Jud. 17-19.

14. Sigun sa Filipos 2:3, ano an makakatabang sa sato na dai magkaigwa nin espiritu nin pakikipagkumpetensiya?

¹⁴ Pag nagpapahiling kita nin mamumuton na pagpadangat sa lambang saro, pinoprotektaran ta an kongregasyon laban sa espiritu nin pakikipagkumpetensiya. Girumdumon na dai nakipagkumpetensiya si Jonathan ki David, asin dai niya ini ibinilang na karibal sa trono. Arugon niyato si Jonathan. Dai ta ibilang na karibal an satong mga kapwa trabahador huli sa saindang mga kakayahan, “kundi may kapakumbabaan [na] ibilang an iba na mas urog kisa” sato. (Basahon an Filipos 2:3.) Isaisip na may maikokontribwir an lambang saro sa laog kan kongregasyon. Kun magdadanay kitang mapakumbaba, hihilingon ta an marahay sa satong mga tugang asin makikinabang kita sa halimbawa ninda nin kaimbudan.—1 Cor. 12:21-25.

15. Ano an manunudan mo sa eksperyensiya ni Tanya asin kan pamilya niya?

¹⁵ Pag napapaatubang kita sa dai inaasahan na mga problema, rinaranga kita ni Jehova paagi sa mamumuton na pagpadangat asin praktikal na tabang na itinatao sato kan satong mga tugang. Pag-isipan an nangyari sa sarong pamilya pagkatapos mag-atender sa pan-Sabadong programa kan saro sa 2019 “An Pagkamuot Dai Nuarin Man Mawawara”! na Internasyonal na mga Kumbensiyon sa Estados Unidos.  Sinabi ni Tanya, na ina na may tulong aki: “Papuli na kami kaidto sa hotel kan may sasakyan na nawaran nin kontrol asin nagsuki sa linya mi tapos binangga kami. Mayo man samong naano, pero nagluwas kami sa awto asin nagtindog sa tinampo na namumungnan. May sarong lalaki sa gilid kan tinampo na pinapaypay kami na maglaog sa awto niya. Saro siya sa mga tugang na kakahali pa man lang sa kumbensiyon. Asin bako lang siya an nagpundo. Limang delegado na taga Sweden an nagpundo man. Ako saka an aki kong babayi kinugos nin higot kan mga sister, na talagang kaipuhan ming marhay kaidto! Sinabi ko sainda na okey lang kami, pero dai pa man giraray ninda kami binayaan. Inibanan ninda kami dawa kan yaon na an mga paramedic, asin sinigurado ninda na igwa kami kan gabos na kaipuhan mi. Sa bilog na panahon na idto, namatian mi an pagkamuot ni Jehova. Napakusog kan eksperyensiyang ini an pagkamuot mi sa mga tugang, saka napararom an pagkamuot asin pagpapahalaga mi ki Jehova.” May panahon daw kaidto na nangangaipo ka tapos pinahilingan ka nin mamumuton na pagpadangat nin sarong kapagtubod?

16. Taano ta dapat kitang magpahiling nin mamumuton na pagpadangat sa lambang saro?

¹⁶ Isipa an magayon na mga resulta pag nagpapahiling kita nin mamumuton na pagpadangat sa lambang saro. Nararanga ta an satong mga tugang pag may problema sinda. Napapakusog ta an pagkasararo kan mga lingkod nin Diyos. Pinapatunayan tang mga disipulo kita ni Jesus, asin nadadagka kaiyan sa tunay na pagsamba an mga tawong sadiyosan an puso. Urog sa gabos, napapamuraway ta “an Ama nin mamumuton na pagkahirak asin an Diyos nin gabos na karangahan,” si Jehova. (2 Cor. 1:3) Lugod na gabos kita padagos na magkaigwa nin mamumuton na pagpadangat asin ipahiling iyan!