1. Kai buktina maka enggo kurang kel kekelengen i bas melala keluarga?

IKATAKEN Pustaka maka bas wari-wari pendungi enggo kurang kel ‘kekelengen’ man anggota keluarga. (2 Tim. 3:1, 3) Enggo siidah nubuat enda terjadi gundari. Contohna, melala kalak si enggo erjabu cerai. Erkiteken si e, enggo ceda hubungen kalak e, janah dungna lanai iakap anakna ia ikelengi. Selain si e, keluarga si tading sada rumah pe lanai rembak. Contohna, nina sekalak penasehat bas keluarga, “Orang tua ras anak-anak lanai lit waktuna ngerana-ngerana perban buen waktu kalak e nggunaken komputer, tablet, ntah pe main game. Aminna pe keluarga-keluarga enda tading sada rumah, lanai kalak e ermediate sada ras si debanna.”

2-3. (a) Menurut Roma 12:10, ise saja si arus sikelengi bali bagi engkelengi keluargata sendiri? (b) Kai kari sibahas bas artikel enda?

² La ateta bali bagi kalak si lit bas doni enda si la lit kekelengenna. (Rom. 12:2) Tapi, siusahaken ateta mpebelin kekelengenta man anggota keluargata bage pe man turang seninata bas runggun. (Baca Roma 12:10.) Janah turang seninata e pe perlu ka sikelengi bali bagi engkelengi keluargata sendiri. Adi bage siban, ikut kita njaga persadan bas runggun. Janah kita kerina banci ngelayani Jahwe alu ermeriah ukur.​—Mi. 2:12.

³ Gelah banci sicidahken kekelengen si bage, mari sibahas kai si banci sipelajari arah contoh si lit bas Pustaka.

4. Kai si ikataken Jakup 5:11?

⁴ Ikataken bas Pustaka maka melala kel sipat-sipat Jahwe si mehuli. Contohna, ikataken maka “Dibata e kekelengen.” (1 Joh. 4:8) Sanga sipelajari kerna Jahwe, merhat kel kita jadi temanNa. Tapi, ikataken Pustaka ka maka “lembut kel kekelengen Jahwe.” (Baca Jakup 5:11.) Arah kata-kata enda teridah maka keleng kel ate Jahwe kita.

5. Kai buktina Jahwe perkuah janah uga kita banci ngusih Ia?

⁵ Bas Jakup 5:11 ikataken maka Jahwe dem kekelengen. Bas ayat e pe ikataken ka kerna sipat Jahwe si deban si erbanca kita merhat rembak ras Ia, eme perkuah ate. (Kel. 34:6) Salah sada cara Jahwe mbuktiken Ia perkuah eme alu ngampuni kesalahenta. (Ms. 51:1) Bas Pustaka ikataken maka kalak si perkuah labo ngenca nggit ngampuni. Tapi, adi idahna kalak ngenanami kiniseran, mbelin kel sura-surana nampati kalak e. Jahwe pe mbelin kel sura-suraNa nampati kita, belinen asangken sura-sura sekalak nande nampati anakna. (Jes. 49:15) Sanga idah Jahwe kita ngenanami kiniseran, sipatNa si perkuah erban tersuruh ukurNa guna nampati kita. (Ms. 37:39; 1 Kor. 10:13) Banci sicidahken sipat si perkuah man turang seninata alu ngampuni kalak e janah la terus ateta nembeh man bana sanga kitik banna ukurta. (Ep. 4:32) Cara si deban banci sicidahken sipat si perkuah eme alu nampati turang seninata sanga ngadapi masalah. Sanga tersuruh ukurta ncidahken sipat si perkuah man kalak si deban, e ertina enggo siusih Jahwe si enggo ncidahken kekelengen belinen asangken ise pe.​—Ep. 5:1.

6. Uga Jonatan ras Daud sikeleng-kelengen bagi engkelengi keluarga sendiri?

⁶ I bas Pustaka lit ituriken kerna manusia si la sempurna si engkelengi kalak si deban bagi engkelengi keluargana  sendiri. Cuba ukuri usihen si ibereken Jonatan ras Daud. Nina Pustaka, “Daud jadi teman Jonatan, kompak kel kalak e. Mulai keleng ate Jonatan man Daud bagi ia engkelengi dirina.” (1 Sam. 18:1) Ipilih Jahwe Daud nggantiken Raja Saul. Meteh si e, cian kel ate Saul ngidah Daud janah iusahakenna munuh Daud. Tapi, Jonatan anak Saul la nggit nampati bapakna munuh Daud perban enggo erjanji kalak e gelah terus erteman janah lalap sisampat-sampaten.​—1 Sam. 20:42.

7. Kai salah sada si banci erban Jonatan ras Daud la erteman?

⁷ Luar biasa kel kekelengen antara Jonatan ras Daud. Aminna pe lit tentangen si banci erban kalak e la erteman, tapi tetap kalak e erteman. Misalna, lit lebih 30 tahun tuan Jonatan asangken Daud. Banci saja la kapna cocok erteman ras kalak si ndauh ngudan asangken ia janah la ka erpengalamen. Tapi la bage cara rukur Jonatan, iergaina kel Daud.

8. Adi menurutndu, engkai maka Jonatan e teman si seh kel ulina man Daud?

⁸ Situhuna banci saja cian ate Jonatan man Daud. Selaku anak Raja Saul, lit hak Jonatan nuntut maka ia si nggantiken bapakna jadi raja. (1 Sam. 20:31) Tapi, perban Jonatan meteruk ukur janah setia man Jahwe, idukungna kel raja si ipilih Jahwe eme Daud. Selain si e, setia ka ia man Daud aminna pe merawa kel bapakna man bana.​—1 Sam. 20:32-34.

9. Ja nari siteh maka la ianggap Jonatan Daud jadi saingenna? Jelasken.

⁹ Keleng kel ate Jonatan man Daud, emaka la pernah ianggapna Daud e saingenna. Jonatan eme kalak si perpang, rusur erperang, janah beluh kel nggunaken busur ras panah. Ikataken kalak ia ras bapakna Saul ‘teren asangken kuliki’ janah “gegehen asangken singa.” (2 Sam. 1:22, 23) Emaka kerina e banci saja erban Jonatan jadi sombong. Tapi, la pernah iusahaken Jonatan gelah hebaten ia asangken Daud ntah pe cian atena ngidah kai si ilakoken Daud. Sebalikna, ipuji Jonatan Daud perban ia kalak si perpang janah lalap ngandalken Jahwe. Mulai keleng ate Jonatan man Daud kenca italuken Daud Goliat. Uga kita banci engkelengi turang seninata bali bagi Jonatan engkelengi Daud?

10. Kai ertina “tuhu-tuhulah kena sikeleng-kelengen arah pusuh nari”?

¹⁰ Ikataken Pustaka man banta, “Tuhu-tuhulah kena sikeleng-kelengen arah pusuh nari.” (1 Pet. 1:22) Ibereken Jahwe usihen man banta kerna si e. Keleng kel ateNa kita janah la pernah Ia ngadi engkelengi kita adi terus kita setia man baNa. (Rom. 8:38, 39) Kata engkelengi banci ka maksudna lit usaha si mbelin guna engkelengi. Mon-mon, banci saja mesera siakap engkelengi turang seninata. Perban keleng ateta kalak e, sanga kitik banna ukurta arus kita ‘sabar man sada ras si debanna, siusahaken njaga persadan si ibereken kesah si badia, janah nggeluh alu dame.’ (Ep. 4:1-3) Adi siusahaken ‘erdame’ ras turang seninata, la siinget-inget kesalahenna. Siusahaken asa ngasupta gelah perukurenta man turang seninata bali bagi perukuren Jahwe man kalak e.​—1 Sam. 16:7; Ms. 130:3.

11. Engkai maka mon-mon mesera siakap engkelengi turang seninata?

¹¹ Labo lalap menukah engkelengi turang  seninata bali bagi engkelengi keluargata sendiri, khususna sanga iban kalak e kesalahen. Banci saja enda me si terjadi man piga-piga kalak Kristen bas abad pertama. Contohna, cuba perdiateken kai si terjadi man Eiodia ras Sintike. Kalak e banci kerja sama ras Paulus sanga “mberitaken berita si meriah.” Tapi, banci saja duana kalak e la sicocoken. Emaka, iiahken Paulus kalak e gelah ‘seperukuren i bas ngelayani Tuhan.’​—Pil. 4:2, 3.

12. Uga carana gelah banci sikelengi turang seninata bali bagi engkelengi keluargata sendiri?

¹² Uga carana gelah banci sikelengi turang seninata bagi engkelengi keluargata sendiri? Adi reh bagesna sitandai kalak e banci saja reh nukahna siakap ngangkai kalak e janah reh belinna me kekelengenta man kalak e. Aminna pe kalak e tuan ntah pe ngudan, ntah beda budayana ras kita, banci kita erteman ras kalak e. Ingetlah kerna Jonatan ras Daud. Lit kira-kira 30 tahun bedana umur Jonatan ras Daud, tapi banci kalak e tetap kompak. Lit nge turang senina bas runggunndu si tuan ntah pe si ngudan asangken kam si banci jadi temanndu? Adi nggit kam erteman ras kalak e, ibuktikenndu me maka ‘keleng atendu temanndu sada kiniteken.’​—1 Pet. 2:17.

13. Engkai maka lebih kompak kita ras piga-piga kalak asangken ras kalak si deban?

¹³ Payo nge maksudna engkelengi turang senina bagi engkelengi keluarga sendiri arus kompak ras kalak e kerina? Lang, e la mungkin. Biasana lebih kompak kita ras kalak si lit perserina ras kita janah e wajar. Jesus pe lebih kompak ras Johanes asangken ras rasul-rasulna si deban aminna pe kerina rasul-rasulna e ikatakenna ‘temanna.’ (Joh. 13:23; 15:15; 20:2) Tapi, labo ulin perbahanen Jesus man Johanes asangken man rasul-rasulna si deban. Contohna, sanga ipindo Johanes ras seninana Jakup gelah ibereken man kalak e ingan si penting bas Kerajan Dibata, nina Jesus, “Kerna  ise si kundul arah kanan ras arah kiriku, labo aku si nentukenca.” (Mrk. 10:35-40) Bagi Jesus, ula ulin perbahanenta man teman kompakta asangken man kalak si deban. (Jak. 2:3, 4) Adi ulin perbahanenta man teman kompakta banci kari siban runggun lanai erdame.​—Jud. 17-19.

14. Menurut Pilipi 2:3, kai si banci nampati kita gelah la siakap turang seninata jadi saingen?

¹⁴ Adi sikelengi turang seninata bali bagi engkelengi keluargata sendiri, la kita nggit ersaing ras kalak e. Ingetlah kerna Jonatan, la atena cian ngidah Daud. La iakap Jonatan maka Daud e saingenna, janah la iusahakenna gelah ia si jadi raja. Kerina kita banci ngusih Jonatan. Ula cian ateta turang seninata perban kengasupenna, tapi ‘alu meteruk ukur sianggaplah ia ganjangen asangken kita.’ (Baca Pilipi 2:3.) Ingetlah, maka tiap kalak erguna man runggun. Adi tetap kita meteruk ukur, banci siidah sipat-sipat si mehuli arah turang seninata janah banci siusih kesetianna.​—1 Kor. 12:21-25.

15. Kai si banci ipelajarindu arah pengalamen Tanya ras keluargana?

¹⁵ Sanga siadapi situasi si la mehuli, iapuli Jahwe kita arah kekelengen ras penampat si ibereken turang seninata. Cuba ukuri kai si terjadi man sada keluarga si telu anakna si reh ku Kebaktin Internasional “Kekelengen e La Erkeri-kerin”! i Amerika Serikat bas tahun 2019. Kenca dung acara hari Sabtu, mulih kalak e ku hotel. I bas perdalanen, rempet motor kalak e itabrak motor si deban.  Nina orang tua arah keluarga e si gelarna Tanya, “Labo lit kami si luka tapi sengget kel kami, ndarat kami arah motor nari janah cinder kami bas dalan. Lit sekalak si ngelebuh kami ku motorna gelah banci aman iakap kami, kepeken ia turang seninata si edenga mulih kebaktin. Tapi, labo ia ngenca si ngadi, lima turang seninata arah Swedia pe ngadi ka i je. Idakep kalak e aku ras anakku si diberu, e erbanca reh tenangna iakap kami. Kukataken man turang senina e maka labo kami kaden pe, janah suruh kami kalak e mulih. Tapi la kalak e nggit nadingken kami. Terus kalak e ras kami seh asa reh penampat arah rumah sakit, janah ipastiken kalak e la kami kurang kai pe. Bas situasi si bage igejapken kami kel kekelengen Jahwe. Pengalamen e erban reh kelengna ate kami turang senina kami janah mpebelin kekelengen ras pengergan kami man Jahwe.” Banci nge ingetndu mulihi sanga isampati turang seninandu kam, si jadi bukti maka keleng kel atena kam?

16. Kai saja alasenna maka arus kita sikeleng-kelengen?

¹⁶ Cuba ukuri kai hasilna adi kita sikeleng-kelengen bali bagi engkelengi keluargata sendiri. Banci siapuli turang seninata sanga kalak e ngadapi masalah. Banci sijaga persadan bas runggun. Banci sibuktiken kita murid Jesus, janah enda banci erban kalak si bujur nggit ngelayani Jahwe. Si pentingna, banci simuliaken “Bapakta si perkuah ras lembut, bage pe Dibata sumber kerina pengapul” eme Jahwe. (2 Kor. 1:3) Mbera siusahaken asa ngasupta gelah terus sikeleng-kelengen janah mpebelin kekelengenta!